Квазимемлекеттік сектордың сыртқы борышының шекті көлемін айқындау мәселелері жөнінде комиссия құру туралы

      Квазимемлекеттік сектордың сыртқы борышының шекті көлемін айқындау мәселелері бойынша ұсыныстар әзірлеу мақсатында:

      1. Квазимемлекеттік сектордың сыртқы борышының шекті көлемін айқындау мәселелері жөніндегі комиссия (бұдан әрі – Комиссия) құрылсын.

      2. Қоса беріліп отырған:

      1) Комиссия құрамы;

      2) Комиссия туралы ереже бекітілсін.

Квазимемлекеттік сектордың сыртқы борышының шекті көлемін айқындау мәселелері жөніндегі комиссияның құрамы

      Ескерту. Құрамға өзгерістер енгізілді - ҚР Премьер-Министрінің 23.10.2018 № 131-ө; 11.04.2019 № 57-ө өкімдерімен; ҚР Үкіметінің 01.10.2020 № 624 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) қаулысымен.

      Қазақстан Республикасы Премьер-Министрінің бірінші орынбасары, төраға

      Қазақстан Республикасының Ұлттық экономика вице-министрі, төрағаның орынбасары

      Қазақстан Республикасы Ұлттық экономика министрлігінің Департамент директоры, хатшы

      Қазақстан Республикасының Ұлттық Банкі төрағасының орынбасары (келісім бойынша)

      Қазақстан Республикасының Ауыл шаруашылығы вице-министрі

      Қазақстан Республикасының Цифрлық даму, қорғаныс жəне аэроғарыш өнеркəсібі вице-министрі

      Қазақстан Республикасының Индустрия жəне инфрақұрылымдық даму вице-министрі

      Қазақстан Республикасының Қаржы вице-министрі

      Қазақстан Республикасының Энергетика вице-министрі

Квазимемлекеттік сектордың сыртқы борышының шекті көлемін айқындау мәселелері жөніндегі комиссия туралы ереже

1. Жалпы ережелер

      1. Квазимемлекеттік сектордың сыртқы борышының шекті көлемін айқындау мәселелері жөніндегі комиссия (бұдан әрі – Комиссия) Қазақстан Республикасы Үкіметінің жанындағы консультативтік-кеңесші орган болып табылады.

      2. Комиссия қызметінің мақсаты квазимемлекеттік сектордың сыртқы борышының шекті көлемін айқындау бойынша ұсынымдар әзірлеу болып табылады.

      3. Комиссия өз қызметінде Қазақстан Республикасының Конституциясын, Қазақстан Республикасының заңдарын және Қазақстан Республикасының өзге де нормативтік құқықтық актілерін, сондай-ақ осы Ережені басшылықа алады.

      4. Қазақстан Республикасының Ұлттық экономика министрлігі Комиссияның жұмыс органы болып табылады.

      5. Комиссияның отырыстары қажеттілігіне қарай өткізіледі.

2. Комиссияның міндеттері

      6. Комиссияның негізгі міндеттері:

      1) квазимемлекеттік сектордың сыртқы борышының шекті көлемін айқындау, сондай-ақ валюталық түсім болмаған жағдайда квазимемлекеттік сектор субъектілерінің шетел валютасындағы жаңа қарыздарын қарыз сомасының кемінде 30 %-ы мөлшерінде хеджирлеу жөніндегі ұсынымдар тұжырымдау;

      2) квазимемлекеттік сектордың сыртқы борышының бекітілген шекті көлемін түзету бойынша ұсынымдар әзірлеу болып табылады.

      6-1. Комиссия квазимемлекеттік сектор субъектілері ұсынатын қарыздарға қызмет көрсету бойынша жоспарларды ескере отырып ұсынымдар тұжырымдайды.

3. Комиссияның қызметін ұйымдастыру

      7. Комиссияның қызметін ұйымдастыру және оның тәртібі Қазақстан Республикасы Үкіметінің 1999 жылғы 16 наурыздағы қаулысымен бекітілген Қазақстан Республикасы Үкіметінің жанындағы консультациялық-кеңесші органдарды құру тәртібі, қызметі мен таратылуы туралы нұсқаулыққа сәйкес жүзеге асырылады.