Қазақстан Республикасы Денсаулық сақтау және әлеуметтік даму министрінің кейбір бұйрықтарына өзгерістер енгізу туралы

      "Халықты жұмыспен қамту туралы" 2016 жылғы 6 сәуірдегі Қазақстан Республикасы Заңының 7-бабының 6), 11), 16), 18) тармақшаларына сәйкес БҰЙЫРАМЫН:

      1. Қазақстан Республикасы Денсаулық сақтау және әлеуметтік даму министрінің өзгерістер енгізілетін кейбір бұйрықтарының тізбесі осы бұйрыққа қосымшаға сәйкес бекітілсін.

      2. Қазақстан Республикасы Еңбек және халықты әлеуметтік қорғау министрлігінің Халықты жұмыспен қамту департаменті заңнамада белгіленген тәртіппен:

      1) осы бұйрықты Қазақстан Республикасының Әділет министрлігінде мемлекеттік тіркеуді;

      2) осы бұйрықты Қазақстан Республикасы Еңбек және халықты әлеуметтік қорғау министрлігінің интернет-ресурсында орналастыруды;

      3) осы бұйрық мемлекеттік тіркелгеннен кейін он жұмыс күні ішінде Қазақстан Республикасы Еңбек және халықты әлеуметтік қорғау министрлігінің Заң қызметі департаментіне осы тармақтың 1), 2) және 3) тармақшаларында көзделген іс-шаралардың орындалуы туралы мәліметтердің ұсынылуын қамтамасыз етсін.

      3. Осы бұйрықтың орындалуын бақылау Қазақстан Республикасының Еңбек және халықты әлеуметтік қорғау бірінші вице-министрі Е.Ж. Жылқыбаевқа жүктелсін.

      4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.

      КЕЛІСІЛДІ

      Қазақстан Республикасының

      Қаржы министрлігі

      КЕЛІСІЛДІ

      Қазақстан Республикасының

      Ұлттық экономика министрлігі

Қазақстан Республикасының Денсаулық сақтау және әлеуметтік даму министрінің өзгерістер енгізілетін кейбір бұйрықтарының тізбесі

      1. Кейбір үлгілік құжаттарды бекіту туралы" Қазақстан Республикасы Денсаулық сақтау және әлеуметтік даму министрінің 2016 жылғы 7 маусымдағы № 482 бұйрығына (Нормативтік құқықтық актілерді мемлекеттік тіркеу тізілімінде № 13867 болып тіркелген, "Әділет" ақпараттық-құқықтық үйесінде 2016 жылғы 18 шілдеде жарияланған) мынадай өзгерістер енгізілсін:

      Ауданның (қаланың), облыстың (астананың, республикалық маңызы бар қаланың) халықты жұмыспен қамту орталығы" мемлекеттік мекемесінің үлгілік жарғысында:

      15-тармақта:

      11 және 12) тармақшалары мынадай редакцияда жазылсын:

      "11) Қазақстан Республикасы Үкіметінің 2018 жылғы 13 қарашадағы № 746 қаулысымен бекітілген Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған "Еңбек" мемлекеттік бағдарламасына (бұдан әрі - Бағдарлама) қатысушылармен еңбек ресурстарының ұтқырлығын арттыру жөнінде осы бұйрықпен бекітілген әлеуметтік келісімшартқа қол қояды, оның орындалуына және шарттары орындалмаған кезде Заңға сәйкес санкциялардың қолданылуына мониторингті жүзеге асырады;

      12) еңбек делдалдығын, сондай-ақ проактивті форматта Қазақстан Республикасының халықты жұмыспен қамту туралы заңнамаларында көзделген халықты жұмыспен қамтуға жәрдемдесу шараларын, оның ішінде мобильді халықты жұмыспен қамту орталықтары арқылы көрсетеді.";

      Халықты жұмыспен қамту мәселелері жөніндегі өңірлік комиссия туралы үлгілік ережеде, көрсетілген бұйрықпен бекітілген:

      5-тармақ мынадай редакцияда жазылсын:

      "5. Аудандық (қалалық) комиссияның функцияларына:

      1) халықты жұмыспен қамту орталықтарын хабардар ете отырып, өтініш берушілерді Бағдарламаға қатысушылардың құрамына қосу туралы не қосудан бас тарту туралы шешім қабылдау;

      2) ТжКБ бар кадрларды даярлауға үміткерлердің тізімін қалыптастыру үшін мобильді топтар құрады;

      3) "Жастар – ел тірегі" ұлттық жобасына қатысу үшін NEET санатындағы жастар тізімін қалыптастыру бойынша мобильдік топтар құру.

      4) ерікті түрде қоныс аударуға қатысушысының келісімін алған жағдайда ол үйді сатып алу үшін жылына отбасына есептелген сома шегінде материалдық көмек сомасынбіржолғы төлеу бойынша ұсынымдарды әзірлеу;

      5) ТжКБ бар кадрларды даярлауға және қысқа мерзімді кәсіптік оқытуға үміткерлердің тізімдерін бекіту;

      6) Бағдарламаға қатысушыларды оқудан шығару және үміткерді бос орынға ауыстыру туралы шешім қабылдау;

      7) Бағдарламаның іске асыру тетіктерін жақсарту, сондай-ақ Бағдарламаның іске асырылуын тексеру нәтижелері бойынша анықталған бұзушылықтардың алдын алу және жою бойынша ұсынымдар әзірлеу;

      8) халықты жұмыспен қамтамасыз ету жөнінде республикалық іс-шараларды жергілікті атқарушы органдар қабылдайтын шаралармен үйлестіру бойынша ұсыныстар әзірлеу;

      9) Бағдарлама шеңберінде іске асырылатын инфрақұрылымдық жобалардың тізбесін қарау және келісу;

      10) біржолғы шартты ақшалай көмекті төлеуді ұсыну туралы мәселелерді қарау кіреді.".

      2. "Халықты жұмыспен қамтуға жәрдемдесудің кейбір мәселелері туралы" Қазақстан Республикасы Денсаулық сақтау және әлеуметтік даму министрінің 2016 жылғы 14 маусымдағы № 516 бұйрығына (Нормативтік құқықтық актілерді мемлекеттік тіркеу тізілімінде № 13938 болып тіркелген, "Әділет" ақпараттық-құқықтық жүйесінде 2016 жылғы 28 шілдеде жарияланған) мынадай өзгерістер енгізілсін:

      көрсетілген бұйрықпен бекітілген Қоғамдық жұмыстарды ұйымдастыру және қаржыландыру қағидаларында:

      9-тармақ мынадай редакцияда жазылсын:

      "9. Халықты жұмыспен қамту орталығы:

      1) қоғамдық жұмыстарды ұйымдастыру және қаржыландыру мәселелері бойынша жұмыс берушілерге концультация береді;

      2) қаржыландыру шегіне байланысты жыл сайын 1 қарашаға дейін осы Қағидаларға 1-қосымшаға сәйкес нысан бойынша қоғамдық жұмыстар ұйымдастырылатын жұмыс берушілерден алдағы қаржы жылына өтінімдер жинауды жүзеге асырады;

      3) өтінімдерді жинау аяқталған күннен бастап 5 жұмыс күні ішінде оларды бірыңғай тізбеге жинақтайды және бекіту үшін халықты жұмыспен қамту мәселелері жөніндегі жергілікті органға жібереді;

      4) жыл ішінде қажеттілікке қарай жұмыс берушілерден қоғамдық жұмыстарды ұйымдастыруға қосымша өтінімдер қабылдайды.

