"Сақтандыру қызметі туралы" 2000 жылғы 18 желтоқсандағы Қазақстан Республикасының Заңына сәйкес Қазақстан Республикасы Ұлттық Банкінің Басқармасы ҚАУЛЫ ЕТЕДІ:
1. Қоса беріліп отырған Сақтандыру портфелін беру қағидалары және сақтандыру (қайта сақтандыру) ұйымын мәжбүрлеп тарату туралы соттың шешімі заңды күшіне енген күнінен бастап, сондай-ақ сақтандыру (қайта сақтандыру) ұйымын консервациялау немесе лицензиядан айыру кезінде сақтандыру портфелін берудің ерекшеліктері бекітілсін.
2. Осы қаулыға қосымшаға сәйкес тізбе бойынша Қазақстан Республикасы нормативтік құқықтық актілерінің, сондай-ақ Қазақстан Республикасының кейбір нормативтік құқықтық актілерінің құрылымдық элементтерінің күші жойылды деп танылсын.
3. Сақтандыруды қадағалау департаменті (Құрманов Ж.Б.) Қазақстан Республикасының заңнамасында белгіленген тәртіппен:
1) Заң департаментімен (Сәрсенова Н.В.) бірлесіп осы қаулыны Қазақстан Республикасының Әділет министрлігінде мемлекеттік тіркеуді;
2) осы қаулыны "Қазақстан Республикасы Әділет министрлігінің Республикалық құқықтық ақпарат орталығы" шаруашылық жүргізу құқығындағы Республикалық мемлекеттік кәсіпорнына Қазақстан Республикасының Әділет министрлігінде мемлекеттік тіркелген күнінен бастап күнтізбелік он күн ішінде Қазақстан Республикасы нормативтік құқықтық актілерінің мемлекеттік тізіліміне, Қазақстан Республикасы нормативтік құқықтық актілерінің эталондық бақылау банкіне енгізуге жіберуді;
3) осы қаулы ресми жарияланғаннан кейін оны Қазақстан Республикасы Ұлттық Банкінің ресми интернет-ресурсына орналастыруды қамтамасыз етсін.
4. Қаржылық қызметтерді тұтынушылардың құқықтарын қорғау және сыртқы коммуникациялар басқармасы (Терентьев А.Л.) осы қаулыны Қазақстан Республикасының Әділет министрлігінде мемлекеттік тіркелгеннен кейін күнтізбелік он күн ішінде мерзімді баспасөз басылымдарында ресми жариялауға жіберуді қамтамасыз етсін.
5. Осы қаулының орындалуын бақылау Қазақстан Республикасының Ұлттық Банкі Төрағасының орынбасары О.А. Смоляковқа жүктелсін.
6. Осы қаулы алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Ұлттық Банк Төрағасы |
Д. Ақышев |
| Қазақстан Республикасы Ұлттық Банк Басқармасының 2016 жылғы 26 желтоқсандағы № 303 қаулысымен бекітілді |
Сақтандыру портфелін беру қағидалары және сақтандыру (қайта сақтандыру) ұйымын мәжбүрлеп тарату туралы соттың шешімі заңды күшіне енген күнінен бастап, сондай-ақ сақтандыру (қайта сақтандыру) ұйымын консервациялау немесе лицензиядан айыру кезінде сақтандыру портфелін берудің ерекшеліктері
1-тарау. Жалпы ережелер
1. Осы Сақтандыру портфелін беру қағидалары және сақтандыру (қайта сақтандыру) ұйымын мәжбүрлеп тарату туралы соттың шешімі заңды күшіне енген күнінен бастап, сондай-ақ сақтандыру (қайта сақтандыру) ұйымын консервациялау немесе лицензиядан айыру кезінде сақтандыру портфелін берудің ерекшеліктері (бұдан әрі – Қағидалар) "Сақтандыру қызметі туралы" 2000 жылғы 18 желтоқсандағы Қазақстан Республикасының Заңына (бұдан әрі – Заң) сәйкес әзірленді және сақтандыру (қайта сақтандыру) ұйымдарының (бұдан әрі – сақтандыру ұйымы) сақтандыру портфелін берудің тәртібін, сақтандыру (қайта сақтандыру) ұйымын мәжбүрлеп тарату туралы соттың шешімі заңды күшіне енген күнінен бастап, сондай-ақ сақтандыру (қайта сақтандыру) ұйымын консервациялау немесе лицензиядан айыру кезінде сақтандыру портфелін берудің тәртібі мен ерекшеліктерін айқындайды.
2. Осы Қағидаларда пайдаланылатын негізгі ұғымдар:
1) әлеуетті сақтандырушы-алушы – сақтандыру портфелін қабылдауға мүдделілік танытқан сақтандыру ұйымы;
2) кепілдік беру жөніндегі ұйым – сақтандыру ұйымдарын мәжбүрлеп тарату кезінде сақтандыру төлемдеріне кепілдік беру жүйесіне енгізілген сақтандырудың кепілдік берілген түрлері бойынша сақтанушыларға (сақтандырылғандарға, пайда алушыларға) сақтандыру төлемдерін төлеуге кепілдік беретін ұйым;
3) сақтандыру портфелін беру – сақтандыру ұйымының, уақытша басқарушының, уақытша әкімшіліктің (уақытша әкімшінің), тарату комиссиясының сақтандыру ұйымы сақтанушыларымен, басқа сақтандыру ұйымымен жасаған сақтандыру портфелін беру туралы шарт негізінде сақтандыру (қайта сақтандыру) шарттарының барлығы немесе бір бөлігі негізінде туындаған құқықтар мен міндеттерді беруі;
4) сақтандырушы-алушы – сақтандыру портфелін қабылдайтын сақтандыру ұйымы;
5) тарату комиссиясы – сақтандыру ұйымын мәжбүрлеп тарату туралы сот шешімі қабылданған жағдайда уәкiлеттi орган тағайындайтын (босататын), тарату рәсiмiн жүргізу барысында сақтандыру ұйымының iстерiн аяқтау және оның кредиторларымен есеп айырысуды қамтамасыз ету мақсатында тарату комиссиясы төрағасының тікелей басшылығымен сақтандыру ұйымының мүлкін және iстерiн басқару жөнiндегi өкiлеттiктердi жүзеге асыратын орган;
6) уақытша әкімшілік (уақытша әкімші) – мүліктің сақталуын қамтамасыз ету және ұйымды басқаруды қамтамасыз ету жөніндегі іс-шараларды жүзеге асыру мақсатында уәкілетті орган сақтандыру ұйымын сақтандыру қызметін жүзеге асыру құқығына берілген лицензиядан айыруға байланысты тағайындайтын орган;
7) уақытша басқарушы – уәкілетті орган сақтандыру ұйымын консервациялауды жүргізу кезеңіне тағайындайтын орган;
8) уәкілетті орган – қаржы нарығы мен қаржы ұйымдарын мемлекеттiк реттеу, бақылау және қадағалау жөніндегі уәкілетті орган.
