Қаржы ұйымдарының, банк, сақтандыру холдингтерінің, "Сақтандыру төлемдеріне кепілдік беру қоры" акционерлік қоғамының басшы қызметкерлерін тағайындауға (сайлауға) келісім беру қағидаларын және келісім алу үшін қажетті құжаттардың тізбесін бекіту туралы

      "Қазақстан Республикасындағы банктер және банк қызметі туралы" 1995 жылғы 31 тамыздағы, "Сақтандыру қызметі туралы" 2000 жылғы 18 желтоқсандағы, "Сақтандыру төлемдеріне кепілдік беру қоры туралы" 2003 жылғы 3 маусымдағы, "Бағалы қағаздар рыногы туралы" 2003 жылғы 2 шілдедегі, "Қазақстан Республикасында зейнетақымен қамсыздандыру туралы" 2013 жылғы 21 маусымдағы Қазақстан Республикасының заңдарына сәйкес Қазақстан Республикасы Ұлттық Банкінің Басқармасы ҚАУЛЫ ЕТЕДІ:

      1. Қоса беріліп отырған Қаржы ұйымдарының, банк, сақтандыру холдингтерінің, "Сақтандыру төлемдеріне кепілдік беру қоры" акционерлік қоғамының басшы қызметкерлерін тағайындауға (сайлауға) келісім беру қағидалары және келісім алу үшін қажетті құжаттардың тізбесі бекітілсін.

      2. Осы қаулыға қосымшаға сәйкес тізбе бойынша Қазақстан Республикасының нормативтік құқықтық актілерінің, сондай-ақ Қазақстан Республикасының кейбір нормативтік құқықтық актілерінің құрылымдық бөліктерінің күші жойылды деп танылсын.

      3. Сақтандыруды қадағалау департаменті (Құрманов Ж.Б.) Қазақстан Республикасының заңнамасында белгіленген тәртіппен:

      1) Заң департаментімен (Сәрсенова Н.В.) бірлесіп осы қаулыны Қазақстан Республикасының Әділет министрлігінде мемлекеттік тіркеуді;

      2) осы қаулыны "Қазақстан Республикасы Әділет министрлігінің Республикалық құқықтық ақпарат орталығы" шаруашылық жүргізу құқығындағы республикалық мемлекеттік кәсіпорнына Қазақстан Республикасының Әділет министрлігінде мемлекеттік тіркелген күннен бастап күнтізбелік он күн ішінде Қазақстан Республикасы нормативтік құқықтық актілерінің мемлекеттік тізіліміне, Қазақстан Республикасы нормативтік құқықтық актілерінің эталондық бақылау банкіне енгізуге жіберуді;

      3) осы қаулы ресми жарияланғаннан кейін оны Қазақстан Республикасы Ұлттық Банкінің ресми интернет-ресурсына орналастыруды қамтамасыз етсін.

      4. Қаржылық қызметтерді тұтынушылардың құқықтарын қорғау және сыртқы коммуникациялар басқармасы (Терентьев А.Л.) осы қаулыны Қазақстан Республикасының Әділет министрлігінде мемлекеттік тіркелгеннен кейін күнтізбелік он күн ішінде мерзімді баспасөз басылымдарында ресми жариялауға жіберуді қамтамасыз етсін.

      5. Осы қаулының орындалуын бақылау Қазақстан Республикасының Ұлттық Банкі Төрағасының орынбасары О. А. Смоляковқа жүктелсін.

      6. Осы қаулы алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Қаржы ұйымдарының, банк, сақтандыру холдингтерінің, "Сақтандыру төлемдеріне кепілдік беру қоры" акционерлік қоғамының басшы қызметкерлерін тағайындауға (сайлауға) келісім беру қағидалары және келісім алу үшін қажетті құжаттар тізбесі

1-тарау. Жалпы ережелер

      1. Осы Қаржы ұйымдарының, банк, сақтандыру холдингтерінің "Сақтандыру төлемдеріне кепілдік беру қоры" акционерлік қоғамының басшы қызметкерлерін тағайындауға (сайлауға) келісім беру қағидалары және келісім алу үшін қажетті құжаттар тізбесі (бұдан әрі - Қағидалар) "Қазақстан Республикасындағы банктер және банк қызметі туралы" 1995 жылғы 31 тамыздағы (бұдан әрі - Банктер туралы заң), "Сақтандыру қызметі туралы" 2000 жылғы 18 желтоқсандағы (бұдан әрі - Сақтандыру қызметі туралы заң), "Сақтандыру төлемдеріне кепілдік беру қоры туралы" 2003 жылғы 3 маусымдағы (бұдан әрі - Кепілдік беру қоры туралы заң), "Бағалы қағаздар рыногы туралы" 2003 жылғы 2 шілдедегі (Бағалы қағаздар нарығы туралы заң), "Қаржы нарығы мен қаржы ұйымдарын мемлекеттік реттеу, бақылау және қадағалау туралы" 2003 жылғы 4 шілдедегі, "Қазақстан Республикасындағы зейнетақымен қамсыздандыру туралы" 2013 жылғы 21 маусымдағы (бұдан әрі - Зейнетақымен қамсыздандыру туралы заң) Қазақстан Республикасының заңдарына сәйкес әзірленген.

      Қағидалар қаржы нарығын және қаржы ұйымдарын реттеу, бақылау мен қадағалау жөніндегі уәкілетті органның (бұдан әрі - уәкілетті орган) банктердің, сақтандыру (қайта сақтандыру) ұйымдарының, сақтандыру брокерлерінің, бірыңғай жинақтаушы зейнетақы қорының, ерікті жинақтаушы зейнетақы қорларының, бағалы қағаздар нарығында қызметті жүзеге асыру үшін лицензия алуға үміттенген немесе лицензиялары бар заңды тұлғалардың, орталық депозитарий мен бірыңғай тіркеушінің (бұдан әрі - қаржы ұйымы), банк, сақтандыру холдингтерінің (бұдан әрі - холдинг) "Сақтандыру төлемдеріне кепілдік беру қоры" акционерлік қоғамының (бұдан әрі - Қоры) басшы қызметкерлерін тағайындауға (сайлауға) келісім беру тәртібін және келісім алу үшін қажетті құжаттар тізбесін анықтайды.

      2. Уәкілетті орган Банктер туралы заңның 20-бабында, Сақтандыру қызметі туралы заңның 34-бабында, "Акционерлік қоғамдар туралы" 2003 жылғы 13 мамырдағы Қазақстан Республикасының Заңның (бұдан әрі - Акционерлік қоғамдар туралы заң) 1-бабының 20)-тармақшасында, 54-бабының 4-тармағында, 59-бабының 2-тармағында, Бағалы қағаздар нарығы туралы заңның 54-бабында, "Бухгалтерлік есеп пен қаржылық есептілік туралы" 2007 жылғы 28 ақпандағы Қазақстан Республикасының Заңның (бұдан әрі - Бухгалтерлік есеп туралы заң) 9-бабында, Зейнетақымен қамсыздандыру туралы заңның 55-бабында, Кепілдік беру қоры туралы заңның 4-1-бабында және Қағидаларда белгіленген талаптарға сәйкес келетін қаржы ұйымының, холдингтің, Қордың басшы қызметкерінің лауазымына кандидатты (бұдан әрі - кандидат) тағайындауға (сайлауға) келісім береді.

