Азаматтық қорғау саласындағы уәкілетті орган жедел резервінің материалдық құндылықтарымен операция жүргізу, олардың орнын ауыстыру, пайдалану, толықтыру қағидаларын бекіту туралы

      "Азаматтық қорғау туралы" 2014 жылғы 11 сәуірдегі Қазақстан Республикасы Заңының 12-бабы 1-тармағының 4) тармақшасын іске асыру мақсатында БҰЙЫРАМЫН:

      1. Қоса беріліп отырған Aзаматтық қорғау саласындағы уәкілетті орган жедел резервінің материалдық құндылықтарымен операция жүргізу, олардың орнын ауыстыру, пайдалану, толықтыру қағидалары бекітілсін.

      2. Қазақстан Республикасы Ішкі істер министрлігінің Төтенше жағдайлар комитеті осы бұйрықты Қазақстан Республикасы Әділет министрлігінде мемлекеттік тіркеуді және оны мерзiмдi баспа басылымдарында және "Әдiлет" ақпараттық-құқықтық жүйесiнде жариялауды қамтамасыз етсін.

      3. Осы бұйрықтың орындалуын бақылау Қазақстан Республикасы Ішкі істер министрлігі Төтенше жағдайлар комитетінің төрағасына (В.В. Петров) жүктелсін.

      4. Осы бұйрық алғаш ресми жарияланғаннан кейін күнтізбелік он күн өткен соң қолданысқа енгізіледі.

Aзаматтық қорғау саласындағы уәкілетті органның жедел резервінің материалдық құндылықтарымен операция жүргізу, олардың орнын ауыстыру, пайдалану, толықтыру қағидалары

1-тарау. Жалпы ережелер

      Ескерту. 1-тараудың тақырыбы жаңа редакцияда – ҚР Төтенше жағдайлар министрінің 20.01.2021 № 18 (ресми жарияланған бірінші күнінен кейін он күнтізбелік күн өткен соң қолданысқа енгізіледі) бұйрығымен.

      1. Осы Қағидада пайдаланылатын негізгі ұғымдар:

      1) уәкілетті органның жедел резерві - белгілі бір номенклатура мен көлемдегі техника және материалдық құндылықтар, оның ішінде дәрілік заттар, медициналық мақсаттағы бұйымдар запасы;

      2) жедел резервтен материалдық құндылықтарды шығару (пайдалану) - төтенше жағдайлар кезінде зардап шеккен халыққа шұғыл көмек көрсету үшін, сондай-ақ оқу-жаттығулар, машықтанулар және әзірлікті тексеру барысында зардап шеккен халық үшін іс жүзінде лагерьді өрістетуді жүргізу үшін жаңарту тәртібінде жедел резервтен материалдық құндылықтарды алып қою;

      3) жедел резервке материалдық құндылықтарды салу - жедел резервте сақтау үшін материалдық құндылықтарды қабылдау;

      4) жедел резервтің техникасы, материалдық құндылықтары, оның ішінде медициналық мақсаттағы дәрілік заттар - белгілі бір номенклатура мен көлемдегі төтенше жағдайлар туындаған кезде зардап шеккен халықтың бірінші кезектегі тіршілігін қамтамасыз етуге арналған қажетті тауарлар;

      5) операция жүргізу - мемлекеттiк резервтiң материалдық құндылықтарын қою, сақтау, шығару және жаңарту;

      6) жедел резервті жаңарту - жедел резервтен материалдық құндылықтарды оларды сақтауға белгіленген мерзім өткенге дейін жедел резервке сондай мөлшердегі және тақылеттес сападағы құндылықтарды сонымен бір мезгілде немесе уақыт алшақтығымен сала отырып шығару;

      7) жедел резервке материалдық құндылықтарды жеткізу (толықтыру) - жедел резервтің материалдық құндылықтарын сатып алу және оларды сақтау пункттеріне жеткізу;

      8) жедел резервтің материалдық құндылықтарын сақтау пункттері - жедел резервтің материалдық құндылықтарын сақтауды жүзеге асыратын заңды тұлғалар;

      9) жедел резервтің материалдық құндылықтарының орнын ауыстыру - материалдық құндылықтарды сақтау орнынан қолдану орнына дейін және кері тікелей мақсаты бойынша тасымалдау;

      10) жедел резервтің үйлестірушісі – жедел резервтің материалдық құндылықтарымен операция жүргізуге бақылауды жүзеге асыратын Қазақстан Республикасы Төтенше жағдайлар министрлігінің Азаматтық қорғаныс және әскери бөлімдер комитеті.

