Мүгедектігі бар адамдарды жұмысқа орналастыру үшін арнайы жұмыс орындарын құратын жұмыс берушілердің шығындарын субсидиялау қағидалары мен шарттарын бекіту туралы

      Ескерту. Бұйрықтың тақырыбы жаңа редакцияда – ҚР Еңбек және халықты әлеуметтік қорғау министрінің 14.09.2022 № 367 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) бұйрығымен.

      "Халықты жұмыспен қамту туралы" Қазақстан Республикасы Заңының 7-бабының 12) тармақшасына сәйкес БҰЙЫРАМЫН:

      1. Осы бұйрыққа қосымшаға сәйкес Мүгедектігі бар адамдарды жұмысқа орналастыру үшін арнайы жұмыс орындарын құратын жұмыс берушілердің шығындарын субсидиялау қағидалары мен шарттары бекітілсін.

      2. Халықты жұмыспен қамту және еңбек нарығын дамыту департаменті белгіленген заңнамалық тәртіпте:

      1) осы бұйрықты Қазақстан Республикасының Әділет министрлігінде мемлекеттік тіркеуді;

      2) осы бұйрық Қазақстан Республикасының Әділет министрлігінде мемлекеттік тіркелген күннен бастан күнтізбелік он күн ішінде оның мемлекеттік және орыс тілдеріндегі көшірмесін баспа және электрондық түрде мерзімді баспа басылымдарына және "Республикалық құқықтық ақпарат орталығы" шаруашылық жүргізу құқығындағы республикалық мемлекеттік кәсіпорнына ресми жариялауға және Қазақстан Республикасының нормативтік құқықтық актілерінің эталондық бақылау банкіне қосу үшін жіберуді;

      3) осы бұйрықты Қазақстан Республикасы Еңбек және халықты әлеуметтік қорғау министрлігінің интернет-ресурсында орналастыруды;

      4) осы бұйрық Қазақстан Республикасының Әділет министрлігінде мемлекеттік тіркелгеннен кейін күнтізбелік он күн ішінде Заң кызметі департаментіне осы тармақтың 1), 2) және 3) тармақшаларында көзделген іс-шаралардың орындалуы туралы мәліметтер ұсынуды қамтамасыз етсін.

      3. Осы бұйрықтың орындалуын бақылау Қазақстан Республикасының Еңбек және халықты әлеуметтік қорғау вице-министрі Б.Б. Нұрымбетовке жүктелсін.

      4. Осы бұйрық алғаш ресми жарияланған күнінен кейін күнтізбелік он күн өткен соң қолданысқа енгізіледі.

      КЕЛІСІЛДІ

      Қазақстан Республикасының

      Қаржы министрі

      ___________ Б. Сұлтанов

      2017 жылғы ___ ________

Мүгедектігі бар адамдарды жұмысқа орналастыру үшін арнайы жұмыс орындарын құратын жұмыс берушілердің шығындарын субсидиялау қағидалары мен шарттары

      Ескерту. Тақырыбы жаңа редакцияда – ҚР Еңбек және халықты әлеуметтік қорғау министрінің 14.09.2022 № 367 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) бұйрығымен.

1-тарау. Жалпы ережелер

      ЗҚАИ-ның ескертпесі!
      1-тармақ жаңа редакцияда көзделген – ҚР Еңбек және халықты әлеуметтік қорғау министрінің 12.05.2022 № 162 (01.01.2023 бастап қолданысқа енгізіледі) бұйрығымен.

      1. Осы Мүгедектігі бар адамдарды жұмысқа орналастыру үшін арнайы жұмыс орындарын құратын жұмыс берушілердің шығындарын субсидиялау қағидалары мен шарттары (бұдан әрі – Қағидалар) "Халықты жұмыспен қамту туралы" Қазақстан Республикасы Заңының 7-бабының 12) тармақшасына сәйкес әзірленді және мүгедектігі бар адамдарды жұмысқа орналастыру үшін арнайы жұмыс орындарын құратын жұмыс берушілердің шығындарын субсидиялау тәртібі мен шарттарын айқындайды.

