Теңіз портының міндетті көрсететін қызметтері үшін бағаларды (тарифтерді) қолдану қағидаларын бекіту туралы

      "Сауда мақсатында теңізде жүзу туралы" 2002 жылғы 17 қаңтардағы Қазақстан Республикасы Заңының 4-бабы 3-тармағының 55-42) тармақшасына сәйкес БҰЙЫРАМЫН:

      1. Қоса беріліп отырған Теңіз портының міндетті көрсететін қызметтері үшін бағаларды (тарифтерді) қолдану қағидалары бекітілсін.

      2. Қазақстан Республикасы Индустрия және инфрақұрылымдық даму министрлігінің Көлік комитеті заңнамада белгіленген тәртіппен:

      1) осы бұйрықты Қазақстан Республикасы Әділет министрлігінде мемлекеттік тіркеуді;

      2) осы бұйрық мемлекеттік тіркелген күнінен бастап күнтізбелік он күн ішінде қазақ және орыс тілдерінде Қазақстан Республикасы Нормативтік құқықтық актілерінің эталондық бақылау банкіне ресми жариялау және енгізу үшін "Қазақстан Республикасының Заңнама және құқықтық ақпарат институты" шаруашылық жүргізу құқығындағы республикалық мемлекеттік кәсіпорнына жіберуді;

      3) осы бұйрықты Қазақстан Республикасы Индустрия және инфрақұрылымдық даму министрлігінің интернет-ресурсында орналастыруды қамтамасыз етсін.

      3. Осы бұйрықтың орындалуын бақылау жетекшілік ететін Қазақстан Республикасының Индустрия және инфрақұрылымдық даму вице-министріне жүктелсін.

      4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.

      "КЕЛІСІЛДІ"

      Қазақстан Республикасының

      Ұлттық экономика министрлігі

Теңіз портының міндетті көрсететін қызметтері үшін бағаларды (тарифтерді) қолдану қағидалары

1-тарау. Жалпы ережелер

      1. Теңіз портының міндетті көрсететін қызметтері үшін бағаларды (тарифтерді) қолдану қағидалары "Сауда мақсатында теңізде жүзу туралы" 2002 жылғы 17 қаңтардағы Қазақстан Республикасы Заңының 4-бабының 3-тармағының 55-42) тармақшасына сәйкес әзірленді және теңіз портының міндетті көрсететін қызметтері үшін бағаларды (тарифтерді) қолдану тәртібін айқындайды.

      2. Теңіз портының міндетті түрде көрсететін қызметтерінің тізбесі (бұдан әрі - Міндетті түрде көрсетілетін қызметтердің тізбесі) "Теңіз портының міндетті түрде көрсететін қызметтерінің тізбесін бекіту туралы" Қазақстан Республикасы Инвестициялар және даму министрінің 2015 жылғы 30 қаңтардағы №77 (Нормативтік құқықтық актілерді мемлекеттік тіркеу тізілімінде № 10906 тіркелген) бұйрығымен бекітілді.

      3. Танкерлер үшін теңіз портының міндетті түрде көрсететін қызметтері үшін тарифтерді табиғи монополиялар салаларында басшылықты жүзеге асыратын уәкілетті орган реттейді.

      4. Осы Қағидаларда мынадай ұғымдар пайдаланылады:

      уәкілетті орган – сауда мақсатында теңізде жүзу саласындағы басшылықты, сондай-ақ Қазақстан Республикасының заңнамасында көзделген шегінде салааралық басшылықты жүзеге асыратын орталық атқарушы орган;

      тәуекел коэффициенті – авариялық оқиғаның мүмкін болуына байланысты теңізө портының көрсетілетін өызметтері үшін тарифтерге қосымша пайыз және ескі кемеге қызмет көрсету кезінде қосымша күш-жігер көрсеткені үшін үстемеақы.

2-тарау. Теңіз портының міндетті көрсететін қызметтері үшін бағаларды (тарифтерді) қолдану тәртібі

      5. Міндетті түрде көрсететін қызметтердің тізбесіне:

      корабельдік;

      навигациялық;

      арнамен өткен үшін;

      айлақтық;

      зәкірлік;

      арқандап байлау;

      табиғат қорғау іс-шаралары саласында;

      карантиндік кіреді.

      1) Кеменің қызмет көрсетуіне арналған баға (тариф) кеме теңіз портына әрбір рет кірген және порттан шыққан кезде қолданылады және кеменің әрбір брутто тіркелген тоннасына белгіленеді.