3. Сақтандыру ұйымы сақтанушылардың келісімі болған кезде мынадай жағдайларда:
1) сақтандыру ұйымы бір немесе бірнеше сақтандыру сыныптары бойынша осы сақтандыру сыныбы (сыныптары) бойынша лицензиясы бар басқа сақтандыру (қайта сақтандыру) ұйымына сақтандыру портфелін беру туралы шешім қабылдағанда;
2) Заңның 37-1-бабының 2-тармағына сәйкес сақтандыру ұйымының лицензиясынан жекелеген сақтандыру сыныптарын алып тастағанда;
3) Заңның 67-бабының 1-тармағына сәйкес сақтандыру ұйымы акционерлерінің жалпы жиналысы оны ерікті түрде тарату туралы шешім қабылдағанда сақтандыру портфелін беруді жүзеге асырады.
Заңның 37-1-бабының 2-тармағына сәйкес қайта сақтандыру бойынша қызметті жүзеге асыруға лицензия ерікті түрде қайтарылған жағдайда сақтандыру ұйымы қайта сақтанушының келісімі болған кезде сақтандыру портфелін беруді жүзеге асырады.
Уақытша басқарушы Заңның 54-1-бабының 3-тармағына сәйкес сақтанушылардың келісімі болған кезде сақтандыру портфелін беруді жүзеге асырады.
Заңның 37-1-бабының 5-тармағында, 54-1-бабының 4-тармағында, 69-1-бабының 1-тармағында көзделген жағдайларда сақтанушылардың келісімін алу талап етілмейді.
4. Мыналар сақтандыру портфелін беру үшін негіз болып табылады:
1) Қазақстан Республикасының сақтандыру және сақтандыру қызметі туралы заңнамасына сәйкес сақтандыру шарттары бойынша құқықтары мен міндеттерін беру (қабылдау) құқығы (міндеті) бар сақтандыру ұйымының уәкілетті тұлғасының (тұлғаларының) шешімі;
2) уақытша басқарушының, уақытша әкімшіліктің (уақытша әкімшінің) уәкілетті органмен келісілген шешімі;
3) сақтандыру ұйымын мәжбүрлеп тарату туралы сот шешімінің заңды күшіне енуі.
5. Сақтандыру ұйымының, уақытша басқарушының, уақытша әкімшіліктің (уақытша әкімшінің) сақтандыру портфелін беру туралы шешімі шешім қабылдау күніндегі жағдай бойынша сақтандыру шарттары бойынша міндеттемелерді қамтамасыз етуге сақтандыру ұйымының активтері жеткілікті болған жағдайда қабылданады.
6. Сақтандыру портфелін беру туралы шешім еркін нысанда жазбаша түрде ресімделеді, сақтандыру ұйымының бас офисінің уақытша басқарушысының, уақытша әкімшілігінің (уақытша әкімшісінің) басшысы мен мүшелері қол қояды.
7. Уақытша басқарушының, уақытша әкімшіліктің (уақытша әкімшінің) сақтандыру портфелін беру туралы шешімі уәкілетті органмен келісілуге тиіс.
Уәкілетті органға келісілуге ұсынылған сақтандыру портфелін беру туралы шешімге мыналар қоса беріледі:
сақтандыру портфелі берілетін сақтандыру сыныптарының тізбесі;
сақтандыру сыныптары (түрлері) бойынша бөлінген сақтандыру шарттары бойынша берілуі болжанатын міндеттемелердің мөлшері;
олардың баланста көрсетілген құнын не бағалау құнын (бар болса) көрсете отырып сақтандыру портфелінің құрамында беру болжанатын активтер тізбесі;
орындалу мерзімдерін көрсете отырып сақтандыру портфелін беруді жүзеге асыру жөніндегі іс-шаралар тізбесі;
сақтандыру портфелін беру туралы шарттың жобасы.
8. Уәкілетті орган уақытша басқарушының, уақытша әкімшіліктің (уақытша әкімшінің) сақтандыру портфелін беру туралы шешімін және Қағидалардың 7-тармағында көзделген ақпаратты алған күннен кейін 10 (он) жұмыс күнінен аспайтын мерзімде келісу туралы шешім қабылдайды не сақтандыру портфелін беру туралы шешіммен келісуден бас тартады.
Сақтандыру портфелін беру туралы шешім келісілген жағдайда, уәкілетті орган уақытша басқарушыға, уақытша әкімшілікке (уақытша әкімшіге) сақтандыру портфеліне енгізілетін сақтандыру (қайта сақтандыру) шарттары берілетін сақтандыру сыныптарын жүзеге асыруға лицензиялары бар, соңғы есепті күнде пруденциялық нормативтерді және өзге де сақталуы міндетті нормалар мен лимиттерді орындайтын, уәкілетті орган қолданған қолданыстағы шектеулі ықпал ету шаралары және (немесе) санкциялары жоқ сақтандыру ұйымдары туралы ақпарат жібереді.
Сақтандыру портфелін беру туралы шешімді келісуден бас тартқан жағдайда уәкілетті орган уақытша басқарушыға, уақытша әкімшілікке (уақытша әкімшіге) бас тарту негіздерін жазбаша нысанда жібереді.
9. Сақтандыру ұйымы сақтандырушыларды хабардар ету және сақтандырушылардың келісімін алу мақсатында Қазақстан Республикасының бүкіл аумағында қазақ және орыс тілдерінде таратылатын 2 (екі) мерзімді баспасөз басылымында алдағы уақытта болатын сақтандыру портфелін беру туралы хабарландыруды сақтандыру портфелін беру туралы шешім қабылданған күннен бастап күнтізбелік 10 (он) күн ішінде жариялайды.
Уақытша басқарушы, уақытша әкімшілік (уақытша әкімші) сақтандыру портфелін беру туралы шешім уәкілетті органмен келісілгеннен кейін 5 (бес) жұмыс күннен кешіктірмей алдағы уақытта болатын сақтандыру портфелін беру туралы хабарландыру жариялайды. Сақтандыру портфелін беру туралы хабарландыру Қазақстан Республикасының бүкіл аумағында қазақ және орыс тілдерінде таратылатын мерзімді баспасөз басылымдарында жарияланады.
10. Уақытша басқарушы, уақытша әкімшілік (уақытша әкімші) уәкілетті органның жазбаша сұратуы бойынша түсіндірмелер және сақтандыру портфелін беруге байланысты растайтын құжаттар береді.
2-тарау. Сақтандырушы-алушыны таңдау
11. Әлеуетті сақтандырушы-алушыға мынадай талаптар қойылады:
1) уәкілетті органның сақтандыру портфеліне енгізілетін сақтандыру шарттары берілетін сақтандыру сыныптарын жүзеге асыруға лицензиясының (лицензияларының) болуы;
2) пруденциялық нормативтерді және өзге де сақталуы міндетті нормалар мен лимиттерді соңғы есепті күнде және алдағы уақытта болатын сақтандыру портфелін қабылдау ескеріле отырып 2 (екі) кейінгі жылда пруденциялық нормативтердің болжамды мәндерін орындау;
3) сақтандыру ұйымының сақтандыру портфелін қабылдау ниеті туралы өтінішті (бұдан әрі – өтініш) беру сәтінде уәкілетті орган қолданған қолданыстағы шектеулі ықпал ету шараларының және (немесе) санкциялардың болмауы;
4) сақтандыру ұйымының клиенттеріне қызмет көрсету үшін филиалдарының болуы.
