1. Қазақстан Республикасының орталық атқарушы органдарындағы мемлекеттік қызметтің бос лауазымын алуға байқау өткізу туралы қоса беріліп отырған Қағида бекітілсін.
2. Осы Қағида Қазақстан Республикасының Әділет министрлігінде мемлекеттік тіркелген күнінен бастап қолдануға енгізілсін.
3. Бұйрықтың орындалуына бақылау Қазақстан Республикасының Мемлекеттік қызмет істері жөніндегі агенттігі Мемлекеттік қызмет жүйесіндегі кадрлармен жұмыс жөніндегі департаментіне жүктелсін.
Қазақстан Республикасының орталық атқарушы
органдарындағы мемлекеттік қызметтің бос
лауазымын алуға байқау өткізудің
Қағидасы
1. Жалпы ережелер
Осы Қағида Қазақстан Республикасы Президентінің "Мемлекеттік қызмет туралы" 1995 жылғы 26 желтоқсандағы N 2730 U952730_ заң күші бар Жарлығына, Қазақстан Республикасы Президентінің "Қазақстан Республикасы Мемлекеттік қызмет істері жөніндегі агенттігінің мәселелері туралы" 1998 жылғы 12 қарашадағы N 4141 N984141_ және "Мемлекеттік қызмет кадрларымен жұмысты жетілдіру мәселелері" туралы 1999 жылғы 24 ақпандағы N 13 Өкімдеріне, өзге де нормативтік-құқықтық актілерге сәйкес әзірленді.
Осы Қағида байқау комиссияларын қалыптастыру мен олардың жұмысының, сондай-ақ орталық атқарушы органдар аппараттарындағы бос лауазымдарды алуға байқаулар өткізудің тәртібін белгілейді.
Байқау:
- азаматтардың өздерінің қабілеттері мен кәсіби даярлығына қарай мемлекеттік қызметке тең дәрежеде қол жеткізуі құқығын қамтамасыз етеді;
- мемлекеттік қызметшілердің үшінші және одан төменгі санаттағы бос лауазымын алуға өткізіледі.
2. Байқауға қатысудың тәртібі мен шарттары
1. Мемлекеттік қызметтің бос лауазымын алуға байқау құжаттар байқауы нысанында өткізіледі. Байқау комиссиясының шешімі бойынша байқауға қатысушылар қажет болған жағдайда әңгімелесуге шақырылуы мүмкін.
2. Қазақстан Республикасының Мемлекеттік қызмет істері жөніндегі агенттігі (бұдан әрі - Агенттік) байқауды өткізудің шарттары мен мерзімдерін бекітеді.
3. Байқаудың өткізілетіні туралы хабарландыруды Агенттік республикалық бұқаралық ақпарат құралдарының ресми басылымдарында ("Егемен Қазақстан", "Казахстанская правда", "Заң", "Юридическая газета") мемлекеттік және орыс тілдерінде жариялайды. Жариялау Қазақстан Республикасы Мәдениет, ақпарат және қоғамдық келісім министрлігі анықтаған тәртіпте осы Министрлік арқылы жүзеге асырылады.
4. Байқау өткізілетіні туралы хабарландыруда мыналар қамтылуға тиіс:
1) Агенттіктің орналасқан жері, почталық мекен-жайы, телефон және
факс нөмірлері;
2) орналасқан жері, почталық мекен-жайы, телефон және факс нөмірлері
көрсетіле отырып, бос лауазымдық орындары бар орталық атқарушы органның
атауы;
3) негізгі лауазымдық функциональді ерекшеліктері көрсетілген байқау
бойынша алынатын лауазымдардың атауы;
4) үміткерлерге қойылатын талаптар;
5) байқауға қатысу туралы өтініштер берілетін мерзім;
6) байқауға қатысу туралы өтінішке қоса берілетін құжаттардың тізбесі;
7) тест өткізілетін мерзімдер.
Хабарландыруда қосымша ақпарат болуы мүмкін.
5. Байқау ол жарияланған күннен бастап бір айдан аспайтын уақыт
ішінде өткізіледі.
