Ескерту. Актiнiң нысаны және тақырыбына өзгерту енгізілді, кiрiспе алып тасталды, мәтiнде "Жарлықты", "Жарлықтың", "Жарлық" деген сөздер тиiсінше "Заңды", "Заңның", "Заң" деген сөздермен ауыстырылды - Қазақстан Республикасының 2004.12.20 N 13 (2005 жылғы 1 қаңтардан бастап күшіне енеді) Заңымен.
1-бап. Алкоголизмге, нашақорлық пен уытқұмарлық дертiне
шалдығудың әлеуметтiк қауiптiлiгi, оларды емдеу
Алкоголизм, нашақорлық пен уытқұмарлық азаматтардың денсаулығына, елiмiздiң тектiлiк қорына залал келтiретiн және қылмыстың өсуiне себепшi болатын дерттер болып табылады.
Өз еркiмен емделуден жалтарған алкоголизмге, нашақорлық пен уытқұмарлық дертiне шалдыққан ауруларға денсаулық сақтау жүйесiнiң мамандандырылған емдеу профилактикалық мекемелерiнде, емдеу кезеңiнде оларды еңбекке тарта отырып, ерiксiз стационарлық ем қолданылуға тиiс.
Денсаулық сақтау жүйесiнiң наркологиялық мекемелерiне ерiксiз емдеуге жiберу сотты болды деп қаралмайды.
2-бап. Ерiксiз емдеуге жiберiлетiн адамдардың құқықтық
жағдайы
Алкоголизмге, нашақорлық пен уытқұмарлық дертiне шалдыққан аурулар ерiксiз емделуге жiберiлген және емделу кезiнде Қазақстан Республикасы азаматтарының құқықтарын емдеу режимiн сақтау қажеттiгiне байланысты шектеулермен пайдаланады.
Олардың құқықтары мен заңды мүдделерiн қорғау үшiн оларға сотта қорғау кепiлдiгi берiледi, сондай-ақ құқықтық және әлеуметтiк көмек көрсетiледi.
Мамандандырылған емдеу-профилактикалық мекемелерiнде емдеуде болу уақыты еңбек стажын үзбейдi және ол жалпы еңбек стажына қосылып есептеледi.
Ерiксiз емделуге жiберiлген адамдардың бұрынғы тұрған жерi бойынша тұрғын жайға құқығы сақталады.
3-бап. Алкоголизмге, нашақорлық пен уытқұмарлық дертiне
шалдыққан деп тану тәртiбi
Алкоголизмге, нашақорлық немесе уытқұмарлық дертiне шалдыққан деп тану Қазақстан Республикасының денсаулық сақтау министрлiгi белгiлеген тәртiппен тиiстi медициналық куәландырудан кейiн мемлекеттiк денсаулық сақтау ұйымдары арқылы жүзеге асырылады.
Ерiксiз емдеуге жiберу туралы мәселенi шешу кезiнде медициналық куәландырудан жалтарған адамдарды ерiксiз тексеру үшiн наркологиялық мекемеге iшкi iстер органдары ықтиярсыз алып келедi.
Алкоголизмге, нашақорлық немесе уытқұмарлық дертiне шалдыққан деп танылған адам мұнымен келiспеген жағдайда бұл шешiмге жоғары тұрған денсаулық сақтау саласын басқару органына немесе сотқа шағым жасауына болады.
Ескерту. 3-бапқа өзгерту енгізілді - Қазақстан Республикасының 2004.12.20 N 13 (2005 жылғы 1 қаңтардан бастап күшіне енеді) Заңымен.
4-бап. Мамандандырылған емдеу профилактикалық
мекемелерiне ерiксiз емдеуге жiберудiң негiздерi
Алкоголизмге, нашақорлық немесе уытқұмарлық дертiне шалдыққан ауруларды ерiксiз емдеуге жiберудi ресiмдеудi аурудың туыстарының, еңбек ұжымдарының, қоғамдық ұйымдардың, iшкi iстер, прокуратура, қорғаншылық және қамқоршылық органдарының бастамасымен медициналық қорытынды бар болған жағдайда мемлекеттiк денсаулық сақтау ұйымдары жүзеге асырады.
Тұрақты тұрған жайы жоқ ауруларды ерiксiз емдеуге ресiмдеудi өтiнiш берiлген кезде тұрып жатқан жерi бойынша iшкi iстер органдары жүзеге асырады.
Ескерту. 4-бапқа өзгерту енгізілді - Қазақстан Республикасының 2004.12.20 N 13 (2005 жылғы 1 қаңтардан бастап күшіне енеді) Заңымен.
5-бап. Мамандандырылған емдеу-профилактикалық
мекемелерiне ерiксiз емдеуге жiберудiң тәртiбi
Мамандандырылған емдеу-профилактикалық мекемелерiне жiберу туралы мәселенi аурудың тұратын жерi бойынша аудандық (қалалық) халық соты материалдың келiп түскен күнiнен бастап он күн мерзiмнен асырмай оның өзiнiң, сондай-ақ денсаулық сақтау және iшкi iстер органдары өкiлдерiнiң, аурудың туыстарының, еңбек ұжымдары, қоғамдық бiрлестiктер өкiлдерiнiң қатысуымен ашық сот мәжiлiсiнде қарайды.
Мамандандырылған емдеу-профилактикалық мекемелерiнде болу мерзiмi екi жылдан аспауға, ал қайтара жiберiлген жағдайда үш жылдан аспауға тиiс.
Ауру адамды мамандандырылған емдеу-профилактикалық мекемесiне жiберу, егер алдыңғы емделуi аяқталған күннен кейiн үш жылдан асатын уақыт өтсе, қайталанған болып саналмайды.
