Мемлекеттік қорғаныстық тапсырысты қалыптастыру, орналастыру және орындау қағидаларын бекіту туралы

      "Қорғаныс өнеркәсібі және мемлекеттік қорғаныстық тапсырыс туралы" 2019 жылғы 18 наурыздағы Қазақстан Республикасы Заңы 5-бабының 6) тармақшасына сәйкес Қазақстан Республикасының Үкіметі ҚАУЛЫ ЕТЕДІ:

      1. Қоса беріліп отырған Мемлекеттік қорғаныстық тапсырысты қалыптастыру, орналастыру және орындау қағидалары бекітілсін.

      2. Осы қаулыға қосымшаға сәйкес Қазақстан Республикасы Үкіметінің кейбір шешімдерінің күші жойылды деп танылсын.

      3. Осы қаулы алғашқы ресми жарияланған күнінен бастап күнтізбелік он күн өткен соң қолданысқа енгізіледі.

Мемлекеттік қорғаныстық тапсырысты қалыптастыру, орналастыру және орындау қағидалары

1-тарау. Жалпы ережелер

      1. Осы Мемлекеттік қорғаныстық тапсырысты қалыптастыру, орналастыру және орындау қағидалары (бұдан әрі – Қағидалар) "Қорғаныс өнеркәсібі және мемлекеттік қорғаныстық тапсырыс туралы" 2019 жылғы 18 наурыздағы Қазақстан Республикасының Заңына сәйкес әзірленді және мемлекеттік қорғаныстық тапсырысты (бұдан әрі – қорғаныстық тапсырыс) қалыптастыру, орналастыру және орындау тәртібін айқындайды.

      2. Қорғаныстық тапсырысты қалыптастыруды, орналастыруды, салааралық үйлестіруді және оның орындалуын бақылауды уәкілетті орган жүзеге асырады.

2-тарау. Қорғаныстық тапсырысты қалыптастыру және орналастыру

      3. Қорғаныстық тапсырысты қалыптастыру және орналастыру үш жылдық кезеңге арналған республикалық бюджетте көзделген, осы мақсаттарға белгіленген шығыстар шегінде жүргізіледі.

      4. Қорғаныстық тапсырысты алушылар (бұдан әрі – алушылар) тактикалық-техникалық тапсырманы (техникалық ерекшелікті, тактикалық-техникалық сипаттаманы) (бұдан әрі – техникалық тапсырма) ұлттық стандарттарға сәйкес қалыптастырады. Техникалық тапсырманы қалыптастыру кезінде ұлттық стандарттарға қайшы келетін қосымша өлшемшарттарды қосуға жол берілмейді.

      Ұлттық стандарттар болмаған жағдайда, алушылар сатып алуға ұсынылатын әскери мақсаттағы тауарларға (өнімге), қосарланған мақсаттағы (қолданыстағы) тауарларға (өнімге), әскери мақсаттағы жұмыстарға және әскери мақсаттағы көрсетілетін қызметтерге (бұдан әрі – қорғаныстық тапсырыс өніміне) техникалық тапсырманы өз бетінше қалыптастырады.

      Ұлттық стандарттар болмаған кезде, қару-жарақты, әскери техниканы біріздендіру, стандарттау, жедел үйлестіру және олардың жаңа (тәжірибелік) үлгілерін сатып алу мақсатында техникалық тапсырмада тауар белгілері, қызмет көрсету белгілері, фирмалық атаулар, патенттер, пайдалы модельдер, өнеркәсіптік үлгілер, тауарды шығарған елдің атауы және өндірушінің атауы көрсетіледі.

      5. Техникалық тапсырманы алушылар, қорғаныс өнеркәсібі және мемлекеттік қорғаныстық тапсырыс саласындағы уәкілетті орган (бұдан әрі – уәкілетті орган), мемлекеттік қорғаныстық тапсырыстың әскери мақсаттағы тауарларды (өнімді), қосарланған мақсаттағы (қолданыстағы) тауарларды (өнімді) отандық өндірушілердің және әскери мақсаттағы жұмыстар мен әскери мақсаттағы көрсетілетін қызметтерді отандық берушілердің тізіліміне (бұдан әрі – тізілім) енгізілген ұйымдар және уәкілетті ұйым қағаз немесе электрондық түрде жолдайды және кейіннен өңдейді.

      Техникалық тапсырмада мемлекеттік құпияларды құрайтын мәліметтер болған кезде, оны беру мемлекеттік құпиялар туралы заңнама талаптарына сәйкес жүзеге асырылады.

      6. Қаржы жылының алдындағы жылғы 1 қыркүйектен кешіктірмей алушылар уәкілетті органға мерзімдерін, мөлшерін (көлемін) және жеткізу орнын көрсете отырып, тиісті жоспарлы кезеңге арналған қажетті қорғаныстық тапсырыс өніміне техникалық тапсырмаларды жібереді. Бұл ретте, тиісті жоспарлы кезеңге дейін екі жыл бұрынғы кезең қаржы жылының алдындағы жыл болып табылады.

      7. Қаржы жылының алдындағы жылғы 1 қыркүйекке дейінгі мерзімде мемлекеттік материалдық резерв саласындағы уәкілетті орган қорғаныстық тапсырыс өніміне қатысты бөлігінде тиісті жоспарлы кезеңде жаңарту тәртібімен шығарылатын мемлекеттік материалдық резервтің материалдық құндылықтарының тізбесін (бұдан әрі – мемлекеттік материалдық резервтің тізбесі) уәкілетті органға жібереді.

