«Сақтандыру төлемдеріне кепілдік беру қоры туралы» Қазақстан Республикасының 2003 жылғы 3 маусымдағы Заңын іске асыру мақсатында Қазақстан Республикасы Қаржы нарығын және қаржы ұйымдарын реттеу мен қадағалау агенттігінің (бұдан әрі - Агенттік) Басқармасы ҚАУЛЫ ЕТЕДІ:
1. Қоса беріліп отырған «Сақтандыру төлемдеріне кепілдік беру қоры» акционерлік қоғамының кепілдік және өтемақы төлемдерін жүзеге асыру ережесі бекітілсін.
2. Осы қаулының қосымшасына сәйкес нормативтік құқықтық актілердің күші жойылғаны танылсын.
3. Осы қаулы бірінші рет ресми жарияланған күннен кейін он күнтізбелік күн өткеннен кейін қолданысқа енгізіледі.
4. Сақтандыру нарығының субъектілерін және басқа қаржы ұйымдарын қадағалау департаменті (Д.Ш. Қарақұлова):
1) Заң департаментімен (Н.В. Сәрсенова) бірлесіп, осы қаулыны Қазақстан Республикасының Әділет министрлігінде мемлекеттік тіркеуден өткізу шараларын қабылдасын;
2) осы қаулы Қазақстан Республикасының Әділет министрлігінде мемлекеттік тіркеуден өткен күннен бастап, он күндік мерзімде оны Агенттіктің мүдделі бөлімшелеріне, "Қазақстан қаржыгерлерінің қауымдастығы" Заңды тұлғалар бірлестігіне, «Сақтандыру төлемдеріне кепілдік беру қоры» акционерлік қоғамына және «Актуарлық статистикалық бюро» ЖШС-ға мәлімет үшін жіберсін.
5. Агенттік Төрайымының Қызметі (А.Ә. Кенже) осы қаулыны Қазақстан Республикасының бұқаралық ақпарат құралдарында жариялау шараларын қолға алсын.
6. Осы қаулының орындалуын бақылау Агенттік Төрайымының орынбасары А.Ө. Алдамбергенге жүктелсін.
Төрайым Е. Бахмутова
Қазақстан Республикасы Қаржы
нарығын және қаржы ұйымдарын
реттеу мен қадағалау агенттігі
Басқармасының
2010 жылғы 30 сәуірдегі № 62
қаулысымен бекітілді
«Сақтандыру төлемдеріне кепілдік беру қоры» акционерлік қоғамының кепілдік және өтемақы төлемдерін жүзеге асыру ережесі
Осы «Сақтандыру төлемдеріне кепілдік беру қоры» акционерлік қоғамының кепілдік және өтемақы төлемдерін жүзеге асыру ережесі «Сақтандыру төлемдеріне кепілдік беру қоры» акционерлік қоғамының (бұдан әрі - Қор) мәжбүрлеп таратылатын сақтандыру ұйымының кредиторларымен жасалған міндетті сақтандыру шарттары бойынша сақтандыру сыйлықақылары төлеміне орай мәжбүрлеп таратылатын сақтандыру ұйымының кредиторларына кепілдік төлемдерін және Қор қатысушысы - сақтандыру ұйымдарына (бұдан әрі - қатысушы-сақтандыру ұйымы) өтемақы төлемдерін жүзеге асыру тәртібі мен шартын айқындайды.
