Астанада жолаушыларды және жүкті автомобиль көлігімен тасымалдау ережесін бекіту туралы

      "Қазақстан Республикасы астанасының мәртебесі туралы" Қазақстан Республикасының 2007 жылғы 21 шілдедегі Заңының 6-бабына сәйкес Қазақстан Республикасының Үкіметі ҚАУЛЫ ЕТЕДІ :

      1. Қоса беріліп отырған Астанада жолаушыларды және жүкті автомобиль көлігімен тасымалдау ережесі бекітілсін.

      2. Осы қаулы алғаш рет ресми жарияланған күнінен бастап он күнтізбелік күн өткен соң қолданысқа енгізіледі.

Астанада жолаушыларды және жүкті автомобиль көлігімен
тасымалдау ережесі
Жалпы ережелер

      1. Осы Астанада жолаушыларды және жүкті автомобиль көлігімен тасымалдау ережесі (бұдан әрі - Ереже) Қазақстан Республикасының астанасында жолаушыларды және жүкті автомобиль көлігімен тасымалдауды ұйымдастыру мен жүзеге асыру тәртібін белгілейді.

      2. Ереже Қазақстан Республикасы астанасының аумағында қолданылады.

      3. Ережеде пайдаланылатын негізгі ұғымдар:

      жүк - буып-түйілген және осы Ережеде белгіленген нормалар шегінде автобуста, сондай-ақ тасымалдаушымен қосымша келісім негізінде таксиде тасымалданатын жолаушы мүлкі;

      билет - жолаушының жол жүруді жүзеге асыру құқығын куәландыратын және жолаушыны автомобильмен тасымалдау шартының жасалғанын растайтын құжат;

      борт журналы - оған автокөлік құралының рейс алдындағы техникалық тексеруден және жүргізушінің рейс алдындағы (ауысым алдындағы) медициналық тексеруден өткені туралы белгілер қойылатын, автокөлік құралында болатын, нөмірленген және тігілген журнал;

      жол полициясы - астанада жол қозғалысы қауіпсіздігін қамтамасыз ету саласындағы арнайы функцияларды жүзеге асыратын аумақтық ішкі істер органы;

      бағыт - жолаушыларды және жүкті автомобильмен тұрақты тасымалдауды ұйымдастыру үдерісінде анықталған, белгіленген бастапқы, аралық және соңғы пункттер мен қозғалыс кестелерінің арасында жүретін жол;

      жаппай тасымалдау - екі немесе одан да көп көлік құралдарының тобы жүзеге асыратын, көлік легіндегі қозғалыста, не белгіленген режимде бағыт бойынша және соңғы пункттерде қозғалысты қосымша бақылау арқылы ұйымдастырылатын тасымал;

      қауіпті учаскелер - жүріп өтуі жол-көлік оқиғасына әкеп соғудың жоғары қаупі бар немесе қозғалыс режимінің елеулі өзгерістерімен байланысты автомобиль жолдарының учаскелері;

      астананың көлік органы - астана аумағында көлік саласындағы реттеуді жүзеге асыруға Астана әкімі уәкілеттік берген жергілікті атқарушы орган;

      көліктік бақылау органы - көлік саласындағы арнайы функцияларды жүзеге асыратын Қазақстан Республикасы Көлік және коммуникация министрлігі Көліктік бақылау комитетінің аумақтық органы;

      жолаушыларды отырғызу және түсіру пункті (аялдама пункті) - осы Ереженің талаптарына сәйкес жайластырылған, жолаушыларды отырғызу және түсіру мақсатында автокөлік құралдарының аялдауына арналған орын;

      қозғалыс кестесі - жолаушыларды және жүкті автомобильмен тұрақты тасымалдау бағытының әрбір аялдама пункті бойынша автобустардың, шағын автобустардың қозғалыс орны мен уақыты туралы мәліметтер қамтылған кесте;

      рейс - автобус, шағын автобус бағытының бастапқы пунктінен соңғы пунктіне дейінгі жолы;

      бағыттың схемасы - аялдама пункттері, олардың арасындағы арақашықтық, сондай-ақ оларға тән бағдарлар (жол айрықтары, қиылыстар, темір жол өтпелері, көпірлер, тоннельдер және т.б.) көрсетіле отырып, бағытты графикалық түрде шартты бейнелеу.

      4. Ұйымдастыру сипаты бойынша жолаушыларды және жүкті автомобильмен тасымалдау тұрақты әрі тұрақты емес болып бөлінеді.

      5. Жолаушыларды және жүкті автомобильмен тұрақты тасымалдауды астананың көлік органы бекіткен бағыттар бойынша автобустар мен шағын автобустар жүзеге асырады.

      Қалалық бағыттарда жолаушыларды және жүкті автомобильмен тұрақты тасымалдауды ұйымдастыру кезінде тасымалдауды жүзеге асыру үшін пайдаланылатын көлік құралдары (автобустар немесе шағын автобустар) күні бұрын белгіленеді.

      6. Жолаушыларды және жүкті автомобильмен тұрақты тасымалдауды жүзеге асыру кезінде тасымалдаушы жүргізушінің рейс алдындағы (ауысым алдындағы) медициналық тексеруден және автокөлік құралының техникалық тексеруден өткені туралы белгілері бар жол қағазының автокөлік құралында болуын қамтамасыз етеді.

      7. Жолаушыларды және жүкті автомобильмен тұрақты емес тасымалдау тасымалдаушылардың жеке бастамасы бойынша ұйымдастырылады және осы Ереже талаптарына сәйкес келетін автобустарды, шағын автобустар мен жеңіл автомобильдерді пайдалану арқылы жүзеге асырылады.

      8. Жолаушылардың және жүктің тұрақты емес тасымалдары бір жолғы сипаты бар тасымалдау, тапсырыс берілген автобустармен, шағын автобустармен және жеңіл автомобильдермен тасымалдау, сондай-ақ таксимен тасымалдау болып бөлінеді.

      9. Жолаушыларды және жүкті автомобильмен тасымалдауға Қазақстан Республикасының заңнамасына сәйкес техникалық тексеруден өткен автокөлік құралдары жіберіледі.

      10. Жолаушыларды және жүкті тасымалдаудың тұрақты автомобиль тасымалдары кезінде пайдаланылатын автобустар мен шағын автобустар тиісті техникалық регламенттердің талаптарына сәйкес келуі тиіс, бұл ретте кемінде екі жолаушы есігі бар қалалық автобустар ғана пайдаланылады.

      11. Астананың тұрақты қалалық бағыттарында қызмет көрсету мерзімі 14 жылдан аспайтын автобустар пайдаланылады.

      12. Жолаушылардың және жүктің қалалық тұрақты автомобиль тасымалдары кезінде пайдаланылатын автобустардың салонында мыналарды қамтитын ақпараттық тақтайша болуы тиіс:

      1) тасымалдаушының толық атауы;

      2) тасымалдаушының, тасымалдауды ұйымдастырушының, сондай-ақ Қазақстан Республикасы Ішкі істер министрлігінің Әкімшілік полиция комитеті аумақтық басқармаларының (бұдан әрі – жол полициясы органдары) байланыс телефондарының нөмірлері;

      3) бағыт схемасының көшірмесі мен қозғалыс кестесі;

      4) бағыт бойынша жол жүруге және жүкті алып жүруге арналып белгіленген тариф;

      5) ақы төлемей жол жүргені және/немесе жүкті алып жүргені үшін белгіленген айыппұлдың мөлшері;

      6) жолаушылардың құқықтары мен міндеттері;

      7) тыйым салулар туралы ақпарат және арнайы орындардың белгілері бар пиктограммалар.

      Жолаушылардың және жүктің қалалық тұрақты автомобиль тасымалдары кезінде пайдаланылатын автобустар бағыттағы диспетчерлік сүйемелдеу жүйесінің аялдамаларды жариялайтын, дауысы қатты шығатын автоматтандырылған құрылғысымен және желідегі жұмысты бақылау үшін жолаушылар ағынын есептеудің автоматтандырылған құрылғысымен (тасымалдауды ұйымдастырушының тиісті талабы болса) жабдықталады.

      13. Жолаушылардың және жүктің қалалық тұрақты автомобиль тасымалдары кезінде пайдаланылатын автобустардың алдыңғы және артқы жақтарында бағыт нөмірі көрсетіле отырып, белгіленген үлгідегі трафареттер орнатылады.

