Азаматтық әуе кемелерін пайдаланушыны сертификаттау және оған сертификат беру қағидаларын бекіту туралы

      «Қазақстан Республикасының әуе кеңістігін пайдалану және авиация қызметі туралы» 2010 жылғы 15 шілдедегі Қазақстан Республикасы Заңының 14-бабы 1-тармағының 41-31) тармақшасына сәйкес БҰЙЫРАМЫН:
      1. Қоса беріліп отырған Азаматтық әуе кемелерін пайдаланушыны сертификаттау және оған сертификат беру қағидалары бекітілсін.
      2. Қазақстан Республикасы Инвестициялар және даму министрлігінің Азаматтық авиация комитеті (Б.К. Сейдахметов):
      1) осы бұйрықты Қазақстан Республикасы Әділет министрлігінде мемлекеттік тіркеуді;
      2) осы бұйрық Қазақстан Республикасы Әділет министрлігінде мемлекеттік тіркелгеннен кейін күнтізбелік он күн ішінде оның көшірмелерін мерзімді баспа басылымдарында және «Әділет» ақпараттық-құқықтық жүйесінде ресми жариялауға жіберуді;
      3) осы бұйрықты Қазақстан Республикасы Инвестициялар және даму министрлігінің интернет-ресурсында және мемлекеттік органдардың интранет-порталында орналастыруды;
      4) осы бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде Қазақстан Республикасы Инвестициялар және даму министрлігінің Заң департаментіне осы бұйрықтың 2-тармағының 1), 2) және 3) тармақшаларында көзделген іс-шаралардың орындалуы туралы мәліметтерді ұсынуды қамтамасыз етсін.
      3. Осы бұйрықтың орындалуын бақылауды өзіме қалдырамын.
      4 Осы бұйрық оның алғашқы ресми жарияланған күнінен кейін күнтізбелік жиырма бір күн өткен соң қолданысқа енгізіледі.

      Қазақстан Республикасының
      Инвестициялар және даму
      министрінің
      міндетін атқарушы                                М. Құсайынов

      «КЕЛІСІЛДІ»
      Қазақстан Республикасының
      Ұлттық экономика министрі
      _______________ Е. Досаев
      2015 жылғы 25 қараша

Қазақстан Республикасы 
Инвестициялар және даму
министрінің      
міндетін атқарушының 
2015 жылғы 10 қарашадағы
№ 1061 бұйрығымен   
бекітілген      

Азаматтық әуе кемелерін пайдаланушыны сертификаттау
және оған сертификат беру қағидалары

1. Жалпы ережелер

      1. Осы Азаматтық әуе кемелерін пайдаланушыны сертификаттау және оған сертификат беру қағидалары (бұдан әрі - Қағидалар) «Қазақстан Республикасының әуе кеңістігін пайдалану және авиация қызметі туралы» 2010 жылғы 15 шілдедегі Қазақстан Республикасы Заңының (бұдан әрі - Заң), Қазақстан Республикасы Жоғарғы Кеңесінің 1992 жылғы 2 шілдедегі қаулысымен ратификацияланған Халықаралық азаматтық авиация туралы конвенңияның 6-қосымшасы талаптарына сәйкес әзірленді.
      2. Қағидалар жолаушыларды, багажды, жүкті және почта жөнелтілімдерін коммерциялық тасымалдауды (әуе тасымалдары) жүзеге асыратын авиакомпаниялардың азаматтық әуе кемелерін пайдаланушыны сертификаттау, оларға сертификат (бұдан әрі - пайдаланушы сертификаты) беру, оны тоқтата тұру және қайтарып алу тәртібін айқындайды.
      3. Пайдаланушы сертификаты қолданылу саласы мен мерзімі көрсетіліп, екі жыл мерзімге беріледі және басқа тұлғаға беруге жатпайды.
      4. Халықаралық коммерциялық тасымалдау құқығын беретін пайдаланушы сертификатын алғаш рет алған авиакомпания Халықаралық азаматтық авиация ұйымында (бұдан әрі - ИКАО) тіркеледі. Авиакомпанияға үш әріптік код пен телефонның шартты түрде шақыру белгісі беріледі.
      Тіркеу азаматтық авиация саласындағы уәкілетті органның (бұдан әрі - уәкілетті орган) ИКАО жіберілетін сұрауы арқылы жүзеге асырылады.
      5. Азаматтық әуе кемелерін пайдаланушыны сертификаттау үшін «Салық және бюджетке төленетін басқа да міндетті төлемдер туралы» 2008 жылғы 10 желтоқсандағы Қазақстан Республикасы Кодексінің 476-3-бабы 2-тармағымен айқындалатын тәртіпте және мөлшерде алым алынады.
      6. Сертификаттау мынадай тәртіпте жүзеге асырылады:
      1) өтiнiмдi беру алдындағы кезең;
      2) өтініш берушінің уәкілетті органға құжаттармен бірге өтінім беруі;
      3) құжаттаманы бағалау және шешім қабылдау;
      4) уәкілетті органның өтініш берушіге сертификаттық тексеру жүргізуі;
      5) шешім қабылдау және пайдаланушы сертификатын беру (беруден бас тарту).
      7. Сертификаттау мен пайдаланушы сертификатын берудің жалпы мерзімі – өтінім берілген сәттен бастап күнтізбелік тоқсан күн.
      8. Қағидаларда мынадай терминдер мен анықтамалар пайдаланылады:
      1) азаматтық әуе кемелерiн пайдаланушының сертификаты – уәкiлеттi орган берген, сертификаттау талаптарына және Қағидаларға сәйкестiгiн куәландыратын құжат;
      2) өтінім – өтініш берушінің азаматтық әуе кемелерін пайдаланушының сертификатын алу үшін уәкілетті органға жазбаша жүгінуі (бұдан әрі - өтінім);
      3) өтініш беруші – азаматтық әуе кемелерін пайдаланушының сертификатын алу үшін уәкілетті органға жүгінген Қазақстан Республикасының жеке немесе заңды тұлғасы;
      4) сертификаттық талаптар – «Азаматтық әуе кемелерін пайдаланушыларға қойылатын сертификаттық талаптарды бекіту туралы» Қазақстан Республикасы Инвестициялар және даму министрі міндетін атқарушының 2015 жылғы 24 ақпандағы № 153 бұйрығымен бекітілген (Нормативтік құқықтық актілерді мемлекеттік тіркеу тізілімінде № 11459 болып тіркелген) әуе тасымалдарын, авиациялық жұмыстарды жүзеге асыратын азаматтық әуе кемелерінің пайдаланушыларына қойылатын талаптар;
      5) сертификаттық тексеру – уәкілетті орган жүзеге асыратын өтініш берушінің құралдарын, жабдықтарын, пайдалану рәсімдерін, технологиялық процестерін, құжаттамасын, ұйымдық құрылымын, әкімшілік, ұшу және жер бетіндегі персоналының құзыретін сертификаттық талаптарға сәйкестігіне және сәйкессіздіктер бар болған кезде – уәкілетті орган бекіткен түзету іс-қимылдарының жоспарын (бұдан әрі - түзету іс-қимылдарының жоспары) орындауға (қолдануға) тексеру.