      5) ай сайын "Еңбек биржасы" мемлекеттік интернет-ресурсында қоғамдық жұмыстар бойынша мыналарды:

      қоғамдық жұмыстарды ұйымдастырған жұмыс берушілердің санын;

      қоғамдық жұмысқа орналасқандардың санын;

      қоғамдық жұмысқа орналасқандардың орташа айлық жалақысының мөлшерін қамтитын мәліметтер орналастырады.";

      12, 13 және 14-тармақтар мынадай редакцияда жазылсын:

      "12. Халықты жұмыспен қамту орталығы қоғамдық жұмыстарға осы Қағидаларға 3-қосымшаға сәйкес нысан бойынша жолдама береді.

      Қоғамдық жұмыстарға қатысқысы келетін адамдар халықты жұмыспен қамту орталығына тіркелген күніне сәйкес кезектілік тәртібімен жіберіледі.

      Қоғамдық жұмыстарға қатысқысы келетін адамдар қажетті құжаттарды қоса бере отырып, осы Қағидаларға 4-қосымшаға сәйкес нысан бойынша мынадай құжаттарды:

      еңбек кітапшасының көшірмесін (бар болса);

      білімі туралы құжаттың (аттестат, куәлік, диплом), сондай-ақ бар болса, оқудан өткенін растайтын құжаттардың (куәлік, сертификат) көшірмелерін қоса отырып өтінім береді.

      Қоғамдық жұмыстарға қатысқысы келетін он алты жас пен он сегіз жас аралығындағы студенттер және жалпы білім беретін мектептердің жоғары сынып оқушылары өтінішпен қоса:

      ата-аналарының бірінен немесе заңды өкілдерінен жазбаша келісімді;

      оқу орнынан оқу процессінен тыс қоғамдық жұмыстарға қатысуына жазбаша келісімді ұсынады.

      13. Жұмыспен қамту орталығы студенттің және жалпы білім беретін мектептердің жоғары сынып оқушысының қоғамдық жұмысқа қатысу үшін өтінішін 2016 жылғы 6 сәуірдегі "Халықты жұмыспен қамту туралы" Қазақстан Республикасы Заңының 22-бабы 2-тармағының 2) тармақшасына сәйкестігін қарайды.

      14. Тоқтап тұруға байланысты жұмыспен қамтамасыз етілмеген адамдар халықты жұмыспен қамту орталығына толық емес жұмыс уақытының немесе ұзақтығы қысқартылған жұмыс уақытының режиміне ауыстыру немесе әлеуметтік демалысты беру немесе мәжбүрлі тоқтап тұру, жалақысы сақталусыз демалысты беру туралы жұмыс берушінің актісін (ішінара жұмыспен қамтылған жалдамалы қызметкерлер үшін) ұсынады.";

      16-тармақ мынадай редакцияда жазылсын:

      "16. Қоғамдық жұмыстарда еңбек ету кезеңі қоғамдық жұмысқа қатысушының жұмыс өтіліне есептеледі.";

      18-тармақ мынадай редакцияда жазылсын:

      "18. Қоғамдық жұмыстарға қатысуды дәлелсіз себептермен өз еркімен тоқтатқан жұмыссыздар жұмыссыздар ретінде есептен шығарылады және жұмыссыз ретінде қайта тіркелген күннен бастап үш ай өткен соң кейін ғана қоғамдық жұмыстарға қайта жіберілуі мүмкін.";

      22, 23 және 24-тармақтар мынадай редакцияда жазылсын:

      "22. Қоғамдық жұмыстарға қатысатын адамдарға еңбекақы төлеуді халықты жұмыспен қамту орталығы ай сайын, Қоғамдық жұмыстарды орындауға арналған үлгілік шартқа қосымшаға сәйкес нысан бойынша жұмыс берушілер ұсынған мәліметтердің негізінде жүргізеді және қоғамдық жұмыстарға қатысатын адамдардың екінші деңгейдегі банктерде немесе банк қызметінің жеке түрлерін жүргізуге құқығы бар өзге қаржылық институттарда ашылған ағымдағы (карточкалық) шоттарына ақшалай қаражатты аудару арқылы жүзеге асырады.

      23. Қоғамдық жұмыстарға қатысқаны үшін адамдарға есептелген жалақыға "Салық және бюджетке төленетін басқа да міндетті төлемдер туралы (Салық кодексі)" 2017 жылғы 25 желтоқсандағы Қазақстан Республикасының Кодексіне сәйкес салық салынады.

      24. Қоғамдық жұмыстарға қатысушы адамдарға уақытша жұмысқа жарамсыздығы жөніндегі әлеуметтік жәрдемақы төлеуді Еңбек кодексіне сәйкес халықты жұмыспен қамту орталығы жүргізеді.";

      4-қосымшасы осы тізбенің 1-қосымшасыны сәйкес жаңа редакцияда жазылсын;

      Әлеуметтік жұмыс орындарын ұйымдастыру және қаржыландыру қағидаларында:

      2-тармақтың 16) тармақшасы мынадай редакцияда жазылсын:

      "16) халықты жұмыспен қамтуға жәрдемдесудің белсенді шаралары – жұмыссыздар, "Жұмыспен қамтылған адамдардың жекелеген санаттарын айқындау туралы" Қазақстан Республикасының Үкіметінің 2019 жылғы 11 сәуірдегі № 178 қаулысына (бұдан әрі – № 178 қаулы) сәйкес жұмыспен қамтылған адамдардың жекелеген санаттары, сондай-ақ Заңда көзделген жағдайларда өзге адамдар қатарындағы Қазақстан Республикасының азаматтары мен оралмандарды жұмыссыздықтан әлеуметтік қорғаудың және халықты жұмыспен қамтамасыз етудің, мемлекеттік қолдаудың Қазақстан Республикасының халықты жұмыспен қамту туралы заңнамасында белгіленген тәртіппен жүзеге асырылатын шаралары;";

      3-тармақ мынадай редакцияда жазылсын:

      "3. Әлеуметтік жұмыс орындары олардың меншік нысанына қарамастан жұмыс берушілерде, сондай-ақ үйде ұйымдастырылады, бұл ретте салық және басқа да әлеуметтік аударымдарын тұрақты түрде жүргізетін, жалақы бойынша мерзімі өткен берешегі жоқ және бір жылдан аса қызмет ететін жұмыс берушілердің қатысуына жол беріледі.

      Жұмыс беруші жұмыссыздарды, оның ішінде табысы аз және көпбалалы отбасылардың мүшелерін, мүгедек балаларды тәрбиелеп отырған адамдарды жұмысқа орналастыру үшін олардың жалақысын субсидиялай отырып әлеуметтік жұмыс орнын құрады.

