Барлық деңгейдегі қала құрылысы жобаларына кешенді қала құрылысы сараптамасын жүргізу қағидаларын бекіту туралы

Қазақстан Республикасы Ұлттық экономика министрінің 2015 жылғы 20 қарашадағы № 706 бұйрығы. Қазақстан Республикасының Әділет министрлігінде 2015 жылы 14 желтоқсанда № 12414 болып тіркелді.

      "Қазақстан Республикасындағы сәулет, қала құрылысы және құрылыс қызметі туралы" 2001 жылғы 16 шілдедегі Қазақстан Республикасы Заңы 20-бабының 11-8) тармақшасына сәйкес БҰЙЫРАМЫН:

      1. Қоса беріліп отырған Барлық деңгейдегі қала құрылысы жобаларына кешенді қала құрылысы сараптамасын жүргізу қағидалары бекітілсін.

      2. Қазақстан Республикасы Ұлттық экономика министрлігі Құрылыс, тұрғын үй-коммуналдық шаруашылық істері және жер ресурстарын басқару комитеті заңнамада белгіленген тәртіппен:

      1) осы бұйрықтың Қазақстан Республикасы Әділет министрлігінде мемлекеттік тіркелуін;

      2) осы бұйрық мемлекеттік тіркелгеннен кейін күнтізбелік он күн ішінде оның мерзімдік баспасөз басылымдарында және "Әділет". ақпараттық-құқықтық жүйесінде ресми жариялауға жіберілуін;

      3) осы бұйрықтың Қазақстан Республикасы Ұлттық экономика министрлігінің ресми интернет-ресурсында орналастырылуын қамтамасыз етсін.

      3. Осы бұйрықтың орындалуын бақылау жетекшілік ететін Қазақстан Республикасының Ұлттық экономика вице-министріне жүктелсін.

      4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Министр

Е. Досаев


  Қазақстан Республикасы
Ұлттық экономика министрінің
2015 жылғы 20 қарашадағы
№ 706 бұйрығымен
бекітілген

      ЗҚАИ-ның ескертпесі!
      Қағида жаңа редакцияда көзделген – ҚР Индустрия және инфрақұрылымдық даму министрінің 14.07.2023 № 513 (07.01.2024 бастап қолданысқа енгізіледі) бұйрығымен.

Барлық деңгейдегі қала құрылысы жобаларына кешенді қала құрылысы сараптамасын жүргізу қағидалары
1. Жалпы ережелер

      1. Осы Барлық деңгейдегі қала құрылысы жобаларына кешенді қала құрылысы сараптамасын жүргізу қағидалары (бұдан әрі - Қағидалар) "Қазақстан Республикасындағы сәулет, қала құрылысы және құрылыс қызметі туралы" 2001 жылғы 16 шілдедегі Қазақстан Республикасы Заңының (бұдан әрі - Заң) 20-бабының 11-8) тармақшасына сәйкес әзірленді, белгіленіп отырған қала құрылысы жобаларына кешенді қала құрылысы сараптамасын жүргізу тәртібі Қазақстан Республикасының аумағында қала құрылысын дамытуды жоспарлау мен аумақтарда құрылыстар салу саласында жүзеге асырылатын сәулет, қала құрылысы және құрылыс қызметінің барлық субъектілеріне басшылыққа алу үшін міндетті болып табылады.

      2. Қала құрылысы жобаларының кешенді қала құрылысы сараптамасы жобалық шешімдермен әлемдік экономикалық процестердің интеграциясы мен жаһандануы жағдайында елді мекендер аумағының кеңістікте орнықты, қауіпсіз дамуын қамтамасыз ету, халықтың тыныс-тіршілігінің сапасын, халықтың өмір сүруі мен әл-ауқатының деңгейін арттыру, экономиканың орнықты әрі серпінді дамуын, табиғи ресурстардың ұтымды пайдаланылуын қамтамасыз ету мақсатында жүргізіледі.

      3. Осы Қағидаларда мынадай ұғымдар қолданылады:

      1) әзірлеуші - қала құрылысын жобалау (тарих және мәдениет ескерткіштеріндегі ғылыми-реставрациялау жұмыстарын қоспағанда, тарихи құрылыс аудандарында қала құрылысын қалпына келтіру үшін жобалау құқығымен) және жоспарлау қызмет түріне лицензиясы бар, қала құрылысы жобасын әзірлеуші болып табылатын заңды тұлға;

      2) хатшы - сараптама комиссиясының (сараптама тобының) құрамына кіретін, қаралатын қала құрылысы жобасы бойынша кешенді қала құрылысы сараптамасын ұйымдастыруға және жүргізуге жауап беретін сәулет, қала құрылысы және құрылыс істері жөніндегі уәкілетті орган ведомствосының (бұдан әрі - ведомство), жергілікті атқарушы органның маманы.