      2. Осы Қағидаларда пайдаланылатын негізгі ұғымдар:

      1) "Электрондық Еңбек биржасы" мемлекеттік интернет-ресурсы (бұдан әрі – Электрондық Еңбек биржасы) – еңбек нарығының бірыңғай ақпараттық базасын қамтитын, Интернет желісінде жұмыс істейтін, халықты жұмыспен қамтуға жәрдемдесудің мемлекеттік шараларын көрсету мақсатында еңбек ресурстарын дамыту орталығы қолдап отыратын электрондық ақпараттық ресурс.

      2) жұмыс беруші – жұмыскер еңбек қатынастарында болатын жеке немесе заңды тұлға;

      3) жұмысқа орналастыру – халықтың жұмыспен қамтылуын қамтамасыз етуге септігін тигізуге бағытталған ұйымдастырушылық, экономикалық және құқықтық iс-шаралар кешенi;

      4) мүгедектігі бар адам – тұрмыс-тіршілігінің шектелуiне және оны әлеуметтiк қорғау қажеттiгiне әкеп соқтыратын ауруларға, мертігулерге (жаралануға, жарақаттарға, контузияларға), олардың зардаптарына, кемiстiктерге байланысты организм функциялары тұрақты бұзылып, денсаулығы нашарлаған адам;

      5) мүгедектігі бар адамдарды жұмысқа орналастыру үшін арнайы жұмыс орындарын жабдықтау (жарақтандыру) – мүгедектігі бар адамдарда организмнің бұзылған функцияларын және тіршілік-тынысының шектелуін толық немесе ішінара алмастыратын (орнын толтыратын) және олардың еңбек функцияларын орындау мүмкіндігін жасайтын негізгі технологиялық құрал-жабдықты, технологиялық жарақтандыруды, құралдарды, қосалқы жабдықты іріктеу, монтаждау және пайдалану процесі;

      6) мүгедектігі бар адамдарды жұмысқа орналастыруға арналған арнайы жұмыс орындары – мүгедектігі бар адамның жеке мүмкіндіктері ескеріле отырып жабдықталған жұмыс орындары (бұдан әрі – арнайы жұмыс орындары.

      7) халықты жұмыспен қамту мәселелері жөніндегі жергілікті орган – өңірлік еңбек нарығындағы ахуалға негіздей отырып, халықты жұмыспен қамтуға жәрдемдесудің бағыттарын айқындайтын ауданның, облыстық маңызы бар қалалардың, облыстың, республикалық маңызы бар қалалардың, астананың жергiлiктi атқарушы органдарының құрылымдық бөлiмшесi;

      8) халықты жұмыспен қамту орталығы – жұмыспен қамтуға жәрдемдесудің белсенді шараларын іске асыру, жұмыссыздықтан әлеуметтік қорғауды және жұмыспен қамтуға жәрдемдесудің өзге де шараларын ұйымдастыру мақсатында ауданның, облыстық және республикалық маңызы бар қалалардың, астананың жергілікті атқарушы органы құратын заңды тұлға.

2-тарау. Арнайы жұмыс орындарын құратын жұмыс берушілерді субсидиялау тәртібі

      ЗҚАИ-ның ескертпесі!
      3-тармақ жаңа редакцияда көзделген – ҚР Еңбек және халықты әлеуметтік қорғау министрінің 12.05.2022 № 162 (01.01.2023 бастап қолданысқа енгізіледі) бұйрығымен.
      ЗҚАИ-ның ескертпесі!
      3-тармақ жаңа редакцияда көзделген – ҚР Еңбек және халықты әлеуметтік қорғау министрінің 29.12.2022 № 537 (01.01.2023 бастап қолданысқа енгізіледі) бұйрығымен.

      3. Жұмыс берушілердің арнайы жұмыс орындарын құрумен байланысты шығындарын субсидиялау бойынша жұмыстарды халықты жұмыспен қамту орталықтары республикалық бюджет қаражаты есебінен бекітілген міндеттемелер мен төлемдер бойынша қаржыландыру жоспарларына сәйкес және осы мақсаттарға аудандардың (облыстық, республикалық маңызы бар қалалардың және астананың) бюджеттерімен көзделген сомалар шегінде іске асырады.

