Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Тәуелсіз Мемлекеттер Достастығына қатысушы мемлекеттердің мемлекеттік әуе кемелерімен болған авиациялық оқиғаларды тексеру саласындағы ынтымақтастық туралы келісімнің жобасы мақұлдансын.
2. Тәуелсіз Мемлекеттер Достастығына қатысушы мемлекеттердің мемлекеттік әуе кемелерімен болған авиациялық оқиғаларды тексеру саласындағы ынтымақтастық туралы келісімге қол қойылсын.
3. "Тәуелсіз Мемлекеттер Достастығына қатысушы мемлекеттердің мемлекеттік әуе кемелерімен болған авиациялық оқиғаларды тексеру саласындағы ынтымақтастық туралы келісімге қол қою туралы" Қазақстан Республикасы Үкіметінің 2009 жылғы 21 мамырдағы N 751 қаулысының күші жойылды деп танылсын.
4. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі К. Мәсімов
Қазақстан Республикасы
Үкіметінің
2009 жылғы 18 қарашадағы
N 1876 қаулысымен
мақұлданған
жоба
Тәуелсіз Мемлекеттер Достастығына қатысушы мемлекеттердің
мемлекеттік әуе кемелерімен болған авиациялық оқиғаларды
тексеру саласындағы ынтымақтастық туралы келісім
Бұдан әрі Тараптар деп аталатын Тәуелсіз Мемлекеттер Достастығына қатысушы мемлекеттердің үкіметтері,
мемлекеттік әуе кемелерімен болған авиациялық оқиғалардың себептерін объективті түрде анықтау маңыздылығын назарға ала отырып,
осы Келісімге қатысушы бір мемлекеттің аумағында екінші мемлекеттің мемлекеттік әуе кемелерімен болған авиациялық оқиғаларды тексеруді ұйымдастыруға бірыңғай ұстанымды қамтамасыз ету мақсатында,
төмендегілер туралы келісті:
1-бап
Осы Келісімнің мақсаттары үшін мынадай анықтамалар пайдаланылады:
авиациялық оқиға - әуе кемесінің бортында болған қандай да бір адамның қаза табуына (өлімге әкеп соқтыратын дене жарақатына) және/немесе осы әуе кемесінің мүлдем істен шығуына әкеп соқтырған әуе кемесін ұшырып пайдалануға байланысты оқиға;
мемлекеттік авиация - ТМД-ға қатысушы мемлекеттің әскери, шекара, милиция, кеден және басқа да мемлекеттік қызметін жүзеге асыру үшін пайдаланылатын авиация;
мемлекеттік әуе кемесі - мемлекеттік авиацияның әуе кемесі;
авиациялық оқиғаны тексеру - қаралып жатқан оқиғаға қатысты фактілер, шарттар мен жағдайлар туралы ақпаратты анықтауды, жинауды және зерделеуді, зерттеулер, сараптамалар және эксперименттер жүргізуді, алынған деректерді жинақтау мен талдауды, жүргізілген жұмыстардың нәтижелері бойынша авиациялық оқиғаның себептері туралы қорытындылар және авиациялық оқиғаны тексеру нәтижелері бойынша ұсынымдар дайындауды қамтитын процесс;
авиациялық оқиғаны тексеру нәтижелері бойынша ұсынымдар - тексеру кезінде алынған ақпарат негізінде жасалған және авиациялық оқиғаларды болдырмауға бағытталған ұсыныстар;
мемлекеттік авиацияның ұшу қауіпіздігінің уәкілетті органы - мемлекеттік әуе кемелерімен болған авиациялық оқиғаларды тексеруді, оларды жіктеу мен есепке алуды, сондай-ақ ұшу қауіпсіздігіне қатысты бөлігінде осы Келісімге қатысушы мемлекеттің мемлекеттік авиациясы авиациялық персоналының қызметіне мемлекеттік ведомствоаралық бақылауды жүзеге асыратын орган.
