Қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл жасау мақсатында екінші деңгейдегі банктер мен Ұлттық пошта операторы үшін ішкі бақылау қағидаларына қойылатын талаптарды бекіту туралы

      РҚАО-ның ескертпесі!
      Осы бұйрықтың қолданысқа енгізілу тәртібін 4-тармақтан қараңыз

      «Қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл туралы» 2009 жылғы 28 тамыздағы Қазақстан Республикасының Заңы 11-бабының 3-2-тармағына сәйкес Қазақстан Республикасының Қаржы министрі БҰЙЫРАДЫ және Қазақстан Республикасы Ұлттық Банкінің Басқармасы ҚАУЛЫ ЕТЕДІ:
      1. Қоса беріліп отырған Қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл жасау мақсатында екінші деңгейдегі банктер мен Ұлттық пошта операторы үшін ішкі бақылау қағидаларына қойылатын талаптар бекітілсін.
      2. Екінші деңгейдегі банктер мен Ұлттық пошта операторы:
      1) осы бұйрық және қаулы қолданысқа енгізілген күннен бастап  күнтізбелік үш айдан кешіктірмей ішкі құжаттаманы осы бұйрыққа және қаулыға сәйкес келтірсін;
      2) осы бұйрық және қаулы қолданысқа енгізілген күннен бастап күнтізбелік бір жылдан кешіктірмей осы бұйрыққа және қаулыға сәйкес автоматтандырылған ақпарат жүйелерін пысықтау және қазіргі клиенттерінің тәуекел деңгейін айқындау бойынша іс-шаралар жүргізсін.
      3. Қазақстан Республикасы Қаржы министрлігінің Қаржы мониторингі комитеті (Тәжіяқов Б.Ш.) заңнамада белгіленген тәртіппен:
      1) осы бұйрықты және қаулыны Қазақстан Республикасының Әділет министрлігінде мемлекеттік тіркеуді;
      2) осы бұйрық және қаулы мемлекеттік тіркелгеннен кейін күнтізбелік он күн ішінде оларды мерзімді баспасөз басылымдарында және «Әділет» ақпарат-құқықтық жүйесінде ресми жариялауға жіберуді;
      3) осы бұйрықты және қаулыны Қазақстан Республикасы Қаржы министрлігінің интернет-ресурсында орналастыруды қамтамасыз етсін.
      4. Осы бұйрық және қаулы 2014 жылғы 15 желтоқсаннан бастап қолданысқа енгізіледі.

      Қазақстан Республикасының       Қазақстан Республикасы
      Қаржы министрі                  Ұлттық Банкінің Төрағасы
      _____________ Б.Сұлтанов        ___________Қ. Келімбетов
      2014 жылғы «__»_________        2014 жылғы «__»_________

Қазақстан Республикасы
Қаржы министрінің  
2014 жылғы 26 қарашадағы
№ 521 бұйрығымен   
және Қазақстан Республикасының
Ұлттық Банкі Басқармасының
2014 жылғы 24 желтоқсандағы
№ 235 қаулысымен  
бекітілген      

Қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл жасау мақсатында екінші деңгейдегі банктер мен Ұлттық пошта операторы үшін ішкі бақылау қағидаларына қойылатын талаптар

1. Жалпы ережелер

      1. Осы Қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл жасау мақсатында екінші деңгейдегі банктер мен Ұлттық пошта операторы үшін ішкі бақылау қағидаларына қойылатын талаптар (бұдан әрі - Талаптар) «Қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл туралы» 2009 жылғы 28 тамыздағы Қазақстан Республикасының Заңына (бұдан әрі - КЖ/ТҚҚ туралы заң) және Нормативтік құқықтық актілерді мемлекеттік тіркеу тізілімінде № 9322 тіркелген Қазақстан Республикасының Ұлттық Банкі Басқармасының «Екінші деңгейдегі банктерге арналған тәуекелдерді басқару және ішкі бақылау жүйесін қалыптастыру қағидаларын бекіту туралы» 2014 жылғы 26 ақпандағы № 29 қаулысына (бұдан әрі - Қағидалар) сәйкес әзірленді.
      2. Егер Талаптармен өзгеше көзделмесе, онда Талаптарда қолданылатын ұғымдар КЖ/ТҚҚ туралы заңда көрсетілген мағыналарында пайдаланылады.
      Талаптардың мақсаттары үшін мынадай негізгі ұғымдар пайдаланылады:
      1) активтерді тоқтата тұру - мынадай жолмен қолданылатын қылмыстық жолмен алынған кірістерді заңдастыру (жылыстату) және терроризмді қаржыландыру (бұдан әрі - КЖ/ТҚ) тәуекелдерін азайту тәсілі:
      клиенттің банк шоты (банк шоттары) бойынша шығыс операцияларын тоқтата тұру;
      номиналды ұстауды есепке алу жүйесіндегі клиенттің бағалы қағаздарын оқшаулау;
      кастодиандық қызмет көрсетуге берілген активтерді есепке алу үшін клиенттің шоты (шоттары) бойынша операцияларды жасауға арналған клиенттің бұйрықтарын (тапсырмаларын) орындаудан (оқшаулаудан) бас тарту;
      клиенттің металл шоты (металл шоттары) бойынша шығыс операцияларын (тазартылған бағалы металдарды шоттан қайтару, алу, есептен шығару немесе басқа шотқа аудару не тазартылған бағалы металдарды сатып алу-сату мәмілесін жасау нәтижесінде ақшаны беру түрінде) жүргізуден бас тарту;
      банк шотын пайдаланбастан төлем немесе ақша аудару бойынша клиенттің нұсқауларын орындауды тоқтата тұру;
      электрондық әмиянды оқшаулау;
      сейф қоймасына кіргізуден бас тартуды қоса алғанда, клиенттің қаржы ресурстарына қол жеткізуін шектеу мақсатында клиент ақшамен және (немесе) өзге де мүлікпен жасайтын өзге операцияларды жүргізуден бас тарту;
      2) әдеттегіден тыс операция (мәміле) - Қазақстан Республикасының Үкіметі бекіткен және екінші деңгейдегі банк немесе Ұлттық пошта операторы (бұдан әрі - банк) дербес әзірлеген белгілер ескеріле отырып КЖ/ТҚҚ туралы заңның 4-бабының 4-тармағына сәйкес міндетті зерделенуге жататын операция (мәміле);
      3) біржолғы операция (мәміле) - банктің клиентке мынадай қызметтерді (өнімдерді) ұсынуы жөніндегі қарым-қатынастар:
      клиенттің айырбастау пункті арқылы қолма-қол шетелдік валютаны сатып алуы, сатуы немесе айырбастауы;
      банк шотын пайдаланбастан клиенттің қолма-қол жасалмайтын төлемді немесе ақша аударуды жүзеге асыруы не олардың оның пайдасына түсуі;
      чек ұстаушының чегін банктің төлеуі;
      вексель ұстаушының векселін банктің есепке алуы;
      қолма-қол ақшаны қабылдауға арналған жабдықтың (құрылғының) көмегімен жеке тұлғаның банк шотына ақша енгізу;
      банк шотына қол жеткізу құралы болып табылмайтын төлем карточкасының көмегімен операцияларды жүзеге асыру;
      4) КЖ/ТҚ тәуекелдері - банкті КЖ/ТҚ процестеріне немесе өзге қылмыстық қызметке қасақана немесе қасақана емес тарту тәуекелдері;
      5) КЖ/ТҚ тәуекелдерін басқару - банктің КЖ/ТҚ тәуекелдерін анықтау, бағалау, оларға мониторинг жасау, сондай-ақ оларды азайту бойынша қабылдайтын шараларының жиынтығы (өнімдерге/қызметтерге, клиенттерге, сондай-ақ клиенттер жасайтын операцияларға қатысты);
      6) шекті операция - ақшамен және (немесе) өзге мүлікпен жасалатын, КЖ/ТҚҚ туралы заңның 4-бабына сәйкес қаржы мониторингі жүргізілуге жататын және КЖ/ТҚҚ туралы заңмен белгіленген шекті сомаға тең не одан асатын операция;
      7) шот - банктің клиентке сейф ұяшығын жалға беруі бойынша қарым-қатынастарды қоспағанда, ақшаны, бағалы қағаздарды және өзге қаржы құралдарын, бағалы металдар мен асыл тастарды қоса алғанда, банктің клиенттің активтерін қабылдауды, есепке алу мен сақтауды жүзеге асыруы көзделетін банк пен клиенттің арасындағы іскерлік қарым-қатынастарды көрсету тәсілі;
      8) іскерлік қарым-қатынастар - біржолғы операцияларға (мәмілелерге) жататын қызметтерді (өнімдерді) қоспағанда, банктің клиентке қаржылық қызметке және қаржылық қызмет көрсетулерге жататын қызметтерді (өнімдерді) ұсынуы бойынша қарым-қатынастар.
      3. Банк қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл жасау мақсатында (бұдан әрі - КЖ/ТҚҚ) ішкі бақылауды:
      1) банктің КЖ/ТҚҚ туралы заңның талаптарын орындауын қамтамасыз ету;
      2) банктің ішкі бақылау жүйесінің КЖ/ТҚ тәуекелдерін және қатар жүретін тәуекелдерді (операциялық, беделді жоғалту, шоғырлану) басқару үшін жеткілікті деңгейде ұстап тұру;
      3) банкті, оның лауазымды тұлғалары мен қызметкерлерін КЖ/ТҚ процестеріне тартуды болдырмау мақсатында жүзеге асырады.
      4. КЖ/ТҚҚ мақсатында ішкі бақылауды ұйымдастыру шеңберінде банкте Қағидалардың талаптары ескерілетін және банктің ішкі аудит қызметінің КЖ/ТҚҚ мақсатында ішкі бақылаудың тиімділігін бағалауды жүргізуіне қойылатын талаптар қамтылатын ішкі бақылау қағидалары әзірленеді.
      Ішкі бақылау қағидалары КЖ/ТҚҚ туралы заңның 11-бабында көзделген бағдарламалардан тұрады, банк оларды Талаптарға сәйкес дербес әзірлейді және олар банктің ішкі құжаты не осындай құжаттардың жиынтығы болып табылады.