      4. Мүгедектігі бар адамдарды арнайы жұмыс орындарына орналастыру мүмкіндігі туралы ақпараттандыруды:

      тиісті өңірдің мүгедектігі бар адамдардың қоғамдық бірлестіктеріне ақпарат жолдау арқылы ауданның, облыстық, республикалық маңызы бар қалалардың, астананың халықты жұмыспен қамту мәселелері жөніндегі жергілікті органы;

      мүгедектігі бар адамның өзі жүгінген кезінде халықты жұмыспен қамту орталығы жүргізеді.

      5. Халықты жұмыспен қамту орталығы интернет-ресурстарға және/немесе бұқаралық ақпарат құралдарында ақпарат орналастыру арқылы жыл сайын 1 қазанға дейін арнайы жұмыс орындарын субсидиялау туралы жұмыс берушілерге ақпарат береді.

      6. Халықты жұмыспен қамту орталығы қаржыландыру лимиті негізінде жыл сайын 1 қарашаға дейін осы Қағидаларға 1-қосымшаға сәйкес нысан бойынша арнайы жұмыс орындарын құратын жұмыс берушілерден немесе Еңбек биржасы арқылы алдағы қаржы жылына өтінімдер жинауды жүзеге асырады.

      Халықты жұмыспен қамту орталығына жүгінген кезде өтінімге:

      1) арнайы жұмыс орындарын жабдықтауға арналған шығыстар сметасы;

      2) банкте шоттың бар-жоғы туралы анықтама қоса беріледі.

      7. Халықты жұмыспен қамту орталығы:

      1) өтінім белгіленген нысанға сәйкес келген, ұсынылған құжаттар толық, өтінімде және құжаттарда көрсетілген мәліметтер толық болған жағдайда – өтінімді Еңбек биржасы арқылы алған кезде өтінімді қабылдайды – өтінімді жұмыс берушінің Еңбек биржасындағы жеке кабинетіне жібереді;

      2) өтінім белгіленген нысанға сәйкес келмеген, ұсынылған құжаттар толық болмаған және (немесе) өтінімде және құжаттарда көрсетілген мәліметтер толық болмаған жағдайда – жұмыс берушіге өтінімді және оған қоса берілген құжаттарды қайтарады, өтінімді Еңбек биржасы арқылы (электрондық түрде) алған кезде – өтінімді жұмыс берушінің Еңбек биржасындағы жеке кабинетіне жібереді.

      8. Халықты жұмыспен қамту орталығы қарауға қабылдаған өтінімдер 5 жұмыс күні ішінде бірыңғай тізбеге жинақталады және ауданның, облыстық, республикалық маңызы бар қалалардың, астананың халықты жұмыспен қамту мәселелері жөніндегі жергілікті органына бекіту үшін жіберіледі.

      9. Ауданның, облыстық, республикалық маңызы бар қалалардың, астананың халықты жұмыспен қамту мәселелері жөніндегі жергiлiктi атқарушы органы бірінші басшысының немесе оның міндетін атқарушы адамның шешімімен арнайы жұмыс орындарын құруға өтінімдері мақұлданған ұйымдардың тізбесін 5 жұмыс күні ішінде бекітеді.

      Халықты жұмыспен қамту орталығы байланыс қызметі арқылы ұйымдарға өтінімдерді қарау нәтижесі туралы хабарлайды, өтінімді Еңбек биржасы арқылы алған жағдайда – хабарламаны жұмыс берушінің Еңбек биржасындағы жеке кабинетіне жібереді.

      10. Халықты жұмыспен қамту орталығы арнайы жұмыс орындарына жұмысқа орналасуды қалайтын мүгедектігі бар адамдарға осы Қағидаларға 2-қосымшаға сәйкес нысан бойынша мүгедектігі бар адамдарды жұмысқа орналастыру үшін құрылатын арнайы жұмыс орындарына жолдама береді.

