Ұйымдардың жұмыскерлері мен халықты өрт қауіпсіздігі шараларына оқыту қағидаларын және өрт қауіпсіздігі шараларына оқыту жөніндегі оқу бағдарламаларының мазмұнына қойылатын талаптарды бекіту туралы

      «Азаматтық қорғау туралы» Қазақстан Республикасының 2014 жылғы 11 сәуірдегі Заңының 12-бабы 1-тармағының 44) тармақшасына сәйкес БҰЙЫРАМЫН:
      1. Қоса беріліп отырған ұйымдардың жұмыскерлері мен халықты өрт қауіпсіздігі шараларына оқыту қағидалары және өрт қауіпсіздігі шараларына оқыту жөніндегі оқу бағдарламаларының мазмұнына қойылатын талаптар бекітілсін.
      2. Қазақстан Республикасы Төтенше жағдайлар министрлігінің Өртке қарсы қызмет комитеті (С.Ғ. Әубәкіров) заңнамада белгіленген тәртіппен:
      1) осы бұйрықтың Қазақстан Республикасы Әділет министрлігінде мемлекеттік тіркелуін;
      2) осы бұйрықты Қазақстан Республикасы Әділет министрлігінде мемлекеттік тіркегеннен кейін күнтізбелік он күн ішінде бұқаралық ақпарат құралдарында және «Әділет» ақпараттық-құқықтық жүйесінде ресми жариялауға жіберуді;
      3) осы бұйрықты Қазақстан Республикасы Төтенше жағдайлар министрлігінің интернет-ресурсында орналастыруды қамтамасыз етсін.
      3. «Ұйымдардың жұмыскерлерін өрт қауіпсіздігі шараларына оқыту бағдарламасының мазмұны мен қағидаларына қойылатын талаптарды бекіту туралы» Қазақстан Республикасы Төтенше жағдайлар министрінің 2011 жылғы 27 шілдедегі № 303 бұйрығының (Қазақстан Республикасының Әділет министрлігінде 2011 жылы 15 тамызда № 7132 тіркелген, 2011 жылғы 4 қазандағы № 474-478 (26870) «Егемен Қазақстан» газетінде жарияланған) күші жойылды деп танылсын.
      4. Осы бұйрықтың орындалуын бақылау Қазақстан Республикасының Төтенше жағдайлар вице-министрі Ж.А. Смаиловқа жүктелсін.
      5. Осы бұйрық алғашқы ресми жарияланған күнінен бастап күнтізбелік он күн өткен соң қолданысқа енгізіледі.

      Министр                                    В. Божко

Қазақстан Республикасы 
Төтенше жағдайлар министрінің
2014 жылғы 9 маусымдағы
№ 276 бұйрығымен    
бекітілген        

Ұйымдардың жұмыскерлері мен халықты өрт қауіпсіздігі шараларына
оқыту қағидаларын және өрт қауіпсіздігі шараларына оқыту
жөніндегі оқу бағдарламаларының мазмұнына қойылатын талаптар

      1. Ұйымдардың жұмыскерлері мен халықты өрт қауіпсіздігі шараларына оқыту қағидалары және өрт қауіпсіздігі шараларына оқыту жөніндегі оқу бағдарламаларының мазмұнына қойылатын талаптар (бұдан әрі – Қағидалар) ұйымдардың жұмыскерлері мен халықты өрт қауіпсіздігі шараларына оқыту тәртібін және өрт қауіпсіздігі шараларына оқыту жөніндегі оқу бағдарламаларының мазмұнына қойылатын талаптарды айқындайды.
      2. Өрт қауіпсіздігі шараларына оқытудан:
      1) халықтың нысаналы тобы (бұдан әрі – жұмыс істемейтін халық);
      2) өндіріс және қызмет көрсету саласында қызмет ететін халық (халыққа көрсетілетін тұрмыстық қызметтердің тұтас аясы) (бұдан әрі – жұмыс істейтін халық) өтеді.
      3. Жұмыс істемейтін халықты өрт қауіпсіздігі шараларына оқыту мыналарды:
      1) оқу кезінде «Өмір тіршілігінің қауіпсіздік негіздері» курсы шеңберінде тиісті бағдарламалар бойынша жалпы білім беру мекемелерінде оқу уақытында сабақтар өткізуді;
      2) жалпы білім беру мекемелерінде оқудан тыс кезде дәрістер, әңгімелесулер өткізуді, оқу фильмдерін қарау, өртке қарсы тақырыпта тақырыптық кештер, конкурстар, сұрақ-жауаптар өткізуді;
      3) жарылыс,-өрт қауіпті заттар мен материалдарды қолдануға байланысты, үй-жайларда адамдар жаппай болатын мәдени және спорттық іс-шаралар өткізуге байланысты сабақтар басталмас бұрын өртке қарсы нұсқаулықты;
      4) мемлекеттік өртке қарсы қызмет қызметкерлерінің әңгімелесулер, дәрістер өткізуді, оқу фильмдерін қарауды;
      5) халықты тұрғылықты жері бойынша оқулар мен жаттығуларға қатысу үшін тартуды;
      6) мемлекеттік органдардың ресми интернет ресурстарында ақпаратты, қоғамдық орындарда, теледидар және радиоарналарда әлеуметтік жарнаманы орналастыруды;
      7) қоғамдық орындарда, сондай-ақ адамдар көп жиналатын жерлерде билбордтарды, баннерлерді орнатуды, бейне және аудио сөз сөйлеулерді көрсетуді қамтиды.
      4. Халықты оқыту кезінде жылдың мезгілі мен ауа райының жағдайларына байланысты өрт қауіптілігінің өзгеруі ескеріледі.
      5. Күзгі-қысқы кезеңде оқу жылыту және жылу беру қондырғылары мен электр құралдарын пайдалану мәселелері бойынша жүргізіледі.
      6. Мемлекеттік өртке қарсы қызмет органдары жыл сайын жылу беру маусымы алдында елді мекендерде өрт қауіпсіздігі айлығын жүргізеді.
      7. Көктемгі кезеңде халықпен қоқысты, қалдықтарды және бос ыдысты жағу кезінде өрт қауіпсіздігі шараларын сақтау туралы әңгімелесулер мен нұсқаулықтар жүргізеді.
      8. Жазғы кезеңде орман және дала алқаптарындағы өрт қауіпсіздігі талаптары туралы нұсқаулықтар жүргізіледі.

Ұйымдардың жұмыскерлерін оқыту және өрт қауіпсіздігі шараларына
оқыту жөніндегі оқу бағдарламаларының мазмұнына қойылатын
талаптар