1-тарау. Жалпы ережелер
1. Осы Ереже мақсатына мынадай негізгі ұғымдар пайдаланылады:
1) кредитор - мәжбүрлеп таратылатын сақтандыру ұйымының міндетті сақтандыру шарты бойынша сақтандыру жағдайы басталған кезде кепілдік төлемін алуға құқығы бар сақтанушы (сақтандырылушы, пайда алушы);
2) кепілдік төлемі - «Сақтандыру қызметі туралы» Қазақстан Республикасының 2000 жылғы 18 желтоқсандағы Заңында көзделген жағдайларда мәжбүрлеп таратылатын сақтандыру ұйымының міндетті сақтандыру шарты бойынша басталған сақтандыру жағдайлары бойынша «Сақтандыру төлемдеріне кепілдік беру қоры» Қазақстан Республикасының 2003 жылғы 3 маусымдағы Заңында және осы Ережеде көзделген тәртіппен және шарттармен сақтанушыға (сақтандырылушыға, пайда алушыға) төлейтін ақша сомасы;
3) сақтандыру төлемдеріне кепілдік беру жүйесінің қатысушысы болып табылатын сақтандыру ұйымы (қатысушы-сақтандыру ұйымы) - Қормен қатысу шартын жасасқан және оның акционері болып табылатын сақтандыру ұйымы;
4) өтемақы төлемдері - Қордың мәжбүрлеп таратылатын сақтандыру ұйымының кредиторымен жасалған міндетті сақтандыру шарты бойынша сақтандыру сыйлықақылары төлеміне орай қатысушы-сақтандыру ұйымына төленетін ақша сомасы;
5) сақтандыру актісі - сақтандырушы және (немесе) оның өкілінің қатысуымен қатысушы-сақтандыру ұйымы жасаған үшінші тұлғаның өміріне, денсаулығына және (немесе мүлкіне) келтірілген зиянның жері, уақыты, мөлшері және себебі көрсетілген және сақтандыру төлемін жүзеге асырудың негізі болып табылатын құжат;
6) дебиторлар тізілімі - тарату комиссиясы беретін міндетті сақтандыру шарттарының сақтандыру сыйлықақылары төлемі бойынша таратылатын сақтандыру ұйымы алдында борышы бар тұлғалардың тізімі;
7) кредиторлар тізілімі - тарату комиссиясы беретін кепілдік төлемді алу құқығына иеленген тұлғалар тізімі;
8) өтемақы төлемінің тізілімі - тарату комиссиясы беретін қалған қолданыс кезеңіне міндетті сақтандыру шартын жасау құқығына иеленген тұлғалар тізімі.
2-тарау. Қордың кепілдік төлемдерін жүзеге асыруы
2. Кепілдік төлемін алу негіздері «Сақтандыру төлемдеріне кепілдік беру қоры» Қазақстан Республикасының 2003 жылғы 3 маусымдағы Заңының 15-бабының 1-тармағында белгіленген.
3. Кредитор «Сақтандыру төлемдеріне кепілдік беру қоры» Қазақстан Республикасының 2003 жылғы 3 маусымдағы Заңының 15-бабының 1-тармағының 1) тармақшасында көзделген негізі бойынша кепілдік төлемін алу үшін Қорға өтініш берген жағдайда, кепілдік төлемін жүзеге асыру жөніндегі жазбаша өтінішке мынадай растайтын құжаттарды:
1) сақтандыру төлемін жүзеге асырудан не сақтандыру төлемін толық емес көлемде жүзеге асырудан заңсыз бас тартқан жағдайда сақтандыру ұйымы мен сақтанушы (сақтандырылушы) арасында жасалған бітімге келу келісімін, сақтандыру төлемін не сақтандыру төлемінің даулы бөлігін заңды күшіне енгені жөніндегі белгімен жүзеге асыру туралы соттың шешімін, не сот актісі болмаған жағдайда мәжбүрлеп таратылатын сақтандыру ұйымының сақтандыру төлемінен бас тарту немесе оны ішінара жүзеге асыру туралы шешімін (бар болғанда), сондай-ақ жүзеге асырылған сақтандыру төлемінің көлемін растайтын төлем құжаттарын, сақтандыру жағдайының басталу фактісін және келтірілген зиян мөлшерін растайтын құжаттарды;
2) егер сақтандыру жағдайы сақтандыру ұйымына сақтандыру қызметін жүзеге асыру құқығына берілген лицензиясынан айырылғаннан кейін болған жағдайда - кредитор сақтандыру төлемін жүзеге асыру туралы талабын қойған кезде ұсынатын Қазақстан Республикасының міндетті сақтандыру түрлері туралы заңнамалық актілермен көзделген құжаттарды, сондай-ақ болжамды сақтандыру төлемінің мөлшерін не оны жүзеге асырудан бас тарту себептерін көрсете отырып, осы талапты қарау қорытындылары бойынша таратылатын сақтандыру ұйымы уақытша әкімшілігінің (тарату комиссиясының) шешімін бар болған - қоса береді.
