Қазақстан Республикасы әлеуметтік-экономикалық саясатының бiрiншi кезектегi шараларының 2014 жылға арналған жол картасын және оны іске асыру жөніндегі іс-шаралар жоспарын бекіту туралы

      Елдің экономикалық өсу тұрақтылығын қамтамасыз ету мақсатында Қазақстан Республикасының Үкіметі ҚАУЛЫ ЕТЕДІ:
      1. Қоса беріліп отырған:
      1) Әлеуметтік-экономикалық саясаттың бiрiншi кезектегi шараларының 2014 жылға арналған жол картасы (бұдан әрі – Жол картасы);
      2) Жол картасын іске асыру жөніндегі іс-шаралар жоспары (бұдан әрі – Іс-шаралар жоспары) бекітілсін.
      2. Қазақстан Республикасының мемлекеттік органдары мен өзге де ұйымдары:
      1) Іс-шаралар жоспарында көзделген іс-шаралардың уақтылы орындалуын қамтамасыз етсін;
      2) Қазақстан Республикасы Экономика және бюджеттік жоспарлау министрлігіне тоқсан сайын, есепті тоқсаннан кейінгі айдың 5-күніне дейін Іс-шаралар жоспарының орындалуы туралы ақпарат берсін.
      3. Қазақстан Республикасы Экономика және бюджеттік жоспарлау министрлігіне тоқсан сайын, есепті тоқсаннан кейінгі айдың 15-күніне дейін Қазақстан Республикасының Үкіметіне Іс-шаралар жоспарының орындалуы туралы жиынтық ақпарат берсін.
      4. Осы қаулы қол қойылған күнінен бастап қолданысқа енгізіледі.

      Қазақстан Республикасының
      Премьер-Министрі                              К. Мәсімов

Қазақстан Республикасы  
  Үкіметінің         
2014 жылғы 14 сәуірдегі
№ 355 қаулысымен    
бекітілген      

Қазақстан Республикасының әлеуметтік-экономикалық саясатының
2014 жылға арналған бiрiншi кезектегi шараларының жол картасы

I. 2014 жылы экономиканы дамытудың ішкі және сыртқы тәуекелдері

      Ағымдағы жылы әлемдік экономикада даму тұрақсыздығы сақталуда. Қазақстанның Ресей Федерациясы мен Қытай сияқты саудадағы негізгі әріптес елдерінде экономикалық өсу қарқынының төмендеуі болжануда.
      Сұраныстың төмендеуі мұнай-газ саласы, өнеркәсіп пен ауыл шаруашылығындағы өндірістің өсуіне, сондай-ақ отандық өнімдер мен көрсетілетін қызметтер экспортына кері әсерін тигізеді.
      Халықтың төлемге қабілетті сұранысының, жеке инвестициялардың, кәсіпкерлік белсенділіктің өсуіндегі байқалып отырған бәсеңдеу, сондай-ақ банк секторындағы проблемалы кредиттердің жоғары деңгейі ішкі өсу көздерін тежейді.
      2014 жылдың қаңтар-наурыз айларында жалпы ішкі өнімнің (бұдан әрі – ЖІӨ) өсуі өткен жылдың осыған ұқсас кезеңіндегі 4,7 %-бен салыстырғанда, 2,9 %-ға дейін баяулады. Бұл ретте инфляциялық процестердің шамалы өскені байқалуда. 2014 жылдың басынан бері инфляция деңгейі 2013 жылғы 1,9 %-ға қарағанда, наурыз айының соңында 3,3 %-ды құрады.
      Сондай-ақ негізгі капиталға инвестициялардың өсуіндегі бәсеңдеу негізгі қауіп болып табылады. Ағымдағы жылдың қаңтар-ақпан айларында өткен жылдың осыған ұқсас кезеңіндегі 8,5 %-бен салыстырғанда, инвестициялардың өсуі 1,9 %-ды құрады. Негізгі себеп өңдеуші өнеркәсіпке инвестициялардың төмендеуімен байланысты.
      Банк секторындағы жұмыс істемейтін және проблемалы кредиттердің едәуір көлемін экономиканы кредиттеу тежеп отыр. Сонымен қатар, несиелік қоржын құрылымында кредиттік ресурстар берудің өсуінде дамып келе жатқан теңгерімсіздікті атап өту қажет. «Тұтынушылық кредит беру көпіршігі» де тез дамып келеді, 2013 жылы тұтынушылық қарыздар 55,0 %-ға өсті.
      Бүгінде табиғи монополиялардың барлық салаларының жағдайы негізгі құралдардың айтарлықтай тозуымен (орташа есеппен алғанда 62 %) және тиісінше ауқымды инвестициялық салымдар қажеттігімен сипатталады.
      Сыртқы тәуекелдер айтарлықтай өсіп отыр.
      Қазақстанның негізгі сауда әріптестері – Ресей мен Қытайда экономикалық өсу қарқынының төмендеуі – сауда-экономикалық ынтымақтастықтың төмендеуіне, Қазақстанның сауда және төлем теңгерімінің нашарлауына алып келуі мүмкін.
      Ресейдің Еуропа елдерімен сауда-экономикалық қатынастарының нашарлауына байланысты, ресейлік тауарлардың экспортын қазақстандық дәстүрлі өткізу нарықтарына қайта бағдарлау мен сыртқы нарықтарда отандық тауарлар үшін бәсекелестіктің күшею қаупі орын алуы ықтимал.
      Импорттық арналардың шектелу ықтималдығына байланысты, ЕО және АҚШ елдерінен келетін заманауи технологиялардың, жабдықтардың және тауарлар мен көрсетілетін қызметтердің Ресейден, Қытайдан және басқа да елдерден келетін импортпен алмастырылатын ағыны күрделенетін болады. Бұл маңызды бағдардамаларды, атап айтқанда, индустриялық-инновациялық даму және агроөнеркәсіптік кешенді дамыту бағдарламаларын іске асыруға кері әсерін тигізуі мүмкін.
      Осыған байланысты жаңа өткізу нарықтары мен жаңа көлік бағдарларын іздестіруді жандандырып, Қазақстанның барлық негізгі тауарлық позициялары бойынша әлемнің басқа елдерімен және өңірлерімен сауданы кеңейту қажет.
      Еуроаймақта жұмыссыздық пен борыштың жоғары деңгейіне, сондай-ақ АҚШ-та сандық жұмсарту бағдарламасының қысқаруына байланысты жүйелік қауіптер сақталып отыр.