      11. Арнайы жұмыс орындарын құратын жұмыс берушілерге субсидия беру халықты жұмыспен қамту орталығы мен жұмыс беруші арасында жасалған шартқа сәйкес жүзеге асырылады.

      Жұмыс берушінің өтінімі Еңбек биржасы арқылы алынған және мақұлданған жағдайда жұмыспен қамту орталығы бірінші басшысының немесе оның міндетін атқарушы адамның электрондық цифрлық қолтаңбасымен қол қойылған шартты жұмыс берушінің Еңбек биржасындағы жеке кабинетіне жібереді.

      Жұмыс беруші алған шартқа Еңбек биржасының жеке кабинетінде электрондық цифрлық қолтаңбасымен қол қойып, оны Еңбек биржасының жеке кабинеті арқылы жұмыспен қамту орталығына жолдайды.

      12. Мүгедектігі бар адам болып табылатын жұмыскер мен жұмыс беруші арасында Қазақстан Республикасының Еңбек кодексіне сәйкес еңбек шарты жасалады.

      13. Еңбек шарты тараптардың бірінің бастамасы бойынша бұзылған жағдайда жұмыс беруші халықты жұмыспен қамту орталығы арқылы мүгедектігі бар адам болып табылатын басқа жұмыскерді оның келісімі бойынша және құрылған арнайы жұмыс орнында жұмыс істеуге мүмкіндік беретін денсаулық жағдайына қарап қабылдайды.

      14. Халықты жұмыспен қамту орталығы:

      1) жұмысқа орналастырылған мүгедектігі бар адамдардың міндетті зейнетақы төлемдерінің болуына мониторинг жүргізеді;

      2) жұмыс берушілердің міндеттемелерді орындауына мониторингті жүзеге асыру үшін жұмыс берушіден қажетті ақпаратты, құжаттар мен материалдарды сұратады.

      15. Жұмыс беруші мүгедектігі бар адамдарды жұмысқа орналастыру үшін арнайы жұмыс орындарын жарақтандыру (жабдықтау) жұмыстарын орындағаннан кейін халықты жұмыспен қамту орталығына жасалған шартқа және бұдан бұрын ұсынылған шығыстар сметасына сәйкес орындалған жұмыстар актісін қол қою және субсидия алу үшін ұсынады не оған электрондық цифрлық қолтаңбасымен қол койып, Электрондық еңбек биржасының жеке кабинеті арқылы жолдайды.

      Жұмыспен қамту орталығы тексергеннен және орындалған жұмыстар актісіне қол қойғаннан кейін жұмыс беруші субсидия алады.

3-тарау. Арнайы жұмыс орындарын құратын жұмыс берушілерді субсидиялау шарттары

      ЗҚАИ-ның ескертпесі!
      16-тармақтың бірінші бөлігі жаңа редакцияда көзделген – ҚР Еңбек және халықты әлеуметтік қорғау министрінің 29.12.2022 № 537 (01.01.2023 бастап қолданысқа енгізіледі) бұйрығымен.

      16. Жұмыс берушілерге субсидиялар арнайы жұмыс орындарын жарақтандыру үшін құрал-жабдықты сатып алуға, монтаждауға және орнатуға кеткен шығындарды өтеу мақсатында беріледі.

      Жұмыс берушілерге субсидиялар уақытша жұмыс орындарын жарақтандыруға берілмейді.

      17. Жұмыс берушілерге субсидиялар олар мынадай шарттарды сақтаған кезде ұсынылады:

      1) құрылып жатқан арнайы жұмыс орындарының Қазақстан Республикасы Денсаулық сақтау және әлеуметтік даму министрінің 2016 жылғы 14 маусымдағы № 519 бұйрығымен (Нормативтік құқықтық актілерді мемлекеттік тіркеу тізілімінде № 13913 болып тіркелген) бекітілген Мүгедектігі бар адамның жұмыс орны стандарттарына сәйкес келуі;

      2) мүгедектігі бар адамдарды жұмысқа орналастыру және олардың жұмыспен қамтылуын тұрақты жұмыс орны құрылған сәттен бастап сақтау;

      3) жұмыс берушіде жалақы бойынша берешектің болмауы;

      4) есептелген салықтар, алымдар және бюджетке өзге де міндетті төлемдер бойынша берешектің болмауы;

      5) жұмыс берушінің құрылған арнайы жұмыс орындарында атқарып отырған лауазымына сәйкес мөлшерде жалақы төлеуін қамтамасыз етуі.