      Уәкілетті органмен келісуге жататын қаржы ұйымдарының, холдингтердің, Қордың басшы қызметкерлерінің тізбесі Банктер туралы заңның 20-бабының 1 және 14-тармақтарында, Сақтандыру қызметі туралы заңның 34-бабының 1 және 14-тармақтарында, Бағалы қағаздар нарығы туралы заңның 54-бабының 1-тармағында, 64-1-бабының 3-тармағында және 79-бабының 1-1-тармағында, Зейнетақымен қамсыздандыру туралы заңның 55-бабының 1-тармағында, Кепілдік беру қоры туралы заңның 4-1-бабының 1-тармағында көзделген.

      3. Қаржы ұйымдары, холдингтер, Қор басшы қызметкерлер тағайындалған (сайланған), басқа лауазымға ауысқан немесе жұмыстан босатылған (өкілеттіліктері тоқтатылған) күннен бастап күнтізбелік 10 (он) күн ішінде олардың құрамындағы болған барлық өзгерістер туралы уәкілетті органды хабардар етеді. Басшы қызметкерлер құрамының өзгеруі туралы мәлімет растайтын құжаттардың көшірмесін қоса бере отырып, Қағидаларға 1-қосымшаға сәйкес нысан бойынша жіберіледі.

      Осы кандидат уәкілетті органмен осы қаржы ұйымының, осы холдингтің немесе Қордың тиісті лауазымына бұрын келісілген не келісілген лауазымнан осы қаржы ұйымының, холдингтің немесе Қордың бір органы шеңберінде төменгі лауазымға ауысқан жағдайда және осы кандидат Банктер туралы заңның 20-бабында, Сақтандыру қызметі туралы заңның 34-бабында, Акционерлік қоғамдар туралы заңның 1-бабының 20) тармақшасында, 54-бабының 4-тармағында, 59-бабының 2-тармағында, Бағалы қағаздар нарығы туралы заңның 54-бабында, Бухгалтерлік есеп туралы заңның 9-бабында, Зейнетақымен қамсыздандыру туралы заңның 55-бабында, Кепілдік беру қоры туралы заңның 4-1-бабында және Қағидаларда белгіленген талаптарға сәйкес келген жағдайда қаржы ұйымының, холдингтің, Қордың уәкілетті органының шешімімен жаңа мерзімге тағайындалған (сайланған) қаржы ұйымының, холдингтің, Қордың басшы қызметкері келісілуге жатпайды.

      Бұл жағдайда қаржы ұйымы, холдинг, Қор басшы қызметкердің жаңа мерзімге тағайындалған (сайланған) не оның басқа лауазымға ауысқан күнінен бастап күнтізбелік 10 (он) күн ішінде осы кандидаттың осы тармақтың екінші бөлігінде көрсетілген Қазақстан Республикасының нормативтік құқықтық актілерінде белгіленген талаптарға сәйкес келуі көрсетілетін ілеспе хатпен, басшы қызметкерді тиісті лауазымға тағайындау (сайлау) туралы осы қаржы ұйымының, осы холдингтің немесе Қордың уәкілетті органының шешімінен үзінді-көшірменің көшірмесін ұсынады. Өзге құжаттарды ұсыну талап етілмейді.

      Қаржы ұйымының, Қордың басқару органының құрамына кіретін уәкілетті органның өкілі уәкілетті органмен келісуге жатпайды.

      4. Банктер туралы заңның 20-бабына, Сақтандыру қызметі туралы заңның 34-бабына, Бағалы қағаздар рыногы туралы заңның 54-бабына, Зейнетақымен қамсыздандыру туралы заңның 55-бабына, Кепілдік беру қоры туралы заңның 4-1-бабына сәйкес кандидатты тағайындау (сайлау) үшін кандидаттың халықаралық қаржы ұйымдарындағы жұмыс стажына мынадай халықаралық қаржы ұйымдарындағы жұмысы кіреді:

      Азия Даму Банкі;

      Азия Инфрақұрылымдық Инвестициялар Банкі;

      Америкааралық Даму Банкі;

      Африка Даму Банкі;

      Дүниежүзілік Банк;

      Дүниежүзілік сауда ұйымы;

      Еуразия даму банкі;

      Еуропа Инвестициялық Банкі;

      Еуропа Қайта құру және Даму Банкі;

      Еуропалық бағалы қағаздар және нарықтар ұйымы;

      Еуропалық банк ұйымы;

      Еуропалық банк федерациясы;

      Еуропалық Кеңестің Даму Банкі;

      Еуропалық сақтандыру және зейнетақымен қамсыздандыру ұйымы;

      Инвестициялар Кепілдігінің Көпжақты Агенттігі;

      Инвестициялық Дауларды Реттеу жөніндегі Халықаралық Орталық;

      Ислам Даму Банкі;

      Исламдық қаржылық қызметтер кеңесі;

      Сақтандыруды қадағалаудың халықаралық қауымдастығы;

      Солтүстік инвестициялық банк;

      Халықаралық бағалы қағаздар комиссиясы;

      Халықаралық Валюта Қоры;

      Халықаралық Даму Қауымдастығы;

      Халықаралық депозиттерді сақтандыру жүйелері қауымдастығы;

      Халықаралық есеп айырысу банкі;

      Халықаралық зейнетақы қадағалау органдары ұйымы;

      Халықаралық Қайта құру және Даму Банкі;

      Халықаралық Қаржы Корпорациясы;

      Экономикалық ынтымақтастық және даму ұйымы.

2-тарау. Құжаттарды қарау тәртібі

      5. Қаржы ұйымы, холдинг, Қор кандидаттарды келісуге уәкілетті органға мынадай құжаттарды ұсынады:

      1) кандидаттың қаржы ұйымының, холдингтің, Қордың басшы қызметкерлеріне қойылатын талаптарға сәйкес келуі жөнінде, сондай-ақ кандидат туралы мәліметтерді қаржы ұйымы, холдинг, Қор құжаттамалық жағынан тексергені жөнінде көрсетіле отырып, еркін нысанда жасалған және мыналар қол қойған өтінішхат:

      атқарушы органның басшысы (атқарушы органның функцияларын жеке жүзеге асыратын тұлғаны), атқарушы органның басшысы болып табылатын басқару органының мүшесі тағайындалған (сайланған) кезде - қаржы ұйымының, холдингтің, Қордың басқару органының басшысы, ал ол болмаған жағдайда басқару органының шешімі бойынша басқару органы мүшелерінің бірі (басқару органының осы шешімінің көшірмесін бере отырып), басқару органының басшысы және мүшелері болмаған жағдайда қаржы ұйымы, холдинг, Қор акционерлерінің бірі, осы құжатқа қол қоюға уәкілетті қаржы ұйымы, холдинг қатысушыларының бірі (жауапкершілігі шектеулі серіктестіктің ұйымдық-құқықтық нысанында құрылған қаржы ұйымы, холдинг үшін);