II. Мақсаты мен міндеттері

      Қазақстан Республикасында экономикалық өсудің тұрақтылығын қамтамасыз ету осы Әлеуметтік-экономикалық саясаттың 2014 жылға арналған бiрiншi кезектегi шаралары жол картасының мақсаты болып табылады.
      Экономикадағы өсу қарқынының төмендеуіне жол бермеу мақсатында мынадай міндеттерді шешу қажет:
      1) экономикалық өсуді ынталандыру және экономиканың нақты секторына қолдау көрсету;
      2) шағын және орта бизнесті (бұдан әрі – ШОБ) қолдау және одан әрі орнықты кредит беруді қамтамасыз ету;
      3) банк секторын сауықтыру және экономикаға кредит беруді, оның ішінде Бірыңғай жинақтаушы зейнетақы қорының (бұдан әрі – БЖЗҚ) қаражатын тарту арқылы кредит беруді кеңейту;
      4) жекешелендірудің екінші толқынын жүргізуді, тариф саясатын реформалауды, көлеңкелі экономиканы азайтуды қоса алғанда, жеке секторды кеңейту және жаңа инвестициялар тарту үшін экономикадағы құрылымдық реформалар шеңберінде шаралар топтамасын іске асыру.
      Жоғарыда көрсетілген міндеттерді іске асыру үшін бірқатар қаржылық және бағдарламалық құралдар көзделген.
      Мемлекет басшысының бастамасы бойынша экономикаға қолдау көрсету және экономикаға кредит беруді кеңейту үшін 2014 – 2015 жылдарға арналған Ұлттық қордан 1 трлн. теңге бөлінетін болады.
      2014 жылы 500 млрд. теңге бөлінеді, олар 100 млрд. теңге сомада ШОБ-ты қолдау мен кредиттеуге, 250 млрд. теңге – банк секторын сауықтыруға, 150 млрд. теңге – Үдемелі индустриялық-инновациялық даму жөніндегі 2015 – 2019 жылдарға арналған мемлекеттік бағдарламаны (бұдан әрі –ҮИИДМБ-2) іске асыруға бағытталатын болады.
      Бұдан басқа Қазақстан Республикасы Үкіметінің резерві бар, ол қазіргі уақытта 95 млрд. теңгені құрайды. Бұл қаражат, қажет болған жағдайда, дағдарысқа қарсы сипаттағы міндеттерді шешу үшін қосымша пайдаланылатын болады.
      «Жұмыспен қамтудың 2020 жылға дейінгі жол картасы» бағдарламасы (бұдан әрі - Бағдарлама) жұмыспен қамтудың өсуін ынталандыру мен қолдаудың маңызды құралы болып табылады, оны 2014 жылы 97,7 млрд. теңге көлемінде қаржыландыру көзделген. Бағдарлама көлік және әлеуметтік инфрақұрылым объектілерін салу, кредиттер беру, аз қамтылған, жұмыссыз және өзін-өзі жұмыспен қамтыған халықты оқыту және жұмысқа орналастыру арқылы дағдарысқа қарсы ден қою тетіктерін қамтиды.

III. Бiрiншi кезектегi шаралар жол картасын іске асыру бойынша іс-қимылдар стратегиясы

      1. Макроэкономикалық тұрақтылықты қамтамасыз ету

      Ұлттық валюта бағамына жүргізілген түзетуден кейін, инфляциялық процестерді жоспарланған дәлізде ұстап тұру үшін инфляцияның өсуін тежейтін шаралар қабылданатын болады:
      1) жергілікті атқарушы органдардың өтініштері бойынша әлеуметтік маңызы бар азық-түлік тауарларына бөлшек сауда бағаларының шекті жол берілетін мөлшерін бекіту;
      2) өндірістік сипаттағы стратегиялық тауарлар (көмір, газ, мазут, дизель отыны) бағасының негізсіз өсуіне жол берілмеуін қамтамасыз ету;
      3) негізгі азық-түлік тауарларының тапшылығына жол бермеу үшін тұрақтандыру қорлары ресурстарының тиімді пайдаланылуын қамтамасыз ету.