      Бағыттың нөмірі ашық сары түсті аяда қара түспен (қаріптің биіктігі кемінде 120 мм) жазылуы тиіс. Жедел тасымалдауды жүзеге асырған жағдайда трафаретте бағыт нөмірінің астында қызыл түсті (қаріптің биіктігі кемінде 60 мм) "Жедел" деген жазу болуы тиіс.

      14. Жолаушылардың және жүктің тұрақты қалалық бағыттардағы автомобиль тасымалдарында пайдаланылатын автобустар салонының оң жағында жолаушы есіктерінің бірінің жанында бағыттың нөмірі мен мемлекеттік және орыс тілдеріндегі қысқаша сипаттамасы (бағыт өтетін аралық және соңғы аялдамалардың, қоғамдық маңызы бар орындардың) бар трафарет орнатылуы тиіс.

      15. Жолаушылардың және жүктің тұрақты қалалық бағыттардағы автомобиль тасымалдарында пайдаланылатын автобустардың алдыңғы жағында, жанында және артқы жақтарында белгіленген нысандағы гараждық нөмірлері қойылады.

      16. Балалардың ұйымдастырылған топтарын тасымалдау кемінде екі есігі бар автобустармен жүзеге асырылуы тиіс. Бұдан басқа, бұл автобустардың алдында және артында "Балаларды тасымалдау" деген айырым белгілері мен сары түсті жарқырауық шамдар орнатылады. Ұйымдастырылған балалар топтарын тасымалдауға жасы кемінде жиырма бестегі, тиісті санаттағы жүргізуші куәлігі және кемінде бес жыл жұмыс өтілі бар жүргізушіге рұқсат етіледі.

      17. Жолаушыларды және жүкті автомобильмен тұрақты тасымалдауда пайдаланылатын автобустар салонының алдыңғы бөлігінде мүгедектерге, зейнеткерлерге, жүкті әйелдерге және мектеп жасына дейінгі балалары бар жолаушыларға арналған орындар көзделеді. Осы орындардың жанында олардың пайдаланылу мақсатын көрсететін ақпараттық тақтайша орнатылуы тиіс.

      18. Қалалық автобустар, таксилер мен қалалық электр көлігі салондарында белгіленбеген орындарда темекі шегу заңнамаға сәйкес жауапкершілікке тартуға әкеп соғады.

Жолаушыларды және жүкті автомобильмен тұрақты тасымалдау
бағыттарын ашу, жабу және өзгерту тәртібі

      19. Жолаушыларды және жүкті автомобильмен тасымалдау тұрақты қалалық бағыттарын ашу, жабу және өзгерту мәселелері бойынша мүдделі жеке және заңды тұлғалар астананың көлік органына тиісті ұсыныстарын жібереді.

      20. Жолаушыларды және жүкті автомобильмен тасымалдау тұрақты бағыттарын ашу жөніндегі мәселелерді шешу үшін мүдделі жеке және заңды тұлғалар бағыт схемасы мен ол бойынша қозғалыс кестесін әзірлейді және оларды астананың көлік органына жібереді.

      21. Жолаушыларды және жүкті тұрақты тасымалдау, егер:

      1) автомобиль жолдарының өткізу қабілеті белгілі бір бағыттар бойынша автобустардың тұрақты қозғалысын жүзеге асыруға мүмкіндік берсе;

      2) автомобиль жолдарының жай-күйі және оларды жайластыру жол қозғалысы қауіпсіздігінің талаптарына сәйкес келсе, ұйымдастырылуы мүмкін.

      22. Жолаушыларды және жүкті автомобиль көлігімен тұрақты тасымалдаудың бағыттық желісін қалыптастырған кезде мынадай қағидаттардың орындалуы қамтамасыз етіледі:

      әрбір бағыт бойынша халықтың тасымалдауға қажеттілігін қанағаттандыру;

      белгіленген нормалар бойынша автобустар сыйымдылығын ұтымды пайдалану;

      жүру жолында жолаушыларға қажетті жағдайлар жасау;

      жолдардың өткізу қабілетін, аялдама пункттерін және инфрақұрылымның басқа да объектілерін сақтау;

      автобустарды пайдалану нормативтері мен ережесін, жол қозғалысының қауіпсіздігі талаптарын сақтау;

      сапардағы жолаушылардың уақыт шығынын барынша азайту;

      барлық түйіндес бағыттар бойынша автобустар қозғалысының кезеңділігі;

      жүргізушілердің еңбек режимі мен демалысын сақтау.

      23. Жолаушылардың және жүктің тұрақты автомобиль тасымалдарының бағыттарын ұйымдастыру мен есепке алуды жоспарлау мақсатында астананың көлік органы жолаушылардың және жүктің қалалық тұрақты автомобиль тасымалдары бағыттарының тізілімін жүргізуді жүзеге асырады.

      24. Тізілімдерде бағыттардың мынадай негізгі сипаттамалары:

      жүрудің бастапқы және соңғы пункттері бойынша бағыттардың нөмірі және атауы;

      тікелей және кері қайту бағыттарындағы бағыттағы аралық пункттер саны және атауы;

      тікелей және кері қайту бағыттарындағы бағыт ұзақтығы;

      тікелей және кері қайту бағыттарындағы бағыттағы қозғалыстың орташа пайдалану жылдамдығы;

      бағытқа қызмет көрсету кезеңі: жыл бойы, қосымша (белгілі бір күндерде және тәулік кезеңдерінде қолданылатын (қалалық бағыттарда демалыс, мерекелік күндер немесе "қауырт" сағаттар), маусымдық (алдын ала белгіленген уақыт аралығы ішінде қолданылатын (саяжай кезеңінде, демалыс аймақтары жұмыс істеген кезде, жолаушылар ағыны көбейген кезеңде);

      бағыттар бойынша қозғалыс кестесі;

      жолаушылар ағыны және жолаушылар айналымы;

      жолаушыларға және жалпы отыруға арналған орындар бойынша бағыттағы автобустардың, шағын автобустардың сыныбы және паспорттық сыйымдылығы (жинақтау алаңшасының сыйымдылығын ескере отырып);

      резервтік жылжымалы құрамды ескере отырып, бағытта қызмет көрсету үшін қажетті автобустардың, шағын автобустардың саны;

      тасымалдаушы туралы мәліметтер (атауы, мекен-жайы, тегі, аты, әкесінің аты, тасымалдауды ұйымдастыратын жауапты басшының және тұлғаның телефоны) және оған берілген рұқсат ету құжаттарының қолданылу кезеңі қамтылады.

      25. Ашылатын, сондай-ақ қолданыстағы астананың жолаушыларды және жүкті тұрақты қалалық автомобильмен тасымалдау бағыттары автомобиль жолы инфрақұрылымының техникалық жай-күйі мен ұстау деңгейі тасымалдау қауіпсіздігінің талаптарына сәйкестігін бағалау мақсатында тексерілуі тиіс.

      Бағыттарды тексеруді құрамын астананың көлік органы бекітетін комиссия өткізеді.

      26. Әрбір тексеру мен қозғалыс кестелерін келісудің нәтижелері қолданыстағы және болжамды жолаушылар ағынын ескере отырып, қозғалыстың белгілі бір кестелері бойынша бағыттарды ашу мүмкіндігі, одан әрі пайдаланудың немесе жабудың орындылығы туралы қорытындысы берілетін актімен ресімделеді.

      27. Тексерудің актілері бағыттарды ашу, өзгерту немесе пайдалануды жалғастыру, тасымалдардың қауіпсіздігін арттыру, анықталған кемшіліктердің жойылуын бақылауды ұйымдастыру жөнінде шаралар қолдану мәселесін шешу үшін астананың көлік органына тапсырылады.

      28. Астананың көлік органы аялдау пункттерін орнатуды, ауыстыруды және ұстауды іске асырады.

      Көлік жүйелерінің алуан түрлері үшін ғимараттарда және құрылыстарда құрамдастырылған аялдау пункттерін ұйымдастыруға жол беріледі.

