Қазақстан Республикасының Үкіметі Қ АУЛЫ ЕТЕДІ:
      1. Қоса беріліп отырған Қылмысқа қарсы күрес саласындағы ақпаратпен алмасу туралы келісімнің жобасы мақұлдансын.
      2. Қылмыспен күрес саласындағы ақпаратпен алмасу туралы келісімге қол қойылсын.
      3. Осы қаулы қол қойылған күнінен бастап қолданысқа енгізіледі.

      Қазақстан Республикасының
      Премьер-Министрі                               К. Мәсімов

Қазақстан Республикасы
Үкіметінің     
2009 жылғы 21 мамырдағы
N 750 қаулысымен   
мақұлданған     

Қылмысқа қарсы күрес саласындағы ақпаратпен алмасу
туралы келісім

      Бұдан әрі Тараптар деп аталатын Тәуелсіз Мемлекеттер Достастығына қатысушы мемлекеттердің үкіметтері,
      қылмыс оның барлық нысандарында жеке тұлғаның, қоғам мен мемлекеттің қауіпсіздігі үшін елеулі қауіп төндіретінін мойындай отырып,
      ақпарат алмасу саласында Тараптардың ынтымақтастығын дамыту ниетін басшылыққа ала отырып,
      азаматтардың құқықтары мен бостандықтарын қорғау, қылмысқа қарсы күрес, қоғамдық тәртіпті сақтау міндеттерін шешу кезінде ақпараттық өзара іс-қимыл жасауды одан әрі нығайту қажеттігін ескере отырып,
      халықаралық құқықтың жалпыға бірдей танылған қағидаттары мен нормаларын басшылыққа ала отырып,
      төмендегілер туралы келісті:

1-бап

      1. Қылмыстарды ескерту, анықтау, жолын кесу, ашу және тергеу мақсатында Тараптар сұрау салулар бойынша жедел-анықтамалық, іздестіру, криминалистикалық және өзге де есептердегі, мұрағаттардағы мәліметтерді өтеусіз негізде ұсынады, сондай-ақ қылмысқа қарсы күрес саласында олардың қарамағындағы ғылыми-техникалық, ақпараттық-талдамалық материалдармен және нормативтік құқықтық актілермен алмасуды жүзеге асырады.
      2. Осы Келісім шеңберіндегі ынтымақтастық Тараптар мемлекеттерінің заңнамасына және халықаралық міндеттемелеріне сәйкес жүзеге асырылады.
      3. Тараптар өздерінің құзыретті органдары арқылы ынтымақтасады. Құзыретті органдардың тізбесін әрбір Тарап айқындайды және осы Келісімнің күшіне енуі үшін қажетті мемлекетішілік рәсімдердің орындалғаны туралы хабарламаны сақтауға тапсыру кезінде депозитарийге беріледі. Құзыретті органдар тізбесінің өзгерістері туралы Тараптардың әрқайсысы бір ай ішінде депозитарийге жазбаша хабарлайды.