      2. Экономикалық өсуді ынталандыру және экономиканың нақты секторына қолдау көрсету

      Экономиканы әртараптандыру мен жаңғырту Қазақстан Республикасы Үкіметі жұмысының негізгі басымдығы болып қала береді:
      1) экономиканы әртараптандыру мен жаңғыртуды қамтамасыз ету үшін ағымдағы жылғы 1 шілдеге дейін ҮИИДМБ-2 қабылданатын болады.
      2) ҮИИДМБ-2 қаржылық қамтамасыз ету мақсатында 2014 жылы индустриялық және инфрақұрылымдық жобаларды іске асыру үшін 150 млрд. теңге бөлінетін болады.
      Бұл қаражат Мемлекет басшысы ҮИИДМБ-2 бекітіп, қаржыландыруға ұсынылатын жобалар тізбесі айқындалғаннан кейін бөлінетін болады. Осы мақсаттарда 2014 жылғы 1 маусымға дейін әлеуетті индустриялық жобалардың тізбесі қалыптастырылатын болады.
      Қазіргі уақытта нарық тарапынан ағымдағы сұранысты көрсететін 519 млрд. теңге сомаға «Қазақстанның Даму Банкі» АҚ перспективалы жобаларының әлеуетті тізбесі бар.
      Экономиканың өсу қарқынын төмендетуге жол бермеу және іскерлік белсенділікті арттыру мақсатында экспортты және сауда әріптестерін әртараптандыру бойынша шаралар қабылданатын болады.
      Иранға қатысты экономикалық санкциялардың алынып тасталуына байланысты, Иран нарығына мұнай-газ және металлургия өнеркәсібінің, ауыл шаруашылығы өнімдерінің экспортын қайта бағдарлау мүмкіндігі бар:
      1) Қазақстандық өнімдерді Оңтүстік-Шығыс Азия, Таяу Шығыс, Орталық Азия елдеріне жеткізуге арналған қолданыстағы экспорттық келісімшарттарды сақтау, жаңа келісімшарттар іздестіру және жасасу, сондай-ақ ішкі нарықта жүйе түзуші кәсіпорындардың өнімдерін тұтынуды ұлғайту бойынша жұмыс жүргізілетін болады;
      2) Иран нарығына шығарылатын өнімдер экспортын ұлғайту үшін Үкімет Қазақстан Республикасы Ұлттық Банкімен (бұдан әрі – Ұлттық Банк) бірлесіп, экспорттық келісімшарттар бойынша қытай юанымен төленетін төлемдерді дамыту бойынша жұмысты жалғастыратын болады;
      3) 2014 жылғы 1 маусымға дейін тау-кен металлургия кешені өнімдерінің экспортын ынталандыру мақсатында Ақтау теңіз порты арқылы батыс бағытта, сондай-ақ Қытайға тасымалдауды жүзеге асыратын экспорттаушы-кәсіпорындардың теміржол тарифтеріне жеңілдіктер ұсыну тетіктері пысықталатын болады;
      4) 2014 жылғы 1 маусымға дейін қолданыстағы заңнама шеңберінде рентабельділігі төмен, аз дебетті, суланған және тұтқырлығы жоғары кен орындары үшін, оның ішінде «Қазақмыс» және «Қазақстан алюминийі» компанияларының кен орындары үшін пайдалы қазбаларды өндіруге төмендетілген салық мөлшерлемесін ұсыну бойынша жұмыс жүргізіледі.
      5) 2014 жылы 2,4 млн. тонна көлемінде жоспарланған мұнайдың Қашаған кен орнында коммерциялық өндіруге шықпай қалу қауіпі бар. Осыған байланысты мұнай өндірудің жоспарланған көлемін қамтамасыз ету үшін ірі жер қойнауын пайдаланушылардың басқа кен орындарында мұнай өндіруін кемінде 1,5 млн. тоннаға ұлғайту және экспорттау бойынша жұмыстар жүргізілетін болады;
      6) 2014 жылғы 1 мамырға дейін Қазақстан Республикасының Үкіметіне құрамында алтын бар шикізатты (Доре қорытпасы, катодты және шлихті алтын, зергерлік сынықтар) Қазақстан Республикасының аумағынан әкетуге тыйым салуды енгізу жөнінде ұсыныстар енгізілетін болады;
      7) 2014 жылғы 1 шілдеге дейін индустриялық жобаларды және өнеркәсіптік инфрақұрылым жобаларын қаржыландыру үшін Ұлттық қордың қаражатын тарту үшін «Бәйтерек» ҰБХ» АҚ облигациялары шығарылатын болады.