2-бап
Тараптар өздерінің уәкілетті органдары арқылы осы Келісімнің ажырамас бөлігі болып табылатын Тәуелсіз Мемлекеттер Достастығына қатысушы мемлекеттердің мемлекеттік әуе кемелерімен болған авиациялық оқиғаларды тексеру ережесіне (қоса беріліп отыр) сәйкес осы Келісімге қатысушы мемлекеттердің аумақтарында мемлекеттік әуе кемелерімен болған авиациялық оқиғаларды тексеру саласында ынтымақтасады.
3-бап
Авиациялық оқиғаны тексерудің мақсаттары авиациялық оқиғаның себептерін анықтау және авиациялық оқиғаны тексеру нәтижелері бойынша ұсынымдарды әзірлеу болып табылады.
Авиациялық оқиғаны тексерудің мақсаты біреудің кінәсін және жауапкершілігін анықтау болып табылмайды.
Біреудің кінәсін немесе жауапкершілігін анықтауға бағытталған кез келген сот немесе әкімшілік тексеру осы Келісімге қатысушы мемлекеттердің тиісті келісімдері және ұлттық заңнамасы негізінде авиациялық оқиғаны тексеруден бөлек жүргізіледі.
4-бап
Тараптар ғылыми әзірлемелерді жүргізу, авиациялық оқиғаларды тексерудің техникалық құралдары мен кешенді жүйелерін жобалау, жасау, сатып алу және енгізу кезінде үйлестірілген қызметті, оның ішінде авиациялық оқиғаларды тексеру әдістерін жетілдіру жөніндегі бірлескен бағдарламаларды әзірлеу жолымен жүзеге асырады.
5-бап
Авиациялық оқиғаларды тексеру және мемлекеттік әуе кемелерінің ұшу қауіпсіздігін қамтамасыз ету саласында мамандар даярлау мен қайта даярлау Тараптар арасындағы келісімдер негізінде келісілген әдістемелер мен бағдарламалар бойынша жүзеге асырылады.
6-бап
Егер әрбір нақты жағдайда өзге тәртіп келісілмеген болса, Тараптар, олардың осы Келісімді орындауы барысында туындайтын шығыстарды дербес көтереді.
7-бап
Тараптар осы Келісімді іске асыру барысында ақпарат беруші Тарап оған қатысты құпиялылықты сақтау қажеттігіне шарттасқан ақпаратты қорғау режимін қамтамасыз етеді. Осындай ақпаратты беру осы Келісімге қатысушы мемлекеттердің тиісті келісімдері және ұлттық заңнамасы негізінде жүзеге асырылады.
8-бап
Осы Келісім осы Келісімге қатысушы мемлекеттің әрқайсысының ол қатысушысы болып табылатын басқа халықаралық шарттардан ол үшін туындайтын құқықтары мен міндеттемелерін қозғамайды.
9-бап
Тараптар осы Келісімнің ережелерін іске асыру үшін мемлекеттік авиацияның ұшу қауіпсіздігінің уәкілетті органын айқындайды, ол туралы мемлекетішілік рәсімдерді орындағаны туралы ақпаратпен бір уақытта депозитарийді хабардар етеді.
Мемлекеттік авиацияның ұшу қауіпсіздігі уәкілетті органының атауы өзгерген жағдайда тиісті Тарап депозитарийді осы туралы хабардар етеді.
10-бап
Тараптардың келісуі бойынша осы Келісімге тиісті хаттамамен ресімделетін, оның ажырамас бөлігі болып табылатын өзгерістер мен толықтырулар енгізілуі мүмкін.
11-бап
Осы Келісімді қолдану мен түсіндіру кезінде туындайтын Тараптар арасындағы даулы мәселелер мүдделі Тараптардың консультациялары мен келіссөздері жолымен шешіледі.
12-бап
Осы Келісім белгісіз мерзімге жасалады.
Тараптардың әрқайсысы депозитарийге шығу күніне дейін алты айдан кешіктірмей өзінің осындай ниеті туралы жазбаша хабарлама жолдай отырып және Келісімнің қолданылуы уақытында туындаған қаржылық және өзге де міндеттемелерін реттей отырып, осы Келісімнен шығуға құқылы.
13-бап
Осы Келісім күшіне енгеннен кейін оған ТМД-ға қатысушы кез келген мемлекеттің депозитарийге қосылу туралы құжатты беру жолымен қосылуы үшін ашық.