Растайтын құжаттар болмаған жағдайда, оларды алу үшін кредитор мәжбүрлеп таратылатын сақтандыру ұйымының тарату комиссиясына сақтандыру төлемін жүзеге асыру жөнінде өтініш (шағым) береді.
4. Кредитор осы Ереженің 3-тармағында көзделген құжаттарды ұсынған күннен бастап Қор он жұмыс күні ішінде кепілдік төлемін жүзеге асыру (жүзеге асырудан бас тарту) туралы мәселені қарайды. Кредитордан келіп түскен өтініш бойынша шешім қабылдау үшін Қор қатысушы - мәжбүрлеп таратылатын сақтандыру ұйымының тарату комиссиясынан (бұдан әрі - тарату комиссиясы) жазбаша түрде кредитордың сақтандыру ісін, соның ішінде есептелген және төленген сақтандыру сыйлықақысының мөлшері, сақтандыру төлемдерінің мөлшері туралы ақпаратты сұратады.
5. Тарату комиссиясы Қордың сұратуын алған күннен бастап бес жұмыс күн ішінде құжаттардың тізімдемесін жасап, Қорға бар сақтандыру ісі мен қажетті құжаттарды жібереді не кредитор жөніндегі құжаттар мен ақпараттың жоқтығы туралы хабарлайды.
6. Қор туралы осы Ереженің 2-тармағының 2) тармақшасында көзделген жағдайда мәжбүрлеп таратылатын сақтандыру ұйымының кредиторы Қорға не қатысушы-сақтандыру ұйымына сақтандыру жағдайының басталуы және Қазақстан Республикасының міндетті сақтандыру түрлері туралы заңнамалық актілерде көзделген мерзімде және тәртіппен сақтандыру (кепілдік) төлемін жүзеге асыру туралы өтінішпен хабарласа алады. Қор мекен-жайын көрсете отырып, қатысушы-сақтандыру ұйымдарының тізбесін мемлекеттік және орыс тілдерінде таралатын мерзімді баспасөз басылымдарында жариялайды.
Кредитордың талабын алғаннан кейін қатысушы-сақтандыру ұйымы не Қор міндетті сақтандыру туралы заңнамалық актілерде көзделген тәртіппен сақтандыру жағдайын және келтірілген зиянның мөлшерін анықтау жөніндегі жұмысты жүргізеді.
7. Осы Ереженің 6-тармағында көзделген жағдайда кредиторларға сақтандыру (кепілдік) төлемін жүзеге асыру үшін Қор қатысушы-мәжбүрлеп таратылатын сақтандыру ұйымы туралы соттың шешімі заңды күшіне енген күнінен бастап екі жұмыс күн ішінде тарату комиссиясынан жазбаша түрде міндетті сақтандыру шарты бойынша, оның ішінде сол шарттар бойынша есептелген және төленген сақтандыру сыйлықақының мөлшері туралы ақпаратты, кредиторлар тізілімі мен өтемақы төлемінің тізілімін сұратады.
8. Тарату комиссиясы Қордың сұратуын алған күннен бастап бес жұмыс күн ішінде сұраған ақпаратты Қорға жібереді.
Қор ақпаратты алғаннан кейін бір жұмыс күн ішінде оны қатысушы-сақтандыру ұйымына жібереді.
9. Кредитор қатысушы - сақтандыру ұйымына сақтандыру жағдайының басталуы және кепілдік төлемін жүзеге асыру туралы өтінішпен хабарласқан жағдайда қатысушы - сақтандыру ұйымы кредитор туралы ақпараттың болуын кредиторлар тізілімінен және (немесе) көлік иелерінің азаматтық-құқықтық жауапкершілігін міндетті сақтандыру жөніндегі деректер базасынан (бұдан әрі - деректер базасы) тексереді.
Кредитор туралы мәліметтер кредиторлар тізілімінде және (немесе) деректер базасында болмаған жағдайда қатысушы-сақтандыру ұйымы кредитор мен Қорға өтінішті қабылдаудан бас тартуды жібереді, сондай-ақ кредиторға осы факті бойынша Қорға хабарласу қажеттігін түсіндіреді.
