Қолданушылардың назарына!!!
Бұйрықтың қолданысқа енгізілу тәртібін 5-тармақтан қараңыз.
"Білім туралы" Қазақстан Республикасының 2007 жылғы 27 шілдедегі Заңның 5-бабы 11) тармақшасын іске асыру мақсатында БҰЙЫРАМЫН:
1. Қоса беріліп отырған Жоғары оқу орнынан кейінгі кәсіби оқу бағдарламаларын іске асыратын білім беру ұйымдарына оқуға қабылдаудың үлгі ережесі бекітілсін.
2. Осы бұйрықтың қосымшасына сәйкес Қазақстан Республикасы Білім және ғылым министрінің кейбір бұйрықтарының күші жойылды деп танылсын.
3. Жоғары және жоғары оқу орнынан кейінгі білім департаменті (С. Өмірбаев) осы бұйрықты белгіленген тәртіппен Қазақстан Республикасы Әділет министрлігіне мемлекеттік тіркеуге ұсынсын.
4. Осы бұйрықтың орындалуын бақылау Қазақстан Республикасы Білім және ғылым вице-министрі К. Шәмшидиноваға жүктелсін.
5. Осы бұйрық алғаш ресми жарияланғаннан кейінгі он күнтізбелік күн өткен соң қолданысқа енгізіледі.
Министр Ж. Түймебаев
"Келісілді"
Қазақстан Республикасы
Денсаулық сақтау министрі
______________ А. Дерновой
2008 жылғы "___"_________
Қазақстан Республикасының
Білім және ғылым министрінің
2008 жылғы 1 сәуірдегі
N 161 бұйрығымен бекітілген
Жоғары оқу орнынан кейінгі кәсіби оқу бағдарламаларын іске
асыратын білім беру ұйымдарына қабылдаудың үлгі ережесі 1. Жалпы ережелер
1. Жоғары оқу орнынан кейінгі кәсіби оқу бағдарламаларын іске асыратын білім беру ұйымдарына қабылдаудың үлгі ережесі (бұдан әрі - Ереже) " Білім туралы " Қазақстан Республикасының 2007 жылғы 27 шілдедегі және " Ғылым туралы " Қазақстан Республикасының 2001 жылғы 9 шілдедегі Заңдарына сәйкес әзірленді.
2. Ереже азаматтарды Қазақстан Республикасының жоғары оқу орындары мен ғылыми ұйымдарының магистратура, резидентура, адъюнктура және докторантурасына қабылдаудың тәртібін айқындайды.
3. Жоғары оқу орындары мен ғылыми ұйымдардың магистранттарының, резидентурасының тыңдаушыларының, адъюнкттарының және докторанттарының контингентін қалыптастыру ғылыми және педагогикалық кадрларды даярлауға (Қазақстан Республикасы Ұлттық қауіпсіздік комитетінің білім беру ұйымдарында мамандарды даярлаудан басқа) мемлекеттік білім беру тапсырысын орналастыру, сондай-ақ азаматтардың өз қаражаттары және басқа да көздері есебінен оқу ақысын төлеу арқылы жүзеге асырылады.
Басқа мемлекеттің азаматы болып табылатын қазақ ұлтының тұлғалары Қазақстан Республикасы азаматтарымен тең жоғары оқу орнынан кейінгі білім алады.
Қазақстан Республикасында тұрғылықты тұратын азаматтығы жоқ тұлғалар мемлекеттік білім беру тапсырысына сәйкес конкурстық негізде ақысыз жоғары оқу орнынан кейінгі білім ала алады, егер олар осы деңгейдегі білімді бірінші рет алатын болса.
Басқа шетелдік азаматтар жоғары оқу орындарына және ғылыми ұйымдарға Қазақстан Республикасының заңнамасында, сондай-ақ Қазақстан Республикасы бекіткен халықаралық шарттарда белгіленген тәртіппен қабылданады.
4. Қазақстан Республикасы Қорғаныс министрлігіне, Қазақстан Республикасы Ішкі істер министрлігіне, Қазақстан Республикасы Төтенше жағдайлар министрлігіне, Қазақстан Республикасы Әділет министрлігіне, Қазақстан Республикасы Экономикалық және сыбайлас жемқорлыққа қарсы күрес агенттігіне (Қаржы полициясы), Қазақстан Республикасы Ұлттық қауіпсіздік комитетіне, Қазақстан Республикасы Президентінің жанындағы Мемлекеттік басқару академиясына ведомстволық бағынысты жоғары оқу орындары мен ғылыми ұйымдарының магистратура, адъюнктура және докторантурасына азаматтарды қабылдау білім беру саласындағы уәкілетті органымен келісілген жеке нормативтік құқықтық актілермен реттеледі.