      9. Ұйымдарда жұмыс істейтін халықты оқыту өртке қарсы нұсқаулық және өрт-техникалық минимум түрінде жүзеге асырылады.
      10. Ұйымдарда өртке қарсы нұсқаулық жұмыскерлерге өрт қауіпсіздігінің негізгі талаптарын жеткізу, өндірістер және жабдықтың технологиялық процесстерінің өрт қауіптілігін, өртке қарсы қорғау құралдарын, сондай-ақ өрт шыққан жағдайда олардың әрекет етуін зерделеу мақсатында жүргізіледі.
      11. Өртке қарсы нұсқаулықты осы Қағидаларға 1-қосымшаға сәйкес Өртке қарсы нұсқаулықтың үлгілік бағдарламасы бойынша (бұдан әрі - Бағдарлама) ұйымның жұмыскерлері қатарынан өрт қауіпсіздігіне жауапты адам жүргізеді.
      Өртке қарсы нұсқаулық жүргізу кезінде ұйым қызметінің ерекшелігі ескеріледі.
      12. Өртке қарсы нұсқаулық ұйымның жұмыскерлерін:
      1) аумақты, ғимараттарды (құрылыстарды) және үй-жайларды, оның ішінде эвакуациялық жолдарды, сыртқы және ішкі су құбырын, өрт туралы хабарлау жүйелерін ұстау қағидаларымен және адамдарды эвакуациялау жөніндегі іс-шараларымен;
      2) өндірістер мен объектілердің технологиялық процесстерінің өрт қауіптілігі ерекшелігі негізінде өрт қауіпсіздігі талаптарымен;
      3) ғимараттарды (құрылыстарды), жабдықты пайдалану, өрт қауіпті жұмыстарды жүргізу кезінде өрт қауіпсіздігін қамтамасыз ету жөніндегі іс-шаралармен;
      4) ашық отты пайдалану және отпен байланысты жұмыстарды жүргізу қағидаларымен;
      5) жұмыскерлердің өрт кезіндегі міндеттерімен және іс-қимылдарымен;
      6) өрт сөндіру құралдарын және өрт автоматикасы қондырғыларын қолдану қағидаларымен таныстыруды қамтиды.
      13. Сипаты және өткізу уақыты бойынша өртке қарсы нұсқаулық: кіріспе, алғашқы, қайта, жоспардан тыс және мақсатты болып бөлінеді.
      14. Кіріспе, алғашқы, қайта, жоспардан тыс, мақсатты өртке қарсы нұсқаулықтарды жүргізу туралы осы Қағидаларға 2-қосымшаға сәйкес өрт қауіпсіздігі нұсқаулықтарын жүргізуді есепке алу журналында жазылады.
      15. Кіріспе өртке қарсы нұсқаулық:
      1) біліміне, кәсібі (лауазымы) бойынша жұмыс өтіліне қарамастан, жаңадан қабылданған барлық жұмыскерлермен;
      2) маусымдық жұмыскерлермен;
      3) өндірістік оқуға немесе практикаға келген оқытылатындармен және студенттермен жүргізіледі.
      16. Кіріспе өртке қарсы нұсқаулық техникалық регламенттердің, өрт қауіпсіздігі жөніндегі қағидалардың, нормалар мен нұсқаулықтардың талаптарын ескере отырып әзірленген бағдарлама бойынша жүргізіледі. Кіріспе өртке қарсы нұсқаулықты жүргізу бағдарламасы ұйым басшысының бұйрығымен (өкімімен) бекітіледі.
      17. Кіріспе өртке қарсы нұсқаулық ұйымда белгіленген өртке қарсы режимді сақтаудың жұмыскер алған дағдысы мен білімін тексерумен, өрт шыққан кездегі іс-қимылдарды практикалық жаттығумен және өрт сөндіру құралдары мен өртке қарсы қорғаныс жүйелерін білуін тексерумен аяқталады.
      18. Кіріспе нұсқаулықтан өтпеген адамдар қызметтік міндеттерін атқаруға жіберілмейді.
      19. Алғашқы өртке қарсы нұсқаулық өндірістік объектілерде, сақтау және сауда объектілерінде, сондай-ақ адамдар жаппай болатын объектілерінде тікелей жұмыс орнында жүзеге асырылады.
      20. Алғашқы өртке қарсы нұсқаулық:
      1) барлық жаңадан қабылданған жұмыскерлермен;
      2) осы ұйымның бір бөлімшесінен басқасына ауысқан жұмыскерлерімен;
      3) ауысқан жағдайда, жаңа жұмысты атқаратын жұмыскерлермен;
      4) маусымдық жұмыскерлермен;
      5) ұйым аумағында құрылыс-монтаждау және басқа да жұмысты орындайтын құрылыс саласының мамандарымен;
      7) өндірістік оқуға немесе практикаға келген оқытылатындармен және студенттермен жүргізіледі.
      21. Алғашқы өртке қарсы нұсқаулық алғашқы өрт сөндіру құралдарын пайдалануды, өрт шыққан кездегі іс-қимылдарды, эвакуациялау қағидаларын, зардап шеккендерге көмек көрсетуді практикалық көрсетіп және машықтап, әрбір жұмыскермен жеке-жеке жүргізіледі, сондай-ақ біртекті жабдыққа қызмет көрсететін адамдар тобымен және жалпы жұмыс орнының шегінде жүргізіледі.
      22. Қайта өртке қарсы нұсқаулық ұйым басшысы бекіткен сабақтарды өткізудің кестесіне сәйкес мынадай кезеңділікпен жылына кемінде 1 рет жүргізіледі:
      1) өндірістік объектілерде, сақтау және сауда объектілерінде, адамдар көп жиналатын объектілерде – жылына бір рет;
      2) адамдар көп жиналатын объектілерге жатпайтын қоғамдық ғимараттарда – 2 жылда бір рет.
      23. Қайта өртке қарсы нұсқаулық жеке немесе жалпы жұмыс орнының шегінде біртекті жабдыққа қызмет көрсететін адамдар тобымен жүргізіледі.
      24. Қайта өртке қарсы нұсқаулық барысында өрт қауіпсіздігі жөніндегі қағидаларды, нормаларды және нұсқаулықтарды білуі, алғашқы өрт сөндіру құралдарын пайдалана білуі, эвакуациялау жолдарын, өрт туралы хабарлау жүйелерін және адамдарды эвакуациялау жөніндегі іс шараларды білуі тексеріледі.
      25. Жоспардан тыс өртке қарсы нұсқаулық:
      1) өндірістің технологиялық процесін өзгеру, жабдықты, құралдарды, негізгі шикізатты, материалдарды ауыстыру немесе жаңғырту, сондай-ақ объектінің өртке қарсы жағдайына әсер ететін басқа да факторлардың өзгеру кезінде;
      2) ұйым жұмыскерлері өрттің шығуына әкелген немесе әкелуі мүмкін өрт қауіпсіздігі талаптарын бұзған кезде;
      3) өрт қауіпсіздігі саласындағы мемлекеттік бақылау лауазымды адамдары ұйымға өрт-техникалық тексеру барысында ұйымдардың жұмыскерлерінің жеткіліксіз білімін анықтағанда олардың ұйғарымы бойынша (тексеру нәтижелері туралы акт) өрт қауіпсіздігі шараларын қосымша зерделеу үшін;
      4) ұқсас өндірістерде, ғимараттар мен құрылыстарда шыққан өрттер туралы ақпараттық материалдар келіп түскен кезде;
      5) ұйымдардың жұмыскерлерінің өрт қауіпсіздігі талаптарын қанағаттанарлықсыз білу фактілері анықталған кезде жүргізіледі.
      26. Жоспардан тыс өртке қарсы нұсқаулықтың мазмұны әрбір нақты жағдайда оны өткізудің қажеттілігінен туындаған себептер мен жағдайларға байланысты анықталады.
      27. Мақсатты өртке қарсы нұсқаулық:
      1) жоғары өрт қауіптілігімен және басқа да отты жұмыстармен (ашық отты пайдаланатын, ұшқын түзетін, газ-ауа, бу-ауа және тозаң-ауа қоспаларының, өзге де жанғыш заттардың (электрмен және газбен дәнекерлеу, бензокесу, дәнекерлеу шамдарын, факелдерді, шілтерлерді пайдаланатын жұмыстар, битум қайнату және жылу мен ұшқын шығаратын басқа да жұмыстар) тұтануы (өздігінен тұтануы) мүмкін температураға дейін жабдықты, аспапты, материалдарды қыздыратын жұмыспен) байланысты бір реттік жұмыстарды орындау кезінде;
      2) төтенше жағдайлар салдарын жою кезінде;
      3) рұқсат-наряд рәсімделетін жұмыстарды жүргізу кезінде, жарылыс қауіпті өндірістерьде отты жұмыстарды жүргізу кезінде;
      4) ұйымдар мен өндірістерде экскурсиялар жүргізу кезінде;
      5) адамдар жаппай болатын іс-шараларды ұйымдастыруға дайындық кезінде жүргізіледі.
      28. Өрт қауіпсіздігі жөніндегі нұсқаулық пен сабақтар көрнекі құралдармен (қағидалар, нұсқаулықтар, плакаттар, өрт сөндіру құралдарының макеттері) жабдықталған үй-жайда өткізіледі.
      29. Өртке қарсы режим, ұйымның технологиялық процесі мен өндірісінің өрт қауіптілігі, сондай- ақ ұйымда өрт шыққан кездегі өрттің алдын алу, өрт кезінде адамдардың өмірін, денсаулығын және мүлкін сақтау бойынша практикалық дағдыларды машықтандыруға мүмкіндік беретін тәсілдер мен іс-қимылдар бөлігінде өрт қауіпсіздік саласындағы нормативтік құқықтық актілердің талаптарын білу көлемінде өрт-техникалық минимумге міндетті түрде оқытуға тізімі осы Қағидаларға 3-қосымшада келтірілген адамдар жатады.
      30. Қызмет бағытына қарамастан, ұйымдардың басшыларын, мамандары мен жұмыскерлерін оқыту жұмысқа қабылдағаннан кейін бір ай ішінде және кейіннен соңғы оқытудан өткен күнінен бастап 3 жылда кемінде бір рет өткізіледі.
      31. Өрт-техникалық минимумын оқыту өндірістен қол үзіп және өндірістен қол үзбей ұйымдастырады.
      32. Мамандандырылған оқу орталықтарында өндірістен қол үзіп өрт-техникалық минимумын оқытудан:
      1) өндірістік объектілер мен А, Б, В жарылыс-өрт және өрт қауіптілігі бойынша өндіріс санаттарындағы сақтау объектілерінің, адамдар жаппай болатын объектілердің басшылары мен өрт қауіпсіздігіне жауапты адамдар;
      2) өндірістік объектілер мен А, Б, В жарылыс-өрт және өрт қауіптілігі бойынша өндіріс санаттарындағы сақтау объектілерінің жұмыскерлері;
      3) газ-электрлік дәнекерлеу және басқа да отты жұмыстарды жүргізетін жұмыскерлер өтеді.
      33. Өрт-техникалық минимум бағдарламасы бойынша оқытуды тікелей ұйымда ұйым басшысы немесе мамандандырылған оқу орталықтарында оқудан өткен, өрт қауіпсіздігін қамтамасыз етуге жауапты адам жүргізеді.
      34. Өрт-техникалық минимумын оқыту аяқталғаннан кейін кемінде үш адамнан құрылған біліктілік комиссиясы өрт қауіпсіздігі талаптарын білуге тексеріс жүргізеді.
      35. Өндірістен қол үзу арқылы оқудан өткен жұмыскерлердің білімін тексеруді жүзеге асыратын біліктілік комиссиясының құрамына азаматтық қорғау саласындағы уәкілетті органның аумақтық бөлімшесімен келісім бойынша өрт қауіпсіздігі саласындағы мемлекеттік инспектор енгізіледі.
      36. Білімдерді тексеру нәтижелері осы Қағидаларға 4-қосымшаға сәйкес хаттамамен рәсімделеді.
      37. Білімдерін тексеруден өткен адамдарға осы Қағидаларға 5-қосымшаға сәйкес біліктілік куәлігі беріледі.
      38. Өрт қауіпсіздігі шараларына оқыту жөніндегі оқыту бағдарламасы кәсіби қызмет ерекшелігін, лауазымы бойынша міндеттерді атқару ерекшеліктерін және салалық құжаттардың ережелерін ескере отырып, оқытылатындардың әр санаты үшін жасалады. Өрт-техникалық минимуміне оқыту сағатының санын атқарылатын жұмыс сипатына байланысты ұйым басшысы белгілейді және осы Қағидаларға 6-қосымшада көрсетілген сағат санынан кем болмауы тиіс.