2-бап

      1. Тараптардың құзыретті органдарының ынтымақтастығы ақпарат жіберу және ақпарат ұсыну туралы сұрау салуларды (бұдан әрі - сұрау салу) орындау арқылы жүзеге асырылады.
      2. Егер ақпарат осы Тарап үшін қызығушылық білдіреді деп ұйғаруға негіз болса, ол екінші Тарапқа бастамашылық тәртіппен берілуі мүмкін.
      3. Сұрау салу жазбаша нысанда жіберіледі. Кідіртуге болмайтын жағдайларда сұрау салу кейіннен үш тәулік кешіктірмейтін мерзімде міндетті түрде жазбаша растамамен, ауызша берілуі мүмкін. Бұл ретте ақпарат берудің техникалық құралдары пайдаланылуы мүмкін. Сұрау салудың түпнұсқалығына немесе мазмұнына күмән туындаған жағдайда оны қосымша растау сұратылуы мүмкін.
      Сұрау салынатын Тараптың құзыретті органы сұрау салуды тиісінше орындау үшін қажетті қосымша мәліметтерді сұратуға құқылы. Сұрау салуда:
      а) сұрау салушы және сұрау салынатын Тараптардың құзыретті органдарының атауы;
      б) сұрау салудың мақсаты мен негіздемесі;
      в) сұрау салуды орындаудың межелі мерзімдері;
      г) сұрау салуды орындау үшін пайдалы болуы мүмкін өзге де мәліметтер көрсетіледі.
      4. Сұрау салушы Тараптың құзыретті органының ресми бланкісінде жіберілген немесе жазбаша нысанда расталған сұрау салуға басшы немесе оны алмастыратын адам қол қоюы және осы органның елтаңбалы мөрімен куәландырылуы тиіс.
      5. Егер сұрау салушы Тараптың құзыретті органы сұрау салуды орындау қажет емес деп тапса, онда осы орган сұрау салынатын Тараптың құзыретті органына бұл туралы дереу хабарлайды.

3-бап

      1. Сұрау салынатын Тараптың құзыретті органы сұрау салуды толық, уақтылы және сапалы орындауды қамтамасыз ету үшін барлық қажетті шараларды қабылдайды. Сұрау салуды орындау тәртібі, көлемі және мерзімі сұрау салынатын Тарап мемлекетінің ұлттық заңнамасымен айқындалады.
      2. Сұрау салушы Тараптың құзыретті органына сұрау салуды орындауға кедергі келтіретін немесе кешіктіретін мән-жайлар туралы дереу хабарланады.
      3. Егер сұрау салуды орындау сұрау салуды алған органның құзыретіне жатпаса, онда ол органның өкілеттіктері болған жағдайда оны сұрау салынатын Тараптың тиісті құзыретті органына береді және бұл туралы сұрау салушы Тараптың құзыретті органына хабарлайды.

4-бап

      1. Егер сұрау салушы Тараптың құзыретті органы сұрау салудың мазмұнын жариялау қажет емес деп есептесе, Тараптардың әрқайсысының құзыретті органы алынған мәліметтердің, оның ішінде сұрау салуды алу фактісі мен мазмұнының құпиялылығын қамтамасыз етеді.
      2. Сұрау салуды орындау кезінде құпиялылықты сақтау мүмкін болмаған жағдайда бұл туралы сұрау салынатын Тараптың құзыретті органы сұрау салуды осындай жағдайларда орындау мүмкіндігі туралы шешім қабылдау үшін сұрау салушы Тараптың құзыретті органына хабарлайды.

5-бап

      1. Сұрау салуды орындау нәтижелері оларды ұсынған сұрау салынатын Тараптың құзыретті органының келісімінсіз олар сұрау салынғаннан және ұсынылғаннан өзге мақсаттарда пайдаланыла алмайды.
      2. Сұрау салушы Тараптың құзыретті органы сұрау салуды орындау нәтижелерін өзге мақсаттарда сұрау салынатын Тараптың құзыретті органының жазбаша келісімімен ғана пайдалана алады. Мұндай жағдайларда сұрау салушы Тараптың құзыретті органы сұрау салынатын Тараптың құзыретті органы белгілеген сұрау салу нәтижелерін пайдалану шектеулерін сақтайды.

6-бап

      Осы Келісімнің негізінде бір Тараптың құзыретті органы алған мәліметтерді үшінші Тарапқа беру үшін осы мәліметтерді ұсынған екінші Тараптың құзыретті органының алдын ала жазбаша келісімі талап етіледі.

