РҚАО-ның ескертпесі!
      Осы бұйрықтың қолданысқа енгізілу тәртібін 5-тармақтан қараңыз.

      Қазақстан Республикасының 2014 жылғы 5 шілдедегі Қылмыстық-атқару кодексі 16-бабының 5) тармақшасына сәйкес БҰЙЫРАМЫН:

      1. Қоса беріліп отырған Бас бостандығынан айыруға сотталғандардың жазасын өтеу кезеңінде орнын ауыстыру қағидалары бекітілсін.

      2. Қазақстан Республикасы Ішкі істер минисстрлігінің Қылмыстық-атқару жүйесі комитеті (Б. Бердалин):

      1) осы бұйрықты Қазақстан Республикасының Әділет министрлігінде мемлекеттік тіркеуді;

      2) осы бұйрықты белгіленген тәртіппен "Әділет" ақпараттық-құқықтық жүйесінде және ресми бұқаралық ақпарат құралдарында жариялауды;

      3) осы бұйрықты Қазақстан Республикасы Ішкі істер министрлігінің интернет-ресурсында жариялауды қамтамасыз етсін.

      3. "Бас бостандығынан айыруға сотталғандардың орнын ауыстыру қағидасын бекіту туралы" Қазақстан Республикасы Ішкі істер министрінің 2012 жылғы 30 наурыздағы № 185 бұйрығының (Нормативтік құқықтық актілерді мемлекеттік тіркеу тізілімінде 2012 жылғы 28 сәуірде № 7604 болып тіркелген, "Казахстанская правда" газетінің 2012 жылғы 26 мамырдағы № 154-156 жарияланған) күші жойылды деп танылсын.

      4. Осы бұйрықтың орындалуын бақылау Қазақстан Республикасы Ішкі істер министрінің орынбасары полиция полковнигі Б.Б. Бисенқұловқа және Қазақстан Республикасы Ішкі істер министрлігі Қылмыстық-атқару жүйесі комитетіне (Б. Бердалин) жүктелсін.

      5. Осы бұйрық ресми жариялануға жатады және 2015 жылғы 1 қаңтардан бастап қолданысқа енгізіледі.

Бас бостандығынан айыруға сотталғандардың жазасын өтеу кезеңінде орнын ауыстыру қағидалары

Жалпы ережелер

      1. Осы Бас бостандығынан айыруға сотталғандардың жазасын өтеу кезеңінде орнын ауыстыру қағидалары (бұдан әрі - Қағидалар) сотталғандардың қылмыстық-атқару жүйесінің (бұдан әрі - ҚАЖ) бір мекемесінен басқа мекемеге орнын ауыстыру тәртібін белгілейді.

      2. Сотталғанның орнын ауыстыруы Қазақстан Республикасы Ішкі істер министрлігі Қылмыстық-атқару жүйесі департаментінің (бұдан әрі - ҚАЖД) бастығы немесе оның орынбасары бекіткен қорытындының негізінде Қазақстан Республикасы Ішкі істер министрлігінің Қылмыстық-атқару жүйесі комитетінің (бұдан әрі - ҚАЖ комитеті) жазбаша нұсқаулары (нарядтары) негізінде жүзеге асырылады.

      3. Орнын ауыстыру қорытындысында мынадай мәліметтер: тегі, аты, әкесінің аты, туған жері және күні, сотталғанға дейінгі тұрған жері, азаматтығы, қашан, қай сот, Қазақстан Республикасы Қылмыстық кодексінің қандай баптары бойынша және қандай жаза тағайындалғаны, жаза мерзімінің басталуы мен аяқталуы, түрмеге қамалғаннан кейінгі мерзімінің аяқталуы, сотталған ұсталатын мекеменің нөмірі мен режим түрі, нөмірі көрсетіле отырып қандай нарядтың негізінде және қашан келіді, қол қойылған күні, осы мекемеге келгенге дейін жазаны өтеу орны (жеке ісі бойынша қозғалысы) және қай мекемеге ауыстыру, ауыстырудың негізі қамтылуы тиіс.

      Қорытындыға мінездеме, көтермелеулер және жазалаулар туралы анықтама, сотталғанның басқа мекемеге ауыстыруға жазбаша өтініші қоса беріледі.

      4. ҚАЖ комитетінің нұсқаулары (нарядтары) бойынша жазаны өтеу үшін жіберілген немесе ауыстырылған сотталғандар осы түрдегі басқа мекемелерге ҚАЖ комитетінің рұқсатынсыз одан әрі ауыстырылмайды.

      5. Сотталғандардың орнын ауыстыру кезінде оларды мекеме (жіберуші орган) киіммен, маусымдық аяқ киіммен, сондай-ақ сотталғандарға белгіленген норма бойынша "Күдіктілерді, айыпталушыларды, сотталғандарды және қылмыстық-атқару жүйесі мекемелеріндегі балалар үйлеріндегі балаларды тамақтандырудың және материалдық-тұрмыстық қамтамасыз етудің заттай нормаларын және сотталғандардың киім нысандары үлгілерін, сондай-ақ Қамауға алу немесе бас бостандығынан айыру түріндегі жазаны өтеуден босатылатын адамдардың тұрғылықты жеріне немесе жұмысына жету үшін ақысыз жол жүрумен, тамақпен немесе ақшамен қамтамасыз ету қағидаларын бекіту туралы" Қазақстан Республикасы Үкіметінің 2014 жылғы 28 қарашадағы № 1255 қаулысына сәйкес жол жүруінің барлық кезеңіне азық-түлікпен қамтамасыз етеді.

      Егер сотталған адамды ауыстыру тергеу изоляторларының транзиттік-өткізу пункттері арқылы жүзеге асырылған жағдайда, сотталғандарды жіберуші орган келесі транзиттік-өткізу пунктіне дейін немесе межелі пунктіне дейін азық-түлікпен қамтамасыз етеді.

      6. Сотталғандардың орнын ауыстыруы бюджеттік қаражат есебінен жүзеге асырылады.

      7. Мекеменің уәкілетті лауазымды адамдары сотталғандарды бір мекемеден басқа мекемеге ауыстыру кезінде құпиялық пен қауіпсіздікті қамтамасыз ету бойынша шаралар қабылдайды.

      8. Толық қауіпсіздік мекемесін жазаны өтеу мерзімі аяқталғаннан кейін сотталған мекемеде құқықтық тәртіпті сақтау қажеттілігіне байланысты оның орын ауыстыру жағдайларын қоспағанда, ол келген қауіпсіздігі аралас мекемелерге бекіту бойынша режимнің тиісті түрі бар мекемеге ауыстырылады.

      9. Бас бостандығынан айыруға сотталғандар бір мекемеден басқа мекемеге айдауылмен айдауылданады.