Өнiмнiң транзитiне рұқсат беру қағидаларын бекіту туралы

      "Экспорттық бақылау туралы" 2007 жылғы 21 шілдедегі Қазақстан Республикасы Заңының 6–бабы 16) тармақшасына сәйкес БҰЙЫРАМЫН:

      1. Қоса беріліп отырған Өнiмнiң транзитiне рұқсат беру қағидалары бекітілсін.

      2. Қазақстан Республикасы Инвестициялар және даму министрлігінің Индустриялық даму және өнеркәсіптік қауіпсіздік комитеті (А.Қ. Ержанов):

      1) осы бұйрықты заңнамада белгіленген тәртіпте Қазақстан Республикасы Әділет министрлігінде мемлекеттік тіркеуді;

      2) осы бұйрық Қазақстан Республикасы Әділет министрлігінде мемлекеттік тіркелгеннен кейін күнтізбелік он күн ішінде оның көшірмесін мерзімді баспа басылымдарында және "Әділет" ақпараттық–құқықтық жүйесінде ресми жариялауға жіберуді;

      3) осы бұйрықты Қазақстан Республикасы Инвестициялар және даму министрлігінің ресми интернет–ресурсында және мемлекеттік органдардың интранет–порталында орналастыруды;

      4) осы бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде осы бұйрықтың 2–тармағының 1), 2) және 3) тармақшаларында көзделген іс-шаралардың орындалуы туралы мәліметтерді Қазақстан Республикасы Инвестициялар және даму министрлігінің Заң департаментіне ұсынуды қамтамасыз етсін.

      3. Осы бұйрықтың орындалуын бақылау жетекшілік ететін Қазақстан Республикасының Инвестициялар және даму вице-министріне жүктелсін.

      4. Осы бұйрық оның алғаш ресми жарияланған күнінен кейін күнтiзбелiк жиырма бір күн өткен соң қолданысқа енгiзiледi.

      "КЕЛІСІЛДІ"

      Қазақстан Республикасының

      Ауыл шаруашылық министрі

      __________________А. Мамытбеков

      2015 жылғы 23 қыркүйек

      "КЕЛІСІЛДІ"

      Қазақстан Республикасының

      Білім және ғылым министрі

      __________________А. Сәрінжіпов

      2015 жылғы 17 тамыз

      "КЕЛІСІЛДІ"

      Қазақстан Республикасының

      Қорғаныс министрі

      __________________И. Тасмағамбетов

      2015 жылғы 8 қыркүйек

      "КЕЛІСІЛДІ"

      Қазақстан Республикасының

      Ұлттық экономика министрі

      __________________Е. Досаев

      2015 жылғы 3 шілде

      "КЕЛІСІЛДІ"

      Қазақстан Республикасының

      Энергетика министрі

      __________________В. Школьник

      2015 жылғы 20 шілде

Өнiмнiң транзитiне рұқсат беру қағидалары
1. Жалпы ережелер

      1. Осы Өнiмнiң транзитiне рұқсат беру қағидалары (бұдан әрi - Қағидалар) "Экспорттық бақылау туралы" 2007 жылғы 21 шiлдедегi Қазақстан Республикасы Заңының 6-бабы 16) тармақшасына сәйкес әзiрленген және өнiмнiң транзитiне рұқсат беру тәртiбiн айқындайды.

      1-1. осы Қағидалардың қолданысы егер баратын елге немесе жөнелтуші елге Қазақстан Республикасының, халықаралық ұйымдардың және оларға қатысты Қазақстан Республикасы осы салада оларды сақтау жөніндегі міндеттемелер қабылдаған жекелеген мемлекеттердің санкциялары салынған жағдайларда қолданылмайды және өнiмнiң транзитiне рұқсат берілмейді.

       2. Осы Қағидаларға 1-қосымшаға сәйкес нысан бойынша экспорттық бақылауға жататын өнiмнiң транзитiне рұқсат берудi экспорттық бақылау саласындағы мемлекеттiк реттеудi жүзеге асыратын уәкiлеттi орган (бұдан әрi - уәкiлеттi орган) жүргізеді.

