Қазақстан Республикасының Үкiметi ҚАУЛЫ ЕТЕДI:
1. Қазақстан Республикасы Үкiметiнiң кейбiр шешiмдерiне мынадай өзгерiстер мен толықтыру енгізiлсiн:
1) «Өсімдік шаруашылығы өнімінің шығымдылығы мен сапасын арттыруға жергілікті бюджеттерден субсидиялау қағидасын бекіту туралы» Қазақстан Республикасы Үкіметінің 2011 жылғы 4 наурыздағы № 221 қаулысында (Қазақстан Республикасының ПҮАЖ-ы, 2011 ж., № 23, 291-құжат):
көрсетілген қаулымен бекітілген Өсімдік шаруашылығы өнімінің шығымдылығы мен сапасын арттыруға жергілікті бюджеттерден субсидиялау қағидасында:
8-тармақтың 2) тармақшасы мынадай редакцияда жазылсын:
«2) қант қызылшасы, майлы дақылдар, күріш, дәндік жүгері, сүрлемдік жүгері, сүрлемдік күнбағыс, мақта, көкөніс-бақша (қорғалған топырақ жағдайында өсірілетін көкөніс дақылдарын қоспағанда), жемшөптік, оның ішінде бірінші, екінші және үшінші өсу жылдарындағы бұршақ тұқымдас көпжылдық шөптер, жеміс-жидек дақылдары, жүзім және картоп бойынша – егіс науқанының қорытындылары бойынша базалық норма бойынша 1 гектарға 100 % жүзеге асырылады.
Бұл ретте:
мақта мен күріш өсірумен айналысатын және 50 гектардан кем мақта, 200 гектардан кем күріш егіс алқабы бар ауыл шаруашылығы тауарын өндірушілерге, егер олар ауылдық тұтыну кооперативіне не су пайдаланушылардың ауылдық тұтыну кооперативіне қатысушы болып табылмаса, субсидиялардың базалық нормасының елу пайызы мөлшерінде бюджеттік субсидия төленеді;»;
9-тармақ мынадай редакцияда жазылсын:
«9. Көкөніс-бақша дақылдары ашық топырақта, картоп, қант қызылшасы мен мақта өнеркәсіптік үлгідегі тамшылатып суару жүйелерін қолдана отырып өсірілген жағдайда субсидия нормасы субсидиялардың базалық нормасымен салыстырғанда көбейеді. Бұл ретте өнеркәсіптік үлгідегі тамшылатып суару жүйелері: сорғы станциясын, гидроциклонды, гидроазықтандырғышты, сүзгіш қондырғыларын, қысым реттегішті, су өлшегішті және тамшылатқышы бар құбыржолдар жүйесін қамтуға тиіс.»;
14-тармақ мынадай редакцияда жазылсын:
«14. Бөлім өтінімдер мен құжаттарды алғаннан кейін үш жұмыс күні ішінде құжаттардың толықтығын, дұрыстығын тексереді және ВАК-тың қарауына енгізеді.»;
27-тармақ мынадай редакцияда жазылсын:
«27. Облыстың жергілікті атқарушы органының шешімімен уәкiлетті органның келісімі бойынша субсидиялардың нормативтері белгіленеді.»;
32-тармақтың 1) тармақшасы мынадай редакцияда жазылсын:
«1) бес жұмыс күні ішінде аудандар (облыстық маңызы бар қалалар) бойынша алдын ала жасалған тізбелерді қарайды. Бұл ретте, егер өтінімдер сомасы бөлінген бюджет қаражатының сомасынан асып кетсе, онда бюджеттік субсидиялауға жататын алаңдар АШТӨ арасында алаңдардың өтінім берілген көлеміне байланысты тепе-тең бөлінеді, ал субсидиялар тепе-тең бөлу нәтижесі бойынша алынған алаңға төленеді;»;
мынадай мазмұндағы 72-1-тармақпен толықтырылсын:
«72-1. Осы Қағиданың 70-тармағының 2), 3), 4) тармақшаларына және 71-тармағына сәйкес субсидия алатын, тыңайтқыштар мен гербицидтер құнының кемінде 50 %-ын төлеген АШТӨ бюджеттік субсидиялар алушылардың тізіміне енгізіледі.
