Ескерту. Күші жойылды - ҚР Үкіметінің 17.07.2023 № 603 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) қаулысымен.
2015 жылғы 29 қазандағы Қазақстан Республикасының Кәсіпкерлік кодексі 79-4-бабының 1-тармағына сәйкес Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған:
1) Арнаулы комиссияны қалыптастыру қағидалары;
2) Арнаулы комиссия туралы ереже бекітілсін.
2. Осы қаулы алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасының Премьер-Министрі |
А. Мамин |
| Қазақстан Республикасы Үкіметінің 2021 жылғы 29 қазандағы № 778 қаулысымен бекітілген |
Арнаулы комиссияны қалыптастыру қағидалары 1-тарау. Жалпы ережелер
1. Осы Арнаулы комиссияны қалыптастыру қағидалары (бұдан әрі – Қағидалар) Қазақстан Республикасының Кәсіпкерлік кодексі 79-4-бабының 1-тармағына сәйкес әзірленді және облыстардың, республикалық маңызы бар қалалардың және астананың жергілікті атқарушы органдары жанынан құрылатын арнаулы комиссияны қалыптастыру тәртібін айқындайды.
2. Осы Қағидаларда пайдаланылатын негізгі ұғымдар:
1) арнаулы комиссия (бұдан әрі – комиссия) – дара кәсіпкерлер мен заңды тұлғаларды (ірі кәсіпкерлік субъектілерін қоспағанда) әлеуметтік кәсіпкерлік субъектілерінің тізіліміне қосуға қатысты мәселелерді қарау мақсатында мемлекеттік органдардың, "Атамекен" Қазақстан Республикасының ұлттық кәсіпкерлер палатасының (бұдан әрі – Ұлттық кәсіпкерлер палатасы), қоғамдық бірлестіктер мен кәсіптік одақтардың өкілдері есебінен құрылатын облыстардың, республикалық маңызы бар қалалардың, астананың жергілікті атқарушы органдары жанындағы консультативтік-кеңесші орган;
2) әлеуметтік кәсіпкерлік субъектілерінің тізілімі (бұдан әрі – тізілім) – әлеуметтік кәсіпкерлік субъектілері болып табылатын дара кәсіпкерлер мен заңды тұлғалар туралы мәліметтер қамтылатын электрондық дерекқор, атап айтқанда:
дара кәсіпкердің атауы не заңды тұлғаның атауы және тіркелген күні;
сәйкестендіру нөмірі (жеке сәйкестендіру нөмірі не бизнес сәйкестендіру нөмірі);
заңды мекенжайы (орналасқан жері);
тізілімге қосылған күні;
әлеуметтік кәсіпкерлік субъектісінің санаты.
2-тарау. Комиссияны қалыптастыру тәртібі
3. Комиссияны қалыптастыру мақсатында облыстың, республикалық маңызы бар қаланың және астананың жергілікті атқарушы органы жыл сайын 1 желтоқсанға дейін дара кәсіпкерлер мен заңды тұлғаларды (ірі кәсіпкерлік субъектілерін қоспағанда) тізілімге қосу мәселелерін қарау бойынша кандидатураны ұсыну үшін тиісті әкімшілік-аумақтық бірліктің аумағындағы мемлекеттік органдарға, Ұлттық кәсіпкерлер палатасына, қоғамдық бірлестіктер мен кәсіптік одақтарға сұрау салу жібереді.
4. Мемлекеттік органдар, Ұлттық кәсіпкерлер палатасы, қоғамдық бірлестіктер мен кәсіптік одақтар сұрау салуды алған күннен бастап 10 (он) жұмыс күнінен кешіктірмей ресми хат-хабар арқылы кандидатураны ұсынады.
5. Дара кәсіпкерлер мен заңды тұлғаларды (ірі кәсіпкерлік субъектілерін қоспағанда) тізілімге қосу мәселелерін қарау жөніндегі комиссияның құрамы облыстың, республикалық маңызы бар қаланың және астананың тиісті жергілікті атқарушы органы әкімінің шешімімен 31 желтоқсаннан кешіктірілмей бекітіледі.
6. Комиссия төрағадан, төрағаның орынбасарынан және оның мүшелерінен тұрады.
7. Комиссияның құрамы коммерциялық емес ұйымдар мен мемлекеттік органдар өкілдерінің қатарынан қалыптастырылады. Бұл ретте мемлекеттік органдардан алынатын өкілдердің саны төрт адамнан кем болмауға тиіс және коммерциялық емес ұйымдардан алынатын өкілдердің санынан аспауға тиіс.