12. Сақтандыру ұйымының сақтандыру портфелін қабылдау туралы ұсыныс-хат әлеуетті сақтандырушы-алушыға оны қарау және ұсыныс-хатты алған күннен кейін 5 (бес) жұмыс күнінен кешіктірмей жауап ұсыну мерзімімен жіберіледі.
Уақытша басқарушы, уақытша әкімшілік (уақытша әкімші) уәкілетті органның сақтандыру портфелін беру туралы шешіммен келісу жөніндегі жазбаша шешімін алған күннен кейін 3 (үш) жұмыс күннен кешіктірмей ұсыныс-хатты уәкілетті органның жазбаша жауабында көрсетілген сақтандыру ұйымдарына жібереді.
Ұсыныс-хатта берілетін сақтандыру шарттары бойынша міндеттемелердің және сақтандыру ұйымы активтерінің болжамды көлемі көрсетіледі.
Ұсыныс-хатқа еркін нысанда жазылған конфиденциалдылықты сақтау және сақтандыру портфелін қабылдау мүмкіндігін қарастыруға байланысты алынған ақпаратты жария етпеу туралы келісім (міндеттеме) қоса беріледі.
13. Сақтандыру ұйымдары ұсыныс-хат алған жағдайда конфиденциалдылықты сақтау және сақтандыру портфелін қабылдау мүмкіндігін қарастыруға байланысты алынған ақпаратты жария етпеу туралы келісімге (міндеттемеге) қол қояды, ол Қағидалардың 12-тармағының бірінші бөлігінде көрсетілген мерзімде сақтандыру ұйымына, уақытша басқарушыға, уақытша әкімшілікке (уақытша әкімшіге), тарату комиссиясына қайтарылуға тиіс.
14. Сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы ұсыныс-хат алған сақтандыру ұйымының сұратуы бойынша Қазақстан Республикасының заңнамалық актілерімен белгіленген заңмен қорғалатын құпиядан тұратын мәліметтерді жария етпеу туралы талаптарды сақтай отырып, қосымша ақпарат береді.
15. Әлеуетті сақтандырушылар-алушылар Қағидалардың 12-тармағының бірінші бөлігінде белгіленген мерзімде сақтандыру ұйымына, уақытша басқарушыға, уақытша әкімшілікке (уақытша әкімшіге), тарату комиссиясына мыналарды ұсынады:
1) еркін нысанда жазылған өтініш;
2) сақтандыру ұйымының клиенттеріне қызмет көрсету үшін филиалдар тізімі;
3) пруденциялық нормативтер болжамы;
4) уәкілетті органның өтініш беру сәтінде уәкілетті орган қолданған қолданыстағы шектеулі ықпал ету шараларының және (немесе) санкциялардың жоқ екендігі туралы жазбаша растауы;
5) сақтандырушы-алушының уәкілетті органының сақтандыру портфелін қабылдау туралы шешімі.
16. Өтініштерін жіберген бірнеше әлеуетті сақтандырушы-алушы Қағидалардың 11-тармағының талаптарына сәйкес келген жағдайда, сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы пруденциялық нормативтердің, оның ішінде төлемқабілеттілігі маржасының жеткіліктілігі нормативінің және өтімділігі жоғары активтердің жеткіліктілігі нормативінің болжамды мәндерінің (бұдан әрі – болжам) ең жақсы көрсеткіштері бар сақтандырушы-алушыны таңдайды.
17. Сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы жіберілген ұсыныс-хат бойынша жауап алған күннен кейін 10 (он) жұмыс күнінен кешіктірмей Қағидалардың 15-тармағына сәйкес құжаттар топтамасын ұсынған әлеуетті сақтандырушылар-алушылар қатарынан сақтандырушы-алушыны таңдайды.
Сақтандыру ұйымдарының тарапынан сақтандыру портфелін қабылдау ниеті туралы өтініштердің болмауы бас тарту ретінде қаралады.
Мемлекеттің қатысуымен "өмірді сақтандыру" саласы бойынша қызметті жүзеге асыратын сақтандыру ұйымы мынадай жағдайларда:
"өмірді сақтандыру" саласы бойынша қызметті жүзеге асыратын сақтандыру ұйымдары Қағидалардың 11-тармағының талаптарына сәйкес келмегенде;
әлеуетті сақтандырушылар-алушылардан "өмірді сақтандыру" саласы бойынша қызметті жүзеге асыратын мәжбүрлеп таратылатын сақтандыру ұйымының сақтандыру портфелін қабылдау ниеті туралы өтініштер болмағанда мәжбүрлеп таратылатын сақтандыру ұйымының сақтандыру портфелін қабылдайды.
18. Мынадай жағдайларда:
1) әлеуетті сақтандырушылар-алушылар Қағидалардың 11-тармағында белгіленген талаптарға сәйкес келмегенде;
2) тарату комиссиясының сақтандыру портфелін беруін қоспағанда, сақтандыру ұйымының берілетін сақтандыру портфелі бойынша міндеттемелерді (сақтандыру резервтерін) өтеуге активтері жеткіліксіз болғанда (болмағанда) сақтандыру портфелі берілмейді.
19. Сақтандыру ұйымының, уақытша басқарушының, уақытша әкімшіліктің (уақытша әкімшінің), тарату комиссиясының сақтандыру портфелі берілетін сақтандырушы-алушыны таңдау туралы шешімі уәкілетті органға жазбаша түрде жіберіледі.
3-тарау. Сақтанушылардың сақтандыру портфелін беруге келісімі
20. Сақтандыру ұйымы сақтанушылардың сақтандыру портфелін беруге келісімін алу үшін сақтанушыларға Қағидаларға 1-қосымшаға сәйкес нысан бойынша сақтандыру портфелін беруге сақтанушының келісімі туралы сұрату (бұдан әрі – сұрату) жібереді.
Сұрату адресаттың өз қолына қолхатпен немесе сұратуды алу фактісін және күнін растайтын өзге де тәсілмен беріледі.
21. Сақтандырушы-алушының сақтандыру қағидалары сақтандыру портфелінің құрамында берілетін сақтандыру шарттарының талаптарына сәйкес келмеген жағдайда, сақтанушыларға сұратумен бір мезгілде шарттың талаптарын өзгертуге және (немесе) жаңа сақтандыру қағидаларына оферта жіберіледі.
22. Сақтандыру портфелін беру туралы шартта қайта сақтандырушыны (қайта сақтанушыны) ауыстыруға қайта сақтанушының (қайта сақтандырушының) келісімі туралы ереже болған және оған қайта сақтанушы (қайта сақтандырушы) қол қойған жағдайда қайта сақтандыру шарттары бойынша сақтандыру портфелін беруге қайта сақтанушының (қайта сақтандырушының) келісімі алынды деп есептелінеді.
23. Сақтандыру ұйымы сақтанушылардың қажетті келісімін алуына қарай әрбір сақтандыру шарты бойынша сақтандыру портфелін берумен бір мезгілде берілуге жататын құжаттар жиынтығын жасайды.
24. Сақтанушылар сақтандыру портфелін беруден бас тартқан жағдайда сақтандыру ұйымы, уақытша басқарушы сақтандыру портфелін бермейді.