2. КЖ/ТҚҚ ішкі жүйесін ұйымдастыру және КЖ/ТҚҚ мақсатында ішкі бақылауды ұйымдастыру бағдарламасы

      5. Банкте банктің ішкі құжаттарында белгіленген тәртіппен банктегі бақылау қағидаларын сақтауға мониторингті жүзеге асыру жөніндегі жауапты қызметкер (бұдан әрі - жауапты қызметкер) тағайындалады, сондай-ақ құзыретіне КЖ/ТҚҚ мәселелері кіретін бөлімше (бұдан әрі - КЖ/ТҚҚ жөніндегі бөлімше) белгіленеді.
      6. Мыналар жауапты қызметкерге қойылатын талаптар болып табылады:
      1) жоғары білімінің болуы;
      2) банктік және (немесе) өзге операцияларды жүзеге асырумен байланысты банк бөлімшесі басшысының лауазымында кемінде бір жыл жұмыс өтілінің не КЖ/ТҚҚ саласында кемінде екі жыл жұмыс өтілінің не қаржылық қызметтерді ұсыну және (немесе) реттеу саласында кемінде үш жыл жұмыс өтілінің болуы;
      3) «Қазақстан Республикасындағы банктер және банк қызметі туралы» 1995 жылғы 31 тамыздағы Қазақстан Республикасының Заңына сәйкес мінсіз іскерлік беделінің болуы.
      7. КЖ/ТҚҚ мақсатында ішкі бақылауды ұйымдастыру бағдарламасы:
      1) КЖ/ТҚҚ жөніндегі бөлімшенің функцияларын, оның ішінде КЖ/ТҚҚ мақсатында ішкі бақылауды жүзеге асыру кезінде банктің басқа бөлімшелерімен, филиалдарымен, еншілес ұйымдарымен өзара әрекет ету тәртібін, сондай-ақ жауапты қызметкердің функцияларын, өкілеттіктерін, жауапты қызметкердің банктің басқару органымен және атқару органымен өзара әрекет ету тәртібін сипаттауды;
      2) КЖ/ТҚҚ мақсатында ішкі бақылауды жүзеге асыру және қаржы мониторингін жүзеге асыратын және КЖ/ТҚҚ туралы заңға сәйкес КЖ/ТҚҚ бойынша өзге де шараларды қабылдайтын мемлекеттік уәкілетті органға (бұдан әрі - қаржы мониторингі жөніндегі уәкілетті орган) хабарламаларды беру үшін пайдаланылатын автоматтандырылған ақпараттық жүйелер мен бағдарламалық қамтамасыз ету туралы мәліметтерді, оның ішінде оларды әзірлеушілер туралы мәліметтерді;
      3) мәліметтерді тіркеу, сондай-ақ КЖ/ТҚҚ мақсатында ішкі бақылауды іске асыру барысында алынған құжаттарды мен ақпаратты сақтау тәртібін;
      4) банк қызметкерлерінің, оның ішінде жауапты қызметкердің банктің басқару органын және атқару органын өздеріне белгілі болған банктің қызметкерлері жол берген КЖ/ТҚҚ туралы заңды, сондай-ақ ішкі бақылау қағидаларын бұзу фактілері туралы хабардар ету тәртібін;
      5) КЖ/ТҚҚ бойынша топтық талаптарды сипаттауды (бар болса);
      6) банктің ішкі аудит бөлімшесінің КЖ/ТҚҚ мақсатында ішкі бақылаудың тиімділігін бағалау нәтижелері бойынша басқару есептілігін дайындауы және банктің басқару органына және атқару органына ұсыну тәртібін қамтиды, бірақ олармен шектелмейді.
      8. КЖ/ТҚҚ мақсатында ішкі бақылауды ұйымдастыру бағдарламасына сәйкес жауапты қызметкердің және КЖ/ТҚҚ жөніндегі бөлімше қызметкерлерінің функцияларына:
      1) банкте әзірленген және банктің атқарушы органымен келісілген ішкі бақылау қағидаларының және (немесе) оларға өзгерістердің (толықтырулардың), сондай-ақ банкте олардың сақталуына мониторингтің болуын қамтамасыз ету;
      2) КЖ/ТҚҚ туралы заңға сәйкес қаржы мониторингі жөніндегі уәкілетті органға хабарламалар ұсынуды ұйымдастыру және олардың ұсынылуына бақылау жасау;
      3) клиенттердің операцияларын күдікті ретінде тану және банктің ішкі құжаттарында көзделген тәртіппен қаржы мониторингі жөніндегі уәкілетті органға хабарламалар жіберу қажеттілігі туралы шешімдер қабылдау;
      4) КЖ/ТҚҚ туралы заңда және (немесе) клиенттермен жасалған шарттарда көзделген жағдайларда және банктің ішкі құжаттарында көзделген тәртіппен клиенттердің операцияларын жүргізуді тоқтата тұру не бас тарту туралы шешімдер қабылдау;
      5) банктің уәкілетті органына КЖ/ТҚҚ туралы заңда және банктің ішкі құжаттарында көзделген жағдайларда және тәртіппен клиенттермен іскерлік қарым-қатынастарды орнату, жалғастыру не тоқтату туралы шешім қабылдау үшін сұратулар жіберу;
      6) банктің уәкілетті органын ішкі бақылау қағидаларының анықталған бұзушылықтары туралы банктің ішкі құжаттарында көзделген тәртіппен хабардар ету;
      7) банктің басқару органына есептерді қалыптастыру үшін КЖ/ТҚҚ мақсатында ішкі бақылау қағидаларын іске асыру нәтижелері және тәуекелдерді басқару және ішкі бақылау жүйелерін жақсарту жөніндегі ұсынылып отырған шаралар туралы ақпаратты дайындау және банктің уәкілетті органдарымен келісу кіреді, бірақ олармен шектелмейді.
      9. Жауапты қызметкерге және КЖ/ТҚҚ жөніндегі бөлімше қызметкерлеріне жүктелген функцияларды орындау үшін мынадай:
      1) өз функцияларын толық көлемде және банктің ішкі құжаттарында көзделген тәртіппен жүзеге асыруға мүмкіндік беретін шекте банктің барлық үй-жайларына, ақпараттық жүйелеріне, телекоммуникация құралдарына, құжаттар мен файлдарға кіруге рұқсат алу;
      2) банктің бөлімшелеріне ақшамен және (немесе) өзге де мүлікпен операция жүргізуге қатысты нұсқаулар беру;
      3) өз функцияларын жүзеге асыру кезінде алынған ақпараттың конфиденциалдылығын қамтамасыз ету;
      4) банктің бөлімшелерінен алынатын құжаттардың және файлдардың сақталуын қамтамасыз ету өкілеттіктері беріледі, бірақ олармен шектелмейді.
      10. Банктің филиалдарында Талаптардың 8 және 9-тармақтарында көзделген функциялар мен өкілеттіктер толық немесе ішінара жүктелген қызметкерлер бар болса осындай қызметкерлердің КЖ/ТҚҚ мәселелері бойынша қызметін үйлестіруді жауапты қызметкер жүзеге асырады.
      11. Жауапты қызметкердің, КЖ/ТҚҚ бойынша бөлімше қызметкерлерінің, сондай-ақ банктің Талаптардың 8-тармағында көзделген функциялар жүктелген қызметкерлерінің функциялары ішкі аудиттің функцияларымен, сондай-ақ банктің бизнес-бөлімшелері жүзеге асыратын функциялармен қоса атқарылмайды.
      12. Банк ішкі бақылау мәселелері бойынша процестерді автоматтандыру үшін КЖ/ТҚҚ мақсатында Қағидалардың талаптарына сәйкес келетін автоматтандырылған ақпараттық жүйелерді пайдаланады.