Автобустар қозғалысына диспетчерлік жетекшілік жүргізу

      29. Тұрақты халықаралық, қалааралық облысаралық, қалааралық облысішілік, қала маңындағы және елді мекендерді: кенттерді, ауылдарды (селоларды) астанамен қосатын бағыттарға диспетчерлік жетекшілік жүргізуді автовокзалдың диспетчерлік қызметі немесе бірыңғай диспетчерлік қызмет қана жүзеге асырады.

      30. Астанада автовокзалдың, автостанциялардың және тасымалдаушылардың диспетчерлік қызметтері мынадай функцияларды:

      1) бағыттағы, соның ішінде ауа райы-климаттық немесе жолдағы басқа да жағдайларға байланысты қозғалыстың ерекшеліктері туралы жүргізушілерге нұсқау беруді;

      2) жүргізушілерде нақты бағыт бойынша жолаушыларды тасымалдауды жүзеге асыруға арналған қажетті құжаттарының (куәлігінің немесе рұқсатының, техникалық білім минимумы оқу курсынан өткені туралы анықтамасының, бағыттар схемасының, жол қағазының) болуын бақылауды;

      3) кондукторда бағыт бойынша жолаушыларды тасымалдауды жүзеге асыруға арналған қажетті құжаттарының (техникалық білім минимумы курсынан өткені туралы анықтамасының, біржолғы билеттердің) болуын бақылауды;

      4) заңнамаға сәйкес өзге де функцияларды орындайды.

      31. Астананың қалалық бағыттарына жалпы диспетчерлік жетекшілік жүргізуді астананың көлік органымен және тұрақты қалалық бағыттардың барлық тасымалдаушыларымен шарт негізінде бірыңғай диспетчерлік қызмет жүзеге асырады.

      32. Бірыңғай диспетчерлік қызмет мынадай функцияларды:

      1) тасымалдаушылар мен олардың диспетчерлік қызметтерін бағыт бойынша жүрудің қиындықтары, оның ішінде ауа райы-климаттық немесе жолдағы басқа жағдайларға байланысты қозғалыстың шектелуі немесе тыйым салу туралы хабардар етуді;

      2) бағыт бойынша жүрудің қиындықтары туралы оның ішінде ауа райы-климаттық немесе жолдағы басқа да жағдайларға байланысты қозғалыстың шектелуі немесе жүрудің мүмкін еместігі туралы жол органдарын, жол-патрульдік полициясы, азаматтық қорғау органдарын хабардар етуді;

      3) астананың көлік органын жолаушылардың және жүктің тұрақты қалалық автомобиль тасымалдарын жүзеге асыратын тасымалдаушылардың қозғалыс кестелерін (графиктерін) әрі осы Ереженің шарттарын басқа да бұзғаны туралы хабардар етуді;

      4) заңнамаға сәйкес өзге де функцияларды орындайды.

Жолаушыларды және жүкті тұрақты қалалық автомобильмен
тасымалдаудың бағыттарына қызмет көрсету құқығына
конкурстар ұйымдастыру және оларды өткізу тәртібі

      33. Бағыттарға қызмет көрсету құқығына конкурста (бұдан әрі - конкурс) жеңген тасымалдаушылар, олардың және астананың көлік органы арасында жасалатын жолаушыларды және жүкті тұрақты қалалық автомобильмен тасымалдауды ұйымдастыру шарттарының негізінде жолаушыларды және жүкті тұрақты қалалық автомобильмен тасымалдауды жүзеге асырады.

      34. Конкурсқа меншік құқығында немесе өзге заңды негіздерде автобустарға, шағын автобустарға иелік етуші, осы Ереженің талаптарына сәйкес тасымалдауды ұйымдастыруға және автобустарға, шағын автобустарға заңнама талаптарына сәйкес техникалық қызмет көрсету мен жөндеуді қамтамасыз етуге қабілетті, меншік нысанына қарамастан кез келген жеке немесе заңды тұлға қатыса алады.

      35. Жолаушыларды және жүкті тұрақты қалалық автомобиль тасымалдарының бағыттары тасымалдаушылардың арасында конкурс негізінде бөлінеді. Конкурсқа жекелеген бағыт та, бірнеше бағыт та бір лотпен шығарылуы мүмкін. Лоттарды қалыптастыру кезінде олардың маңыздылығы мен рентабельділігі ескеріледі. Лотқа рентабельділерімен қатар, рентабельді еместері де, бірақ бір лотқа екеуден аспайтын бағыттар енгізілуі мүмкін.

      36. Астананың көлік органы конкурсты ұйымдастырушы болып табылады.

      37. Нақты бағытқа (лот бағыттарына) қызмет көрсету құқығына конкурстың жеңімпазы болып, жолаушыларға сапалы қызмет көрсетуді және осы бағытта (лот бағыттарында) тасымалдау қауіпсіздігін қамтамасыз етуді ескере отырып, көлік талаптарына сәйкес келетін әрі тасымалдаудың неғұрлым жақсы жағдайларын ұсынған және тиісті бағалау шкаласы (қосымша) бойынша есептелген баллдардың неғұрлым көп санын алған қатысушы танылады.

      38. Астана әкімдігі жолаушыларды және жүкті тұрақты қалалық автомобиль тасымалдарының бағыттары бойынша конкурсқа қатысушылар ұсынған тарифтен төменірек әрі тиісті жолаушыларды және жүкті тасымалдаудың тарифтерін есептеу әдістемесіне сәйкес анықталған тарифтер белгілеуі мүмкін.

      Астана әкімдігі белгілеген тарифтер осы тармақта көрсетілген тасымалдардың шығындарын жаппаған жағдайда, астана әкімдігі тасымалдаушыға белгіленген тариф пен тасымалдаудың нақты шығындарының арасындағы айырманы жергілікті бюджет қаражатының есебінен өтейді.

      39. Жолаушыларды және жүкті тұрақты қалалық автомобиль тасымалдарының бағыттары бойынша жол жүру тарифтері өзгерген жағдайда, астана әкімдігі аталған өзгерістер туралы халыққа бұқаралық ақпарат құралдары арқылы жаңа тарифтер бойынша тасымалдауды жүзеге асыру басталғанға дейінгі он күнтізбелік күннен кешіктірмей хабарлайды.

      40. Конкурстың ұзақтығы, оны жариялаған күннен бастап және конкурстың нәтижелері туралы хаттамаға қол қойылған күнмен аяқталып, кемінде 30 және ең көп дегенде 60 күнтізбелік күнді қамтуы тиіс.

      41. Конкурстық ұсыныстарды қарау, оларды бағалау және конкурстың жеңімпаздарын анықтау үшін құрамы астана әкімінің өкімімен белгіленетін конкурстық комиссия (бұдан әрі - комиссия) құрылады.

      42. Комиссияға:

      1) астананың көлік органының;

      2) көліктік бақылау органының;

      3) жол полициясының өкілдері кіреді.

      Комиссияның құрамына астананың көлік органына тиісті өтінім берілген жағдайда, жолаушыларды автокөлікпен тасымалдау қоғамдық бірлестіктерінің өкілдері енгізіледі.

      43. Комиссия құрамында конкурстық ұсыныстарды бағалау құқығынсыз комиссия жұмысын ұйымдастыру қызметі жүктелетін комиссия хатшысы көзделуі тиіс.

      44. Комиссия мүшелерінің саны тақ болуы және кемінде бес адамды құрауы тиіс.

      45. Конкурсты өткізу алдында астананың көлік органы комиссиямен келісілген лоттарды қалыптастырады және конкурстық құжаттаманың жиынтығын дайындайды.

      Бұл ретте қалыптастырылатын лоттарды келісу жөнінде шешім қабылдауды отырыс хаттамасында шешімді бекіте отырып, комиссия жүзеге асырады.