7-бап

      1. Егер сұрау салынатын Тараптың құзыретті органы сұрау салуды орындау оның мемлекетінің егемендігіне, қауіпсіздігіне, қоғамдық тәртібіне зиян келтіруі не ұлттық заңнамасына және (немесе) халықаралық міндеттемелеріне қайшы келуі, сондай-ақ азаматтардың құқықтарын, бостандықтары мен заңды мүдделерін бұзуға әкеп соғуы мүмкін деп ұйғарса, жәрдем көрсетуден толық немесе ішінара бас тартылуы мүмкін.
      2. Сұрау салушы Тараптың құзыретті органы бас тартудың негізделген себептерін көрсете отырып, сұрау салуды орындаудан толық немесе ішінара бас тарту туралы дереу жазбаша хабарландырылады.

8-бап

      1. Орталықтандырылған жедел-анықтамалық, криминалистикалық және іздестіру есептерінің, сондай-ақ статистикалық және мұрағаттық ақпараттың барлық жиымы Мемлекетаралық ақпараттық банкте (бұдан әрі - МАБ) жинақталады, Ресей Федерациясы Ішкі істер министрлігі оны ұстаушы болып табылады.
      2. Ресей Федерациясы Ішкі істер министрлігі:
      а) Тараптардың құзыретті органдарының сұрау салуы бойынша МАБ-та бар ақпаратты, сондай-ақ Тәуелсіз Мемлекеттер Достастығына қатысушы мемлекеттердегі қылмыстылықтың жай-күйі мен қылмыстарды тергеу нәтижелері туралы статистикалық мәліметтерді өңдеуді, сақтауды және беруді қамтамасыз етеді;
      б) қолда бар мүмкіндіктер мен өкілеттіктерді ескере отырып, Тараптардың құзыретті органдарымен келісім бойынша МАБ-қа бастапқы ақпараттың көлемін, құрылымын, нысандары мен беру тәсілдерін белгілейді;
      в) Тараптардың құзыретті органдарына орталық мұрағаттағы ретроспективті ақпараттың тізбесі туралы хабарлайды;
      г) іздестіру есептерінің көмегімен Тараптардың құзыретті органдары мемлекетаралық іздестіру жариялаған адамдарды іздестіру жөніндегі қызметті ақпараттық қамтамасыз етуді жүзеге асырады;
      д) компьютерлендіру, бағдарламалық және ақпараттық қамтамасыз етуді жетілдіру, деректерді берудің бірыңғай автоматтандырылған жүйесін құру саласында Тараптардың құзыретті органдарымен ынтымақтасады және жәрдем көрсетеді;
      е) Тараптардың құзыретті органдарының МАБ-ты толықтыруын қамтамасыз ету, ұсынылатын ақпараттың мерзімін, толықтығын және шынайылығын сақтау жөнінде қажетті шаралар қабылдайды;
      ж) осы ақпараттық банктегі өңделетін, берілетін және сақталатын ақпаратты сыртқы әр түрлі қол сұғушылықтардан қорғау жөнінде шаралар қабылдайды.

9-бап

      МАБ-ты өзекті жай-күйде ұстау мақсатында Тараптардың құзыретті органдары өздеріндегі мүмкіндіктерді ескере отырып, орталықтандырылған жедел-анықтамалық, іздестіру және криминалистикалық есептерді толықтыру және түзету үшін осы Келісімнің ажырамас бөлігі болып табылатын қосымшада санамаланған есепке алу объектілері туралы мәліметтерді Ресей Федерациясы Ішкі істер министрлігіне ұсынады.

10-бап

      МАБ-ты қаржыландыруды мүдделі Тараптардың құзыретті органдары олардың функцияларын орындау үшін жыл сайын құзыретті органдарға ұлттық бюджеттерде көзделетін ақшалай қаржы құралдары шеңберінде Ресей Федерациясы Ішкі істер министрлігімен жасалатын шарттарға сәйкес жүзеге асырады.

11-бап

      Талаптар арасында осы Келісімді қолдану және түсіндіру кезінде туындайтын даулы мәселелер мүдделі Тараптардың консультациялары мен келіссөздері немесе Тараптармен келісілген басқа да рәсім арқылы шешіледі.