Қосылушы мемлекет үшін Келісім қосылу туралы құжатты депозитарий алған күнінен бастап 30 (отыз) күн өткен соң күшіне енеді.
14-бап
Осы Келісім депозитарий оның күшіне енуі үшін қажетті мемлекетішілік рәсімдерді оған қол қойған Тараптардың орындағаны туралы үшінші жазбаша хабарлама алған күнінен бастап 30 (отыз) күн өткен соң күшіне енеді.
Мемлекетішілік рәсімдерді кешірек орындаған Тараптар үшін осы Келісім депозитарий тиісті құжаттарды алған күнінен бастап 30 (отыз) күн өткен соң күшіне енеді.
20 жылғы " " қаласында орыс тіліндегі бір түпнұсқа данада жасалды. Түпнұсқа данасы Тәуелсіз Мемлекеттер Достастығының Атқарушы комитетінде сақталады, ол осы Келісімге қол қойған әрбір мемлекетке оның расталған көшірмесін жолдайды.
Әзірбайжан Республикасының Молдова Республикасының
Үкіметі үшін Үкіметі үшін
Армения Республикасының Ресей Федерациясының
Үкіметі үшін Үкіметі үшін
Беларусь Республикасының Тәжікстан Республикасының
Үкіметі үшін Үкіметі үшін
Қазақстан Республикасының Түрікменстан Үкіметі үшін
Үкіметі үшін
Қырғыз Республикасының Өзбекстан Республикасының
Үкіметі үшін Үкіметі үшін
Украина Үкіметі үшін
2009 жылғы " "
Тәуелсіз Мемлекеттер Достастығына
қатысушы мемлекеттердің мемлекеттік
әуе кемелерімен болған авиациялық
оқиғаларды тексеру саласындағы
ынтымақтастық туралы келісімге
қосымша
Тәуелсіз Мемлекеттер Достастығына қатысушы мемлекеттердің
мемлекеттік әуе кемелерімен болған авиациялық оқиғаларды
тексеру ережесі
Осы Ереже авиациялық оқиғаларды тексеруді ұйымдастыруға бірыңғай ұстанымды қамтамасыз етуге бағытталған және осы Келісімге қатысушы бір мемлекеттің аумағында екінші мемлекеттің мемлекеттік әуе кемелерімен болған авиациялық оқиғаларға қолданылады.
1. Жалпы ережелер
Осы Ереже осы Келісімге қатысушы мемлекеттердің мемлекеттік әуе кемелерімен болған авиациялық оқиғалардың анықтамалары мен жіктемесін қамтиды, тексеру жүргізу тәртібін және уәкілетті өкілдер мен олардың кеңесшілерінің осы Келісімге қатысушы бір мемлекеттің аумағында екінші мемлекеттің мемлекеттік әуе кемелерімен болған авиациялық оқиғаларды тексеруге қатысуы дәрежесін белгілейді.
Осы Келісімге қатысушы бір мемлекеттің аумағында екінші мемлекеттің мемлекеттік әуе кемелерімен болған әрбір авиациялық оқиға міндетті түрде тексерілуге тиіс.
Авиациялық оқиғаны тексеру - қаралып жатқан оқиғаға қатысты фактілер, шарттар мен жағдайлар туралы ақпаратты анықтауды, жинауды және зерделеуді, зерттеулер, сараптамалар және эксперименттер жүргізуді, алынған деректерді жинақтау мен талдауды, жүргізілген жұмыстардың нәтижелері бойынша авиациялық оқиғаның себептері туралы қорытындылар және авиациялық оқиғаны тексеру нәтижелері бойынша ұсынымдар дайындауды қамтитын процесс.
2. Жіктеме және анықтамалар
1. Авиациялық оқиғалар:
а) авиациялық оқиғалар;
б) авиациялық тосын оқиғалар;
в) төтенше оқиғалар;
г) жер-үсті оқиғалары болып бөлінеді.
2. Авиациялық оқиғалар олардың салдарына байланысты:
а) апаттар;
б) авариялар болып бөлінеді.