8. Комиссияны төраға басқарады, оны комиссия мүшелері бірінші отырыста сайлайды.
9. Комиссия төрағасы мемлекеттік органдардың өкілі бола алмайды.
10. Төраға болмаған уақытта оның функцияларын төрағаның орынбасары орындайды, ол мемлекеттік органдардың өкілі болмайды.
Төрағаның орынбасарын комиссия төрағасы тағайындайды.
11. Комиссия хатшысы жұмыс органының өкілі болып табылады.
12. Облыстың, республикалық маңызы бар қаланың, астананың әкімі айқындайтын әлеуметтік кәсіпкерлік саласындағы жұмыстарды жүргізуге жауапты облыстың, республикалық маңызы бар қаланың, астананың деңгейіндегі жергілікті атқарушы органның құрылымдық бөлімшесі комиссияның жұмыс органы болып табылады.
| Қазақстан Республикасы Үкіметінің 2021 жылғы 29 қазандағы № 778 қаулысымен бекітілген |
Арнаулы комиссия туралы ереже
1-тарау. Жалпы ережелер
1. Осы Арнаулы комиссия туралы ереже (бұдан әрі – Ереже) Қазақстан Республикасының Кәсіпкерлік кодексі 79-4-бабының 1-тармағына сәйкес әзірленді және облыстардың, республикалық маңызы бар қалалардың және астананың жергілікті атқарушы органдары жанынан құрылатын арнаулы комиссияның (бұдан әрі – комиссия) мәртебесі мен өкілеттіктерін айқындайды.
2. Комиссия өз қызметінде Қазақстан Республикасының Конституциясын, заңдарын, Қазақстан Республикасының Президенті мен Үкіметінің актілерін, Қазақстан Республикасының өзге де нормативтік құқықтық актілерін, сондай-ақ осы Ережені басшылыққа алады. Комиссия өз жұмысын ашықтық, жариялылық, алқалылық және бейтараптық қағидаттарында ұйымдастырады.
3. Облыстың, республикалық маңызы бар қаланың, астананың әкімі айқындайтын әлеуметтік кәсіпкерлік саласындағы жұмыстарды жүргізуге жауапты облыстың, республикалық маңызы бар қаланың, астананың деңгейіндегі жергілікті атқарушы органның құрылымдық бөлімшесі комиссияның жұмыс органы болып табылады.
4. Комиссияның қызметі облыс, республикалық маңызы бар қала және астана әкімі шешімінің негізінде тоқтатылады.
2-тарау. Комиссияның міндеттері
5. Комиссияның міндеті дара кәсіпкерлер мен заңды тұлғалар (ірі кәсіпкерлік субъектілерін қоспағанда) үшін тең жағдайлар жасау, сондай-ақ оларға қойылатын талаптардың бірлігін, ұсынылатын құжаттарды зерттеулердің жан-жақтылығы мен толықтығын, қабылданатын шешімдердің объективтілігін сақтау мақсатында дара кәсіпкерлер мен заңды тұлғаларды (ірі кәсіпкерлік субъектілерін қоспағанда) әлеуметтік кәсіпкерлік субъектілерінің тізіліміне (бұдан әрі – тізілім) қосу бойынша ұсынымдар мен ұсыныстар әзірлеу болып табылады.
6. Комиссия өзіне жүктелген міндеттерге қол жеткізу мақсатында:
1) дара кәсіпкерлер мен заңды тұлғалардың (ірі кәсіпкерлік субъектілерін қоспағанда) өтініштерін қарайды;
2) мемлекеттік органдармен және өзге де ұйымдармен өзара іс-қимыл жасайды;
3) өз құзыретіне жататын мәселелер бойынша ұсынымдар мен ұсыныстар тұжырымдайды.
3-тарау. Комиссияның қызметін ұйымдастыру
7. Комиссия өз қызметін отырыс нысанында (бетпе-бет форматта немесе селекторлық режимде) жүзеге асырады.
Комиссия отырыстары тоқсанына бір рет өткізіледі.
8. Комиссияның хатшысы:
1) төрағаның тапсырмасы бойынша отырысқа мемлекеттік органдардың, мемлекеттік кәсіпорындар мен мекемелердің өкілдерін, сондай-ақ сарапшыларды, шағын және орта кәсіпкерлік пен әлеуметтік кәсіпкерлікті дамытуды қолдау саласындағы қоғамдық бірлестіктер мен коммерциялық емес ұйымдардың өкілдерін шақырады;
2) белгіленген тәртіппен мемлекеттік органдардан, ұйымдардан, жеке тұлғалардан комиссия міндеттерін іске асыру үшін қажетті материалдарды сұратады және алады.