      3. Шағын және орта бизнесті дамыту және жұмыспен қамтуды қамтамасыз ету

      ШОБ жобаларын қолжетімді және ұзақ мерзімді негізде қаржы ресурстарымен қамтамасыз ету үшін 2014 жылы 100 млрд. теңге бөлінетін болады.
      «Бәйтерек» ұлттық басқарушы холдингі» АҚ 2014 жылғы 20 сәуірге дейін шағын және орта бизнес субъектілеріне уақтылы жеткізу үшін екінші деңгейдегі банктерге қаражатты орналастыруға кіріседі.
      Өңдеу өнеркәсібіндегі ШОБ жобаларын қаржыландыру, бұрын қабылданған ШОБ-ты мемлекеттік қолдау бағдарламаларына қатыспаған, қарыз алушылардың қолданыстағы қарызын қайта қаржыландыру үшін «Даму» кәсіпкерлікті дамыту қоры» АҚ кредиттерін екінші деңгейдегі банктерде (бұдан әрі – ЕДБ) шартты түрде орналастыру үшін қаражат қайтарымды негізде бөлінетін болады.
      Бөлінетін қаражаттың 50 %-ы бұрын берілген кредиттерді қайта қаржыландыруға, 50 % жаңа жобаларды қаржыландыруға бағытталатын болады. Жаңа жобалар пулының кемінде 50 %-ы тамақ өнеркәсібі жобаларын мақсатты қаржыландыру үшін көзделеді.
      «Бәйтерек» ҰБХ» АҚ ШОБ субъектілері жобаларының пулын көп қамту үшін 2014 жылғы 1 шілдеге дейін капитал нарығына 30 млрд. теңгеге дейінгі сомада қаржы қаражатын қосымша тарту мәселесін пысықтайтын болады.
      2014 жылғы 15 сәуірге дейін Үкімет Қазақстан Республикасының Ұлттық Банкімен бірлесіп, Қазақстан Республикасы Үкіметі мен Қазақстан Республикасы Ұлттық Банкінің өңдеу өнеркәсібіндегі шағын және орта кәсіпкерлік жобаларын қаржыландыруды қамтамасыз ету жөніндегі бірлескен іс-қимыл жоспары қабылданатын болады.
      2014 жылғы 1 маусымға дейін ШОБ субъектілерінің қаржылық тұрақтылығын арттыру үшін 2013 жылғы 1 қаңтардағы жағдай бойынша салық органдарында есепте тұрған, бірақ 2014 жылғы 1 қаңтарға төленбеген өсімпұлдар мен айыппұлдардан босату жолымен ШОБ субъектілері үшін салықтық амнистия жүргізу бойынша ұсыныстар енгізілетін болады. Бұл ретте субъектілер «Әкімшілік құқық бұзушылық туралы» Қазақстан Республикасының Кодексінде көзделген тәртіппен әкімшілік өндіріп алуды орындаудан босатылуға жатады.
      2014 жылғы маусымда «Бизнестің жол картасы 2020» бағдарламасы шеңберінде жетіспейтін (өндірістік) индустриялық инфрақұрылымды және индустриялық аймақтарды салуды және реконструкциялауды қаржыландыруды ұлғайту бойынша ұсыныстар енгізілетін болады.
      Іскерлік белсенділікті ынталандыру және ШОБ-қа өзін-өзі жұмыспен қамтыған халықты тарту, сондай-ақ жұмыспен қамтылуды қамтамасыз ету мақсатында Қазақстан Республикасының Ұлттық кәсіпкерлер палатасымен (бұдан әрі - ҰКП) бірлесіп, 2014 жылғы 1 шілдеге дейін шағын және орта бизнесті ақпараттық-консультациялық қолдауды қамтамасыз ететін бірыңғай бизнес инфрақұрылымын құру, сондай-ақ бизнес жобаларға оқып-үйрету және оларды одан әрі сүйемелдеу мақсатында ісін жаңа бастаған кәсіпкерлер үшін бизнес оқытулар ұйымдастыру қамтамасыз етілетін болады.
      ШОБ-тың іскерлік белсенділігін ынталандыру және жұмыспен қамтылуды қамтамасыз ету мақсатында 2014 жылғы 1 шілдеге дейін қаражатты қайта бөлу және жергілікті бюджеттің кіріс бөлігін асыра орындау есебінен тұрғын үй-коммуналдық шаруашылық, жол құрылысы, әлеуметтік мақсаттағы объектілерді жөндеу және реконструкциялау саласындағы жобаларды жергілікті бюджеттерден қосымша қаржыландыру бойынша жергілікті атқарушы органдардың шешімдері қабылданатын болады.
      Қазіргі уақытта 22,5 млрд. теңгеден астам сомаға жергілікті бюджет кірістері есебінен жергілікті жобаларды қосымша қаржыландыру ұсынылып отыр. Бұл қаражат облыстық, ауылішілік және кентішілік маңызы бар жолдарды салуға, реконструкциялауға және жөндеуге, мектептерді, балабақшаларды, ауылдық дәрігерлік амбулаторияларды, ТКШ объектілерін, сондай-ақ кәсіпкерлерге қызмет көрсету орталықтарын күрделі жөндеуге және салуға бағытталатын болады.