2. Сертификаттауды жүргізу тәртібі

1-параграф. Өтiнiмдi беру алдындағы кезең

      9. Өтiнiмдi беру алдындағы кезең өтініш берушінің уәкілетті органға пайдаланушының сертификатын алу ниеті туралы алдын ала жүгінуін қарастырады, онда оған ұшулардың рұқсат етілген түріне, өтінімді қарастырған кезде қолданылатын рәсімдерге және өтініш беруші ұсынатын мәліметтерге қатысты толыққанды ақпарат беріледі.
      Өз кезегінде, өтiнiш беруші алдын ала бағалау үшін пайдалануға жоспарланатын әуе кемелерінің түріне, оның ұшу қауіпсіздігін қамтамасыз ету үшін қаржы-экономикалық жағдайына және ұсынылатын тасымалдауларға сәйкес келетін маршруттардың құрылымына, тасымалдаулардың жоспарланатын рентабельдiгiне, бiлiктi персоналдың бар болуына, қажеттiлiктерге немесе сұранысқа ие және қоғам мүдделеріне жауап беретін қызмет көрсетудің деңгейіне қатысты ақпаратты ұсынады.
      10. Алдын ала бағалау нәтижелері бойынша оң немесе теріс қорытынды туралы уәкілетті орган жүгінген күннен бастап он жұмыс күні ішінде өтініш берушіге хабардар етеді. Оң қорытынды пайдаланушыны сертификаттауға дайындауды бастау үшін негіз болып табылады.

2-параграф. Өтінімді және құжаттарды беру

      11. Өтініш беруші ұшуларды орындауды бастаудың жоспарланған күніне дейін күнтізбелік тоқсан күн бұрын Қағидаларға 1-қосымшаға сәйкес нысан бойынша пайдаланушы сертификатын алу үшін өтінімді уәкілетті органға жібереді.
      12. Өтінімге Қағидаларға 2-қосымшаға сәйкес Пайдаланушы сертификатын алуға өтінімге қоса берілетін құжаттардың тізбесіне сәйкес құжаттар қоса беріледі.
      13. Кезекті пайдаланушы сертификатын алу үшін өтініш беруші Қағидалардың 11 және 12-тармақтарында көрсетілген өзгерістер болған және/немесе толықтырулар енгізілген құжаттармен бірге өтінімді береді.

3-параграф. Құжаттаманы бағалау және шешім қабылдау

      14. Уәкілетті орган ұсынылған құжаттарды қарайды, олар бойынша Қағидаларға 3-қосымшаға сәйкес «Пайдаланушы сертификатын алуға арналған өтінім бойынша шешім» нысан бойынша тиісті шешім қабылдайды.
      Қараудың барынша ұзақ мерзімі – жиырма жұмыс күні, өтінім мен қоса берілген құжаттар Қағидалардың талаптарына сәйкессіздіктер анықталған жағдайда өтініш берушіге анықталған сәйкессіздіктерді жою мүмкіндігі беріледі, бұл ретте жою мерзімі он жұмыс күніне белгіленеді.
      15. Қағидалардың 14-тармағымен белгіленген мерзімде өтініш беруші анықталған сәйкессіздіктерді жоймаған жағдайда, өтініш берушіге бас тарту себептері көрсетіліп, өтінімді қараудан бас тарту туралы шешім жіберіледі.
      16. Өтінім мен құжаттар Қағидалардың талаптарына сәйкес келген жағдайда, уәкілетті органмен өтініш берушіге сертификаттық тексеру кезеңіне көшу туралы шешім жіберіледі және оны өткізу үшін Комиссия (бұдан әрі - Комиссия) құрылады.

