Қазақстан Республикасының Кәсіпкерлік кодексінің 282, 286 және 294-баптарына сәйкес Қазақстан Республикасының Үкiметi ҚАУЛЫ ЕТЕДІ:

      1. Қоса беріліп отырған:

      1) инвестицияларды жүзеге асыруды және инвестициялық преференциялар беруді көздейтін инвестициялық жобаны іске асыруға арналған модельдік келісімшарт (бұдан әрі – модельдік келісімшарт);

      2) инвестициялық жобаларды іске асыруға арналған қызметтің басым түрлерінің тізбесі;

      3) Мемлекеттік органдардың мамандарын, Қазақстан Республикасының жеке және заңды тұлғалары арасынан консультанттар мен сарапшыларды тарту қағидалары бекітілсін.

      2. Осы қаулыға қосымшаға сәйкес Қазақстан Республикасы Үкіметінің кейбір шешімдерінің күші жойылды деп танылсын.

      3. Осы қаулы, 2017 жылғы 1 қаңтардан бастап қолданысқа енгізілетін модельдік келісімшарттың 3-тармағы 1) тармақшасының төртінші абзацын қоспағанда, алғашқы ресми жарияланған күнінен бастап қолданысқа енгізіледі.

Инвестицияларды жүзеге асыруды және инвестициялық преференциялар беруді көздейтін инвестициялық жобаны іске асыруға арналған модельдік келісімшарт

      Ескерту. Келісімшартқа өзгерістер енгізілді – ҚР Үкіметінің 27.12.2019 № 987 (алғашқы ресми жарияланған күнінен бастап қолданысқа енгізіледі); 12.01.2021 № 4 ("ҚР кейбір заңнамалық актілеріне экономикалық өсуді қалпына келтіру мәселелері бойынша өзгерістер мен толықтырулар енгізу туралы" 02.01.2021 ҚР Заңы қолданысқа енгізілген күннен бастап қолданысқа енгізіледі); 25.10.2021 № 764 (алғашқы ресми жарияланған күнінен бастап қолданысқа енгізіледі); 22.10.2022 № 840 (алғашқы ресми жарияланған күнінен бастап қолданысқа енгізіледі); 23.02.2023 № 158 (алғашқы ресми жарияланған күнінен бастап қолданысқа енгізіледі) қаулыларымен.

      Астана қаласы ________________________________________ (күні, айы, жылы)

      Осы инвестицияларды жүзеге асыруды және инвестициялық

      преференциялар беруді көздейтін инвестициялық жобаны іске

      асыруға арналған келісімшарт бұдан әрі Тараптар деп аталатын,

      ___________________________________ негізінде әрекет ететін

      (ереже немесе бұйрық)

      ________________________ (бұдан әрі - уәкілетті орган) атынан

      (уәкілетті органның атауы)

      __________________________________________________ мен

      (басшының немесе оның міндетін атқарушы адамның

      тегі, аты, әкесінің аты (бар болса)

      ___________________ негізінде әрекет ететін, инвестициялық

      жобаны іске (жарғы немесе сенімхат) асыратын

      _______________________________________________________,

      (Қазақстан Республикасының заңды тұлғасының атауы,

      мемлекеттік тіркеу нөмірі, күні)

      атынан _________________________________________________

      (басшының немесе өзге уәкілетті адамның тегі, аты,
әкесінің аты (бар болса) (бұдан әрі – инвестор) арасында жасалды.

      Мыналарды:

      1) Қазақстан Республикасының Конституциясына негізделген, бағыттарының бірі экономиканы дамыту үшін қолайлы инвестициялық жағдай жасау және заманауи технологияларды қолданып инвестицияларды жаңа өндірістерді құруға, жұмыс істеп тұрғандарын кеңейтуге және жаңартуға салуды ынталандыру, қазақстандық кадрлардың біліктілігін арттыру, сондай-ақ қоршаған ортаны қорғау болып табылатын Қазақстан Республикасының кәсіпкерлік саласындағы заңнамасын;

      2) уәкілетті органға тікелей инвестициялық келісімшартты жасасумен және орындалуын бақылаумен байланысты құқықтар берілгенін;

      3) уәкілетті орган мен инвестор инвестициялық келісімшарттың ___________________________________ (инвестициялық жобаның атауы) іске асыру кезінде олардың өзара құқықтары мен міндеттерін реттейтіні туралы уағдаласқандарын назарға ала отырып, уәкілетті орган мен инвестор мыналар туралы осы инвестициялық келісімшартты жасасты.

1. Негізгі ұғымдар

      1. Осы инвестициялық келісімшартта пайдаланылатын негізгі ұғымдар:

      1) инвестициялық келісімшарт – инвестицияларды жүзеге асыруды және инвестициялық преференциялар беруді көздейтін инвестициялық жобаны іске асыруға арналған шарт;

      2) кірістер – төленетін нысанына қарамастан, пайданы, дивидендтерді және басқа да сыйақыларды қоса алғанда, инвестициялық немесе онымен байланысты қызметтен алынатын кірістер;

      3) материалдық емес активтер – жиынтық жылдық кіріс алу үшін ұзақ мерзімді кезең ішінде (бір жылдан астам) пайдаланылатын материалдық емес объектілер;

      4) форс-мажор – инвестициялық келісімшарттың одан әрі орындалу барысын қиындататын немесе оған мүмкіндік бермейтін еңсерілмейтін күш мән-жайлары (дүлей құбылыстар, соғыс қимылдары, төтенше жағдай және т.с.с.);

      5) үшінші тұлға – инвестициялық келісімшарт бойынша Тарап болып табылмайтын кез келген тұлға;

      6) жұмыс бағдарламасы – өндiрiсті пайдалануға бергенге дейiн инвестициялық жобаны iске асыру жөнiндегi жұмыстардың күнтiзбелiк кестесiн айқындайтын, инвестициялық келiсiмшартқа 1-қосымша;

      7) инвестициялық жоба – мемлекеттік-жекешелік әріптестік жобасын, оның ішінде концессиялық жобаны іске асыру барысында тауарлардың, жұмыстар мен көрсетілетін қызметтердің құрылған, кеңейтілген және (немесе) жаңартылған өндірісін қоса алғанда, тауарлардың, жұмыстар мен көрсетілетін қызметтердің жаңа өндірістерін құруға, жұмыс iстеп тұрғандарын кеңейтуге және (немесе) жаңартуға инвестициялар көздейтiн iс-шаралар кешені;

      8) инвестициялық басым жоба –

      егер Қазақстан Республикасының Кәсіпкерлік кодексінде өзгеше көзделмесе, заңды тұлғаның жаңа өндірістік объектілердің құрылысына республикалық бюджет туралы заңда белгіленген және инвестициялық преференциялар беруге өтінім берілген күні қолданыста болатын айлық есептік көрсеткіштің екі миллион еселенген мөлшерінен кем болмайтын мөлшердегі инвестицияларды жүзеге асыруын көздейтін тауарлардың, жұмыстар мен көрсетілетін қызметтердің жаңа өндірістерін құру бойынша;

      егер Қазақстан Республикасының Кәсіпкерлік кодексінде өзгеше көзделмесе, заңды тұлғаның негізгі құралдарды өзгертуге, оның ішінде өнім шығаратын жұмыс істеп тұрған өндірістік қуаттарды жаңартуға (реновациялау, реконструкциялау, жаңғырту) республикалық бюджет туралы заңда белгіленген және инвестициялық преференциялар беруге өтінім берілген күні қолданыста болатын айлық есептік көрсеткіштің бес миллион еселенген мөлшерінен кем болмайтын мөлшердегі инвестицияларды жүзеге асыруын көздейтін тауарлардың, жұмыстар мен көрсетілетін қызметтердің жаңа өндірістерін кеңейту және (немесе) жаңарту бойынша инвестициялық жоба.