Бұл ретте АШТӨ осы Қағиданың 72-тармағында көрсетілген құжаттарға қосымша ВАК-тың жұмыс органына:
iшiнара төленгенiн растайтын төлем құжаттарының (кассалық кiрiс ордерi, банктiң төлем тапсырмасы) көшiрмелерiн;
гербицид сатып алынған, пестицидтердi (улы химикаттарды) өндiрудi (формуляциялауды) және сатуды жүзеге асыратын гербицид жеткiзушiлер лицензияларының көшiрмелерiн ұсынады. Бұл ретте АШТӨ қалған сомаға төлем құжаттарының (кассалық кiрiс ордерi, банктiң төлем тапсырмасы) көшірмелерін тыңайтқыштарды және (немесе) гербицидтердi алуға сенiмхаттың түпнұсқасын құнын толық төлегеннен кейiн, бiрақ бюджеттiк субсидияларды алған күннен бастап 15 жұмыс күнінен кешiктiрмей ВАК-тың жұмыс органына ұсынады. Осы Қағиданың 72-1-тармағының талаптары орындалмаған жағдайда, АШТӨ алынған бюджеттiк субсидияларды Басқарманың есеп айырысу шотына аудару жолымен қайтарады.»;
79-тармақтың 2) тармақшасының төртінші абзацы мынадай редакцияда жазылсын:
«уәкiлеттi орган бекiткен нысан бойынша өндiрушi мен АШТӨ арасындағы тыңайтқыштарды сатып алу-сату шартын ұсынады, ол үш данада жасалады: бiрiншiсi – өндiрушi үшiн, екiншiсi – АШТӨ үшiн, үшiншiсi – Басқарма үшiн;»;
2) «Облыстық бюджеттердің, Астана және Алматы қалалары бюджеттерінің тұқым шаруашылығын қолдауға 2011 жылғы республикалық бюджеттен берілетін ағымдағы нысаналы трансферттерді пайдалану қағидасын бекіту туралы» Қазақстан Республикасы Үкіметінің 2011 жылғы 30 наурыздағы № 297 қаулысында:
көрсетілген қаулымен бекітілген Облыстық бюджеттердің, Астана және Алматы қалалары бюджеттерінің тұқым шаруашылығын қолдауға 2011 жылғы республикалық бюджеттен берілетін ағымдағы нысаналы трансферттерді пайдалану қағидасында:
9 және 10-тармақтар мынадай редакцияда жазылсын:
«9. Осы Қағиданың 3-тармағының 4) тармақшасында көрсетілген бюджеттік субсидиялар аттестатталған элиттұқымшарларға әрбір облыс, Астана және Алматы қалалары үшін тұқым мен көшеттің әрбір түрі бойынша Министрлік белгілеген квоталар шегінде жүгерінің, күнбағыстың және көшеттердің Қазақстан Республикасында пайдалануға рұқсат етілген сорттарының элиталық тұқымдары мен көшеттерін арзандатылған бағамен отандық тауар өндірушілерге нақты сатылған көлемі үшін төленеді.
Отандық ауыл шаруашылығы тауарын өндірушілерге мақтаның элиталық тұқымының арзандатылған құны бойынша нақты сатылған көлемі үшін бюджеттік субсидиялар аттестатталған элиттұқымшарлар мен тұқым өткізушілерге төленеді.
Элиттұқымшарлар мен тұқым өткізушілер мақтаның, жүгерінің, күнбағыстың элиталық тұқымдарын және көшеттерді отандық ауыл шаруашылығы тауарын өндірушілерге Министрліктің бұйрығымен белгіленген шекті бағадан аспайтын баға бойынша сатады.