10. Кредитор өзі туралы мәліметтер кредиторлар тізілімінде және (немесе) деректер базасында болмағандықтан Қормен хабарласқан кезде Қор тарату комиссиясына үш жұмыс күн ішінде кепілдік төлемін жүзеге асыру (жүзеге асырудан бас тарту) үшін кредитор жөніндегі ақпаратты беру туралы жазбаша түрде сұраныс жібереді.
11. Тарату комиссиясы Қордың сұратуын алған күннен бастап үш жұмыс күні ішінде Қорға сақтандыру полистің екінші данасын не міндетті сақтандыру шарты бойынша сақтандыру сыйлықақы төлемін растайтын құжатты жібереді.
12. Өтініш берушіде қатысушы-мәжбүрлеп таратылатын сақтандыру ұйымымен міндетті сақтандыру шарты бойынша ақпараты болған кезде қатысушы-сақтандыру ұйымы кредитор міндетті сақтандыру туралы Қазақстан Республикасының заңнамалық актілерінде көзделген құжаттың толық пакетін берген күннен бастап жеті жұмыс күні ішінде сақтандыру төлемі мөлшерінің есебін және сақтандыру актісін жасайды не міндетті сақтандыру туралы Қазақстан Республикасының заңнамалық актілерінде көзделген негіздер бойынша кепілдік төлемін жүзеге асырудан бас тарту жөнінде жазбаша хабарлайды.
13. Қатысушы-сақтандыру ұйымымен осы Ереженің 12-тармағында көрсетілген құжаттарды жасаған күннен бастап екі жұмыс күні ішінде қалыптасқан құжаттар пакетін Қорға жібереді.
Құжаттар пакетіне сақтандыру жағдайын, шығыстар мөлшерін көрсете отырып келтірілген зиян мөлшерін айқындау бойынша жұмысты жүзеге асырумен байланысты шығыстарын Қормен өтеуі туралы қатысушы-сақтандыру ұйымының талабы қоса беріледі. Қор құжаттар пакеті келіп түскен күннен бастап он жұмыс күні ішінде нақты болған шығыстар мөлшерінде, бірақ тиісті қаржы жылына жасалған республикалық бюджет туралы Қазақстан Республикасының Заңында белгіленген жеті айлық есептік көрсеткіштен астам емес мөлшерде қатысушы-сақтандыру ұйымының шығыстарын өтейді.
14. Қор қатысушы-сақтандыру ұйымынан Қазақстан Республикасының міндетті сақтандыру туралы заңнамалық актілерінде және осы Ережеде көзделген құжаттар пакетін алғаннан кейін, Қор кепілдік төлемін жүзеге асыру не жүзеге асырудан бас тарту туралы шешімді осы Ереженің 15-тармағында көрсетілген Қазақстан Республикасының заңнамалық актілерінде белгіленген мерзімде қабылдайды.
15. Қор кепілдік төлемін жүзеге асыру үшін «Көлік құралдары иелерінің азаматтық-құқықтық жауапкершілігін міндетті сақтандыру туралы міндетті сақтандыру түрлері туралы» Қазақстан Республикасының 2003 жылғы 1 шілдедегі Заңымен, «Тасымалдаушының жолаушылар алдындағы азаматтық-құқықтық жауапкершілігін міндетті сақтандыру туралы» Қазақстан Республикасының 2003 жылғы 1 шілдедегі Заңымен және «Туроператордың және турагенттің азаматтық-құқықтық жауапкершілігін міндетті сақтандыру туралы» Қазақстан Республикасының 2003 жылғы 31 желтоқсандағы Заңымен белгіленген тәртіпте, мөлшерде және мерзімде жүзеге асырады.
Қордың кепілдік төлемін жүзеге асыруы үшін кредитор осы Ережеде көзделген құжаттардан басқа жеке басын куәландыратын куәліктің көшірмесін, банктік деректемелер туралы деректерді (бар болғанда) ұсынады.