3. КЖ/ТҚ тәуекелдерін басқару бағдарламасы

      13. КЖ/ТҚ тәуекелдерін басқаруды ұйымдастыру мақсатында банк Қағидалардың талаптарына сәйкес келетін КЖ/ТҚ тәуекелдерін басқару бағдарламасын әзірлейді.
      14. Банк кем дегенде тәуекелдердің мынадай ерекше санаттарын: клиенттердің типтері бойынша тәуекелді, елдік (географиялық) тәуекелді, қызметтер (өнім) және (немесе) оны беру тәсілінің тәуекелін ескере отырып, банк қызметтерінің (өнімдерінің) КЖ/ТҚ тәуекелдеріне ұшырағыштық дәрежесін бағалауды жыл сайынғы негізде жүзеге асырады.
      Банк қызметтерінің (өнімдерінің) КЖ/ТҚ тәуекелдеріне ұшырағыштық дәрежесін бағалау клиенттердің операцияларын сәйкестендіру және оларға мониторинг жүргізу рәсімдерін өзгертуді, операциялар жүргізуге лимиттер белгілеуді, қызметтерді (өнімдерді) ұсыну талаптарын өзгертуді, қызметтерді (өнімдерді) ұсынудан бас тартуды қоса, анықталған тәуекелдерді барынша азайтуға бағытталған ықтимал іс-шараларды сипаттаумен қатар жүреді.
      15. Мәртебесі және (немесе) қызметі КЖ/ТҚ тәуекелін арттыратын клиенттердің типтеріне:
      1) шетелдік жария лауазымды тұлғалар, олардың жақын туыстары мен өкілдері;
      2) шетелдік қаржы ұйымдары;
      3) заңды тұлғалар және қызметі қолма-қол ақшаның қарқынды айналымымен байланысты дара кәсіпкерлер, оның ішінде:
      қызметінің ерекше түрі қолма-қол шетелдік валютамен айырбастау операцияларын ұйымдастыру болып табылатын заңды тұлғалар;
      ерекше қызметі банкноттарды, монеталарды және құндылықтарды инкассациялау болып табылатын ұйымдар (банк белгілеген КЖ/ТҚҚ жөніндегі талаптарды сақтайтын банктердің еншілес ұйымдарын қоспағанда);
      микроқаржы ұйымдары;
      ломбардтар ретінде тіркелген заңды тұлғалар;
      тұтынушылардан қолма-қол ақшаларды қабылдауды, оның ішінде электрондық терминалдар арқылы жүзеге асырушы қызметтерді (қаржылықтан басқа) жеткізушілердің агенттері (сенім білдірген);
      ойын бизнесін ұйымдастырушылар, сондай-ақ Қазақстан Республикасынан тыс онлайн-казино қызметін көрсететін не онлайн-казино қызметінен түсетін кірістерді алатын тұлғалар;
      туристік қызметтерді, сондай-ақ қолма-қол ақшаның қарқынды айналысымен байланысты өзге де қызметтерді көрсететін тұлғалар;
      4) инвестициялық портфельді басқарушы брокер-дилерлер (банк белгілеген КЖ/ТҚҚ жөніндегі талаптарды сақтайтын банктердің еншілес ұйымдарын қоспағанда);
      5) «өмірді сақтандыру» саласы бойынша қызметті жүзеге асыратын сақтандыру (қайта сақтандыру) ұйымдары, сақтандыру брокерлері (банк белгілеген КЖ/ТҚҚ жөніндегі талаптарды сақтайтын банктердің еншілес ұйымдарын қоспағанда);
      6) қаржы лизингі бойынша қызмет көрсететін тұлғалар (банк белгілеген КЖ/ТҚҚ жөніндегі талаптарды сақтайтын банктердің еншілес ұйымдарын қоспағанда);
      7) кредиттік серіктестіктер;
      8) сақтандыру агенттері ретінде қызметті жүзеге асыратын тұлғалар;
      9) жылжымайтын мүлікті сату-сатып алу жөніндегі делдалдық қызметті жүзеге асыратын тұлғалар;
      10) қызметі қаруды, жарылғыш заттарды өндірумен және (немесе) сатумен байланысты тұлғалар;
      11) қызметі бағалы металдарды, асыл тастарды не олардан жасалған бұйымдарды өндірумен және (немесе) өңдеумен, сатып алумен-сатумен байланысты тұлғалар;
      12) қорлардың, діни бірлестіктердің ұйымдық-құқықтық нысанындағы коммерциялық емес ұйымдар;
      13) Талаптардың 16-тармағында көрсетілген шет мемлекеттерде орналасқан (тіркелген) тұлғалар, сондай-ақ Қазақстан Республикасында орналасқан филиалдар мен осындай тұлғалардың өкілдіктері кіреді, бірақ олармен шектелмейді.
      16. Банк осы тармақта көрсетілген шет мемлекеттерде қызметті жүргізумен, осындай шет мемлекеттер клиенттеріне қызметтерді (өнімдерді) көрсетумен, осындай шет мемлекеттердің қатысуымен ақшамен және (немесе) өзге де мүлікпен операцияларды жүзеге асырумен байланысты елдік (географиялық) тәуекелді басқаруды жүзеге асырады.
      Олармен жасалатын операциялар КЖ/ТҚ тәуекелін жоғарылататын шет мемлекеттер:
      1) қаржы мониторингі бойынша уәкілетті орган жасайтын Ақшаны жылыстатуға қарсы күрестің қаржылық шараларын әзірлейтін топтың (ФАТФ) ұсынымдарын орындамайтын не жеткілікті орындамайтын мемлекеттердің (аумақтардың) тізбесіне енгізілген шет мемлекеттер (аумақтар);
      2) БҰҰ Қауіпсіздік Кеңесінің қарарларымен қабылданған халықаралық санкциялар (эмбарго) оларға қатысты қолданылатын шет мемлекеттер (аумақтар);
      3) Қазақстан Республикасының Үкіметі бекіткен жеңілдетілген салық салынған мемлекеттердің тізбесіне енгізілген шет мемлекеттер (аумақтар);
      4) банк басқа факторлардың (сыбайлас жемқорлық, есірткілердің заңсыз өндірілуі, айналымы және (немесе) транзит деңгейі туралы мәліметтер, халықаралық терроризмді қолдау туралы мәліметтер) негізінде КЖ/ТҚ жоғары тәуекелін көрсетуші ретінде анықтаған шет мемлекеттер (аумақтар) болып табылады.
       17. Банк қызметтеріне (өнімдеріне, операцияларына), сондай-ақ КЖ/ТҚ жоғары тәуекеліне ұшыраған оларды ұсыну тәсілдеріне:
      1) дербес компьютерлер, телефондар, электрондық терминалдар арқылы қызмет көрсетуді қоса, клиенттерге қашықтықтан қызмет көрсету (транзакциялық-банктік электрондық қызметтер);
      2) клиенттерге дербес банктік қызмет көрсету;
      3) банк шотын пайдаланусыз ақша төлемі және (немесе) аударымы;
      4) сауда қаржыландыруы;
      5) сейфтік қызметтер (сейф жәшіктерін жалдау, сейф қоймаларында жауапты сақтау);
      6) мүлікті сенімгерлік басқару;
      7) халықаралық нарықтарда брокерлік қызмет көрсету;
      8) кастодиандық қызмет көрсету;
      9) электрондық ақша;
      10) алдын ала төленген төлем карточкалары;
      11) чектер, оның ішінде жол чектері;
      12) шетелдік қаржы ұйымдарының шоттары;
      13) қолма-қол шетел валюталарын айырбастау пункттері арқылы сатып алу, сату, айырбастау бойынша операциялар кіреді, бірақ олармен шектелмейді.
      18. Банк қызметтерінің (өнімдерінің) КЖ/ТҚ тәуекелдеріне ұшырағыштық дәрежесін Талаптардың 15, 16 және 17-тармақтарында көрсетілген тәуекелдердің факторларына сәйкес бағалау кезінде банк тәуекелдің жиынтық дәрежесіне ықпал ететін мыналар:
      1) банктің қаржы мониторингі бойынша уәкілетті органға клиенттердің күдікті операциялары туралы хабарламаларының саны;
      2) банктің қаржы мониторингі бойынша уәкілетті органға клиенттердің қолма-қол ақшамен шекті операциялары туралы хабарламаларының саны кіретін, бірақ олармен шектелмейтін қосымша мәліметтерді ескереді.
      19. КЖ/ТҚ тәуекелдерін басқару бағдарламасын іске асыру шеңберінде банк Талаптардың 15, 16 және 17-тармақтарында көрсетілген тәуекелдердің санаттары мен факторларын, сондай-ақ банк белгілейтін тәуекелдердің өзге де санаттары мен факторларын ескере отырып, клиенттерді жіктеу жөнінде шаралар қолданады.
      Клиенттің (клиенттер тобының) тәуекел деңгейін банктегі клиент (клиенттер) туралы мәліметтер мен ақпаратқа жүргізілген талдау нәтижелері бойынша банк белгілейді және тәуекел деңгейін айқындаудың кемінде екі деңгейден тұратын шәкілі бойынша бағаланады.
      Банк клиенттің (клиенттер тобының) тәуекел деңгейін қайта қарауды клиент (клиенттер тобы) туралы мәліметтердің жаңартылуына қарай жүзеге асырады.
      20. Талаптардың 15, 16 және 17-тармақтарында көрсетілген тәуекелдер санаттары мен факторларын пайдаланумен тәуекелді бағалау клиенттерге (клиенттер тобына) қатысты операциялардың мониторингі (іскерлік қарым-қатынастар) нәтижелері негізінде жүргізіледі.
      Банк оларға қатысты тәуекелді бағалау бұдан бұрын жүргізілмеген және (немесе) олармен іскерлік қарым-қатынастар бұдан бұрын орнатылмаған клиенттер (клиенттер тобы) бойынша іскерлік қарым-қатынастарды орнатқанға немесе бір жолғы операцияны жүргізгенге дейін алынған деректердің негізінде тәуекелді бастапқы бағалауды жүргізеді.