12-бап

      Осы Келісім Тараптардың әрқайсысының ол үшін оның мемлекеті қатысушысы болып табылатын басқа да халықаралық шарттардан туындайтын құқықтар мен міндеттемелерді қозғамайды.

13-бап

      Тараптар осы Келісімнің шеңберінде ынтымақтастықты жүзеге асыру кезінде жұмыс тілі ретінде орыс тілін пайдаланады.

14-бап

      Осы Келісімге Тараптардың өзара келісімі бойынша өзгерістер мен толықтырулар енгізілуі мүмкін, олар тиісті хаттамамен ресімделеді.

15-бап

      Осы Келісім оның күшіне енуіне қажетті мемлекетішілік рәсімдерді оған қол қойған Тараптардың орындағаны туралы үшінші хабарламаны депозитарий алған күннен бастап 30 күн өткен соң күшіне енеді.
      Мемлекетішілік рәсімдерді кешірек орындаған Тараптар үшін осы Келісім депозитарий тиісті құжаттарды алған күннен бастап күшіне енеді.

16-бап

      Осы Келісім белгіленбеген мерзімге жасалады. Тараптардың әрқайсысы осы Келісімнен шығу күнінен алты ай бұрын өзінің осындай ниеті туралы депозитарийге жазбаша хабарлама жібере отырып және Келісімнің қолданылуы кезінде туындаған қаржылық және өзге де міндеттемелерді реттеп, одан шығуға құқылы.
      200 жылы              қаласында орыс тілінде бір түпнұсқа данада жасалды. Түпнұсқа данасы Тәуелсіз Мемлекеттер Достастығының Атқарушы комитетінде сақталады, ол осы Келісімге қол қойған әрбір мемлекетке оның расталған көшірмесін жібереді.

       Әзірбайжан Республикасының       Молдова Республикасының
      Үкіметі үшін                     Үкіметі үшін

      Армения Республикасының          Ресей Федерациясының
      Үкіметі үшін                     Үкіметі үшін

      Белорусь Республикасының         Тәжікстан Республикасының
      Үкіметі үшін                     Үкіметі үшін

      Грузия                           Түрікменстан
      Үкіметі үшін                     Үкіметі үшін

      Қазақстан Республикасының        Өзбекстан Республикасының
      Үкіметі үшін                     Үкіметі үшін

      Қырғыз Республикасының           Украина
      Үкіметі үшін                     Үкіметі үшін

