Қазақстан Республикасының
Президенті мен Үкіметі актілерінің
жинағында жариялануға тиіс
Қазақстан Республикасының 2008 жылғы 4 желтоқсандағы Бюджет кодексінің 127-бабына сәйкес ҚАУЛЫ ЕТЕМІН:
1. Қоса беріліп отырған Республикалық бюджеттің атқарылуы туралы жылдық есепті жасау және ұсыну ережесі бекітілсін.
2. Мыналардың күші жойылды деп танылсын:
1) "Республикалық бюджеттің атқарылуы туралы есепті жасау және ұсыну ережесін бекіту туралы" Қазақстан Республикасы Президентінің 2004 жылғы 17 қыркүйектегі N 1443 Жарлығы (Қазақстан Республикасының ПҮАЖ-ы, 2004 ж., N 36, 469-құжат);
2) "Қазақстан Республикасы Президентінің 2004 жылғы 17 қыркүйектегі N 1443 Жарлығына толықтырулар енгізу туралы" Қазақстан Республикасы Президентінің 2005 жылғы 28 мамырдағы N 1579 Жарлығы (Қазақстан Республикасының ПҮАЖ-ы, 2005 ж., N 21, 246-құжат);
3) "Қазақстан Республикасы Президентінің 2004 жылғы 17 қыркүйектегі N 1443 Жарлығына өзгерістер енгізу туралы" Қазақстан Республикасы Президентінің 2006 жылғы 8 желтоқсандағы N 218 Жарлығы (Қазақстан Республикасының ПҮАЖ-ы, 2006 ж., N 46, 483-құжат).
3. Осы Жарлық 2009 жылғы 1 қаңтардан бастап қолданысқа енгізіледі.
Қазақстан Республикасының
Президенті Н. Назарбаев
Қазақстан Республикасы
Президентінің
2009 жылғы 16 қыркүйектегі
N 871 Жарлығымен
БЕКІТІЛГЕН
Республикалық бюджеттің атқарылуы туралы
жылдық есепті жасау және ұсыну
ЕРЕЖЕСІ
1. Жалпы ережелер
1. Осы Республикалық бюджеттің атқарылуы туралы жылдық есепті жасау және ұсыну ережесі (бұдан әрі - Ереже) есепті қаржы жылындағы республикалық бюджеттің атқарылуы туралы жылдық есепті жасау және ұсыну тәртібін айқындайды.
2. Түсімдердің және төлемдер бойынша қаржыландырудың жиынтық жоспарының, міндеттемелер бойынша қаржыландырудың жиынтық жоспарының атқарылуы туралы есептердің, елдің стратегиялық даму бағыттарымен өзара байланысты бюджеттің атқарылу көрсеткіштерін талдау нәтижелерінің деректері есепті қаржы жылындағы республикалық бюджеттің атқарылуы туралы жылдық есепті жасау үшін негіз болып табылады.
3. Республикалық бюджеттің атқарылуы туралы жылдық есеп есепті қаржы жылында жүргізілген республикалық бюджеттің түсімдері және шығыстарын қаржыландыру жөніндегі барлық операцияларды көрсетеді.
4. Республикалық бюджеттің атқарылуы туралы жылдық есепті Қазақстан Республикасының Бюджет кодексіне және осы Ережеде белгіленген талаптарға сәйкес бюджеттің атқарылуы жөніндегі орталық уәкілетті орган жасайды.
5. Есепті қаржы жылындағы республикалық бюджеттің атқарылуы туралы жылдық есепті қалыптастыру Қазақстан Республикасының Бюджет кодексінде айқындалған бюджет құрылымы бойынша кассалық негізде, мың теңгемен жүзеге асырылады.
2. Есепті қаржы жылындағы республикалық бюджеттің атқарылуы туралы жылдық есепті жасау тәртібі
6. Есепті қаржы жылындағы республикалық бюджеттің атқарылуы туралы жылдық есеп:
1) түсіндірме жазбадан;
2) тиісті қаржы жылындағы республикалық бюджеттің атқарылуы туралы есептен;
3) республикалық бюджеттің атқарылуы туралы талдамалық есептен тұрады.
2.1. Түсіндірме жазбаны жасау тәртібі
7. Есепті қаржы жылындағы республикалық бюджеттің атқарылуы туралы жылдық есепке түсіндірме жазбада елдің экономикалық ахуалы, стратегиялық және бағдарламалық құжаттарында, Қазақстан Республикасы Президентінің Қазақстан халқына жыл сайынғы жолдауында айқындалған мақсаттарға қол жеткізу және басымдықтардың іске асырылуы туралы, елде тиісті кезеңге арналған республиканың әлеуметтік-экономикалық даму болжамы мен бюджеттік параметрлерде қабылданған салық-бюджет саясатының негізгі бағыттарының іске асырылуы және тиісті қаржы жылына арналған республикалық бюджет туралы заң баптарының атқарылуы туралы талдамалық ақпарат көрсетіледі.
2.2. Тиісті қаржы жылындағы республикалық бюджеттің атқарылуы туралы есепті жасау тәртібі
8. Есепті қаржы жылындағы республикалық бюджеттің атқарылуы туралы есеп республикалық бюджет туралы заңға қосымшаларға сәйкес республикалық бюджет көрсеткіштерінің атқарылуы туралы деректерді білдіреді.