      Табысы аз, көпбалалы отбасылардың мүшелері, мүгедек балаларды тәрбиелеуші адамдар үшін сондай-ақ, әлеуметтік жұмыс орындарын құру көзделеді.";

      6-тармақ мынадай редакцияда жазылсын:

      "6. Әлеуметтік жұмыс орындары жұмыссыздар үшін арнайы құрылады, олардың арасында табысы аз және көпбалалы отбасы мүшелері, мүгедек балаларды тәрбиелеуші адамдар, сондай-ақ "Халықты жұмыспен қамту туралы" Заңның 20-бабы 2-тармағының 1)-9) тармақшаларында көрсетілген адамдар:

      1) балалар ауылының тәрбиеленушілері және балалар үйлерінің, жетім балалар мен ата-анасының қамқорлығынсыз қалған он алты жастан жиырма үш жасқа дейінгі балаларға арналған мектеп-интернаттардың түлектері;

      2) зейнеткерлік жас алдындағы (зейнеткерлікке шығуға екі жыл қалған) адамдар;

      3) мүгедектер;

      4) бас бостандығынан айыру орындарынан босатылған және (немесе) мәжбүрлеп емдеуден өткен адамдар;

      5) пробация қызметінің есебінде тұрған адамдар;

      6) кәмелетке толмаған балаларды тәрбиелеп отырған жалғызілікті, көпбалалы ата-аналар;

      7) жеті жасқа дейінгі баланы, мүгедек баланы, бірінші және екінші топтағы мүгедектерді бағып-күтуді жүзеге асыратын адамдар;

      8) оралмандар;

      9) терроризм актісінің нәтижесінде зардап шеккен адамдар және оның жолын кесуге қатысқан адамдар басымдыққа ие.";

      7-тармақ мынадай редакцияда жазылсын:

      "7. Халықты жұмыспен қамту орталығы:

      1) жұмыс берушілерге әлеуметтік жұмыс орындарын құру және қаржыландыру мәселелері бойынша консультация береді;

      2) қаржыландыру шегіне қарай жыл сайын 1 қарашаға дейінгі мерзімде осы Қағидаларға 1-қосымшаға сәйкес нысан бойынша әлеуметтік жұмыс орындарын ұйымдастыратын жұмыс берушілерден алдағы қаржы жылына өтінімдер жинауды жүзеге асырады;

      3) өтінімдерді жинау аяқталған күннен бастап 5 жұмыс күні ішінде оларды бірыңғай тізбеге жинақтайды және бекіту үшін жұмыспен қамту мәселелері жөніндегі жергілікті органға жібереді;

      4) жыл ішінде қажеттілікке қарай жұмыс берушілерден әлеуметтік жұмыс орындарын ұйымдастыруға қосымша өтінімдер қабылдайды;

      5) жұмыс берушілердің бюджет қаражатын мақсатты пайдалануына, жұмысқа орналастырылған азаматтардың міндетті зейнетақы аударымдары болуына мониторинг жүргізеді.

      6) "Еңбек биржасы" мемлекеттік интернет-ресурсында әлеуметтік жұмыс орындары бойынша мыналарды құрайтын деректерді жариялайды:

      әлеуметтік жұмыс орындарын ұйымдастырған жұмыс берушілердің саны;

      әлеуметтік жұмыс орындарына орналастырылғандардың саны;

      әлеуметтік жұмыс орындарына орналастырылғандардың орташа айлық мөлшері.";

      13-тармақ 2) тармақшасы мынадай редакцияда жазылсын:

      "2) жұмыссыз ретінде тіркелгендігі ескеріледі.";

      16-тармақ мынадай редакцияда жазылсын:

      "16. "Халықты жұмыспен қамту туралы" Заңның 20-бабына сәйкес әлеуметтік жұмыс орындарындағы еңбек қызметін дәлелсіз себептермен өз бетінше тоқтатқан жұмыссыздар жұмыссыздар ретінде есептен шығарылады және жұмыссыз ретінде қайта тіркелген күннен бастап үш ай өткеннен кейін ғана жұмыспен қамтуға жәрдемдесудің белсенді шараларына қайта қатыса алады.";

      19 және 20-тармақтарды мынадай редакцияда жазылсын:

      "19. Әлеуметтік жұмыс орындарына жіберілген жұмыссыздарға Қазақстан Республикасының еңбек заңнамасы қолданылады.

      Әлеуметтік жұмыс орындарына қатысушының еңбек қызметінің кезеңі оның еңбек өтіліне есептеледі.

      20. Бос жұмыс орны пайда болған кезде жұмыс берушінің бастамасы бойынша және әлеуметтік жұмыс орындарына қатысушының келісімімен жасалған еңбек шартының мерзімі аяқталғанға дейін тұрақты жұмыс орнына жұмысқа орналасуға жол беріледі. Бұл ретте жұмыс беруші тұрақты жұмысқа қабылдау туралы бұйықтың көшірмесін халықты жұмыспен қамту орталығына жұмысқа қабылдаған кезден бастап бес жұмыс күні ішінде жолдайды.";

      25-тармақ мынадай редакцияда жазылсын:

      "25. Қазақстан Республикасы Үкіметінің 2018 жылғы 13 қарашадағы № 746 қаулысымен бекітілген Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған "Еңбек" мемлекеттік бағдарламасына (бұдан әрі – Бағдарлама) сәйкес экологиялық үстемеақылар бойынша төлемдерді есепке алмағанда, салықтарды, міндетті әлеуметтік аударымдарды және пайдаланылмаған еңбек демалысына өтемақыны ескергенде әлеуметтік жұмыс орындарына жұмысқа орналастырылған жұмыссыздардың жалақысына субсидияның ай сайынғы мөлшері жалақының белгіленген мөлшерінен 35 %-ды құрайды, бірақ тиісті қаржы жылына арналған республикалық бюджет туралы заңда айқындалған ең төменгі жалақы мөлшерінен аспайды.

      Үкіметтік емес ұйымдар мүмкіндіктері шектеулі адамдар үшін құратын әлеуметтік жұмыс орындарының жалақысын субсидиялау мөлшерін жергілікті атқарушы органдар дербес белгілейді.

      Орындалатын жұмыстың көлеміне және күрделілігіне қарай жұмыс беруші өз қаражаты есебінен, қажет болған жағдайда, нақты орындалған жұмыс үшін қосымша үстемеақылар белгілейді.";

      28-тармақ мынадай редакцияда жазылсын:

      "28. Жұмыс беруші әлеуметтік жұмыс орындарына жұмысқа орналастырылған жұмыссыздарға еңбекақы төлеуді ай сайын нақты орындалған жұмыс уақыты үшін еңбек шартында белгіленген мөлшерге қарай жүргізеді.";

      1-қосымша осы тізбенің 2-қосымшасына сәйкес жаңа редакцияда жазылсын;

      2-қосымшада:

      қосымша осы тізбенің 3-қосымшасына сәйкес жаңа редакцияда жазылсын;

      Жастар практикасын ұйымдастыру және қаржыландыру қағидаларында:

      4-тармақтың 1-тармақшасы мынадай редакцияда жазылсын:

      "1) жастар практикасы Қазақстан Республикасы Үкіметінің 2018 жылғы 13 қарашадағы № 746 қаулысымен бекітілген Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған "Еңбек" мемлекеттік бағдарламасына (бұдан әрі – Бағдарлама) сәйкес түлектер оқуды аяқтағаннан кейінгі 3 жыл ішінде алған кәсібі (мамандығы) бойынша бастапқы жұмыс тәжірибесін жинақтау үшін арналған;";

      7-тармақ мынадай редакцияда жазылсын:

      "7. "Халықты жұмыспен қамту туралы" Заңның 20-бабы 3-тармағына сәйкес халықты жұмыспен қамту мәселелері жөніндегі жергілікті орган:

      1) жастар практикасын ұйымдастыруға сұраныс пен ұсынысты қалыптастырады;

      2) жастар практикасын ұйымдастыруға өтінім берген өңірлердегі ұйымдардың тізбесін, тартылатын білім беру ұйымдары түлектерінің қатарындағы жұмыссыздардың санын, оларға еңбекақы төлеу шарттары мен мөлшерін және қаржыландыру көздерін айқындайды..

      Ұйымдардың тізбесі жыл ішінде қажеттілігіне қарай жаңартылады.";

      11-тармақ мынадай редакцияда жазылсын:

      "11. Халықты жұмыспен қамту орталығы:

      1) жұмыссыздарға жастар практикасынан өту мәселелері бойынша консультация береді;

      2) жұмыссыздарға осы Қағидаларға 4-қосымшаға сәйкес нысан бойынша жастар практикасына жолдама береді.

