Денсаулық сақтау ұйымдары желісінің мемлекеттік нормативін бекіту туралы

      "Халық денсаулығы және денсаулық сақтау жүйесі туралы" Қазақстан Республикасының 2020 жылғы 7 шілдедегі Кодексінің 7-бабы 68) тармақшасына сәйкес БҰЙЫРАМЫН:

      1. Осы бұйрыққа 1-қосымшаға сәйкес денсаулық сақтау ұйымдары желісінің мемлекеттік нормативі (бұдан әрі – мемлекеттік норматив) бекітілсін.

      2. Осы бұйрыққа 2-қосымшаға сәйкес тізбе бойынша Қазақстан Республикасы Денсаулық сақтау министрлігінің кейбір бұйрықтарының күші жойылды деп танылсын.

      3. Қазақстан Республикасы Денсаулық сақтау министрлігінің Инвестициялық саясат департаменті Қазақстан Республикасының заңнамасында белгіленген тәртіппен:

      1) осы бұйрықты Қазақстан Республикасы Әділет министрлігінде мемлекеттік тіркеуді;

      2) осы бұйрықты Қазақстан Республикасы Денсаулық сақтау министрлігінің интернет-ресурсына орналастыруды;

      3) осы бұйрықты Қазақстан Республикасы Әділет министрлігінде мемлекеттік тіркегеннен кейін он жұмыс күні ішінде Қазақстан Республикасы Денсаулық сақтау министрлігінің Заң департаментіне осы тармақтың 1), 2) тармақшаларында көзделген іс-шаралардың орындалуы туралы мәліметтерді ұсынуды қамтамасыз етсін.

      4. Осы бұйрықтың орындалуын бақылау жетекшілік ететін Қазақстан Республикасының Денсаулық сақтау вице-министріне жүктелсін.

      5. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Денсаулық сақтау ұйымдары желісінің мемлекеттік нормативі

      1. Аудандық деңгейде:

      1) амбулаториялық-емханалық көмек көрсететін денсаулық сақтау ұйымдары және (немесе) олардың құрылымдық бөлімшелері:

      халықтың орташа жылдық саны 50 (елу) бастап 800 (сегіз жүз) адамға дейін болатын әрбір елді мекенде (ауылдық округте) құрылатын медициналық пункт*;

      халық саны 800-ден (сегіз жүз) бастап 1500 (бір мың бес жүз) адамға дейін болатын әрбір елді мекенде (ауылдық округте) құрылатын фельдшерлік-акушериялық пункт;

      бекітілген халық саны 1500 (бір мың бес жүз) бастап және 10000 (он мың) адамға дейін болатын елді мекенде (ауылдық округте) құрылатын дәрігерлік амбулатория;

      бекітілген халық саны 10000 (он мың) адамнан бастап 30000 (отыз мың) адамға дейін болатын елді мекенде (ауылдық округте) құрылатын медициналық-санитариялық алғашқы көмек орталығы;

      аудандық аурухана немесе ауданаралық аурухана құрамында аудандық орталықта құрылатын аудандық емхана;

      халық саны 30000 (отыз мың) адам және одан жоғары ауылдық елді мекендері бар аудандық аурухана жанынан құрылатын нөмірлік аудандық емхана;

      2) стационарлық көмек көрсететін денсаулық сақтау ұйымдары және (немесе) олардың құрылымдық бөлімшелері:

      аудан орталығында және аудандық маңызы бар қалаларда құрылатын аудандық аурухана**;

      халық саны 30000 (отыз мың) және одан жоғары ауылдық елді мекендері бар ауданда құрылатын нөмірлік аудандық аурухана;

      қызмет көрсетілетін халықтың саны 50000 (елу мың) және одан жоғары бірнеше жақын орналасқан аудандардың халқына қызмет көрсету үшін жұмыс істеп тұрған аудандық ауруханада құрылатын көп бейінді ауданаралық аурухана**;

      оңалту орталықтары, паллиативтік көмек, мейіргерлік күтім аудандық немесе ауданаралық аурухананың құрылымдық бөлімшесі (төсек) түрінде құрылады;

      3) патологиялық анатомия (цитопатология) саласында қызметті жүзеге асыратын ұйымдар аудандарда орталықтандырылған патологиялық- анатомиялық бөлімше ретінде аудандық немесе ауданаралық ауруханада құрылады;

      4) жедел медициналық көмек облыстық жедел медициналық жәрдем станциясының құрылымдық бөлімшесі нысанында құрылады;

      5) халықтың санитариялық-эпидемиологиялық саламаттылығы саласындағы қызметті жүзеге асыратын республикалық денсаулық сақтау ұйымдары:

      аудандық деңгейде құрылатын ұлттық сараптама орталығының құрылымдық бөлімшелері;

      инфекциялық аурулардың табиғи ошақтарында құрылатын обаға қарсы мекемелердің бөлімшелері.