      46. Конкурстық құжаттаманың жиынтығы өзіне:

      1) конкурсқа шығарылатын жолаушыларды және жүкті қалалық тұрақты автомобиль тасымалдары бағыттарының негізгі сипаттамаларын, сондай-ақ оларға қоса берілетін бағыттардың схемалары мен қозғалыстар кестелерін, жылжымалы құрамды жаңарту қажеттілігінің кестесі, экологиялық талаптар, жүргізушілер (кондукторлар) мен диспетчерлердің арнайы киім-кешегі мен киім нысанының қажеттілігін;

      2) конкурсқа шығарылатын жолаушылардың және жүктің тұрақты қалалық автомобиль тасымалдарының бағыттарына қызмет көрсетуге конкурстық ұсыныстар толтырылатын нысандарын (бұдан әрі - конкурстық ұсыныстар) комиссия мүшелері санына тең мөлшерде;

      3) жолаушыларды және жүкті тұрақты қалалық автомобиль тасымалдарын ұйымдастыру шартының жобасын;

      4) қатысушы туралы ақпарат бланкісін;

      5) бағалау шкаласын;

      6) конкурстық ұсыныстарды беру үшін бір үлкен конвертті (егер конкурсқа бағыттар бір лоттан артық шығарылса, онда әрбір лотқа жеке конверттер болуы тиіс) қамтиды.

      47. Конкурстық ұсыныстар, комиссия конкурстың қорытындысы бойынша қатысушыларды бағалауды жүргізетін мынадай өлшемдердің жинағын өзіне қамтиды:

      1) ұсынылып отырған жылжымалы құрам (автобустардың, шағын автобустардың түрі, санаты мен саны, пайдалану мерзімі, паспорттық сыйымдылығы);

      2) көлік құралдарының тиесілігі;

      3) жылжымалы құрамды сақтауға, оған техникалық қызмет көрсетуге және жөндеуге арналған өндірістік-техникалық базаның болуы (меншікті немесе шарт бойынша пайдаланылатын);

      4) үміткердің басшылық буынының қалалық бағыттардағы жұмыс тәжірибесі;

      5) жүргізуші персоналының жолаушылар тасымалы саласындағы жұмыс тәжірибесі;

      6) желіден шығып қалған жылжымалы бірліктерді ауыстыру жөніндегі шаралар жүйесі;

      7) жолаушылар тасымалын жүзеге асыру жөніндегі қосымша ұсыныстар.

      48. Конкурстық ұсыныстарда жылжымалы құрам мен жүргізуші персоналын бір бағыттан артық, осы бағыт кіретін лот бойынша конкурс аяқталғанға дейін қайталап көрсетуге жол берілмейді.

      Осы бағыт қамтылған лот бойынша конкурс аяқталғанға дейін конкурстық ұсыныстарда қатысушылар жылжымалы құрам мен жүргізуші персоналын бір бағыттан артық көрсету фактілері анықталған жағдайда, неғұрлым кештеу тапсырылған конкурстық ұсыныстар жарамсыз болып саналады.

      49. Қатысушы конкурстық ұсыныстар бойынша толық және сенімді ақпаратты ұсынуы тиіс.

      50. Астананың көлік органы конкурс өткізілгенге дейін 30 күнтізбелік күннен кешіктірмей, конкурстың өткізілетін күнін, орнын және уақытын, конкурсқа қатысу үшін міндетті шарттарды, өтінімдерді қабылдау орны мен мерзімдерін бұқаралық ақпарат құралдары арқылы хабарлайды.

      51. Конкурс өткізу туралы хабарландыру жарияланған күннен бастап бес жұмыс күні ішінде комиссия конкурс өткізу мәселелері бойынша конкурс алдындағы конференция өткізеді.

      52. Комиссия төрағасы конкурсқа қатысушылар ұсынған мәліметтердің шынайылығын орнына барып тексеруді (бұдан әрі - тексеру) ұйымдастыру үшін комиссия құрамына кірмейтін астана көлік органының, көліктік бақылау және жол полициясы органдарының өкілдерінен конкурс алдындағы комиссия құрады.

      Комиссия төрағасының болмауына байланысты конкурс алдындағы комиссия құрамы туралы шешімді уақтылы қабылдау мүмкін болмаған жағдайда, комиссия конкурс алдындағы комиссия құрамын алқалы түрде анықтай алады.

      53. Конкурсқа қатысуға тілек білдірушілер конкурстық құжаттаманың жиынтығына жазбаша түрде өтінім береді және оның құнын төлейді. Конкурстық құжаттама жиынтығының құны, конкурс өткізуге байланысты шығындардың калькуляциясына сәйкес болуы тиіс, бірақ конкурс өткізу туралы хабарландыру шығатын күнге бекітілген айлық есептік көрсеткіштің 10 есе мөлшерінен аспауы тиіс.

      54. Осы Ереженің 47-тармағының 1), 3) және 5) тармақшаларында көрсетілген құжаттар, конкурсқа қатысушылар үшін дайындалған конкурстық құжаттаманың жиынтығы астананың көлік органының мөрімен куәландырылуы тиіс.

      55. Конкурсқа қатысушыларды тіркеу конкурс туралы хабарландыру жарияланған күннен басталады және оның басталуына дейін бес жұмыс күні бұрын аяқталады.

      56. Конкурсқа қатысушы ретінде тіркелу үшін тиісті лот бойынша конкурсқа қатысуға өтінімді (бұдан әрі - өтінім) комиссияға конкурстық құжаттамаға қоса берілетін конвертке салынған мынадай құжаттарды:

      1) қатысушы туралы толтырылған ақпарат бланкісін;

      2) заңды тұлғаның немесе өз қызметін заңды тұлғаны құрмай жүзеге асыратын кәсіпкердің мемлекеттік тіркелуі туралы куәліктің көшірмесін;

      3) автокөлік құралдары иелерінің азаматтық-құқықтық жауапкершілігін міндетті сақтандыру шарттарының және жолаушылар алдында тасымалдаушының азаматтық-құқықтық жауапкершілігін міндетті сақтандыру шарттарының көшірмелерін;

      4) конкурс кезеңінің алдындағы жарты жылдағы тасымалдауға ұсынылатын бүкіл жылжымалы құрамға техникалық паспорттардың және мемлекеттік техникалық тексеруден өткені туралы куәліктердің көшірмелерін;

      5) конкурстық құжаттама жиынтығына салынған нысандар санына тең санда қатысушының қолымен толтырылған әрі оның мөрімен куәландырылған конкурстық ұсыныстарды табыс етуі қажет.

      Конкурстық ұсыныстар стандартты ақ парақтарда біркелкі, түзетілмей және былғамай ресімделеді.

      57. Комиссияның хатшысы мерзімінде берілген өтінімдерді қабылдайды және қатысушыға құжаттардың қабылданғаны туралы хабарлама (анықтама) беріледі, содан кейін конкурстық ұсыныстарға өзгерістер мен толықтырулар енгізуге жол берілмейді.

      Конкурс өткізу туралы хабарландыруда көрсетілген мерзімдерді бұзып берілген өтінімдер мен оларға қоса берілетін құжаттарды комиссия қарамайды.

      58. Өтінімдерді қабылдау осы Ереженің 56-тармағында көзделген барлық құжаттар болған кезде жүргізіледі.

      59. Қабылданған өтінімдермен қатар конкурс алдындағы комиссия тексеру жүргізу кестесін жасайды және 3 күннен кешіктірмей әрбір қатысушыны тексеру уақыты туралы жазбаша түрде хабардар етеді. Қатысушы тексеру өткізілетін күні конкурс алдындағы комиссияға барлық қажетті материалдарды ұсынады және оларды талап етілетін объектілермен таныстыру мүмкіндігін қамтамасыз етеді.

      60. Конкурс алдындағы комиссия мүшелері ұсынылған конкурстық құжаттамаға қоса берілетін құжаттар көшірмелерінің шынайылығын, конкурстық қосымшаларда көрсетілген автокөлік құралдарының сыныптарының, модельдері мен тіркеу нөмірлерінің сәйкестігін, сондай-ақ конкурстық ұсыныстарда көрсетілген өндірістік-техникалық базада жылжымалы құрамды сақтау, оған техникалық қызмет көрсету және жөндеу мүмкіндігін тексереді.

      Конкурс алдындағы комиссия тексеру қорытындылары бойынша қатысушы туралы ақпарат толтырылған бланкіде конкурстық ұсыныстарда ұсынылған мәліметтердің шынайылығы туралы белгі қояды және қатысушының конкурстық ұсыныстарында көрсетілген автокөлік құралдарының осы Ережеде көрсетілген талаптарға сәйкестігі туралы анықтаманы (бұдан әрі - анықтама) қоса береді.