      2) Навигациялық орталықтың қызметтерін пайдалану "Мемлекеттік мүлік туралы" 2011 жылғы 1 наурыздағы Қазақстан Республикасы Заңының 156-бабының 1-тармағына сәйкес уәкілетті орган бекітетін бағалар (тарифтер) бойынша ақылы негізде жүзеге асырылады.

      Кемелердің қозғалысын басқару жүйесін пайдалана отырып навигациялық қызметтер көрсету тәртібі Қазақстан Республикасы Инвистициялар және даму министірінің міндетін атқарушы 2015 жылғы 24 ақпандағы № 162 (Нормативтік құқықтық актілерді мемлекеттік тіркеу тізілімінде № 12193 болып тіркелген) бұйрығымен бекітілген Қазақстан Республикасының теңіз порттарында және оларға кіреберістерде кемелердің жүзу және тұрақта тұру қағидаларына сәйкес жүзеге асырылады.

      Навигациялық орталықтың қызметтерін пайдаланудың бағасы (тарифі) кеменің өлшемдік куәлігінде көрсетілген кеменің жалпы сыйымдылық бірлігі үшін белгіленеді және кеме қозғалысын басқару жүйесі әрекет ету аймағында кеменің кіруі үшін және кеме қозғалысын басқару жүйесі әрекет ету аймағында кеменің шығуы үшін бөлек қолданылады.

      Өлшеу куәлігі жоқ кемелер үшін навигациялық орталықтың қызметтерін пайдалану бағасының (тарифінің) есебі кеме құжаттарында көрсетілген кеме бортының ең көп ұзындығы, ең көп ені және ең көп биіктігі – кеменің үш көлемінің көбейтіндісі арқылы текше метріне есептелетін кеменің шартты көлемі бойынша 0,35 коэффициентін қолдану арқылы жүргізіледі.

      Баржабуксирлік құрамның, керуендер мен өзге де құрамдық жүзу объектілерінің (соның ішінде салдар) жалпы сыйымдылығы навигациялық орталығының қызметтерінің көлемін есептеу кезінде жүзу объектілердің барлық элементтерінің жалпы сыйымдылығының қосындысы ретінде айқындалады. Жүзу объектілерінің жалпы сыйымдылығы болмаған жағдайда, кеме құжаттарында немесе жүзу объектілерінің басқа құжаттарында көрсетілген кеме бортының ең көп ұзындығы, ең көп ені және ең көп биіктігі – кеменің үш көлемінің көбейтіндісі арқылы текше метріне есептелетін кеменің шартты көлемі бойынша 0,35 коэффициентін қолдану арқылы жүргізіледі.

      Ақтау портының навигациялық қызметтері (навигациялық құралдарын пайдалану) үшін бағалар (тарифтер) табиғи монополиялар салаларында басшылықты жүзеге асыратын уәкілетті орган бекіткен реттеліп көрсетілетін қызметтердің тарифтеріне сәйкес қолданылады.

      Навигациялық орталықтың қызметтеріне арналған баға (тариф) әскери кемелерге және Қазақстан Республикасы Қарулы Күштерінің Әскери-Теңіз күштерінің және Қазақстан Республикасы Ұлттық қауіпсіздік комитеті Шекара қызметінің кемелеріне, сондай-ақ табиғи және техногендік сипаттағы төтенше жағдайларды ескерту және (немесе) жою бойынша шараларды қабылдау, оларға дайындықты арттыру (оқытулар, жаттығулар) бойынша іс-шараларға қатысу үшін тартылатын мемлекеттік органдардың кемелеріне қолданылмайды.

      3) Каналмен өткені үшін баға (тариф) соңғы баратын жеріне каналдан әрбір өткен сайын қолданылады және кеменің әрбір брутто тіркелген тоннасына белгіленеді.

      4) Жүк операцияларына айлақты пайдалану бағасы (тарифі) айлақтың басындағы жүк және көмекші операциялары үшін кеменің тұрағына қолданылады және әрбір бруттосына тіркелген тоннасына белгіленеді және айлақтың басындағы кемелерден алынады (рейдік айлақтан басқа).

      Егер операция кемеден кемеге нұсқасы бойынша жүзеге асырылса, айлақтық төлемнің 50% алынады.

      Өзге кемеге жанымен, айлақтың басында тұмсығымен немесе артымен тұрған кемелерден айлақтық төлемнің 50% алынады.