Қылмысқа қарсы күрес саласындағы
ақпарат алмасу туралы келісімге
қосымша            

Мемлекетаралық ақпараттық банкке ұсынылатын ақпарат
тізбесі

      1. Есептегі адамдар туралы мәліметтер:
      1.1. Тараптар мемлекеттерінің нормативтік құқықтық актілеріне сәйкес орталықтандырылған жедел-анықтамалық есепке қоюға жататын сотталғандар;
      1.2. Осы тізбенің 1.1-тармақшасында көрсетілген, жазасын өтеу үшін келген (кеткен), оларға қатысты үкімдер өзгертілген және бас бостандығынан айыру орындарынан босатылған сотталғандар санаттары;
      1.3. Мемлекетаралық іздестірудегі, хабарсыз жоғалған, денсаулық жағдайына немесе жасына байланысты өзі туралы мәлімет беруге қабілеті жоқ адамдар, танылмаған мәйіттер;
      1.4. Қылмыстық топтарды ұйымдастырушылар;
      1.5. Мынадай қылмыс түрлерін:
      1.5.1. Ерекше қатыгездікпен, сондай-ақ көрінеу кәмелетке толмағандарға қатысты жасалған жыныстық қылмыстар;
      1.5.2. Мәдени, тарихи құндылықтарды ұрлау;
      1.5.3. Адамдарды сату, адам ұрлау, сондай-ақ адамдарды пайдалануға байланысты өзге де қылмыстар;
      1.5.4. Порнографиялық, оның ішінде кәмелетке толмағандар бейнеленген материалдарды дайындау және тарату;
      1.5.5. Жалған ақша белгілерін, бағалы қағаздар, кредит не есеп айырысу карталары мен өзге де төлем құралдарын дайындау және өткізу, сондай-ақ жоғары технологиялар саласында жасалған қылмыстар;
      1.5.6. Контрабанда;
      1.5.7. Заңсыз көші-қон арналарын ұйымдастыру;
      1.5.8. Мемлекеттік шекарадан заңсыз өту;
      1.5.9. Ұлтаралық, нәсілдік және діни алауыздықты өршіту, сондай-ақ экстремистік, диверсиялық және террористік ұйымдардың іс-әрекетіне қатыстылығы;
      1.5.10. Террористік топтарды ұйымдастыру және (немесе) террористік актілер дайындау, жасау, сондай-ақ қылмыстық жолмен алынған кірісті заңдастыруға және терроризмді қаржыландыруға байланысты қылмыстарды жасауда күдіктілер, айыпталушылар немесе жасағаны үшін сотталғандар.
      1.6. Бұрын берілген есепке алу деректері өзгерген кезде осы тізбенің 1.5-тармақшасында санамаланған адамдар.
      2. Қылмыстық қол сұғушылық заттары, жоғалған, алынған және иесіз қалған заттар, қылмыстық әрекет құралдары:
      2.1. Ойықты атыс қаруы;
      2.2. Көлік құралдары;
      2.3. Тарихи және мәдени құндылықтар;
      2.4. Радио-, бейне, фото-, компьютерлік және жеке нөмірлері бар өзге де техника;
      2.5. Мемлекеттік айналымы бар нөмірлік бағалы қағаздар мен құжаттар туралы мәліметтер.
      3. Ашылмаған қылмыстар туралы мәліметтер:
      3.1. Кісі өлтіру мен денсаулыққа қасақана ауыр зиян келтіру;
      3.2. Ерекше қатыгездікпен, сондай-ақ кәмелетке толмағандарға қатысты жасалған жыныстық қылмыстар;
      3.3. Атыс қаруын қолдана отырып жасалған қарақшылық;
      3.4. Ірі және аса ірі көлемдегі алаяқтық;
      3.5. Жалған ақша белгілерін, бағалы қағаздар, кредит не есеп айырысу карталары мен өзге де төлем құралдарын жасау және өткізу, сондай-ақ жоғары технологиялар саласында жасалған қылмыстар;
      3.6. Тонау:
      3.6.1. Атыс қаруын, оқ-дәрілерді, жарылғыш заттар мен жарғыш қондырғыларды;
      3.6.2. Радиоактивті, уландырғыш, күшті әсер ететін және улы заттарды;
      3.6.3. Есірткі құралдары мен психотроптық заттарды;
      3.6.4. Стратегиялық маңызды шикізат тауарларын;
      3.6.5. Автокөлікті;
      3.6.6. Сейфтерден және басқа да металдан жасалған сақтау орындарынан ұрлау;
      3.6.7. Пәтерлерден сипатты тәсілмен жасалған ұрлық;
      3.6.8. Мәдени және тарихи құндылықтарды ұрлау.
      3.7. Заңсыз қаржы, биржалық және валюталық операцияларға байланысты;
      3.8. Адамдарды ұрлау;
      3.9. Күш қолданып бопсалау;
      3.10. Адамдарды, адам органдары мен тіндерін сату;
      3.11. Террористік және диверсиялық актілер, экстремистік бағыттағы қылмыстар;
      4. Қылмыстылықтың жай-күйі және Тәуелсіз Мемлекеттер Достастығына қатысушы мемлекеттердегі қылмыстарды тергеу нәтижелері туралы статистикалық ақпарат.