4-параграф. Сертификаттық тексеруді өткізу

      17. Сертификаттық тексеру мемлекеттік авиация инспекторлары үшін уәкілетті орган әзірлеген нұсқамалық материалды пайдалана отырып, пайдаланушының белгіленген сертификаттау талаптарына сәйкестігіне, оның ішінде ұшу қауіпсіздігін қамтамасыз ету үшін оның қаржы-экономикалық жағдайына жүзеге асырылады.
      18. Ұшу және жер бетіндегі қызметтерді тексеру қойылған міндеттерді шешу үшін авиация персоналының, жердегі құралдардың және жабдықтардың дайындық дәрежесін айқындау мақсатында жүргізіледі.
      Бұл ретте ғимараттар мен құрылыстардың тиісінше жабдықталғаны және олардың тікелей мақсаты бойынша пайдаланылуы тексеріліп, расталады.
      19. Пайдаланушы сертификатын алғаш рет алған кезде өтініш берушіні сертификаттық тексеру мыналарды қосымша қамтиды: өтініш берушінің ұшуларға басшылық ету жүйесін көрсету, суға мәжбүрлі қонуды көрсетуге еліктеу, авариялық көшіруді көрсету.
      20. Сертификаттық тексеру нәтижелері бойынша Қағидаларға 4-қосымшаға сәйкес нысан бойынша екі данада Сертификаттық тексеру актісі (бұдан әрі - Акт) жасалынады, онда өтініш беруші объектілерінің нақты жай-күйі, қорытындылар, ұсынымдар мен пайдаланушының сертификатын беру мүмкіндігі немесе мүмкін еместігі туралы қорытынды көрсетіледі. Актіге Комиссияның мүшелері қол қояды және танысу үшін өтініш берушіге беріледі.
      21. Сертификаттық тексеруді жүргізу кезінде сәйкессіздіктер анықталған жағдайда, өтініш беруші Актіге қол қойылған күннен бастап он жұмыс күні ішінде уәкілетті органға бекіту үшін оларды жою бойынша түзету әрекеттерінің жоспарын ұсынады.
      Сертификаттық талаптарға сәйкессіздіктерді жойғаннан кейін өтініш беруші уәкілетті органға тексеру үшін растаушы құжаттаманы қоса бере отырып, түзету іс-қимылдарының жоспарында белгіленген мерзімдерде түзету әрекеттерінің орындалуы туралы анықтаманы ұсынады.
      22. Пайдаланушы сертификаттау талаптарына сай болған жағдайда, уәкілетті орган пайдаланушы сертификатын беру туралы шешім қабылдайды.

5-параграф. Шешім қабылдау және пайдаланушы сертификатын
беру (беруден бас тарту)

      23. Пайдаланушы сертификатын беру үшін пайдаланушы сертификатын беру мүмкіндігі туралы қорытындымен Комиссия жасаған Сертификаттық тексеру актісі негіз болып табылады.
      Уәкілетті орган сертификат беру туралы шешім қабылданған сәттен бастап үш жұмыс күні ішінде Қағидаларға 5-қосымшаға сәйкес нысан бойынша пайдаланушы сертификатын және пайдалану ерекшеліктерін ресімдеуді және беруді жүргізеді.
      24. Уәкiлеттi органның басшысының немесе оны алмастырушы тұлғаның қолымен және уәкілетті органның мөрімен расталған пайдаланушы сертификатының көшiрмесi және онымен байланысты пайдалану ерекшеліктерінің көшірмелері әуе кемесінің бортында болады.
      25. Егер:
      1) өтініш беруші ұсынған құжаттар топтамасы Қағидалардың 11 және 12-тармақтарының талаптарына сәйкес келмесе;
      2) өтініш берушінің қызметі сертификаттық талаптарға сәйкес келмесе;
      3) өтініш берушіге қатысты қызметтердің осы түрлерін көрсетуге тыйым салатын сот шешімі болса, пайдаланушы сертификатын беруден бас тарту жүргізіледі.
      26. Пайдаланушы сертификатын беруден бас тарту туралы шешім қабылданған күннен бастап үш жұмыс күні ішінде уәкілетті орган өтініш берушіге жазбаша түрде дәлелді бас тартуды жібереді.
      27. Пайдаланушы сертификатта белгіленген пайдалану талаптары мен шектеулерді сақтайды.