4. Клиенттерді сәйкестендіру бағдарламасы

      21. КЖ/ТҚҚ туралы заңның клиентті тиісінше тексеру бойынша талаптарын іске асыру мақсатында банк клиенттерді (олардың өкілдерін) және бенефициарлық меншік иелерін сәйкестендіру бағдарламасын әзірлейді.
      Банктің клиент (оның өкілі) туралы мәліметтерді тіркеу және дәйектілігін тексеру, бенефициарлық меншік иесін анықтау және ол туралы мәліметтерді тіркеу, іскерлік қарым-қатынастардың немесе бір жолғы операцияның (мәміленің) болжанатын мақсатын белгілеу және тіркеу, сондай-ақ Талаптарда көзделген Клиент (оның өкілі) және бенефициарлық меншік иесі туралы өзге де мәліметтерді алу және тіркеу бойынша іс-шараларды жүргізуі клиентті (оның өкілін) және бенефициарлық меншік иесін сәйкестендіру болып табылады.
      Клиенттің тәуекел деңгейіне қарай банк жүргізетін іс-шаралардың деңгейі клиентті, бенефициарлық меншік иесін стандартты, жеңілдетілген және тереңдетілген сәйкестендіру түрінде көрсетіледі.
      22. КЖ/ТҚҚ туралы заңның 5-бабы 2-тармағының талаптарын ескере отырып, банк клиентті (оның өкілін) және бенефициарлық меншік иесін сәйкестендіруді жүргізеді, сондай-ақ мынадай:
      1) тиісті қаржы жылына республикалық бюджет туралы заңмен белгіленген айлық есептік көрсеткіштің жүз еселік мөлшерінен аспайтын сомаға электрондық ақшаны шығаруды және сатуды, сондай-ақ 200 000 теңгеден аспайтын сомаға не 200 000 теңге баламасынан аспайтын шетел валютасындағы сомаға банк шотына қол жеткізу құралы болып табылмайтын төлем карточкасын шығаруды қоспағанда клиентпен іскерлік қарым-қатынастар орнатылған;
      2) клиент:
      2 000 000 теңгеден асатын сомаға не 2 000 000 теңге баламасынан асатын шетел валютасындағы сомаға, оның ішінде күнтізбелік бір күнде қолма-қол шетел валютасын айырбастау пункті арқылы сатып алу, сату немесе айырбастау түрінде бірнеше операциялар (мәмілелер) жасау, клиенттің жүзеге асыруы не оның пайдасына қолма-қол жасалмайтын төлемнің келіп түсуі немесе банк шотын пайдаланусыз ақшаны аудару, банктің чек ұстаушының чегін төлеу, банктің вексель ұстаушының векселін есепке алу жолымен;
      500 000 теңгеден асатын сомаға не 500 000 теңге баламасынан асатын шетел валютасындағы сомаға, оның ішінде күнтізбелік бір күнде жеке тұлғаның банк шотына ақшаны қолма-қол ақшаны қабылдауға арналған жабдықтың (кұрылғының) көмегімен енгізу түрінде бірнеше операциялар (мәмілелер) жасау жолымен;
      2 000 000 теңгеден асатын сомаға не 2 000 000 теңге баламасынан асатын шетел валютасындағы сомаға, оның ішінде күнтізбелік бір күнде жеке тұлғаның банк шотына ақшаны қолма-қол ақшаны қабылдауға арналған жабдықтың (құрылғының) көмегімен енгізу түрінде бірнеше операциялар (мәмілелер) жасау жолымен бір жолғы операция (мәміле) жасалған;
      3) клиент шекті операцияны (мәмілені) жасаған;
      4) клиенттің күдікті операциясы (мәмілесі) анықталған;
      5) жеке және заңды тұлғалар туралы бұрын алынған деректердің дәйектілігіне күмән туғызатын негіздемелер болған жағдайда іскерлік қарым-қатынастардың немесе бір жолғы операцияның (мәміленің) болжанатын мақсатын белгілейді.
      Клиент орнатылған іскерлік қарым-қатынастар шегінде (ашылған шоттың болуы) операциялар (мәмілені) жүргізген кезде, егер ол, осы тармақтың бірінші бөлігінің 4) және 5) тармақшаларында көзделген жағдайларды қоспағанда, осындай іскерлік қарым-қатынастар орнатылған (ашылған шоттың болуы), сондай-ақ бұрын алынған мәліметтерді жаңарту не клиенттің тәуекелі деңгейіне және осы Талаптарға сәйкес қосымша мәліметтерді алу үшін қажет болған кезде клиентті (оның өкілін) және бенефициарлық меншік иесін сәйкестендіру жүргізілмейді.
      23. Талаптардың 22-тармағына сәйкес алынған мәліметтерді банк клиенттің досьесіне енгізеді, ол клиентпен іскерлік қарым-қатынастардың бүкіл кезеңі ішінде және олар аяқталғаннан не бір жолғы операцияны (мәмілені) жасағаннан кейін кем дегенде бес жыл банкте сақталады.
      Банк ішкі құжаттарға сәйкес досьелер жүргізетін клиенттердің топтарына:
      1) жеке тұлғалар;
      2) заңды тұлғалар;
      3) шетел қаржы ұйымдары-респонденттері кіреді, бірақ олармен шектелмейді.
      Клиенттің досьесіне енгізілуі және стандартты, жеңілдетілген не тереңдетілген сәйкестендіру жүргізген кезде дәйектілігі тексерілуі тиіс ең аз талап етілетін мәліметтер Талаптардың 1, 2 және  3-қосымшаларында белгіленген.
      24. Клиент ақша аударымын жүзеге асырған не оның пайдасына қолма-қол ақшасыз төлем немесе ақша аударымы келіп түскен кезде банк төлем құжатында КЖ/ТҚҚ туралы заңның 7-бабының 2-тармағында көзделген клиент туралы мәліметтердің болуын, сондай-ақ оларды төлемге, ақша аударымына қатысушы банкке берілуін бақылайды.
      25. Банк жеңілдетілген сәйкестендіруді мынадай:
      1) клиент-жеке тұлға жүзеге асырғанда не оның пайдасына қолма-қол емес төлем түскенде немесе банктік шотты пайдаланбай ақша аударғанда, егер мұндай төлем немесе ақша аударым сомасы 2 000 000 теңгеден не 2 000 000 теңгеге барабар шетел валютасындағы сомадан асатын болса;