10. Әрбір элиталық тұқымның түрі бойынша әрбір тұқымшарға және тұқым тұтынушыға, мақтаның, жүгерінің, күнбағыстың элиталық тұқымдары және көшеттің әрбір түрі бойынша әрбір элиттұқымшар және тұқым өткізуші үшін квоталарды белгіленген тәртіппен облыстардың жергілікті атқарушы органдары белгілейді.»;
19-тармақтың екінші бөлігі мынадай редакцияда жазылсын:
«Бюджеттік субсидияларды төлеу сатып алынған тұқым үшін толық төлем жасаған сатып алушылармен қатар, сатып алынған тұқым үшін тұқымның нарықтық құнының елу пайызынан кем емес мөлшерде ішінара төлем жасаған сатып алушыларға да жүргізіледі.»;
20-тармақтың 2) тармақшасы мынадай редакцияда жазылсын:
«2) осы Қағиданың 19-тармағының 2), 3), 4) тармақшаларында көрсетілген құжаттардың тізбесін;»;
23-тармақтың бірінші бөлігінің төртінші абзацы мынадай редакцияда жазылсын:
«тұқым сапасына сараптама жасау жөніндегі зертхананың тексерілген тұқымның мөлшері мен сапасының стандарттар талаптарына сәйкестігі туралы анықтамасының көшірмесін тапсырады.»;
28-тармақ мынадай редакцияда жазылсын:
«28. Арзандатылған құн бойынша сатылған мақтаның, жүгерінің және күнбағыстың элиталық тұқымдары мен көшеттерге (бұдан әрі – элиталық тұқымдар мен көшеттер) бюджеттік субсидиялар алу үшін:
1) Қазақстан Республикасының қорғалатын өсімдіктер сорттарының мемлекеттік тізіліміне енгізілген ауыл шаруашылығы өсімдіктері сорттарының тұқымдары мен көшеттері белгіленген квоталар шегінде сатылған жағдайда, элиттұқымшарлар мен тұқым өткізушілер ауданның жергілікті атқарушы органына лицензиялық шартты береді, ол бойынша патент иесі (лицензиар) элиттұқымшарға немесе тұқым өткізушіге (лицензиатқа) Селекциялық жетістіктерді қорғау туралы заңға сәйкес селекциялық жетістікті уақытша пайдалану құқығын береді;
2) элиттұқымшарлар мен тұқым өткізушілер ай сайын 1-күніне қарай ауданның жергілікті атқарушы органына сатып алушылар бөлінісінде сатылған элиталық тұқымдар мен көшеттердің мөлшері мен сапасы туралы ақпарат береді;
3) элиттұқымшарлар мен тұқым өткізушілер элиталық тұқымдар мен көшеттерді сату фактісін растау үшін тиісті жылдың 20 маусымына дейін ауданның жергілікті атқарушы органына:
элиттұқымшар мен тұқым өткізуші нақты сатқан элиталық тұқымдар мен көшеттердің көлемі жөніндегі жиынтық тізілімді;
элиталық тұқымдар мен көшеттерді өндіруге арналған бастапқы материалдың шығу тегін растайтын құжаттарды (сынақтан өткізу актісі және сынақтан өткізу туралы есепті, ал молықтыру питомниктерінің тұқымдары мен суперэлитаны сатып алған жағдайда – тұқымға арналған аттестаттың көшірмесін) (тұқым өткізушілер - мақтаның элиталық тұқымдарының сорттық және егу сапасын растайтын құжаттарды (тұқым аттестатының көшірмесін));
тексерілген тұқымның (көшеттерді қоспағанда) саны мен сапасының стандарттардың талаптарына сәйкестігі туралы тұқымдардың сапасына сараптама жасау жөніндегі зертхананың анықтамасын;
сатылған элиталық тұқымдар мен көшеттердің бастапқы төлем құжаттарының, сондай-ақ көшеттерді тиеп жөнелтуге арналған жүкқұжаттың және шот-фактуралардың көшірмелерін;
элиттұқымшар (тұқым өткізуші) мен сатып алушының арасындағы сатылған және сатып алынған элиталық тұқымдар мен көшеттердің көлемі туралы элиталық көшеттерді сатып алу-сату шартын ұсынады.