      4. Агроөнеркәсіптік кешенді дамыту

      Ауыл шаруашылық қайта өңдеуде импортты алмастыратын өндірістерді дамыта отырып, елдің азық-түліктік қауіпсіздігін қамтамасыз ету агроөнеркәсіптік кешенді (бұдан әрі - АӨК) дамытудағы негізгі басымдыққа айналады. Осы мақсаттарда Қазақстан Республикасының агроөнеркәсіптік кешенін дамыту жөніндегі 2013 - 2020 жылдарға арналған «Агробизнес 2020» бағдарламасын іске асыру шеңберінде ауыл шаруашылығы өнімдерін өндеуді басым түрде дамытуға және АӨК субъектілерін қаржылық сауықтыру тетіктерін жетілдіруге бағытталған шаралар қабылданатын болады.
      2014 жылғы 15 сәуірге дейін ЕДБ-ге жылдық 3 %-ға дейін кредит беру мақсатында «ҚазАгро» ұлттық басқарушы холдингі» АҚ қорландыру құнын субсидиялауды, АӨК субъектілерін кешенді сауықтыруға ЕДБ-ның қатысуын көздейтін АӨК субъектілерін қаржылық сауықтыру қағидалары қабылданатын болады.
      ҰКП, ЕДБ және агрохолдингтермен бірлесіп, ағымдағы жылғы 15 сәуірге дейін кәсіпорындарды сауықтыру жоспарларын дайындау үшін бірлескен кредиторлар комитеттері құрылатын болады.
      2014 жылғы 1 маусымға дейін жалпы берешек сомасы 140 млрд. теңге 140 АӨК субъектісі АӨК субъектілерін қаржылық сауықтыру шеңберінде мемлекеттік қолдау шараларын алатын болады.
      2014 жылғы 1 мамырға дейін жаңа өндірістік қуаттарды құру және/немесе қолданыстағыларын жаңғырту кезінде АӨК субъектісі шеккен шығыстардың бір бөлігін өтеуді көздейтін Инвестициялық субсидиялау қағидалары қабылданатын болады.
      2014 жылғы 1 шілдеге дейін жалпы сомасы 12,5 млрд. теңгеге 11 АӨК инвестициялық жобасы пайдалануға берілетін болады.

      5. Көліктік және логистикалық инфрақұрылымды әртараптандыру

      Қазақстандық тауарлардың экспортын әртараптандыру және елдің транзиттік әлеуетін нығайту мақсатында Оңтүстік, Батыс, Шығыс бағытында жаңа көліктік және логистикалық бағдарлар пысықталатын болады.
      2014 жылғы 1 шілдеге дейін Ақтау теңіз портының өткізу қуатын кеңейту үшін 3 құрғақ жүк терминалының құрылысын бастау қамтамасыз етілетін болады.
      2014 жылғы 1 шілдеге дейін «Қазақстан темір жолы» АҚ-ның меншікті қаражаты есебінен 36,8 млрд. теңге сомасында болжамды қаржыландырылатын және республикалық бюджет қаражаты есебінен 38,4 млрд. теңге сомасында қоса қаржыландырылатын «Қорғас – Шығыс қақпасы» АЭА аумағында құрғақ порттың құрылысы басталатын болады.
      Жүктердің батыс бағытта және Ақтау теңіз порты арқылы қысқа жолмен шығуын қамтамасыз ету үшін құрылыс жалғасатын болады және 2014 жылғы 1 желтоқсанға дейін Жезқазған-Бейнеу теміржол желісі арқылы қозғалыстың ашылуы жоспарланып отыр.
      2014 жылғы 1 шілдеге дейін Ляньюньган портында (ҚХР) терминал салудың басталуы қамтамасыз етіледі.
      Қытай бағытына, оның ішінде құбыр жолдары және теміржол көлігімен мұнай мен газды тиеп жіберу және олардың транзитін ұлғайту мәселесін пысықталатын болады.
      2015 жылы «Батыс Еуропа – Батыс Қытай» автомобиль жолының «Алматы – Қорғас» учаскесінің пайдалануға берілуіне байланысты, Қытаймен шекарада қосымша өткізу пункттерін салу мәселесі пысықталатын болады.
      2014 жылғы 1 шілдеге дейін үнемделген 814 млн. АҚШ долларын ірі инфрақұрылымдық жобаларды іске асыруға пайдалану үшін келісімдерге қол қоюды мақұлдау үшін ХҚДБ, АДБ және ЕҚДБ-лермен келіссөздер жүргізілетін болады.