      2) клиент-жеке тұлға айырбастау орны арқылы қолма-қол шетел валютасын сатып алу, сату немесе ауыстыруды жүзеге асырғанда, егер мұндай операция сомасы 2 000 000 теңгеден не 2 000 000 теңгеге барабар шетел валютасындағы сомадан асатын болса;
      3) мынадай:
      Қазақстан Республикасының Ұлттық Банкін қоса алғанда, Қазақстан Республикасының мемлекеттік органдары, сондай-ақ бақылауын мемлекеттік органдар жүзеге асыратын заңды тұлғалар;
      мемлекеттік мекеме немесе мемлекеттік кәсіпорын ұйымдық құқықтық нысанында құрылған заңды тұлғалар, сондай-ақ ұлттық басқарушы холдинг не дауыс беретін акцияларының (қатысу үлестерінің) жүз пайызы ұлттық басқарушы холдингіне тиесілі заңды тұлғалар;
      екінші деңгейдегі банктер, сақтандыру (қайта сақтандыру) ұйымдары, бағалы қағаздар нарығының кәсіби қатысушылары - Қазақстан Республикасының резиденттері;
      акциялары Қазақстан Республикасы қор биржасының және (немесе) шет мемлекеттің қор биржасының ресми тізіміне енгізілген ұйымдар;
      Қазақстан Республикасының аумағында орналасқан не қатысушысы Қазақстан Республикасы болып табылатын халықаралық ұйымдар сияқты клиенттермен іскерлік қарым-қатынастарды орнатқан жағдайларда жүргізеді.
      26. Банк мынадай:
      1) клиентке жоғары тәуекел деңгейі тағайындалған;
      2) тереңдетілген сәйкестендіру қаржы мониторингі жөніндегі уәкілетті органға осындай операция туралы хабарламаның жіберілуі туралы оның абайсызда хабардар болуына апаратын жағдайларды қоспағанда, клиентке мониторинг жүргізу және операцияларын зерделеу барысында күдікті операцияны (мәмілені) не оны жасау әрекетін анықтаған;
      3) клиент ұсынған мәліметтердің дәйектілігінде күмән болғанда;
      4) банктің ішкі құжаттарында белгіленген жағдайларда, сондай-ақ жауапты қызметкердің шешімі бойынша тереңдетілген сәйкестендіруді жүргізеді.
      27. Клиентті сәйкестендіру (бенефициарлық меншік иесін анықтау) барысында банк КЖ/ТҚҚ туралы заңның 12-бабына сәйкес алынатын терроризмді және экстремизмді қаржыландырумен байланысты тұлғалардың және ұйымдардың тізбесінде (бұдан әрі - Тізбе) осындай клиенттің (бенефициарлық меншік иесінің) болуына тексеру жүргізеді.
      Шетелдіктерге, шет мемлекеті азаматтығының болуы туралы банк мәліметтер болған өзге де тұлғаларға қатысты, сондай-ақ азаматтығы жоқ тұлғаларға қатысты банк клиентті сәйкестендіру (бенефициарлық меншік иесін анықтау) барысында осындай клиенттің (бенефициарлық меншік иесінің) шетелдік жария лауазымды тұлғаға жататынын тексереді.
      28. Клиент (оның өкілі) ұсынатын құжаттар клиент (оның өкілі) және бенефициарлық меншік иесі туралы мәліметтерді растау мақсатында олардың шынайы болуы тексеріледі.
      29. Клиентті, оның өкілін және бенефициарлық меншік иесін сәйкестендіру бағдарламасына мыналар:
      1) іскерлік қатынастар белгілеуге және (немесе) операциялар жүргізуге, сондай-ақ іскерлік қатынастарды тоқтатуға арналған тәртіпті және негіздемелерді қоса алғанда, қызмет көрсетуге клиенттер қабылдау тәртібі;
      2) клиентті (оның өкілін) және бенефициарлық меншік иесін сәйкестендіру тәртібі, оның ішінде жеңілдетілген және тереңдетілген сәйкестендіру рәсімдерінің ерекшеліктері;
      3) шетелдік қаржы ұйымдарымен корреспонденттік қатынастар орнату кезінде сәйкестендіруді жүргізу ерекшеліктері;
      4) банктің қызмет көрсетілетін немесе қызмет көрсетуге қабылдайтын жеке тұлғалардың, сондай-ақ шетелдік жария лауазымды тұлғалардың арасында анықтауға бағытталған шараларының сипаттамасы;
      5) клиенттің (оның өкілінің) және бенефициарлық меншік иесінің Тізбеде болуын тексеру тәртібі;
      6) іскерлік қарым-қатынастарды қашықтықтан орнату кезінде (клиенттің немесе оның өкілінің жеке қатысуынсыз) сәйкестендіру ерекшеліктері;
      7) клиентті (оның өкілін) және бенефициарлық меншік иесін банк кіретін банк конгломератының (бар болса) КЖ/ТҚҚ жөніндегі талаптарды орындау шеңберінде сәйкестендіру барысында алынған мәліметтер алмасудың ерекшеліктері;
      8) басқа қаржы ұйымдарынан мәліметтер алу арқылы клиенттерді сәйкестендіру, оның ішінде жеке және заңды тұлғаларды сәйкестендіру ерекшеліктері, брокер-дилер олардың пайдасына немесе олардың атынан өзінің банк шоты бойынша операциялар жүргізеді;
      9) клиентті (оның өкілін) және бенефициарлық меншік иесін сәйкестендіру мақсатында қосымша ақпарат көздерінің, оның ішінде мемлекеттік органдар ұсынатын ақпараттың сипаттамасы;
      10) клиент (оның өкілі) және бенефициарлық меншік иесі туралы мәліметтердің шынайы болуын тексеру тәртібі;
      11) клиенттің досье жүргізу, мәліметтерді жаңарту кезеңділігін көрсетумен досьедегі мәліметтерді жаңарт, нысанына, мазмұнына және тәртібіне қойылатын талаптар;
      12) банк қызметкерлерінің сәйкестендіруді жүргізу кезінде алынған ақпаратқа қол жетімділігін қамтамасыз ету тәртібі;
      13) клиенттің тәуекел деңгейін бағалау тәртібі, осындай тәуекелді бағалау негіздері кіреді, бірақ олармен шектелмейді.