      басқа жағдайларда - қаржы ұйымының, холдингтің, Қордың атқарушы органының басшысы (атқарушы органның функцияларын жеке жүзеге асыратын тұлға) не оның міндетін атқарушы тұлға (міндеттерді атқару жүктелгені туралы шешімнің көшірмесін бере отырып);

      2) Банктер туралы заңның 20-бабында, Сақтандыру қызметі туралы заңның 34-бабында, Бағалы қағаздар нарығы туралы заңның 54-бабында, Зейнетақымен қамсыздандыру туралы заңның 55-бабында белгіленген талаптарға сәйкес келетін қаржы ұйымының, холдингтің, Қордың атқарушы органының мүшесі лауазымына не қаржы ұйымының, холдингтің өзге басшысы лауазымына кандидаттың мыналар қамтылатын лауазымдық нұсқаулығының көшірмесі:

      осы кандидаттың өкілеттігі (тегі, аты, әкесінің аты (бар болса), лауазымы, лауазымдық нұсқаулықпен танысқаны туралы оның қойған қолы және күні көрсетіле отырып);

      осы кандидат жетекшілік ететін құрылымдық бөлімшенің (бөлімшелердің) атауы туралы мәліметтер және оның (олардың) құзыретіне жататын мәселелер тізбесі;

      өз функцияларын жүзеге асыру кезіндегі жауапкершілігі.

      Қаржы ұйымының, холдингтің өзге басшы қызметкер лауазымына кандидаттың лауазымдық нұсқаулықта қол қоятын құжаттардың тізбесі болмаған жағдайда, кандидатқа құжаттарға қол қою құқығы берілетін басқа құжаттың көшірмесі ұсынылады;

      3) егер қаржы ұйымының, холдингтің, Қордың атқарушы органының мүшесі лауазымына кандидат өзге ұйымда жұмыс істеген жағдайда - акционерлік қоғамның ұйымдық-құқықтық нысанында құрылған осы қаржы ұйымының, осы холдингтің немесе Қордың басқару органының кандидатқа өзге ұйымда жұмыс істеуге келісім беру туралы шешімінен үзінді-көшірме;

      4) егер кандидат акционерлік қоғамның атқарушы органының мүшесі болып табылатын жағдайда - осы акционерлік қоғамның басқару органының кандидатқа қаржы ұйымында, холдингте, Қорда жұмыс істеуге келісім беру туралы шешімінен үзінді-көшірме;

      5) кандидатты тағайындау (сайлау) күнін көрсете отырып, қаржы ұйымының, холдингтің, Қордың уәкілетті органының шешімінен үзінді-көшірме не кандидатты тағайындау туралы бұйрықтың көшірмесі.

      Егер тағайындау (сайлау) күні болмаса, онда қаржы ұйымының, холдингтің, Қордың уәкілетті органы шешім (бұйрық) қабылдаған күн не шешімде (бұйрықта) көрсетілген оқиғаның басталған күні кандидатты тағайындау (сайлау) күні болып саналады.

      Шешімде (бұйрықта) көрсетілген оқиға басталған жағдайда, қаржы ұйымы, холдинг, Қор растайтын құжаттардың көшірмелерін ұсынады.

      Қаржы ұйымының, холдингтің, Қордың уәкілетті органының шешімінен үзінді-көшірмеде мынадай мәліметтер қамтылады:

      қаржы ұйымының, холдингтің, Қордың толық атауы және қаржы ұйымының, холдингтің, Қордың атқарушы органының орналасқан жері;

      акционерлердің жалпы жиналысын (басқару органының отырысын) өткізу күні, уақыты мен орны;

      отырысқа қатысқан тұлғалар туралы мәліметтер (басқару органының отырысы үшін);

      акционерлердің жалпы жиналысының (басқару органы отырысының) кворумы;

      кандидатты басшы лауазымына тағайындау (сайлау) туралы мәселе бөлігінде акционерлердің жалпы жиналысы отырысының (басқару органы отырысының) күн тәртібі;

      дауыс беруге қойылған мәселелер, кандидатты басшы лауазымына тағайындау (сайлау) бөлігінде олар бойынша дауыс беру қорытындылары;

      кандидатты басшы лауазымына тағайындау (сайлау) бөлігінде қабылданған шешімдер.

      Қаржы ұйымының, холдингтің, Қордың уәкілетті органының шешімінен үзінді-көшірме осындай құжатқа қол қоюға уәкілетті қызметкердің (қызметкерлердің) қолымен және қаржы ұйымы, холдинг, Қор мөрінің бедерімен (бар болса) расталады және үзінді-көшірменің дұрыс екеніне нұсқауды қамтиды;

      6) Қағидаларға 2-қосымшаға сәйкес электрондық және қағаз тасымалдағыштарда (2-қосымшадағы түрлі-түсті фотосурет көлемі 3х4, ашық аяда орындалады) басшы қызметкері лауазымына кандидат туралы мәліметтер;

      7) Қағидалардың 6-тармағының 4) тармақшасында көзделген жағдайда білім және ғылым саласындағы Қазақстан Республикасының заңнамасында белгіленген тәртіппен ғылыми дәреже алғанын растайтын құжаттың көшірмесі;

      Азаматтық еліндегі (шетелдіктер үшін) немесе тұрақты тұратын еліндегі (азаматтығы жоқ тұлғалар үшін) ғылыми дәреже алғанын растау мақсатында шетелдіктер (азаматтығы жоқ тұлғалар) уәкілетті органға олардың азаматтық елінің (азаматтығы жоқ тұлғалар үшін - олардың тұрақты тұратын елінің) мемлекеттік органы берген тиісті құжатты ұсынады;

      8) кандидаттың жеке басын куәландыратын құжаттың көшірмесі (шетелдіктер, азаматтығы жоқ адамдар үшін);

      9) кандидатта азаматтығы бар елде (шетелдіктер үшін) немесе тұрғылықты тұратын елде (азаматтығы жоқ адамдар үшін) алынбаған немесе өтелмеген соттылығының жоқ екендігі туралы мәліметтерді растайтын, олардың азаматтығы бар елдің (олар тұрғылықты тұратын елдің – азаматтығы жоқ адамдар үшін) не кандидат соңғы 15 (он бес) жыл бойы тұрғылықты тұрған елдің мемлекеттік органы берген құжат. Көрсетілген құжатты беру күні өтінішхат берілген күннің алдындағы 3 (үш) айдан аспайды;

      10) кандидат ұсынылатын лауазымды, ұсынып отырған тұлғаның қол қойған күнін және лауазымын, сондай-ақ кандидаттың кәсіби және тұлғалық мінездемелерін көрсете отырып, еркін нысанда жазылған, Қағидалардың 6-тармағында көрсетілген кемінде екі тұлғадан кандидатқа берілген ұсынымхаттар. Ұсынымхатты беру күні өтінішхат берілген күннің алдындағы 3 (үш) айдан аспайды;