2. Инвестициялық келісімшарттың нысанасы

      2. Осы инвестициялық келісімшарттың нысанасы инвесторға инвестициялық жоба шеңберінде Қазақстан Республикасының инвестициялар туралы заңнамасында көзделген инвестициялық преференциялар беру болып табылады.

      3. Инвесторға:

      1) инвестициялық жоба (оның ішінде инвестициялық басым жоба) бойынша инвестициялық преференциялардың мынадай түрлері беріледі:

      технологиялық жабдықты және оның жинақтауыштарын импорттау кезінде инвестициялық келісімшарттың қолданылу мерзіміне, бірақ осы инвестициялық келісімшартқа 2-қосымшаға сәйкес инвестициялық келісімшарт тіркелген кезден бастап 5 (бес) жылдан аспайтын мерзімге кедендік баж салудан босату;

      инвестициялық келісімшартқа 3-қосымшаға сәйкес тіркелген активтерге инвестициялардың көлеміне қарай технологиялық жабдықтың қосалқы бөлшектерін импорттау кезінде 5 (бес) жылға дейінгі мерзімге кедендік баж салудан босату;

      жұмыс бағдарламасы бойынша тіркелген активтер пайдалануға берілген күннен бастап осы инвестициялық келісімшартқа 3-қосымшаға сәйкес шикізатты және (немесе) материалдарды импорттау кезінде 5 (бес) жыл мерзімге кедендік баж салудан босату;

      инвестициялық келісімшартқа 4-қосымшаға сәйкес жұмыс бағдарламасында көзделген тіркелген активтер пайдалануға енгізілген айдың 1 күнінен бастап қатарынан 5 (бес) жыл мерзімге шикізат және (немесе) материалдар импортын қосылған құн салығынан босату;

      мемлекеттік заттай грант: инвестициялық келісімшартқа сәйкес инвестициялық міндеттемелерін орындаған жағдайда ______ түрінде ________ құқығында кейіннен ______;

      2) инвестициялық басым жоба бойынша инвестициялық преференциялардың мынадай түрлерi берiледi:

      салықтар бойынша преференциялар:

      тауарлардың, жұмыстар мен көрсетілетін қызметтердің жаңа өндірістерін құру бойынша:

      инвестициялық басым жобаны іске асыруға арналған инвестициялық келісімшарт жасалған жылдың 1 қаңтарынан бастап және инвестициялық басым жобаны іске асыруға арналған инвестициялық келісімшарт жасалған жылдан кейінгі жылдың 1 қаңтарынан бастап есептелетін, қатарынан келетін 10 (он) жылдан кешіктірмей аяқталатын инвестициялық келісімшартта көрсетілген басым қызмет түрлерін жүзеге асырудан алынған кірістер бойынша корпоративтік табыс салығын 100 пайызға азайту;

      инвестициялық келісімшарт жасалған айдың 1 күнінен бастап және инвестициялық басым жобаны іске асыруға арналған инвестициялық келісімшарт жасалған жылдан кейінгі жылдың 1 қаңтарынан бастап есептелетін, қатарынан келетін 10 (он) жылдан кешіктірмей аяқталатын жер салығының мөлшерлемелеріне 0 коэффициентін қолдану;

      халықаралық қаржылық есептілік стандарттарына және Қазақстан Республикасының бухгалтерлік есеп және (немесе) қаржылық есептілік туралы заңнамасының талаптарына сәйкес бірінші актив негізгі құралдар құрамында ескерілген айдың 1-і күнінен бастап және халықаралық қаржылық есептілік стандарттарына және Қазақстан Республикасының бухгалтерлік есеп және (немесе) қаржылық есептілік туралы заңнамасының талаптарына сәйкес бірінші актив негізгі құралдар құрамында ескерілген жылдан кейінгі жылдың 1 қаңтарынан бастап есептелетін, қатарынан келетін 8 (сегіз) жылдан кешіктірмей аяқталатын салықтық базаға 0 пайыз мөлшерлемесі бойынша мүлік салығын есептеу;

      жұмыс істеп тұрған тауарлардың, жұмыстар мен көрсетілетін қызметтердің өндірістерін кеңейту және (немесе) жаңарту бойынша:

      инвестициялық басым жобаны іске асыруға арналған инвестициялық келісімшарт шеңберінде өнім шығаратын соңғы тіркелген активті пайдалануға беру жүргізілген жылдан кейінгі жылдың 1 қаңтарынан бастап және инвестициялық басым жобаны іске асыруға арналған инвестициялық келісімшарт шеңберінде өнім шығаратын соңғы тіркелген активті пайдалануға беру жүргізілген жылдан кейінгі жылдың 1 қаңтарынан бастап есептелетін, қатарынан келетін 3 (үш) жылдан кешіктірмей аяқталатын инвестициялық келісімшартта көрсетілген басым қызмет түрлерін жүзеге асырудан алынған кірістер бойынша корпоративтік табыс салығын 100 пайызға азайту;

      инвестициялық басым жобаны іске асыруға арналған инвестициялық келісімшартта көзделген өнімді шығаратын тіркелген активтерді кезең-кезеңімен енгізу кезінде жұмыс істеп тұрған тауарлардың, жұмыстар мен көрсетілетін қызметтердің өндірістерін кеңейту және (немесе) жаңарту бойынша:

      инвестициялық жоба шеңберінде өнім шығаратын тіркелген активті пайдалануға беру жүргізілген жылдан кейінгі жылдың 1 қаңтарынан бастап және инвестициялық жоба шеңберінде пайдалануға берілген, өнім шығаратын тіркелген активті енгізу жүргізілген жылдан кейінгі жылдың 1 қаңтарынан бастап есептелетін, қатарынан келетін 3 (үш) жылдан кешіктірмей аяқталатын инвестициялық келісімшартта көрсетілген басым қызмет түрлерін жүзеге асырудан түскен кірістер бойынша корпоративтік табыс салығын 100 пайызға азайту.

3. Инвестициялық келісімшарттың мақсаты

      4. Осы инвестициялық келісімшарт _____________________________ (қызметтің басым түрлерінің атауы) сыныбына сәйкес _________________

      ________________________________ (инвестициялық немесе инвестициялық басым жоба) іске асыру кезінде инвестициялық преференцияларды беру мақсатында қолдану құқығына сәйкес уәкілетті орган мен инвестор арасындағы шарттық өзара қарым-қатынастардың заңды шеңберін белгілейді.