      4. Ведомствоның сараптама комиссиялары және жергілікті атқарушы органдардың сараптама топтары Заңның 20 бабының 11-2) тармақшасына сәйкес құрылады.

      5. Ведомство (жергілікті атқарушы орган) сараптама комиссияларын (сараптама топтарын) құрған кезде Кешенді қала құрылысы сараптамасын жүргізу жөніндегі сараптама комиссиясының (сараптама тобының) іс-шаралар жоспарын (бұдан әрі - Іс-шаралар жоспары) бекітеді.

      6. Ведомствоның сараптама комиссиясы мынадай қала құрылысы жобаларына:

      1) Қазақстан Республикасының аумағын ұйымдастырудың бас схемасы;

      2) аумақты дамытудың өңіраралық схемасы;

      3) республикалық маңызы бар қаланың, астананың, халқының есептік саны жүз мың тұрғыннан асатын облыстық маңызы бар қалалардың бас жоспарлары;

      4) жалпымемлекеттік маңызы бар өзге де қала құрылысы жобалары бойынша кешенді қала құрылысы сараптамасын жүргізеді.

      7. Жергілікті атқарушы органдардың сараптама топтары мынадай қала құрылысы жобаларына:

      1) облыстар, аудандар аумақтарының қала құрылысын жоспарлаудың кешенді схемалары;

      2) халқының есептік саны жүз мың тұрғынға дейінгі елді мекендердің бас жоспарлары;

      3) халқының есептік саны бес мың тұрғыннан асатын елді мекендердің бас жоспарлары бойынша кешенді қала құрылысы сараптамасын жүргізеді.

      8. Қала құрылысы сараптамасына мына жобалар жатпайды:

      1) халқының саны бес мың тұрғынға дейінгі ауылдық елді мекендердің бас жоспарлары - даму және құрылыс салу схемалары (оңайлатылған бас жоспар);

      2) қолданыстағы бас жоспардың туындысы болып табылатын қалалар аумақтарының жекелеген бөліктерін қала құрылысын игеру жобалары (егжей-тегжейлі жоспарлау жобалары, өнеркәсіптік аймақты жоспарлау жобалары және құрылыс салу жоспарлары).

      9. Қала құрылысы жобаларына кешенді қала құрылысы сараптамасын жүргізудің қадамдық іс-қимылдары Іс-шаралар жоспарында көрсетіледі.

      10. Кешенді қала құрылысы сараптамасының оң қорытындысын алған қала құрылысының жобалары Заңның 19, 21, 22 және 23-1-баптарына сәйкес бекітіледі.

2. Қала құрылысы жобасын қарау тәртібі

      11. Жобаны әзірлеуші Ведомствоға (жергілікті атқарушы органға) кешенді қала құрылысы сараптамасына жобалауға арналған тапсырмада көзделген қала құрылысы жобасының материалдарын және бастапқы құжаттарды (деректерді), қала құрылысы жобасының қажетті келісулерінің болуы туралы құжаттарды Іс-шаралар жоспарына сәйкес ұсынады.

      Аумақтардың қала құрылысын жоспарлау жобалары бойынша кешенді қала құрылысы сараптамасын жүргізу ұзақтығы Іс-шаралар жоспарында қырық бестен алпыс жұмыс күніне дейін айқындалады.

      Ескерту. 11-тармаққа өзгеріс енгізілді - ҚР Инвестициялар және даму министрінің 26.04.2017 № 239 бұйрығымен (алғашқы ресми жарияланған күнінен кейін күнтізбелік он күн өткен соң қолданысқа енгізіледі).

      12. Ведомство (жергілікті атқарушы орган) қала құрылысы жобасы материалдарының және бастапқы құжаттардың толықтылығын белгілеу үшін оларды бес жұмыс күнінің ішінде сараптама комиссиясының (сараптама тобының) мүшелеріне жібереді.