3. Пайдаланушы сертификатын тоқтата тұру және
қайтарып алу тәртібі

      28. Уәкілетті орган:
      1) пайдаланушы сертификаттық талаптар мен шектеулерді сақтамаған;
      2) Қазақстан Республикасының міндетті сақтандыру түрлері туралы  заңдарының талаптарына сәйкес сақтандыру қамтамасыз етілмеген;
      3) инспекциялық тексеру кезінде, оның ішінде шетел мемлекеттерде белгіленген бірінші деңгейдегі немесе ұшулардың қауіпсіздігіне әсер ететін бұзушылықтар анықталған;
      4) пайдаланушы жазбаша өтініш берген жағдайда, пайдаланушы сертификатының қолданылуын тоқтата тұрады.
      29. Инспекторлық ұйғарымның белгіленген мерзімде орындалмауы сертификаттың қолданылуын тоқтата тұру немесе қайтарып алу үшін негіз болып табылады.
      30. Пайдаланушы коммерциялық әуе тасымалдарын алты айдан астам мерзімге тоқтатқан жағдайда, уәкілетті орган пайдаланушы сертификатын қайтарып алады.
      Уәкілетті орган көрсетілген мерзім басталғанға дейін отыз жұмыс күні бұрын пайдаланушыға сертификатты кері қайтарып алу мүмкіндігі туралы хабарлайды.
      31. Қағидалардың 28-тармағының 1), 2) және 3) тармақшаларында көрсетілген жағдайларда, уәкілетті орган пайдаланушының анықталған бұзушылықтарды жою сәтіне дейін тоқтата тұру себептерін көрсете отырып, пайдаланушы сертификатының қолданылуын тоқтата тұрады.
      Инспекторлық ұйғарым берілген немесе тексеру нәтижелері туралы актімен танысқан күннен бастап он жұмыс күндік ішінде пайдаланушы уәкілетті органға бұзушылықтарды жою бойынша түзету әрекеттерінің жоспарын және бұзушылықтар жойылғаннан кейін жоспармен белгіленген мерзімдерде растайтын құжаттаманы қоса бере отырып, түзету әрекеттерінің орындалуы туралы анықтаманы ұсынады.
      Егер пайдаланушы жоспарда белгіленген мерзімдерде пайдаланушы сертификатының қолданылуын тоқтата тұруға душар еткізген анықталған бұзушылықтарды жоймаса, уәкілетті орган пайдаланушы сертификатын қайтарып алады.
      Пайдаланушы сертификатының қолданылуын тоқтату Қағидалардың 28-тармағында көрсетілген барлық жағдайларда, алты айдан аспайтын мерзімде жүзеге асырылады, одан кейін уәкiлеттi орган пайдаланушының сертификатын кері қайтарып алады.
      32. Пайдаланушы сертификатының қолданылуы тоқтатылған жағдайда уәкілетті орган тарапынан оны қайта жаңарту пайдаланушы түзету әрекеттері жоспарының жоспарда белгіленген мерзімдерде орындалуы туралы анықтаманы бергеннен кейін ғана растайтын құжаттаманы қоса берумен және пайдаланушыны уәкілетті орган тексергеннен кейін жүзеге асырылады.
      33. Уәкілетті орган пайдаланушы сертификатының қолданылуын қайта қалпына келтіру немесе қайта қалпына келтіруден бас тарту туралы шешімді тексеру аяқталған сәттен бастап үш жұмыс күні ішінде пайдаланушыға жазбаша нысанда хабарлайды.
      34. Пайдаланушы сертификатының қолданылуы тоқтатыла тұрған немесе ол қайтарып алынған жағдайда, уәкілетті орган қабылданған шешім туралы пайдаланушыға және әуе қозғалысына қызмет көрсету органына дереу хабарлайды.
      35. Пайдаланушы сертификаты қайтарып алынған жағдайда, пайдаланушы сертификаттың түпнұсқасын уәкілетті органға дереу қайтарады.
      36. Уәкілетті орган қайтарып алу туралы шешім қабылданған сәттен бастап он жұмыс күні ішінде бұл туралы ИКАО хабарлайды (халықаралық әуе тасымалдарын жүзеге асыратын пайдаланушы үшін).

