1. Ұлты қазақ азаматтар өздерiнiң тегi мен әкесiнiң атының жазылуын қазақ тiлiне тән емес аффикстi алып тастай отырып, өзгертуге хақылы, алайда тегi мен әкесiнiң атының түбiрлiк негiзi сақталуға тиiс. Бұл ретте әкесiнiң атын жазған кезде азаматтың жынысына қарай "ұлы" немесе "қызы" сөздерi қосылып, бiрге жазылады.
2. Қазақстан Республикасы азаматының паспортын және жеке басының куәлiгiн берген кезде республика iшкi iстер органдары осы Жарлықтың 1-тармағында көзделгендей, тегi мен әкесiнiң атының жазылуын оңайтылған тәртiппен, азаматтық хал-ахуалын жазу актiлерiне өзгертулер енгiзусiз жүргiзедi деп белгiленсiн.
3. Азаматтың тегi мен әкесiнiң атының жазылуын өзгертуi оның құқықтық субъектiлiгiн қозғамайды, яғни тегi мен әкесiнiң атының бұрынғы жазылуында алған құқықтары мен мiндеттерiн доғаруға немесе өзгертуге негiз бола алмайды.
4. Азаматтардың тегiн, есiмiн, әкесiнiң атын өзгертуге байланысты қалған барлық өзге мәселелер Қазақстан Республикасының нормативтiк құқықтық актiлерiне сәйкес шешiледi.
5. Республика Үкiметi өзiнiң құқықтық нормативтiк актiлерiн және республиканың орталық атқарушы органдарының актiлерiн осы Жарлыққа сәйкес келтiрудi қамтамасыз етсiн.
6. Осы Жарлық, 1996 жылдың 1 мамырынан күшiне енетiн 2-тармағын қоспағанда, жарияланған күнiнен бастап күшiне енедi.
Қазақстан Республикасының
Президентi