2-тарау. Уәкілетті орган жедел резервінің мақсаты

      Ескерту. 2-тараудың тақырыбы жаңа редакцияда – ҚР Төтенше жағдайлар министрінің 20.01.2021 № 18 (ресми жарияланған бірінші күнінен кейін он күнтізбелік күн өткен соң қолданысқа енгізіледі) бұйрығымен.

      2. Aзаматтық қорғау саласындағы уәкілетті органның жедел резерві алдын ала құрылады және төтенше жағдай аймағындағы халыққа бірінші кезекте тіршілікті қамтамасыз етуге және шұғыл медициналық көмек көрсетуге, сондай-ақ Қазақстан Республикасы аумағында авариялық-құтқару жұмыстарын қамтамасыз етуге арналған.

3-тарау. Уәкілетті органның негізгі міндеттері мен функциялары

      Ескерту. 3-тараудың тақырыбы жаңа редакцияда – ҚР Төтенше жағдайлар министрінің 20.01.2021 № 18 (ресми жарияланған бірінші күнінен кейін он күнтізбелік күн өткен соң қолданысқа енгізіледі) бұйрығымен.

      3. Қазақстан Республикасы Төтенше жағдайлар министрлігінің міндеті (бұдан әрі – Министрлік) жедел резервті құру және оны қолдану болып табылады.

      4. Министрлік мынадай функцияларды жүзеге асырады:

      жедел резервпен операция жүргізу, жедел резервтің материалдық құндылықтарын орналастыру, сақтау, толықтыру, олардың орнын ауыстыру, жаңарту және оларды нысаналы пайдалану кезінде осы Қағидалар талаптарын сақтау;

      Қазақстан Республикасының Үкіметіне жедел резервтің материалдық құндылықтарының көлемі мен қалыптастыру жөнінде ұсыныстар енгізу;

      жедел резервтің материалдық құндылықтарын уақытында жаңғырту;

      жедел резервке материалдық құндылықтарды шығару немесе жеткізу туралы шешім қабылдау;

      жедел резервтің материалдық құндылықтарын сапалық және сандық сақталуын, есепке алуды және бақылауды қамтамасыз ету.

4-тарау. Уәкілетті орган жедел резервінің материалдық құндылықтармен операция жүргізу

      Ескерту. 4-тараудың тақырыбы жаңа редакцияда – ҚР Төтенше жағдайлар министрінің 20.01.2021 № 18 (ресми жарияланған бірінші күнінен кейін он күнтізбелік күн өткен соң қолданысқа енгізіледі) бұйрығымен.

      5. Жедел резервке материалдық құндылықтарды жеткізу (толықтыру) қолданыстағы номенклатураға қатаң сәйкестікте жүргізіледі.

      6. Жедел резервтің материалдық құндылықтарын сатып алу кезекті қаржы жылына тауарларды, жұмыстарды, қызметтерді мемлекеттік сатып алу жоспарының негізінде жүзеге асырылады.

      7. Жедел резервке жеткізілетін материалдық құндылықтар стандарт талаптарына, техникалық шарттарға жауап беруі, ұзақ мерзім сақтауға дайын, ал олардың сапалық жағдайы сертификаттармен, өнім паспорттарымен, сынақ хаттамаларымен немесе басқа тиісті құжаттармен расталған болуы тиіс.

      8. Жедел резервтің материалдық құндылықтары:

      1) дәрілік заттар мен медициналық мақсаттағы бұйымдар – Министрліктің "Апаттар медицинасы орталығы" мемлекеттік мекемесінің (бұдан әрі – "Апаттар медицинасы орталығы" ММ) ведомстволық бағынысты ұйымдарында;

      2) техника, шатырлар, шаруашылық мүлкі, заттай мүлік, гигиеналық құралдар - Министрлік азаматтық қорғанысының әскери бөлімдерінде сақталады.

      9. Жедел резервтің материалдық құндылықтарын сақтауды ұйымдастыру сағат сайын олардың орнын ауыстыруға әзірлігін қамтамасыз етуі тиіс.

      10. "Апаттар медицинасы орталығы" ММ ведомстволық бағынысты ұйымдары, азаматтық қорғаныс әскери бөлімдері сақтауға берілген жедел резервтің материалдық құндылықтарының сапалық және сандық сақталуына жауапкершілікте болады.

      11. Жедел резервті шығару (пайдалану) Қазақстан Республикасы Төтенше жағдайлар министрінің немесе оның міндетін атқаратын вице-министрдің шешімімен жүзеге асырылады.