4. Инвестициялық қызмет объектісі

      5. Осы инвестициялық келісімшарт бойынша инвестициялық қызмет объектісі мыналарды:

      тіркелген активтерге инвестицияларды:

      қамтитын, ________________________________________ орналасқан

      (мекенжайы)

      ____________________________________________________болып табылады.

      (инвестициялық жобаның атауы)

5. Тараптардың құқықтары

      6. Уәкілетті органның:

      1) өкілеттіктерді табыстау шегінде инвесторлармен тікелей келіссөздер жүргізу кезінде Қазақстан Республикасының атынан өкілдік етуге;

      2) инвестициялық келісімшарттардың талаптарын және оны жасасу мен бұзу тәртібін айқындауға, инвестициялық келісімшарт жасасуға және тіркеуге;

      3) инвестициялық жобаны іске асыруға бақылау жүргізуге, оның ішінде осы инвестициялық келісімшарттың 19, 20 және 21-тармақтарына сәйкес Инвестордан инвестициялық келісімшарттың талаптарын орындау жөнінде есепті талап етуге, сондай-ақ инвестициялық жобаға қатысты өзге де ақпаратты сұратуға;

      4) осы инвестициялық келісімшартқа 6-қосымшада көрсетілген мүдделі заңды тұлғалар талаптарына кепілдендірілген тапсырысты қамтамасыз етуге жәрдем көрсетуге;

      5) Уәкілетті орган туралы ережеде және Қазақстан Республикасының заңнамасында көзделген өзге де құқықтары бар.

      7. Инвестордың:

      1) инвестициялық жобаны іске асыру үшін инвестициялық келісімшарт талаптарына және Қазақстан Республикасының қолданыстағы заңнамасына қайшы келмейтін кез келген әрекет жасауға;

      2) Қазақстан Республикасының салық заңнамасына сәйкес салықтарды және бюджетке төленетiн басқа да міндетті төлемдердi төлегеннен кейiн өз еркімен алынған кірістерді өз қалауы бойынша пайдалануға;

      3) Қазақстан Республикасының аумағындағы банктерде Қазақстан Республикасының банк және валюталық заңнамасына сәйкес ұлттық валютада және (немесе) шетелдiк валютада банк шоттарын ашуға;

      4) инвестициялық басым жобаларды іске асыру үшін тартылатын шетелдік жұмыс күшін осы инвестициялық келісімшартқа 7-қосымшаға сәйкес кәсіптер тізбесі мен сан бойынша тартуға құқығы бар.

6. Тараптардың міндеттері

      8. Уәкілетті орган өз құзыреті шегінде:

      1) осы инвестициялық келісімшартты жасасу арқылы инвестициялық преференциялар беруге;

      2) инвестордың қатысуымен инвестициялық дауларды сотқа дейінгі тәртіппен реттеуде көмек көрсетуге міндеттенеді.

      9. Инвестор:

      1) жұмыс бағдарламасына сәйкес осы инвестициялық келісімшарттың 5-тармағында көрсетілген инвестицияларды жүзеге асыруға және тіркелген активтерді пайдалануға енгізуге;

      2) инвестициялық жобаны іске асыру кезінде осы инвестициялық келісімшарттың ережелерін сақтауға;

      3) осы инвестициялық келісімшарттың 4-тармағында көрсетілген қызмет түрін өзгертпеуге және инвестициялық преференциялар берілетін келісілген инвестициялық жобаның шарттарын бұзбауға;

      4) қазақстандық кадрларды үздіксіз оқыту жүйесін енгізуге және олардың біліктілігін арттыру жөнінде жұмыс жүргізуге;

      5) уәкілетті орган талап еткен инвестициялық жобаның іске асырылу барысы туралы ақпаратты беруге және осы инвестициялық келісімшарттың 19, 20 және 21-тармақтарына сәйкес есеп беру мерзімін сақтауға;

      6) инвестициялық келісімшарт қолданылатын мерзімде берілген мемлекеттік заттай грантты және инвестициялық келісімшарттың жұмыс бағдарламасына сәйкес сатып алынған тіркелген активтерді иеліктен айырмауға және олардың нысаналы мақсатын өзгертпеуге;

      7) инвестициялық келісімшарт қолданылатын мерзімде осы инвестициялық келісімшарттың шеңберінде 4-тармақта көрсетілген қызметті жүзеге асыру үшін осы инвестициялық келісімшартқа 3-қосымшаға сәйкес импортталған технологиялық жабдыққа қосалқы бөлшектерді, шикізатты және материалдарды қолдануға;

      8) өз тарапынан мемлекеттің және (немесе) квазимемлекеттік сектор субъектісінің инвестициялық келісімшарт тіркелген күннен бастап 5 (бес) жыл ішінде, ал құйма өнімді өндіруді қоса алғанда, машина жасау саласындағы инвестициялық басым жобалар бойынша инвестициялық келісімшарт тіркелген күннен бастап 20 (жиырма) жыл ішінде инвестордың құрылтайшысы және (немесе) қатысушысы (акционері) құрамынан шығуын қамтамасыз етуге міндеттенеді.

      Осы тармақшаның ережелері мемлекеттің және (немесе) квазимемлекеттік сектор субъектісінің инвестордың құрылтайшысы және (немесе) қатысушысы (акционері) ретіндегі үлесі 50 пайыздан кем болатын квазимемлекеттік сектор субъектісі өз қызметін көмір қабаттарындағы метанды өндіру жөніндегі инвестициялық басым жобаны іске асыру шеңберінде жүзеге асыратын жағдайда қолданылмайды.

7. Салықтар және төлемдер

      10. Инвестор Қазақстан Республикасының қолданыстағы салық заңнамасына сәйкес салық және бюджетке төленетін басқа да міндетті төлемдерді төлеуге міндеттенеді.

8. Форс-мажор

      11. Инвестициялық келісімшарт бойынша қандай да болмасын орындалмаған міндеттемелер үшін, егер мұндай орындамау немесе орындау кезінде кідірту еңсерілмейтін күш (бұдан әрі – форс-мажор) мән-жайынан туған болса, Тараптардың ешқайсысы жауапты болмайды.

      12. Форс-мажорға еңсерілмейтін күш мән-жайлары, яғни төтенше және осы жағдайлар кезiнде тойтаруға болмайтын мән-жайлар (дүлей құбылыстар, соғыс қимылдары, төтенше жағдай және т.с.с.) жатады.

      13. Инвестициялық келісімшарт бойынша жұмыстардың форс-мажор мән-жайларынан туындаған толық немесе ішінара тоқтауы кезінде жұмыс бағдарламасына өзгерістер енгізу жолымен осы жұмыстардың жүргізілу мерзімі форс-мажордың әрекет ету мерзіміне ұзартылады және форс-мажор аяқталған сәттен бастап жаңартылады.

      14. Форс-мажор жағдайлары туындаған жағдайда, одан зардап шеккен Тарап ол басталған күннен бастап 15 жұмыс күні ішінде бұл туралы форс-мажор оқиғасы басталған күнді және сипаттамасын көрсете отырып, жазбаша хабарламаны тапсыру жолымен екінші Тарапты хабардар етеді.

      15. Форс-мажор мән-жайлар туындаған кезде Тараптар қалыптасқан жағдайдан шығудың шешуін іздеу үшін дереу келіссөздер өткізеді және мұндай жағдайлардың зардаптарын барынша азайту үшін барлық құралдарды пайдаланады.