16. Кепілдік төлемін Қор тікелей өзі немесе кредитордың банк шотына қолма-қол ақшасыз нысанда агент-банк арқылы не тараптардың келісімі бойынша қолма-қол ақшамен жүзеге асырылуы мүмкін.
17. Егер қатысушы-сақтандыру ұйымын мәжбүрлеп тарату туралы соттың шешімі заңды күшіне енген күннен бастап Қор осы Ереженің 15-тармағында көрсетілген Қазақстан Республикасының заңнамалық актілеріндегі талаптарға сәйкес кредитордың талабын қабылдаған ішіндегі уақыт кезеңі аяқталғанға дейін сақтандыру жағдайының басталуына әкеліп соқтырған оқиғаның нәтижесінде кредитордың денсаулығы нашарласа (мүгедектік немесе мүгедектіктің ең жоғарғы тобы белгіленеді) не ол қайтыс болса, Қор кредитордан немесе оның мұрагерлерінен келіп түскен өтініштің және тиісті құжаттардың негізінде Қазақстан Республикасының міндетті сақтандыру туралы заңнамалық актілерінде белгіленген тәртіппен және мерзімде кепілдік төлемінің сомасын қайта есептейді. Кепілдік төлемінің сомасын қайта есептеген кезде есепке бұрын төленген сомалар қабылданады.
18. Кредитордың (сақтанушының) мәжбүрлеп таратылатын сақтандыру ұйымы алдында сақтандыру сыйлықақылары бойынша берешегі болған жағдайда, Қор осы кредиторға төлейтін кепілдік төлемінің мөлшерін, берешек сомасын шегере отырып, белгілейді.
19. Кепілдік төлемін жүзеге асырудан бас тартылған жағдайда, мәжбүрлеп таратылатын сақтандыру ұйымының кредиторына кепілдік төлемін жүзеге асырудан бас тарту себептерін негіздей отырып, осы Ереженің 15-тармағында көрсетілген Қазақстан Республикасының заңнамасында белгіленген мерзімде жазбаша хабарлама жіберіледі.
Қор бір уақытта мәжбүрлеп таратылатын сақтандыру ұйымының тарату комиссиясына кепілдік төлемін жүзеге асырудан бас тарту жөнінде хабарлайды.
20. Кепілдік төлемінің төленген сомаларын салыстырып тексеру Қор және агент-банк жасайтын кепілдік төлемінің төленген сомалары бойынша салыстырып тексеру актісінің негізінде, төлемдер жүзеге асырылған күннен бастап жеті жұмыс күні ішінде жүзеге асырылады.
3-тарау. Қордың өтемақы төлемдерін жүзеге асыруы
21. Қолданылу мерзімі аяқталмаған қатысушы-мәжбүрлеп таратылатын сақтандыру ұйымының міндетті сақтандыру шарттары бойынша сақтанушы соттың шешімі заңды күшіне енген күнінен бастап екі айлық мерзімде қатысушы-сақтандыру ұйымымен мәжбүрлеп таратылатын сақтандыру ұйымымен бұрын жасалған міндетті сақтандыру шарты қолдануға тиіс болатын қалған уақытқа міндетті сақтандыру шартын жасай алады.
22. Сақтанушы қатысушы-сақтандыру ұйымымен қалған уақытқа міндетті сақтандыру шартын жасау үшін қатысушы-сақтандыру ұйымына міндетті сақтандыру шартын жасау туралы өтінішпен хабарласады әрі оған мынадай құжаттарды:
1) сақтандыру полисінің (сақтандыру шартының) түпнұсқасын немесе оның дубликатын;
2) өтініш берушінің (егер сақтанушы - жеке тұлға болса) жеке басын куәландыратын құжаттың көшірмесін не сақтанушының мүдделерін білдіру құқығын растайтын құжаттың түпнұсқасын (егер сақтанушы - заңды тұлға болса) қоса береді.
23. Кредитордың міндетті сақтандыру шартын жасау туралы өтінішін алған кезде қатысушы-сақтандыру ұйымы кредитор туралы ақпараттың болуын кредиторлар тізілімінен және (немесе) деректер базасынан тексереді.