      3. Осы Қағидалар барлық жеке және заңды тұлғаларға (бұдан әрi - өтiнiш берушi) таралады.

2. Өнімнің транзитіне рұқсат беру тәртiбi

      4. Рұқсат алу үшiн өтiнiш берушi (не оның сенімхат арқылы өкілі) мынадай құжаттарды:

      1) осы Қағидаларға 2-қосымшаға сәйкес нысан бойынша өнімнің транзитіне рұқсат алуға арналған өтiнiшті;

      2) заңды тұлғаның мемлекеттік тіркелуі (қайта тіркелуі) туралы құжатты – шетелдік заңды тұлға үшін;

      3) жеке тұлғаның жеке басын куәландыратын құжатты, кәсіпкерлік қызметпен айналысу құқығын растайтын құжатты – шетелдік жеке тұлға үшін;

      4) экспорттаушы елдің экспорттық бақылау мәселелері жөніндегі уәкілетті органы берген өнімді шығаруға рұқсатының бар екендігі туралы құжатты;

      егер елдің заңнамасында осындай құжатты беру көзделмеген жағдайда, экспорттаушы елдің экспорттық бақылау саласындағы уәкілетті органынан тиісті растаушы хаты ұсынылады;

      5) оған қосымшаларымен және (немесе) толықтыруларымен бірге өнiмнiң номенклатурасы мен көлемi заттай және құндық мәнде міндетті түрде көрсетілген сыртқы сауда мәмілесіне қатысушылардың арасындағы (сатушы, жүк жөнелтушi, сатып алушы, жүк алушы, делдал) өнімді жеткізуге арналған келісім-шарт;

      6) "Сақтандыру қызметі туралы" 2000 жылғы 18 желтоқсандағы Қазақстан Республикасының Заңына сәйкес өтініш берушінің азаматтық-құқықтық жауапкершілігін сақтандыру шарты;

      7) Қазақстан Республикасының ядролық және радиациялық қауiпсiздiгi жөнiндегi құзыреттi органдары рұқсатының қолданылу шарттарын қоса алғанда, Қазақстан Республикасының қолданыстағы нормативтiк актiлерiн бұзу айқындалған жағдайда оның тарапынан тасымалдың нақты жағдайларына тексеру жүргiзуге, сондай-ақ ықтимал уақытша сақтауға, керi тасымалдауға, сараптамаға және атқарушы органдардың басқа да қажеттi әрекеттерiне байланысты шығыстарды, сондай-ақ айқындалған ауытқуларды заңнама талаптарына сәйкес келтiру және/немесе экспортталуы мемлекетке жүктi қайтару қажеттiлігiне байланысты шығыстарды өтеуге кепiлдiктi растайтын (келісім-шарттың нөмірі мен күні көрсетілген) өтiнiш берушiнің хаты;

      8) егер жүк алушыға жүктi беру оған қатысы жоқ себептер бойынша мүмкiн болмаған жағдайда, транзитпен өтетін өнiмдi оның бұл жүктi қайтадан қабылдауға сөзсіз келiсiмiн растайтын (келісім-шарттың нөмірі мен күні көрсетілген) (уәкілетті органға бағытталған) жүк жөнелтушiнiң хаты;

      9) осы Қағидаларға 3-қосымшаға сәйкес нысан бойынша өтініш берушінің транзиттік тасымалдарды жүзеге асыруы кезінде қозғалыс бағыты, кіру және шығу шекаралық бекеттері, көлік түрі туралы мәліметтер;

      10) әскери (қосарлы) мақсаттағы өнім транзитін әскери қарауылмен алып жүрген кезде - әскери қарауыл адамдарының санын, олардың қарулары мен әкелінетін қарудың әр бірлігіне оқ-дәрілер туралы деректерді (маркасы (түрі), калибрі, саны) көрсете отырып, әскери қарауыл туралы ақпарат;