5. Клиенттердің операциялары мониторингінің және зерделеудің бағдарламасы

      30. КЖ/ТҚҚ туралы заңның клиентті тиісінше тексеру жөніндегі, сондай-ақ шекті және күдікті операциялар туралы хабарламаларды анықтау және қаржы мониторингі жөніндегі уәкілетті органға жіберу талаптарын іске асыру мақсатында, банк клиенттердің операциялары мониторингінің және зерделеудің бағдарламасын әзірлейді.
      31. Клиенттердің операциялары мониторингінің және зерделеудің бағдарламасы шеңберінде банктер клиенттер жасайтын операцияларды қаржыландыру көзі туралы мәліметтерді қоса алғанда, клиенттер (олардың өкілдері) және бенефициарлық меншік иелері туралы қосымша мәліметтерді жаңарту және (немесе) алу бойынша, сондай-ақ клиенттердің операцияларын зерделеу және шекті, әдеттегіден тыс және күдікті операцияларды анықтау бойынша іс-шаралар жүргізеді.
      Банк клиенттердің операциялары мониторингінің және зерделеудің нәтижелерін банк қызметтерінің (өнімдерінің) КЖ/ТҚ тәуекелдеріне ұшырау дәрежесін жыл сайын бағалау, сондай-ақ клиенттердің тәуекелдер деңгейін қайта қарау үшін пайдаланады.
      Клиенттердің операциялары мониторингінің және зерделеудің бағдарламасын іске асыру шеңберінде алынған мәліметтер Талаптардың 23-тармағында көрсетілген клиенттің досьесіне енгізіледі және (немесе) банкте клиентпен іскерлік қарым-қатынастардың барлық кезеңі ішінде және олар аяқталған не бір жолғы операцияны (мәмілені) жасаған күннен бастап кемінде бес жыл бойы сақталады.
      32. Банк клиенттің (клиенттер тобының) тәуекел деңгейін және (немесе) клиент пайдаланатын банк қызметінің (өнімдерінің) КЖ/ТҚ тәуекелдеріне ұшырау дәрежесін ескере отырып, клиент (оның өкілі) және бенефициарлық меншік иесі туралы қосымша мәліметтерді жаңартудың кезеңдігін және (немесе) алу қажеттігін белгілейді.
      Талаптардың 26-тармағында көзделген жағдайларда, банк клиентке тереңдетілген сәйкестендіруді жүргізеді.
      Тәуекелдің жоғары деңгейі бар клиент (оның өкілі) және бенефициарлық меншік иесі туралы мәліметтерді жаңарту жылына кемінде бір рет жүзеге асырылады.
      Тізбедегі клиенттің (бенефициарлық меншік иесінің) бар болуын (қосылғанын) тексеру клиенттің тәуекел деңгейіне байланысты емес және Тізбеге (Тізбенің жаңартуларына) өзгерістер енгізуге қарай жүзеге асырылады.
      33. Банк клиенттің (клиенттер тобының) тәуекел деңгейін және (немесе) клиент пайдаланатын банк қызметінің (өнімінің) КЖ/ТҚ тәуекелдеріне ұшырау дәрежесін ескере отырып, сондай-ақ банк КЖ/ТҚ сценарийлерін (схемаларын) және (немесе) әдеттегіден тыс және күдікті операциялардың белгілерін ескере отырып клиенттің операцияларын зерделеу дәрежесін айқындайды.
      Банк клиентке тәуекелдің жоғары деңгейі тағайындалған жағдайда, сондай-ақ клиент күдікті операциялар жүргізген жағдайда клиент белгіленген уақыт кезеңінде жүргізіп отырған (жүргізген) операцияларды зерделейді.
      34. Клиенттердің операциялары мониторингінің және зерделеудің бағдарламасы:
      1) Қазақстан Республикасының Үкіметі бекіткен, сондай-ақ банк дербес әзірлеген белгілердің негізінде жасалатын әдеттегіден тыс және күдікті операциялар белгілерінің тізбесін;
      2) банк бөлімшелері (қызметкерлері) арасында Талаптарда көзделген жағдайларда клиент (оның өкілі) пен бенефициарлық меншік иесі туралы бұрын алынған қосымша мәліметтерді жаңарту және (немесе) оларды алу жөніндегі міндеттерді бөлуді;
      3) банк бөлімшелері (қызметкерлері) арасында шекті, әдеттегіден тыс және күдікті операциялар туралы мәліметтерді анықтау және бөлімшелер (қызметкерлер) арасында бір-біріне беру жөніндегі міндеттерді бөлуді;
      4) банк бөлімшелерінің шекті, әдеттегіден тыс және күдікті операцияларды анықтаған кезде өзара әрекет ету тетіктерін сипаттауды;
      5) жауапты қызметкерінің клиент операциясының түрі туралы шешімді қабылдау тәртібін, негіздемесін және мерзімін;
      6) бөлімшелердің (қызметкерлердің) клиент операциясын жүргізуден бас тарту жөніндегі (клиент, бенефициарлық меншік иесі Тізбеде тұруына байланысты бас тартуды қоспағанда), сондай-ақ клиентпен іскерлік қарым-қатынастарды тоқтату жөніндегі шешімді қабылдау бойынша өзара әрекет ету тәртібін;
      7) банк бөлімшелерінің (қызметкерлерінің) Тізбедегі клиенттер мен бенефициарлық меншік иелерін анықтау бойынша, сондай-ақ осындай клиенттердің активтерін дереу тоқтату бойынша өзара әрекет ету тәртібін;
      8) әдеттегіден тыс операцияларды зерделеу нәтижелері жөніндегі мәліметтерді, сондай-ақ шекті және күдікті операциялар жөніндегі мәліметтерді (оның ішінде операция сомасы, төлем валютасы, клиенттің қарсы агенті туралы деректерді) тіркеу (оның ішінде тіркеу әдістері) және сақтау тәртібін;
      9) қаржы мониторингі жөніндегі уәкілетті органға шекті және күдікті операциялар туралы хабарламаларды ұсыну тәртібін;
      10) банктің Бас комплаенс-бақылаушысын және (немесе) бірінші басшысын шекті және күдікті операциялар анықталғаны жөнінде хабарлау (қажеттілігіне қарай) тәртібін;
      11) клиент әдеттегіден тыс және (немесе) күдікті операцияларды жүйелі және (немесе) елеулі көлемде жүзеге асырған жағдайда, банк клиент пен оның операциясына қатысты қабылдайтын шараларды қабылдау тәртібін және сипаттауды қамтиды, бірақ олармен шектелмейді;
      35. Операцияны шекті ретінде түрінің заңдылығы бөлігінде күмән туындаған кезде, сондай-ақ әдеттегіден тыс немесе күдікті операцияны анықтаған кезде, аталған операцияны анықтаған банк қызметкері банктің ішкі құжаттарында белгіленген тәртіпте, нысанда және мерзімде КЖ/ТҚҚ жөніндегі бөлімшеге осындай операция туралы хабарламаны жібереді.
      Бір хабарламада бірнеше операция туралы ақпараттың болуына жол беріледі.
      Банк осы тармақтың бірінші бөлігінде көрсетілген операциялар туралы хабарламаны, сондай-ақ оларды зерттеудің нәтижелерін клиентпен іскерлік қарым-қатынастарды тоқтатқан күннен бастап кемінде бес жыл сақтайды.