9. Құпиялылық

      16. Тараптар Қазақстан Республикасының заңнамасына сәйкес осы инвестициялық келісімшарттың әрекет ету мерзімі ішінде оны іске асыру жөніндегі жұмысқа қатысты барлық құжаттар, ақпарат және есептер жөніндегі құпиялылық шарттарын (осы инвестициялық келісімшарттың 17-тармағына сәйкес) сақтайды.

      17. Мына:

      1) ақпарат сот тергеуі барысында пайдаланылатын;

      2) егер үшінші тұлға мұндай ақпараттың құпиялылығы шарттарын сақтау және ол ақпаратты Тараптар белгіленген мақсаттарда және Тараптар анықтаған мерзімде ғана пайдалану міндеттемесін өзіне алған жағдайда, ақпарат Тараптардың біріне инвестициялық келісімшарт бойынша қызмет көрсететін үшінші тұлғаларға берілген;

      3) инвестициялық келісімшарт бойынша Тарап қаржы қаражатын алатын банк немесе басқа қаржы ұйымы бұл ақпараттың құпиялылық шарттарын сақтауға міндеттеме алуы шартымен ақпарат осындай банкке немесе басқа қаржылық ұйымына берілген;

      4) кез келген, оның iшiнде инвестордың, оның ішiнде Қазақстан Республикасынан тысқары шетелдiк банктерде ашылған кез келген шоттарына қатысты банктік құпия болып табылатын ақпаратқа қол жетімділігі бар салық немесе өзге де Қазақстан Республикасының мемлекеттік уәкiлеттi органдарына берілген;

      5) егер жасалған инвестициялық келісімшарт бойынша инвестициялық жобаны іске асыруға қатысты нормативтік құқықтық актілерді уәкілетті орган бұқаралық ақпарат құралдарында жариялаған жағдайлардан басқа, екінші Тараптан жазбаша келісім алмайынша, Тараптардың ешқайсысының инвестициялық келісімшарттың мазмұнына қатысты ақпаратты немесе инвестициялық жобаны жүзеге асыруға байланысты және құпия деп есептелетін өзге де ақпаратты ашуға құқығы жоқ. Бұл ретте уәкілетті орган инвестициялардың сомасы мен іске асырылатын өңірлердің құрылатын жұмыс орындарының саны және инвестициялық жобаның атауы туралы ақпаратты ғана жариялауға құқылы.

10. Инвестициялық келісімшарт талаптарының сақталуын бақылау

      18. Инвестициялық келісімшарт талаптарының сақталуын бақылауды уәкілетті орган мынадай нысандарда жүзеге асырады:

      1) камералдық бақылау – уәкілетті орган осы инвестициялық келісімшарттың 19, 20 және 21-тармақтарына сәйкес ұсынылған есептерді зерделеу және талдау негізінде жүзеге асыратын бақылау;

      2) инвестициялық қызмет объектісіне бару, оның ішінде жұмыс бағдарламасын және инвестициялық келісімшарт талаптарын орындау жөніндегі құжаттарды қарастыру арқылы.

      19. Инвестициялық келісімшарт жасасқаннан кейін Инвестор уәкілетті орган белгілейтін нысан бойынша тіркелген активтердің пайдалануға берілуін, технологиялық жабдықтың қосалқы бөлшектерінің, шикізаттың және (немесе) материалдардың жеткізілуі мен пайдаланылуын растайтын құжаттарды қоса бере отырып, жұмыс бағдарламасында көзделген шығындар баптары бойынша таратып жазып, инвестициялық келісімшарттың орындалуы туралы жартыжылдық есептерді жиырма бесінші шілдеден және жиырма бесінші қаңтардан кешіктірмей береді.

      20. Мемлекеттің және (немесе) квазимемлекеттік сектор субъектісінің құрылтайшы және (немесе) қатысушы (акционер) құрамынан шығуы жөніндегі талапты растау үшін инвестор Қазақстан Республикасы заңды тұлғасының құрылтайшысы және (немесе) қатысушысы (акционері) құрамынан шығу мерзімі өткеннен кейін күнтізбелік отыз күн ішінде уәкілетті органға басшының қолымен және инвестордың мөрімен (бар болса) расталған жарғының көшірмесін ұсынады.

      21. Инвестициялық келісімшарт жасасқан инвестор жұмыс бағдарламасын іске асыруды аяқтағаннан кейін екі ай ішінде инвестициялар жөніндегі уәкілетті органға аудиторлық есепті ұсынады, онда мыналар қамтылуға тиіс:

      1) жұмыс бағдарламасына сәйкес инвестициялық міндеттемелердің орындалуы туралы ақпарат;

      2) жұмыс бағдарламасына сәйкес сатып алынған тіркелген активтер бойынша таратып жазу;

      3) жұмыс бағдарламасының орындалғанын растайтын құжаттардың жиынтық тізілімі;

      4) инвестициялық келісімшарт талаптарының орындалуы туралы мәліметтер.

      22. Инвестициялық келісімшартқа қосымшаға өзгерiстер тараптардың келiсуi бойынша жылына екі рет енгiзiлуі мүмкін.

      23. Инвестициялық қызмет объектісіне барып тексеру жұмыс бағдарламасы аяқталған жағдайда тіркелген активтер пайдалануға берілгеннен кейін алты ай кезеңінде жүргізіледі.

      24. Тексеру нәтижелері бойынша уәкілетті органның өкілі мен инвестордың басшысы уәкілетті орган белгілеген нысан бойынша инвестициялық келісімшарттың жұмыс бағдарламасы орындалуының ағымдағы жай-күйі актісіне қол қояды.

      25. Инвестор инвестициялық келісімшарт бойынша міндеттемелерін орындамаған не тиісінше орындамаған кезде және келісімшартқа өзгерістер енгізу үшін инвестор инвестициялық жобаның одан әрі іске асырылу мүмкіндіктерін негіздейтін құжаттарды ұсынбаған жағдайда инвестициялар жөніндегі уәкілетті орган хабарлама жіберілген сәттен бастап үш ай өткен соң біржақты тәртіппен инвестициялық келісімшарттың қолданылуын мерзімінен бұрын тоқтатады.

      Инвестициялық келісімшарт бұзылған жағдайда көрсетілген инвестор инвестициялық келісімшарт бойынша берілген инвестициялық преференциялардың салдарынан бюджетке төленбеген салықтар мен кедендік баждардың сомаларын төлейді.

      26. Егер уәкілетті орган жүргізген тексеру нәтижелері бойынша инвестициялық жобаны іске асыру үшін әкелінген және кедендік баждар төлеуден босатылған технологиялық жабдық, оның жинақтауыштары, қосалқы бөлшектері, шикізат және (немесе) материалдар пайдалануға берілмегені не пайдаланылмағаны анықталған жағдайда, инвестициялық келісімшарт бойынша ұсынылған инвестициялық преференциялар салдарынан кедендік баждардың сомасын төлемеген инвестор пайдаланылмаған жабдық, оның жинақтауыштары, қосалқы бөлшектері, шикізаттар және (немесе) материалдар бөлігінде оларды төлейді.

      27. Мемлекеттің және (немесе) квазимемлекеттік сектор субъектісінің құрылтайшы және (немесе) қатысушы (акционер) құрамынан шығуы жөніндегі талап орындалмаған жағдайда инвестициялық преференцияларды қолдану ол (олар) инвестордың құрылтайшысы және (немесе) қатысушысы (акционері) құрамынан толық шыққанға дейін бір жылдан аспайтын мерзімге тоқтатыла тұрады.