5. Жоғары оқу орындары мен ғылыми ұйымдардың магистратура, резидентура, адъюнктура және докторантурасына азаматтарды қабылдау түсу емтихандарының қорытындысы бойынша конкурстық негізде жүзеге асырылады.
6. Жоғары оқу орны және ғылыми ұйым құжаттарды тапсыру мерзіміне дейін отыз күнтізбелік күннен кешіктірілмей магистратура, резидентура, адъюнктура және докторантураға қабылдауды дайындау мамандықтарын көрсете отырып, бұқаралық ақпарат құралдары арқылы хабарлайды.
7. Жоғары оқу орындары мен ғылыми ұйымдардың магистратура, резидентура, адъюнктура және докторантураға түсушілердің өтінішін қабылдау 1-30 шілде аралығында өткізіледі.
Магистратура, резидентура, адъюнктура және докторантураға түсу емтихандары 1 тамыздан 20 тамызға дейін, қабылдау - 31 тамызға дейін өткізіледі.
8. Магистратура, резидентура, адъюнктураға түсу емтихандарының бағдарламаларын жоғары оқу орындары мен ғылыми ұйымдар жоғары білім беру пәндері бойынша үлгі бағдарламалардың негізінде қалыптастырады.
Докторантураға түсу емтихандарының бағдарламаларын жоғары оқу орындары мен ғылыми ұйымдар магистратураның кәсіби оқу бағдарламаларының негізінде қалыптастырады.
2. Магистратура, резидентура, адъюнктура және
докторантураға түсуші тұлғаларды қабылдау тәртібі
9. Магистратураға, резидентураға, адъюнктураға жоғары білім беру кәсіби оқу бағдарламаларын игерген азаматтар қабылданады.
10. Магистратураға, резидентураға, адъюнктураға түсуші тұлғалар жоғары оқу орындары және ғылыми ұйымдарға келесі құжаттарды тапсырады:
1) ұйым басшысының атына өтініш;
2) жоғары оқу орнын бітіргендігі туралы нотариальды куәландырылған құжат көшірмесі, интернатурада оқығандығы туралы құжат (резидентураға түсу үшін);
3) бар болған жағдайда кадрлар есебі бойынша жеке парағы және нотариальды куәландырылған еңбек кітапшасының көшірмесі;
4) 3,5x4,5 көлеміндегі алты фотосурет;
5) 086-У нысанындағы медициналық анықтама қағазы;
6) жеке куәлігінің көшірмесі;
7) бар болған жағдайда ғылыми және ғылыми-әдістемелік жұмыстарының тізімі;
8) ақылы негізде түсушілер үшін шартқа отыруды және оқудың шығыстар төлемақысын кепілдендіретін хат;
9) құжаттар тізімдемесі.
11. Докторантураға:
1) "магистр" академиялық дәрежесі бар;
2) ғылым кандидаты атағы бар тұлғалар қабылданады.
12. Докторонтураға түсуші тұлғалар жоғары оқу орындары және ғылыми ұйымдарға келесі құжаттарды тапсырады:
1) ұйым басшысының атына өтініш;
2) зерттеу тақырыбы бойынша қазақ немесе орыс тілдерінде автореферат нысанындағы негіздеме;
3) жеке куәлігінің көшірмесі;
4) білімі және/немесе ғылым кандидаты туралы нотариальды куәландырылған құжаттар көшірмесі;
5) бар болған жағдайда ғылыми және ғылыми-әдістемелік жұмыстарының тізімі;
6) 086-У нысанындағы медициналық анықтама қағазы;
7) бар болған жағдайда кадрлар есебі бойынша жеке қағазы және нотариальды куәландырылған еңбек кітапшасының көшірмесі;
8) басқа оқу орындарында, аспирантурада оқығандығын куәландыратын құжаттар көшірмесі;
9) ақылы негізде түсушілер үшін шартқа отыруды және оқудың шығыстар төлемақысын кепілдендіретін хат;
10) құжаттар тізімдемесі.
3. Түсу емтиханын өткізудің тәртібі
13. Магистратураға, резидентураға, адъюнктураға және докторантураға түсуші азаматтар түсу емтихандарын тапсырады:
1) бір шет тілі бойынша (ағылшын, француз, неміс);
2) мамандық бойынша.
14. Магистратураға, резидентураға, адъюнктураға және докторантураға түсуші шетел азаматтары түсу емтихандарын тапсырады:
1) қазақ немесе орыс тілдері бойынша (оқыту тілі);
2) мамандық бойынша.
15. Басқа шет тілдері (араб, қытай, түрік, жапон тілдері және басқалар) бойынша емтихан тапсыру туралы және (ауызша, жазбаша) емтихан тапсыру нысаны бойынша мәселе білім беру саласындағы уәкілетті органның келісімі бойынша жоғары оқу орнының қабылдау комиссиясы шешеді және жеке тәртіпте қарайды.
