Конституциялық Кеңестің мүшесі В.Д.Шопиннің хабарын, өтініш субъектісінің өкілі депутат Н.С.Каптильдің сөзін тыңдап және қолда бар материалдармен таныса келе, Қазақстан Республикасының Конституциялық Кеңесі мынаны анықтады:
Конституциялық Кеңеске Қазақстан Республикасы Парламенті Мәжілісі Төрағасының Қазақстан Республикасы Конституциясының 59-бабының 3-тармағын ресми түсіндіру туралы өтініші келіп түсті. Өтініште сондай-ақ Қазақстан Республикасы Парламентінің сессиясын ұзартудың мүмкіндігі туралы да мәселе қойылуда.
Қазақстан Республикасы Конституциясының 59-бабының 3-тармағын ресми түсіндіруде Конституциялық Кеңес мынаны ескерді.
Қазақстан Республикасы Конституциясының 59-бабының 3-тармағы Қазақстан Республикасы Парламентінің, қыркүйектің бірінші жұмыс күнінен бастап маусымның соңғы жұмыс күніне дейін, кезектегі сессияларын бір жылда бір рет өткізуді белгілейді. Бұл осы норманың Парламенттің сессиялық жұмысының жалпы мерзімін көзде тұтуын білдіреді, бұл ретте Республика Конституциясында көрсетілген мерзімді өзгертуге тыйым салатын нормалар жоқ.
Қазақстан Республикасы Конституциясының 61-бабының 2-тармағына сай, Қазақстан Республикасының Президенті заң жобасын жедел қаралады деп жариялауға құқылы, бұл осы жобаны ол енгізілген күннен бастап Парламент бір айдың ішінде қарап шығуы керек екенін білдіреді. Парламент осы талапты орындамағанда Республика Президенті заң күші бар жарлық шығаруға құқылы.
Республика Президенті Парламент сессиясы кезеңінде енгізілген заң жобаларын жедел қаралады деп жариялағандықтан, Парламент сессиялық жұмыс кезеңін қажетті мерзімге дейін жалғастыру туралы шешім қабылдап, оларды бір айдың ішінде қарауға тиіс.
Баяндалғанның негізінде, Қазақстан Республикасы Конституциясының 72-бабы 1-тармағының 4) тармақшасын, Қазақстан Республикасы Президентінің "Қазақстан Республикасының Конституциялық Кеңесі туралы" конституциялық заң күші бар Жарлығының 17-бабы 3-тармағының 1) тармақшасын, 37-бабын басшылыққа алып, Қазақстан Республикасы Конституциясының 59-бабының 3-тармағын ресми түсіндіру тәртібінде Қазақстан Республикасының Конституциялық Кеңесі қаулы етті:
1. Қазақстан Республикасы Конституциясының 59-бабының 3-тармағын, өтініш мәселесіне қатысты, осы норма Қазақстан Республикасы Парламентінің сессиялық жұмысы кезеңін белгілейді деп түсіну керек, ол кезең Қазақстан Республикасы Парламентінің қаулысымен ұзартылуы мүмкін.
Қазақстан Республикасы Президентінің заң жобаларын жедел қаралады деп
жариялауы Парламентті олар енгізілген күннен бастап бір айдың ішінде
қарауға міндеттейді.
2. Қазақстан Республикасы Конституциясының 74-бабының 3-тармағына
сәйкес осы қаулы оны қабылдаған күннен бастап күшіне енеді, Қазақстан
Республикасының бүкіл аумағында жалпыға бірдей міндетті, түпкілікті болып
табылады және Қазақстан Республикасы Конституциясының 73-бабының
4-тармағында көзделген жағдайларды ескеріп, шағымдануға жатпайды.
Қазақстан Республикасы
Конституциялық Кеңесінің Төрағасы
Оқығандар:
Қасымбеков Б.А.
Омарбекова А.Т.