      13. Қала құрылысы жобаларына кешенді қала құрылысы сараптамасын жүргізу барысында сараптама комиссиялары (сараптама топтары) мыналарға:

      1) жобалау құжаттамасының, сондай-ақ қала құрылысы жобасын әзірлеуге негіз болған бастапқы құжаттардың (материалдардың, деректердің) жинақтылығы мен құрамына;

      2) жобалауға арналған тапсырмадағы шарттар мен шектеулердің сақталуына, жобалау шешімдеріне және деңгейі бойынша қолданыстағы қала құрылысы жобасынан жоғары тұрған жобаның негізгі ережелеріне;

      3) жобалау шешімдері мен есептеулердің Қазақстан Республикасында қолданылып жүрген нормативтік құқықтық актілер мен нормативтік техникалық құжаттардың ережелеріне, нормалары мен талаптарына сәйкестігіне;

      4) қоршаған ортаның жағдайын жақсарту, табиғи ресурстарды ұтымды пайдалану, халықтың денсаулығын қорғау мен тарихи және мәдениет ескерткіштерін сақтау арқылы жоспарланатын аумақта экологиялық тепе-теңдікті қамтамасыз ету бойынша жоба ұсынған шаралардың тиімділігіне, толықтығына бағалау жүргізеді.

      14. Қала құрылысы жобаларына кешенді қала құрылысы сараптамасын жүргізу барысында сараптама комиссиялары (сараптама топтары) қала құрылысы ортасының қазіргі заманғы жай-күйі мен жобаның аралық және есептік мерзімдері бойынша жобалау шешімдеріне, сондай-ақ оларды кезең-кезең бойынша іске асыру жолдарына талдау жүргізіледі.

      15. Мамандануларына сәйкес келетін қала құрылыс жобасының бөлімдері (бөліктері), жобалау шешімдерін аралас бөлімдермен өзара байланыстыру қаралады, сондай-ақ дәлелді ескертулер (олар болған кезде) мен тұжырымдарды сараптамалық қорытындыға енгізуге арналған ұстанымдармен сәйкестендіре отырып, қала құрылысы жобасының аталған бөлімі (бөлігі) бойынша алдын ала жергілікті қорытындылар жасалады.

      16. Ұсынылған материалдар мен бастапқы деректер толық болмаған, мемлекеттік нормативтердің талаптарына сәйкес келмеген жағдайда және сәулет, қала құрылысы және құрылыс саласындағы заңнаманың нормаларын бұзатын, жобаның нысанасы мен мақсатына қатысты сарапшылардың қала құрылысы жобасының бөлімдерін (бөліктерін) қарау барысында белгіленген ескертулер мен ұсынымдары болған кезде жобалау шешімдерінің, есептеулердің және қала құрылысы жобасын ресімдеу нормативтік талаптармен шектеулерге сәйкес келмеген жағдайда қала құрылысы жобасының аталған бөлімі (бөлігі) құжаттар комплектісін қарауға енгізген күннен бастап он жұмыс күні ішінде ведомствоға (жергілікті атқарушы органға) қайтарылады. Ведомство (жергілікті атқарушы орган) сараптама комиссиясынан (сараптама тобынан) сараптамашылардың ескертулер мен ұсынымдарын алған күні әзірлеушіге жібереді. Әзірлеуші көрсетілген ескертулерді алған күннен бастап он жұмыс күні ішінде жояды.

      Сараптама жүргізу барысында белгіленген мерзімде ескертулерді жоймау Ведомствоның (жергілікті атқарушы органның) жобаны одан әрі қарамай теріс сараптамалық қорытынды беру үшін негіз болып табылады.

      Сараптама комиссиясының (сараптама тобының) мүшелері тарапынан ескертулер болмай, тұтастай алғанда жоба оң бағаланған кезде немесе жобаны әзірлеуші ескертулерді жойған жағдайда, қаралған қала құрылысы жобасы мен оның негізгі ережелерін бекітуге арналған ұсынымдары бар кешенді қала құрылысы сараптамасының сараптамалық қорытындысы Заңның 20 бабының 11-3) тармақшасына сәйкес жасалады және рәсімделеді, одан соң ведомствоға (жергілікті атқарушы органға) беріледі.

      17. Бекітілген қала құрылысы жобалары жиынтығының электрондық нұсқалары және кешенді қала құрылысы сараптамасының сараптамалық қорытындысы бақылаудағы мұрағаттық даналары ретінде тапсырыс беруші мен әзірлеушіде (бас жобалау ұйымында) сақталады.