Ұйымдардың жұмыскерлері мен  
халықты өрт қауіпсіздігі шараларына
оқыту қағидаларына және өрт қауіпсіздігі
шараларына оқыту жөніндегі оқу 
бағдарламаларының мазмұнына  
қойылатын талаптарға     
1-қосымша            

Өртке қарсы нұсқаулықтың үлгілік бағдарламасы

      1. Өрт және жарылыс қауіптілігі бойынша ұйымның (өндірістің) ерекшелігі туралы жалпы мәліметтер.
      2. Жұмыскерлердің міндеттері және олардың өрт қауіпсіздігі талаптарын сақтаулары үшін жауапкершілігі.
      3. Ұйымдағы өртке қарсы режиммен таныстыру.
      4. Өртке қарсы режимді сақтау жөніндегі бұйрықтармен, өрт қауіпсіздігі жөніндегі нұсқаулықтармен таныстыру.
      5. Өрттің алдын алу және оны сөндіру бойынша жалпы шаралар:
      құрылымдық бөлімшелердің, цехтердің, учаскелердің басшылары үшін (гидранттар мен ішкі өрт крандарын тексеру және сынау, өрт сөндіргіштерді, автоматты өрт сөндіру және дабыл құралдарын зарядтау мерзімдері, цех немесе учаске персоналын алғашқы нұсқаулықтан өткізу бағдарламасымен таныстыру, жеке және ұжымдық қауіпсіздікті қамтамасыз ету және т.б.);
      жұмыскерлер үшін (жану немесе өрт кезіндегі іс-әрекеттер, өрт туралы өрт сөндіру бөліміне және тікелей басшыға хабарлау, жануды немесе сөндіру тәсілдері мен құралдары, жеке және ұжымдық қауіпсіздік шаралары, объектіде белгіленген өртке қарсы режимді білу және сақтау).
      6. Алғашқы өрт сөндіру құралдары, гидранттары, су қоры мен құм, көшіру жолдары мен шығу жолдары орналасқан орындармен танысу (көшіру жоспарына сәйкес). Тиісті үй-жайлар мен аумақтарды аралау.
      7. Қолданылатын шикізаттың, материалдардың және дайындалатын өнімнің өрт қауіпті қасиеттері. Технологиялық үдерістің өрт қауіптілігі.
      8. Өрт сөндіргіштердің түрлері және оларды өрттің класына (жанғыш заттың түріне, жабдықтың ерекшелігіне) байланысты қолдану.
      9. Электр қондырғылары мен өндірістік жабдықты сөндіру кезіндегі талаптар. Өрт кезінде және көшіру жолында қою түтіндеген кезде нұсқаулықтан өтушінің іс-әрекет жасауы.
      10. Өрт туралы хабарлау тәсілдері. Өрт шыққан кезде жеке қауіпсіздік шаралары. Зардап шеккендерге дәрігерге дейін көмек көрсету тәсілдері.

Ұйымдардың жұмыскерлері мен  
халықты өрт қауіпсіздігі шараларына
оқыту қағидаларына және өрт қауіпсіздігі
шараларына оқыту жөніндегі   
оқу бағдарламаларының мазмұнына
қойылатын талаптарға    
2-қосымша           

(бет жағы)

(ұйымның атауы)

Өрт қауіпсіздігі бойынша нұсқаулықтар өткізуді есепке алу
№ ___журналы

Журналды жүргізуді бастаған күні 20__ ж. «___» _____
Журнал жүргізуді аяқтаған күні 20__ ж. «___» _______

(ішкі жағы)

      Ескертпе:
      - өрт қауіпсіздігі жөніндегі нұсқаулықтарды өткізуді есепке алу журналы нұсқаулықтардың барлық түрлеріне немесе ұйым басшысының шешімі бойынша нұсқаулықтың әр түрі үшін бөлек ресімделеді;
      - егер бұйрық бойынша нұсқаулықтарды өткізуге ұйымның немесе объектінің бір қызметкері жауапты болса, еңбекті қорғау мен қауіпсіздік техникасымен біргебір журналда өрт қауіпсіздігі жөніндегі нұсқаулықтардың барлық түрлерін өткізуге жол беріледі.