      3) ай сайын "Еңбек биржасы" мемлекеттік интернет-ресурсында жастар практикасы бойынша:

      Жастар практикасын ұйымдастырған жұмыс берушілердің саны;

      Жастар практикасына жұмысқа орналасқандардың саны;

      Жастар практикасына жұмысқа орналасқандардың орта айлық еңбекақы мөлшері туралы мәліметтерді орналастырады.";

      Білім беру ұйымдары түлектерінің қатарындағы жұмыссыздарды жастар практикасына жіберуге олардың келісімімен ғана жол беріледі.

      16-тармақ мынадай редакцияда жазылсын:

      "16. Жұмыс берушінің бастамасы бойынша бос жұмыс орны пайда болған кезде және жастар практикасына қатысушының келісімімен жасалған еңбек шартының мерзімі аяқталғанға дейін тұрақты жұмыс орнына жұмысқа орналасуға жол беріледі. Бұл ретте, жұмыс беруші тұрақты жұмысқа қабылдау туралы бұйықтың көшірмесін халықты жұмыспен қамту орталығына жұмысқа қабылдаған сәттен бастап бес жұмыс күні ішінде жолдайды.";

      25, 26 және 27-тармақтар мынадай редакцияда жазылсын:

      "25. халықты жұмыспен қамту орталығы ай сайын "Қазақстан Республикасының Денсаулық сақтау және әлеуметтік даму министрлігі әзірлеген ведомстволық статистикалық байқаулардың нысандары мен оларды толтыру жөніндегі нұсқаулықтарды бекіту туралы" Қазақстан Республикасының Ұлттық экономика министрлігі Статистика комитеті төрағасының міндетін атқарушының 2015 жылғы 30 желтоқсандағы № 227 бұйрығымен (Нормативтік құқықтық актілерді мемлекеттік тіркеу тізілімінде № 13485 болып тіркелген) бекітілген нысан бойынша және мерзімдерде жастар практикасы бойынша есептілік жүргізеді және оны халықты жұмыспен қамту мәселелері жөніндегі жергілікті органға ұсынады және аталған есепте:

      1) жастар практикасының шеңберінде құрылған жұмыс орындарына жұмысқа орналастырылған түлектердің саны туралы;

      2) жастар практикасының шеңберінде құрылған жұмыс орындарына жұмысқа орналастырылған адамдар жалақысының орташа айлық мөлшері туралы мәліметтер көрсетіледі.";

      26. Түлектер қатарындағы жастар практикасына қатысушылардың жалақысын қаржыландыру алты айдан аспайтын мерзімде еңбек шартына сәйкес жүзеге асырылады.

      Республикалық немесе жергілікті бюджеттерден айына субсидия беру (жалақының) мөлшері экологиялық үстемеақылар бойынша төлемдерді қоспағанда, республикалық немесе жергілікті бюджеттерден субсидиялаудың бір айдағы мөлшері 25 айлық есептік көрсеткішті (салықтарды, міндетті әлеуметтік аударымдарды, пайдаланылмаған еңбек демалысына өтемақыларды және банк қызметтерін ескергенде) құрайды.

      Орындалатын жұмыстың көлеміне және күрделілігіне қарай жұмыс беруші өз қаражаты есебінен, қажет болған жағдайда, нақты орындалған жұмыс үшін қосымша үстемеақылар белгілейді.

      Жастар практикасы бойынша жұмыс істейтіндерге есептелген еңбекақыға 2017 жылғы 25 желтоқсандағы "Салық және бюджетке төленетін басқа да міндетті төлемдер туралы (Салық кодексі)" Қазақстан Республикасының Кодексіне сәйкес салық салынады.

      27. Жастар практикасын қаржыландыру республикалық және жергілікті бюджеттер қаражаты есебінен, сондай-ақ алған кәсібі (мамандығы) бойынша техникалық және кәсіптік, орта білімнен кейінгі, жоғары, жоғары оқу орнынан кейінгі білім беру бағдарламаларын іске асыратын білім беру ұйымдарының жиырма тоғыз жастан аспаған түлектеріне еңбекақы төлеуге Қазақстан Республикасының заңнамаларында тыйым салынбаған көздерден жүзеге асырылады.

      Мемлекеттік қолдау шарасын республикалық бюджеттен қаржыландыру халықты жұмыспен қамту мәселелері жөніндегі уәкілетті орган арқылы жүзеге асырылады.

      Мемлекеттік қолдау шарасын жергілікті бюджеттен қаржыландыру халықты жұмыспен қамту мәселелері жөніндегі жергілікті орган арқылы жүзеге асырылады".

      Әлеуметтік кәсіптік бағдарлау жүргізу қағидаларында:

      1-тармақ мынадай редакцияда жазылсын:

      "1. Осы Әлеуметтік кәсіптік бағдарлау жүргізу қағидалары (бұдан әрі – Қағидалар) "Халықты жұмыспен қамту туралы" 2016 жылғы 6 сәуірдегі Қазақстан Республикасы Заңының (бұдан әрі – "Халықты жұмыспен қамту туралы" Заң) 7-бабының 13) тармақшасына сәйкес әзірленді және жұмыс іздеп жүрген адамдарға, жұмыссыздарға, № 178 Қаулыға сәйкес жұмыспен қамтылғандардың жекелген санаттарына (бұдан әрі – жұмыспен қамтылғандардың санаттары), оралмандарға, сондай-ақ студенттерге, жалпы білім беретін мектептердің жоғары сынып оқушыларына әлеуметтік кәсіптік бағдарлау жүргізу тәртібін айқындайды.";

      3. "Жұмыс күшінің ұтқырлығын арттыру үшін адамдардың ерікті түрде қоныс аудару қағидаларын бекіту туралы" Қазақстан Республикасы Денсаулық сақтау және әлеуметтік даму министрінің 2016 жылғы 14 маусымдағы № 515 бұйрығына (Нормативтік құқықтық актілерді мемлекеттік тіркеу тізілімінде № 13921 болып тіркелген, "Әділет" ақпараттық-құқықтық жүйесінде 2016 жылғы 17 тамызда жарияланған) мынадай өзгерістер енгізілсін:

      көрсетілген бұйрықпен бекітілген Жұмыс күшінің ұтқырлығын арттыру үшін адамдардың ерікті түрде қоныс аудару қағидаларында:

      3-тармақта:

      2) және 3) тармақшалары мынадай редацияда жазылсын:

      "2) әлеуметтік келісімшарт – жұмыссыздар, № 178 қаулыға сәйкес Қазақстан Республикасының Үкіметі айқындайтын жұмыспен қамтылған адамдардың жекелеген санаттары, сондай-ақ Заңда көзделген жағдайларда өзге адамдар қатарындағы Қазақстан Республикасының азаматы не оралман мен халықты жұмыспен қамту орталығы арасындағы, ал Заңда көзделген жағдайларда, жұмыспен қамтуға жәрдемдесудің белсенді шараларын ұйымдастыруға тартылған жеке және заңды тұлғалардың тараптардың құқықтары мен міндеттерін айқындайтын, жұмыспен қамтуға жәрдемдесудің белсенді шараларына қатысу туралы, сондай-ақ мемлекеттік атаулы әлеуметтік көмек көрсету туралы келісім;