      Қағидалардың 6-тармағында көрсетілген тұлғалар:

      кандидатты келісу туралы өтінішхат берген қаржы ұйымының, холдингтің, Қордың басшы қызметкерлері, уәкілетті органның қызметкерлері;

      кандидатты келісу туралы өтінішхат берген қаржы ұйымының, холдингтің, Қордың құрылтайшылары, акционерлері, қатысушылары;

      кандидатты келісу туралы өтінішхат берген қаржы ұйымы, холдинг, Қор құрылтайшысының, акционерінің, қатысушысының басшы қызметкерлері;

      кандидатты келісу туралы өтінішхат берген қаржы ұйымының, холдингтің еншілес ұйымының басшы қызметкерлері;

      кандидаттың жұбайы (зайыбы), жақын туыстары (ата-анасы, аға-інісі, әпке-сіңлісі, балалары) және кандидаттың жекжаттары (жұбайының (зайыбының) ата-анасы, аға-інісі, әпке-сіңлісі, балалары);

      қаржы ұйымы, холдинг, Қор кандидатты келісу туралы өтінішхат бергенге дейінгі бір жыл ішінде уәкілетті органның тарапынан шектеулі ықпал ету шаралары және (немесе) санкциялар қолданылған жеке тұлғалар болып табылса, олардың ұсынымхаттары қабылданбайды.

      11) Қағидалардың 6-тармағының екінші бөлігінде көзделген жағдайда Қазақстан Республикасының бейрезиденттері – қаржы ұйымында тізбесі Нормативтік құқықтық актілерді мемлекеттік тіркеу тізілімінде № 8318 тіркелген "Болу қажеттілігі қаржы ұйымдарының қызметін реттейтін Қазақстан Республикасының заңнамасына сәйкес талап етілетін заңды тұлғалар үшін ең аз рейтингіні, осы рейтингіні беретін рейтингілік агенттіктер тізбесін белгілеу туралы" Қазақстан Республикасы Ұлттық Банкі Басқармасының 2012 жылғы 24 желтоқсандағы № 385 қаулысымен (бұдан әрі - № 385 қаулы) белгіленген Standard & Poor’s агенттігінің халықаралық шәкілі бойынша "BB+" төмен емес кредиттік рейтингі немесе басқа рейтингілік агенттіктердің бірінің осыған ұқсас деңгейдегi рейтингi туралы мәлімет;

      12) бас бухгалтер лауазымына кандидат үшін – Қазақстан Республикасының бухгалтерлiк есеп пен қаржылық есептiлiк туралы заңнамасында белгіленген тәртіппен берілген кәсіби бухгалтер сертификатының көшірмесі;

      13) бас бухгалтер лауазымына кандидат үшін – мүшелік билеттің (кітапшаның) көшірмесі немесе бухгалтерлердің аккредиттеген кәсіптік ұйымындағы мүшелігін растайтын анықтама.

      Талап етілетін құжаттар қоса берілген өтінішхат қағаз тасымалдағышта не "электрондық үкіметтің" веб-порталы арқылы электрондық түрде ұсынылады.

      6. Ұсыным беруші тұлғалар мыналар болады:

      1) "Қазақстан қаржыгерлерінің қауымдастығы" заңды тұлғалар бірлестігі Кеңесінің төрағасы және оның орынбасарлары;

      2) ұсынымхатқа қол қою күні уәкілетті органның тағайындалуға (сайлануға) қол қою күнінде қайтарып алынбаған келісімін алған қаржы ұйымдарының, холдингтердің, Қордың басқару органының басшысы, басқару органының мүшесі, атқарушы органының басшысы (атқарушы органның функцияларын жеке жүзеге асыратын тұлға), атқарушы органының мүшесі лауазымдарында болған тұлғалар;

      3) ұсынымхатқа қол қою күні уәкілетті органның бірінші басшысы және оның орынбасарлары лауазымында болған тұлғаларды қоспағанда, мемлекеттік органдар мен ведомстволардың бірінші басшылары және олардың орынбасарлары;

      4) экономика және (немесе) заң ғылымының докторы ғылыми дәрежесі бар тұлғалар;

      5) өкілдіктердің басшылары, тізбесі Қағидалардың 4-тармағында айқындалған халықаралық қаржы ұйымдарының басшылары.

      Қазақстан Республикасының бейрезиденттері - кандидаттарды келісу кезінде тізбесі № 385 қаулыда белгіленген Standard & Poor’s агенттігінің халықаралық шәкілі бойынша "BB+" төмен емес рейтингі немесе басқа рейтингілік агенттіктердің бірінің осыған ұқсас деңгейдегi рейтингi бар Қазақстан Республикасының бейрезиденттері - қаржы ұйымдарының басқару органының басшысы мен мүшелері, атқарушы органының басшысы мен мүшелері де ұсыным беруші тұлғалар болып табылады.

      Уәкілетті орган қаржы ұйымының, холдингтің, Қордың басшы қызметкері лауазымына тағайындалуына (сайлануына) келісімін кейіннен уәкілетті орган қайтарып алған кандидатқа ұсыным беруші тұлғаның ұсынымхат беру фактісін анықтаған жағдайда, уәкілетті орган бұдан кейін көрсетілген ұсыным беруші тұлғаның ұсынымхаттарын қабылдамайды.

      7. Қағидалардың 8-тармағында көрсетілген құжаттарды қоспағанда, Қағидалардың 5-тармағында аталған, бірнеше парақтан тұратын құжаттар нөмірленген, тігілген және соңғы парақтың екінші бетінде тігілген шетіне желімделген парақтардың саны көрсетіліп, ішінара жапсырманың жоғарғы жағына қаржы ұйымының, холдингтің, Қордың мөрімен (бар болса) расталған күйінде ұсынылады.

      Қағидалардың 8-тармағында көрсетілген құжаттарды қоспағанда, құжаттардың көшірмелері қаржы ұйымының, холдингтің, Қордың атқарушы органның басшысы (атқарушы органның функцияларын жеке жүзеге асыратын тұлға) не оның міндетін атқарушы тұлғаның (міндеттерді атқару жүктелгені туралы шешімнің көшірмесін бере отырып) тегін, атын, әкесінің атын (бар болса) көрсете, лауазымды тұлғаның қолымен және көшірменің дұрыстығын көрсете отырып, қаржы ұйымының, холдингтің, Қордың мөр бедерімен (бар болса) расталады.

      8. Қаржы ұйымы, холдинг, Қор шет тілінде ұсынатын Қазақстан Республикасының бейрезиденті - кандидатты келісуге құжаттар Қазақстан Республикасы заңнамасының талаптарына немесе Қазақстан Республикасы бекіткен халықаралық шарттарға сәйкес заңдастырылуға не апостильделуге тиіс (кандидаттың жеке басын куәландыратын құжатты қоспағанда). Көрсетілген құжаттар қазақ және орыс тілдеріне аударылады және уәкілетті органға Қазақстан Республикасының заңнамасына сәйкес нотариатпен куәландырылып ұсынылады.

