"Республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақша қаражатын жұмсау қағидаларын бекіту туралы" Қазақстан Республикасы Мәдениет және спорт министрінің 2020 жылғы 24 сәуірдегі № 100 бұйрығына өзгерістер енгізу туралы"

      ЗҚАИ-ның ескертпесі!
      Осы бұйрық 16.06.2025 ж. бастап қолданысқа енгізіледі

      БҰЙЫРАМЫН:

      1. "Республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақша қаражатын жұмсау қағидаларын бекіту туралы" Қазақстан Республикасы Мәдениет және спорт министрінің 2020 жылғы 24 сәуірдегі № 100 бұйрығына (Нормативтік құқықтық актілерді мемлекеттік тіркеу тізілімінде № 20488 болып тіркелген) мынадай өзгерістер енгізілсін:

      бұйрықтың тақырыбы мынадай редакцияда жазылсын:

      "Республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақша жұмсау қағидаларын бекіту туралы";

      1-тармақ мынадай редакцияда жазылсын:

      "1. Қоса беріліп отырған республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақшаны жұмсау қағидалары бекітілсін.";

      көрсетілген бұйрықпен бекітілген Республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақша қаражатын жұмсау қағидаларында:

      тақырып мынадай редакцияда жазылсын:

      "Республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақша жұмсау қағидалары";

      көрсетілген бұйрықпен бекітілген республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақша қаражатын жұмсау қағидалары осы бұйрықтың қосымшасына сәйкес жаңа редакцияда жазылсын.

      2. Қазақстан Республикасы Туризм және спорт министрлігінің Спорт және дене шынықтыру істері комитеті Қазақстан Республикасының заңнамасында белгіленген тәртіппен:

      1) осы бұйрықты Қазақстан Республикасының Әділет министрлігінде мемлекеттік тіркеуді;

      2) осы бұйрықты күшіне енгеннен кейін Қазақстан Республикасы Туризм және спорт министрлігінің интернет-ресурсында орналастыруды;

      3) осы бұйрықта көзделген іс-шаралар орындалғаннан кейін он жұмыс күні ішінде Қазақстан Республикасы Туризм және спорт министрлігінің Заң қызметі департаментіне іс-шаралардың орындалуы туралы мәліметтерді ұсынуды қамтамасыз етсін.

      3. Осы бұйрықтың орындалуын бақылау жетекшілік ететін Қазақстан Республикасының Туризм және спорт министрінің орынбасарына жүктелсін.

      4. Осы бұйрық 2025 жылғы 16 маусымнан бастап қолданысқа енгізіледі және ресми жариялануы тиіс.

Республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақша жұмсау қағидалары

1-тарау. Жалпы ережелер

      1. Осы Республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақша жұмсау қағидалары "Дене шынықтыру және спорт туралы" Қазақстан Республикасының Заңына сәйкес әзірленген және спорттық іс-шараларға, оның ішінде республикалық және жергілікті бюджеттерден қаржыландырылатын дене шынықтыру-спорт ұйымдары (бұдан әрі – ұйым) үшін оқу-жаттығу жиындарына (бұдан әрі – спорттық іс-шаралар) бөлінетін ақша қаражатын жұмсау тәртібін айқындайды.

2-тарау. Республикалық және жергілікті бюджеттерден қаржыландырылатын спорттық іс-шараларға, оның ішінде дене шынықтыру-спорт ұйымдары үшін оқу-жаттығу жиындарына бөлінетін ақша жұмсау тәртібі

      2. Спорттық іс-шараларды қаржыландыру тиісті жылдарға арналған республикалық және жергілікті бюджеттердің қаражаты (бұдан әрі – қаражат) есебінен жүзеге асырылады.

      3. Дене шынықтыру-сауықтыру және спорт ғимараттарында өткізілетін спорттық іс-шараларға қатысу және спорттық іс-шараларды өткізу үшін ақша жұмсауға негіз болып табылады:

      1) спорттық-бұқаралық іс-шаралар күнтізбесі, қаржылық күнтізбе және ұйымның ағымдағы қаржы жылына арналған қаржыландыру жоспары;

      2) спорттық іс-шараға қатысу туралы немесе спорттық іс-шараны өткізу туралы бұйрық және осы іс-шараға бекітілген шығыстар сметасы.

      4. Дене шынықтыру-спорт ұйымдары спорттық іс-шараларға қатысуға, спорттық іс-шараларды ұйымдастыруға және өткізуге ақша жұмсауды Қазақстан Республикасы Мәдениет және спорт министрінің 2015 жылғы 14 мамырдағы № 179 бұйрығымен бекітілген (Нормативтік құқықтық актілерді мемлекеттік тіркеу тізілімінде № 11437 болып тіркелген) Жарыстар түрлерінің, оқу-жаттығу жиындарының тізбесі және олардың сыныптамасының тізімі бойынша жүзеге асырады, оның ішінде:

      спортшылардың тамақтануы Қазақстан Республикасы Мәдениет және спорт министрінің 2014 жылғы 22 қарашадағы № 107 бұйрығымен (Нормативтік құқықтық актілерді мемлекеттік тіркеу тізілімінде № 10005 болып тіркелген) (бұдан әрі - № 107 бұйрық) бекітілген Оқу-жаттығу процесі мен спорттық іс-шаралар кезеңінде спортшыларды, оның ішінде барлық санаттағы әскери қызметшілерді және құқық қорғау және арнаулы мемлекеттік органдардың қызметкерлерін тамақтандыру және фармакологиялық қамтамасыз ету нормативтерінің әдістемесі негізінде айқындалады;

      медициналық қамтамасыз ету және медициналық көмек көрсету;

      № 107 бұйрыққа сәйкес фармакологиялық қамтамасыз ету;

      спорттық мүкәммал, спорттық жабдықтар және спорттық жарақтар сатып алу;

      тұрғын үй-жайларды жалдау, спорттық іс-шаралар өткізілетін жерге дейін және кері жол жүру, бастапқы (нысаналы) жарналарға ақы төлеу. Спорттық іс-шараны және оқу-жаттығу жиыны өткізу кезінде қатысушылардың нақты тұратын жері бойынша тұру және тамақтану үшін ақы төлеуге жол беріледі;

      барлық қатысушылардың жолда болған уақыты үшін тәуліктік ақы, сондай-ақ спортшылардан басқа, қатысушылардың спорттық іс-шараларында болған уақыты үшін тәуліктік ақы төлеу;

      жанар-жағар май сатып алу;

      спорттық іс-шараларға қатысушыларды материалдық қамтамасыз етуге байланысты спорт түрлері бойынша шығыстар;

      визалық қызметтерге, багажды тасымалдауға, трансфер құнына ақы төлеу, оларды төлеу туралы ұсынылған құжаттар негізінде рұқсат етіледі;

      полиграфиялық және кәдесый өнімдерін дайындау және сатып алу;

      марапаттау және жүлделерді табыстау рәсімі Қазақстан Республикасы Мәдениет және спорт министрінің 2017 жылғы 28 шілдедегі № 219 "Дене шынықтыру және спорт саласындағы уәкілетті орган мен жергілікті атқарушы органдар өткізетін спорттық жарыстардың чемпиондары мен жүлдегерлері үшін жүлделер құнының мөлшерін бекіту туралы" бұйрығына (Нормативтік құқықтық актілерді мемлекеттік тіркеу тізілімінде № 15562 болып тіркелген) сәйкес;

      спорттық іс-шараларды өткізу орнын, музыкалық және жарық жабдықтарын, мүкәммалды және өзге де қосалқы құралдарды жалға алу;

      көлік, почта-телеграф, баспаханалық және ақпараттық шығыстар;

      спорттық іс-шараларды ұйымдастыруға және өткізуге тартылған қызметкерлердің еңбегіне, тартылған мамандар мен қызмет көрсетуші (оның ішінде медициналық) персоналдың қызметтеріне ақы төлеу;

      спорт жарыстарына қызмет көрсеткені үшін спорт төрешілерінің қызметтеріне ақы төлеу және тартылған мамандар мен қызмет көрсетуші персоналдың (оның ішінде медициналық) еңбегіне ақы төлеу, жасалған шарттардың негізінде жүзеге асырылады;

      спорттық делегацияларды қабылдау және оларға қызмет көрсету, тұрғын үй-жайларды жалдау және ұйымдастырылған тамақтану;

      заңды және жеке тұлғалар ақылы негізде көрсететін қызметтерді қоса алғанда, спорттық іс-шараларды ұйымдастыруға, өткізу орындарын дайындауға және ағымдағы ұстауға байланысты қызметтерге ақы төлеу;

      спорттық іс-шараны өткізу үшін қажетті спорт түрінің немесе спорттық іс-шараның ерекшелігін ескере отырып, спорттық іс-шараларды өткізу үшін материалдық қорларды сатып алу;

      спорттық іс-шараларға қатысу бойынша бастапқы және ұйымдастырушылық жарналарды төлеуге, іссапарға жіберілетін тарап не спорт түрлері бойынша аккредиттелген спорт федерациялары ақшаны аудару арқылы жүзеге асырылатын бірыңғай республикалық және өңірлік күнтізбелерде спорттық іс-шараларды тіркеуге байланысты шығыстар;

      спорт түрлері бойынша Қазақстан Республикасының ұлттық командаларын, спорттық іс-шараларға қатысу үшін спорттық іс-шараларға қатысушыларды және спорттық жарыстарға қызмет көрсету үшін қажетті мамандарды іссапарға жіберу;

      бірінші топтағы мүгедектігі бар еріп жүретін спортшының тірек-қимыл аппараты зақымданған, көру органдары бұзылған, интеллектуалдық дамуы бұзылған бірінші топтағы мүгедектігі бар спортшылармен оқу-жаттығу жиындарына, спорттық іс-шараларға және халықаралық спорттық жарыстарға шығу кезінде жол жүруге, тәуліктік ақыға, тұруға, багажға арналған шығыстарын және қажет болған жағдайда осы Қағидаларда көзделген өзге де шығыстарды өтеу.

      5. Спорттық іс-шараларға қатысуға және спорттық іс-шараларды өткізуге байланысты барлық шығыстар спорттық іс-шараларға қатысушылардың карт-шоттарына ақша аудару (іссапар шығыстары) не тауарларды (жұмыстарды, қызметтерді) жеткізушілердің не спорттық мүкәммалды (жабдықты) жалдауға материалдық жауапты тұлғаның есеп айырысу шоттарына ақша аудару арқылы жүзеге асырылады.

      Командада кәмелетке толмаған спортшылар мен мүгедектігі бар спортшылар (тірек-қимыл аппараты зақымданған, көру органдары бұзылған және интеллектуалдық дамуы бұзылған) бар болған жағдайда ақша мүгедектігі бар спортшы және кәмелетке толмаған спортшының заңды өкілінен нотариалды куәландырылған сенімхаттың негізінде, жіберуші тарап пен команда жаттықтырушысы арасындағы жасалған шартқа сәйкес материалдық-жауапты тұлғаға аударылады.

      6. Спорттық іс-шараларға қатысатын немесе спорттық іс-шараны өткізетін ұйымдар іс-шара аяқталғаннан кейін қолданыстағы заңнамаға сәйкес спорттық іс-шараларға бөлінетін ақша пайдалану туралы есеп жасайды.