      Уақытты оңтайландыру үшін конкурстық ұсыныстарда ұсынылған мәліметтердің шынайылығы туралы пікірлер білдіру мақсатында тексеру объектілері және түрлері бойынша конкурс алдындағы комиссия мүшелерін бөлуге жол беріледі.

      Көрсетілген құжаттар қатысушы ұсынған өтініммен және құжаттармен бірге тиісті конвертте мөрмен бастырылады.

      61. Конкурс өткізілетін күні комиссия мүшелері қатысушылардың өтінімдері мен қоса берілген құжаттар бар конверттерді кезекпен ашады және конкурстық ұсыныстарды қатысушыларды тіркеу тізіміне сәйкес қарайды.

      Комиссия мүшелері бағалау шкаласына сәйкес конкурстық ұсыныстарды бағалау парағына баллдарды жеке қояды.

      62. Конкурстық ұсынымдарда көрсетілген автобустардың, шағын автобустардың (резервтік жылжымалы құрамды ескере отырып) сыныбы, жолаушылар сыйымдылығы және саны осы Ереженің талаптарын және бағыттардың негізгі сипаттамаларын қанағаттандырмаған жағдайда, сондай-ақ конкурсты өткізу туралы хабарландыруға сәйкес келетін конкурсты ұйымдастырушылар айқындаған қосымша талаптарды орындауға сілтемелер конкурстық ұсыныстарда көрсетілмеген жағдайда, өтінімдер мен оларға қоса берілетін құжаттарды комиссия қарауға қабылдамайды.

      63. Қатысушылардың нақты лотқа құжаттарымен бірге барлық конверттер қаралғаннан және бағаланғаннан кейін комиссия мүшелері тиісті қатысушылар бойынша конкурстық ұсыныстарды бағалау парақтарының қорытынды баллдарын қосады және жалпы жиынтық баллды анықтайды, ол хаттамада тіркеледі.

      64. Жалпы жиынтық баллдардың нәтижесі бойынша комиссия мүшелері барынша жоғары жалпы жиынтық балл алған қатысушының құжаттарын, оның ішінде анықтамасын қарайды.

      Қатысушының конкурстық ұсыныстарында көрсетілген автокөлік құралдарының осы Ережеде көрсетілген талаптарға сәйкестігі туралы конкурс алдындағы комиссияның оң бағасы болған жағдайда, осы қатысушы тиісті лот бойынша конкурстың жеңімпазы деп танылады.

      Конкурс алдындағы комиссия теріс қорытынды жасаған жағдайда, комиссия мүшелері жоғарылығы бойынша келесі жалпы жиынтық балл алған қатысушының құжаттарын осылайша қарауға көшеді.

      65. Егер қандай да бір лот бойынша бір де бір қатысушы тіркелмесе, астананың көлік органы осы лот бойынша негізгі талаптарды өзгертуі немесе басқа лот қалыптастыруы және оны келесі конкурсқа шығаруы тиіс.

      Егер лот бойынша екі конкурсқа екі рет бір қатысушы өтінім берген жағдайда, сол қатысушыны конкурстық комиссия комиссия мүшелерінің жалпы санынан 1/2 кем емес дауыс беруі жолымен лот бойынша осы қатысушыны жеңімпаз деп анықтауы мүмкін.

      66. Өткізілген конкурстың нәтижелері хаттамамен ресімделеді, оған комиссия мүшелері қол қояды және комиссия төрағасы бекітеді. Комиссияның әрбір мүшесі өзінің ерекше пікірін жазбаша беруі және оны хаттамаға қоса беруі мүмкін.

      Егер оның отырысына мүшелерінің кемінде 2/3 қатысса, комиссияның шешімі заңды деп танылады.

      67. Конкурсты ұйымдастырушы конкурс өткізілген күннен бастап 30 күнтізбелік күн ішінде өздері ұсынған конкурстық ұсыныстарды бағалау нәтижесін барлық қатысушыларға жазбаша түрде жібереді.

      68. Конкурс нәтижесіне сот тәртібімен шағым берілуі мүмкін.

      69. Конкурс нәтижелерін сот жарамсыз деп таныған жағдайда, қайталама конкурс алдыңғы конкурс нәтижесінің күшін жою туралы сот шешімі күшіне енгеннен кейін 30 жұмыс күнінен кешіктірмей өткізіледі.

      Бұл ретте алдыңғы конкурстың қатысушыларына конкурстық құжаттама тегін беріледі.

      70. Хаттаманың негізінде астананың көлік органы конкурстың жеңімпазымен жолаушылардың және жүктің тұрақты қалалық автомобиль тасымалдарын ұйымдастыру шартын (бұдан әрі - шарт) жасайды. Шарт кемінде үш жыл мерзімге жасалады.

      71. Шарт жасасқан конкурс жеңімпазына шарттың бүкіл қолданылу мерзіміне бағытта жұмыс істеу құқығын растайтын жолаушылардың және жүктің тұрақты қалалық автомобиль тасымалдарының бағыттарына қызмет көрсету құқығына куәлік (бұдан әрі - куәлік) беріледі. Көрсетілген тасымалдарды куәліксіз жүзеге асыруға жол берілмейді.

      72. Куәлікті астананың көлік органы типографиялық тәсілмен дайындайды, оның кемінде 4 қорғаныш дәрежесі бар және қатаң есептілік бланкісі болып табылады және онда мынадай ақпарат:

      тасымалдаушының атауы;

      бағыттың нөмірі;

      берілген күні;

      қолданылу мерзімі;

      астана көлік органы лауазымды тұлғасының қолы және мөріне арналған орын қамтылуы тиіс.

      73. Конкурстық ұсыныстарда конкурс жеңімпазы ұсынған бағытта пайдалануға арналған автобустар (шағын автобустар) көрсетілген, оның ішінде резервтік жылжымалы құрам көрсетілген куәліктер тасымалдаушыға, бағытта пайдаланылатын автокөлік құралдарының тиісті санына сәйкес мөлшерде беріледі және тасымалдауды жүзеге асыру кезінде автобустардың, шағын автобустардың жүргізушілерінде болуы тиіс.

      74. Бағытта (бағыттарда) жұмыс істеу құқығын үшінші тарапқа беруге жол берілмейді.

      75. Шарттың қолданылуы тоқтатылған жағдайда, астананың көлік органы тасымалдаушыдан куәлікті қайтарып алады және осы шарт бойынша қызмет көрсетілетін бағыттарға жаңа конкурс жариялайды.

      76. Тасымалдаушының бастамасы бойынша бір жақты тәртіппен шарт бұзылған жағдайда, ол бұл туралы астананың көлік органын 45 күнтізбелік күннен кешіктірмей хабардар етеді.

Жолаушылардың және жүктің тұрақты қалалық автомобиль тасымалы

      77. Жолаушылардың және жүктің тұрақты қалалық автомобиль тасымалы астананың көлік органы бекіткен бағыт желісі бойынша жүзеге асырылады, ол жолаушы көлігін дамытудың бекітілген кешенді схемасы және азаматтардың, ұйымдардың ұсыныстары бойынша жолаушылар ағынын талдаудың негізінде қалыптастырылады.

      Бұл ретте қала маңындағы бағыттың қала ішіндегі қозғалыс схемасы мейлінше қысқа болуы тиіс.

      78. Халықаралық, облысаралық қалааралық, облысішілік қалааралық және елді мекендерді: кенттерді, ауылдарды (селоларды) астанамен жалғастыратын, астана ішінде жүретін тұрақты бағыттардың қозғалысы астананың көлік органы бекіткен астананың карта-схемасы бойынша жүзеге асырылады.

      79. Жолаушыларды және жүкті тұрақты қалалық автомобильмен тасымалдау бағыттық желісі белгілі бір бағыттарды қайталау, сондай-ақ бір бағыт басқасының елу пайыздан астам аялдама пункттерін қайталауын болдырмайтындай етіп қалыптастырылуы тиіс.

      80. Жолаушыларды және жүкті тұрақты қалалық автомобильмен тасымалдау бағытында шағын автобустарды пайдалануды айқындау жолаушылар ағынының төмен болуымен негізделеді, бұл ретте шағын автобустар пайдаланылатын бағыттардың ұзақтығы жолаушыларды және жүкті қалалық тұрақты автомобильмен тасымалдау бағыттық желісі ұзақтығының отыз пайызынан аспауы тиіс.