25. Сақтандыру ұйымы сақтанушыдан сұратуда көрсетілген мерзімде сақтандыру портфелін беруге және сақтандыру шартындағы сақтандырушыны ауыстыруға келісімі немесе бас тартуы бар жазбаша жауабын алмаған жағдайда, келісім алынбады деп есептелінеді. Мұндай шарт берілетін сақтандыру портфеліне енгізілмейді.
Егер сұратумен бір мезгілде сақтандыру шартының талаптарын өзгертуге және (немесе) жаңа сақтандыру қағидаларына оферта жіберілген болса, ал сақтанушы сақтандыру шартының талаптарын өзгертуден бас тартқан болса, онда сақтандыру портфелін беруге сақтанушының келісімі алынбады деп есептелінеді.
26. Сақтандыру ұйымы сақтанушылардан келісім алмаған жағдайда, осы шарт оның тараптарына және өзге қатысушыларға (сақтандырушыға, сақтанушыға, өзге кредиторға (пайда алушыға) және шарттың басқа да қатысушыларына) қатысты одан әрі қолданыста болады.
4-тарау. Сақтандыру портфелін берудің тәртібі және сақтандыру (қайта сақтандыру) ұйымын мәжбүрлеп тарату туралы соттың шешімі заңды күшіне енген күнінен бастап, сондай-ақ сақтандыру ұйымын консервациялау немесе лицензиядан айыру кезінде сақтандыру портфелін берудің ерекшеліктері
27. Сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы Қағидаларға 2-қосымшаға сәйкес нысан бойынша берілетін сақтандыру портфелінің құрамына енгізілетін сақтандыру шарттарының тізімін (бұдан әрі – Шарттар тізімі) жасайды.
28. Шарттардың тізімі Сақтандыру (қайта сақтандыру) шарттары тізілімінің мәліметтері негізінде қалыптастырылады, олардың тізбесі Нормативтік құқықтық актілерді мемлекеттік тіркеу тізілімінде № 6164 тіркелген Қазақстан Республикасы Қаржы нарығын және қаржы ұйымдарын реттеу мен қадағалау агенттігі Басқармасының 2010 жылғы 1 наурыздағы № 25 қаулысымен бекітілген Сақтандыру ұйымының сақтандыру қызметін жүзеге асыруына қойылатын талаптардың, оның ішінде сақтандыру нарығының қатысушыларымен өзара қарым-қатынастары жөніндегі талаптар және сақтандыру агентінің сақтандыру нарығында делдалдық қызметті жүзеге асыруына өкілеттіктерінің 5-1 тармағында айқындалған.
29. Уақытша басқарушы консервациялау кезеңінде сақтандыру портфелін беру шеңберінде сақтанушының сақтандыру шартын беру туралы келісімі болған кезде уәкілетті органмен келісім бойынша сақтандырудың бір немесе бірнеше сыныбы бойынша сақтандыру портфелін ішінара немесе толық беру туралы шешім қабылдайды. Бұл ретте сақтандырудың бір сыныбы (түрі) шеңберінде сақтандыру портфелі бір сақтандыру ұйымына беріледі.
30. Лицензиядан сақтандырудың жекелеген сыныбы (жекелеген сыныптары) алып тасталған, сақтандырудың жекелеген сыныбы (жекелеген сыныптары) бойынша лицензиядан айырылған кезде сақтандырудың осы сыныбы (осы сыныптары) бойынша жасалған барлық сақтандыру шарттары, оның ішінде қолданылу мерзімі өткен, сақтандыру ұйымы сақтанушылар (сақтандырылғандар, пайда алушылар) алдында міндеттемелер атқаратын не міндеттемелер туындау ықтималдығы бар сақтандыру шарттары берілуге жатады. Бұл ретте сақтандырудың бір сыныбы (түрі) шеңберінде сақтандыру портфелі бір сақтандыру ұйымына беріледі.
31. Лицензия ерікті түрде қайтарылған, лицензиядан айырылған, сақтандыру ұйымы ерікті түрде немесе мәжбүрлеп таратылған кезде сақтандырудың барлық сыныптары (түрлері) бойынша жасалған барлық сақтандыру шарттары, оның ішінде қолданылу мерзімі өткен, сақтандыру ұйымының сақтанушылар (сақтандырылғандар, пайда алушылар) алдында міндеттемелер атқаратын не міндеттемелер туындау ықтималдығы бар сақтандыру шарттары берілуге жатады.
32. Сақтандыру ұйымын мәжбүрлеп тарату туралы сот шешімі заңды күшіне енген күнінен бастап берілетін сақтандыру портфелінің құрамына:
1) басталғаны туралы мәлімделген және сақтандыру төлемдері жүзеге асырылмаған немесе толық көлемде жүзеге асырылмаған сақтандыру жағдайлары бойынша мәжбүрлеп таратылатын сақтандыру ұйымының сақтандыру төлемдерін жүзеге асыру бойынша міндеттемелері басталған сақтандыру шарттары;
2) сақтандыру шарттары тізілімінде және (немесе) мәжбүрлеп таратылатын сақтандыру ұйымының деректер базасында жоқ сақтандыру шарттары;
3) тараптары (сақтанушы, қайта сақтанушы, қайта сақтандырушы) сақтандырушы-алушы болып табылатын сақтандыру шарттары енгізілмейді.
33. Егер уақытша әкімшілік (уақытша әкімші) сақтандыру ұйымын мәжбүрлеп тарату туралы сот шешімі заңды күшіне енгенге дейін сақтандыру портфелін берген болса, онда тарату комиссиясы дейін сақтандыру портфелін бергеннен кейінгі кезеңде және сақтандыру ұйымын мәжбүрлеп тарату туралы сот шешімі заңды күшіне енгенге дейін сақтандыру жағдайлары болған сақтандыру шарттарын кредиторлар тізіліміне енгізбейді.
34. Шарттар тізімі ондағы ақпараттың өзгеруіне немесе шартты бұзуға, келісім алуға немесе сақтанушының сақтандыру шартын беруден бас тартуына, сақтандыру жағдайы туралы өтініш алуға, сақтанушының сақтандыру сыйлықақысын төлеуіне, сақтандыру төлемінің жүзеге асырылуына және басқа да өзгерістерге байланысты жаңа ақпараттың алуына қарай жаңартылады.
35. Шарттар тізімін жасағаннан кейін сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы сақтандыру резервінің түріне қарай әрбір сынып және әрбір сақтандыру шарты бойынша сақтандыру резервтерінің мөлшерін алдын ала есептейді.
Сақтандыру резервтерінің құрамына:
еңбек сіңірілмеген сыйлықақы резерві;
орын алған, бірақ мәлімделмеген шығындар резерві (бұдан әрі – ОМШР);
өмірді сақтандыру шарттары бойынша орын алмаған шығындар резерві;
аннуитет шарттары бойынша орын алмаған шығындар резерві;
мәлімделген, бірақ реттелмеген шығындар резерві (тарату комиссиясы беретін сақтандыру шарттарын қоспағанда) енгізіледі.
Сақтандыру резервтері Нормативтік құқықтық актілерді мемлекеттік тіркеу тізілімінде № 9529 тіркелген "Сақтандыру резервтерін қалыптастыруға, есептеу әдістемесіне және олардың құрылымына қойылатын талаптарды бекіту туралы" Қазақстан Республикасы Ұлттық Банкі Басқармасының 2014 жылғы 6 мамырдағы № 76 қаулысына сәйкес есептеледі.