3. Авиациялық тосын оқиғалар, олардың қауіптілік дәрежесіне және салдарына байланысты:
а) авиациялық тосын оқиғалар;
б) елеулі авиациялық тосын оқиғалар болып бөлінеді.
Авиациялық оқиғаларды тексеруді ұйымдастыруға бірыңғай ұстанымды қамтамасыз ету мақсатында мынадай терминдер мен олардың анықтамалары қолданылады:
"авиациялық оқиға" - барысында ерекше жағдай туындаған (туындайтын) әуе кемесін ұшырып пайдалануға байланысты оқиға.
ерекше жағдай - қауіпті факторлардың пайда болуы (ықпал етуі) нәтижесінде әуе кемесін ұшырып пайдалану процесінде туындаған жағдай;
қауіпті фактор - пайда болуы ерекше жағдайдың туындауына және/немесе өршуіне әкеп соқтырған (әкеп соқтыратын немесе әкеп соқтыруы мүмкін) ықтимал себеп (фактор);
"авиациялық оқиға" - әуе кемесінің бортында болған қандай да бір адамның қаза табуына (өлімге әкеп соқтырған дене жарақатына) және/немесе осы әуе кемесінің мүлдем істен шығуына әкеп соқтырған әуе кемесін ұшырып пайдалануға байланысты оқиға.
Әуе кемесі:
әуе кемесі толық қирағанда;
әуе кемесінің (оның қалдықтарының) болатын жері анықталмағанда және оны ресми іздестіру тоқтатылғанда;
олардағы ақауларға қарамастан, әуе кемесін, оны мәжбүрлі қондыру орнынан эвакуациялау мүмкін болмағанда немесе орынсыз деп саналғанда;
әуе кемесін қалпына келтіру мүмкін болмағанда немесе экономикалық тұрғыдан орынсыз болғанда істен шықты деп саналады;
"авиациялық тосын оқиға" - мемлекеттік әуе кемесінің тұтастығына және/немесе оның бортындағы адамдардың өміріне қатер төнген немесе төнуі мүмкін мемлекеттік әуе кемесін ұшырып пайдалануға байланысты, бірақ авиациялық оқиғамен аяқталмаған оқиға;
"авария" — адам шығындарынсыз болған авиациялық оқиға;
"апат" - қандай да бір адамның өліміне әкелген дене жарақатына немесе әуе кемесі жолаушыларының немесе экипажы мүшелерінің хабарсыз кетуіне әкеп соқтырған авиациялық оқиға.
адамның өліміне әкелген дене жарақаты - тек дене жарақатының статистикалық деректерін бірегейлендіру мақсатында оның нәтижесінде оқиға болған сәттен бастап 30 күн ішінде адамның өліміне әкелген дене жарақаты ретінде жіктеледі;
"елеулі авиациялық тосын оқиға" - авиациялық оқиғаның болуын едәуір арттыруды сипаттайтын жағдайлардың туындауына байланысты авиациялық тосын оқиға, оны болдырмау үшін экипаждың және/немесе әуе қозғалысы ұйымы органдарының әуе қозғалысына әуе кемесінің қалыпты ұшу жағдайларында қолданылмайтын күрделі және/немесе шұғыл іс-қимылдармен қызмет көрсетуді орындауды талап етеді.