4. Қорытынды ережелер

      37. Пайдаланушы сертификатына өзгерістер мен толықтырулар:
      1) пайдаланушының өтінімі бойынша;
      2) пайдаланушыға жүргізілген тексеру нәтижелері бойынша уәкілетті органның шешімі бойынша енгізіледі.
      38. Пайдаланушы уәкілетті органға Қағидаларға 6-қосымшаға сәйкес нысан бойынша пайдаланушы сертификатына өзгерістер мен толықтырулар енгізуге өтінімді жібереді.
      39. Пайдаланушы атауының, оның мәртебесінің, ведомстволық тиесілігінің өзгеруі (егер олар сертификаттау талаптарына сәйкессіздіктерге әкеп соқтырмайтын болса), әуе кемелерін пайдалануды тоқтатқан жағдайда, пайдаланушы сертификатына және пайдалану ерекшеліктеріне тиісті өзгерістер енгізіледі. Өзгерістерді енгізу мерзімі өтінімді алған сәттен бастап он жұмыс күнін құрайды.
      40. Пайдаланушы пайдаланғанмен бір типтегі әуе кемелерін меншікке, экипажсыз жалға алған жағдайда, уәкілетті орган өтінімді алған сәттен бастап он жұмыс күні ішінде:
      1) ұсынылған құжаттарды қарайды;
      2) әуе кемесін тексеруді жүргізеді, оның нәтижелері бойынша пайдаланушының пайдалану ерекшеліктеріне тиісті өзгерістер мен толықтырулар енгізіледі.
      41. Пайдаланушы бұрын өзі пайдаланбаған басқа типтегі әуе кемелерін меншікке, экипажсыз жалға алған жағдайда, уәкілетті орган өтінімді алған сәттен бастап отыз жұмыс күні ішінде:
      1) ұсынылған құжаттарды қарайды;
      2) нәтижелері бойынша пайдаланушының пайдалану ерекшеліктеріне тиісті өзгерістер мен толықтырулар енгізілетін бөлігінде пайдаланушыға тексеруді жүргізеді.
      42. Егер:
      1) осы сертификаттық талаптарға сәйкессіздікті әкелетін болса;
      2) өтініш беруші ұсынған құжаттар Қағидаларға 7-қосымшаға сәйкес Пайдаланушы сертификатына өзгерістер мен толықтырулар енгізуге арналған құжаттардың тізбесіне сәйкес келмесе;
      3) мәлімделген әуе кемесі басқа пайдаланушының сертификаты немесе куәлігінің пайдалану ерекшеліктеріне енгізілсе, мәлімделген әуе кемесін пайдаланушы сертификатының пайдалану ерекшеліктеріне енгізуден бас тарту жүргізіледі.
      43. Уәкілетті орган мәлімделген әуе кемесін пайдаланушы сертификатына енгізуден бас тартқан жағдайда, өтініш берушіге өтінімді алған сәттен бастап он жұмыс күні ішінде жазбаша түрде дәлелді бас тарту беріледі.

Азаматтық әуе кемелерін 
пайдаланушыны сертификаттау
және оған сертификат беру
қағидаларына 1-қосымша  

Нысан

Пайдаланушы сертификатын алу үшін
өтінім

Алғаш рет беру / кезекті беру
(керегінің астын сызу)

1. Жалпы ақпарат

      1. Компанияның ресми атауы және саудадағы атауы (егер өзгеше болса):
      1) № ________________________________________ ПС өтініш беруші;
      2) пайдаланушы «_____________________________________________»;
      3) телефон, факс: ____________________________________________;
      4) электрондық поштасының мекенжайы: __________________________
      2. Заңды мекенжайы, телефоны және факсы: ______________________
      3. Қызметтік қосымша мекенжайы: _______________________________
      4. Жұмысты бастайтын болжамды күні: ___________________________
      5. Бастапқы сертификаттау кезінде, ұшу-пайдалану агенттігі үшін сұралатын шартты белгілер.
      6. ИКАО/ИАТА коды (3 әріптік/2 әріптік, бар болса):
________________________________________/__________________________.
      7. Басшылар мен негізгі қызметкерлер.

2. Техникалық қызмет көрсету және өтініш беруші
тасымалдарының түрлері

      8. Пайдаланушы:
      техникалық қызмет көрсетуді өз бетімен жүзеге асыруды/техникалық қызмет көрсетуді шарттар негізінде орындауды жоспарлап отыр (керегінің астын сызу).
      9. Тасымалдаудың ұсынылған түрлері:
      жолаушылар және жүк/жүк/пошта жөнелтілімдері (керегінің астын сызу).

3. Әуе кемелері мен болжамды ұшулар
аудандары туралы ақпарат

      10. Әуе кемелері туралы мәліметтер (меншікті, жалға алынған):
      1) Түрі, моделі және версиясы бойынша әуе кемелерінің саны, сондай-ақ ұлттық айырым және тіркеу белгілері;
      2) Жолаушы креслоларының саны және/немесе пайдалы жүктелуі (кг., тонна);
      3) Әуе кемесінің рұқсат етілген ең ауыр ұшып көтерілу салмағы (MTOW).
      11. Әуе кемесін (кемелерін) жалға алу туралы келісімдердің деректері, келісім мерзімі, әуе кемелерін иеленушінің атауы мен заңды мекенжайы: __________________________________________________________
      12. Ұшудың болжамды ауданы (аудандары):
      Кариб өңірі (CAR), Африка және Үнді мұхиты өңірі (AFI), Еуропа өңірі (EUR), Таяу Шығыс және Азия өңірі (MID/ASIA), Солтүстік Америка өңірі (NAM), Солтүстік Атлант өңірі (NAT), Тынық мұхиты өңірі (PAC), Оңтүстік Америка өңірі (SAM) (керегінің астын сызу).