      12. Жедел резервтен материалдық құндылықтарды шығару (пайдалану):

      төтенше жағдайларда зардап шеккендерге шұғыл көмек көрсету және бірінші кезектегі тіршілікті қамтамасыз ету;

      жаңартуға байланысты;

      оқу-жаттығулар, машықтанулар және әзірлікті тексеру барысында зардап шеккен халыққа лагерьді өрістету бойынша жеке құрамның іс-қимылдарын іс жүзінде пысықтау жағдайларында жүзеге асырылады.

      13. Жедел резервтің материалдық құндылықтарын сандық есепке алуды, қолдануды ұйымдастыруды, операция жүргізуді, олардың орнын ауыстыруды, жаңартуды, пайдалануды, толықтыруды жүргізуді жедел резервтің үйлестірушісі жүзеге асырады.

      14. Пайдаланылған жедел резервтің материалдық құндылықтары республикалық бюджет қаражаты есебінен өтеуге жатады.

      15. Мақсаты бойынша пайдаланғаннан кейін техника, шатырлар, шаруашылық мүлкі, байланыс құралдары тиісті техникалық қызмет көрсетуге (жөндеуге) және одан әрі жедел резервке салуға жатады.

      16. Жедел резервтің материалдық құндылықтарын сақтау орындарынан мақсаты бойынша пайдалану орындарына дейін және кері орнын ауыстыру Қазақстан Республикасы Төтенше жағдайлар министрінің шешімі бойынша көлік құралдарымен жүзеге асырылады.

5-тарау. Уәкілетті орган жедел резервінің материалдық құндылықтарын жаңарту тәртібі

      Ескерту. 5-тараудың тақырыбы жаңа редакцияда – ҚР Төтенше жағдайлар министрінің 20.01.2021 № 18 (ресми жарияланған бірінші күнінен кейін он күнтізбелік күн өткен соң қолданысқа енгізіледі) бұйрығымен.

      17. Жедел резервтің материалдық құндылықтары Қазақстан Республикасы Төтенше жағдайлар министрінің шешімі негізінде сақтау, жарамдылық мерзімдерінің аяқталуына немесе тозуына қарай жаңартылады.

      18. Жедел резервтің материалдық құндылықтарын уақтында жаңарту жауапкершілігі "Aпаттар медицинасы орталығы" мемлекеттік мекемелерінің басшыларына және Aзаматтық қорғаныс әскери бөлімдерінің командирлеріне жүктеледі.

      19. Жедел резервтің материалдық құндылықтарының жарамдылық (сақтау) мерзімдері аяқталу кезеңінде немесе мақсатқа сай пайдаланғаннан кейін "Апаттар медицинасы орталығы" ММ басшылары және азаматтық қорғаныс әскери бөлімдерінің командирлері жедел резервті үйлестірушінің атына оларды жаңартуға өтінім береді, онда жаңартуға жататын материалдық құндылықтарды жаңарту себебі, олардың тізбесі, көлемі (саны) және құны көрсетіледі.

      Пайдаланған кезде жедел резервтің материалдық құндылықтарының толық тозуы себебі бойынша шекті, жарамсыз жай-күйде болған жағдайда өтінімдерге одан әрі материалдық құндылықтарды қолдануға жарамсыздығы туралы комиссияның қорытындысымен техникалық жай-күйінің тиісті актілері қоса берілуі тиіс. Техникалық жай-күйі актілеріне шекті, жарамсыз жай-күйді растайтын фотографияларды қоса алғанда, қажетті материалдар қоса берілуі тиіс

      20. Берілген өтінімдер негізінде жедел резервті үйлестіруші Қазақстан Республикасы Төтенше жағдайлар министрінің тиісті бұйрығын әзірлейді, онда жедел резервтің жаңартылатын материалдық құндылықтарын одан әрі пайдалану және толтыру тәртібі көрсетіледі.

      22. Дәрілік заттарды және медициналық мақсаттағы бұйымдарды жаңарту "Мемлекеттік мекемелерде бухгалтерлік есепке алуды жүргізу қағидаларын бекіту туралы" Қазақстан Республикасы Қаржы министрінің 2010 жылғы 3 тамыздағы № 393 бұйрығының "Қорларды есепке алу тәртібі" 8-тарауына және "Халық денсаулығы және денсаулық сақтау жүйесі туралы" Қазақстан Республикасының 2020 жылғы 7 шілдедгі Кодексінің 250-бабына сәйкес жүзеге асырылады.