Ұйымдардың жұмыскерлері мен 
халықты өрт қауіпсіздігі шараларына
оқыту қағидаларына және өрт  
қауіпсіздігі шараларына оқыту
жөніндегі оқу бағдарламаларының
мазмұнына қойылатын талаптарға
3-қосымша        

Өрт-техникалық минимумге міндетті оқытылатын
жұмыскерлер тізбесі

      1. Ұйымдардың басшылары, өрт қауіпті өндірістері бар өндірістік объектілердің өрт қауіпсіздігі және өртке қарсы нұсқаулық өткізуге жауапты адамдар.
      2. Өрт қауіпті жұмыстарды (желіммен, мастикалармен, битумдермен, полимерлермен және өзге де жанғыш материалдармен; газбен дәнекерлеу жұмыстары, электрмен дәнекерлеу жұмыстары, металл кесу, қыздыру жұмыстары және т.б.) жүзеге асыратын жұмыскерлер.
      3. Өрт қауіпсіздігіне жауапты ауыл шаруашылығы ұйымдарының басшылары мен жұмыскерлері.
      4. Жаңадан салынып жатқан және қайта құрылып жатқан объектілердің өрт қауіпсіздігіне жауапты адамдары.
      5. Мектепке дейінгі, жалпы білім беру және жоғары оқу орындарының өрт қауіпсіздігіне жауапты адамдар мен басшылар.
      6. Адамдар жаппай жиналатын объектілердің (тұрмыстық мақсаттағы, сауда, қоғамдық тамақтану, емдеу, театр, ойын-сауық және мәдени-ағарту ұйымдарының, кеңсе мекемелерінің) өрт қауіпсіздігіне жауапты адамдары мен басшылары.
      7. Электриктер.
      8. Ұйымдарды күзетуді жүзеге асыратын жұмыскерлер.
      9. Автожанармай құю станцияларының жұмыскерлері.
      9. Пәтер иелері кооперативтерінің өрт қауіпсіздігіне жауапты адамдары мен басшылар.

Ұйымдардың жұмыскерлері мен  
халықты өрт қауіпсіздігі шараларына
оқыту қағидаларына және өрт қауіпсіздігі
шараларына оқыту жөніндегі  
оқу бағдарламаларының мазмұнына
қойылатын талаптарға   
4-қосымша         

Өрт-техникалық минимумы көлемінде өрт қауіпсіздігі бойынша
білімдерді тексеру жөніндегі біліктілік комиссиясы отырысының
№ ___ хаттамасы

____________________________________________
(ұйымның толық атауы)

____________________________________«___» _____ 20__ ж.
№ ___ бұйрығына (өкіміне) сәйкес біліктілік комиссиясы мынадай құрамда:
төраға _________________________________________________
             (тегі, аты, әкесінің аты, лауазымы)
мүшелері:
1. __________________________________________________________________
           (тегі, аты, әкесінің аты, лауазымы)
2. __________________________________________________________________
3. __________________________________________________________________
4. __________________________________________________________________
«___» _____ 20__ ж. өрт-техникалық минимумы көлемінде өрт
қауіпсіздігі білімін тексеріп, мынадай нәтижелерді анықтады:

Комиссия төрағасы ___________________________________________________
                  (тегі, аты, әкесінің аты, лауазымы)
Комиссия мүшелері:
1. __________________________________________________________________
                   (тегі, аты, әкесінің аты, лауазымы)
2. __________________________________________________________________
3. __________________________________________________________________
4. __________________________________________________________________
М.О. «___» _____ 20__ ж.

Ұйымдардың жұмыскерлері мен 
халықты өрт қауіпсіздігі шараларына
оқыту қағидаларына және өрт  
қауіпсіздігі шараларына оқыту
жөніндегі оқу бағдарламаларының
мазмұнына қойылатын талаптарға
5-қосымша          

(оң жағы)

Өрт-техникалық минимум көлемінде
өрт қауіпсіздігі саласында білімдерді тексеру бойынша
біліктілік куәлігі

(ішкі беті, сол жағы)

_______________________________________
(ұйымның толық атауы)

Өрт-техникалық минимум бойынша
№ ___ біліктілік куәлігі

______________________________________________________________берілді
          (төрағаның қолы, тегі, аты, әкесінің аты)

Лауазымы ____________________________________________________________
Жұмыс орны __________________________________________________________

М.О.
(беру күні, берген ұйымның атауы және басшының қолы)

                           (ішкі беті, оң жағы және келесі беттері)

Білімін тексеру туралы мәліметтер

Ұйымдардың жұмыскерлері мен     
халықты өрт қауіпсіздігі шараларына 
оқыту қағидаларына және өрт қауіпсіздігі
шараларына оқыту жөніндегі оқу    
бағдарламаларының мазмұнына қойылатын
талаптарға              
6-қосымша              

Өрт қауіпті өндірістері бар өндірістік объектілердің өрт
қауіпсіздігі және өртке қарсы нұсқаулық өткізу үшін
жауапты ұйымдардың басшыларына арналған
өрт-техникалық минимум Тақырыптық жоспар мен үлгілік оқу бағдарламасы

1-тақырып. Өрт қауіпсіздігі саласындағы заңнамалық база
Негізгі ережелер

      Өрт қауіпсіздігі саласындағы негізгі нормативтік құқықтық актілерді зерделеу. Өрт қауіпсіздігін қамтамасыз ету үшін лауазымды адамдардың құқықтары, міндеттері, жауаптылығы, өрт қауіпсіздігі ережелері мен нормаларын бұзғаны және орындамағаны үшін әкімшілік-құқықтық әсер ету түрлері.

2-тақырып. Заттар мен материалдардың жану және өрт шығу, жарылу
қауіптілігі, ғимараттардың өрт қауіптілігі туралы жалпы
ұғымдар

      Жану туралы жалпы мәліметтер. Заттар мен материалдардың жарылыс, өрт қауіпті қасиеттерін сипаттайтын көрсеткіштер. Үй-жайларды, ғимараттарды, құрылыстар мен технологиялық үдерістерді өрт, жарылыс қауіптілігі бойынша санатқа бөлу және жіктеу. Құрылыс материалдарын жану топтары бойынша жіктеу. Отқа төзімділік шегі мен жалынның таралу шегі туралы ұғым. Ғимараттар мен құрылыстардың отқа төзімділік дәрежесі туралы ұғым. Құрылымдарды оттан қорғау тәсілдері.

3-тақырып. Ұйымдағы өрт қауіптілігі

      Өндірістің өрт қауіптілігін реттейтін негізгі нормативтік құжаттар. Жылу беру және желдету жүйелерінің өрт қауіптілігі. Жылу беру және желдету жүйелерін орнату кезіндегі өрт қауіпсіздігі шаралары.
      Өрттің электр тогынан шығу себептері және олардың алдын алу шаралары. Жарылыс қауіпті және өрт қауіпті аймақтарды жіктеу. Найзағайдың тікелей соққысы мен оның қайта көрініс беруінің өрт қауіптілігі. Ғимараттар мен құрылыстарды найзағайдан қорғау құралдарының санаттары. Найзағайдан қорғағыштарды орнату жөніндегі негізгі ережелер. Статикалық электр және оның өрт қауіптілігі. Алдын алу шаралары.

4-тақырып. Өрт қауіпті жұмыс жүргізу, заттар мен материалдарды
сақтау кезіндегі өрт қауіпсіздігі шаралары

      Отпен байланысты жұмыстардың түрлері және олардың өрт қауіптілігі. Тұрақты және уақытша отпен байланысты жұмыстар жүргізу бекеттері. Отпен байланысты жұмыстарды жүргізуге адамдарды жіберу тәртібі және олардың жүргізілуін бақылау. Жарылыс, өрт қауіпті үй-жайларда электрмен, газбен дәнекерлеу жұмыстарын, сондай-ақ өзге де отпен байланысты жұмыстарды жүргізу кезінде өрт қауіптілігінің ерекшеліктері.
      ТТС, ЖС, ЖГ өрт қауіпті қасиеттері. Жалпы объектілік қоймаларда, ашық алаңдарда, цехтің таратушы қоймаларында ТТС, ЖС, ЖГ сақтау кезінде өрт қауіпсіздігі шаралары. Жұмыс орындарында, сырлау және өзге де өрт қауіпті жұмыстарды жүргізу кезінде ТТС, ЖС, ЖГ қолданудағы өрт қауіпсіздігі шаралары. ТТС, ЖС, ЖГ тасымалдау кезіндегі өрт қауіпсіздігі шаралары.

5-тақырып. Көшіру жолдарына қойылатын өрт қауіпсіздігі талаптары

      Көшіру жолдары. Көшіру жолдары мен көшіретін шығу жолдарын анықтау. Көшіру жолдарына қойылатын өрт қауіпсіздігі талаптары. Көшіру жолдарының түтіндеуін болдырмайтын іс-шаралар. Пайдаланудағы объектілерде өрт шыққан жағдайда көшіру жоспары. Өрт кезінде адамдарды көшіру туралы шұғыл хабарлау жүйесі. Адамдарды көшіру бойынша жаттығулар ұйымдастыру.