6. Байқауға қатысуға мынадай азаматтар жіберіледі:
1) Қазақстан Республикасының азаматтығы бар;
2) Қазақстан Республикасының заңдарында мемлекеттік қызметшілер
лауазымдарының тиісті санаттарына қатысты өзгеше белгіленбесе, он сегіз
жастан кіші емес;
3) тиісті білімі мен кәсіби даярлық деңгейі бар, біліктілік
талаптарына сай, сондай-ақ заңдарда көзделген жағдайларда мамандығы
бойынша тиісті стажы бар.
7. Мемлекеттік қызметтің тиісті лауазымын алуға үміткерлер (бұдан әрі
- үміткер) байқау жарияланғаннан кейін Агенттікке мынадай құжаттарды
тапсырады:
1) белгіленген нысандағы өтініш;
2) кадр есебі бойынша жеке парағы;
3) Агенттік бекіткен нысан бойынша толтырылған анкета;
4) білімі туралы құжаттардың көшірмелері;
5) еңбек кітапшасының белгіленген тәртіппен расталған көшірмесі;
6) денсаулық жағдайы туралы белгіленген нысандағы анықтама;
7) 3х4 көлемдегі 2 фотосурет.
Үміткерлер бұған қосымша өз біліміне, жұмыс тәжірибесіне, кәсіби деңгейіне және беделіне қатысты басқа да ақпарат (біліктілігін арттырғаны, ғылыми дәрежелер және атақтар берілгені туралы құжаттардың, мінездемелердің, ұсынымдардың, ғылыми жарияланымдарының көшірмелерін және т.с.с.) бере алады.
8. Агенттік байқауға қатысуға тілек білдірген азаматтар ұсынған құжаттарды қабылдайды және саралайды.
Ұсынылған құжаттарды талдаудың негізінде Агенттік үміткерлерді тест тапсыруға жіберу не жібермеу туралы шешім қабылдайды.
9. Үміткерлерді тестен өткізудің шарттарын Агенттік белгілейді.
10. Тесттен өтуге жіберілген үміткерлер тесттен Агенттікте өтеді. Тесттің нәтижелерін Агенттік осы Қағиданың 7-тармағында көрсетілген құжаттарға қоса тіркеп, байқау комиссиясына береді.
11. Тестке және байқауға қатысуға байланысты шығыстарды (тест, байқау өткізілетін жерге бару және қайту, тұрғын үй жалдау, тұру, байланыстың барлық түрін пайдалану) азаматтар өз қаражатының есебінен төлейді.
12. Байқауға осы Қағиданың 7-тармағында көзделген құжаттар мен тест туралы анықтама ұсынған үміткерлердің құжаттары ғана қатыстырылады.
13. Құжаттары байқауға жіберілген үміткер бос лауазымды алуға арналған байқаудың қатысушысы болады.
14. Байқауға қатысуға:
1) осы Қағиданың 6-тармағында белгіленген талаптарға сай келмейтін;
2) соттың заңды күшіне енген шешімімен әрекет қабілеті жоқ немесе әрекет қабілеті шектеулі деп танылған;
3) соттың заңды күшіне енген шешімімен белгілі бір мерзім ішінде мемлекеттік лауазым алу құқығынан айырылған азаматтар;
4) заңдарда белгіленген басқа да жағдайларда қатыстырылмайды.
3. Байқау комиссиясы
15. Байқауды өткізу туралы шешімді Агенттік орталық атқарушы органдар ұсынған бос лауазымдар тізімінің негізінде қабылдайды.
16. Орталық атқарушы органдар бос лауазымдардың тізімін Агенттік белгілеген нысандар мен мерзімдер бойынша береді.
17. Байқау комиссиясы Агенттік төрағасы мен Агенттіктің байқау өткізу жөніндегі шешімінің негізінде бос лауазымдарға алуға өтініштерді көрсеткен орталық атқару органы басшысының бірлескен бұйрығымен құрылады.
18. Комиссияның құрамына Агенттіктің, Сыбайлас жемқорлыққа қарсы күрес жөніндегі мемлекеттік комиссияның, мүдделі орталық атқарушы органның және басқа да мемлекеттік органдардың өкілдері кіреді.
19. Байқау комиссиясы мүшелерінің өкілеттіктері тиісті түрде ресімделген сенімхаттармен куәландырылады. Агенттіктің өкілдері комиссияларға сенімхатсыз қатысады.
20. Комиссия төрағалары Агенттік өкілдері болады.