36. Берілуі болжанған сақтандыру міндеттемелеріне сәйкес келетін сақтандыру резервтерінің алдын ала мөлшерін айқындағаннан кейін сақтандыру ұйымы, уақытша басқарушы, уақытша әкімшілік (уақытша әкімші) сақтандыру портфелімен бірге берілуі болжанып отырған активтердің тізбесін жасайды.
Активтердің тізбесінде мыналар қамтылады:
сақтандыру портфелінің құрамында берілетін активтердің мөлшері, түрі және тізбесі (сақтанушылардың дебиторлық берешегі және басқа активтер);
сақтандыру резервтерін өтеуге қабылданатын активтерге сәйкес келетін активтердің мөлшері, түрі және тізбесі;
жеткіліксіз сомаға өзге активтердің мөлшері, түрі мен тізбесі және сақтандыру резервтерін өтеуге қабылданатын активтерге сәйкес келетін активтерге оларды ауыстыру нұсқалары (берілуі болжанып отырған сақтандыру міндеттемелеріне сәйкес келетін сақтандыру резервтерінің мөлшеріне қатысты сақтандыру резервтерін өтеуге қабылданатын активтерге сәйкес келетін активтердің мөлшері жеткіліксіз болған жағдайда).
37. Тарату комиссиясы кепілдік беру жөніндегі ұйымға сақтандыру портфеліне ақы төлеу үшін берілуі болжанып отырған сақтандыру міндеттемелеріне сәйкес келетін сақтандыру резервтерінің алдын ала мөлшері туралы ақпарат ұсынады.
38. Берілетін портфель бойынша міндеттемелердің (сақтандыру резервтерінің) мөлшерін бағалауды тәуелсіз актуарий жүзеге асырады.
Сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы сақтандыру портфелін беру күнінде берілетін сақтандыру портфеліне сәйкес келетін сақтандыру резервтерінің мөлшерін есептеу үшін тәуелсіз актуарийді жұмысқа тартады.
Есептелген сақтандыру резервтерінің дұрыстығын тексеру қажет болғанда сақтандырушы-алушы немесе сақтандыру ұйымын мәжбүрлеп тарату туралы сот шешімі заңды күшіне енген жағдайда кепілдік беру жөніндегі ұйым тәуелсіз актуарийді жұмысқа тартады.
39. Дебиторлық берешек бойынша берілетін талап қою құқығының құны баланстық және баланстан тыс шоттарда есепте болатын берешек сомасы ретінде анықталады.
Сақтандыру портфелін беру кезінде сақтандыру портфеліне енгізілген сақтандыру шарттары бойынша активтер мен міндеттемелердің құны оны беру күніне есептеледі.
40. Сақтандыру портфелімен берілетін сақтандыру ұйымының активтері сапасына және өтімділігіне сәйкес келмеген және сақтандырушы-алушы оларды қабылдамаған жағдайда, сақтандыру ұйымы, уақытша басқарушы, уақытша әкімшілік (уақытша әкімші) көрсетілген активтерді ауыстыруға бағытталған қажетті іс-шараларды (сатып алу-сату, ауыстыру және басқа да операциялар) жүргізеді.
41. Сақтандыру портфелін беру туралы шарт жазбаша нысанда жасалады.
42. Сақтандыру портфелін беру туралы шарт:
1) беру күні көрсетіле отырып сақтандыру сыныптары (түрлері) бойынша бөлінген сақтандыру портфеліне енгізілетін сақтандыру шарттары;
2) сақтандыру портфелін беру күнінде сақтандыру портфелі шеңберінде берілетін сақтандыру шарттарында көзделген құқықтары мен міндеттері (төленбеген сақтандыру сыйлықақысының мөлшері, мерзімін кейінге қалдырып төлеуді немесе бөліп төлеуді ескере отырып сақтандыру сыйлықақысын төлеу мерзімі, сақтандыру сыйлықақысын төлеу мерзімінің өткен күндер саны, төленген сақтандыру төлемдері, мәлімделген, бірақ реттелмеген шығындар);
3) сақтандыру портфелін беру күнінде берілетін сақтандыру портфеліне енгізілген сақтандыру шарттары бойынша құжаттарды, сондай-ақ сақтандыру шарттарының орындалуын көрсететін құжаттарды (сақтандыру шарттарының түпнұсқалары, сақтандыру сыйлықақысының (сақтандыру жарналарының) төленуін растайтын құжаттар, сақтандыру ұйымы сақтандыру жағдайларын реттеу кезінде жинаған құжаттарды, сондай-ақ сақтандыру төлемдерін жүзеге асыруды растайтын құжаттарды, реттелмеген сақтандыру жағдайлары бойынша құжаттарды) беру тәртібі мен мерзімдері;
4) сақтандыру портфелін бергеннен кейін сақтандыру ұйымына келіп түскен берілген сақтандыру портфелі бойынша құжаттарды және ақпаратты беру тәртібі мен мерзімдері;
5) сақтандыру портфелін беру күнінде сақтандыру портфелін беретін сақтандыру ұйымының және сақтандырушы-алушының тәуелсіз актуарийі есептеген және берілетін сақтандыру шарттарына сәйкес келетін сақтандыру резервтерінің мөлшері;
6) берілетін активтердің мөлшері, құрамы мен құны және оларды беру мерзімі, ал тарату комиссиясы сақтандыру портфелін берген кезде – кепілдік беру жөніндегі ұйым сақтандырушы-алушыға төлеуге тиіс ақша сомасы;
7) тарату комиссиясының сақтандыру портфелін беру жағдайларын қоспағанда, активтерді ауыстыру ықтималдығы;
8) кепілдік берілетін сақтандыру түрлері бойынша сақтандыру жарналарын төлеу туралы мәліметтерді қамтиды. Сақтандыру портфелін беру туралы шартта көрсетілген ақпарат болмаған жағдайда кепілдік берілетін сақтандыру түрлері бойынша сақтандыру жарналарын төлеу сақтандырушы-алушыға жүктеледі.
43. Сақтандыру ұйымына сақтандыру портфелін беру туралы шарттың барлық маңызды талаптары мәлім болған, оны беруге тиісті келісімдер алынған және сақтандыру портфелін беруге қажетті өзге талаптар бұзылмаған жағдайда, сақтандыру ұйымы бір немесе бірнеше сақтандырушыға сақтандыру портфелін беру туралы шарт жасау ұсынысымен, оның ішінде жария оферта арқылы оферта жібереді.
44. Сақтандыру ұйымы сақтандыру портфелін беруге ниет білдірген, бірақ берілетін сақтандыру портфелінің құрамына енгізуге жататын құқықтар мен міндеттерінің түпкілікті көлеміне қатысты сақтандыру портфелін беру туралы шарттың талаптары белгіленбеген жағдайда, сақтандыру ұйымы және сақтандырушы-алушы сақтандыру портфелін беру туралы алдын ала шарт жасайды.
Сақтанушы және сақтандырушы-алушы сақтандыру портфелін беру туралы алдын ала шарт бойынша болашақта сақтандыру портфелін беру туралы шартты (негізгі шарт) алдын ала шартта көзделген талаптармен жасау міндеттесін қабылдайды.