6-тақырып. Ұйымдағы өрттен қорғау жүйелері туралы жалпы мәліметтер

      Алғашқы өрт сөндіру құралдары. Өрт сөндіргіштерді орнату, тактикалық-техникалық сипаттамасы және пайдалану ережесі.
      Сыртқы және ішкі сумен жабдықтау, мақсаты, құрылғысы. Өрт крандары, орналастыру және оларды бақылау. Өрт кезінде қолдану ережесі.
      Автоматты өрт сөндіру және дабыл жүйелерінің мақсаты, қолдану саласы. Өрт дабылы, өрт хабарлағыштары станцияларын жіктеу, негізгі параметрлері. Монтаждау және пайдалану ережелері. Техникалық қызмет көрсету және жүйелердің жұмыс қабілеттілігін бақылау. Сумен, көбікпен, газбен және ұнтақпен өрт сөндіру жүйелерінің жұмыс істеу қағидалары, құрылғысы.
      Түтіннен қорғау қондырғыларының мақсаты, түрлері, негізгі элементтері. Түтіннен қорғау жүйелеріне қойылатын нормалар мен ережелердің талаптары. Түтіннен қорғау жүйелерін пайдалану және тексеру.

7-тақырып. Ұйымда өрт қауіпсіздігін қамтамасыз етудің
ұйымдастырушылық негіздері

      Өрт-техникалық комиссия. Жұмыскерлерге өрт қауіпсіздігі шараларын оқыту. Өртке қарсы нұсқаулық және өрт-техникалық минимум. Өрт қауіпсіздігі шаралары туралы нұсқаулық. Өртке қарсы іс-шараларды әзірлеу тәртібі. Ұйым жұмыскерлерімен практикалық сабақтар. Өртке қарсы насихаттау. Өрт қауіпсіздігі бұрыштары.
      «Өртке қарсы режим» терминінің ұғымы. Объект аумағындағы, жертөле және шатыр үй-жайларындағы өртке қарсы режим, үй-жайларды ұстау.

8-тақырып. Өрт кезінде жұмыскерлердің іс-әрекеттері

      Өрттің дамуының жалпы сипаты мен ерекшеліктері. Өрт туралы хабарлау тәртібі. Өрт сөндіру бөлімшелері келгенге дейін от қауіпті және бағалы заттар мен материалдарды сөндіруді ұйымдастыру, адамдарды көшіру. Өрт сөндіру бөлімшелерін қарсы алу. Өрттің таралуынан алдын алу шаралары. Өрт сөндіру бөлімшелері келгеннен кейінгі іс-шаралар.

9-тақырып. Практикалық сабақтар

      Модельді өрт ошағында өрт сөндіргіштермен практикалық түрде таныстыру және жұмыс істеу. Өрт кранын қолдану бойынша жаттығу. Өрттен қорғау жүйелерімен практикалық түрде таныстыру. Адамдарды көшіру бойынша жаттығулар.

Өрт қауіпті жұмыстарды жүзеге асыратын жұмыскерлерге арналған
өрт-техникалық минимум Тақырыптық жоспар мен үлгілік оқу бағдарламасы

      1-тақырып. Өрт қауіпті жұмыстарды жүргізу кезінде өрт
қауіпсіздігі талаптарын реттейтін негізгі нормативтік құжаттар

      Өрт қауіпсіздігі саласындағы негізгі нормативтік құқықтық актілерді зерделеу. Отпен байланысты жұмыстарды жүргізу кезіндегі объектілік нұсқаулықтар, бұйрықтар, ұйым басшысының өкімдері.

      2-тақырып. Өрт қауіпті жұмыстарды жүргізу түрлері мен тәртібі. Заттар мен материалдардың өрт қауіптілігі

      Газбен, электрмен дәнекерлеу және қыздыру жұмыстары, металл кесу, желіммен, шайырмен, битуммен, полимермен және өзге де жанғыш материалдармен жұмыс істеу. Оларды жүргізу тәртібі. Жұмыстардың өрт қауіптілігі және олардың өрт қауіптілігінің ерекшеліктері.

      3-тақырып. Өрттің шығу себептері, алдын алу шаралары

      Газбен, электрмен дәнекерлеу жұмыстарын жүргізу кезіндегі өрттің негізгі себептері: жұмыс істеу ережесін бұзу, газбен, электрмен дәнекерлеу жабдығының ақаулығы, жұмыс аяқталғаннан кейін жұмыс орындарын бақылаудың болмауы. Отпен байланысты жұмыстарды жүргізуге дайындау, жүргізу, жұмыс орындарын бақылау, сондай-ақ оларды аяқтау үдерісінде өрттің алдын алу шаралары.

      4-тақырып. Жарылыс, өрт қауіпті объектілер мен қондырғыларда отпен байланысты жұмыстарды жүргізу кезіндегі өрт қауіптілігі ерекшеліктері

      ТТС, ЖС және ЖГ босатылған сыйымдылықтарда оларды алдын ала дайындамай, жұмыс істеу кезінде қысыммен жұмыс істейтін қондырғыларда отпен байланысты жұмыстарды жүргізу. Жарылыс қауіпті және жарылу, өрт шығу қаупі бар бөлімшелерде отпен байланысты жұмыстарды жүргізу тәртібі.

      5-тақырып. Газбен дәнекерлеу және электрмен дәнекерлеу жұмыстары

      Жұмыс істеу кезінде қолданылатын газдардың өрт қауіптілігі. Сығылған және сұйытылған газдарға арналған баллондармен жұмыс істеу ерекшеліктері. Кальций карбидін тасымалдау кезіндегі оның қасиеттері, сақтау және қолдану ережесі. Ацетилен генераторы, аппараттарға қойылатын негізгі талаптар. Ацетилен аппараттары мен газ баллондарының орналасу орындары, оларды ашық оттан және басқа да жылу көздерінен қорғау. Газ өткізу шлангілерін сынау және тексеру тәртібі. Электрмен дәнекерлеу аппараттары, аппараттарға қойылатын негізгі талаптар. Техникалық қызмет көрсету, жоспарлы алдын ала жөндеу.Дәнекерлеу аппараттарын іске қосу, кабельдерді қосу. Дәнекерлеу кезінде қолданылатын электродтар, қосқыш құрылғыларға қойылатын талаптар.

      6-тақырып. Өртке қарсы жабдық пен құрал-сайман, өрт кезінде пайдалану тәртібі

      Өртке қарсы жабдық пен құрал-сайман түрлері және қолданылу саласы. Мақсаты мен құрылғысы. Алғашқы өрт сөндіру құралдары. Мақсаты, техникалық сипаты, жұмыс тәртібі және олардың орналасу орны. Сумен жабдықтау көздері. Ішкі өрт крандары.

      7-тақырып. Өрт кезіндегі іс-әрекеттер

      Өрт туралы хабарлау тәртібі. Өрт сөндіру бөлімшелері келгенге дейін өрт сөндіру тәсілдері. Өрттің таралуынан алдын алу шаралары. Көшіру жолдары мен тәртібі, көшіру жоспары. Өрт сөндіру бөлімшелері келгеннен кейін жұмыскерлердің іс-қимылдары (жең желілерін төсеуге көмектесу, материалдық құндылықтарды көшіруге қатысу және өрт сөндіру жетекшісінің өкімі бойынша өзге де жұмыстарды орындау). Тұрғын үй секторындағы өрт қауіпсіздігі. Тұрғын үйде өрт шыққан кездегі іс-әрекеттер.

      8-тақырып. Практикалық сабақтар

      Модельді өрт ошағында өрт сөндіргіштермен практикалық түрде таныстыру және жұмыс істеу. Түтін, жану, өрт байқалған кезде іс-қимылдарды машықтау. Ұйымнан көшіру бойынша практикалық сабақтар.