      6. Қаржы жүйесін дамыту және банк секторын сауықтыру

      Банк секторын сауықтыру және қаржы жүйесін сапалы дамыту үшін мынадай шараларды іске асыру көзделеді.
      Қаржы секторын дамытудың ұзақ мерзімді перспективаларын айқындау мақсатында 2014 жылғы маусымда Қаржы секторын 2030 жылға дейін дамыту жөніндегі тұжырымдама қабылданатын болады.
      Банктерден «нашар активтерді» сатып алуды қаржылық қамтамасыз ету үшін «Проблемалы кредиттер қоры» АҚ-ны (бұдан әрі - ПКҚ) Ұлттық қор қаражатынан 250 млрд. теңге мөлшерінде капиталдандыру көзделеді.
      Осыны ескере отырып, ПКҚ-ның ЕДБ-ден проблемалы активтерді сатып алуы арқылы жұмыс істемейтін кредиттердің үлесін азайту бойынша іс-шаралар жүргізілетін болады.
      Бұл ретте ПКҚ қызметі экономиканың нақты секторындағы түпкілікті қарыз алушы кәсіпорындардың қаржылық жағдайын сауықтыруға ықпал ететін болады.
      2014 жылғы 1 шілдеге дейін ПКҚ жұмыс істеуінің жаңа тұжырымдамасы қабылданатын болады, ол ПКҚ-нің банктерден проблемалы активтерді түрлі тәсілдер негізінде олардың құнын айқындай отырып, сатып алуының оңтайлы тетіктерін, сондай-ақ ПКҚ-ның проблемалы қарыз алушылар қызметін қайта құрылымдау бойынша мамандандырылған компанияларды тартуын көздейді.
      2014 жылғы 1 маусымға дейін екінші деңгейдегі банктер жанындағы Стресті активтерді басқару жөніндегі компаниялардың өкілеттіктерін кеңейту бойынша нормативтік құқықтық актілер қабылданатын болады.
      2014 жылғы сәуірде екінші деңгейдегі банктерге және стресті активтерді басқару жөніндегі компанияға салық салуды жетілдіру бойынша Қазақстан Республикасының Салық кодексіне енгізілетін өзгерістердің жобалары енгізілетін болады.
      Қазақстан Республикасы Ұлттық Банкінің 2016 жылғы 1 қаңтарға қарай ЕДБ-нің жұмыс істемейтін кредиттерінің үлесін 10 %-ға дейін төмендету бойынша пруденциялық нормативті қабылдауы банктерді «нашар активтерден» тез арылуға ынталандыратын болады.
      Ішкі нарықты ұлттық валютада ұзақ мерзімді қорландырумен қамтамасыз ету үшін 2014 жылғы 1 мамырға дейін Зейнетақы активтерін (БЖЗҚ активтерін) басқару жөніндегі тұжырымдама әзірленетін болады.

      7. Жекешелендірудің екінші толқынының басталуы және «Халықтық IPO» бағдарламасын іске асыру

      Мемлекеттің экономикаға қатысуын қысқарту және жеке кәсіпкерлікті дамыту мақсатында жекешелендірудің екінші толқынының басталуы қамтамасыз етілетін болады.
      2014 жылғы сәуірде жекешелендіруге жататын квазимемлекеттік сектор ұйымдарының тізбесі айқындалатын болады.
      Тізбеге республикалық меншіктегі 32 ұйым, коммуналдық меншіктегі 586 объекті және ұлттық басқарушы холдингтердің, ұлттық холдингтердің құрылымына кіретін 191 ұйым алдын ала енгізілді.
      2014 жылғы мамырда нормативтік құқықтық актілерге өзгерістер енгізіліп, квазимемлекеттік сектор ұйымдарын жекешелендіруді қамтамасыз ету бойынша дайындық жұмысы аяқталатын болады.
      2014 жылғы маусымда квазимемлекеттік сектор ұйымдарын бәсекелес ортаға дайындау және беру процесі басталады.
      2014 жылдың бірінші жартыжылдығының соңына дейін «шаруашылық жүргізу құқығындағы мемлекеттік кәсіпорын» және «жедел басқару құқығындағы мемлекеттік кәсіпорын» институттарын тарата отырып, мемлекет меншігінде қалатын ұйымдар үшін бірыңғай ұйымдық-құқықтық нысанды айқындау бөлігінде мемлекеттік меншіктің ұйымдық құрылымын реформалау бойынша тұжырымдамалық тәсілдер әзірленетін болады.
      «Халықтық IPO» бағдарламасын іске асыру жандандырылатын болады:
      1) 2014 жылғы сәуірде «Самұрық-Қазына» ұлттық әл-ауқат қоры» АҚ тобына кіретін компанияларды орта мерзімді кезеңге қор нарығына шығару кестесі айқындалатын болады;
      2) 2014 жылғы 1 мамырға дейін «Халықтық IPO» бағдарламасына енгізілген компаниялардың жарғылық капиталына берілген стратегиялық объектілерді иеліктен шығару мәселесі бойынша тұжырымдамалық тәсілдер айқындалатын болады;
      3) 2014 жылғы мамырда «Халықтық IPO» бағдарламасын іске асыруға кедергі келтіретін шектеулерді алып тастау бөлігінде қолданыстағы заңнамаға өзгерістер, сондай-ақ «Халықтық IPO» бағдарламасына тиісті өзгерістер енгізілетін болады;
      4) 2014 жылғы маусымнан бастап қор нарығына 2014 жылы - «КЕGОC» АҚ, 2015 жылы - «Самұрық-Энерго» АҚ, «ҚазТрансГаз» АҚ шығару бойынша дайындық жұмыстары басталады.