      Тоқтатыла тұрған кезең ішінде инвестордың құрылтайшысы және (немесе) қатысушысы (акционері) құрамынан шығу жөніндегі талаптың орындалмауы инвестициялық келісімшартты мерзімінен бұрын тоқтатуға және бұрын берілген инвестициялық преференцияларды қайтаруға әкеп соқтырады.

      28. Инвестициялық келісімшартты бұзу туралы ақпарат мемлекеттің экономикалық мүдделерін қорғауды қамтамасыз ету мақсатында мыналарға:

      1) тиісті шаралар қабылдау үшін мемлекеттік кіріс органдарына және қажет болған жағдайда өзге де мемлекеттік органдарға;

      2) оларға сәйкес мемлекеттік заттай грант берілген инвестициялық келісімшарттар бойынша мемлекеттік кіріс органдарына, мемлекеттік мүлікті және (немесе) жер ресурстарын басқару жөніндегі уәкілетті органдарға, сондай-ақ жергілікті атқарушы органдарға жіберіледі.

11. Дауларды шешу

      29. Тараптар инвестициялық келісімшарттың кез келген ережелерін орындауға немесе түсіндіруге байланысты туындайтын барлық даулар мен келіспеушіліктерді өзара келіссөздер жолымен шешу үшін бар күш-жігерін салады.

      30. Тараптар кез келген Тараптың екінші Тарапқа жазбаша өтінімі алынған күннен бастап екі ай ішінде келісімге қол жеткізбеген жағдайда дауларды шешу "Астана" халықаралық қаржы орталығының сотында, "Астана" халықаралық қаржы орталығының Халықаралық төрелік орталығында немесе Қазақстан Республикасының сот органдарында, сондай-ақ Тараптардың келісімімен айқындалатын төрелiктерде жүргізілуі мүмкін.

      31. Тараптар пайда болған даулар мен келіспеушіліктер толықтай шешілгенге дейін инвестициялық келісімшартта белгіленген міндеттемелерді орындаудан босатылмайды.

12. Инвестициялық келісімшарттың тұрақтылығына кепілдемелер

      32. Инвестордың құқықтары мен мүдделерi толық және сөзсiз қорғалады, бұл Қазақстан Республикасының Конституциясымен, Қазақстан Республикасының Кәсіпкерлік кодексімен және Қазақстан Республикасының өзге де нормативтiк құқықтық актiлерімен, сондай-ақ Қазақстан Республикасы ратификациялаған халықаралық шарттармен қамтамасыз етiледi.

      33. Инвестордың мемлекеттiк органдардың Қазақстан Республикасының заңдарына сәйкес келмейтiн актiлер шығаруы, сондай-ақ осы органдардың лауазымды адамдарының заңсыз әрекетiнiң (әрекетсiздiгiнiң) салдарынан өзiне келтiрiлген зиянды Қазақстан Республикасының азаматтық заңнамасына сәйкес өтетуге құқығы бар.

      34. Шарттарға тараптардың келiсiмi бойынша өзгерiстер енгiзiлетiн жағдайларды қоспағанда, Қазақстан Республикасы инвесторлар мен Қазақстан Республикасының мемлекеттiк органдары арасында жасалған шарттар талаптарының тұрақтылығына кепiлдiк бередi.

      Бұл кепiлдiктер:

      1) акцизделетiн тауарлар импортының, өндiрiсінiң, оларды өткiзу тәртiбi мен шарттарын өзгертетiн Қазақстан Республикасының заңнамасындағы өзгерiстерге және (немесе) Қазақстан Республикасының халықаралық шарттарының күшiне енуіне және (немесе) олардың өзгерiстерiне;

      2) ұлттық қауiпсiздiктi, қоғамдық тәртіпті, халықтың денсаулығы мен имандылығын сақтауды қамтамасыз ету мақсатында Қазақстан Республикасының заңдарына енгiзiлетiн өзгерiстер мен толықтыруларға қолданылмайды.

13. Қолданылатын құқық

      35. Инвестициялық келісімшарт және инвестициялық келісімшарт негізінде қол қойылған басқа да келісімдер үшін "Астана" халықаралық қаржы орталығының немесе Қазақстан Республикасының қолданыстағы құқығы қолданылады.

14. Инвестициялық келісімшарттың әрекет ету мерзімі және күшіне енуі

      36. Инвестициялық келісімшарттың қолданылу мерзімі инвестициялық преференциялардың қолданылу мерзімімен айқындалады. Жұмыс бағдарламасы бойынша жұмыстарды аяқтау мерзімі инвестициялық келісімшарттың қолданылу мерзімі аяқталғанға дейін тоғыз айдан кешіктірмей аяқталуға тиіс.

      37. Осы инвестициялық келісімшарт уәкілетті органда тіркелген сәттен бастап күшіне енеді.

      38. Инвестициялық келісімшарттың қолданылуы инвестициялық келісімшарттың 16-бөлімінде көрсетілген жағдайларды қоспағанда, _______________ өткен соң тоқтатылады.

      (күні)

15. Инвестициялық келісімшартқа енгізілетін өзгерістер мен толықтырулар

      39. Тараптар өзара келісім бойынша Қазақстан Республикасының заңнамасына сәйкес инвестициялық келісімшартқа өзгерістер мен толықтырулар енгізуге құқылы.

16. Инвестициялық келісімшартты бұзу талаптары

      40. Инвестициялық преференциялардың қолданылуы инвестициялық келiсiмшарттың қолданылу мерзiмi өткен соң тоқтатылады не осы бапта белгiленген тәртiппен осындай мерзiм өткенге дейiн тоқтатылуы мүмкiн.

      41. Инвестициялық келiсiмшарттың қолданылуы:

      1) тараптардың келiсуi бойынша;

      2) бiр жақты тәртiппен мерзiмiнен бұрын тоқтатылуы мүмкiн.

      43. Инвестициялық келiсiмшарт жасасқан Қазақстан Республикасы заңды тұлғасының бастамасы бойынша инвестициялық келiсiмшарт бiржақты тәртiппен мерзiмiнен бұрын тоқтатылған кезде аталған заңды тұлға инвестициялық келiсiмшарт бойынша берiлген инвестициялық преференциялар нәтижесінде төленбеген салықтар мен кедендік баждар сомаларын төлейдi.

      44. Инвестициялық келiсiмшарт тараптардың келiсуi бойынша мерзiмiнен бұрын тоқтатылған кезде инвестициялық келiсiмшарт жасасқан Қазақстан Республикасының заңды тұлғасы инвестициялық келiсiмшарт бойынша берiлген инвестициялық преференциялар нәтижесінде төленбеген салықтар мен кедендік баждар сомаларын төлейдi.

      45. Инвестициялық келiсiмшарт мерзiмiнен бұрын тоқтатылған кезде инвестициялық келiсiмшарт жасасқан инвестор өзiне мемлекеттiк заттай грант ретiнде берiлген мүлiктi заттай не инвестициялық келiсiмшарттың талаптарына сәйкес оның берiлген күнгi бастапқы құнын қайтарады.