16. Магистратураға, резидентураға, адъюнктураға және докторантураға түсу емтиханын өткізу мерзімінде жоғары оқу орнында және ғылыми ұйымда қабылдау және мамандықтар бойынша емтихан комиссиялары құрылады.
17. Қабылдау комиссиясының төрағасы жоғары оқу орнының немесе ғылыми ұйымның басшысы болып табылады.
18. Мамандықтар бойынша емтихан комиссиясы берілген өңірдегі жоғары оқу орындары мен ғылыми ұйымдардағы мамандықтарға сәйкес жоғары білікті ғалымдардың санынан құралады.
Мамандықтар бойынша емтихан комиссиясының құрамы төрағадан және үш мүшеден тұрады, оның ішінде екеуі ғылым докторы, қалғандары мамандық бейіні бойынша ғылым кандидаттары болуы қажет.
Мамандықтар бойынша емтихан комиссиясының құрамы жоғары оқу орындары немесе ғылыми ұйымдары басшысының бұйрығымен бекітіледі.
Мамандық бойынша емтиханды өткізу нысанын қабылдау комиссиясы анықтайды.
19. Шет тілі, қазақ және орыс тілдері бойынша түсу емтихандары Қазақстан Республикасы Білім және ғылым министрлігінің Мемлекеттік білім беру стандарттары мен тестілеудің ұлттық орталығы әзірлеген технология бойынша тапсырылады.
20. Түсу емтихандарды қайта тапсыруға жіберілмейді.
21. Түсу емтихандарының қорытындыларымен келіспеген азамат жазбаша түрде апелляциялық өтінішті беруіне болады.
Осы мақсатта апелляциялық комиссия екі түрде құрылады: шет тілі, қазақ және орыс тілдері және мамандық бойынша.
4. Магистратураға, резидентураға, адъюнктураға
және докторантураға қабылдау
22. Магистранттар, резидентураның тыңдаушылары, адъюнкттар және докторанттар қатарына қабылдауды қабылдау комиссиясы жүзеге асырады.
23. Мемлекеттік білім беру тапсырысы бойынша оқуға қабылдау түсу емтихандарының қосындысында шет тілі және мамандық бойынша кемінде 8 балл (әр пән бойынша білімді бағалаудың 4 баллдық шкаласы бойынша) жинаған тұлғалар жіберіледі.
24. Конкурстық балдардың көрсеткіштері бірдей болған жағдайда мамандық бойынша, шет тілі, қазақ және орыс тілдері бойынша ең жоғары баға алған азаматтар қабылдау кезінде басым құқыққа ие болады. Содан кейін тиісті ғылыми мамандығының бейіні бойынша ғылыми жетістіктері ескеріледі.
25. Жоғары оқу орындары және ғылыми ұйымдар, жеке меншік нысанына қарамастан, білім беру саласындағы уәкілетті органға он күндік мерзім ішінде қабылдауды ұйымдастыру және өткізу бойынша қорытынды есепті, сонымен қатар магистратураға, резидентураға, адъюнктураға және докторантураға қабылдау туралы бұйрықтар көшірмелерін ұсынады.
26. Оқуға қабылдаудың тәртібі осы Үлгі ережесінде реттелмеген жағдайда, жоғары оқу орнының және ғылыми ұйымның құрылтайшысы немесе құрылтайшылары (мемлекеттік басқару органы) белгілейді.