6. Банк қызметкерлерін КЖ/ТҚҚ мәселелері бойынша даярлау және оқыту бағдарламасы

      36. Банк қызметкерлерінің КЖ/ТҚҚ саласындағы заңнаманың, сондай-ақ ішкі бақылау қағидаларының және банктің өзге де ішкі құжаттарының талаптарын орындау үшін қажетті білім алуы және дағдыларды қалыптастыруы банк қызметкерлерін КЖ/ТҚҚ мәселелері бойынша даярлау және оқыту бағдарламасының (бұдан әрі - Оқыту бағдарламасы) мақсаты болып табылады.
      37. Оқыту бағдарламасына:
      1) оқытудың тақырыптарын, өткізудің әдістерін, мерзімдерін және оқытуды өткізуге жауапты бөлімшені қамтитын қызметкерлерді оқыту тәртібі;
      2) қызметкерлері оқытудан өтетін банк бөлімшелерінің тізбесі;
      3) оқыту нәтижелерін сақтау тәртібі мен нысандары;
      4) банк қызметкерлерінің КЖ/ТҚҚ мәселелері бойынша білімдерін тексеру тәртібі мен нысандары енгізіледі.
      38. Банк қаржы мониторингі жөніндегі уәкілетті орган бекіткен талаптарды ескере отырып оқытуды өткізудің нысандары мен кезеңділігін белгілейді.

Қылмыстық жолмен алынған кірістерді
заңдастыруға (жылыстатуға) және 
терроризмді қаржыландыруға қарсы 
іс-қимыл мақсатында екінші деңгейдегі
банктер мен Ұлттық пошта операторы үшін
ішкі бақылау қағидаларына қойылатын
талаптарға 1-қосымша         

Жеке тұлға - клиент досьесінің мазмұнына қойылатын талаптар

Клиент досьесінің мазмұнына қойылатын талаптарға түсіндірмелер:

      1. Қазақстан Республикасының заңнамасына сәйкес азаматтық құқықтық мәмілелер жасалатын негізде жеке басын куәландыратын құжат болып:
      1.1 Қазақстан Республикасының азаматтары үшін:
      1) Қазақстан Республикасы азаматының төлқұжаты;
      2) Қазақстан Республикасы азаматының жеке куәлігі;
      3) туу туралы куәлік (кәмелетке толмаған адамның атына жинақ шотын ашқан кезде);
      1.2. Шетел азаматтары үшін:
      1) шетелдік төлқұжаты (шетел мемлекеті азаматының төлқұжаты);
      2) шетелдіктің Қазақстан Республикасында тұруына ықтиярхат;
      3) негізінде Қазақстан республикасының аумағында азаматтық құқықтық мәмілелер жасалатын жеке басын куәландыратын құжат ретінде Қазақстан Республикасы бекіткен халықаралық шартқа сәйкес танылатын өзге де құжат;
      1.3. Қазақстан Республикасының аумағында тұрақты тұратын азаматтығы жоқ адамдар үшін:
      азаматтығы жоқ адамның куәлігі.
      2. Салық резиденттілігінің мәртебесі салық ақпаратын айырбастау саласында Қазақстан Республикасының халықаралық шарттарынан туындайтын талаптарды ескере отырып нысанын дербес банк белгілейтін клиент сауалнамада (өтініште) көрсететін мәліметтердің негізінде белгіленеді.
      Қазақстан Республикасының салық резиденттілігін растау үшін Қазақстан Республикасы Салық кодексінің 225-бабына сәйкес Қазақстан Республикасының салық органы беретін құжатты пайдалануға рұқсат беріледі.
      Салық резиденттілігі мәртебесі тұрғын үй құрылыс жинақтарында және білім беру жинақтауы салымдары туралы шарттарды жасау кезінде белгіленбейді.
      3. Ұсынылған мәліметтердің дәйектілігін тексеру клиент (оның өкілі) ұсынған тиісті құжаттар түпнұсқаларының және нотариалды куәландырылған көшірмелерінің деректерімен салыстыру, рұқсат етілген дерек көздермен (дерекқормен) салыстыру, мекенжайы бойынша шығуды қосқанда басқа да тәсілдермен мәліметтерді тексеру арқылы жүзеге асырылады. Жеке басын сәйкестендіру бойынша дәйектілігін тексеру шеңберінде, клиентпен (клиенттің өкілімен) жеке басын куәландыратын құжатта орналастырылған суретті көзбен салыстыру жүргізіледі.