      9. Қаржы ұйымы, холдинг, Қор кандидаттарды келісу үшін уәкілетті органға олар тағайындалған (сайланған) күннен бастап күнтізбелік 60 (алпыс) күннен кешіктірмейтін мерзімде құжаттардың толық топтамасын (кандидаттарды, жауапты тұлғаларды, байланыс телефондарын және электрондық пошта мекенжайларын көрсете отырып) ұсынады.

      Уәкілетті орган тиісті мемлекеттік ақпараттық жүйелерден "электрондық үкімет" шлюзі арқылы:

      Қазақстан Республикасының резидент - жеке тұлғасының жеке басын куәландыратын;

      Қазақстан Республикасының резидент - жеке тұлғасында алынбаған немесе өтелмеген соттылығының жоқ екенін растайтын;

      Қазақстан Республикасының резидент - заңды тұлғасын мемлекеттік тіркеу (қайта тіркеу) туралы құжаттарда көрсетілген мәліметтерді алады.

      Қаржы ұйымы, холдинг, Қор Қағидалардың 5-тармағында көзделген құжаттардың толық емес топтамасын ұсынған жағдайда, уәкілетті орган "Мемлекеттік көрсетілетін қызметтер туралы" 2013 жылғы 15 сәуірдегі Қазақстан Республикасы Заңының 19-бабына сәйкес кандидатты келісуге арналған құжаттарды қабылдаудан бас тартады.

      Кандидатты келісу үшін ұсынылған құжаттарды уәкілетті орган Қағидалардың 5-тармағында көрсетілген құжаттар ұсынылған күннен бастап 30 (отыз) жұмыс күні ішінде қарайды.

      Ұсынылған құжаттарды қарау мерзімі ішінде олардың Қағидалардың осы тармақтың төртінші бөлігінде көрсетілген талаптарына сәйкессіздігі анықталған жағдайда, уәкілетті орган қаржы ұйымына, холдингке, Қорға оларды жою және Қазақстан Республикасы заңнамасының талаптарына сәйкес келетін пысықталған (түзетілген) құжаттарды ұсыну үшін ескертулермен хат жібереді. Бұл ретте уәкілетті органның кандидатты келісуге арналған құжаттарды қарау мерзімі үзілмейді.

      Қаржы ұйымының, холдингтің, Қордың басшы қызметкерлерін тағайындауға (сайлауға) келісім беру үшін ұсынылған құжаттарды кері қайтарып алуға уәкілетті орган кандидаттарды келісу туралы шешім қабылдағанға дейін, ал тестілеуге шақыру арқылы келісу кезінде кандидаттың тестілеуден өту күніне дейін, оларды кері қайтарып алу себебін көрсете отырып, қаржы ұйымының, холдингтің, Қордың еркін нысандағы жазбаша өтініш беру жолымен жол беріледі.

      10. Кандидаттың Қазақстан Республикасының бейрезиденттері болып табылатын қаржы ұйымдарында жұмыс өтілі болған жағдайда, уәкілетті орган кандидаттың мінсіз іскерлік беделінің болуын растау мақсатында шет мемлекеттің уәкілетті қадағалау органынан кандидаттың мінсіз іскерлік беделін сипаттайтын мәліметтердің болуы (болмауы) туралы ақпаратты сұратады не шет мемлекеттің қадағалау органының ресми интернет-ресурсынан осы мәліметтерді (бар болса) алады.

3-тарау. Тестілеуден өту үшін шақырумен немесе шақырусыз келісу тәртібі

      11. Кандидатты келісу үшін уәкілетті органда дербес құрамы уәкілетті органның бірінші басшысының бұйрығымен бекітілген қаржы ұйымдарының, холдингтің, Қордың басшы қызметкерлерінің лауазымына кандидаттардың сәйкестігін айқындау жөніндегі комиссия (бұдан әрі - Комиссия) құрылады.

      12. Уәкілетті орган Комиссияның шешімі бойынша кандидаттарды тестілеуден өту үшін шақырып не Қағидалардың 15-тармағында көзделген жағдайларда шақырмай-ақ, келісуді жүргізеді.

      13. Уәкілетті орган тестілеуден өту күні мен уақыты туралы қаржы ұйымына, холдингке, Қорға жазбаша түрде хабарлайды.

      14. Қаржы ұйымы, холдинг, Қор уәкілетті орган белгілеген күні мен уақытта тестілеуден өту үшін кандидаттың уәкілетті органға келуін қамтамасыз етеді.

      15. Комиссияның шешімі бойынша мынадай кандидаттар ұсынылған құжаттар негізінде шақырусыз келісілуге жатады:

      1) уәкілетті органмен қаржы нарығының осы секторында, Қорда тиісті лауазымға бұрын келісілген кандидат;

      2) бұрын қаржы нарығы мен қаржы ұйымдарын реттеуді, бақылауды және (немесе) қадағалауды жүзеге асыратын (жүзеге асырған) мемлекеттік органның басқарма мүшесі, бірінші басшы немесе бірінші басшысының орынбасары, дербес құрылымдық бөлімшесінің (департаменттің, басқарманың) басшысы (басшының орынбасары), сондай-ақ қаржы ұйымдарының аудитін жүргізу жөніндегі қызметтерді реттеуді жүзеге асыратын (жүзеге асырған) мемлекеттік органның бірінші басшысы (бірінші басшысының орынбасары) болған кандидат;

      3) бұрын мемлекеттік органның басқарма мүшесі, бірінші басшысы немесе бірінші басшысының орынбасары, жауапты хатшысы болған кандидат;

      4) мыналар ретінде кемінде 3 (үш) жыл еңбек өтілі болса - атқарушы органның бірінші басшысы лауазымына кандидат (атқарушы органның функцияларын жеке жүзеге асыратын тұлға):

      қаржы ұйымдарының аудитін тікелей жүзеге асырған аудитор;

      қаржы нарығының осы секторында, Қорда және (немесе) Қағидалардың 4-тармағында көрсетілген халықаралық қаржы ұйымдарының бірінде:

      басқару органының басшысы, мүшесі;

      қаржылық қызметтерді көрсетуге байланысты мәселелер бойынша жетекшілік жасаған атқарушы органның басшысы, мүшесі;

      бас бухгалтер;

      қызметі қаржылық қызметтерді көрсетуге байланысты болған дербес құрылымдық бөлімшенің (департаменттің, басқарманың, филиалдың) басшысы, қаржылық қызметтерді көрсетуге байланысты мәселелер бойынша жетекшілік жасаған қаржылық және (немесе) басқарушы, атқарушы директор;

      5) мыналар ретінде кемінде 2 (екі) жыл еңбек өтілі болса - басқару органының басшысы лауазымына кандидат:

      қаржы ұйымдарының аудитін тікелей жүзеге асырған аудитор;

      қаржы нарығында, Қорда және (немесе) Қағидалардың 4-тармағында көрсетілген халықаралық қаржы ұйымдарының бірінде:

      басқару органының басшысы, мүшесі;

      атқарушы органның басшысы, мүшесі (қаржылық қызметтерді көрсетуге байланысты мәселелер бойынша жетекшілік жасаған);

      бас бухгалтер;

      6) мыналар ретінде кемінде 3 (үш) жыл еңбек өтілі болса - бас қаржы ұйымының атқарушы органының мүшесі болып табылатын басқару органының басшысы мен мүшесі лауазымына кандидат:

      қаржы ұйымдарының аудитін тікелей жүзеге асырған аудитор;

      қаржы нарығында және (немесе) Қағидалардың 4-тармағында көрсетілген халықаралық қаржы ұйымдарының бірінде:

      басқару органының басшысы, мүшесі;

      атқарушы органның басшысы, мүшесі (қаржылық қызметтерді көрсетуге байланысты мәселелер бойынша жетекшілік жасаған);

      бас бухгалтер;

      7) сақтандыру брокері басшысының орынбасары, қаржы ұйымының, холдингтің, Қордың қауіпсіздік мәселелеріне және әкімшілік-шаруашылық мәселелері бойынша ғана жетекшілік жасаған атқарушы органының мүшесі лауазымдарына кандидат;

      8) мыналар ретінде кемінде 2 (екі) жыл еңбек өтілі болса сақтандыру брокері басшысының орынбасары, қаржы ұйымының, холдингтің, Қордың атқарушы органының мүшесі лауазымына кандидат:

      қаржы ұйымдарының аудитін тікелей жүзеге асырған аудитор;

      қаржы нарығының осы секторында, Қорда және (немесе) Қағидалардың 4-тармағында көрсетілген халықаралық қаржы ұйымдарының бірінде:

      басқару органының басшысы, мүшесі;

      қаржылық қызметтерді көрсетуге байланысты мәселелерге бақылау жасаған атқарушы органның басшысы, мүшесі;

      бас бухгалтер немесе бас бухгалтердің орынбасары;

      қызметі қаржылық қызметтерді көрсетуге байланысты болған дербес құрылымдық бөлімшенің (департаменттің, басқарманың, филиалдың) басшысы (басшысының орынбасары), қаржылық қызметтерді көрсетуге байланысты мәселелер бойынша жетекшілік жасаған қаржылық және (немесе) басқарушы, атқарушы директор;

      9) бас бухгалтер лауазымына кандидат;

      10) қаржы нарығының осы секторындағы қаржы ұйымының, Қордың басшы қызметкері лауазымына келісу кезінде уәкілетті органда өткен тестілеудің оң нәтижесін алған кандидат.

      Осы тармақшаның мақсаттары үшін тестілеудің оң нәтижелері есептелетін мерзім кандидаттың уәкілетті органда тестілеуден өту күнінен бастап 6 (алты) айдан аспайды;

      11) мыналар ретінде кемінде 1 (бір) жыл еңбек өтілі болса - өзге басшы қызметкер лауазымына кандидат:

      қаржы ұйымдарының аудитін тікелей жүзеге асырған аудитор;

      қаржы нарығының осы секторында және (немесе) Қағидалардың 4-тармағында көрсетілген халықаралық қаржы ұйымдарының бірінде:

      басқару органының басшысы, мүшесі;

      қаржылық қызметтерді көрсетуге байланысты мәселелер бойынша жетекшілік жасаған атқарушы органның басшысы, мүшесі;

      бас бухгалтер немесе бас бухгалтердің орынбасары;

      қызметі қаржылық қызметтерді көрсетуге байланысты болған дербес құрылымдық бөлімшенің (департаменттің, басқарманың, филиалдың) басшысы, қаржылық қызметтерді көрсетуге байланысты мәселелер бойынша жетекшілік жасаған қаржылық және (немесе) басқарушы, атқарушы директор;

      12) басқару органының мүшесі лауазымына кандидат.

      16. Тестілеуден өту үшін шақырылған кандидаттарды келісу 30 сұрақ бойынша 45 минуттың ішінде компьютерлік тестілеу әдісімен қазақ немесе орыс немесе ағылшын тілдерінде өткізіледі.

      17. Тестілейтін тұлғамен бірге бір үй-жайда кандидаттарды тестілеу уақытында тек уәкілетті органның қызметкерлері болуына рұқсат беріледі.

      Кандидат тестілеуден өту кезінде қандай да бір жазбаша, электрондық немесе басқа ақпараттық материалдарды пайдалануға жол берілмейді. Осы тармақта баяндалған талаптарды бұзу тестілеудің теріс нәтижесіне тең келеді.

      18. Кандидаттарды тестілеу уәкілетті органның интернет-ресурсында онлайн режімге трансляциялаумен жүргізіледі.

      19. Тестілеудің оң нәтижесін алған кезде (кемінде жетпіс пайыз дұрыс жауап) кандидат тағайындалған (сайланған) лауазымына келісілген болып есептеледі.

      Кандидат тестілеуден өткеннен кейін тез арада қол қою арқылы тест нәтижелерімен танысуға тиіс.

4-тарау. Қаржы ұйымдарының, холдингтердің, Қордың басшы қызметкерлерін тағайындауға (сайлауға) келісім беру тәртібі

      20. Қаржы ұйымы, холдинг, Қор ұсынған құжаттар Комиссияның қарауына жіберіледі. Комиссия мүшелері құжаттарды қарайды және қаралып отырған мәселе бойынша Қағидаларға 3-қосымшаға сәйкес нысан бойынша ресімделген Комиссияның қаржы ұйымының, холдингтің, Қордың басшы қызметкері лауазымына кандидатты қарау жөніндегі хаттамасында (бұдан әрі - Хаттама) өз пікірін білдіреді.

      21. Комиссияның шешімі жай көпшілік дауыспен қабылданады. Дауыстар тең болғанда Комиссия төрағасының немесе оның орнындағы тұлғаның дауысы шешуші болып табылады. Комиссия шешімі сауалнамалық жолмен де қабылданады.

      22. Қаржы ұйымына, холдингке, Қорға уәкілетті орган кандидаттарды келісудің нәтижелері туралы жазбаша хабарламаны жіберу арқылы Комиссия Төрағасының (немесе оның орынбасарының) хаттамаға қол қойған күннен, егер тестілеуден өткен жағдайда - тестілеу өткен күннен бастап 5 (бес) жұмыс күні ішінде хабарлайды.

      23. Уәкілетті орган Банктер туралы заңның 20-бабының 8-тармағында, Сақтандыру қызметі туралы заңның 34-бабының 8-тармағында, Кепілдік беру қоры туралы заңның 4-тармағында, Бағалы қағаздар нарығы туралы заңның 54-бабының 7-тармағында, Зейнетақымен қамсыздандыру туралы заңның 55-бабының 6-тармағында белгіленген негіздер бойынша қаржы ұйымының, холдингтің, Қордың басшы қызметкерлерін тағайындауға (сайлауға) келісім беруден бас тартады.