Елеулі авиациялық тосын оқиғаларға мынадай белгілер тән:
әуе кемесінің ұшырып пайдалану жағдайлары шегінен шығуы;
әуе кемесінің экипажына немесе жолаушыларына зиянды әсер етудің туындауы (түтін, булар, улы заттар, уытты газдар, жоғары немесе төмен температура, қысым және т.б.);
әуе кемесінің орнықтылық пен басқарушылық сипаттарының, ұшу немесе беріктілік сипаттарының едәуір нашарлауы;
әуе кемесі экипажы мүшелерінің жұмыс істеу қабілетінің едәуір төмендеуі;
әуе кемесінің экипажына психофизиологиялық жүктеменің едәуір артуы;
өрт, басқару элементтерінің бұзылуы немесе ажырауы, қозғалтқыштың, трансмиссияның оқшауланбаған бұзылуы нәтижесінде әуе кемесінің өмірлік маңызды элементтерінің нақты ықтимал зақымдануының туындауы;
"әуе кемесін ұшырып пайдалану" - ұшқыш құрамының әуе кемесін ұшу алдындағы тексеру жүргізуді бастағанынан бастап және әуе кемесінің бортындағы барлық адамдар ұшу мақсатында әуе кемесінен кеткен сәтке дейінгі кезеңді қамтитын әуе кемесін пайдалану процесі;
"жерүсті оқиғасы" - ол болған кезде әуе кемесі зақымданған және істен шыққан әуе кемесіне қызмет көрсетуге, сақтауға немесе тасымалдауға байланысты оқиға;
"авиациялық оқиғаның себептері (факторлары)" - авиациялық оқиғаға әкеп соқтырған іс-әрекет, әрекетсіздік, жағдайлар, шарттар немесе олардың үйлесуі;
"төтенше оқиға" - ол болған кезде мынадай салдардың бірі туындаған әуе кемесін пайдалануға байланысты авиациялық оқиғаға жатпайтын оқиға:
жауынгерлік ұшу уақытында террористік акт, әуе кемесін ұшырып әкету немесе ұшырып әкетуге әрекет ету салдарынан әуе кемесінің істен шығуы немесе оның бортындағы адамдардың қаза табуы;
әуе кемесін әуеайлақтан тысқары жерге мәжбүрлі қондырғаннан кейін сыртқы ортаның қолайсыз әсер етуі салдарынан әуе кемесінің бортындағы адамдардың қаза табуы;
басқа әуе кемесімен болған авиациялық оқиға салдарынан әуе кемесінің істен шығуы немесе жердегі (корабль полубасындағы) адамдардың қаза табуы;
төтенше жағдайлар аймақтарында арнайы міндеттерді орындау кезінде әуе кемесінің істен шығуы немесе онда болған адамдардың қаза табуы;
"оқиға болған мемлекет" - аумағында авиациялық оқиға орын алған мемлекет;
"әуе кемесі тіркелген мемлекет" - тізілімінде мемлекеттік әуе кемесі тіркелген мемлекет;
"әуе кемесін пайдаланушы мемлекет" - аумағында мемлекеттік әуе кемесін пайдаланатын ұйым қызметінің негізгі орны немесе, егер мемлекеттік әуе кемесін пайдаланатын ұйымның осындай қызмет орны болмаса, осы ұйымның тұрақты болатын орны орналасқан мемлекет;
"мүдделі мемлекеттер" - оқиға болған мемлекет;
әуе кемесі тіркелген мемлекет;
әуе кемесін пайдаланушы мемлекет;
әуе кемесін түпкілікті жинауға жауапты ұйымға қатысты заңды құзыры бар мемлекет;
әуе кемесінің үлгісін құрастыруға жауапты ұйымға қатысты заңды құзыры бар мемлекет, сондай-ақ авиациялық оқиға кезінде азаматтары қаза тапқан немесе дене жарақатын алған, мемлекет;
"тексеру жөніндегі комиссия төрағасы" - онда тиісті біліктіліктің бар болуына орай тексеруді ұйымдастыру мен жүргізу тапсырылған адам;
"уәкілетті өкіл" - осы Келісімге қатысушы мемлекеттің мемлекеттік авиациясының ұшу қауіпсіздігі уәкілетті органының басшысы басқа Тарап жүргізетін авиациялық оқиғаны тексеруге қатысуды тапсырған адам;
"уәкілетті өкілдің кеңесшісі" - тиісті біліктілігі бар және уәкілетті өкілге авиациялық оқиғаға тексеру жүргізуде көмек көрсететін адам;
"әуе қозғалысына қызмет көрсететін орган" - әуе қозғалысына (ұшуды басқаруға) қызмет көрсетуді не әуе кеңістігін пайдалану жөніндегі өзге де қызметті жүзеге асыратын әуе кеңістігін пайдаланушыларға әуе қозғалысына (ұшуды басқаруға) қызмет көрсететін орган.