      81. Жолаушыларды және жүкті тұрақты қалалық автомобильмен тасымалдаудың бағыттарына мынадай режимдердің бірінде қызмет көрсетіледі:

      1) кемінде екі жолаушы есігі бар қалалық автобустармен, шағын автобустармен, сондай-ақ қалааралық автобустармен тұрақты автомобиль тасымалдарының бағыттарында, бағыттың схемасында көрсетілген, қала шегінде олардың арасындағы қашықтық 400-ден 800 метрге дейін болуы тиіс барлық аялдама пункттеріне тоқтау арқылы жүзеге асырылатын әдеттегі бағыттар;

      2) кемінде екі жолаушы есігі бар қалалық автобустармен бағыттың схемасында көрсетілген, олардың арасындағы қашықтық 800-ден 3000 метрге дейін болуы мүмкін барлық аялдама пункттеріне тоқтау арқылы жүзеге асырылатын жедел бағыттар.

      82. Халыққа қызмет көрсету ерекшелігіне сәйкес астанада жолаушылардың және жүктің тұрақты қалалық автомобиль тасымалдары мынадай сипатта болуы мүмкін:

      1) тәуліктің бүкіл белгіленген кезеңі және аптаның барлық күндері ішінде қолданылатын тұрақты;

      2) белгілі бір күндерде немесе тәуліктің кезеңдерінде қолданылатын қосымша (демалыс, мерекелік күндер немесе "қауырт" сағаттар);

      3) алдын ала белгіленген уақыт аралығы ішінде қолданылатын маусымдық (саяжай кезеңінде, демалыс аймақтары, спорттық-сауықтыру кешендері жұмыс істеген кезде);

      4) уақытша, қысқа уақытта қолданылатын уақытша (әдеттегі режимде қызмет көрсетуге кедергі жасайтын жол желісінде күтпеген жағдайлар туындаған кезде).

      83. Жолаушыларды автокөлік құралына отырғызу және түсіру мынадай ретпен жүргізіледі:

      1) шағын автобустарда алдымен жолаушыларды түсіру, одан кейін отырғызу жүргізіледі;

      2) екі және одан да көп есігі бар автобустарда жолаушыларды түсіру - алдыңғы есіктен басқа барлық есік арқылы, ал отырғызу алдыңғы есік арқылы жүргізіледі.

      84. Артқы есік арқылы отырғызу құқығын тек мүгедектер ғана пайдаланады.

      85. Кезектен тыс отырғызу құқығын мүгедектер, зейнеткерлер, жүкті әйелдер, мектеп жасына дейінгі балалары бар жолаушылар пайдаланады.

      86. Жолаушылардың және жүктің тұрақты қалалық автомобиль тасымалдарының бағыттарында жол жүру және жүк алып жүру төлемін жолаушы қолма-қол ақшамен кондукторға (жүргізушіге) немесе жол ақысын төлеудің бірыңғай электронды жүйесі арқылы отыру кезінде береді.

      Автобустың салонында өлшемі 60x40x20 см және салмағы 20 кг дейінгі бір орындық қол жүгін, сондай-ақ қаптамасы бар бір жұп шаңғыны, бала арбасын немесе шанасын қосымша ақысыз алып жүруге рұқсат етіледі (автобустарда ғана).

      87. Тұрақты қалалық бағыттарда айлық жолақы билеттері және төлемақының тікелей байланыссыз электронды карталарын сату жолақы билеттерін тарату пункттерінде жүргізіледі. Жеңілдікті жолақы билеттерін беру жергілікті халықты әлеуметтік қорғау органдарында жүзеге асырылады.

      88. Байланыссыз электронды карталардың шоттарын толықтыру мамандандырылған электронды қондырғылар желісі арқылы жүзеге асырылады.

      89. Қалалық қатынаста жол жүру, белгіленген нормадан асқан қол жүгін алып жүруге қолма қол ақша төлеу фактісі мынадай:

      сериясы және нөмірі;

      жол жүру құны;

      билеттің шығарылған жылы сияқты ақпарат қамтылған біржолғы жалпы билет жолаушыға беріліп, тіркеледі.

      90. Байланыссыз электронды карта арқылы жол жүруіне ақы төлеу фактісі тиісті сәйкестендіру нөміріндегі байланыссыз электронды картаның электронды шотында тіркеледі.

      91. Байланыссыз электронды карталарды пайдалану тәртібі қолданылатын жүйелердің технологиясымен регламенттеледі, бірақ қолданыстағы заңнаманың талаптарына қайшы келмеуі тиіс.

      92. Жол жүргені үшін ақы төлеудің екі немесе және одан да көп технологиялық жүйелерін бір мезгілде қолдануға жол берілмейді.

      93. Айлық немесе жеңілдікті жол жүру билеттерінің қолданылуы белгіленген нормадан асатын жүкті және қол жүгін алып жүруге қолданылмайды.

      94. Айлық немесе жеңілдікті жол жүру билеті бар жолаушы оны кондукторға (жүргізушіге) автобусқа, шағын автобусқа мінген кезде көрсетеді.

      95. Егер жолаушы жеңілдікті жол жүру билетін пайдаланса, онда ол сондай-ақ оның жеңілдікке құқығын растайтын құжатты да ұсынады.

Жолаушыларды және жүкті таксимен тасымалдау

      96. Такси автомобильмен жолаушыларды және жүкті тасымалдауға астанада жолаушылар мен жүкті тасымалдау жөніндегі қызмет көрсетуге астананың көлік органымен шарт жасасқан жеке кәсіпкерлер және заңды тұлғалар жіберіледі.

      97. Шарт кемінде бір жыл мерзімге жасалады. Шарт жасасқан тұлғаға шартқа сәйкес әрбір көлік құралына (шарттың бүкіл қолданылу мерзіміне) куәлік беріледі.

      98. Тасымалдаушылармен шарт жасасу және бұзу туралы мәліметтерді астананың көлік органы астана аумағында таралатын мерзімді баспа басылымдарында жариялайды.

      99. Астанада жолаушылар мен жүкті тасымалдау жөнінде қызмет көрсетуге шарт жасау үшін (бұдан әрі - шарт) мүдделі тұлға тиісті өтініммен астананың көлік органына өтініш жасайды.

      100. Өтініш және қоса берілген құжаттар негізінде астананың көлік органы өтініш берілген күннен бастап он жұмыс күні ішінде ұсынылған құжаттарды қарайды.

      101. Өтініш берушінің ұсыныстарын қарау нәтижесі бойынша астананың көлік органы:

      шарт жасасу немесе жасасудан бас тарту туралы;

      құжаттарды қайта қарау жөнінде қосымша мерзім тағайындау туралы шешім қабылдайды.

      Мүдделі тұлға осы Ереженің талаптарына сай келмеген жағдайда шарт жасасудан бас тартуға жол беріледі және ол жазбаша нысанда бас тарту негізі көрсетіліп, ресімделеді.

      102. Тасымалдаушылар:

      Ереженің талаптарына сәйкес келетін және техникалық жарамды такси автомобильмен тасымалдауды жүзеге асырады;

      тапсырыстарды қабылдау және тапсыру қызметтерін көрсету үшін диспетчерлік қызметпен немесе диспетчерлік сүйемелдеуге диспетчерлік қызметпен шарты болуы тиіс;

      Қазақстан Республикасының заңнамасына сәйкес заңды тұлға немесе жеке кәсіпкер ретінде тіркеледі;

      Қазақстан Республикасының міндетті сақтандыру туралы заңнамасына сәйкес жолаушылар алдында тасымалдаушылардың азаматтық құқықтық жауапкершілігін сақтандыру шартын жасайды;

      Автокөлік құралдарын техникалық пайдалану ережесіне сәйкес жоспарлы-алдын ала техникалық қызмет көрсету, жылжымалы құрамды жөндеу және рейс алдындағы бақылаудан өткізуді жүргізу үшін жағдайлар жасайды. Осындай база немесе оның жекелеген компоненттері болмаған жағдайда тасымалдаушылардың тиісті жұмыстар мен қызметтер түрлерін жүзеге асыруға рұқсат құжаттары бар қызметтерді орындаушы субъектілермен шаруашылық шарттары болуы тиіс;