4. Пайдалану ерекшеліктерінің жобасы

      13. Пайдаланушы Қағидаларға 5-қосымшаға сәйкес «Пайдаланушы сертификаты және пайдалану ерекшеліктері» нысан бойынша құрастырылған, пайдалану ерекшеліктері жобасын ұсынады, оларда ұшу/жұмыстар түрлері көрсетіледі:
      1) тұрақты/тұрақты емес коммерциялық әуе тасымалдары;
      2) жолаушылар;
      3) жүк;
      4) өзгелері (авиациялық жұмыстар).
      14. Пайдалану ерекшеліктерінің жобасы арнайы рұқсаттарды/ мақұлдауларды (әр әуе кемесіне толтырылады) қамтиды:
      1) Көріну қашықтығы (RVR) (метр);
      2) Шешім қабылдаудың қатысты биіктігі DH (метр/фут);
      3) Көрініс шектеулі болғанда ұшып көтерілу LVTO RVR (метр);
      4) Кеңейтілген пайдалану мүмкіндіктері;
      5) Ең төменгі навигациялық сипаттамаларға қойылатын талаптар MNPS;
      6) Аймақтық дәл навигация P-RNAV (Precision RNAV);
      7) Аймақтық базалық навигация B-RNAV (Basic RNAV);
      8) Талап етілетін навигациялық сипаттамалар (RNP);
      9) Тігінен эшелондаудың қысқартылған минимумы (RVSM);
      10) Әуе қозғалысы туралы ақпарат беру және соқтығысудың алдын алу жүйесі (TCAS);
      11) Жерге жақындау туралы сигнал берудің электрондық жүйесі (EGPWS);
      12) Жаһандық навигациялық спутниктік жүйе (GNSS);
      13) Қашықтан әрекет ететін навигациялық жүйелер (LRNS);
      14) Жан-жаққа бағытталған АЖЖ-радиомаяк (VOR);
      15) Инерциялық тірек блогы (инерциялық өлшегіш)/Инерциялық тірек жүйесі (IRU/IRS);
      16) Қашықтықты өлшеу жабдығы (DME);
      17) Электронды ұшу құжаттамасы (EFB);
      18) Қауіпті жүктер;
      19) Қосалқы әуеайлаққа кететін уақыт ұлғайтылған ұшуды орындау (EDTO): шекті уақыт _____ (минут), қашықтық ______ (теңіз милі NM);
      20) Қосалқы әуеайлаққа кететін уақыт ұлғайтылмаған ұшуды орындау (non-EDTO) ______ (минут);
      21) Қосалқы әуеайлаққа дейін ұшатын ең көп уақыт ________ (минут);
      22) Тұрған жерін айқындаудың жаһандық жүйесі бойынша қонуға бет алу (GPS Approach) (қолданылатынының астын сызу, қажет болған жағдайда толтыру).
      Арнайы шектеулер: ____________________________________________

5. Авиациялық персоналдың даярлығы туралы ақпарат

      15. Персоналдың ұсынылатын даярлығы (ұшу персоналына арналған пилотаждық тренажерлар және/немесе кабина персоналына арналған тренажерлық қондырғылар):
      16. Пайдаланушы сертификатын алуға өтініш беру ниетін растау.

      17. Уәкілетті орган енгізетін мәліметтер:

Азаматтық әуе кемелерін 
пайдаланушыны сертификаттау
және оған сертификат беру
қағидаларына 2-қосымша  

Пайдаланушы сертификатын алуға өтінімге қоса
берілетін құжаттардың тізбесі

      1. Азаматтық әуе кемелерін пайдаланушыны сертификаттау үшін алымның төленгенін растайтын құжат.
      2. Заңды тұлғаны мемлекеттік тіркеу (қайта тіркеу) туралы куәліктің* көшірмесі немесе анықтама;
      Ескертпе: *«Қазақстан Республикасының кейбір заңнамалық актiлерiне заңды тұлғаларды мемлекеттік тіркеу және филиалдар мен өкiлдiктердi есептік тіркеу мәселелері бойынша өзгерістер мен толықтырулар енгізу туралы» 2012 жылғы 24 желтоқсандағы Қазақстан Республикасының Заңы қолданысқа енгізілгенге дейін берілген заңды тұлғаны (филиалды, өкілдікті) мемлекеттік (есептік) тіркеу (қайта тіркеу) туралы куәлік заңды тұлғаның қызметі тоқтатылғанға дейін жарамды болып табылады.
      3. Пайдаланушының бірінші басшысы қол қойған, қызметтің сертификаттық талаптарға, Нұсқаулардың ережелеріне сәйкестігі туралы декларация және осы сәйкестікті тұрақты қолдау міндеттемесі.
      4. Өтініш беруші жарғысының және құрылтай шартының көшірмелері.
      5. Өтініш берушінің ақпараты, ол мыналарды қамтиды:
      1) өтініш берушінің негізгі деректері мен құрылтайшылары;
      2) жоспарланатын коммерциялық әуе тасымалдарының / жұмыстарының түрлері;
      3) ұшу жұмысын ұйымдастыру;
      4) ұшуға жарамдылықты қолдау жүйесі;
      5) ұшуды қамтамасыз ету;
      6) ұшу персоналы мен техникалық персоналдың әзірлігі;
      7) техникалық қызмет көрсету объектілерінің әзірлігі;
      8) әуе кемелерінің әзірлігі;
      9) авариялық эвакуацияны көрсету және демонстрациялық ұшуды өткізу жоспары.
      6. Ұйымдық құрылымы, басқару құрылымы мен қызметі, Т.А.Ә.А., білімі, біліктілігі және жұмыс тәжірибесі көрсетілген жауапты тұлғалар.
      7. Мынадай басшылардың және/немесе жауапты тұлғалардың тағайындалуын растайтын құжаттар:
      ұшу қауіпсіздігі бойынша қызмет;
      ұшу қызметі;
      ұшуға жарамдылықты қолдау бойынша қызмет;
      жер үсті қамтамасыз ету бойынша;
      персоналды даярлау бойынша;
      авиациялық қауіпсіздік бойынша;
      бортсеріктер қызметі (бар болса);
      сапаны бақылау бойынша.
      8. Түрі, моделі, сериясы, ұлттық және тіркеу белгілері көрсетілген әуе кемелерінің тізімі.
      9. Авиациялық персонал бойынша ақпарат.
      10. Ұшуды жүргізу бойынша нұсқау.
      11. Сертификатталған ең ауыр ұшып көтерілу салмағы 5700 кг. жоғары әуе кемелерін пайдаланатын пайдаланушылар үшін ұшу қауіпсіздігін басқару бойынша нұсқау.
      12. Техникалық қызмет көрсетуді реттеу бойынша пайдаланушының нұсқауы.
      13. Әуе кемелеріне техникалық қызмет көрсету бойынша бағдарлама (регламент).
      14. Қазақстан Республикасының сақтандырудың міндетті түрлері туралы заңдарына сәйкес пайдаланушыны оның қызметкерлерінің алдында міндетті сақтандырудың азаматтық-құқықтық жауапкершілігін сақтандыру полистерінің көшірмелері.
      15. Пайдаланушының басшысы бекітетін әуе кемелерін бояу үлгілері мен мәтіндік сипаттамасы.
      16. Пайдаланушының авиациялық қауіпсіздік бағдарламасы.
      17. Ұшуды жер үстінде қамтамасыз ету бойынша ақпарат.
      18. Жұмыс түрлері көрсетілген сыртқы ұйымдармен техникалық қызмет көрсетуге жасалған шарттардың тізбесі.
      19. Сыртқы ұйымдармен ұшуға жарамдылықты қолдауға жасалған шарттардың көшірмелері.
      Жоғарыда көрсетілген құжаттардың барлық көшірмелері өтініш берушінің қолымен және мөрімен куәландырылады.