3. Авиациялық оқиғаларды тексеру
Тексеруді ұйымдастыру
4. Мемлекеттік әуе кемелерімен болған авиациялық оқиғаларды тексеруді оқиға болған мемлекет болып табылатын осы Келісімге қатысушы мемлекеттің мемлекеттік авиациясының ұшу қауіпсіздігінің уәкілетті органы ұйымдастырады.
5. Оқиға болған мемлекет тексеру құқығын әуе кемесі тіркелген мемлекетке немесе осы Келісімге қатысушы басқа мүдделі мемлекетке беруге құқылы, ол жеке құжатпен ресімделеді.
Бұл жағдайда тексеруді тексеруге құқық берілген осы Келісімге қатысушы мемлекеттің мемлекеттік авиациясының ұшу қауіпсіздігінің уәкілетті органы ұйымдастырады.
6. Мемлекеттік әуе кемелерімен болған авиациялық оқиғаларды тексеруді тиісті мемлекет қатысушысы болып табылатын халықаралық шарттарға, осы Ережеге және оқиға болған мемлекеттің ұлттық заңнамасына сәйкес тексеруді жүргізетін осы Келісімге қатысушы мемлекеттің мемлекеттік авиациясы ұшу қауіпсіздігінің уәкілетті органы құрған комиссия жүргізеді.
7. Мүдделі мемлекеттер авиациялық оқиғаны тексеруге қатысу үшін өз уәкілетті өкілдері мен уәкілетті өкілдерінің кеңесшілерін тағайындауы мүмкін.
Уәкілетті өкілдердің құрамы туралы хабарлама дипломатиялық арналар арқылы жіберіледі.
8. Тексеру жүргізетін осы Келісімге қатысушы мемлекеттің мемлекеттік авиациясы ұшу қауіпсіздігінің уәкілетті органы авиациялық оқиғаны тексеру жөніндегі комиссия жұмыс органдарының құрамына мүдделі мемлекеттердің уәкілетті өкілдері мен уәкілетті өкілдерінің кеңесшілерін қамтиды.
9. Мүдделі мемлекеттердің уәкілетті өкілдері мен уәкілетті өкілдері кеңесшілерінің авиациялық оқиғаны тексеруге қатысу дәрежесін тексеру жүргізетін осы Келісімге қатысушы мемлекеттің мемлекеттік авиациясы ұшу қауіпсіздігінің уәкілетті органы айқындайды және комиссия төрағасымен келісу бойынша және оның бақылаумен оларға мынадай құқықты береді:
авиациялық оқиға орнына бару;
әуе кемесін немесе қираған әуе кемесінің бөлшектерін, сондай-ақ әуе кемелерінің ұшуын қамтамасыз ету құралдары мен объектілерін қарау;
куәгерлердің көрсеткіштерін қамтитын ақпаратты алу және олардан сұрау тақырыбын ұсыну;
авиациялық оқиғаға қатысты барлық заттай айғақтарға рұқсат алу;
авиациялық оқиғаға қатысты құжаттарды алу;
авиациялық оқиғаны тексеру мақсатында авиациялық оқиға орнынан тысқары жерлерде агрегаттарды қарау және зерттеу, техникалық консультациялар, сынаулар және модельдеу сияқты тексеру жөніндегі іс-шараларға қатысу;
авиациялық оқиға бойынша қорытындыларды, себептер мен ұсынымдарды тұжырымдауға байланысты кеңестерге қатысу.
10. Авиациялық оқиғаны тексеруге қатысатын адамдардың тиісті біліктілігі болуға тиіс, ол бойынша тексеру жүргізіліп жатқан ұшуды ұйымдастыруға, орындауға, қамтамасыз етуге немесе қызмет көрсетуге қатысы болмауға тиіс, сондай-ақ авиациялық оқиғаға қатысы бар заңды немесе жеке тұлғалардың алдында қаржылық міндеттемелері бар сақтандыру компанияларының мүдделерін білдіре алмайды.
11. Тексеруге тартылатын адамдарды оқиға болған мемлекеттің аумағына жеткізуді және кері қайтаруды осы өкілдерді жіберуші осы Келісімге қатысушы мемлекеттің мемлекеттік авиациясы ұшу қауіпсіздігі уәкілетті органының басшысы ұйымдастырады.