      46. Мемлекеттiк заттай грантты қайтаруды инвестициялық келiсiмшарт жасасқан инвестор инвестициялар жөніндегі уәкiлеттi орган инвестициялық келiсiмшартты мерзiмiнен бұрын тоқтату туралы шешiм қабылдағаннан кейiн күнтiзбелiк отыз күн iшiнде жүзеге асырады.

17. Инвестициялық келісімшарт тілі

      47. Инвестициялық келісімшарттың мәтіні, осы инвестициялық келісімшартқа қоса берілетін өзгерістер, қосымшалар, қосымша құжаттар мемлекеттік және орыс тілдерінде жасақталады. Барлық даналар егер, инвестициялық келісімшартта өзге жағдайлар көзделмеген болса, тең түпнұсқалы болып табылады және бірдей заңды күшке ие.

      48. Тараптар ___________ тілі қатынас тілі ретінде қолданылатындығына уағдаласады. Инвестициялық келісімшарт күшіне енген күнінен бастап инвестициялық жобаны іске асыруға қатысты ақпарат _________ тілінде жасалады.

18. Қосымша ережелер

      49. Инвесторды қайта ұйымдастыру Қазақстан Республикасының заңнамасына сәйкес уәкілетті органның жазбаша келісімімен жүзеге асырылады.

      50. Хабарламалар мен есептер тікелей қолға беріледі немесе төменде көрсетілген мекенжайға хабарламалы поштамен жіберіледі:

      уәкілетті орган: ______________________________________________;

      (атауы, заңды мекенжайы, телефондары)

      уәкілетті органның басшысы: __________________________________;

      (тегі, аты, әкесінің аты (бар болса)

      инвестор: __________________________________________________;

      (атауы, заңды және нақты мекенжайы, телефондары, электрондық мекенжайы)

      инвестордың басшысы:______________________________________";

      (тегі, аты, әкесінің аты (бар болса)

      51. Инвестициялық келісімшарт бойынша мекенжайлар өзгерген кезде Тараптардың әрқайсысы екі апта мерзімде екінші Тарапқа жазбаша хабарлама беруге тиіс.

      52. Қосымшалардың ережелері мен инвестициялық келісімшарт арасында қандай да бір ауытқушылық болған кезде соңғысының негіз құраушы мәні бар.

      53. Осы инвестициялық келісімшартқа ____ жылғы ___ _______ Астана қаласында, Қазақстан Республикасы, Тараптардың уәкілетті өкілдері қол қойған.

      Уәкілетті орган: Инвестор:

      Қолы ____________ М. О. Қолы _________

Инвестициялық жоба бойынша жұмыс бағдарламасы _________________________________________________ (атауы)

      Ескерту. 1-қосымша жаңа редакцияда – ҚР Үкіметінің 27.12.2019 № 987 (алғашқы ресми жарияланған күнінен бастап қолданысқа енгізіледі) қаулысымен.

      Инвестордың атауы:__________________

      Тіркелген активтерге инвестициялар, мың теңге

______ жылғы "__" ____ бастап____жылғы "__" _______ аралығында кедендік баждар салудан босатылатын импортталатын технологиялық жабдық пен оның жиынтықтауыштарының тізімі және көлемі

      Ескерту. 2-қосымша жаңа редакцияда – ҚР Үкіметінің 27.12.2019 № 987 (алғашқы ресми жарияланған күнінен бастап қолданысқа енгізіледі) қаулысымен.

      Барлығы _____ парақтағы _____ атау.

Кедендік баждар салудан босатылатын импортталатын технологиялық жабдықтардың қосалқы бөлшектерінің, шикізаттың және (немесе) материалдардың тізімі және көлемі

      Ескерту. 3-қосымша жаңа редакцияда – ҚР Үкіметінің 27.12.2019 № 987 (алғашқы ресми жарияланған күнінен бастап қолданысқа енгізіледі) қаулысымен; өзгеріс енгізілді - ҚР Үкіметінің 25.10.2021 № 764 (алғашқы ресми жарияланған күнінен бастап қолданысқа енгізіледі) қаулысымен.

      Барлығы _____ парақта _____ атау.

      Ескертпе:

      технологиялық жабдықтың қосалқы бөлшектерін импорттау кезінде кедендік баж салудан босату Қазақстан Республикасының Үкіметі бекіткен қызметтің басым түрлерінің тізбесіне сәйкес қызметін жүзеге асыратын Қазақстан Республикасының заңды тұлғаларына тіркелген активтерге инвестициялардың мынадай көлемдеріне қарай айқындалатын мерзімдерге беріледі:

      1) бірлік мөлшері ағымдағы жылға арналған "Республикалық бюджет туралы" Қазақстан Республикасының Заңында белгіленген бір миллион айлық есептік көрсеткішке (бұдан әрі – АЕК) дейін – 3 жылға;

      2) бір миллионнан бес миллион АЕК-ке дейін – 4 жылға;

      3) бес миллион АЕК-тен жоғары – 5 жылға.

___жылғы "__" ______ бастап __ жылғы "__"_______аралығында қосылған құн салығын салудан босатылатын импортталатың шикізаттың және (немесе) материалдардың тізімі және көлемі

      Ескерту. 4-қосымша жаңа редакцияда – ҚР Үкіметінің 27.12.2019 № 987 (алғашқы ресми жарияланған күнінен бастап қолданысқа енгізіледі) қаулысымен.

      Барлығы _____ парақтағы _____ атау.

Инвестициялық субсидияны төлеу графигі мен жылдық көлемі

      Ескерту. 5-қосымша алып тасталды – ҚР Үкіметінің 12.01.2021 № 4 ("ҚР кейбір заңнамалық актілеріне экономикалық өсуді қалпына келтіру мәселелері бойынша өзгерістер мен толықтырулар енгізу туралы" 02.01.2021 ҚР Заңы қолданысқа енгізілген күннен бастап қолданысқа енгізіледі) қаулысымен. қаулысымен.

Кепілдік берілген тапсырыс

      Ескерту. 6-қосымша жаңа редакцияда – ҚР Үкіметінің 27.12.2019 № 987 (алғашқы ресми жарияланған күнінен бастап қолданысқа енгізіледі) қаулысымен.

      1-тарап болып табылатын инвестор және 2-тарап болып табылатын заңды тұлға 1-тараптың мыналарды әкелетіні, ал 2-тараптың сатып алатыны туралы уағдаласты:

Инвестициялық басым жобаны іске асыру кезінде тартылатын мамандықтар тізбесі және шетелдік жұмыс күшінің саны

      Ескерту. 7-қосымша жаңа редакцияда – ҚР Үкіметінің 27.12.2019 № 987 (алғашқы ресми жарияланған күнінен бастап қолданысқа енгізіледі) қаулысымен.