      Қазақстан Республикасының заңнамасына сәйкес медицина қызметкері осы қызмет түріне рұқсат еткен көлік құралдарының жүргізушілерін, олардың жұмыс күні (ауысымы) қашан, қайда басталатынына қарамастан, мерзімді және рейс алдындағы медициналық тексеруден міндетті түрде өтуін және рейс алдындағы медициналық тексеруден өтпеген жүргізушілердің көлік құралдарын пайдаланбауын, сондай-ақ таксилерді бұзылған жағдайда уақтылы ауыстыруды қамтамасыз етеді;

      жүргізушілердің еңбек және демалыс режимін сақтайды;

      жүргізушілер персоналын белгіленген үлгідегі нысанды киіммен қамтамасыз етеді;

      қаланың және көшелердің орналасуын;

      Жол қозғалысы ережесін және осы Ережені;

      қауіптілігі жоғары жиі ұшырасатын жол-көліктік жағдайларын, қиын жол және метеорологиялық жағдайларда көлік құралын қауіпсіз басқару негіздерін;

      зардап шегушілерге алғашқы медициналық көмек көрсету әдістерін;

      жол-көлік оқиғасы кезінде жолаушыларды көшіру тәртібін жүргізушілердің білуін көздейтін, жолаушылар көлігінің кәсіптік оқу - білім беру орталықтарында кәсіптік даярлаудан, қайта даярлаудан өтуін және олардың біліктілігін арттыруды қамтамасыз етеді.

      Такси автомобильдері шанақ периметрі бойынша шаршылы белдеумен және 500 метр қашықтықтан жақсы ажыратылатын төбесінде орналасқан айырымдық белгімен, алдыңғы есіктері жүргізушінің логотипімен, артқы есіктері қызмет көрсететін диспетчерлік қызметтің нөмірлерімен және шанақтың артқы бүйір жақтары такси автомобильдің жеке тіркеу нөмірімен (гараж нөмірімен) жабдықталуы тиіс. Айырымдық белгіде "ТАХІ" (такси) деген жазу немесе тәуліктің қараңғы уақытында жанып көрінетін оған тән "шаршылы белдеу" бейнелеуге тиіс.

      103. Такси автомобиль астананың көлік органы бекіткен нысандағы бірыңғай түсті гаммада болуы тиіс.

      104. Такси автомобиль жарамды жағдайдағы таксометрмен жарақтандырылуы және белгіленген тәртіппен салық органында тіркелуі тиіс.

      105. Такси автомобильдер радио құралдарымен және диспетчерлік қызметпен өзге де байланыс жасау түрімен жабдықталуы тиіс.

      106. Такси автомобильдің салонында жолаушылардың көз алдында:

      жүргізушінің фотосуреті бар, тегі, аты, әкесінің аты, сондай-ақ тасымалдаушының ресми атауы көрсетілген шарттың болуын растайтын куәлігі;

      тасымалдауға, сондай-ақ белгілі бір жағдайда қолданылатын арнайы тариф (әрбір жүк орнына, әрбір жануарға және т.б.);

      астананың көлік органының, тасымалдаушы диспетчерлік қызметінің және "051 қызметі" мемлекеттік мекемесінің телефон нөмірлері болуы тиіс.

      Такси автомобильдің салонында қол жететін жерде:

      тасымалдаушылардың жолаушылар алдындағы азаматтық-құқықтық жауапкершілігінің сақтандыру полисі;

      тасымалдау үдерісіне қатысушылардың құқықтары мен міндеттері бөлігіндегі Ережеден үзінді көшірме;

      қаланың (астананың) картасы болуы тиіс.

      Осы тармақтың ережелері тіл туралы заңнамаға сәйкес орындалуы тиіс.

      107. Такси автомобильде:

      1) қажетті дәрілер жиынтығы және медициналық заттар салынған медициналық қобдиша;

      2) апат жағдайында тоқтау белгісімен;

      3) жүргізуші тез қол жеткізетін орында бекітілген өрт сөндіру құралдары болуы тиіс.

      108. Такси автомобильдің алдыңғы орындықтары бас тіреуіштермен және қауіпсіздік белдіктерімен жабдықталуы тиіс.

      109. Такси автомобильдер астананың Ішкі істер департаментінің Жол полициясы басқармасында тұрақты есепте тұруы тиіс.

      110. Такси автомобильдер Қазақстан Республикасының заңнамасында белгіленген тәртіппен тоқсан сайын мемлекеттік техникалық тексеруден өтіп тұруы тиіс.

      111. Такси автомобильдің жол қозғалысы және қоршаған ортаны қорғау қауіпсіздігі бөлігіндегі техникалық жай-күйі мен жабдықталуы олардың техникалық пайдаланылуы жөніндегі тиісті стандарттардың, ережелер мен басшылықтардың талаптарына жауап беруі тиіс.

      112. Такси автомобиль салоны күн сайын дымқылдап сүртіліп тұруы тиіс.

      113. Такси автомобильмен астанада жолаушыларды және жүкті тасымалдауды жүзеге асыратын жүргізушілерде:

      тиісті санаттағы жүргізу куәлігі;

      5 жылдан кем емес жүргізушілік еңбек өтілі;

      жолаушыларды тасымалдауға жарамдылығы көрсетілген медициналық тексеруден өткені және жыл сайынғы флюорографиялық тексеруден өткені туралы анықтамасы болуы тиіс.

      114. Таксиге тапсырыс қабылдау жөніндегі диспетчерлік қызметтер өтініш беру жолымен астананың көлік органының тізілімінде тіркелуге міндетті.

      115. Диспетчерлік қызметтер:

      жолаушылардан тапсырыстар қабылдау жөнінде сапалы көп арналы және жедел радио байланысымен әрі өзге де байланыс түрімен қамтамасыз етілуге және оларды такси жүргізушілеріне хабарлауға;

      тапсырыстардың уақтылы орындалуын және таксилердің жіберілуін бақылауды жүзеге асыруға;

      жолаушылардан түскен тапсырыстарды тіркеу журналын жүргізуге;

      такси кешіккен немесе тапсырысты дереу орындауға мүмкіндік болмаған жағдайда, таксиге тапсырыс ресімдеген тұлғаға дереу оның кешігетіні туралы ескертуге немесе тапсырыс берушімен келісім бойынша, қысқа мерзімде басқа таксимен ауыстыруға;

      таксиге тапсырыстар қабылдау туралы қала тұрғындарына сенімді және шынайы ақпарат беруге тиіс.

      116. Такси автомобильдерінің тиімді жұмыс істеуі және оларды жолаушылардың пайдалануын қолайлы ету үшін ірі объектілердің - вокзалдардың, сауда орталықтарының, стадиондардың және басқа да қаланың жолаушылар жиналатын орындарында такси тұрақтарын жабдықтау және орналастыру ұйымдастырылады.

      117. Такси тұрақтары өздеріне жүру бөлігінен оқшауландырылған 10-нан аспайтын такси автомобильді кіргізу және тұрғызуға арналған жайластырылған аумақты, жол сызбаларын, жол белгілерін, тұрақтың атауы және нөмірі көрсетілген трафаретті, "Таксиге отырғызу" көрсеткішін қамтиды. Такси тұрақтарын ағымдағы ұстау мен оларға қызмет көрсетуді қаланың аудандық әкімдіктері жүзеге асырады.

      118. Жүру бөлігінің бойында тұрақта тұрған таксилер саны жайластырылған қалтарыста бес автомобильден (қалтарыссыз жерде үштен аспайды) аспауға тиіс.

      119. Такси автомобильдердің тұрақтары тәуліктің қараңғы кезінде жарықтандырылуы тиіс.

      120. Таксилер тұрақтарын пайдалану құқығына осы Ереженің шарттарына сай және куәліктері бар тасымалдаушылар ғана ие болады.

      121. Такси автомобильге отырғызу арнайы жабдықталған такси тұрақтарында, көше-жол желісінің учаскелерінде және жолаушылардың тапсырыстары бойынша такси автомобильдерді беру орындарында жүргізіледі.

      122. Такси автомобильге отырғызу және одан түсіру әбден тоқтағаннан кейін және жолаушыларды отырғызу және түсіру жүру бөлігіне жақын жерде тек қана автомобильдің оң жағынан орындалады.