      Қазақстан Республикасының мемлекеттік шекарасы арқылы өткізу пункттерінде Қазақстан Республикасына кіруге немесе Қазақстан Республикасынан шығуға құқық беретін тұлғалардың (әскери қарауыл құрамынан) құжаттары, бекітілген қаруды, оқ-дәрілерді көрсете отырып, әскери бөлімнің лауазымды тұлғалары бекіткен әскери қарауыл тұлғаларының атаулы тізімін және әскери қарауалдың тиісті ілеспе құжаттары (жазба бұйрық, наряд, қорытынды) ұсынады.

      2), 3), 4), 5) және 6) тармақшаларда көрсетiлген құжаттар нотариалды куәландырылған көшірмелерімен қоса ұсынылады. Шет тілдерінде жасалған құжаттар Қазақстан Республикасының мемлекеттiк тiлiне немесе орыс тiлiне нотариалды куәландырылған аудармасымен ұсынылады.

      5. Егер шет мемлекеттiң мемлекеттiк органы өтiнiш берушi болып шығатын жағдайда:

      1) осы Қағидалардың 4-тармағының 2), 6) және 7) тармақшаларында көрсетiлген құжаттарды ұсыну талап етiлмейдi;

      2) осы Қағидалардың 4-тармағының 5) тармақшасында көрсетiлген келiсiм-шарт болмаған кезде өнімді жеткізу қажеттілігін негіздейтін құжаттар ұсынылады;

      3) осы Қағидалардың 4-тармағы 4) тармақшаның бірінші бөлігінде көрсетiлген құжатты елдің заңнамасында беру көзделмесе, растаушы хат ұсынылады.

      7. Уәкілетті орган өтініш берушінің рұқсат беруге құжаттарын алған сәттен бастап үш жұмыс күні ішінде ұсынылған құжаттардың толықтығын тексереді.

      Өтініш беруші құжаттардың толық топтамасын ұсынбаған жағдайда, көрсетілген мерзімде өтінішті одан әрі қараудан дәлелді бас тартады.

      8. Қазақстан Республикасының мемлекеттік шекарасы арқылы өнiмдi заңсыз алып өтудi болдырмау және оның жолын кесу мақсатында, уәкiлеттi орган мемлекеттiк органдарға оларға қатысты бөлiгiнде осы Қағидалардың 4 және 5-тармақтарында көрсетiлген құжаттардың көшiрмелерiн келiсуге жiбередi.

      9. Мемлекеттiк органдар он жүмыс күні iшiнде уәкiлеттi мемлекеттік органды қарау нәтижелерi туралы хабардар етедi.

      Мемлекеттік органдар белгіленген мерзімде жауап ұсынбаған жағдайда рұқсат беру келісілді деп есептеледі.

      10. Осы Қағидалардың 4 және 5-тармақтарында көрсетілген құжаттар құжаттарды қарау қорытындылары бойынша уәкiлеттi орган рұқсат беру туралы немесе оны беруден бас тарту туралы шешiм қабылдайды.

      11. Ұсынылатын мәлiметтердiң дұрыстығы үшiн жауапкершiлiк өтiнiш берушiге жүктеледi.

      12. Өнімнің транзитіне рұқсат беру немесе рұқсат беруден дәлелді бас тарту туралы шешiм осы Қағидалардың 4, 5-тармақтарында көрсетiлген құжаттар ұсынылған күннен бастап жиырма жұмыс күнінен кешіктірілмей беріледі.

      13. Рұқсат өнiмнiң саны мен номенклатурасына қарамастан, кемiнде он белгiден тұратын деңгейдегi кодты көрсете отырып, Еуразиялық экономикалық одақтың Сыртқы экономикалық қызметінің тауар номенклатурасының (бұдан әрі – СЭҚ ТН) кодына сәйкес тауардың бiр түрiне берiледi.