      адам саны

Инвестициялық жобаларды іске асыруға арналған қызметтің басым түрлерінің тізбесі

      Ескерту. Тізбе жаңа редакцияда – ҚР Үкіметінің 27.07.2018 № 468 (алғашқы ресми жарияланған күнінен бастап қолданысқа енгізіледі) қаулысымен; өзгерістер енгізілді – ҚР Үкіметінің 29.12.2018 № 917 (03.08.2018 бастап қолданысқа енгізіледі); 24.02.2020 № 81 (алғашқы ресми жарияланған күнінен бастап қолданысқа енгізіледі); 12.01.2021 № 3 (алғашқы ресми жарияланған күнінен бастап қолданысқа енгізіледі); 12.01.2021 № 4 ("ҚР кейбір заңнамалық актілеріне экономикалық өсуді қалпына келтіру мәселелері бойынша өзгерістер мен толықтырулар енгізу туралы" 02.01.2021 ҚР Заңы қолданысқа енгізілген күннен бастап қолданысқа енгізіледі); 22.10.2022 № 840 (алғашқы ресми жарияланған күнінен бастап қолданысқа енгізіледі); 23.01.2023 № 30 (алғашқы ресми жарияланған күнінен бастап қолданысқа енгізіледі); 23.02.2023 № 158 (алғашқы ресми жарияланған күнінен бастап қолданысқа енгізіледі); 15.05.2024 № 381 (қолданысқа енгізілу тәртібін 3-т. қараңыз) қаулыларымен.

      Ескертпе:

      * 2020 жылғы 1 қаңтардан бастап ақ қант (СЭҚТН коды 170199) кедендік әкелу бажынан босатылмайды;

      ** ауылдық елді мекендерде, шағын қалаларда орналасқан, 2019 жылғы қаңтардан бастап қолданысқа енгізілген;

      *** республикалық, облыстық және жергілікті маңызы бар жолдардың жол бойындағы белдеуінде орналасқан, 2019 жылғы 1 қаңтардан бастап қолданысқа енгізілген;

      **** темір кені концентраты және (немесе) шекемтастар өндірісіне ғана қатысты;

      ***** тас көмірді байытуға ғана қатысты;

      ****** студенттерге, магистранттар мен докторанттарға арналған жатақханалар салу бойынша мемлекеттік заттай грант түрінде инвестициялық преференция алуға ғана қатысты;

      ******* мемлекеттік заттай грант түрінде инвестициялық преференция алуға ғана қатысты;

      ******** ауылдық елді мекендерде, шағын қалаларда орналасқан, 2019 жылғы қаңтардан бастап қолданысқа енгізілген немесе республикалық маңызы бар қалалар мен астанадан тыс жерлердегі жобаларды іске асыруға қатысты.

Мемлекеттік органдардың мамандарын, Қазақстан Республикасының жеке және заңды тұлғалары арасынан консультанттар мен сарапшыларды тарту қағидалары

      Осы Мемлекеттік органдардың мамандарын, Қазақстан Республикасының жеке және заңды тұлғалары арасынан консультанттар мен сарапшыларды тарту қағидалары (бұдан әрі – Қағидалар) инвестициялық преференцияларды беруге өтінімдерді қарау, инвестицияларды жүзеге асыруды және инвестициялық преференциялар беруді көздейтін инвестициялық жобаны іске асыруға арналған инвестициялық келісімшарт жасасу, сондай-ақ инвестордың инвестициялық қызметті жүзеге асыруы кезінде сараптама жүргізу үшін инвестициялар жөніндегі уәкілетті органның (бұдан әрі – уәкілетті орган) тиісті мемлекеттік органдардың мамандарын, Қазақстан Республикасының жеке және заңды тұлғалары қатарынан консультанттар мен сарапшыларды тарту тәртібі мен шарттарын айқындайды.

1. Жалпы ережелер

      1. Уәкілетті орган өзiне жүктелген міндеттерді орындау мақсатында өз құзыретінің шегінде осы Қағидаларда белгiленген шарттарда мемлекеттiк органдардың мамандарын, Қазақстан Республикасының жеке және заңды тұлғалары арасынан консультанттар мен сарапшыларды тартуға құқығы бар.

      2. Мемлекеттiк органдардың мамандарын, консультанттар мен сарапшыларды тартудың мақсаты инвестициялық жобаны, инвестициялық қызметтi объективтi бағалау үшiн қажетті арнайы iлiм алу, сондай-ақ уәкілетті орган мен инвестор арасындағы туындаған даулы жағдайларды шешу болып табылады.

      3. Уәкілетті орган осы Қағидаларда белгiленген жағдайларда инвестициялық жобаның ерекшелiктеріне қарай сараптамалардың әр түрiн ұйымдастыруға құқылы.

2. Негiзгi ұғымдар

      4. Осы Қағидаларда мынадай негiзгi ұғымдар пайдаланылады:

      1) мемлекеттiк органның маманы – тиiстi мемлекеттiк органның қажеттi бiлiктiлiгi бар штаттық қызметкерi;

      2) консультант – қажеттi бiлiктiлiгi бар жеке және заңды тұлға немесе қажеттi бiлiктiлiгі бар мамандар штаты, жұмыс тәжiрибесi, сондай-ақ егер бұл Қазақстан Республикасының заңнамасында көзделген болса, тиiстi лицензияcы бар заңды тұлға;

      3) сарапшы – қажеттi бiліктiлiгі мен жұмыс тәжірибесі бар мамандар штаты, жұмыс тәжiрибесi, сондай-ақ егер бұл Қазақстан Республикасының заңнамасында көзделген болса, тиiстi лицензиясы бар жеке және заңды тұлға.

3. Мемлекеттiк органның мамандарын, консультанттар мен сарапшыларды тарту тәртiбi

      5. Мемлекеттiк органдардың мамандары, Қазақстан Республикасының жеке және заңды тұлғалары арасынан консультанттар мен сарапшылар мына жағдайларда тартылады:

      1) арнайы iлiмдерге қажеттілiк;

      2) тәуелсiз сараптама жүргiзу қажеттілігі;

      3) уәкілетті орган пен инвестор арасында даулы жағдайдың орын алуы;

      Қазақстан Республикасының жеке және заңды тұлғалары арасынан консультанттар мен сарапшыларды тарту инвестициялық жобаның ерекшелiктеріне қарай іске асырылады.

      6. Мемлекеттiк органның маманын таңдауды осы органның басшысы уәкілетті органның өтiнiмi негiзінде жүзеге асырады. Уәкілетті органның маман беру туралы өтiнiмінде сараптама жүргiзу мәселелерi және мерзiмi көрсетiледi.

      7. Консультант және сарапшыны тарту уәкілетті орган, инвестор және консультант немесе сарапшы арасында тиiстi шарт жасау арқылы жүзеге асырылады.

4. Уәкілетті органның мемлекеттiк органдардың мамандарын, консультанттар мен сарапшыларды тарту кезiндегi өкілеттiктері

      8. Уәкілетті орган мемлекеттiк органдардың мамандарын, Қазақстан Республикасының жеке және заңды тұлғалары арасынан консультанттар мен сарапшыларды тарту кезінде:

      1) дәйекті жауаптар берудi қажет ететiн мәселелер тiзбесін айқындауға;

      2) консультация немесе сараптама нәтижелерi бойынша түсiндiрменi (оның ішінде жазбаша) талап етуге;

      3) егер бастапқы консультацияны немесе сараптаманы толық емес немесе жеткiлiксiз деп санаса, қосымша консультация немесе сараптама жүргізудi талап eтугe;

      4) консультация немесе сараптама жүргiзу процесiнде консультантқа немесе capaпшығa белгiлi болған ақпараттың құпиялылығын талап етуге;

      5) сараптама жүргiзу барысын бақылауға құқылы.