      8. Тікелей шетелдік және отандық инвестицияларды тарту үшін ынталандырулардың жаңа топтамасы

      Тікелей шетелдік және отандық инвестицияларды тартуды кеңейту мақсатында инвесторлар үшін ынталандырулардың жаңа топтамасы әзірленіп, енгізілетін болады.
      2014 жылғы 1 маусымға дейін Қазақстан Республикасы Парламентіне «Инвестициялық заңнаманы жетілдіру мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасы енгізілетін болады, ол:
      1) мынадай мемлекеттік қолдау шараларын:
      объекті пайдалануға берілгеннен кейін мемлекет тарапынан инвестициялық шығындардың (инвестициялық субсидия) 30 %-ға дейінгі өтемақысын;
      корпоративтік табыс салығын төлеуден босатуды;
      ұлттық холдингтер, ұлттық компаниялар және мемлекеттік мекемелер тарапынан инвесторлардың тауарлары мен көрсететін қызметтеріне ұзақ мерзімді тапсырысты енгізе отырып, инвесторлармен келісімшарттар жасау тетігін түбегейлі түрде қайта қарауды;
      2) салық және экология салаларындағы заңнаманың және шетелдік, отандық инвесторлармен жасалатын келісімшарттар шеңберінде болжанатын ұзақ мерзімді кезеңге арналған тарифтердің 10 жылға «тұрақтылық» қағидатын;
      3) Қазақстан Республикасы Индустрия және жаңа технологиялар министрлігі Инвестициялар комитетіне инвесторлардың сұрау салуы бойынша рұқсат беру құжаттарын беруді үйлестіру бойынша функцияларды бере отырып, инвесторлар үшін «бір терезе» қағидатын, инвестициялық омбудсмен институтын енгізуді;
      4) сотқа дейінгі реттеу тетігін енгізуді және инвесторлардың халықаралық коммерциялық төрелікке қол жеткізуін кеңейтуді көздейді.
      2014 жылғы 1 қыркүйекке дейін шетелдік инвесторлар үшін ауыл шаруашылығы мақсатындағы жерлерді жалға алу мерзімін ұлғайту туралы заң жобасы дайындалатын болады.
      2014 жылғы 1 маусымға дейін мемлекеттік органдар және ұлттық холдингтер мен компаниялар Қазақстанда «зәкірлік» инвестициялық жобаларды іске асыру бойынша ірі шетелдік инвесторлармен және трансұлттық корпорациялармен тікелей келіссөздер жүргізетін болады.
      2014 жылғы 1 мамырға дейін «Қазақстан Республикасының кейбір заңнамалық актiлерiне бюджет заңнамасын жетiлдiру мәселелері бойынша өзгерiстер мен толықтырулар енгiзу туралы» 2013 жылғы 3 желтоқсандағы Қазақстан Республикасы Заңының шеңберінде жобаларды жоспарлау және іріктеу мәселелері бойынша Қазақстан Республикасы Үкіметінің кейбір шешімдеріне өзгерістер енгізілетін болады.

      9. Тарифтік саясаттың жаңа тәсілдерін қалыптастыру және бәсекелес қатынастардың дамуы үшін жағдайлар жасау