      3) Бағдарламаға қатысушылар – жұмыс іздеп жүрген адамдар, жұмыссыз, жұмыспен қамтылғандардың жекелеген санаттары қатарындағы Қазақстан Республикасының азаматтары, сондай-ақ жиырма тоғыз жасқа дейінгі жастар, № 178 Қаулыға сәйкес Қазақстан Республикасының Үкіметі айқындаған өңірлерге келген және оралмандар мен қоныс аударушыларды қабылдаудың өңірлік квотасына енгізілген, тұрақты тұру үшін келген оралмандар мен қоныс аударушылар және қатысу басымдығы Қазақстан Республикасы Үкіметінің 2018 жылғы 13 қарашадағы № 746 қаулысымен бекітілген Нәтижелі жұмыспен қамту және жаппай кәсіпкерлікті дамытудың 2017 − 2021 жылдарға арналған "Еңбек" мемлекеттік бағдарламасында (бұдан әрі − Бағдарлама) белгіленген азаматтардың өзге де санаттары;";

      3-тармақтың 24) тармақшасы мынадай редакцияда жазылсын:

      "24) халықты жұмыспен қамтуға жәрдемдесудің белсенді шаралары – жұмыссыздар, № 178 қаулыға сәйкес Қазақстан Республикасының Үкіметі айқындайтын жұмыспен қамтылған адамдардың жекелеген санаттары, сондай-ақ Заңда көзделген жағдайларда өзге адамдар қатарындағы Қазақстан Республикасының азаматтары мен оралмандарды жұмыссыздықтан әлеуметтік қорғаудың және халықты жұмыспен қамтамасыз етудің, мемлекеттік қолдаудың Қазақстан Республикасының халықты жұмыспен қамту туралы заңнамасында белгіленген тәртіппен жүзеге асырылатын шаралары;";

      4, 5, 6, 7 және 8-тармақтар мынадай редакцияда жазылсын:

      "4. Жұмыс күшінің ұтқырлығын арттыру үшін адамдардың ерікті түрде қоныс аударуы 2 бағытта жүзеге асырылады: Қазақстан Республикасының Үкіметі айқындаған қоныс аударушылар мен оралмандарды қабылдаудың өңірлік квотасы шеңберінде өңіраралық және облыс ішіндегі қоныс аудару.

      5. Өңіраралық қоныс аудару үшін қабылдау өңірлерінің халықты жұмыспен қамту орталықтары жыл сайын 1 ақпанға дейін қоныс аудару алдағы жылға мыналар:

      1) жұмыс берушілердің еңбек ресурстарына қажеттілігі;

      2) кәсіптер бөлінісінде жұмыс берушілердің жұмыс күшіне сұранысын қанағаттандыру үшін қосымша еңбек ресурстарын тарту қажеттілігін анықтап, үш жұмыс күні ішінде халықты жұмыспен қамту мәселелері жөніндегі жергілікті органға ол туралы ақпарат жібереді.

      6. Қабылдау өңірінің халықты жұмыспен қамту мәселелері жөніндегі жергілікті органы халықты жұмыспен қамту орталығының ақпараты негізінде шығу өңірлерінен кәсіптер бөлінісінде қосымша еңбек ресурстарын тарту жөніндегі ұсыныстарды қарайды және өңірлік комиссияға жолдайды.

      7. Қоныстандыру өңірлерінің өңірлік комиссиясы шығу өңірлерінен қосымша еңбек ресурстары тартылатын Кәсіптер тізбесін (бұдан әрі – Тізбе), мамандарға қойылатын талаптарды, жұмыс жағдайларын бекітеді.

      Тізбеге мемлекеттік бағдарламалар шеңберінде іске асырылатын жобаларға тарту үшін білікті жұмыскерлердің кәсіптері қосылады.

      8. Оралмандар мен қоныс аударушыларды қабылдау өңірлерінің халықты жұмыспен қамту мәселелері жөніндегі жергілікті органдары қоныс аударушылар мен оралмандарды қабылдау мүмкіндігі туралы ақпаратты халықты жұмыспен қамту мәселелер жөніндегі уәкілетті органға ұсынады.

      11, 12 және 13-тармақтар мынадай редакцияда жазылсын:

      "11. Қабылдау өңірлерінің халықты жұмыспен қамту мәселелері жөніндегі жергілікті органы оралмандар мен қоныс аударушыларды қабылдаудың өңірлік квотасы бекітілген күннен бастап он жұмыс күні ішінде бекітілген Тізбені және қабылдау шарттары туралы ақпаратты шығу өңірлерінің халықты жұмыспен қамту мәселелері жөніндегі жергілікті атқарушы органдарына жібереді.

      12. Шығу өңірлерінің халықты жұмыспен қамту мәселелері жөніндегі жергілікті органдары қабылдау өңірінен бекітілген Тізбені алған күннен бастап бес жұмыс күні ішінде өздерінің интернет-ресурстарында қабылдау өңірлері мен қабылдау шарттары туралы ақпаратты орналастыру үшін оны халықты жұмыспен қамту орталықтарына жібереді.

      13. Халықты жұмыспен қамту мәселелері жөніндегі жергілікті органдар азаматтардың ерікті түрде қоныс аударуын ұйымдастыру үшін облыс шегінде ауылдар мен облыстық (аудандық) маңызы бар қалалар тізбесінің жобасын облыс ішіндегі қоныс аудару үшін өңірлік комиссияның қарауына енгізеді.";

      17-тармақ жаңа мынадай редакцияда жазылсын:

      "17. Халықты жұмыспен қамту орталықтары ерікті өңіраралық қоныс аударуға мынадай санаттағы адамдарға және олардың отбасы мүшелеріне:

      1) жұмыс іздеп жүрген адамдарға;

      2) жұмыссыздарға;

      3) № 178 қаулыға сәйкес жұмыспен қамтылғандардың жекелеген санаттарына жәрдем көрсетеді.

      Ерікті өңіраралық қоныс аударуға:

      1) жиырма тоғыз жасқа дейінгі жастар, оның ішінде балалар ауылының тәрбиеленушілері және балалар үйлерінің, жетім балалар мен ата-анасының қамқорлығынсыз қалған он алты жастан жиырма үш жасқа дейінгі балаларға арналған мектеп-интернаттардың түлектері, сондай-ақ "Мәңгілік ел жастары - индустрияға!" ("Серпін") жобасы шеңберіндегі түлектер;

      2) орта, техникалық және кәсіптік, орта білімнен кейінгі, жоғары және жоғары оқу орнынан кейінгі білім беру ұйымдарының түлектері оқу орнын аяқтаған соң үш жыл ішінде;

      3) жұмыс беруші – заңды тұлғаның таратылуына не жұмыс беруші – жеке тұлға қызметінің тоқтатылуына, жұмыскерлер санының немесе штатының қысқаруына, жұмыс берушінің экономикалық жағдайының нашарлауына әкеп соққан өндірістердің және орындалатын жұмыстар мен көрсетілетін қызметтер көлемінің төмендеуіне байланысты жұмыстан босатылған адамдар;

      4) "Техникалық және кәсіптік, орта білімнен кейінгі және жоғары білімнің білім беру бағдарламаларын іске асыратын білім беру ұйымдарына оқуға түсу кезінде қабылдау квотасының мөлшерін бекіту туралы" Қазақстан Республикасы Үкіметінің 2012 жылғы № 28 ақпандағы № 264 қаулысына сәйкес 10 пайыз көлеміндегі белгіленген квотамен қабылдау өңірлерінде оқитын ауыл жастары қатарынан түлектер басымдықты пайдаланады.";

      22-тармақтың мынадай редакцияда жазылсын:

      "22. Жұмыссыздар, жұмыс іздеп жүрген адамдар және № 178 қаулыға сәйкес жұмыспен қамтылғандардың жекелген санаттары облыс ішінде ерікті түрде қоныс аударуға қатысушылар болып табылады.";

      23-тармақтың 2) тармақсашы алынып тасталсын.