21. Байқау комиссиясы ұсынылған құжаттардың негізінде байқауға қатысушыларға баға береді және осы Қағидада белгіленген тәртіп бойынша бос лауазымды алу үшін қатысушылардың арасынан адамдарды іріктейді.
22. Комиссияның мәжілісіне комиссияның жалпы құрамының үштен екісі қатысса, ол заңды болып табылады. Комиссияның шешімі ашық дауыс беру жолымен қабылданады.
23. Қатысып отырған комиссия мүшелерінің көпшілігі жақтап дауыс берген жағдайда байқауға қатысушы оң қорытынды алады. Байқау комиссиясы мүшелерінің дауыс саны тең түскен жағдайда төрағаның дауысы шешуші болып табылады.
24. Байқау комиссиясының шешімі орталық атқарушы орган жариялаған бос лауазымдық қызметке тұруға немесе мұндай қызметке қабылдаудан бас тартуға негіз болады.
25. Байқау комиссиясының оң қорытындысын алған байқауға қатысушылар бос лауазымды алуға, яғни, мемлекеттік қызметке тұруға құқылы.
26. Байқау комиссиясының шешімі шыққаннан кейін екі апта мерзім ішінде бос лауазым жөнінде жариялаған орталық атқарушы органның басшысы оң қорытынды алған байқауға қатысушыны жарияланған қызметке қабылдауға міндетті. Бұл ретте мемлекеттік қызметке тұрудың заңдарда көзделген талаптары орындалуға тиіс.
27. Байқау комиссиясының оң қорытындысын алған азаматтың мемлекеттік қызметке қабылдау кезінде шындыққа сай келмейтін мәліметтерді ұсынғаны, құжаттарды қолдан жасағаны, фактілерді қасақана бұрмалағаны және т.с.с. анықталса, бұл жарияланған бос лауазымға қызметке қабылдаудан бас тартуға негіз болады.
28. Байқау комиссиясының оң қорытындысын алмаған, бірақ байқау комиссиясы мемлекеттік қызметке алуға болады деп ұсыным жасаған байқауға қатысушылар Агенттік құрған кадрлар резервіне алынуы мүмкін.
29. Кадрлар резервіне алынған қатысушылар байқаудан өткеннен бастап бір жылдың ішінде орталық атқарушы органда байқаудан өтпей-ақ тиісті бос лауазымды ала алады.
30. Егер байқау нәтижелері бойынша бос лауазым талаптарына сай келетін қатысушылар анықталмаса, онда Агенттік төрағасының қайталап байқау өткізу туралы шешім қабылдауы мүмкін.
31. Осы Қағидамен реттелмеген мәселелер туындаған жағдайда Агенттік өз бетінше тиісті шешім қабылдай алады.
32. Комиссияның осы Қағидадағы тәртіп бойынша және оның талаптарын сақтай отырып қабылдаған шешімі түпкілікті шешім болып табылады.
33. Байқау комиссиясының шешімі хаттама түрінде ресімделеді, оған комиссия мүшелері, сондай-ақ хаттама жүргізіп отырған адам қол қояды. Хаттаманы Агенттіктің байқау комиссиясының құрамына кірмейтін өкілі жүргізеді.
34. Байқауға қатысушылар байқау комиссиясының шешімімен келіспейтіні туралы Агенттікке арыз беруге немесе бұл шешімдерге заңдарда көзделген тәртіппен шағым беруге құқылы.
Агенттік байқау комиссиясының шешімімен келіспейтіні туралы келіп
түскен арыздарды қарайды және қараудың нәтижелері жөнінде арыз берушіге
хабарлайды. Осы Қағиданың, өзге де нормативтік құқықтық актілердің
бұзылғаны анықталған жағдайда Агенттік байқау комиссияларының шешімдерін
толығымен немесе ішінара жоя алады немесе байқауды қайта өткізу туралы
шешім қабылдай алады.
35. Байқауға қатысушылар өздеріне қатысты бөлігінде, комиссия
мүшелері, басқа да уәкілетті органдардың өкілдері осы Қағиданың 7, 10 және
33-тармақтарында көрсетілген байқау құжаттарымен танысуға құқылы.
36. Байқаудың әрбір қатысушысына байқаудың нәтижелері туралы ол
аяқталған күннен бастап бір айдың ішінде жазбаша нысанда хабарланады.
Оқығандар:
Умбетова А.М.
Қасымбеков Б.А.