Элиталық тұқымдар мен көшеттерді сатып алу-сату шарты төрт данада жасалады: біріншісі – элиттұқымшар (тұқым өткізуші) үшін, екіншісі – сатып алушы үшін, үшіншісі – ауданның жергілікті атқарушы органы үшін, төртіншісі – облыстың жергілікті атқарушы органы үшін.
Химиялық әдіспен тазартылған мақтаның тұқымын отандық ауыл шаруашылығы тауарын өндірушілерге арзандатылған құны бойынша сатқан элиттұқымшарлар бюджеттік субсидиялар алу үшін қосымша мақта тұқымын химиялық әдіспен өңдеуге арналған шарттардың көшірмелерін және химиялық әдіспен тазарту бойынша орындалған жұмыстардың актісін (тұқым өткізушілер - химиялық әдіспен тазарту бойынша орындалған жұмыстардың актісін) тапсырады;
4) ауданның жергілікті атқарушы органы ұсынылған бастапқы төлем құжаттарының көшірмелерін түпнұсқаларымен салыстырады және өзінің мөрімен куәландырады. Куәландырылған бастапқы төлем құжаттарының көшірмелері, элиталық тұқымдар мен көшеттердің нақты сатылған көлемі жөніндегі жиынтық тізілімнің бір данасы және сатып алу-сату шартының бір данасы ауданның жергілікті атқарушы органында сақтауға тапсырылады;
5) ауданның жергілікті атқарушы органы тиісті жылдың 1 шілдесіне дейінгі мерзімде облыстың жергілікті атқарушы органына мынадай құжаттарды:
элиттұқымшар (тұқым өткізуші) нақты сатқан элиталық тұқымдар мен көшеттер көлемі жөніндегі жиынтық тізілімді;
элиттұқымшар (тұқым өткізуші) мен сатып алушы арасындағы сатылған және сатып алынған элиталық тұқымдар мен көшеттердің саны туралы элиталық тұқымды сатып алу-сату шартын;
тексерілген тұқымның (көшеттерді қоспағанда) мөлшері мен сапасының стандарттар талаптарына сәйкестігі туралы тұқымдардың сапасына сараптама жасау жөніндегі зертхананың анықтамасын тапсырады;
6) облыстың жергілікті атқарушы органы:
он бес жұмыс күні ішінде ұсынылған құжаттарды тексереді, облыс бойынша элиталық тұқымдар мен көшеттердің нақты сатылған көлемі жөніндегі жиынтық актіні жасайды және бекітеді;
облыс бойынша элиталық тұқымдар мен көшеттердің нақты сатылған көлемі жөнінде бекітілген жиынтық актілер бойынша, онда көрсетілген элиталық тұқымдар мен көшеттердің көлемі мен бекітілген бюджеттік субсидиялар нормативтері негізінде тиесілі бюджет қаражатының көлемін анықтайды;
әрбір элиттұқымшарға (тұқым өткізушіге) белгіленген квоталар шегінде осы Қағидаға 9-қосымшаға сәйкес нысан бойынша отандық ауыл шаруашылығы тауарын өндірушілерге сатылған элиталық тұқымдар мен көшеттер құнын ішінара арзандатуға бюджеттік субсидиялар төлеуге арналған жиынтық ведомость жасайды;
7) ұсынылып отырған элиталық тұқымдар мен көшеттерді сатып алу-сату шартының, элиттұқымшар (тұқым өткізуші) нақты сатқан элиталық тұқымдар мен көшеттердің көлемі жөніндегі жиынтық тізілімнің, облыс бойынша сатылған элиталық тұқымдар мен көшеттердің көлемі жөніндегі жиынтық актінің нысандарын Министрлік бекітеді.»;
көрсетілген Қағидаға 9-қосымшадағы 2-бағанның тақырыбы мынадай редакцияда жазылсын:
«Элиттұқымшардың (тұқым өткізушінің) атауы».
2. Осы қаулы алғашқы ресми жарияланған күнінен бастап қолданысқа енгізіледі.
Қазақстан Республикасының
Премьер-Министрі К.Мәсімов