      2. Қалалық деңгейде:

      1) амбулаториялық-емханалық көмек көрсететін денсаулық сақтау ұйымдары және (немесе) олардың құрылымдық бөлімшелері:

      бекітілген халық саны 1500-ден (бір мың бес жүз) бастап 10000 (он мың) адамға дейін болатын аумақтық қызмет көрсету аймағының шегінде қалаларда құрылатын дәрігерлік амбулатория;

      бекітілген халық саны 10000-нан (он мың) бастап 30000 (отыз мың) адамға дейін болатын аумақтық қызмет көрсету аймағының шегінде қалаларда құрылатын медициналық-санитариялық алғашқы көмек орталығы;

      бекітілген халық саны 30000 (отыз мың) адамнан асатын аумақтық қызмет көрсету аймағының шегінде қалаларда құрылатын қалалық емхана (бұдан әрі – ҚЕ), бірақ кемінде бір ҚЕ;

      алғашқы психикалық денсаулық орталығы бекітілген халық саны 60000 (алпыс мың) адам және одан жоғары, оның ішінде бір немесе бірнеше жақын орналасқан амбулаториялық-емханалық ұйымдардың халқына қызмет көрсету үшін ҚЕ құрамында құрылады;

      республикалық маңызы бар қалаларда және астанада құрылатын стоматологиялық емхана;

      республикалық маңызы бар қалаларда және астанада көп бейінді аурухананың құрылымдық бөлімшесі ретінде консультациялық - диагностикалық орталық;

      жастар денсаулық орталығы;

      2) стационарлық көмек көрсететін денсаулық сақтау ұйымдары және (немесе) олардың құрылымдық бөлімшелері:

      халқының саны 100000 (жүз мың) адамнан аспайтын қалаларда құрылатын қалалық аурухана;

      қызмет көрсетілетін халықтың саны 100000 (жүз мың) адамнан асатын жақын орналасқан аудандардың халқына қызмет көрсету үшін республикалық маңызы бар қалаларда, астанада және қалаларда құрылатын көп бейінді қалалық аурухана;

      халықтың саны 300000 (үш жүз мың) мың адамнан асатын қалаларда, республикалық маңызы бар қалаларда және астанада құрылатын көп бейінді қалалық балалар ауруханасы;

      республикалық маңызы бар қалаларда және астанада құрылатын психикалық денсаулық орталығы;

      республикалық маңызы бар қалаларда және астанада құрылатын фтизиопульмонология орталығы;

      көп бейінді ауруханалардың құрылымдық бөлімшесі ретінде перинаталдық (босандыру бөлімшесі), онкологиялық, инфекциялық, тері-венерологиялық, травматогиялық, инсульттік, ревматологиялық, офтальмалогиялық, кардиологиялық және кардиохирургиялық орталықтар құрылады;

      3) республикалық маңызы бар қалаларда және астанада құрылатын жедел медициналық жәрдем станциясы. Республикалық маңызы бар қалалар мен астанадан басқа қалаларда облыстық жедел медициналық жәрдем станциясының құрылымдық бөлімшесі ретінде құрылады;

      4) көп бейінді аурухана жанынан ұйымдастырылатын қалпына келтіріп емдеу және медициналық оңалту ұйымдары - санаторий, мамандандырылған санаторий, профилакторий, оңалту орталығы немесе оңалту бөлімшесі (төсектері);

      5) көп бейінді аурухананың, фтизиопульмонология орталығының жанынан ұйымдастырылатын паллиативтік көмек және мейіргерлік күтім көрсететін ұйымдар - хоспис, мейіргерлік күтім ауруханасы немесе бөлімшесі, төсектері;

      6) қан қызметі саласында қызметті жүзеге асыратын денсаулық сақтау ұйымдары қала халқының саны 300000 (үш жүз мың) адамнан асатын қалаларда, республикалық маңызы бар қалаларда және астанада құрылады, оларда қан қызметі саласында қызметті жүзеге асыратын республикалық денсаулық сақтау ұйымдары болмаған кезде;

      7) республикалық маңызы бар қалаларда және астанада, сондай-ақ халық саны 300000 (үш жүз мың) адамнан асатын қалаларда құрылатын патологиялық анатомия (цитопатология) саласында қызметті жүзеге асыратын денсаулық сақтау ұйымдары. Халық саны 300000 (үш жүз мың) адамнан асатын қалаларда қалалық немесе ауданаралық ауруханалар құрылымында орталықтандырылған патологиялық-анатомиялық бөлімше ретінде құрылады;

      8) республикалық маңызы бар қалаларда және астанада құрылатын АИТВ/ЖИТС-тің профилактикасы саласында қызметті жүзеге асыратын денсаулық сақтау ұйымдары;

      9) республикалық маңызы бар қалаларда және астанада құрылатын жетім балаларға, туылғаннан бастап үш жылға дейін ата-аналарының қамқорлығынсыз қалған балаларға, туғаннан бастап төрт жылға дейін психикалық және физикалық дамуында ауытқулары бар балаларға арналған, баладан бас тарту қаупі бар отбасылармен психологиялық-педагогикалық сүйемелдеу жүргізетін денсаулық сақтау ұйымдары;

      10) қалаларда, республикалық маңызы бар қалаларда және астанада құрылатын денсаулық сақтау саласындағы техникалық, кәсіптік және орта білімнен кейінгі білім беру ұйымдары;

      11) халықтың санитариялық-эпидемиологиялық саламаттылығы саласындағы қызметті жүзеге асыратын республикалық денсаулық сақтау ұйымдары:

      астанада, республикалық маңызы бар қалаларда құрылымдық бөлімшелерімен астанада құрылатын ұлттық сараптама орталығы;

      республикалық маңызы бар қалаларда құрылатын ғылыми ұйымдар;

      инфекциялық аурулардың табиғи ошақтарында құрылатын обаға қарсы мекемелер;

      12) Қазақстан Республикасының заңнамасына сәйкес республикалық деңгейде астанада құрылатын денсаулық сақтау саласындағы ұлттық холдинг.

      3. Облыстық деңгейде:

      1) амбулаториялық-емханалық көмек көрсететін денсаулық сақтау ұйымдары және (немесе) олардың құрылымдық бөлімшелері:

      стоматологиялық емхана;

      көп бейінді облыстық аурухананың құрылымдық бөлімшесі ретінде консультациялық - диагностикалық орталық;

      жастар денсаулық орталығы;

      2) стационарлық көмек көрсететін денсаулық сақтау ұйымдары және (немесе) олардың құрылымдық бөлімшелері:

      облыс орталығында құрылатын көп бейінді облыстық аурухана;

      облыс орталығында құрылатын көп бейінді облыстық балалар ауруханасы;

      облыс орталығында құрылатын облыстық фтизиопульмонология орталығы;

      облыс орталығында құрылатын облыстық туберкулезге қарсы диспансер;

      перинаталдық (босандыру бөлімшесі), онкологиялық, инфекциялық, тері-венерологиялық, травматогиялық, инсульттік, ревматологиялық, офтальмалогиялық, кардиологиялық және кардиохирургиялық орталықтар көп бейінді ауруханалардың құрылымдық бөлімшесі ретінде құрылады;

      3) санитариялық авиация бөлімшесін қоса алғандағы облыстық жедел медициналық жәрдем станциясы;

      4) көп бейінді аурухананың жанынан құрылатын қалпына келтіріп емдеу және медициналық оңалту ұйымдары-санаторий, мамандандырылған санаторий, профилакторий, оңалту орталығы немесе оңалту бөлімшесі (төсектері);

      5) көп бейінді аурухана, фтизиопульмонология орталығының жанынан ұйымдастырылатын паллиативтік көмек және мейіргерлік күтім көрсететін ұйымдар - хоспис, мейіргерлік күтім ауруханасы немесе бөлімшесі, төсектері;

      6) қан қызметі саласында жұмысты жүзеге асыратын ұйымдар;

      7) патологиялық анатомия (цитопатология) қызметін жүзеге асыратын ұйымдар;

      8) АИТВ/ЖИТС-тің профилактикасы саласында қызметті жүзеге асыратын денсаулық сақтау ұйымдары;

      9) жетім балаларға, туғаннан бастап үш жылға дейін ата-аналарының қамқорлығынсыз қалған балаларға, туғаннан бастап төрт жылға дейін психикалық және физикалық дамуында ауытқулары бар балаларға арналған, баладан бас тарту қаупі бар отбасылармен психологиялық-педагогикалық сүйемелдеу жүргізетін облыстық деңгейде құрылатын денсаулық сақтау ұйымдары;

      10) қалаларда, республикалық маңызы бар қалада және астанада құрылатын денсаулық сақтау саласындағы техникалық, кәсіптік және орта білімнен кейінгі білім беру ұйымдары.

      Ескертпе:

      * "Халық денсаулығы және денсаулық сақтау жүйесі туралы" Қазақстан Республикасының 2020 жылғы 7 шілдедегі Кодексінің (бұдан әрі – Кодекс) 12-бабы 2-тармағының 15) тармақшасына сәйкес 5 километрден асатын радиуста медициналық ұйым болмаған жағдайда халық саны 50-ден (елу) аз елді мекенде медициналық пункт құрылады;

      ** Кодекстің 12-бабы 2-тармағының 15) тармақшасына сәйкес халқының саны кемінде 5000 (бес мың) адам шалғай ауылдық елді мекендерде аудандық аурухана немесе ауданаралық аурухана бөлімшелері құрылады.

      Қазақстан Республикасының денсаулық сақтау ұйымдары желісінің мемлекеттік нормативі тегін медициналық көмектің кепілдік берілген көлемінің, сондай-ақ міндетті әлеуметтік медициналық сақтандыру жүйесінің шеңберінде медициналық көмек көрсететін денсаулық сақтау субъектілеріне қолданылады және "Ең төмен әлеуметтік стандарттар және олардың кепілдіктері туралы" Қазақстан Республикасы Заңының 31-бабына сәйкес "Денсаулық сақтаудың көрсетілетін қызметтерінің халыққа қолжетімді болуын қамтамасыз ету" ең төмен әлеуметтік стандартын қамтамасыз етеді.

Қазақстан Республикасы Денсаулық сақтау министрлігінің күші жойылған кейбір бұйрықтардың тізбесі

      1. "Денсаулық сақтау ұйымдары желісінің мемлекеттік нормативін бекіту туралы" Қазақстан Республикасы Денсаулық сақтау және әлеуметтік даму министрінің 2015 жылғы 28 сәуірдегі № 284 бұйрығы (Қазақстан Республикасы нормативтік құқықтық актілерінің мемлекеттік тізілімінде № 11231 болып тіркелген, 2015 жылғы 19 маусымда "Әділет"ақпараттық-құқықтық жүйесінде жарияланған).

      2. "Денсаулық сақтау ұйымдары желісінің мемлекеттік нормативін бекіту туралы" Қазақстан Республикасы Денсаулық сақтау және әлеуметтік даму министрінің 2015 жылғы 28 сәуірдегі № 284 бұйрығына өзгеріс енгізу туралы" Қазақстан Республикасы Денсаулық сақтау министрінің 2017 жылғы 27 қарашадағы № 882 бұйрығы (Қазақстан Республикасы нормативтік құқықтық актілерінің мемлекеттік тізілімінде № 16087 болып тіркелген, 2017 жылғы 27 желтоқсанда Қазақстан Республикасы нормативтік құқықтық актілерінің электрондық түрдегі эталондық бақылау банкінде жарияланған).

      3. "Қазақстан Республикасы Денсаулық сақтау министрлігінің кейбір бұйрықтарына өзгерістер мен толықтырулар енгізу туралы" Қазақстан Республикасы Денсаулық сақтау министрінің 2018 жылғы 13 желтоқсандағы № ҚР ДСМ-39 бұйрығының 1-тармағы (Қазақстан Республикасы нормативтік құқықтық актілерінің мемлекеттік тізілімінде № 17965 болып тіркелген, 2019 жылғы 3 қаңтарда Қазақстан Республикасы нормативтік құқықтық актілерінің электрондық түрдегі эталондық бақылау банкінде жарияланған).

      4. "Денсаулық сақтау ұйымдары желісінің мемлекеттік нормативін бекіту туралы" Қазақстан Республикасы Денсаулық сақтау және әлеуметтік даму министрінің 2015 жылғы 28 сәуірдегі № 284 бұйрығына өзгерістер енгізу туралы" Қазақстан Республикасы Денсаулық сақтау министрінің 2019 жылғы 28 қазандағы № ҚР ДСМ-137 бұйрығы (Қазақстан Республикасы нормативтік құқықтық актілерінің мемлекеттік тізілімінде № 19537 болып тіркелген, 2019 жылғы 6 қарашада Қазақстан Республикасы нормативтік құқықтық актілерінің электрондық түрдегі эталондық бақылау банкінде жарияланған).