      14. Рұқсат өтiнiш берушiге рұқсат берiлген күннен бастап күнтiзбелiк бiр жылдан аспайтын мерзiмге олардың бiр транзит операциясын жүзеге асыруы үшiн берiледi.

      Өнімнің транзитіне берілетін рұқсаттың қолданылу мерзімі рұқсат беру үшін негіз болатын шарттың немесе құжаттың қолданылу мерзімімен шектеледі

      Егер өнiм транзитi көрсетiлген мерзiмде жүзеге асырылмаса, онда транзитке берілген рұқсат автоматты түрде жойылады.

      15. Уәкiлеттi орган өнімнің транзитіне рұқсат беруді "Е-лицензиялау" мемлекеттік деректер базасы" ақпараттық жүйесі арқылы жүзеге асырады.

      16. Қазақстан Республикасының аумағы бойынша өту кезінде өнімнің ұрлануын және заңсыз айналымын болдырмау және оның жолын кесу мақсатында мүдделі органдар оларды қызықтырған ақпаратты "Е-лицензиялау" мемлекеттік деректер базасы" ақпараттық жүйесі арқылы алады.

      17. Транзитке берiлген рұқсат басқа заңды және жеке тұлғаға берiлмейдi.

      18. Уәкілетті орган рұқсат беруден мынадай:

      1) өтiнiш берушiнің рұқсатты алу үшін ұсынған құжаттарының және (немесе) олардағы деректердің (мәліметтердің) анық еместігі анықталған;

      2) өтiнiш берушiнің және (немесе) рұқсат беру үшін қажетті ұсынылған материалдардың, объектілердің, деректердің және мәліметтердің Қазақстан Республикасының нормативтік құқықтық актілерінде белгіленген талаптарға сәйкес келмеген;

      3) уәкілетті мемлекеттік органның рұқсат беру үшін қажетті келісімі туралы сұрау салуға берілген теріс жауап, сондай-ақ сараптаманың, зерттеудің не тексерудің теріс қорытындысы;

      4) өтiнiш берушiге қатысты оның қызметіне немесе рұқсатты алуды талап ететін жекелеген қызмет түрлеріне тыйым салу туралы соттың заңды күшіне енген шешімінің (үкімінің) болуы;

      5) өтiнiш берушiге қатысты соттың заңды күшіне енген үкімінің болуы, оның негізінде өтiнiш берушiнің мемлекеттік рұқсат алумен байланысты арнаулы құқығынан айырылуы жағдайларда бас тартылады.

Өнім транзитіне берілетін рұқсат

      Ескерту. 1-қосымша жаңа редакцияда – ҚР Инвестициялар және даму министрінің 03.03.2017 № 131 (алғашқы ресми жарияланған күнінен кейін күнтізбелік жиырма бір күн өткен соң қолданысқа енгізіледі) бұйрығымен

№ __ өнiмнiң транзитiне рұқсат алуға арналған өтiнiш

      Ескерту. 2-қосымша жаңа редакцияда – ҚР Инвестициялар және даму министрінің 03.03.2017 № 131 (алғашқы ресми жарияланған күнінен кейін күнтізбелік жиырма бір күн өткен соң қолданысқа енгізіледі) бұйрығымен

Мәлімделген транзиттік тасымалдауды жүзеге асырған кезде қозғалыс бағыты, кіру және шығу шекаралық бекеттері, көлік түрі туралы мәліметтер

      Ескерту. 3-қосымша жаңа редакцияда – ҚР Инвестициялар және даму министрінің 03.03.2017 № 131 (алғашқы ресми жарияланған күнінен кейін күнтізбелік жиырма бір күн өткен соң қолданысқа енгізіледі) бұйрығымен

      Өтініш беруші ___________ ________________________________________________________

      лауазымы, қолы                  (тегi, аты, әкесiнiң аты (болған жағдайда)

      Мөрдің орны (болған жағдайда)