Басшы қызметкерлердің құрамындағы өзгерістер туралы мәліметтер

      _______________________________________________________________

      (қаржы ұйымының, холдингтің, Қордың атауы)

      Қосымша (парақтар санын көрсете отырып):

      __________________________________________________________________________

      Бірінші басшының тегі, аты, әкесінің аты (бар болса)

      ______________________

      (қолы)

      ______жылғы "___"____________

      Мөр орны (бар болса)

Басшы қызметкер лауазымына кандидат туралы мәліметтер

      Ескерту. 2-қосымша жаңа редакцияда – ҚР Ұлттық Банкі Басқармасының 22.12.2017 № 260 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) қаулысымен.

      ________________________________________________________________________________

      (қаржы ұйымының, холдингтің, Қордың атауы)

      ________________________________________________________________________________

      ________________________________________________________________________________

      (тегі, аты, әкесiнiң аты (бар болса), лауазымы)

      1. Жалпы мәлiметтер:

      2. Білімі:

      3. Жұбайы (зайыбы), жақын туыстары (ата-анасы, аға-інісі, әпке-сіңлісі, балалары)

      және жекжаты (жұбайының (зайыбының) ата-анасы, аға-інісі, әпке-сіңлісі, балалары) туралы

      мәліметтер:

      4. Кандидаттың заңды тұлғалардың жарғылық капиталына қатысуы немесе акцияларын

      иеленуі туралы мәліметтер:

      5. Еңбек қызметі туралы мәліметтер.

      Осы тармақта кандидаттың бүкіл еңбек қызметi (сондай-ақ уәкiлеттi органға мүшелігі),

      оның iшiнде уәкiлеттi органға келісу туралы өтiнiштi берген қаржы ұйымындағы, холдингтегі,

      Қордағы лауазымын көрсете отырып, жоғарғы оқу орнын аяқтаған кезден бастап еңбек

      қызметi туралы мәліметтер, сондай-ақ кандидат еңбек қызметін жүзеге асырмаған кезең

      көрсетіледі.

      6. Кандидаттың қаржы ұйымдарының аудитін жүргізуі туралы мәліметтер

      ________________________________________________________________________________

      (қаржы ұйымының атауын, аудит жүргізу мерзімін, кандидат аудитор-

      ________________________________________________________________________________

      орындаушы ретінде аудиторлық есепке қол қойған күнін көрсету қажет).

      7. Осы ұйымдағы және (немесе) басқа ұйымдардағы инвестициялық комитеттерде

      мүшелігі туралы мәліметтер:

      8. Қызметі қаржылық қызметтерді көрсетуге байланысты болған дербес құрылымдық

      бөлімшенің (департаменттің, басқарманың, филиал) басшысы (басшысының орынбасары),

      осы ұйымда және (немесе) басқа ұйымдарда қаржылық қызметтерді көрсетуге байланысты

      мәселелер бойынша жетекшілік жасаған қаржылық және (немесе) басқарушы және (немесе)

      директор лауазымында болғаны туралы мәліметтер:

      9. Қаржы нарығын және қаржы ұйымдарын реттеу, бақылау мен қадағалау жөніндегі

      уәкілетті орган қаржы ұйымын консервациялау не оның акцияларын мәжбүрлеп сатып алу,

      қаржы ұйымын таратуға әкеп соққан оны лицензиядан айыру және (немесе) қаржы нарығында

      қызметін жүзеге асыруды тоқтату туралы шешім қабылдағанға не қаржы ұйымын мәжбүрлеп

      тарату немесе Қазақстан Республикасының заңнамасында белгіленген тәртіпте оны банкрот

      деп тану туралы сот шешімі заңды күшіне ену дейін кем дегенде 1 (бір) жылдан аспайтын

      кезеңде кандидаттың бұрын қаржы ұйымының басқару органының басшысы, мүшесі,

      атқарушы органның (тіркеуші трансфер-агенттің атқару органының функциясын жеке жүзеге

      асыратын адам және оның орынбасары) басшысы, мүшесі, бас бухгалтері, жеке тұлға – ірі

      қатысушысы (банк немесе сақтандыру холдингінің), қаржы ұйымының заңды тұлғасы – ірі

      қатысушының басшысы және (немесе) қаржы ұйымының басшы қызметкері болғандығы

      туралы мәліметтер ______________________________________________________________

      (иә (жоқ), ұйымның атауын,

      ________________________________________________________________________________

      лауазымын, жұмыс кезеңiн көрсету қажет)

      10. Кандидат бұрын төрт және одан астам кезең ішінде шығарылған эмиссиялық бағалы

      қағаздар бойынша купонды сыйақыны төлеуден дефолт жіберген не дефолт жіберген

      шығарылған эмиссиялық бағалы қағаздар бойынша купонды сыйақыны төлеу бойынша

      берешек сомасы купонды сыйақының төрт еселік және (немесе) және одан астам мөлшерін

      құрайтын не шығарылған эмиссиялық бағалы қағаздар бойынша негізгі борышты төлеу

      жөніндегі дефолт мөлшері төлеу күні республикалық бюджет туралы заңмен белгіленген

      айлық есептік көрсеткіштен он мың есе асатын соманы құрайтын эмитент басқару органының

      басшысы, мүшесі, атқарушы органның қатарынан басшысы, мүшесі, қаржы ұйымының бас

      бухгалтері, жеке тұлға ірі қатысушы (ірі акционер), басқару органының басшысы, мүшесі,

      атқарушы органның қатарынан басшысы, мүшесі, қаржы ұйымының бас бухгалтері, заңды

      тұлға ірі қатысушы (ірі акционер) болғандығы туралы мәліметтер (Қордың басшы қызметкері

      лауазымына кандидат толтырмайды)________________________________________________

      (иә (жоқ), ұйымның атауын,

      ________________________________________________________________________________

      лауазымын, жұмыс кезеңiн көрсету қажет)

      11. Қаржы ұйымының, холдингтің, Қордың басшысы ретінде қаржы ұйымы, холдинг,

      Қор қызметінің мәселелері бойынша сот талқылауларына жауап беруші ретінде тартылды

      ма______________________________________________________________________________

      (иә/жоқ, күнін,

      ________________________________________________________________________________

      қаржы ұйымының, холдингтің, Қордың атауын, сот

      ________________________________________________________________________________

      талқылауына жауап берушіні, қаралып отырған мәселені және заңды күшіне енген

      (ол шығарылған жағдайда) сот шешімін

      ________________________________________________________________________________

      көрсету қажет)

      12. Кандидат тағайындау (сайлау) күніне дейін үш жыл ішінде сыбайлас жемқорлық

      қылмыс жасағаны үшін жауапкершілікке не сыбайлас жемқорлық құқық бұзушылық жасағаны

      үшін тәртіптік жауапкершілікке тартылды ма (Қордың басшы қызметкері лауазымына

      кандидат толтырмайды) _____________

      (иә (жоқ),

      ________________________________________________________________________________

      құқық бұзушылықтың, қылмыстың қысқаша сипаттамасы,

      ________________________________________________________________________________

      жауапкершілікке тарту негіздерін көрсете отырып, тәртіптік жаза қолдану

      ________________________________________________________________________________

      туралы актінің немесе сот шешімінің деректемелері)

      Осы ақпаратты өзім тексергенімді және оның дәйекті және толық екендігін, мінсіз

      іскери беделі болуын растаймын. Мемлекеттік қызмет көрсету үшін қажетті дербес деректерді

      жинауға және өңдеуге және ақпараттық жүйелердегі заңмен қорғалатын құпияны құрайтын

      мәліметтерді пайдалануға келісім беремін.