Алдын ала шарт жазбаша нысанда жасалады, онда шарттың мәнін белгілеуге мүмкіндік беретін жағдайлар, сондай-ақ тараптар оны жасасуға міндеттенетін мерзімі көрсетіле отырып, сақтандыру портфелін беру туралы шарт тараптарының басқа талаптары қамтылады.
45. Уақытша басқарушы, уақытша әкімшілік (уақытша әкімші), тарату комиссиясы сақтандыру портфелін беру туралы шарт жасаған және қабылдау-өткізу актісіне қол қойған күннен кейін 1 (бір) жұмыс күні ішінде уәкілетті органға көрсетілген құжаттардың көшірмелерін жібереді.
46. Сақтандыру портфелін беру туралы шартты жасағаннан кейін сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы сақтандырушы-алушыға сақтандыру портфелін беру туралы шартта тараптар келіскен мерзімде, тәртіпте және талаптарда сақтандыру портфеліне қатысты барлық құжаттарды, берілетін сақтандыру міндеттемелеріне (тарату комиссиясының сақтандыру портфелін беруін қоспағанда) сәйкес келетін сақтандыру резервтерінің мөлшеріндегі активтерді, сақтандыру портфелін беру туралы шарттың талаптарына сәйкес ақпаратты және басқа мәліметтер мен құжаттарды береді.
47. Сақтандыру шарты бойынша міндеттемелерді беру осы шарт бойынша сақтандыру ұйымы борышкерлерінің немесе кредиторларының олармен байланысты құқықтарын немесе міндеттерін бір мезгілде беру арқылы жүргізіледі.
48. Бір сақтандыру шартынан сақтандыру міндеттемелерінен басқа, өзге де міндеттемелер туындаса, онда сақтандыру ұйымының құқықтары мен міндеттерінің берілуі Қазақстан Республикасының сақтандыру және сақтандыру қызметі туралы заңнамасымен белгіленген тәртіппен өзге міндеттемелер бойынша оның құқықтары мен міндеттерін бір мезгілде беру арқылы жүзеге асырылады.
49. Сақтандыру шарттары бойынша құқықтар мен міндеттерді берумен бір мезгілде қайта сақтандыру шарттары бойынша сақтандыру портфелін беретін сақтандыру ұйымының - қайта сақтанушының құқықтары мен міндеттері беріледі.
Егер сақтандыру ұйымы жасаған қайта сақтандыру шарттары бойынша құқықтары мен міндеттері қайта сақтандырылған сақтандыру шарттарынан туындаған құқықтарымен және міндеттерімен бір мезгілде берілмеген болса, онда сақтандыру ұйымы - қайта сақтанушы қайта сақтандыру объектісі толық немесе ішінара жойылғаны туралы қайта сақтанушыны хабардар етеді.
50. Сақтандыру портфелін беру кезінде берілетін сақтандыру шарттары бойынша сақтандыру ұйымының құқықтары мен міндеттері сақтандырушы-алушыға сақтандыру портфелін беру күніндегі көлемде және талаптарда өтеді.
Сақтандырушы - алушының сақтандыру шарттары бойынша құқықтар мен міндеттер өзіне өткен күннен бастап барлық тоқтатылмаған құқықтары болады және берілетін сақтандыру шарты күшіне енген кезден бастап туындаған сақтандыру ұйымның барлық тоқтатылмаған міндеттеріне жауап береді.
51. Сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы сақтандыру портфелін беру туралы шартта тараптармен келісілген талаптарда сақтандырушы-алушыға сақтандыру портфелін бергеннен кейін сақтандыру ұйымына келіп түскен барлық құжаттар мен ақпаратты береді.
52. Сақтандыру портфелі шеңберінде берілуге жататын өзге сақтандыру шарттары анықталған жағдайда, сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы және сақтандырушы-алушы сақтандыру портфелін беру шартына қосымша келісім жасайды.
53. Сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы құжаттарды Қағидаларға 3-қосымшаға сәйкес нысан бойынша сақтандыру портфелін беру туралы шарт бойынша құжаттарды қабылдау-өткізу актісі (бұдан әрі – қабылдау-өткізу актісі) бойынша береді.
54. Бір жағынан сақтандыру ұйымының, уақытша басқарушының, уақытша әкімшіліктің (уақытша әкімшінің), тарату комиссиясының және екінші жағынан сақтандырушы-алушының арасындағы қабылдау-өткізу актісінде мынадай мәліметтер көрсетіледі:
1) сақтандыру шарттары бойынша берілетін міндеттемелер мөлшері, сақтанушының тегі, аты, әкесінің аты (бар болса) (жеке тұлға үшін) немесе сақтанушының атауы (заңды тұлға үшін), сақтандыру шарты жасалған күн және оның нөмірі, сақтандыру шартының қолданылу мерзімі, сақтандыру кезеңі, сақтандыру объектісі, сақтандыру сомасының және сақтандыру сыйлықақысының мөлшері көрсетіле отырып сақтандыру шарттарының тізбесі;
2) атауы, түгендеу нөмірі, баланстық (бар болса – бағалау) құны, сақтандыру ұйымының меншік құқығын растайтын құжаттар көрсетіле отырып сақтандыру ұйымының берілетін активтерінің мөлшері, тізбесі және түрлері (тарату комиссиясының сақтандыру портфелін беруін қоспағанда);
3) дебиторлардың тегі, аты, әкесінің аты (бар болса) немесе атауы, дебиторлық берешектің сомасы ескерілген шоттардың нөмірлері, берешектің туындауына негіздеме көрсетіле отырып дебиторлық берешек бойынша берілетін талап ету құқығының құны мен тізбесі (тарату комиссиясының сақтандыру портфелін беруін қоспағанда);
4) тарату комиссиясының сақтандыру портфелін беру кезінде кепілдік беру жөніндегі ұйым сақтандырушы-алушыға төлейтін ақша сомасы;
5) берілетін құжаттар (шарттар, куәліктер мен басқа да құжаттар).
Қабылдау-өткізу актісін жасау күні тараптардың келісімі бойынша айқындалады.
Сақтандыру ұйымының және сақтандырушы-алушының мөрлерімен (бар болса) расталған берілген құжаттардың көшірмелері сақтандыру ұйымында, уақытша басқарушыда, уақытша әкімшілікте (уақытша әкімшіде), тарату комиссиясында сақталады.
55. Сақтандыру портфелінің құрамына берілмеген сақтандыру шарты Қазақстан Республикасының сақтандыру және сақтандыру қызметі туралы заңнамасында және сақтандыру шартында көзделген талаптарда бұзылады.
56. Сақтандырушы-алушы сақтандыру ұйымының сақтандыру портфелін қабылдау-өткізу актісі бойынша қабылдаған күннен кейін 5 (бес) жұмыс күні ішінде сақтандыру ұйымы, уақытша басқарушы, уақытша әкімшілік (уақытша әкімші), тарату комиссиясы сақтандыру портфелінің берілгені туралы хабарландыруды Қазақстан Республикасының бүкіл аумағында таратылатын мерзімді баспасөз басылымдарында қазақ және орыс тілдерінде жариялайды.
Хабарландыруда:
сақтандыру портфелінің берілген күні;
сақтандырушы-алушының атауы, филиалдары мен өкілдіктері, байланыс телефондары ескеріле отырып оның орналасқан жері туралы ақпарат қамтылады.