      Сынақ. Өрт-техникалық минимумы білімін тексеру

Ұйымдарды күзетуді жүзеге асыратын жұмыскерлерге арналған
өрт-техникалық минимум Тақырыптық жоспар мен үлгілік оқу бағдарламасы

      1-тақырып. Ғимараттар мен үй-жайларға қойылатын талаптар

      Қазақстан Республикасындағы өрт қауіпсіздігі ережелері. Өрт қауіпсіздігі жөніндегі нұсқаулықтар. Ғимараттардың көлемдік-жоспарлау және құрылымдық шешімдері. Өртке қарсы режим. Көшіру жоспары. Көшіру жолдары мен көшіретін шығу жолдары.

      2-тақырып. Техникалық өрт сөндіру құралдары, өртке қарсы құрал-сайман

      Алғашқы өрт сөндіру құралдары. Өрт сөндіргіштерді жіктеу, қолдану саласы, мақсаты, қолдану ережесі, орналасу орны. Ішкі өртке қарсы су құбырының, өрт крандарының мақсаты мен құрылғысы, орналасу орны. Автоматты өрт дабылы (АӨДҚ) және өрт сөндіру (АӨСҚ) қондырғылары; ұйымда орналастыру сызбасы. АӨДҚ мен АӨСҚ жұмыс істеген кездегі әрекеті. Өрт жабдығы мен құрал-саймандарының түрлері, мақсаты, құрылғысы мен орналасу орны.

      3-тақырып. Өрт кезіндегі іс-әрекеттер

      Өрттің өршуінің жалпы сипаты мен ерекшеліктері. Өрт туралы хабарлау тәртібі. Өрт сөндіру бөлімшелері келгенге дейін өртті сөндіру. Өрт сөндіру бөлімшелері келгеннен кейінгі іс-әрекеттер.

      4-тақырып. Практикалық сабақтар

      Модельді өрт ошағында өрт сөндіргіштермен практикалық түрде таныстыру және жұмыс істеу. Өрт кранын қолдану бойынша жаттығу.

      Сынақ. Өрт-техникалық минимумы білімін тексеру

Ауыл шаруашылығы ұйымдарының басшыларына және өрт
қауіпсіздігіне жауапты адамдарға арналған өрт-техникалық минимум

      Тақырыптық жоспар мен үлгілік оқу бағдарламасы

      1-тақырып. Кіріспе. Өрт қауіпсіздігі талаптарын реттейтін негізгі нормативтік құжаттар

      Ауыл шаруашылығы объектілеріндегі өрттердің статистикасы. Өрттердің себептері. Ауыл шаруашылығы объектілерінің өрт қауіптілігі. Ұйымдардың, шаруа қожалықтарының, бөлімшелердің, шеберханалардың, гараждардың, базалардың және өзге де объектілердің басшыларының міндеттері және өрт қауіпсіздігін қамтамасыз ету үшін жауаптылығы. Аумақтарды, ғимараттарды, үй-жайларды ұстауға, электр желілерін, электр қондырғыларын, жылу беру, желдету жүйелерін және жылу бөлу қондырғыларын монтаждау мен пайдалануға қойылатын жалпы талаптар. Өрт қауіпсіздігі саласындағы негізгі нормативтік құқықтық актілерді зерделеу. Өрт қауіпсіздігі жөніндегі нұсқаулықтар.

      2-тақырып. Ауыл шаруашылығы өндірісі объектілері мен фермерлік шаруашылықтарда өрт қауіпсіздігін қамтамасыз ету жөніндегі ұйымдастырушылық іс-шаралар

      Өрттің алдын алудың негізгі міндеттері. Өртке қарсы режим, анықтамасы, мақсаты мен оны белгілеу тәртібі. Ауыл шаруашылығы өндірісі объектілерінде, шаруа қожалықтарында және елді мекендерде жалпы ұйымдастырушылық өрттің алдын алу іс-шаралары.

      3-тақырып. Ауыл шаруашылығы объектілері мен аумақтарындағы өрт қауіпсіздігі талаптар

      Мал өсіру және құс өсіру фермаларында, зертханаларда, жөндеу шеберханаларында, гараждарда, техника сақтау орындарында, ағаш өңдеу шеберханаларында, ТТС, ЖС және ЖГ қоймаларында, материал қоймаларында, астық қоймаларында, астық кептіргіштерде, құрама жем қоймаларында, химиялық заттар қоймаларында, газ баллондарын сақтау орындарында өрт қауіпсіздігі талаптары. Астық дақылдарын жинау, жемдерді дайындау кезіндегі өрт қауіпсіздігі шаралары. Отпен байланысты және жөндеу, монтаждау жұмыстарына қойылатын өрт қауіпсіздігі ережелерінің арнайы талаптары. Ауылдық жерлердегі тұрғын үй және әкімшілік ғимараттардың өрт қауіптілігі ерекшеліктері. Аумақтарды, ғимараттарды, әкімшілік үй-жайларды ұстауға қойылатын негізгі өрт қауіпсіздігі талаптары. Отпен байланысты жұмыстарды жүргізуді ұйымдастыру, техникалық қызмет көрсетуді қамтамасыз ету және өрт, жарылыс қауіпті инженерлік-техникалық құрылғыларды дұрыс пайдалану тәртібі.

      4-тақырып. Ауыл шаруашылығы объектілеріндегі өрттен қорғау

      Алғашқы өрт сөндіру құралдары, олардың мақсаты, құрылғысы, техникалық сипаттамалары мен пайдалану ережесі. Өртке қарсы сумен жабдықтау және оның түрлері. Өрт сөндіретін су айдындарын орнату ережесі. Ауыл шаруашылығы объектілерін байланыспен, дабылмен және өрт сөндіру құралдарымен қамтамасыз ету.

      5-тақырып. Ауыл шаруашылығы өндірісі объектілері мен фермерлік шаруашылықтарда жұмыскерлермен өрт-техникалық минимум бағдарламасы бойынша сабақтар өткізу әдістемесі

      Өртке қарсы нұсқаулық пен өрт-техникалық минимум. Өрт-техникалық минимум бағдарламасының мазмұны. Жоспар конспектісін, сыныпты, көрнекі оқу құралдарын және техникалық оқыту құралдарын дайындау. Бағдарламаның әр тақырыбы бойынша сабақ өткізу әдістемесі.

      6-тақырып.

      Ұйым (шаруа қожалықтарының) басшыларының, өртті жою бойынша тұрғындар мен ауылдық жердегі жұмысшылардың өрт-техникалық жаттығуы. Өрт жеңдерін төсеу. Су көзінен су беру. Өрт сөндіргішпен жұмыс істеу. Өртке қарсы қызметті шақырту.

Сынақ. Өрт-техникалық минимумы білімін тексеру Жаңадан салынып және қайта құрылып жатқан
объектілердегі өрт қауіпсіздігіне жауапкершілік атқаратын
тұлғаларға арналған өрт-техникалық минимум Тақырыптық жоспар және үлгілік оқу бағдарламасы

      1-тақырып. Өрт қауіпсіздігі талаптарын реттейтін негізгі нормативтік құжаттар

      Өрт қауіпсіздігі саласында негізгі нормативтік құқықтық актілерді оқып білу. Өрт қауіпсіздігін қамтамасыз ету жөнінде жауапкершілік атқаратын лауазымды тұлғалардың құқықтары, міндеттері, жауапкершілігі.

      2-тақырып. Жаңадан салынып және қайта құрылып жатқан объектілерде өрт қауіпсіздігін қамтамасыз ету жөніндегі ұйымдастыру іс-шаралары

      Құрылыс объектілеріндегі сипатты өрттердің қысқаша талдауы. Өрт сөндіру профилактикасының негізгі міндеттері. Өрт қауіпсіздігіне жауапкершілік атқаратын тұлғалардың міндеттері. Жаңадан салынып және құрылып жатқан объектілерде, құрылыс алаңдарымен қосалқы қожалықтарда өртке қарсы тәртіпті орнату және ұстау жөніндегі негізгі ұйымдастыру іс-шаралары.
      Бөлек құрылыс учаскелерінің, корпус, цехтер, қоймалар, шеберханалардың өрт қауіпсіздігіне жауапкершілік. Өндірісте және тұрмыста өрт қауіпсіздігі шараларына жұмыскерлерді үйрету. Өрт-техникалық комиссияның жұмысын құру және ұйымдастыру.