      9. Сараптама барысын немесе оның нәтижесін өзгерту мақсатында мемлекеттiк органдардың мамандарына, консультанттар мен сарапшыларға қандай да бiр қысым жасауға тыйым салынады.

5. Мемлекеттiк органдар мамандарының, консультанттар мен сарапшылардың жауапкершiлiгi

      10. Мемлекеттiк органдардың мамандары, Қазақстан Республикасының жеке және заңды тұлғалары арасынан консультанттар, сарапшылар сараптаманы сапалы және уақтылы жүргiзудi, сараптамаға ұсынылған құжаттардың сақталуын және құпиялылықтың сақталуын қамтамасыз етедi.

      11. Жеке және заңды тұлғалар қатарынан консультанттар мен сарапшылар жүргiзілген сараптаманың нәтижелері үшiн Қазақстан Республикасының заңнамалық актілерінде және осы Қағидалардың 7-тармағына сәйкес жасалған шартта көзделген жағдайларда жауаптылықта болады.

6. Мемлекеттiк органдардың мамандарын, консультанттар, сарапшылар көрсеткен қызметтерге ақы төлеу

      12. Мемлекеттiк органдардың мамандары көрсеткен қызметке ақы төленбейдi.

      13. Консультанттар және сарапшылар көрсеткен қызметтерге ақыны сараптама нәтижесіне қарамастан инвестор төлейді.

Қазақстан Республикасы Үкіметінің күші жойылған кейбір шешімдерінің тізбесі

      1. "Инвестициялар туралы" Қазақстан Республикасының Заңын iске асырудың кейбiр мәселелерi туралы Қазақстан Республикасы Үкіметінің 2003 жылғы 8 мамырдағы № 436 қаулысы (Қазақстан Республикасының ПҮАЖ-ы, 2003 ж., № 19, 192-құжат).

      2. "Қазақстан Республикасы Үкiметiнiң 2003 жылғы 8 мамырдағы № 436 қаулысына толықтырулар енгiзу туралы" Қазақстан Республикасы Үкіметінің 2005 жылғы 18 ақпандағы № 152 қаулысы (Қазақстан Республикасының ПҮАЖ-ы, 2005 ж., № 9, 82-құжат).

      3. "Қазақстан Республикасы Yкiметiнiң 2003 жылғы 8 мамырдағы № 436 қаулысына өзгерiстер мен толықтырулар енгізу туралы" Қазақстан Республикасы Yкiметiнiң 2005 жылғы 17 қыркүйектегі № 925 қаулысы (Қазақстан Республикасының ПҮАЖ-ы, 2005 ж., № 34, 478-құжат).

      4. "Қазақстан Республикасы Үкіметінің 2003 жылғы 8 мамырдағы № 436 қаулысына өзгеріс пен толықтыру енгізу туралы" Қазақстан Республикасы Үкіметінің 2005 жылғы 21 желтоқсандағы № 1267 қаулысы (Қазақстан Республикасының ПҮАЖ-ы, 2005 ж., № 49, 627-құжат).

      5. "Қазақстан Республикасы Үкiметiнiң 2003 жылғы 8 мамырдағы № 436 қаулысына өзгерiстер енгiзу туралы" Қазақстан Республикасы Үкіметінің 2006 жылғы 7 қыркүйектегі № 851 қаулысы (Қазақстан Республикасының ПҮАЖ-ы, 2006 ж., № 34, 364-құжат).

      6. "Қазақстан Республикасы Yкiметiнiң 2003 жылғы 8 мамырдағы № 436 қаулысына толықтырулар енгiзу туралы" Қазақстан Республикасы Үкіметінің 2006 жылғы 28 қыркүйектегі № 940 қаулысы (Қазақстан Республикасының ПҮАЖ-ы, 2006 ж., № 36, 402-құжат).

      7. "Қазақстан Республикасы Yкiметiнiң 2003 жылғы 8 мамырдағы № 436 қаулысына толықтырулар енгiзу туралы" Қазақстан Республикасы Үкіметінің 2007 жылғы 6 қаңтардағы № 5 қаулысы (Қазақстан Республикасының ПҮАЖ-ы, 2007 ж., № 1, 8-құжат).

      8. "Қазақстан Республикасының Үкіметінің 2003 жылғы 8 мамырдағы № 436 қаулысына өзгерістер мен толықтырулар енгізу туралы" Қазақстан Республикасы Үкіметінің 2009 жылғы 30 шілдедегі № 1157 қаулысы (Қазақстан Республикасының ПҮАЖ-ы, 2009 ж., № 34, 327-құжат).

      9. "Қазақстан Республикасы Үкіметінің кейбір шешімдеріне өзгерістер енгізу туралы" Қазақстан Республикасы Үкіметінің 2010 жылғы 17 шілдедегі № 600 қаулысымен бекітілген Қазақстан Республикасы Үкіметінің кейбір шешімдеріне енгізілетін өзгерістердің 2-тармағы (Қазақстан Республикасының ПҮАЖ-ы, 2010 ж., № 39, 338-құжат).

      10. "Қазақстан Республикасы Үкіметінің 2003 жылғы 8 мамырдағы № 436 қаулысына өзгерістер енгізу туралы" Қазақстан Республикасы Үкіметінің 2010 жылғы 6 тамыздағы № 809 қаулысы (Қазақстан Республикасының ПҮАЖ-ы, 2010 ж., № 48, 437-құжат).

      11. "Инвестициялар туралы" Қазақстан Республикасының Заңын іске асырудың кейбір мәселелері туралы" Қазақстан Республикасы Үкіметінің 2003 жылғы 8 мамырдағы № 436 қаулысына өзгерістер мен толықтырулар енгізу туралы" Қазақстан Республикасы Үкіметінің 2012 жылғы 8 қарашадағы № 1416 қаулысы (Қазақстан Республикасының ПҮАЖ-ы, 2012 ж., № 77-78, 1147-құжат).

      12. "Қазақстан Республикасы Үкіметінің "Инвестициялар туралы" Қазақстан Республикасының Заңын іске асырудың кейбір мәселелері туралы" 2003 жылғы 8 мамырдағы № 436 және "Моноқалаларды дамытудың 2012 – 2020 жылдарға арналған бағдарламасын бекіту туралы" 2012 жылғы 25 мамырдағы № 683 қаулыларына өзгерістер енгізу және Қазақстан Республикасы Үкіметінің кейбір шешімдерінің күші жойылды деп тану туралы" Қазақстан Республикасы Үкіметінің 2014 жылғы 30 қазандағы № 1154 қаулысы (Қазақстан Республикасының ПҮАЖ-ы, 2014 ж., № 66, 615-құжат).

      13. "Қазақстан Республикасы Үкіметінің "Инвестициялар туралы" Қазақстан Республикасының Заңын іске асырудың кейбір мәселелері туралы" 2003 жылғы 8 мамырдағы № 436 және "Инвестициялық субсидия беру қағидаларын бекіту туралы" 2014 жылғы 4 қарашадағы № 1175 қаулыларына өзгерістер мен толықтырулар енгізу туралы" Қазақстан Республикасы Үкіметінің 2015 жылғы 9 сәуірдегі № 210 қаулысының 1-тармағының 1) тармақшасы (Қазақстан Республикасының ПҮАЖ-ы, 2015 ж., № 21, 115-құжат).