Азаматтық әуе кемелерін 
пайдаланушыны сертификаттау
және оған сертификат беру
қағидаларына 3-қосымша  

Нысан

Пайдаланушы сертификатын алуға арналған өтінім бойынша
шешім

20__ жылғы «___» __________ № _____

_____________________________________________________________________
                     (өтініш берушінің атауы)
коммерциялық әуе тасымалдарын жүзеге асыруға азаматтық әуе кемелерін
пайдаланушы сертификатын алуға арналған өтінімін қарап, сіз ұсынған
құжаттар Азаматтық әуе кемелерін пайдаланушыны сертификаттау және
оған сертификат беру қағидаларына сәйкес (сәйкес емес) (құжаттар
сәйкес келмеген жағдайда сәйкессіздік тармағы/тармақтары көрсетіледі)
келетінін хабарлаймыз.
      Сертификаттық тексеру кезеңіне көшу туралы хабарлаймыз (сәйкес
болған кезде).

      МО                     Уәкілетті органның лауазымды тұлғасы
                                 не ол уәкілеттік берген тұлға
                            ____________________________  ___________
                                      (Т.А.Ә.А.)             (қолы)

Азаматтық әуе кемелерін 
пайдаланушыны сертификаттау
және оған сертификат беру
қағидаларына 4-қосымша  

Нысан

Сертификаттық тексеру акті

_______________________________ 20__ жылғы «__» ______ № ____________
  (уәкілетті органның атауы)

бұйрығына сәйкес мынадай құрамдағы Комиссия:

Төраға: _____________________________________________________________
                            (Т.А.Ә.А., лауазымы)

Комиссия мүшелері:
__________________________________________________
            (Т.А.Ә.А., лауазымы)
__________________________________________________
            (Т.А.Ә.А., лауазымы)
__________________________________________________
            (Т.А.Ә.А., лауазымы)

өтініш беруші _______________________________________________________
                             (заңды тұлғаның атауы)

      Азаматтық әуе кемелерін пайдаланушыға қойылатын сертификаттау
талаптарына сәйкестігіне сертификаттық тексеру жүргізді.
      Қорытындының мәтіні:___________________________________________

Төраға: _____________________________________________  ______________
                           (Т.А.Ә.А.)                      (қолы)
Комиссия мүшелері: __________________________________  ______________
                           (Т.А.Ә.А.)                      (қолы)

Актімен таныстым:
Жауапты тұлға: ______________________________________  ______________
                           (Т.А.Ә.А.)                      (қолы)

Азаматтық әуе кемелерін 
пайдаланушыны сертификаттау
және оған сертификат беру
қағидаларына 5-қосымша  

Нысан

Пайдаланушы сертификаты және пайдалану ерекшеліктері Қазақстан Республикасының Мемлекеттік Елтаңбасы

Уәкілетті органның атауы Пайдалану ерекшеліктері
(пайдаланудағы талаптар мен шектеулер)