      45-тармақ мынадай редакцияда жазылсын:

      "45. Жергілікті атқарушы органдардың тапсырыстары бойынша Қазақстан Республикасының Үкіметі айқындаған өңірлерге қоныс аударатын Бағдарламаға қатысушыларға жұмыс беруші жұмыскерге тұрғынжай ұсынған жағдайды қоспағанда, тұрғын үй, қызметтік тұрғын үй және жатақханалардан бөлме беріледі.";

      51-тармақ мынадай редацияда жазылсын:

      "51. Бағдарламаға қатысушының немесе еңбек етуге қабілетті отбасы мүшесінің екі айдан астам қолданыстағы еңбек шарты немесе мемлекеттік қолдау көрсету туралы әлеуметтік шарты болмаған жағдайда тұрғын үйді, қызметтік тұрғын үйді, жастарға арналған жатақханадағы бөлмені жалдау (қосымша жалдау) шарты бұзылады.";

      59-тармақ мынадай редацияда жазылсын:

      "59. Отбасының кәмелетке толған мүшесі болмаған жағдайда жалдау (қосымша жалдау) шарты қалалық (аудандық) комиссияның келісімімен отбасының кәмелетке толмаған мүшесінің (мүшелерінің) заңды өкілдерімен жасалады.";

      66-тармақ мынадай редакцияда жазылсын:

      "66. Ерікті өңіраралық қоныс аударуға Бағдарламаға қатысқысы келетін жұмыс берушілер қабылдау өңірінің халықты жұмыспен қамту орталықтарына Бағдарламаға қатысушылардың қатарына қосу және субсидия төлеу туралы осы Қағидаларға 5-қосымша сәйкес нысан бойынша өтінішті мынадай құжаттардың:

      1) өңірлік комиссияның оралмандар мен қоныс аударушыларды қабылдаудың өңірлік квотасына енгізу туралы шешімінің;

      2) өз бетінше қоныс аударушыны қоныс аударған кезден бастап бір жыл ішінде жұмыс берушінің жұмысқа қабылдау туралы актісінің не жұмыскермен жасалған, әрбір жұмыскер үшін жұмыс берушінің қолымен және мөрімен (бар болса) расталған еңбек шартының көшірмелерімен қоса береді.";

      2-қосымшада:

      7-тармақтың 8-тармақшасы мынадай редакцияда жазылсын:

      "8) қоныстану жерінен он екі ай ішінде кеткен (отбасымен) жағдайда көшуге алған субсидиялардың және тұрғын үйді жалдау (жалға алу) және коммуналдық қызметтерге ақы төлеу бойынша шығыстарды өтеуге субсидиялардың сомаларын бюджетке өтеуге міндетті.";

      8-тармақ алып тасталсын;

      6-қосымшасы осы тізбенің 4-қосымшаға сәйкес жаңа редакцияда жазылсын.

ӨТІНІШ

      Мені _______________________________________________________

                              (бағдарламаның атауы)

      бағдарламасы бойынша қоғамдық жұмысқа жіберуіңізді сұраймын.

      Қосымша ___ парақта:

      жеке басты куәландыратын құжаттың көшірмесі;

      тұрғылықты жері бойынша тіркелгенін растайтын құжаттың (мекенжай анықтамасы, ауыл әкімінің анықтамасы) көшірмесі;

      еңбек кітапшасының көшірмесі (бар болса);

      білімі туралы құжаттың (аттестат, куәлік, диплом), сондай-ақ бар болса, оқудан өткенін растайтын құжаттардың (куәлік, сертификат) көшірмелері;

      толық емес жұмыс уақыты немесе ұзақтығы қысқартылған жұмыс уақыты режиміне ауыстыру немесе әлеуметтік демалыс ұсыну туралы немесе мәжбүрлі тоқтап тұру туралы, жалақысы сақталмайтын еңбек демалысы туралы (ішінара жұмыспен қамтылған жалдамалы жұмыскерлер үшін) жұмыс берушінің актісі;

      демалыста болу туралы оқу орнынан анықтама (бар болса).

      Жұмыспен қамтуға жәрдемдесудің белсенді шараларын алу үшін қажетті менің дербес деректерімді жинау мен өңдеуге келісім беремін.

      Ақпараттық жүйелердегі заңмен қорғалатын құпияны құрайтын мәліметтерді пайдалануға келісемін.

      *ұсынылған құжаттардың дәйектілігіне өтініш беруші жауапты болады.

      _________________                              ___________

                  Күні                                           қолы

      ------------------------------------------------------------------------------------------------

                              (кесу сызығы)

      Азамат (ша) ______________________________________________ өтініші

      20__ жылғы ___ ________ қабылданды, № ________ болып тіркелді.

      Құжаттарды қабылдаған адамның тегі, аты, әкесінің аты (бар болса), лауазымы және қолы:

      ________________________________________________________________

      ________________________________________________________________

      _________________                         ___________

                  Күні                               қолы

      *ұсынылған құжаттардың дәйектілігіне өтініш беруші жауапты болады.

Әлеуметтік жұмыс орындарын ұйымдастыру үшін жұмыс берушінің алдағы қаржы жылына өтінімі

      _______________________________________________________________

      (жұмыс берушінің толық атауы, заңды мекенжайы, БСН (ЖСН),

      байланыс жасайтын адамдары мен телефондары) жұмыссыздар үшін үйде, әлеуметтік жұмыс орындарын ұйымдастыратын жұмыс берушілер тізбесіне қосуды сұрайды.

      Жұмыс берушілердің тізбесіне қосу мәселесі оң шешім тапқан жағдайда жұмыссыздарға тізбеге сәйкес мынадай әлеуметтік жұмыс орындары ұсынылатын болады:

      Ескертпе:

      Өтінімге мынадай құжаттар ұсынылады:

      1. Заңды тұлғаны, дара кәсіпкерді мемлекеттік тіркеу (қайта тіркеу) туралы анықтама немесе куәліктің көшірмесі.

      2. Заңды тұлға жарғысының көшірмесі.

      _________________                         ___________

                  Басшы                         Күні

      __________________________________________________________________

      (жұмыс берушінің атауы)

      Әлеуметтік жұмыс орындарына қатысушылар туралы

      20__ жылғы ____________

      кестенің жалғасуы

      Басшы __________________

      Бас есепші ______________

Жұмыс күшінің ұтқырлығын арттыру үшін ерікті түрде қоныс аударуға жәрдемдесу бойынша мемлекеттік қолдау көрсету туралы әлеуметтік келісімшарт

      ________________________                   20__ жылғы "___" ________________

                  (жасалған орны)

      Бұдан әрі "Халықты жұмыспен қамту орталығы" деп аталатын

      _______________________________ атынан _____________________

      (Халықты жұмыспен қамту орталығының атауы, бизнес-сәйкестендіру нөмірі,

      лауазымы, тегі, аты, әкесінің аты (бар болса)

      бір тараптан, бұдан әрі "Бағдарламаға қатысушы" деп аталатын

      ________________________________________________________________

      (тегі, аты, әкесінің аты (бар болса), жеке сәйкестендіру нөмірі, жеке басын куәландыратын құжаттың сериясы, нөмірі, қашан және кім берген) атынан екінші тараптан және "Жұмыс беруші" деп аталатын

      ________________________________________________________________

      (жұмыс берушінің атауы, заңды өкілінің тегі, аты, әкесінің аты (бар болса), бизнес сәйкестендіру нөмірі, жұмыс берушінің заңды мекен-жайы) үшінші тараптар төмендегі туралы осы әлеуметтік келісімшартты (бұдан әрі – Келісімшарт) жасады:

      1. Келісімшарттың мәні

      1. Келісімшарт жұмыс күшінің ұтқырлығын арттыру үшін ерікті түрде қоныс аударуға жәрдемдесу, сондай-ақ мемлекеттік қолдау шараларын көрсету мақсатында жасалды.