Сақтанушы туралы мәліметтер өтемақы төлемі тізілімінде және (немесе) деректер базасында болмаған жағдайда қатысушы-сақтандыру ұйымы сақтанушыға міндетті сақтандыру шартын жасауға бас тартады, сондай-ақ осы факті бойынша Қорға хабарласу қажеттігін түсіндіреді.
24. Сақтанушы өзі туралы мәліметтер кредиторлар тізілімінде және (немесе) деректер базасында болмағандықтан, Қормен хабарласқан кезде, Қор тарату комиссиясына қатысушы-сақтандыру ұйымымен міндетті сақтандыру шартын жасауға сақтанушы жөніндегі ақпаратты беру туралы жазбаша түрде сұраныс жібереді.
25. Тарату комиссиясы Қордың сұратуын алған күннен бастап үш жұмыс күні ішінде Қорға сақтандыру полистің екінші данасын не міндетті сақтандыру шарты бойынша сақтандыру сыйлықақы төлемін растайтын құжатты жібереді.
26. Өтемақы төлемі тізілімінде және (немесе) деректер базасында сақтанушы туралы деректердің болуын растаған кезде қатысушы-сақтандыру ұйымы екі жұмыс күні ішінде онымен бұрын жасалған шарттың аяқталмаған қолданылу кезеңіне міндетті сақтандыру шартын жасайды және Қорға мынадай құжаттарды:
1) кредитор мен мәжбүрлеп таратылатын сақтандыру ұйым арасында жасалған міндетті сақтандыру шарттарының (сақтандыру полисінің) түпнұсқаларын немесе олардың дубликаттарын;
2) кредитор мен Қор қатысушысы-сақтандыру ұйымы арасында жасалған міндетті сақтандыру шарттарының (сақтандыру полисінің) көшірмелерін;
3) әрбір кредитор қимасында өтемақы төлемі мөлшерінің есебін, заңды және жеке тұлғалар бойынша қимасындағы өтемақы төлемінің жалпы есептелген сомасын көрсете отырып кредиторлардың тізімін ұсынады.
27. Өтемақы төлемінің мөлшері жаңадан жасалған міндетті сақтандыру шартының қолданылу кезеңіне қарай Қазақстан Республикасының міндетті сақтандыру туралы заңнамалық актілеріне сәйкес айқындалады. Жаңадан жасалған шарттың қолданылу мерзімі жаңа шартты жасау күнінен бастап және сақтанушы мәжбүрлеп таратылатын сақтандыру ұйымымен бұрын жасалған міндетті сақтандыру шарты қолданыста болатын мерзім аяқталғанға дейінгі кезең болады.
28. Осы Ереженің 27-тармағына сәйкес өтемақы төлемі мөлшерінің есебін жүзеге асыру мақсатында мәжбүрлеп таратылатын сақтандыру ұйымының тарату комиссиясы Қорға міндетті сақтандыру шарттары бойынша сақтандыру сыйлықақыларының төлемі бойынша борыш сомасын және сақтандыру полистері нөмірлерін көрсете отырып дебиторлар тізілімін ұсынады.
29. Қор екі жұмыс күні ішінде қатысушы-сақтандыру ұйымдарына жүзеге асырылатын өтемақы төлемдерінің келесі салыстырып тексеру және есептеу үшін дебиторлар тілімдемесін береді.
30. Қор құжаттарды алғаннан кейін он жұмыс күні ішінде қатысушы-сақтандыру ұйымының банк шотына өтемақы төлемінің сомасын аударады. Бұл ретте төлем тапсырмасына тиесілі өтемақы төлемінің сомасын көрсете отырып сақтанушылар тізімі қоса беріледі.
31. Қор мәжбүрлеп таратылатын сақтандыру ұйымымен жасалған міндетті сақтандыру шарты бойынша сақтанушы сақтандыру сыйлықақысын толық емес төлеген жағдайда сақтанушы төлемеген сақтандыру сыйлықақы сомасын шегере отырып, өтемақы төлемін жүзеге асырады.