      Жүк операцияларынан тыс операцияларына айлақты пайдалану бағасы (тарифі) айлақтың басындағы тұрақта тұрған кемелердің әр тәулігіне әрбір бруттосына тіркелген тоннасына белгіленеді және айлақтың басында тұрған кемелерден алынады (рейдтік айлақтан басқа).

      Тәулікке есептелген бағаларды (тарифтерді) есептеген кезде, уақыты 0,5 тәулікке дейін дөңгелектенеді, 0,5 тәулікке дейінгі уақыты 0,5 тәулік болып есептеледі, ал 0,5 тәуліктен артық уақыты 1 тәулік болып есептеледі.

      5) Зәкірлік қызмет үшін баға (тариф) рейдте және/немесе айлақта кемелерге зәкірлік тұрақ үшін қолданылады және тұрақтың уақытына қарамастан кеменің әрбір бруттосына тіркелген тоннасына белгіленеді.

      6) Арқандап байлау қызметі үшін баға (тариф) арқанның ұштарын тарату, арқанды босату және кемелерді тарту бойынша арқан байлаушылардың жұмысына қолданылады.

      Кеменің ұзындығынан артық айлақтың бойымен кемені тарту екі операция ретінде, кеменің ұзындығынан кем бір операция ретінде саналады.

      Кеменің айлақтан айлаққа өтіп арқандап байлауы екі операция ретінде саналады.

      Арқандап байлаған ұштарын тарату және арқанды босату екі операция ретінде саналады.

      Порттарда жүктеу жұмыстары барысында жүкті түсіру және тиеу кезінде кемені қайтадан арқандап байлау бір рет, қажет болған жағдайда, тиеу (түсіру) барысында жүкті ауыстырып тиейтін арнайы кешені үшін - тағы бір рет қайта арқандап байлауға рұқсат етіледі.

      Порттың талабы бойынша жүргізілетін қосымша арқандап байлаудың барлық шығындары порттың өзіне жүктеледі. Арқандап байлау қызметі үшін арналған баға (тариф) бір операцияға белгіленеді.

      7) Табиғатты қорғау іс-шаралары үшін баға (тариф) кемеден қандай-да бір шектеусіз ластанудың барлық түрлерін (балласт суларынан басқа) қабылдау жөніндегі жұмыс үшін қолданылады және портта кемелердің тұрақта тұрған әр тәулігіне белгіленеді.

      8) Карантиндік:

      инфекциялармен ауыратын науқастарды және инфекция тасымалдау мүмкін адамдарды уақытша оқшаулау үшін үй-жайлар ұсыну;

      теңіз порты объектілерін және аумағын тиісті санитариялық жағдайда ұстау;

      көлік кемелерінде, порт объектілерінде санитариялық-эпидемиологиялық станцияның күшімен кеміргіштер мен жәндіктерді алдын ала жою бойынша қамтамасыз етілетін қызметтермен байланысты карантиндік қызметтер үшін баға (тариф) кеменің бір рет кіргені үшін белгіленеді.

      6. Осы портқа тіркелген кемелер кеменің теңізде автономды жұмыс істеу мерзімінен көп болуына байланысты жүктен тыс операцияларды (қорларды толықтыру, бункерлеу, қалдықтарды тапсыру немесе өзге де мәжбүрлі қажеттілік) жүзеге асыру үшін портқа кірген кезде теңіз портының иесі (теңіз терминалының операторы), мемлекет реттеп көрсететін қызметтерді қоспағанда, теңіз портының міндетті көрсететін қызметтеріне өзі айқындаған шарттарда және тәртіппен жеңілдіктер ұсынады.

      7. Теңіз портының иесі және навигациялық орталық кемелерге (субстандартты не шығарылғанына жиырма жылдан асқан), оның ішінде осы теңіз портының акваториясына кіретін шетелдік кемелерге қатысты теңіз портының міндетті көрсететін қызметтеріне арналған тарифтерге тәуекел коэффициенттерін қолдануға құқылы.

      Тәуекел коэффициенттерінің мөлшерін теңіз портының иесі, навигациялық қызметтер көрсетуге қатысты сауда мақсатында теңізде жүзу саласындағы мемлекеттік саясатты жүзеге асыратын уәкілетті органның ведомствосы айқындайды.

      Бұл ретте, тәуекел коэффициенттерінің мөлшерін келесіден аспауы керек:

      20 жылдан асқан және 25 жылға дейінгі кемелер үшін – теңіз портының міндетті қызметінен 30 % құрайды;

      25 жылдан асқан кемелер үшін – теңіз портының міндетті қызметінен 50 % құрайды.