Наркологиялық мекемеге ерiксiз емдеуге жiберу туралы өтiнiш жасалған ауру адам сот мәжiлiсiне келуден жалтарған жағдайда оны iшкi iстер органдары ықтиярсыз алып келедi.
Тексеру үшiн ерiксiз ауруханаға жатқызылған уақыт мамандандырылған емдеу-профилактикалық мекемесiнде ерiксiз емдеу кезеңiне қоса есептеледi.
Мамандандырылған емдеу-профилактикалық мекемелерiне жiберу кәмелетке толмағандарға, жүктi әйелдерге, белгiленген тәртiппен аналық құқынан айырылмаған, 8 жасқа дейiнгi баласы бар әйелдерге, 60-тан асқан ерлер мен 55-тен асқан әйелдерге, 1 және 2-топтағы мүгедектерге, сондай-ақ Қазақстан Республикасының Денсаулық сақтау министрлiгi бекiткен тiзбедегi жүйке және ағза ауруларымен ауыратындрға қолданылмайды.
6-бап. Мамандандырылған емдеу-профилактикалық
мекемелерiнде емдеудi ұйымдастыру
Мамандандырылған емдеу-профилактикалық мекемелерiне ерiксiз емдеуге жiберiлген ауруларды ұстау режимi, емдеу тәртiбi мен олардың еңбегiн ұйымдастыру Қазақстан Республикасының Үкiметi бекiткен Қазақстан Республикасының Денсаулық сақтау министрлiгi жүйесiнiң мамандандырылған емдеу-профилактикалық мекемелерiнде ерiксiз емдеу туралы Ережемен реттеледi.
Ескерту. 6-бапқа өзгерту енгізілді - Қазақстан Республикасының 2004.12.20 N 13 (2005 жылғы 1 қаңтардан бастап күшіне енеді) Заңымен.
7-бап. Мамандандырылған емдеу-профилактикалық
мекемелерiнен емделiп шыққан ауруларды ерiксiз
емдеудi тоқтатудың негiздерi мен тәртiбi
Емдеу-профилактикалық мекемелерiнен аурулар:
- сот белгiлеген ерiксiз емдеу мерзiмi бiткен кезде;
- ерiксiз емдеу жүргiзуге кедергi жасайтын қосалқы ауыр науқасының анықталуына байланысты - соттың қаулысымен;
- дертiнен тез айығуына байланысты мерзiмiнен бұрын, бiрақ 6 айдан ерте емес - соттың қаулысымен шығарылады.
Мекемеде жүрген ауру емдеуден жалтарған жағдайда оның емделу мерзiмiн әкiмшiлiктiң медициналық қорытындыға негiзделген ұсынысы бойынша мекеме орналасқан жердегi халық (қалалық) соты бiр жылдан аспайтын мерзiмге ұзартуы мүмкiн. Бұл ретте мекемеде болу уақыты үш жылдан аспауға тиiс.
Мамандандырылған емдеу-профилактикалық мекемесiнде немесе оған барар жолда жасалған қылмысы үшiн сотталған ауруды емдеу жазаны өтеу орындарында жүзеге асырылады. Еңбекпен түзеу мекемесiнде емдеу жүргiзiлмеген жағдайда ауру бас бостандығынан айыру түрiндегi жазасын өтегеннен кейiн медициналық қорытынды бар болған жағдайда мамандандырылған емдеу-профилактикалық мекемелерiне жiберiлуге тиiс.
8-бап. Есепке алу және сүйемелдеп емдеу
Алкоголизмнен, нашақорлық пен уытқұмарлықпен ерiксiз емделген адамдар мамандандырылған емдеу-алдын алу мекемелерiнен шығарылған соң тұрғын жайлары бойынша наркологиялық мекемелерге есепке тұруға және оларда Қазақстан Республикасының Денсаулық сақтау министрлiгi бекiткен тәртiппен сүйемелдеп емдеуден өтуге тиiс.
Есепке тұрудан және сүйемелдеп емдеуден жалтарған адамдарды iшкi iстер органдары ықтиярсыз алып келуi мүмкiн.
Ескерту. 8-бапқа өзгерту енгізілді - Қазақстан Республикасының 2004.12.20 N 13 (2005 жылғы 1 қаңтардан бастап күшіне енеді) Заңымен.
9-бап. Мамандандырылған емдеу-алдын алу мекемелерiнен
шыққан адамдарды жұмысқа және тұрмыстық
орналастыру
Мамандандырылған емдеу-алдын-алу мекемелерiнен шыққан адамдарды жұмысқа және тұрмыстық орналастыру тұрғылықты жерi бойынша жүзеге асырылады және аудандардың (облыстық маңызы бар қаланың), республикалық маңызы бар қаланың, астананың жергiлiктi атқарушы органдарына жүктеледі.
Ескерту. 9-бап жаңа редакцияда - Қазақстан Республикасының 2004.12.20 N 13 (2005 жылғы 1 қаңтардан бастап күшіне енеді) Заңымен.
10-бап. Мамандандырылған емдеу-профилактикалық
мекемелерiнде заңдылықты сақталуын қадағалау
Мамандандырылған емдеу-профилактикалық мекемелерiнде заңдылықты қадағалауды Қазақстан Республикасының прокуратура органдары жүзеге асырады.
Ескерту. 10-бапқа өзгерту енгізілді - Қазақстан Республикасының 2004.12.20 N 13 (2005 жылғы 1 қаңтардан бастап күшіне енеді) Заңымен.
11-бап. Осы Заңның күшiне ену тәртiбi
Осы Заң жарияланған күнiнен бастап күшiне енедi.
Қазақстан Республикасының
Президентi