Өтінім

      Ескерту. 1-қосымша жаңа редакцияда – ҚР Еңбек және халықты әлеуметтік қорғау министрінің 14.09.2022 № 367 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) бұйрығымен.

      ________________________________________________________________________

      (ұйымның толық атауы, мекенжайы, бизнес-сәйкестендіру нөмірі (БСН) және

      жеке сейкестендіру нөмірі (ЖСН), байланыс жасайтын адамдар және телефондары)

      мүгедектігі бар адамдарды жұмысқа орналастыру үшін арнайы жұмыс орындары

      ұйымдастырылатын жұмыс берушілердің тізбесіне қосуды сұрайды.

      Мәселе оң шешiлген жағдайда мүгедектігі бар адамдар қатарындағы азаматтарға

      тiзбеге сәйкес мынадай арнайы жұмыс орындары ұсынылатын болады:

      Қосымша:

      1. Арнайы жұмыс орындарын жабдықтауға арналған шығыстар сметасы;

      2. Банкте шоттың бар-жоғы туралы анықтама.

      Басшы _____________ _________"Мөрдің орны (бар болса)" қолы күні

      Нысан

Мүгедектігі бар адамдарды жұмысқа орналастыру үшін құрылатын арнайы жұмыс орындарына
№ ______ жолдама

      Ескерту. 2-қосымша жаңа редакцияда – ҚР Еңбек және халықты әлеуметтік қорғау министрінің 14.09.2022 № 367 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) бұйрығымен.

      ___________________________________________________________________

      (тегі, аты, әкесінің аты (бар болса), жеке сәйкестендіру нөмірі)

      _____________________ бастап _____________________ дейін __________ ай мерзімге

      _________________________________________________________________________

      (жұмыс берушінің атауы, заңды мекенжайы, байланыс телефоны)

      __________________________________________________________________________

      (кәсіп/мамандық атауы)

      мамандығы (кәсібі) бойынша мүгедектігі бар адамдарды жұмысқа орналастыру үшін құрылатын арнайы жұмыс орнына жұмысқа орналасу үшін жіберіледі.

      ____________________________                   _____________________________

      Халықты жұмыспен қамту                               қолдың таратылып жазылуы

      орталығының директоры

      Берілген күні

      Мөрдің орны

      ---------------------------------------------------------------------------------------------------------------

      (кесу сызығы)

      Жұмысқа орналасу үшін жіберілген күннен бастап бес жұмыс күні ішінде Халықты жұмыспен қамту орталығына қайтарылады

      № ______ жолдамаға хабарлама

      __________________________________________________________________________

      _________________________________________________________________________

      (жұмыс берушінің атауы)

      20__ жылғы __ __________ № ______ жасалған еңбек шартына (20__ жылғы _______

      № __________ бұйрық) сәйкес мүгедектігі бар адамдарды жұмысқа орналастыру үшін

      құрылатын арнайы жұмыс орнына 20__ жылғы _______________

      _________________________________________________________________________

      (кәсіп/мамандық атауы)

      ретінде қабылданды.

      Жұмысқа орналасу мерзімі: ______ ай 20___ жылғы "___" ___________ бастап 20___

      жылғы "___" ___________ дейін

      Жұмысқа қабылдау туралы бұйрықтың көшірмесі қоса беріледі.

      Жұмыс берушінің жауапты өкілі

      _______________________________                   __________________________

      Тегі, аты, әкесінің аты (бар болса), лауазымы                         қолы

      Мөрдің орны (бар болса)