Комиссия мүшелері мен тексеруге тартылатын адамдарды авиациялық оқиға болған орынға тасымалдауды және кері қайтаруды оқиға болған орын мемлекеті мемлекеттік авиациясы ұшу қауіпсіздігі уәкілетті органының басшысы ұйымдастырады.
12. Осы Келісімге қатысушы мемлекеттің атқарушы билік органдары, ұйымдары, дипломатиялық өкілдіктері мен консулдық мекемелері комиссияның жұмысына жәрдем көрсетеді.
Авиациялық оқиға туралы хабардар ету
13. Авиациялық оқиға болған жағдайда әуе кемесінің ұшуына тікелей басшылықты (басқаруды) жүзеге асыратын әуе қозғалысына қызмет көрсету органдары оқиға болған мемлекеттің ұлттық заңнамасына сәйкес әрекет етеді.
14. Оқиға болған мемлекеттің мемлекеттік авиациясы ұшу қауіпсіздігінің уәкілетті органы авиациялық оқиға туралы әуе кемесін тіркеген мемлекетті, әуе кемесін пайдаланушы мемлекеттің мемлекеттік авиациясы ұшу қауіпсіздігінің уәкілетті органдарын, ал қажет болған жағдайда басқа да мүдделі мемлекеттердің мемлекеттік авиациясы ұшу қауіпсіздігінің уәкілетті органдарын дереу хабардар етеді.
Авиациялық оқиға кезіндегі лауазымды адамдардың іс-әрекеті
15. Әуе кемесін іздестіруді ұйымдастыру, оның жолаушылары мен экипаж мүшелерін құтқару, оларға көмек көрсету оқиға болған мемлекеттің ұлттық заңнамасына сәйкес жүзеге асырылады.
16. Мүдделі мемлекеттер тиісті ұйымдарының басшылары авиациялық оқиға туралы ақпаратты алғаннан кейін осы әуе кемесін әзірлеуге, сынауға, жасауға, жөндеуге және пайдалануға қатысты құжаттаманың сақталуын қамтамасыз ету және оның ұшуын қамтамасыз ету жөніндегі шараларды қабылдауға міндетті.
17. Ұшудан оралмаған мемлекеттік әуе кемесін іздестіруді тоқтату туралы шешімді әуе кемесін пайдаланушы мемлекеттің атқарушы билік органымен немесе ұйымының басшысымен келісім бойынша оқиға болған мемлекеттің мемлекеттік авиациясы ұшулар қауіпсіздігі уәкілетті органының басшысы қабылдайды.
18. Мемлекеттік әуе кемесін эвакуациялаудың орындылығы туралы шешімді комиссия төрағасымен келісім бойынша әуе кемесін тіркеген мемлекеттің атқарушы билік органдары мен ұйымдарының басшылары қабылдайды.
4. Авиациялық оқиға туралы
ақпаратқа жариялылық беру тәртібі
19. Авиациялық оқиға фактісі туралы ақпаратқа жариялылық беру тәртібі осы Келісімге қатысушы мемлекеттің ұлттық заңнамасымен айқындалады.
20. Авиациялық оқиғаны тексеру барысында алынған және авиациялық оқиғаға қатысы бар кез келген мәлімдемелерді және адамдардың куәгерлік етуін, кез келген хат алмасуларды қамтитын ақпаратқа, авиациялық оқиға туралы басқа да мәліметтерге тексеруді жүзеге асыратын құқық қорғау органдарымен келісім бойынша ғана жариялылық берілуі мүмкін.
21. Авиациялық оқиға жағдайларына қатысты жаңадан белгілі болған ақпаратты тексеруге қатысушылар комиссия төрағасына баяндайды. Олар комиссия төрағасының келісімімен осы ақпаратты ұшу қауіпсіздігін арттыруға бағытталған шараларды қабылдау үшін пайдалануы мүмкін. Тексеру процесіне зиян келтірмеу үшін көрсетілген ақпарат қандай да бір жағдайлар болмасын комиссия құрамына кірмейтін адамдарға немесе авиациялық оқиғаны тексеруді жүргізу үшін тартылмайтын мамандарға берілмейді немесе олармен талқыланбайды.