Қазақстан Республикасы
Білім және ғылым министрінің
2008 жылғы 1 сәуірдегі
N 161 бұйрығына қосымша
Күші жойылды деп танылған Қазақстан Республикасы Білім
және ғылым министрінің кейбір бұйрықтарының тізбесі
1. "Қазақстан Республикасы жоғары оқу орындарының магистратурасына қабылдаудың типтік ережесін бекіту туралы" Қазақстан Республикасы Білім және ғылым министрінің 29 мамыр 2003 жылғы N 354 бұйрығы (Нормативтік құқықтық актілерді мемлекеттік тіркеу тізілімінде N 2383 тіркелген) 2003 жылғы N 23-24 Нормативтік құқықтық актілер бюллетенінде жарияланған;
2. ""Қазақстан Республикасының жоғары оқу орындарының магистратурасына қабылдаудың типтік ережелерін бекіту туралы" Қазақстан Республикасы Білім және ғылым министрлігінің 2003 жылғы 29 мамырдағы N 354 бұйрығына өзгерістер мен толықтырулар енгізу туралы" Қазақстан Республикасы Білім және ғылым министрінің 2004 жылғы 5 маусымдағы N 520 бұйрығы (Нормативтік құқықтық актілерді мемлекеттік тіркеу тізілімінде N 2929 тіркелген) "Заң" газетінің N 149 санында 16 тамыз 2005 жылы жарияланған;
3. "Аспирантура мен докторантураға қабылдаудың Типтік ережесін бекіту туралы" Қазақстан Республикасы Білім және ғылым министрінің 2004 жылғы 23 шілдедегі N 645 бұйрығы (Нормативтік құқықтық актілерді мемлекеттік тіркеу тізілімінде N 3005 тіркелген) "Заң" газетінің N 147-148 санында 12 тамыз 2005 жылы жарияланған;
4. ""Қазақстан Республикасының жоғары оқу орындарының магистратурасына қабылдаудың типтік ережелерін бекіту туралы" Қазақстан Республикасының Білім және ғылым министрінің 2003 жылғы 29 мамырдағы N 354 бұйрығына өзгерістер енгізу туралы" Қазақстан Республикасы Білім және ғылым министрінің 2004 жылы 13 тамыздағы N 683 бұйрығы (Нормативтік құқықтық актілерін мемлекеттік тіркеу тізілімінде N 3049 тіркелген) "Заң" газетінің N 147-148 сандарында 12 тамыз 2005 жылы жарияланған;
5. "Адъюнктураға қабылдаудың үлгі ережесін бекіту туралы" Қазақстан Республикасы Білім және ғылым министрінің 2004 жылғы 23 қарашадағы N 962 бұйрығы (Нормативтік құқықтық актілерді мемлекеттік тіркеу тізілімінде N 3305 тіркелген) "Заң" газетінің N 147-148 сандарында 12 тамыз 2005 жылы жарияланған;
6. "Клиникалық ординатураға қабылдаудың үлгі ережесін бекіту туралы" Қазақстан Республикасы Білім және ғылым министрінің 2004 жылғы 23 қарашадағы N 963 бұйрығы (Нормативтік құқықтық актілерді мемлекеттік тіркеу тізілімінде N 3304 тіркелеген) "Заң" газетінің N 147-148 сандарында 12 тамыз 2005 жылы жарияланған;
7. ""Аспирантура мен докторантураға қабылдаудың типтік ережесін бекіту туралы" Қазақстан Республикасы Білім және ғылым министрінің 2004 жылғы 23 шілдедегі N 645 бұйрығына өзгерістер енгізу туралы" Қазақстан Республикасы Білім және ғылым министрінің міндетін атқарушының 2005 жылғы 13 мамырдағы N 299 бұйрығы (Нормативтік құқықтық актілерді мемлекеттік тіркеу тізілімінде N 3656 тіркелген) 2005 жылғы 23 қарашада "Заң" газетінің N 217 санында жарияланған;
8. ""Қазақстан Республикасының жоғары оқу орындарының магистратурасына қабылдаудың типтік ережесін бекіту туралы" Қазақстан Республикасы Білім және ғылым министрінің 2003 жылғы 29 мамырдағы N 354 бұйрығына өзгеріс пен толықтырулар енгізу туралы" Қазақстан Республикасы Білім және ғылым министрінің 2005 жылғы 26 қыркүйектегі N 646 бұйрығы (Нормативтік құқықтық актілерді мемлекеттік тіркеу реестрінде N 3911 тіркелген) "Заң" газетінің N 233-234 сандарында 14 желтоқсан 2005 жылы жарияланған;
9. ""Аспирантура мен докторантураға қабылдаудың типтік ережесін бекіту туралы" Қазақстан Республикасы Білім және ғылым министрінің 2004 жылғы 23 шілдедегі N 645 бұйрығына өзгертулер енгізу туралы" Қазақстан Республикасы Білім және ғылым министрінің 2006 жылғы 15 мамырдағы N 260 бұйрығы (Нормативтік құқықтық актілерді мемлекеттік тіркеу тізілімінде N 4233 тіркелген) "Заң" газетінің N 99-100 сандарында 2 маусым 2006 жылы жарияланған;
10. ""Клиникалық ординатураға қабылдаудың үлгі ережесін бекіту туралы" Қазақстан Республикасы Білім және ғылым министрінің 2004 жылғы 23 қарашадағы N 963 бұйрығына өзгерістер енгізу туралы" Қазақстан Республикасы Білім және ғылым министрінің 2007 жылғы 19 сәуірдегі N 202 бұйрығы (Нормативтік құқықтық актілерді мемлекеттік тіркеу тізілімінде N 4663 тіркелген);
11. ""Аспирантура мен докторантураға қабылдаудың типтік ережесін бекіту туралы" Қазақстан Республикасы Білім және ғылым министрінің 2004 жылғы 23 шілдедегі N 645 бұйрығына толықтыру енгізу туралы" Қазақстан Республикасы Білім және ғылым министрінің 2007 жылғы 17 мамырдағы N 252 бұйрығы (Нормативтік құқықтық актілерді мемлекеттік тіркеу тізілімінде N 4705 тіркелген).