      3-тақырып. Жаңадан салынып жатқан және қайта құрылып жатқан объектілердегі өрт қауіпсіздігі шаралары

      Ауданның, облыстың құрылыс объектілерінде аса кең таралған себептерден болған өрттер мен тұтануларды талдау. Электр желілерін, электр жабдығын, электрмен жылыту және электрлі жарық беру құралдарын пайдаланудағы өрт қауіпсіздігі шаралары. Электрлік асырмалы жүктемелердің, қысқа тұйықталулардың, күрделі ауыспалы қарсылықтардың мәні мен пайда болу себептері. Қыздыру шамдарының өрт қауіптілігі. Электр құрылғыларын қысқа тұйықталу және асырмалы жүктемелерден қорғау шаралары. Автоматты және иілмелі сақтандырғыштар. Жылыту және қыздыру құралдарын, желдеткіш құрылғыларын пайдалану кезіндегі өрт қауіпсіздігі шаралары. Отпен жұмыстар жүргізгенде, ашық отты қолдану кезіндегі өрт қауіпсіздігі шаралары. Жаңа құрылыстар мен қайта құрылып жатқан жатқан объектілердегі өрт қауіпсіздігі ерекшеліктері. Құрылыс алаңдарын ұстау (орман материалдарын, ағаш қалдықтарын сақтау тәртібі, уақытша қызметтік, тұрмыстық, қойма, және басқа үй-жайларды орналастыру). Тұрмыстық үй-жайларда, арнайы киім кептіргіштерінде және үй-жайларды кептіруге арналған уақытша пештерді, электр құрылғыларын, жылу генераторларын пайдалану кезінде өрт қауіпсіздігі. Құрылыс ағаштарына қойылатын талаптар. Ғимараттарға, құрылыстарға, су көздеріне, өрт сөндіру гидранттары аумақтарын, жолдарын, кіреберістерін ұстау және қатты, сұйық және газ тәрізді отында жұмыс істейтін пештерді, каминдерді, пайдаланғанда өрт сөндіру құралдарына жету, сондай-ақ ТТС жұмыс істеу. Эвакуациялау жолдарына өрт қауіпсіздігі ережелерінің талаптары.

      4-тақырып. Алғашқы өрт сөндіру құралдары. Өрт болғанда жұмыскерлердің әрекеттері.

      Өрт сөндіргіштердің мақсаты, құрылыс және әрекет ету принципі. Оларды пайдалану және оларды тұтануды немесе өртті сөндіруде қолдану ережелері. Ішкі өрт сөндіру шүмектерінің мақсаты, құрылысы, жабдықталуы; оларды пайдалану ережелері. Өрт сөндіру қалқандары және олардың жабдықталуы. Өрт сөндіруге өрт сөндіру құрал-сайманын және қосалқы құралдарды пайдалану ережелері. Жаңа құрылыстар мен қайта құрылып жатқан ғимараттарды өрт сөндіру құралдарымен қамтамасыз ету нормалары. Өрт пайда болғанда жұмыскерлердің әрекеттері: өрт сөндіру көмегін шақыру, қолда бар құралдармен сөндіру, өрт орнына келген өрт сөндіру бөлімшесін күтіп алу және олармен еріп жүру. Өртеніп жатқан үй-жайлардан адамдар мен мүлікті эвакуациялауды ұйымдастыру және оның тәртібі.

      5-тақырып. Практикалық сабақтар

      Өрт сөндіргішпен жұмыс істеу.

Сынақ. Өрт-техникалық минимум білімдерін тексеру

Мектепке дейінгі мекемелерде және жалпы білім беру
мектептерінде өрт қауіпсіздігіне жауапкершілік атқаратын
тұлғалар мен басшыларға арналған өрт-техникалық минимумы Тақырыптық жоспар және үлгілік оқу бағдарламасы

      1-тақырып. Өрт қауіпсіздігі талаптарын реттейтін негізгі нормативтік құжаттар

      Өрт қауіпсіздігі саласында негізгі нормативтік құқықтық актілерді оқып білу. Өрт қауіпсіздігі ережелерінің сақталуына ұйымдардың жетекшілерінің құқықтары, міндеттері, жауапкершіліктері.

      2-тақырып. Мектепке дейінгі және жалпы білім беру мектептеріндегі өрт қауіпсіздігі шаралары

      Өрттер мен тұтанулардың негізгі себептерінің қысқаша талдауы. Электр желілерін, электрлік жабдықты және электрмен жылыту құралдарын пайдалану кезіндегі өрт қауіпсіздігі шаралары. Қысқа тұйықталу, асқын жүктеме, ауыспалы қарсылық, ұшқындау, олардың мәні, пайда болу себептері мен жол бермеу тәсілдері. Өрт қауіпті сұйықтықтарды сақтау және олармен жұмыс істеу тәртібі. ТТС мен ЖС өрт қауіптілігін анықтайтын негізгі факторлар: жарқ ету температурасы, өздігінен тұтану және тұтану. Жарылыс жайлы түсінік. ТТС мен ЖС сақтау орындарына қойылатын талаптар. Өрт қауіпті сұйықтықтарды қабылдау, беру және қолдану кезіндегі өртке қарсы тәртіп. Химиялық реактивтер мен сілті металлдарын пайдаланғанда оларды сақтау және өрт қауіпсіздігі шаралары. Ғимараттардағы өртке қарсы тәртіп. Эвакуациялау жолдарын ұстау. Сыныптарда парталардың, үстелдердің және орындықтардың орналасуы. Кіру орындарын, шығу орындарын, холлдарды, коридорларды, саты алаңын, сондай-ақ шатырдағы бөлмелерді, жер төле үй-жайларының, оқу-өндірістік шеберханаларын, химия және физика кабинеттерін ұстау. Эвакуациялау жоспарларын әзірлеу. Қызмет көрсету персоналына нұсқамалық беру. Сауықтыру кезеңінде балаларды жоғары қабатты ғимараттар мен көп қабатты үйлерге орналастыру тәртібі.
      Балалар мекемелерінде, мектеп-интернаттарындағы кезекшілер мен күзетшілер. Оларға нұсқамалық беру. Өрт пайда болған жағдайда өрт қауіпсіздігін сақтау жөнінде міндеттер. Жаңа жылғы шырша орнатқанда, кино көруді, кештер мен спектакльдерді ұйымдастыру кезінде қойылатын талаптар. Шыршаларды орнату және бекіту ережелері. Адамдардың жаппай болатын үй-жайларға қойылатын талаптар.
      Жаппай іс-шараларды өткізу жауапкершілігі, кезекшілердің мақсаты мен міндеттері.

      3-тақырып. Өрттерді сөндіру құралдары. Оларды қолдану ережелері. Өрт кезіндегі әрекеттер және өрт сөндіру күзетін шақырту

      Өрт сөндіргіштердің мақсаты. Көмір қышқылды, ұнтақты және аэрозоль өрт сөндіргіштердің құрылысы мен жұмыс істеу принципі туралы түсінік. Оларды пайдалану және өрт сөндіруде қолдану ережелері.
      Алғашқы өрт сөндіру құралдарының (құм, түрлі жабындар, суы бар бөшкелер мен шелектер, өрт сөндіру құрал-сайманы) және ішкі өрт сөндіру шүмектерінің мақсаты. Оларды пайдалану ережелері.
      Өртте қызмет көрсету персоналының әрекеттері. Өрттерде үй-жайлардың ішінен балаларды және мүлікті эвакуациялауды ұйымдастыру және оның тәртібі.

      4-тақырып. Практикалық сабақтар

      Эвакуацияны өткізуді жаттықтыру. Өрт сөндіргішпен жұмыс істеу.

      Сынақ. Өрт-техникалық минимум білімдерін тексеру

Адамдар жаппай жиналатын объектілердің басшылары мен өрт
қауіпсіздігі үшін жауапты адамдарға арналған өрт-техникалық
минимум Тақырыптық жоспар және үлгілік оқу бағдарламасы

      1-тақырып. Өрт қауіпсіздігі талаптарын реттейтін негізгі нормативтік құжаттар

      Өрт қауіпсіздігі саласында негізгі нормативтік құқықтық актілерді оқып білу. Өрт қауіпсіздігін қамтамасыз етуге жауапкершілік атқаратын лауазымды тұлғалардың құқықтары, міндеттері, жауапкершілігі.

      2-тақырып. Сауда және қоғамдық тамақтану, базаларда, қоймаларда өрт қауіпсіздігін қамтамасыз ету жөніндегі іс-шараларды ұйымдастыру

      Сауда және қоғамдық тамақтану ұйымдарында, базаларда, қоймаларда өрттер мен тұтанулардың негізгі себептерінің қысқаша талдауы. Өндірістік, әкімшілік, қойма және қосалқы үй-жайларында қатаң өртке қарсы режимді орнату және ұстау жөнінде негізгі ұйымдастырушылық іс-шаралар. Ведомстволық бағыныстағы объектілердің (учаскелердің) өртке қарсы жағдайына жауапкершілік атқаратын лауазымды тұлғалардың міндеттері мен жауапкершіліктері. Өрт-техникалық комиссияның жұмысын құру және ұйымдастыру. Қызметкерлерге өндірісте және тұрмыста өрт қауіпсіздігі шараларын үйрету. Адамдарды және материалдық құндылықтарды эвакуациялау жоспарын, өрттерде қызмет көрсету персоналының әрекеттері жоспарын, объектідегі (учаскедегі) өрт қауіпсіздігі шаралары туралы нұсқаулық.

      3-тақырып. Сауда, қоғамдық тамақтану ұйымдарында, базалар мен қоймаларда ғимараттарды, құрылыстарды пайдалануда өрт қауіпсіздігі ережелерінің талаптарын

      Өрт қауіпсіздігі ережелерінің жалпы талаптары: аумақтарды, ғимараттарды, үй-жайларды, жылыту, желдеткіш, түтін жою, дабыл және өрт сөндіру жүйелерін ұстау. Электр қондырғыларының өрт қауіптілігі. Жөндеу және от жұмыстарын жүргізуде өртке қарсы тәртіп.
      Азық-түлік тауарларын сату ұйымдарында, азық-түлік қоймалары мен базаларында өрт қауіпсіздігі шаралары. Өрт қауіптілігі бар азық-түлік тауарларының қысқаша өрт сипаттамасы: өсімдік, мал және синтетикалық майлар, спирт арақ өнімдері, шөп, сіріңке және т.б. Сақтау мен сату кезінде өрт қауіпсіздігі шаралары. Мұздату қондырғылары мен электр қозғалтқыштары бар механизмдерді пайдаланғанда өрт қауіпсіздігі шаралары.
      Базаларда, қоймаларда, дүкендерде және басқа да өнеркәсіптік тауарларды сату ұйымдарында өрт қауіпсіздігі шаралары. ТТС, ЖС және ЖГ сақтау мен сату кезінде өрт қауіпсіздігі шаралары және қысқаша сипаттама. Еденге арналған мастика, тұрмыстық химия тауарлары, парфюмерлік өнімдерінің, оқ-дәрілердің, пистондардың және т.б. өрт қауіптілігі. Сауда залдары мен қосалқы үй-жайларда, қоймалар мен базаларда өртке қарсы тәртіп.
      Қоғамдық тамақтану ұйымдарында өрт қауіпсіздігі шаралары. Түскі ас залдарында, цехтерде, қоймаларда, қойма, тұрмыстық және қосалқы үй-жайларда өрт қауіпсіздігі шаралары. Дәнекерлеу пештерін, қайнатқыштарды, мұздатқыш қондырғыларды, ас үй плиталары мен жабдықтарын пайдалануда өртке қарсы іс-шаралар. Жаппай іс-шараларды жүргізу кезіндегі өрт қауіпсіздігі шаралары. Аумақтарды, ғимараттарды, гараждарды, шаруашылық құрылыстар мен эвакуациялау жолдарын ұстауға өрт қауіпсіздігі ережелерінің талаптары. Жылыту және қыздыру құралдарын, электр қондырғыларын, радио және теледидарларды, сондай-ақ ТТС, ЖС мен ЖГ ұсатуда және сақтауда өрт қауіпсіздігі ережелері. Өрттерді табу, хабарландыру және сөндіру құралдары.

      4-тақырып. Алғашқы өрт сөндіру құралдары, өрттегі әрекеттер

      Өрт сөндіргіштердің мақсаты, құрылысы және қолдану ережелері. Ұйымдарды, базаларды, қоймаларды алғашқы өрт сөндіру құралдарымен қамтамасыз ету нормалары. Автоматты жүйелер: өрт туралы хабарлау, түтін жою және өрт сөндіру. Ішкі өрт сөндіру шүмектерінің құрылысы мен пайдалану ережелері. Өрт (тұтану) пайда болған жағдайда қызметкерлердің қолда бар өрт сөндіру құралдарымен жасайтын әрекеттері. Өрт сөндіру бөлімшелерінің күтіп алу және оларға еріп жүру. Адамдар мен мүлікті эвакуациялауды ұйымдастыру және оның тәртібі.

      5-тақырып. Практикалық сабақтар

      Персоналды эвакуациялауды ұйымдастыру. Өрт сөндіргішпен жұмыс істеу.

Сынақ. Өрт-техникалық минимумы білімдерін тексеру Кәсіпорын иелері кооперативтерінің басшылары мен өрт
қауіпсіздігі үшін жауапты адамдарға арналған өрт-техникалық
минимум Тақырыптық жоспар және үлгілік оқу бағдарламасы

      1-тақырып. Өрт қауіпсіздігі талаптарын реттейтін негізгі нормативтік құжаттар

      Өрт қауіпсіздігі саласында негізгі нормативтік құқықтық актілерді оқып білу. Өрт қауіпсіздігін қамтамасыз ету жөнінде жауапкершілік атқаратын лауазымды тұлғалардың құқықтары, міндеттері, жауапкершілігі.

      2-тақырып. Тұрғын үйдегі ұйымдастырушылық өртке қарсы іс-шаралар

      Қоғамдық ғимараттарда болған өрттерді қысқаша шолу. Кеңселерде болған аса сипатты өрттердің үлгілері. Олардың талдауы мен себептері. Өрт қауіпсіздігі шараларын жүзеге асыру жөніндегі мекеме басшыларының міндеттері. Өртке қарсы тәртіпті орнату жөніндегі негізгі ұйымдастыру іс-шаралар. Қызметкерлерді жұмыс орындарында өрт қауіпсіздігі шараларына үйрету және өрт пайда болған жағдайда олардың әрекеттері. Мекемелерде өрт-техникалық комиссияларын құру, олардың міндеттері мен тәжірибелік қызметі.

      3-тақырып. Алғашқы өрт сөндіру құралдары, автоматты өрт дабылы мен өрт сөндіру қондырғылары. Өрт кезіндегі әрекеттер және өртке қарсы қызметін шақырту.

      Алғашқы өрт сөндіру құралдары және тұтану кезінде оларды пайдалану. Автоматты өрт дабылы мен өрт сөндіру қондырғылары. Көмір қышқылды, ұнтақты және аэрозоль өрт сөндіргіштердің мақсаты мен жұмыс істеу принципі. Ішкі өрт сөндіру шүмектерінің мақсаты мен пайдалану ережелері. Өрт сөндіруде алғашқы өрт сөндіру құралдары мен өрт сөндіру құрал-саймандарын қолдану. Мекемелерді өрт сөндіру құралдарымен қамтамасыз ету нормалары. Өрт кезінде жұмыскерлердің әрекеттері. Өрт сөндіру бөлімшелерін шақырту және өрт орнына оларға ілесіп бару. Қабаттылығы жоғары және адамдар жаппай болатын үй-жайларда эвакуациялауды жүргізу тәртібі. Қалын түтін басқан жағдайдағы әрекеттер. Үрей жағдайдың алдын алу жөніндегі әрекеттер. Өртте зардап шеккендерге алғашқы көмек көрсету.

      4-тақырып. Практикалық сабақ

      Персоналды эвакуациялау жөніндегі жаттығуларды ұйымдастыру. Өрт сөндіргішпен жұмыс істеу.

      Сынақ. Өрт-техникалық минимум білімдерін тексеру.