Тарату комиссиясы сақтандыру портфелін берген жағдайда, хабарландыруда байланыс телефондары көрсетіле отырып тарату комиссиясының, оның бөлімшелерінің және кепілдік беру жөніндегі ұйымның орналасқан жері туралы ақпарат қосымша қамтылады.
57. Сақтандыру портфелін беру кезінде кепілдік беру жөніндегі ұйымға жарналарды сақтандыру шартын жасау кезінде сақтандыру сыйлықақысын қабылдаған сақтандыру ұйымы төлейді.
Міндетті жарна сомасын және кепілдік беру жөніндегі ұйымға төленуге жататын соманы есептеу мақсатында сақтандыру портфелін беретін сақтандыру ұйымы сақтандыру портфелін беру сәтіне дейін кезекті тоқсан сайынғы жарна төленгеннен кейін жасалған сақтандыру шарттары бойынша сақтандыру сыйлықақыларын да есепке алуға тиіс.
5-тарау. Бас банктің еншілес сақтандыру (қайта сақтандыру) ұйымдарының арасында сақтандыру портфелін берудің ерекшеліктері
58. "Қазақстан Республикасындағы банктер және банк қызметі туралы" 1995 жылғы 31 тамыздағы Қазақстан Республикасы Заңының 61-4-бабында көзделген операцияны жүзеге асырған бас банктің еншілес сақтандыру (қайта сақтандыру) ұйымдарының арасында сақтандыру портфелін беру сақтанушының келісімін алмай-ақ жүзеге асырылады.
59. Сақтанушыларды (пайда алушыларды) алдағы уақытта болатын бас банктің еншілес сақтандыру (қайта сақтандыру) ұйымдарының арасында сақтандыру портфелін беру туралы хабардар ету Қазақстан Республикасының бүкіл аумағында қазақ және орыс тілдерінде таратылатын мерзімді баспасөз басылымдарында сақтандыру портфелін беру туралы хабарландыру жариялау жолымен жүргізіледі.
Сақтандыру портфелін беруге сақтанушының келісімі туралы сұрату
Сізді 20___ жылғы "____" ___________ № ______ сақтандыру шарты бойынша
құқықтар мен міндеттерді беру ниетіміз туралы хабардар етеміз, ол бойынша Сіз тиісті
сақтандыру сыныбына 20___ жылғы "____" ___________№________ лицензиясы бар
________________________________________________________________________________
________________________________________________________________________________
(сақтандыру портфелін қабылдайтын сақтандыру ұйымының атауы) сақтандыру ұйымының
сақтанушысы болып табыласыз.
Біздің көрсетілген құқықтарымыз бен міндеттерімізді беруіміздің нәтижесінде
сақтандыру ұйымы
________________________________________________________________________________
(сақтандыру портфелін қабылдайтын сақтандыру ұйымының атауы)
сақтандыру шарты бойынша сақтандырушы болады және оны оның талаптарына сәйкес
орындауды жалғастырады немесе оны мынадай талаптармен орындауды жалғастырады:
________________________________________________________________________________
_______________________________________________________________________________.
(өзгертілген талаптар көрсетіледі немесе жаңа сақтандыру қағидалары қоса беріледі)
Көрсетілген сақтандыру шарты бойынша құқықтар мен міндеттерді беру үшін Сіздің
жазбаша келісіміңізді алуымыз қажет.
Сіздің сақтандыру ұйымын ауыстырудан бас тарту құқығыңыз бар.
Егер Сіз сақтандыру ұйымын ____________________ сақтандырушыға ауыстырғаннан
кейін сақтандыру шартының талаптарын өзгертуге келіспесеңіз, бұл сақтандыру портфелін
беруден бас тартуыңыз ретінде қарастырылатынына назарыңызды аударамыз.
Сізден мына төмендегі бағандарды таңдаған жауап нұсқасын "V" белгісімен белгілеп
толтыруды және осы сұратуды 20__ жылғы "___"______ кешіктірмей біздің мекенжайымызға
жіберуді өтінеміз.
________________________________________________________________________________
(сақтандыру портфелін беретін сақтандыру ұйымының шешуі бойынша қосымша
ақпарат көрсетіледі).
Жеке тұлға-сақтанушы үшін:
Мен,___________________________________________________________,
(тегі, аты, бар болса – әкесінің аты (егер ол жеке басын
куәландыратын құжатта көрсетілсе))
Заңды тұлға-сақтанушы үшін:
________________________________________________________________________________
(заңды тұлғаның бірінші басшысы немесе оның орнындағы тұлға)
________________________________________________________________________________
(орналасқан жері, мемлекеттік тіркеу (қайта тіркеу) туралы анықтаманың
немесе мемлекеттік тіркеу (қайта тіркеу) туралы куәліктің күні
________________________________________________________________________________
және нөмірі, БСН)
________________________________________________________________________________
(банк деректемелері: БСК, ЖСК, банк шоты ашылған банктің атауы)
сақтандыру портфелін __________________________________ беруге келісемін;
сақтандыру портфелін __________________________________ беруге келіспеймін;
____________________________________ сақтандыру шартын бұзуға келісемін.
20____ жылғы "____" ________
(толтырған күні)
___________________________
(сақтанушының қолы)
Мөр орны (бар болса)
Ескерту:
1) осы сұрату сақтандыру ұйымының бланкінде толтырылады;
2) осы сақтандыру ұйымының сұратуы сақтандырушыны ауыстырудан және сақтандыру шартын ұзартудан бас тарту құқығын түсіндіреді. Егер сақтанушы алдыңғы сақтандыру шартының қолданылу мерзімі аяқталғанға дейін ұзартылған сақтандыру шарты бойынша сақтандыру сыйлықақысын төлеген болса, онда ұзартылған шарт оған қойылатын талаптар ескеріле отырып берілетін сақтандыру портфеліне енгізіледі;
3) егер Қазақстан Республикасының заңнамасымен сақтандыру шарттарын бұзу көзделсе, сұратуда сақтандыру портфелін беруге келіспеген жағдайда мұндай шарттар бұзылуға тиіс екенін көрсету қажет.