      Инвестициялық тартымдылықты арттыру, сондай-ақ табиғи монополиялар субъектілерінің (бұдан әрі - ТМС) негізгі құралдарын жаңғыртуға және жаңартуға инвестициялар салуды ынталандыру мақсатында Қазақстан Республикасының Үкіметі мемлекет реттейтін тарифтер мен бағалардың болжамдылығын қамтамасыз ететін болады.
      Осыған байланысты 2014 жылғы 1 шілдеге дейін табиғи монополиялар салаларындағы 2020 жылға дейінгі тарифтік саясат жөніндегі бағдарлама әзірленіп, Қазақстан Республикасының Үкіметіне енгізіледі, ол ТМС реттеуде мынадай жаңа тәсілдерді:
      1) ТМС көрсететін қызметтерге қолданылу мерзімі 5 және одан көп жыл болатын шекті (ұзақ мерзімді) тарифтерді бекіту арқылы қысқа мерзімді реттеуден ұзақ мерзімді реттеуге өтуді;
      2) ТМС-тің тарифтерді бекітуге байланысты өтінімдерін ұсыну рәсімдерін жеңілдету арқылы мемлекеттік реттеу және әкімшілік жүктеме дәрежесін төмендетуді;
      3) ТМС-нің инвестициялық бағдарламаларды орындауын және тарифтердің өсуінен алынатын қаражатты мақсатты пайдалануын бақылау тетіктерін жетілдіруді көздейді.
      Бүгінгі күні инвестициялық жобалар үшін шығындардың елеулі бөлігін электр энергиясы мен газ шығындары құрайды, олар табиғи монополиялар салаларына жатқызылмаған, алайда олардың бағаларын мемлекет реттейді.
      Электр энергиясы мен газ бағаларының болжамдылығын қамтамасыз ету мақсатында 2014 жылғы маусымда тиісті салалық министрліктер ҰКП-мен бірлесіп, ұзақ мерзімді шекті бағаларды 5 және одан көп жылға белгілеу мәселесі бойынша Қазақстан Республикасының Үкіметіне ұсыныстар енгізетін болады.
      Тауар нарықтарын дамыту, олардың инвестициялық тартымдылығын, сондай-ақ сыртқы нарықтарда бәсекеге қабілеттілігін арттыру үшін мынадай іс-шаралар іске асырылатын болады.
      1) 2014 жылғы 1 маусымға дейін Қазақстан Республикасы Үкіметіне табиғи монополиялар субъектілерінің реттеліп көрсетілетін қызметтерін (тауарларын, жұмыстарын) бәсекелес ортаға шығару тұрғысынан оларға кешенді талдау жүргізу жөніндегі іс-шаралар жоспары енгізілетін болады.
      2) 2014 жылғы 1 қыркүйекке дейін көрсетілетін қызметтердің жекелеген түрлерін мемлекеттік бағалық реттеуден шығару мақсатында реттелетін нарықтарға тексеру жүргізілетін болады.
      2014 жылғы 1 шілдеге дейін:
      1) монополияға қарсы органдардың тауар нарықтарына талдау жүргізуге ҰКП-ның қатысуы;
      2) тауар нарықтарындағы бәсекелес ортаның жай-күйін талдау нәтижелерін Қазақстан Республикасы Бәсекелестікті қорғау агенттігінің сайтында міндетті түрде жариялауды қамтамасыз ету;
      3) Мемлекеттік субъектілер тізілімінен нарықта басым немесе монополиялық жағдайға ие субъектілерді алып тастау рәсімін жеңілдету бөлігінде «Бәсекелестік туралы» Қазақстан Республикасының Заңы 43-бабының нормаларын ескере отырып, бәсекелес қатынастарды дамыту жөніндегі ұсыныстар енгізілетін болады.

      10. Көлеңкелі экономикаға қарсы күрес

      Көлеңкелі экономикаға қарсы күрес экономиканың қосымша өсуін, оны ресмилендіруді және бюджетті толықтыруды қамтамасыз етуге мүмкіндік береді.
      2014 жылғы 1 маусымға дейін қаржы капиталын заңдастыру жөнінде заң жобасы әзірленетін болады.
      Өзекті сипат берілген Көлеңкелі экономикаға қарсы күрес жөніндегі жоспар, көлеңкелі экономиканың үлесі неғұрлым жоғары экономика салаларында оны азайтуға назар аудара отырып, іске асырыла бастайды.
      2014 жылғы 1 мамырға дейін заңды тұлғалар мен дара кәсіпкерлер үшін банк шоттарынан қолма-қол ақша алу лимитін белгілеу және сауда-экономика саласында қолма-қол ақшасыз есеп айырысуды одан әрі ынталандыру бойынша ұсыныстар әзірленетін болады.
      2014 жылғы 1 шілдеге дейін экономика салаларында SIM-карталары бар бақылау-кассалық машиналарды міндетті түрде қолдануды кеңейту мәселесі бойынша заңнамалық шаралар әзірленетін болады.
      2014 жылғы 1 қазанға дейін «заманауи сауда объектісі» ұғымын анықтаудың нақты критерийлерін айқындайтын заң жобасы әзірленетін болады және 2018 жылдан бастап осы критерийлерге сәйкес келмейтін объектілерді пайдалауға тыйым салу енгізіледі.
      Сауда объектілерінің заманауи сауда форматына өтуі үшін мемлекеттік қолдау алу мақсатында «Бизнестің жол картасы-2020» бағдарламасына қазіргі заманғы форматтағы сауда объектілерін салу саласы қосылатын болады.
      Қосымша құн салығын (бұдан әрі – ҚҚС) салықтық әкімшілендіруді жақсарту және жалған кәсіпорындардың құрылуына жол бермеу үшін 2014 жылғы 1 шілдеге дейін барлық ҚҚС төлеушілер үшін арнайы ҚҚС-шот пен электронды шот-фактураларды енгізу, сондай-ақ нөлдік мөлшерлеме бойынша ҚҚС-ты қайтару тетігін жетілдіру бойынша ұсыныстар әзірленетін болады.
      Жоғарыда көрсетілген шаралар елдің әлеуметтік-экономикалық даму тұрақтылығын қолдауға ықпал ететін болады.

Қазақстан Республикасы  
Үкіметінің        
2014 жылғы 14 сәуірдегі
№ 355 қаулысымен    
бекітілген       

Қазақстан Республикасының әлеуметтік-экономикалық саясатының
2014 жылға арналған бiрiншi кезектегi шараларының жол картасын
іске асыру жөніндегі іс-шаралар жоспары

Ескертпе: аббревиатуралардың толық жазылуы: