Қазақстан Республикасының 2003 жылғы 8 шілдедегі Орман кодексінің 15 бабына, "Мемлекеттік орман қоры участкілеріндегі қылқан жапырақтылар мен сексеуіл екпелерінде басты мақсатта пайдалану үшін ағаш кесуге тыйым салу және оларды сақтау жөніндегі шаралар туралы" Қазақстан Республикасы Үкіметінің 2004 жылғы 23 сәуірдегі N 460 қаулысына сәйкес және қылқан жапырақтылар мен сексеуіл екпелерінің қурауына жол бермеу, сондай-ақ ормандарды заңсыз ағаш кесуден қорғауды күшейту мақсатында облыс әкімияты ҚАУЛЫ ЕТЕДІ:
      1. Ақтөбе облысының мемлекеттік орман қорындағы участкелерінде басты мақсатта пайдалану үшін қылқан жапырақтылар мен сексеуіл ағаштарын кесуге (Ақтөбе, Ұлы-Борсық, Мәртөк, Темір, Ойыл орман шаруашылықтарында) 10 жылға тыйым салынсын.
      2. Аудандардың әкімдері, Ақтөбе облыстық орман және аңшылық шаруашылық аумақтық басқармасы (М.Г.Аязбаев), орман шаруашылығы мемлекеттік мекемелеріне (М.І.Сартов, И.Көмекбаев, Р.Ш.Мифтахутдинов, А.С.Зирбаев, Ж.Мағауияұлы) заңда бекітілген тәртіппен:
      1) осы қаулының 1-тармағын орындау үшін қажетті шаралар қабылдансын;
      2) мемлекеттік орман қоры участкелерінде ағаштар мен бұта тұқымдарын плантацияда өсіру жөніндегі, сондай-ақ жеке меншік орман өсіру үшін жеке және мемлекеттік емес заңды тұлғаларға жер участкелерін беру жұмыстарын ұйымдастырсын;
      3) жыл сайын 5 маусымға және 5 қаңтарға "Ақтөбе облыстық ауыл шаруашылығы департаменті" мемлекеттік мекемесі ормандарды заңсыз ағаш кесуден қорғау жөнінде қолданылған шаралар және ағаштар мен бұта тұқымдарын плантацияда өсіру туралы ақпарат берсін;
      4) ормандарды заңсыз ағаш кесуден қорғау жөніндегі шаралардың орындалуын бақылауды және құрылып жатқан ағаштар мен бұта тұқымдары плантацияларын есепке алынуын ұйымдастырсын.
      3. Осы қаулының орындалуын бақылау облыс әкімінің орынбасары Ә.Н.Қартовқа жүктелсін.

Облыс Әкімі