4-тарау. Қорытынды ережелер
32. Қор және тарату комиссиясы қатысушы-сақтандыру ұйымын мәжбүрлеп тарату туралы сот шешімі заңдық күшіне енген күнінен бастап алты ай мерзімі өткеннен кейін мынадай мәліметтері:
1) кредиторлар деректері, кепілдік төлемінің мөлшері, сондай-ақ кепілдік төлемін жүзеге асыруға байланысты Қормен шеккен шығын мөлшері көрсетілген кепілдік төлемін алған кредиторлар тізімі;
2) кредиторлар деректері көрсетілген кепілдік төлемін жүзеге асыруға бас тарту туралы шешімі қабылданған кредиторлар тізімі;
3) тарату комиссиясына қайтарылған сақтандыру істері;
4) деректері мен өтемақы төлемінің мөлшері көрсетілген, Қормен өтемақы төлемі жүзеге асырылған бойынша басқа қатысушы-сақтандыру ұйымымен міндетті сақтандыру шартын жасаған сақтанушылар тізімі бар салыстырып тексеру актісіне қол қояды.
33. Қор мен тарату комиссиясы салыстырып тексеру актісіне қол қойған кезде Қор кепілдік төлемін жүзеге асырудан бас тарту туралы шешімін қабылдаған бойынша кредиторлардың сақтандыру істерін Қор тарату комиссиясына бір уақытта тізімдеме бойынша тапсырады.
34. Қормен кепілдік төлемі жүзеге асырылған бойынша кредиторлардың құжаттары қатысушы-сақтандыру ұйымын мәжбүрлеп тарату туралы сот шешімі заңды күшіне енген күннен бастап Қорда үш жыл бойы сақталады.
35. Кредиторлар сақтандыру ұйымын мәжбүрлеп тарату туралы сот шешімі заңды күшіне енген күннен бастап алты ай мерзімі аяқталғаннан кейін тарату ісін жүргізу тәртібімен олардың талаптарын қарау және қанағаттандыру мақсатында мәжбүрлеп таратылатын сақтандыру ұйымының тарату комиссиясына хабарласады.
36. Кепілдік және (немесе) өтемақы төлемдері жүзеге асырылған күннен бастап Қорға жүзеге асырылған кепілдік және өтемақы төлемінің көлемінде кредитордың таратылатын сақтандыру ұйымына болған кері талап ету құқығы көшеді.
Қазақстан Республикасы
Қаржы нарығын және қаржы
ұйымдарын реттеу мен қадағалау
агенттігі Басқармасының
2010 жылғы 30 сәуірдегі
№ 62 қаулысына қосымша
Күші жойылды деп танылатын нормативтік құқықтық актілердің тізбесі
1. Агенттік Басқармасының «Сақтандыру төлемдеріне кепілдік беру қорының кепілдік және өтемақы төлемдерін жүзеге асыру ережесін бекіту туралы және Қазақстан Республикасының Ұлттық Банкі Басқармасының «Сақтандыру төлемдеріне кепілдік беру қорына қатысудың үлгі шартын бекіту туралы» 2003 жылғы 24 қыркүйектегі № 345 қаулысына өзгерістер мен толықтырулар енгізу туралы» 2006 жылғы 25 наурыздағы № 71 қаулысының 1-тармағы (Нормативтік құқықтық актілерді мемлекеттік тіркеу тізілімінде № 4221 тіркелген);
2. Агенттік Басқармасының «Қазақстан Республикасының кейбір нормативтік құқықтық актілеріне сәйкестендіру нөмірлері бойынша өзгерістер мен толықтырулар енгізу туралы» 2007 жылғы 28 мамырдағы № 155 қаулысының 17-тармағы (Нормативтік құқықтық актілерді мемлекеттік тіркеу тізілімінде № 4803 тіркелген);
3. Агенттік Басқармасының «Қазақстан Республикасы Қаржы нарығын және қаржы ұйымдарын реттеу мен қадағалау агенттігінің кейбір нормативтік құқықтық актілеріне «Сақтандыру төлемдеріне кепілдік беру қоры» акционерлік қоғамының қызметі мәселелері бойынша өзгерістер мен толықтырулар енгізу туралы» 2010 жылғы 1 наурыздағы № 21 қаулысының 2-тармағы (Нормативтік құқықтық актілерді мемлекеттік тіркеу тізілімінде № 6155 тіркелген).