Есеп тиісті қаржы жылына арналған республикалық бюджет туралы заңға сәйкес жасалады және мыналар:
есепті қаржы жылына арнап бекітілген, нақтыланған, түзетілген республикалық бюджеттің сомасы;
есепті қаржы жылына арнап қабылданған міндеттемелердің сомасы;
есепті қаржы жылында төленбеген міндеттемелердің сомасы;
есепті қаржы жылындағы республикалық бюджеттік бағдарламалар бойынша бюджет түсімдерінің және (немесе) төленген міндеттемелердің атқарылу сомасы;
есепті қаржы жылындағы бюджет түсімдерінің атқарылу және (немесе) республикалық бюджеттік бағдарламалар бойынша төленген міндеттемелер сомасының есепті қаржы жылындағы орындалған (бекітілген, нақтыланған, түзетілген) республикалық бюджеттің сомасынан ауытқуы;
есепті қаржы жылындағы бюджет түсімдерінің атқарылу және (немесе) республикалық бюджеттік бағдарламалар бойынша төленген міндеттемелер сомасының есепті қаржы жылындағы орындалған (бекітілген, нақтыланған, түзетілген) республикалық бюджеттің сомасына проценттік қатынасы көрсетіле отырып, Бірыңғай бюджеттік сыныптаманың бюджет түсімдері сыныптамасының кодтары мен бюджет шығыстарының функционалдық сыныптамасы бойынша қалыптастырылады.
2.3. Республикалық бюджеттің атқарылуы туралы талдамалық есепті жасау тәртібі
9. Республикалық бюджеттің атқарылуы туралы талдамалық есеп бюджеттік бағдарламалардың әкімшілері мен Қазақстан Республикасының Президенті уәкілеттік берген мемлекеттік орган жүргізген бюджеттік мониторинг пен нәтижелерді бағалау нәтижелеріне негізделген республикалық бюджеттік бағдарламалардың түсімдері және оларды іске асыру жөніндегі талдамалық деректерді қамтиды және мынадай:
түсімдер жоспарының атқарылуына әсер ететін негізгі факторларды және кірістер түсімдерінің жоспарынан іс жүзіндегі атқарылудың ауытқу себептерін баяндай отырып, салықтық түсімдердің, салықтық емес түсімдердің, негізгі капиталды сатудан түсетін түсімдердің, трансферттер түсімдерінің атқарылуын талдауды қамтитын "Кірістер" бөлімі бойынша республикалық бюджеттің атқарылуы туралы;
республикалық бюджеттік бағдарламалардың әкімшілері мен Қазақстан Республикасының Президенті уәкілеттік берген мемлекеттік орган жүргізген нәтижелерді бағалауды қамтитын "Шығындар" бөлімі бойынша іс жүзіндегі атқарылудың жоспарлы сомадан ауытқу себептерін көрсете отырып, республикалық бюджеттік бағдарламаларды іске асыру туралы;
кредит беруге байланысты республикалық бюджеттік бағдарламалардың орындалу нәтижелерін бағалауды қамтитын, іс жүзіндегі атқарылудың бюджеттік кредиттер беру мен оларды өтеу бойынша түскен қаражат түсімдері жөніндегі жоспардан ауытқуының негізгі факторлары мен себептері баяндалған "Таза бюджеттік кредит беру" бөлімінің атқарылуы туралы;
қаржы активтерін сатып алуға байланысты бюджеттік бағдарламалардың атқарылу нәтижелерін қамтитын, олардың нәтижелерін бағалауды, сондай-ақ олардың іс жүзіндегі түсімдерінің жоспарлы сомадан ауытқу себептерін көрсете отырып, мемлекеттің қаржы активтерін сатудан түсетін түсімдер жоспарының атқарылу көрсеткіштерін қамтитын "Қаржы активтерімен операциялар бойынша сальдо" бөлімінің атқарылуы туралы;
республикалық бюджеттің атқарылу қорытындылары бойынша тапшылықтың (профициттің) іс жүзінде қалыптасқан сомасын түсіндіретін "Бюджет тапшылығы (профициті)" бөлімінің атқарылуы туралы;
бюджет қаражатының қарызға алу және пайдаланылатын қалдықтары есебінен бюджет тапшылығын жабуды іс жүзінде қамтамасыз ету немесе бюджет профицитін, қарыз қаражатын, бюджет қаражатының пайдаланылатын қалдықтарын қарыздар бойынша негізгі борышты өтеуге жұмсау жолымен бюджет профицитін пайдалану нәтижелерін қамтитын "Бюджет тапшылығын қаржыландыру (профицитін пайдалану)" бөлімінің атқарылуы туралы ақпаратты қамтиды.
3. Жылдық есепті ұсыну тәртібі
10. Бюджетті атқару жөніндегі орталық уәкілетті орган есепті жылдан кейінгі жылғы 1 сәуірден кешіктірмей есепті қаржы жылындағы республикалық бюджеттің атқарылуы туралы жылдық есепті осы Ереженің 6-9-тармақтарында белгіленген талаптарға сәйкес Қазақстан Республикасының Үкіметіне, мемлекеттік жоспарлау жөніндегі орталық уәкілетті органға және мемлекеттік қаржылық бақылау органдарына ұсынады.
11. Есепті қаржы жылындағы республикалық бюджеттің атқарылуы туралы жылдық есепті Қазақстан Республикасының Үкіметі жыл сайын ағымдағы жылғы 1 мамырдан кешіктірмей Қазақстан Республикасының Парламентіне және Республикалық бюджеттің атқарылуын бақылау жөніндегі есеп комитетіне ұсынады.
Бюджетті атқару жөніндегі орталық уәкілетті орган есепті қаржы жылындағы республикалық бюджеттің атқарылуы туралы жылдық есепті Қазақстан Республикасының Парламентінде қарау кезінде бюджеттік бағдарламалар әкімшілерінің жұмысын үйлестіруді қамтамасыз етеді.