      123. Жолаушыны күту қажет болған жағдайда (оның өтініші бойынша) жолаушы жүргізушімен жүріп өткен жолы үшін толық есеп айырысуға міндетті.

      124. Такси автомобильдерді беруге тапсырысты тасымалдаушы телефон арқылы қабылдауы мүмкін. Жолаушы жол жүрудің құнын таксометр көрсеткіші бойынша төлейді.

      125. Тапсырыстарды қабылдау және такси автомобильдерді жіберу арасындағы уақыт аралығы, сондай-ақ шұғыл тапсырыстар тәртібі мен төлемақы мөлшері диспетчерлік қызметтермен келісім бойынша белгіленеді.

      126. Алдын ала тапсырыс жасалған кезде жүргізуші такси автомобильдің тапсырыста көрсетілген уақытта жіберілуін қамтамасыз етуге міндетті, бұл ретте жолаушыны күту уақыты 10 минуттан аспауы тиіс. Осы уақыт өткеннен кейін жүргізуші оған тапсырыс беруші диспетчерлік қызметке хабарлап, кетуге құқылы.

      127. Таксимен тасымалдау тарифтерінің мөлшерін тасымалдаушы белгілейді.

      128. Такси автомобильге жолаушы отырған соң жүргізуші таксометрді іске қосуы тиіс.

      129. Жол жүру аяқталған соң таксометр көрсеткішіне сәйкес жолаушыға такси автомобиль қызметі үшін түбіртек (чек) беріледі. Жүргізушімен есеп айырысу қолма-қол ақшамен жүргізіледі.

      130. Такси автомобильді бірнеше жолаушы жалдаған жағдайда төлемақының жалпы сомасы әрбір жолаушының жүріп өткен қашықтығына қарай жолаушылар барабар төлейді.

      131. Егер такси автомобильмен тасымалдау барысында жүргізушінің еркінен тыс жағдаяттарға байланысты қозғалыс жасау мүмкін болмаған жағдайда, онда Тасымалдау шарты дереу үзілді деп есептеледі және жолаушы жүрілген қашықтыққа жол құнын төлейді.

      132. Таксидегі жол жүру ақысына жеңілдіктер жасауды тасымалдаушы көздейді.

      133. Такси автомобильдің жүк бөлімшесінде жалпы салмағы автомобиль шығарушы регламенттеген салмақтан аспайтын жүкті тасымалдауға және жүк бөлімшесінің қақпағы жабық болған жағдайда ғана рұқсат етіледі.

      134. Такси автомобильдің салонында есік арқылы еркін сиятын, салон қаптамаларын және оның жабдықтарын бүлдірмейтін әрі былғамайтын, жүргізушіге автомобильді жүргізуге және артқы айнаны пайдалануға кедергі келтірмейтін әртүрлі нәрселер мен заттарды тасымалдауға рұқсат етіледі.

      135. Такси автомобильдерде ұсақ жануарлар мен құстарды себептерде, торларда немесе түбі бүтін сөмкелерде тасымалдауға рұқсат етіледі. Такси автомобильдерде иттерді тасымалдауға тек жүргізуші мен басқа жолаушылардың келісімі болған кезде ғана рұқсат етіледі.

      136. Такси жүргізушілер:

      жүру жолында алдын ала қозғалыс жолын таңдауды, жылдамдық режимін реттеуді және көлік құралының мейлінше қауіпсіздігін және бірқалыпты жүруді қамтамасыз ететіндей маневр жасауды жүзеге асырады;

      көлік құралының жолаушылар өмірі мен денсаулығына және жол қозғалысының қауіпсіздігіне қауіп төндіретіндей техникалық ақауы болған жағдайда, көлік құралын тоқтатып, оның барлық есіктерін ашады және жолаушыларды шығарады;

      шұғыл жағдайларда 01, 02, 03 немесе 051 мамандандырылған қызметтерімен дереу байланыс жасайды;

      жол-көлік оқиғасы орын алған жағдайда оқиғаның сипаттамасы туралы тиісті қызметтерге хабарлау үшін дереу шаралар қабылдайды және мүмкіндігінше зардап шеккендерге алғашқы медициналық көмек көрсетуді, шұғыл медициналық жәрдем пункттеріне олардың жеткізілуін ұйымдастырады;

      жолаушының байқамауынан көлік құралында ұмыт қалған заттар болса, оларды тасымалдаушы әкімшілігінің жауапты қызметкерлеріне немесе "табылған заттар" үстеліне сақтауға қысқа мерзімде тапсырылуын қамтамасыз етеді;

      такси автомобильде ақаулар анықталған жағдайда, бұл туралы диспетчерлік қызметке дереу хабарлайды және жолаушының баратын жеріне немесе жолаушылар көлігінің ең жақын аялдамасына дейін тез жетуіне көмектеседі;

      жолаушыларды тасымалдау қауіпсіздігімен және қызмет көрсетудің жоғары мәдениетімен қамтамасыз етеді;

      жолға шығу алдында автомобильдің техникалық жай-күйін тексереді;

      жүргізушінің ауысым алдындағы медициналық тексеруден және такси автомобильдің ауысым алдындағы техникалық тексеруден өткені туралы белгі қойылатын жол парағы немесе борт журналы онда болуы тиіс;

      музыка ойнатқышты немесе радио қабылдағышты жолаушының келісімімен қосады және жолаушының талабы бойынша сөндіреді.

      137. Тапсырыстың орындалуына жеке өзі немесе телефон арқылы шақырылатын такси автомобильдегі жүргізуші мынадай себептер бойынша:

      егер адамды құқық қорғау органдары қудаласа;

      жолаушылардың саны автомобильдегі отыратын орындардың санынан асқан кезде;

      жолаушының өміріне қауіп төнетін жағдайлардан басқа, жолаушы мас күйде немесе есірткіден уытталған күйде болған жағдайда;

      жолаушының киімі, оның жүгі немесе ол алып жүретін жануарлар басқа жолаушыларға немесе автомобиль салонына зиян келтіруі мүмкін болған жағдайда;

      қозғалысына тыйым салынған немесе апатты жағдайдағы жолдармен жүріп, қызмет көрсетуге шақырған кезде оны орындаудан бас тартуға құқылы.

      138. Жүргізуші, егер жолаушылардың жүгі жүк бөлімшесіне сыйса және оған зиян келтірмесе, оны тасымалдауға тыйым сала алмайды.

      139. Егер зақымдалуы Жол қозғалысы ережесінің және осы Ереженің бұзылуынан туындаса, тасымалдаушылар материалдық жауапкершілік тартады және жолаушылар денсаулығына, сондай-ақ олардың тасымалданған заттарына келтірілген зиянның орнын толтырады.

      140. Астанада таксиде жолаушылар мен жүкті тасымалдау жөнінде қызмет көрсетуге арналған шарт астананың көлік органының бастамасы бойынша:

      жол полициясында осы жүргізушінің бір айда үш реттен артық Жол қозғалысы ережелерін бұзғандығы туралы ақпарат болған кезде;

      жолаушылардан жүргізушіге Таксиде жолаушылар мен жүкті тасымалдау жөнінде қызмет көрсетуге арналған шартты орындауға қатысты бір айда үш реттен артық негізделген шағым келіп түскен кезде бұзылуы мүмкін.

Осы Ереженің сақталуын бақылау

      141. Осы Ереженің сақталуын бақылау Қазақстан Республикасының заңнамасына сәйкес жүзеге асырылады.

      Жолаушылардың және жүктің қалалық тұрақты автомобиль

      тасымалдарының бағыттарында қызмет көрсетуге арналған

      конкурстық ұсыныстарды бағалау шкаласы

      Комиссияның қарауына""Жолаушылар тасымалы жағдайларын жақсартатын қосымша ұсыныстар" деген 9-бағанға 6 баллға дейінгі бағамен қосымша өлшемдер (жылжымалы құрамды жуу мен жинауды ұйымдастыру және жүзеге асыру жүйесі, диспетчерлік қызметі бар байланыс жүйесі, рейс алдындағы автобустарды техникалық бақылауды қамтамасыз ету, жол жүру тарифі) енгізілуі немесе тасымалдаушылардың жол үстіндегі сервистік қызметтер бойынша қосымша ұсыныстары 1 баллға бағалаумен ескерілуі мүмкін.