      2. Келісімшарт тараптары Халықты жұмыспен қамту орталығы және Бағдарламаға қатысушы, ал Қазақстан Республикасы Денсаулық сақтау және әлеуметтік даму министрінің 2016 жылғы 14 маусымдағы № 515 бұйрығымен (Нормативтік құқықтық актілерді мемлекеттік тіркеу тізілімінде № 13921 болып тіркелген) бекітілген Жұмыс күшінің ұтқырлығын арттыру үшін адамдардың ерікті түрде қоныс аудару қағидаларында (бұдан әрі – Қағидалар) көзделген жағдайларда жұмыс беруші болады. Келісімшарт шеңберінде Бағдарламаға қатысушыға мынадай мемлекеттік қолдау шаралары:

      ________________________________________________________________

      ________________________________________________________________

      _____________________________________________________ ұсынылады.

      (Бағдарламаға қатысушыға көрсетілетін мемлекеттік қолдау шараларын көрсету)

      1. Келісімшарт Халықты жұмыспен қамту орталығы директорының 20 ___ жылғы "____"___________ № ____ бұйрығы негізінде жасалды.

      2. Тараптардың құқықтары мен міндеттері

      4. Халықты жұмыспен қамту орталығының:

      1) Бағдарламаға қатысушыдан көшуге субсидия, тұрғын үйді жалдау (жалға алу) және коммуналдық қызметтерге ақы төлеу бойынша шығыстарды өтуге субсидия тағайындау және тұрғын үй, қызметтік тұрғын үй (еңбекші жастарға арналған жатақханалардан бөлмелер) беру үшін өтініш пен құжаттар топтамасын қабылдауға;

      2) тұрғын үй комиссиясының Бағдарламаға қатысушыға тұрғын үй, қызметтік тұрғын үй (еңбекші жастарға арналған жатақханалардан бөлмелер) беру туралы шешімін қабылдауға;

      3) Бағдарламаға қатысушымен тұрғын үйді, қызметтік тұрғын үйді (еңбекші жастарға арналған жатақханалардан бөлмелерді) жалға беру шартын жасауға;

      4) көшуге субсидиялар, тұрғын үйді жалдау (жалға алу) бойынша шығыстарды өтеуге субсидия тағайындау туралы шешім қабылдауға және субсидияларды Бағдарламаға қатысушының дербес шотына аударуды жүзеге асыруға;

      5) Бағдарламаға қатысушының тұрғын үйге, қызметтік тұрғын үйге (еңбекші жастарға арналған жатақханалардағы бөлмеге) қоныстануын қамтамасыз етуге;

      6) Бағдарламаға қатысушыны жаңа тұрғылықты жері бойынша тіркеуге жәрдемдесуге;

      7) Қағидаларда ескертілген жағдайларда Бағдарламаға қатысушы отбасының кәмелеттік жасқа толған басқа мүшелерімен тұрғын үйді жалға алу шартын қайта жасауға құқығы бар.

      5. Халықты жұмыспен қамту орталығы:

      1) Бағдарламаға қатысушының тұрақты жұмыс орнына жұмысқа орналасуына жәрдемдесуге және оны бақылауды жүзеге асыруға;

      2) Бағдарламаға қатысушы мен жұмыс берушінің келісімшартты орындауына мониторингті жүзеге асыруға;

      3) тараптардың міндеттемелерін орындауына мониторингті жүзеге асыруға қажетті ақпаратты, құжаттарды және материалдарды тараптардан сұратуға және алуға;

      4) Бағдарламаға қатысушының көшу тәртібіне, мерзіміне қатысты ақпаратты шыққан жеріндегі Халықты жұмыспен қамту орталығынан сұратуға;

      5) Бағдарламаға қатысушы мен жұмыс берушіден Келісімшарт талаптарының уақтылы және тиісінше орындалуын талап етуге;

      6) Келісімшарт талаптары орындалмаған және (немесе) тиісінше орындалмаған жағдайда тұрғын үйді, қызметтік тұрғын үйді (еңбекші жастарға арналған жатақханалардан бөлмені) жалға алу шартын бұзуға;

      7) жұмысқа орналастырудың жеке картасында Бағдарламаға қатысушының қоныс аударғаннан кейін тұрақты жұмысқа орналасқаны туралы мәліметтерді көрсетуге міндетті.

      6. Бағдарламаға қатысушының:

      1) Халықты жұмыспен қамту орталығына көшуге субсидиялар, тұрғын үйді жалдау (жалға алу) және коммуналдық қызметтердің ақысын төлеу бойынша шығыстарды өтеуге субсидия тағайындау және тұрғын үй, қызметтік тұрғын үй (еңбекші жастарға арналған жатақханалардан бөлмелер) бөлу үшін өтініш пен қажетті құжаттар топтамасын тапсыруға;

      2) көшудің тәртібі, мерзімі және қабылдау шарттары туралы, оның іщінді тұрғын үймен, қызметтік тұрғын үймен (еңбекші жастарға арналған жатақханалардан бөлмемен) қамтамасыз ету және тұрақты жұмыс орнына жұмысқа орналасу мәселелері бойынша ақпаратты шыққан жерінің Халықты жұмыспен қамту орталығынан алуға;

      3) Келісімшарт тараптарынан келісімшарттың уақтылы және тиісінше орындалуын талап етуге;

      4) келісімшартта көзделген мемлекеттік қолдау шараларын алуға құқығы бар.

      7. Бағдарламаға қатысушы:

      1) көшуге жолдама алғаннан кейін белгіленген мерзімдерде айқындалған елді мекенге келуге;

      2) Халықты жұмыспен қамту орталығымен тұрғын үйді, қызметтік тұрғын үйді (еңбекші жастарға арналған жатақханалардан бөлмелерді) жалға беру шартын жасауға және оған белгіленген мерзімде қоныстануға;

      3) жұмысқа орналасқаннан кейін тұрғын үй жинақтау жүйесіне қатысуға;

      4) жұмыс беруші ұсынған тұрақты жұмыс орнына жұмысқа орналасуға не кейіннен жұмысқа орналасумен кәсіптік оқытудан өтуге;

      5) коммуналдық және жалға алу ақысын уақтылы төлеуге;

      6) тараптардың міндеттемелерін орындауына мониторингті жүзеге асыруға қажетті ақпаратты, құжаттар мен материалдарды уақтылы және толық көлемде тараптардың сұратуы бойынша ұсынуға;

      7) өзіне көрсетілетін мемлекеттік қолдау шаралары шеңберінде жүктелген міндеттемелерді адал атқаруға;

      8) қоныстану жерінен алты ай ішінде кеткен жағдайда (отбасымен) көшуге алған субсидиялардың сомаларын бюджетке өтеуге міндетті.

      8. Жұмыс берушінің:

      1) көшудің тәртібі, мерзімі және қабылдау шарттары туралы, оның ішінде тұрғын үймен, қызметтік тұрғын үймен (еңбекші жастарға арналған жатақханалардағы бөлмемен) қамтамасыз ету және тұрақты жұмыс орнына жұмысқа орналасу мәселелері жөніндегі ақпаратты шығу жеріндегі Халықты жұмыспен қамту орталығынан алуға;

      2) Келісімшарт тараптарынан келісімшарттың уақтылы және тиісінше орындалуын талап етуге құқығы бар.