Шартты белгілер:

       - тиісті мәліметтерді белгілеу қажеттілігі;
       - тиісті мәліметтерді белгілеу және олардың шынайылығын тексеру қажеттілігі.

Қылмыстық жолмен алынған кірістерді
заңдастыруға (жылыстатуға) және 
терроризмді қаржыландыруға қарсы 
іс-қимыл мақсатында екінші деңгейдегі
банктер мен Ұлттық пошта операторы үшін
ішкі бақылау қағидаларына қойылатын
талаптарға 2-қосымша         

Заңды тұлға - клиент досьесінің мазмұнына қойылатын талаптар

Клиент досьесінің мазмұнына қойылатын талаптарға түсіндірмелер:

      1. Қазақстан Республикасының заңнамасына сәйкес азаматтық құқықтық мәмілелер жасалатын негізде жеке басын куәландыратын құжат болып:
      1.1 Қазақстан Республикасының азаматтары үшін:
      1) Қазақстан Республикасы азаматының төлқұжаты;
      2) Қазақстан Республикасы азаматының жеке куәлігі;
      3) туу туралы куәлік (кәмелетке толмаған адамның атына жинақ шотын ашқан кезде);
      1.2. Шетел азаматтары үшін:
      1) шетелдік төлқұжаты (шетел мемлекеті азаматының төлқұжаты);
      2) шетелдіктің Қазақстан Республикасында тұруына ықтиярхат;
      3) негізінде Қазақстан республикасының аумағында азаматтық құқықтық мәмілелер жасалатын жеке басын куәландыратын құжат ретінде Қазақстан Республикасы бекіткен халықаралық шартқа сәйкес танылатын өзге де құжат;
      1.3 Қазақстан Республикасының аумағында тұрақты тұратын азаматтығы жоқ адамдар үшін:
      азаматтығы жоқ адамның куәлігі.
      2. Салық резидентгілігінің мәртебесі салық ақпаратын айырбастау саласында Қазақстан Республикасының халықаралық шарттарынан туындайтын талаптарды ескере отырып нысанын дербес банк белгілейтін клиент сауалнамада (өтініште) көрсететін мәліметтердің негізінде белгіленеді.
      Қазақстан Республикасының салық резиденттілігін растау үшін Қазақстан Республикасы Салық кодексінің 225-бабына сәйкес Қазақстан Республикасының салық органы беретін құжатты пайдалануға рұқсат беріледі.
      3. Ұсынылған мәліметтердің дәйектілігін тексеру клиент (оның өкілі) ұсынған тиісті құжаттар түпнұсқаларының және нотариалды куәландырылған көшірмелерінің деректерімен салыстыру, рұқсат етілген дерек көздермен (дерекқормен) салыстыру, мекенжайы бойынша шығуды қосқанда басқа да тәсілдермен мәліметтерді тексеру арқылы жүзеге асырылады. Жеке басын сәйкестендіру бойынша дәйектілігін тексеру шеңберінде, клиентпен (клиенттің өкілімен) жеке басын куәландыратын құжатта орналастырылған суретті көзбен салыстыру жүргізіледі.
      4. Тіркеуге жататын мәліметтер және лицензияның болуы, сондай-ақ халықаралық ұйымға қатысты белгіленеді, егер осындай халықаралық ұйымның мекемесі туралы және (немесе) оның мемлекет (мемлекеттер) аумағында болатын жері талаптары туралы шарттармен тиісінше тіркеусіз және (немесе) лицензиясыз олардың қызметін жүзеге асыру көзделмесе.

Шартты белгілер:

      - тиісті мәліметтерді белгілеу қажеттілігі;
      - тиісті мәліметтерді белгілеу және олардың шынайылығын тексеру қажеттілігі.

Қылмыстық жолмен алынған кірістерді
заңдастыруға (жылыстатуға) және 
терроризмді қаржыландыруға қарсы 
іс-қимыл мақсатында екінші деңгейдегі
банктер мен Ұлттық пошта операторы үшін
ішкі бақылау қағидаларына қойылатын
талаптарға 3-қосымша         

Респондент - шетелдік қаржы ұйымы досьесінің мазмұнына қойылатын талаптар

Клиент досьесінің мазмұнына қойылатын талаптарға түсіндірмелер:

      1. Қазақстан Республикасының заңнамасына сәйкес азаматтық құқықтық мәмілелер жасалатын негізде жеке басын куәландыратын құжат болып:
      1.1. Қазақстан Республикасының азаматтары үшін:
      1) Қазақстан Республикасы азаматының төлқұжаты;
      2) Қазақстан Республикасы азаматының жеке куәлігі;
      3) туу туралы куәлік (кәмелетке толмаған адамның атына жинақ шотын ашқан кезде);
      1.2. Шетел азаматтары үшін:
      1) шетелдік төлқұжаты (шетел мемлекеті азаматының төлқұжаты);
      2) шетелдіктің Қазақстан Республикасында тұруына ықтиярхат;
      3) негізінде Қазақстан Республикасының аумағында азаматтық құқықтық мәмілелер жасалатын жеке басын куәландыратын құжат ретінде Қазақстан Республикасы бекіткен халықаралық шартқа сәйкес танылатын өзге де құжат;
      1.3 Қазақстан Республикасының аумағында тұрақты тұратын азаматтығы жоқ адамдар үшін:
      азаматтығы жоқ адамның куәлігі.
      2. Салық резиденттілігінің мәртебесі салық ақпаратын айырбастау саласында Қазақстан Республикасының халықаралық шарттарынан туындайтын талаптарды ескере отырып нысанын дербес банк белгілейтін клиент сауалнамада (өтініште) көрсететін мәліметтердің негізінде белгіленеді.
      Қазақстан Республикасының салық резиденттілігін растау үшін Қазақстан Республикасы Салық кодексінің 225-бабына сәйкес Қазақстан Республикасының салық органы беретін құжатты пайдалануға рұқсат беріледі.
      3. Ұсынылған мәліметтердің дәйектілігін тексеру үшін осындай мәліметтерді түпнұсқалардың деректерімен немесе клиент (оның өкілі) ұсынған тиісті құжаттардың нотариат куәландырған көшірмелерімен салыстырып тексеру жүргізіледі. Рұқсат етілген дерек көздерімен (дерекқормен) салыстыруға рұқсат беріледі. Жеке басын сәйкестендіру бойынша дәйектілігін тексеру шеңберінде, клиентпен (клиенттің өкілімен) жеке басын куәландыратын құжатта орналастырылған суретті көзбен беттестіріп тексеру жүргізіледі.
      4. Тіркеуге жататын мәліметтер және лиңензияның болуы, сондай-ақ халықаралық ұйымға қатысты белгіленеді, егер осындай халықаралық ұйымның мекемесі туралы және (немесе) оның мемлекет (мемлекеттер) аумағында болатын жері талаптары туралы шарттармен тиісінше тіркеусіз және (немесе) лиңензиясыз олардың қызметін жүзеге асыру көзделмесе.

Шартты белгілер:

       тиісті мәліметтерді белгілеу қажеттігі;
       тиісті мәліметтерді белгілеу және олардың дәйектілігін тексеру қажеттігі