      Тегі, аты, әкесінің аты (бар болса)

      ________________________________________________________________________________

      (кандидат өз қолымен баспа әріптерімен толтырады)

      Қолы _______________________

      Күні _____________________

Комиссияның қаржы ұйымының, холдингтің, Қордың басшы қызметкерi лауазымына кандидатты қарау жөніндегі

      _______________________________________________________________

      (қаржы ұйымының, холдингтің, Қордың басшы қызметкерi лауазымына

      кандидаттың тегі, аты, әкесiнiң аты (бар болса))

      № ______________ хаттама

      ____ жылғы ____ __________

      Комиссия Төрағасы

      ___________________________                        _________________

      (тегі, аты, әкесінің аты (бар болса))                        (қолы)

      Комиссия шешімі:

      Тестілеуге шақырусыз келісілсін

      Тестілеуге жіберілсін және тестілеудің оң нәтижесінде келісілсін

      Келісуден бас тартылсын

      ___________________________________________

      (қажеттінің астын сызу қажет)

Күші жойылды деп танылатын Қазақстан Республикасының нормативтік құқықтық актілерінің, сондай-ақ Қазақстан Республикасының кейбір нормативтік құқықтық актілерінің құрылымдық бөліктерінің тізбесі

      1. "Сақтандыру төлемдеріне кепілдік беру қоры" акционерлік қоғамының қызметін реттейтін нормативтік құқықтық актілерді бекіту туралы" Қазақстан Республикасы Ұлттық Банкі Басқармасының 2010 жылғы 1 наурыздағы № 26 қаулысының (Нормативтік құқықтық актілерін мемлекеттік тіркеу тізілімінде 2013 жылғы 27 тамызда № 6167 тіркелген, 2010 жылғы 26 қазанда "Егемен Қазақстан" газетінде № 439-442 (26285) жарияланған) 1-тармағының 4) тармақшасы.

      2. "Сақтандыру төлемдеріне кепілдік беру қоры" акционерлік қоғамының қызметін реттейтін нормативтік құқықтық актілерді бекіту туралы" Қазақстан Республикасы Қаржы нарығын және қаржы ұйымдарын реттеу мен қадағалау агенттігі Басқармасының 2010 жылғы 1 наурыздағы № 26 қаулысына өзгерістер мен толықтырулар енгізу туралы" Қазақстан Республикасы Ұлттық Банкі Басқармасының 2012 жылғы 24 ақпандағы № 94 қаулысы (Нормативтік құқықтық актілерін мемлекеттік тіркеу тізілімінде № 7546 тіркелген, 2012 жылғы 4 тамызда "Егемен Қазақстан" газетінде № 464-470 (27543) жарияланған).

      3. "Қаржы ұйымдарының, банк, сақтандыру холдингтерінің басшы қызметкерлерін тағайындауға (сайлауға) келісім беру қағидаларын және келісім алу үшін қажетті құжаттар тізбесін бекіту туралы" Қазақстан Республикасы Ұлттық Банкі Басқармасының 2012 жылғы 24 ақпандағы № 95 қаулысы (Нормативтік құқықтық актілерін мемлекеттік тіркеу тізілімінде № 7561 тіркелген, 2012 жылғы 4 тамызда "Егемен Қазақстан" газетінде № 464-470 (27543) жарияланған).

      4. "Қазақстан Республикасының кейбір нормативтік құқықтық актілеріне қаржы ұйымдарын бақылау мен қадағалау мәселелері бойынша өзгерістер енгізу туралы" Қазақстан Республикасы Ұлттық Банкі Басқармасының 2013 жылғы 27 тамыздағы № 212 қаулысымен (Нормативтік құқықтық актілерін мемлекеттік тіркеу тізілімінде № 8805 тіркелген, 2013 жылғы 27 қарашада "Заң газеті" газетінде № 179 (2380) жарияланған) бекітілген, Қазақстан Республикасының қаржы ұйымдарын бақылау мен қадағалау мәселелері бойынша өзгерістер енгізілетін нормативтік құқықтық актілерінің тізбесінің 3-тармағы.

      5. "Қазақстан Республикасының кейбір нормативтік құқықтық актілеріне Қазақстан Республикасының Ұлттық Банкі көрсететін мемлекеттік қызметтердің бизнес-процестерін оңтайландыру және автоматтандыру мәселелері бойынша өзгерістер мен толықтырулар енгізу туралы" Қазақстан Республикасы Ұлттық Банкі Басқармасының 2014 жылғы 24 желтоқсандағы № 261 қаулысымен (Нормативтік құқықтық актілерін мемлекеттік тіркеу тізілімінде № 10211 тіркелген, 2015 жылғы 26 ақпанда "Әділет" ақпараттық-құқықтық жүйесінде жарияланған) бекітілген, Қазақстан Республикасының Ұлттық Банкі көрсететін мемлекеттік қызметтердің бизнес-процестерін оңтайландыру және автоматтандыру мәселелері бойынша өзгерістер мен толықтырулар енгізілетін Қазақстан Республикасының нормативтік құқықтық актілерінің тізбесінің 4-тармағының бестен бастап жиырма бірінші абзацтары, 9-тармақ.

      6. "Қазақстан Республикасының кейбір нормативтік құқықтық актілеріне қаржы ұйымдарының, холдингтердің және "Сақтандыру төлемдеріне кепілдік беру қоры" акционерлік қоғамының басшы қызметкерлерін келісу мәселелері бойынша өзгерістер мен толықтыру енгізу туралы" Қазақстан Республикасы Ұлттық Банкі Басқармасының 2015 жылғы 17 маусымдағы № 102 қаулысы (Нормативтік құқықтық актілерін мемлекеттік тіркеу тізілімінде № 11747 тіркелген, 2015 жылғы 12 тамызда "Заң газеті" газетінде № 118 (2704) жарияланған).

      7. "Қазақстан Республикасының кейбір нормативтік құқықтық актілеріне қаржы ұйымдарының, холдингтердің және "Сақтандыру төлемдеріне кепілдік беру қоры" акционерлік қоғамының басшы қызметкерлерін келісу мәселелері бойынша өзгерістер мен толықтыру енгізу туралы" Қазақстан Республикасы Ұлттық Банкі Басқармасының 2016 жылғы 29 ақпандағы № 73 қаулысы (Нормативтік құқықтық актілерін мемлекеттік тіркеу тізілімінде № 13605 тіркелген, 2016 жылғы 16 мамырда "Әділет" ақпараттық-құқықтық жүйесінде жарияланған).