Берілетін сақтандыру портфелінің құрамына енгізілетін сақтандыру шарттарының тізімі
№ | Сақтандыру шартының (сақтандыру полисінің) нөмірі | Сақтандыру шартының жасалған күні | Сақтанушының, сақтандырылғанның атауы не тегі, аты, әкесінің аты (бар болса) | Сақтанушының, сақтандырылғанның ЖСН/ БСН | Сақтандыру сыныбы | Сақтандыру шартының қолданыла бастау күні | Сақтандыру шартының қолданысы аяқталатын күн | Сақтандыру сомасының мөлшері |
1 | 2 | 3 | 4 | 5 | 6 | 7 | 8 | 9 |
кестенің жалғасы:
Сақтандыру сыйлықақысының мөлшері | Сақтандыру сыйлықақысы төленген күн | Төленген сақтандыру сыйлықақысының мөлшері | Сақтандыру жағдайы туралы өтініштің түскен күні | Сақтандыру жағдайы басталған күн | Сақтандыру төлемі (төлемдері) жүргізілген күн (күндер) | Жүргізілген сақтандыру төлемінің (төлемдерінің) мөлшері (мөлшерлері) | Жүргізілмеген сақтандыру төлемін (төлемдерін) төлеу мерзімдері | Жүргізілмеген сақтандыру төлемінің (төлемдерінің) мөлшері (мөлшерлері) |
10 | 11 | 12 | 13 | 14 | 15 | 16 | 17 | 18 |
кестенің жалғасы:
Сақтандыру шарты бойынша қалыптастырылған сақтандыру резервінің мөлшері (мөлшерлері): | Сақтандыру портфелін беруге келісім алу туралы мәліметтер (заңнамамен белгіленген жағдайларда) | |||||
Сақтандыру төлемінен (төлемдерінен) бас тартқан күн (күндер) | Еңбек сіңірілмеген сыйлықақы резерві | Орын алған, бірақ мәлімделмеген шығындар резерві | Мәлімделген, бірақ реттелмеген шығындар резерві | Өмірді сақтандыру шарттары бойынша орын алмаған шығындар резерві | Аннуитет шарттары бойынша орын алмаған шығындар резерві | |
19 | 20 | 21 | 22 | 23 | 24 | 25 |
Сақтандыру ұйымының бірінші басшысының немесе оның орнындағы тұлғаның, уақытша
басқарушы, уақытша әкімшілік (уақытша әкімші), тарату комиссиясы басшысының қолы
_________________________________________
(қолтаңба)
Қол қойылған күн 20___жылғы "___" ___________________.
Мөр орны (бар болса)
Ескерту: осы Қосымшаның 13, 14, 15, 16, 17, 18 және 19-бағандары тарату комиссиясы беретін сақтандыру портфелінің құрамына кіретін сақтандыру шарттары бойынша толтырылмайды.
Сақтандыру портфелін беру туралы шарт бойынша құжаттарды қабылдау-өткізу актісі
20____ жылғы "__" _______ №___________
______________ қаласы 20____ жылғы "____" _____________
Сақтандыру портфелін беретін
________________________________________________________________________________
(атауы)
сақтандыру ұйымы, бұдан әрі "1-тарап" деп аталады,
________________________________________________________________________________
________________________________________________________________________________
(тұлғаның өкілеттіктерін айқындайтын құжаттың деректемелері)
негізінде әрекет ететін арқылы бір жағынан және сақтандыру портфелін
қабылдайтын____________________________________________________________________
_______________________________________________________________________________,
(тегі, аты, әкесінің аты (бар болса))
________________________________________________________________________________
________________________________________________________________________________
(атауы)
сақтандыру ұйымы, бұдан әрі "2-тарап" деп аталады, негізінде әрекет ететін
________________________________________________________________________________
________________________________________________________________________________
(тұлғаның өкілеттіктерін айқындайтын құжаттың деректемелері)
_______________________________________________________________________________,
(тегі, аты, әкесінің аты (бар болса))
арқылы екінші жағынан, бірлесіп "Тараптар" деп аталады, осы Сақтандыру портфелін беру
туралы шарт бойынша Құжаттарды қабылдау-өткізу актісіне (бұдан әрі – Акті) қол қою
арқылы:
1) осы Актіге қосымшаға сәйкес 1-тараптың құжаттарды бергенін, ал 2-тараптың қабылдағанын;
2) 2-тараптың осы Актіге қосымшада көрсетілген құжаттар тізбесіне наразылықтарының жоқ екенін;
3) Акті күші бірдей екі данада жасалғанын және қол қойылғанын растайды;
4) _____________________________________________________________.
(қосымша мәліметтер (бар болса).
1-тарап: _________________ (қолы) Мөр орны (бар болса) | 2-тарап: _________________ (қолы) Мөр орны (бар болса) |
| Қазақстан Республикасы Ұлттық Банкі Басқармасының 2016 жылғы 26 желтоқсандағы № 303 қаулысына қосымша |
Күші жойылған Қазақстан Республикасының нормативтік құқықтық актілерінің, сондай-ақ Қазақстан Республикасының кейбір нормативтік құқықтық актілерінің құрылымдық элементтерінің тізбесі
1. "Сақтандыру портфелін беру қағидаларын және сақтандыру (қайта сақтандыру) ұйымын мәжбүрлеп тарату туралы сот шешімі заңды күшіне енген күннен бастап, сондай-ақ сақтандыру (қайта сақтандыру) ұйымын консервациялау немесе лицензиясынан айыру кезінде сақтандыру портфелін берудің ерекшеліктерін бекіту туралы" Қазақстан Республикасы Қаржы нарығын және қаржы ұйымдарын реттеу мен қадағалау агенттігі Басқармасының 2010 жылғы 29 қарашадағы № 171 қаулысы (Нормативтік құқықтық актілерді мемлекеттік тіркеу тізілімінде № 6722 тіркелген, 2011 жылғы 23 сәуірде "Егемен Қазақстан" газетінде № 164-165 (26567) жарияланған).
2. "Қазақстан Республикасының кейбір нормативтік құқықтық актілеріне зейнетақымен қамсыздандыру және сақтандыру қызметі мәселелері бойынша өзгерістер енгізу туралы" Қазақстан Республикасы Ұлттық Банкі Басқармасының 2013 жылғы 26 шілдедегі № 202 қаулысымен (Нормативтік құқықтық актілерді мемлекеттік тіркеу тізілімінде № 8686 тіркелген, 2013 жылғы 8 қазанда "Заң газеті" газетінде № 151 (2352) жарияланған) бекітілген Зейнетақымен қамсыздандыру және сақтандыру қызметі мәселелері бойынша өзгерістер енгізілетін Қазақстан Республикасының нормативтік құқықтық актілері тізбесінің 1-тармағы.
3. "Қазақстан Республикасының кейбір нормативтік құқықтық актілеріне банктер арасындағы активтер мен міндеттемелерді бірмезгілде беру жөніндегі операцияны жүргізу мәселелері бойынша өзгерістер мен толықтырулар енгізу туралы" Қазақстан Республикасы Ұлттық Банкі Басқармасының 2015 жылғы 8 мамырдағы № 78 қаулысымен (Нормативтік құқықтық актілерді мемлекеттік тіркеу тізілімінде № 11149 тіркелген, 2015 жылғы 27 мамырда "Әділет" ақпараттық-құқықтық жүйесінде жарияланған) бекітілген Қазақстан Республикасының банктер арасындағы активтер мен міндеттемелерді бірмезгілде беру жөніндегі операцияны жүргізу мәселелері бойынша өзгерістер мен толықтырулар енгізілетін нормативтік құқықтық актілері тізбесінің 4-тармағы.
4. "Қазақстан Республикасының кейбір нормативтік құқықтық актілеріне сақтандыру қызметін реттеу мәселелері бойынша өзгерістер енгізу туралы" Қазақстан Республикасы Ұлттық Банкі Басқармасының 2016 жылғы 30 мамырдағы № 127 қаулысымен (Нормативтік құқықтық актілерді мемлекеттік тіркеу тізілімінде № 14277 тіркелген, 2016 жылғы 24 қазанда "Әділет" ақпараттық-құқықтық жүйесінде жарияланған) бекітілген Қазақстан Республикасының өзгерістер енгізілетін сақтандыру қызметін реттеу мәселелері бойынша нормативтік құқықтық актілері тізбесінің 14-тармағы.