А бөлігі - Жалпы ережелер

      1. Осы пайдалану ерекшеліктері Қазақстан Республикасы Инвестициялар және даму министрінің міндетін атқарушының 2015 жылғы ____________ № _______ бұйрығымен бекітілген Азаматтық әуе кемелерін пайдаланушыны сертификаттау және оған сертификат беру қағидаларына және Халықаралық азаматтық авиация туралы конвенцияға (Чикаго, 1944 ж.) 6-қосымшаға (I бөлім) сәйкес беріледі.
      2. Пайдаланушы «________» ұшуды орындауға даярланған.
      3. Пайдаланушы «________» коммерциялық әуе тасымалдарын орындау үшін мынадай өндірушілер мен модельдердің әуе кемелерін пайдалануға рұқсат етіледі:

      Ішкі және (немесе) халықаралық әуе желілерінде ұшу үшін:

      1-бағанда әуе кемесін өндіруші зауыт көрсетіледі; 2-бағанда әуе кемесінің үлгісі және мемлекеттік тіркеу нөмірі көрсетіледі; 3-бағанда тоннамен немесе килограмммен көрсеткіш және жолаушылар орындарының саны көрсетіледі.
_____________________ ________________________________ __________
      (лауазымы)                 (Т.А.Ә.А.)              (қолы)

                                                              МО

Берілген күні: 20__ ж. «___» __________

Уәкілетті органның атауы Пайдалану ерекшеліктері
(пайдаланудағы талаптар мен шектеулер)

В бөлігі – Маршруттардағы рұқсаттар мен шектеулер (ұшақтар)

Уәкілетті органның атауы Пайдалану ерекшеліктері
(пайдаланудағы талаптар мен шектеулер)

В/1 бөлігі – Маршруттардағы рұқсаттар мен шектеулер (тікұшақтар)

Азаматтық әуе кемелерін 
пайдаланушыны сертификаттау
және оған сертификат беру
қағидаларына 6-қосымша  

Нысан

Уәкілетті органның лауазымды тұлғасына

Пайдаланушы сертификатына өзгерістер мен толықтырулар енгізуге
өтінім

_____________________________________________________________________
                (өтініш берушінің толық атауы)
пайдаланушы сертификатының пайдалану ерекшеліктеріне өзгерістер және
(немесе) толықтырулар енгізуді сұраймын.
      Ұшуды бастаудың жоспарланған күні: ____________________________
_____________________________________________________________________
    (өзгерістер және (немесе) толықтырулар енгізілген кезде жаңа
      пайдалану жағдайларында ұшуды бастаудың жоспарланған күні
                     көрсетіледі)

      Басшы ________________________________________________________
                         (лауазымы / қолы / күні)

      М.О.

Азаматтық әуе кемелерін 
пайдаланушыны сертификаттау
және оған сертификат беру
қағидаларына 7-қосымша  

Пайдаланушы сертификатына өзгерістер мен толықтырулар
енгізуге арналған құжаттардың тізбесі

      1. Әуе кемесін пайдаланушы сертификатына енгізген кезде өтініш беруші пайдаланушы сертификатына өзгерістер мен толықтырулар енгізуге өтінім мен бірге мынадай құжаттарды ұсынады:
      1) әуе кемесін мемлекеттік тіркеу туралы куәліктің көшірмесі;
      2) ұшуға жарамдылық сертификатының, радиостанцияға арналған рұқсатының (лицензияның) және әуе кемесі тұрған жердегі шу бойынша сертификатының көшірмелері;
      3) ұшуға жарамдылықта ұстау туралы мәліметтер;
      4) әуе кемесіне техникалық қызмет көрсету туралы мәліметтер;
      5) ұшу және техникалық құрам туралы мәліметтер;
      6) Қазақстан Республикасының міндетті сақтандыру түрлері туралы заңдарына сәйкес пайдаланушыны оның қызметкерлері алдындағы азаматтық-құқықтық жауапкершілігін міндетті сақтандырудың сақтандыру полистерінің көшірмелері;
      7) ұшуды орындау жөніндегі нұсқауға, техникалық қызмет көрсетуді реттеу жөніндегі пайдаланушы нұсқауына, техникалық қызмет көрсету бағдарламасына, ең аз жабдықтардың тізбесіне (MEL) тиісті өзгерістер мен толықтырулар.
      2. Экипажсыз жалға алған әуе кемесін пайдаланушы сертификатына енгізген кезде өтініш беруші, осы тізбенің 1-тармағында көрсетілген құжаттарға қосымша мыналарды ұсынады:
      1) әуе кемесінің түрі, моделі және сериялық нөмірі туралы мәліметтер;
      2) әуе кемесі иесінің тегі (атауы) және мекенжайы;
      3) тіркелген мемлекеті, ұлттық және тіркеу белгілері туралы мәліметтер;
      4) уәкілетті орган берген әуе кемесінің ұшуға жарамдылығы сертификатын жарамды деп тану туралы шешімнің көшірмесі (басқа мемлекетте тіркелген әуе кемесін жалға алған жағдайда);
      5) әуе кемесін пайдалану бойынша бақылауға, техникалық қызмет көрсетуге және ұшу жарамдылығын сақтауға жауапты тараптар, сондай-ақ жалға алу мерзімі көрсетілген әуе кемесін экипажсыз жалға алу туралы шарттың көшірмесі;
      6) ұшу орындалатын аудандар.
      3. Жоғарыда көрсетілген құжаттардың барлық көшірмелері өтініш берушінің қолымен және мөрімен куәландырылады.