9. Комиссия отырысының күн тәртібін жұмыс органы дара кәсіпкерлер мен заңды тұлғалардың (ірі кәсіпкерлік субъектілерін қоспағанда) оларды тізілімге енгізу туралы өтініштері негізінде қалыптастырады.
10. Комиссияның алдағы кезеңге арналған отырысының күн тәртібін алдағы тоқсанның бірінші айының 1-күніне дейін күнтізбелік 15 күннен кешіктірмей комиссия төрағасы бекітеді.
11. Комиссия хатшысы комиссия отырысы өткізілетін күнге дейін 3 (үш) жұмыс күнінен кешіктірмей оның мүшелеріне, сондай-ақ тізілімге енуге үміткер дара кәсіпкерлер мен заңды тұлғаларға (ірі кәсіпкерлік субъектілерін қоспағанда) өткізу уақытын, форматын және орнын көрсете отырып, күн тәртібін жібереді.
12. Комиссия төрағасы оның қызметін басқарады, комиссияның отырыстарында төрағалық етеді, жұмысын жоспарлайды, ұсынымдарының іске асырылуына жалпы бақылауды жүзеге асырады.
13. Комиссияның отырысына қатысатын адамдарды комиссия хатшысы тіркейді.
14. Комиссия мүшелері олардың қызметіне алмастыру құқығынсыз қатысады.
15. Комиссия мүшелері ұсынымдарды әзірлеу кезінде тең дауысқа ие болады.
Дауыстар тең болған жағдайда комиссия төрағасы дауыс берген ұсыным қабылданды деп есептеледі.
16. Келіспеген жағдайда комиссия мүшелері ерекше пікірін жазбаша түрде баяндайды және оны комиссия отырысының хаттамасына қоса береді.
17. Комиссия отырысы, егер оған комиссия мүшелерінің жалпы санының кемінде үштен екісі қатысса, заңды деп есептеледі.
18. Комиссияның ұсынымдары, егер оған отырысқа қатысып отырған комиссия мүшелерінің жартысынан астамы дауыс берсе, қабылданады.
19. Комиссия отырысы күн тәртібінің мәселелерін комиссия хатшысы жария етеді.
20. Комиссия төрағасының орынбасары (ол болмаған жағдайда – комиссия хатшысы) комиссияның қарауына ұсынылған материалдар бойынша баяндама жасайды.
21. Комиссияның ұсынымдары комиссияның қарауына берілетін материалдар бойынша баяндаманы және комиссия мүшелерінің дауыс беруі арқылы өтініш берушілердің түсіндірмелерін талқылағаннан кейін әзірленеді.
22. Комиссия төрағасы күн тәртібінің әр тармағын талқылау нәтижесі бойынша дауыс беруді жариялайды, ол "қолдаймын" немесе "қарсымын" форматында өткізіледі.
23. Комиссия хатшысы дауыстарды санауды жүзеге асырады және алынған нәтижені жариялайды. Дауыс беру нәтижесі комиссия отырысының хаттамасына енгізіледі.
4-тарау. Комиссия отырысында қабылданған ұсынымдарды ресімдеу
24. Комиссия отырысында қабылданған ұсынымдар отырыс хаттамасы түрінде ресімделеді және тізілімді бекіту үшін кәсіпкерлік жөніндегі уәкілетті органға жіберіледі.
25. Төраға комиссия отырысының хаттамасына комиссияның тиісті отырысы өткізілген күннен бастап 5 (бес) жұмыс күнінен кешіктірмей қол қояды.
26. Комиссия отырысының хаттамасын – комиссияның төрағасы, ал ол болмаған жағдайда отырысқа төрағалық етуші комиссия төрағасының орынбасары бекітеді.
27. Комиссия хатшысы отырыстың хаттамасын бекіткен күннен бастап күнтізбелік 5 (бес) күннен кешіктірмей комиссия отырысы хаттамасының көшірмесін қағаз және (немесе) электрондық нысанда комиссия мүшелеріне және тізілімге енуге үміткер дара кәсіпкерлер мен заңды тұлғаларға (ірі кәсіпкерлік субъектілерін қоспағанда) жібереді.
28. Комиссия хатшысы комиссияның тиісті отырысының күн тәртібі өтініштері негізінде қалыптастырылған адамдарға комиссия отырысы хаттамасынан үзінді көшірмені жібереді. Мұндай үзінді көшірмеде комиссия отырысының хаттамасынан нақты өтінішке қатысты мәліметтер ғана қамтылуы мүмкін.