      9. Жұмыс беруші:

      1) тұрақты жұмыс орнына қабылдаған күннен бастап кемінде күнтізбелік отыз алты ай мерзіміне кемінде бес Бағдарламаға қатысушыны жұмысқа жұмысқа орналастыруға;

      2) жұмысқа қабылдау немесе одан бас тарту туралы халықты жұмыспен қамту орталығын Қазақстан Республикасының заңнамасында белгіленген мерзімдерде хабардар етуге;

      3) Бағдарламаға қатысушымен 2015 жылғы 23 қарашадағы Қазақстан Республикасының Еңбек кодексіне (бұдан әрі – Еңбек кодексі) сәйкес еңбек шартын жасауға;

      4) 2017 жылғы 25 желтоқсандағы "Салық және бюджетке төленетін басқа да міндетті төлемдер туралы (Салық кодексі)" Қазақстан Республикасының Кодексіне (бұдан әрі – Салық кодексі), "Қазақстан Республикасында зейнетақымен қамсыздандыру туралы" 2013 жылғы 21 маусымдағы Қазақстан Республикасының Заңына, "Міндетті әлеуметтік сақтандыру туралы" 2003 жылғы 25 сәуірдегі Қазақстан Республикасының Заңына сәйкес Бағдарламаға қатысушылар алған табыстарынан жеке табыс салығын және міндетті зейнетақы жарналарын ұстауды және аударуды, сондай-ақ әлеуметтік салық төлеуді және орындалған жұмыстар мен көрсетілген қызметтер үшін Бағдарламаға қатысушыларға төленетін жұмыс берушінің табыс түріндегі төлейтін шығыстарынан әлеуметтік аударымдар аударуды жүргізуге;

      5) халықты жұмыспен қамту орталығының сұратуы бойынша Бағдарламаға қатысушыға міндетті зейнетақы аударымдары аударылғанын растайтын құжаттардың көшірмелерін ұсынуға;

      6) қажет болған жағдайда Бағдарламаға қатысушыны кейіннен жұмысқа орналастыру үшін кәсіптік оқытуға жіберуге міндетті.

      10. Әлеуметтік келісімшарттың талаптарына сәйкес Бағдарламаға қатысушы (отбасымен бірге) қоныстандырған жерінен он екі ай ішінде кеткен жағдайда, кеткен күнінен бастап көшуге берілетін субсидияның және тұрғын үй жалдау (жалға беруге) және коммуналдық қызметтерге ақы төлеу бойынша шығыстарды өтеуге берілетін субсидияның алынған сомасы республикалық бюджетке өтеледі.

      11. Әскери қызметке шақырылған, осы елді мекенде тұруға мүмкіндік бермейтін сырқаттанушылықты, жұмыс берушінің өтінімі бойынша басқа жерге оқуға жіберілген жағдайларды қоспағанда, Бағдарламаға қатысушының отбасы мүшелерінің бірі қоныстандырған жерінен кеткен жағдайда, кеткен отбасы мүшесі алған көшуге берілетін субсидия сомасы бюджетке қайтарылады.

      3. Тараптардың жауапкершілігі

      12. Жұмыспен қамту орталығы, Бағдарламаға қатысушылар және жұмыс берушілер осы Келісімшартта көзделген өз міндеттемелерін орындамағаны не тиісінше орындамағаны үшін Қазақстан Республикасының заңнамалық актілерінде белгіленген жауаптылықта болады.

      13. Жұмыс берушілермен Бағдарламаға қатысушыны жұмысқа орналастыру жөніндегі міндеттемені орындамаған жағдайда жұмыс берушілер жұмыскердің көшу бойынша шығыстарын өтеуге жаңа тұрғылықты жерде орнығуға жәрдемақы ұсынуға, жұмыскерге қызметтік тұрғын үй беруге немесе тұрғын үйді жалдау бойынша шығыстарын өтеуге, жұмыскердің тұрғын үй сатып алуға шығыстарын ішінара өтеу, жұмыскердің мектепке дейінгі білім беру ұйымдарының қызметтеріне ақы төлеу шығыстарын толық немесе ішінара өтеуге мемлекеттің көтерген шығыстарын өтейді.

      14. Халықты жұмыспен қамту орталығының мен Бағдарламаға қатысушылармен жұмыс берушілердің осы Келісімшартта көзделмеген жауапкершілік шаралары Қазақстан Республикасының азаматтық заңнамасының нормаларына сәйкес қолданылады.

      15. Осы Келісімшарттың қолданылу мерзімінің аяқталуы Жұмыспен қамту орталығын Бағдарламаға қатысушыларды және жұмыс берушілерді осы мерзімнің аяқталуына дейін болған оны бұзғаны үшін жауапкершіліктен босатпайды.

      4. Еңсерілмейтін күш жағдаяттары

      16. Жұмыспен қамту орталығымен Бағдарламаға қатысушылар және жұмыс берушілер осы Келісімшартқа қол қойылғаннан кейін туындаған өрт, жер сілкінісі, су тасқыны және апатты құбылыстар, әскери әрекеттер сияқты төтенше жағдайларда немесе күшпен еңсеруге келмейтін жағдайларда (форс-мажор) міндеттемелерін толық немесе ішінара орындамағаны үшін жауапкершіліктен босатылады.

      17. Форс-мажорлық жағдайлар туындаған кезде, осы Келісімшартқа сәйкес қандай да болмасын міндеттемесінің орындалуы осындай жағдайдың туындауына орай мүмкін болмай қалған Жұмыспен қамту орталығы, Бағдарламаға қатысушылар және жұмыс берушілер форс-мажорлық жағдай туындаған немесе тоқтатылған сәттен бастап үш жұмыс күні ішінде жазбаша нысанда (осы келісімшарт бойынша өз міндеттемелерінің орындалмауы мүмкіндігін уәждемелеп және негіздеп) хабардар етуге міндеттенеді.

      18. Хабардар етпеу немесе уақтылы хабарламау, Жұмыспен қамту орталығыны Бағдарламаға қатысушыны және жұмыс берушіні мұндай хабардар етпеу немесе уақтылы хабарламау тиісті форс-мажорлық жағдайлардан тікелей туындаған жағдайларды қоспағанда, осы Келісімшарт бойынша міндеттемелердің орындалмауы үшін жауапкершіліктен босатушы негіздеме ретінде кез келген форс-мажорлық жағдайға сілтеме жасаудан айырады.

      Форс-мажорлық жағдайлардың басталуы немесе тоқтатылуы туралы хабарлама форс-мажорлық жағдайлар жалпыға белгілі және көпшілік сипатта болған әрі дәлелдеуді қажет етпейтін жағдайларды қоспағанда, құжатпен не мұндай жағдайдарды растайтын тиісті органның және/немесе мекеменің шешімімен расталуға тиіс.

      19. Осы Келісімшарт бойынша міндеттемелердің орындалу мерзімі форс-мажорлық жағдайлар, сондай-ақ осы жағдайлардан туындаған салдар орын алған уақытқа тең болады. Егер форс-мажорлық жағдайлардың туындауына байланысты Жұмыспен қамту орталығының, Бағдарламаға қатысушынының және жұмыс берушінің осы Келісімшарт бойынша міндеттемелердің толық немесе ішінара орындауының мүмкін болмауы _____ (кезеңі көрсетілсін) асатын болса, онда осы Келісімшартты бұзуға құқылы.

      5. Басқа да жағдайлар

      20. Келісімшартқа тараптардың келісімі бойынша қосымша әлеуметтік келісімшартқа қол қою арқылы өзгерістер мен толықтырулар енгізілуі мүмкін.

      21. Осы Келісімшарт оған Халықты жұмыспен қамту орталығы, Бағдарламаға қатысушы және жұмыс беруші қол қойған сәттен бастап күшіне енеді және 20__ жылғы "__" ______ дейін қолданылады.

      6. Тараптардың мекенжайлары мен деректемелері