      8. Уәкілетті орган мемлекеттік материалдық резерв саласындағы уәкілетті органмен бірлесіп мемлекеттік материалдық резервтің тізбесі мен ұсынылған техникалық тапсырмаларды алған күннен бастап он жұмыс күні ішінде олардың сәйкестігін салыстырады.

      Алушының техникалық тапсырмасына сәйкес келетін қорғаныстық тапсырыс өнімі болған кезде уәкілетті орган мемлекеттік материалдық резервтің көрсетілген материалдық құндылықтарын алу қажеттігі туралы хабарламасы бар техникалық тапсырмаларды алушыларға қайтарады.

      9. Мемлекеттік материалдық резервтің жаңартуға жататын материалдық құндылықтарын алушыларға тапсыру тиісті жоспарлы кезеңнің 1 қаңтарынан бастап 1 наурызы аралығындағы кезеңде Қазақстан Республикасының азаматтық қорғау туралы заңнамасына сәйкес өтеусіз жүзеге асырылады.

      Мемлекеттік материалдық резервтің материалдық құндылықтары техникалық тапсырманың талаптарына сәйкес болған кезде алушының оларды алудан бас тартуына жол берілмейді.

      Техникалық тапсырмада көрсетілген көлем мемлекеттік материалдық резервтің тізбесінде көзделген материалдық құндылықтардың көлемінен артық болғанда, қорғаныстық тапсырыс өнімінің қалған бөлігі техникалық тапсырмадағы сандық деректер өзгертіле отырып, қорғаныстық тапсырыс шеңберінде сатып алынады.

      10. Қайтарылған күннен бастап бес жұмыс күні ішінде алушы мемлекеттік материалдық резервтің материалдық құндылықтарын болжамды алуды ескере отырып, техникалық тапсырманы өзгертеді.

      11. Қаржы жылының алдындағы жылғы 1 қазанға дейінгі мерзімде уәкілетті органның бюджетінде қорғаныстық тапсырыс шеңберінде бюджет қаражаты көзделгенде (бұдан әрі – қаражат уәкілетті органда болғанда), уәкілетті орган техникалық тапсырмаларды қызмет бағыттары бойынша тізілімге енгізілген ұйымдарға және/немесе уәкілетті ұйымға жібереді.

      12. Қаржы жылының алдындағы жылғы 1 қазанға дейінгі мерзімде арнаулы мемлекеттік органдарды қоспағанда, қорғаныстық тапсырыс шеңберінде бюджет қаражаты алушылардың бюджетінде көзделгенде (бұдан әрі – қаражат алушыларда болғанда) алушылар техникалық тапсырмаларды қызмет бағыттары бойынша тізілімге енгізілген отандық тауар өндірушілерге, жұмыстар мен көрсетілетін қызметтерді отандық берушілерге (бұдан әрі – тізілімге енгізілген ұйымдар) және/немесе уәкілетті ұйымға өз бетінше жібереді.

      13. Техникалық тапсырманы орындау мүмкін болмаған кезде тізілімге енгізілген ұйым оны алған күннен бастап үш жұмыс күні ішінде тиісті дәлелді жауапты жолдайды.

      14. Қаржы жылының алдындағы жылғы 10 қазанға дейінгі мерзімде тізілімге енгізілген ұйымдар техникалық тапсырманы қарайды және қорғаныстық тапсырысты орындау не оның балама нұсқасын және/немесе аз мөлшерде (көлемде) орындау мүмкіндігі туралы жауапты уәкілетті органға немесе қаражат алушыда болғанда алушыға жібереді. Көрсетілген мерзім ішінде жауап ұсынылмаған кезде тізілімге енгізілген ұйымның қорғаныстық тапсырысты орындауы мүмкін емес деп танылады.

      15. Техникалық тапсырманың балама нұсқасы болған кезде тізілімге енгізілген ұйым уәкілетті органға немесе қаражат алушыда болғанда алушыға ұлттық стандарттарда көзделген жағдайларды қоспағанда, техникалық тапсырманың балама нұсқасын ұсынады.

      16. Қаржы жылының алдындағы жылғы 15 қазанға дейінгі мерзімде уәкілетті орган тізілімге енгізілген ұйымдардың техникалық тапсырмалар бойынша жауабын, оның ішінде олардың балама нұсқаларын қаражат алушыларда болған жағдайларды қоспағанда, алушыларға жолдайды.

      Қаражат алушыларда болғанда алушылар тізілімге енгізілген ұйымдардан келіп түскен жауаптарды өз бетінше қарайды.

      17. Қаржы жылының алдындағы жылғы 1 қарашаға дейінгі мерзімде алушы техникалық тапсырманың ұсынылған нұсқасы бойынша шешім қабылдайды. Егер тізілімге енгізілген ұйымдар ұсынған техникалық тапсырмалардың бірде бірі алушының талаптарына сәйкес келмесе, ол туралы қаражат уәкілетті органда болғанда уәкілетті орган хабардар етіледі.

      18. Техникалық тапсырмалар бойынша келіспеушіліктер туындаған кезде қаражат уәкілетті органда болғанда уәкілетті орган алушылармен және тізілімге енгізілген ұйымдармен бірлесіп келіспеушілікті талқылауды қамтамасыз етеді.

      19. Техникалық тапсырма бойынша бірыңғай шешім қабылданған кезде алушы бес жұмыс күні ішінде уәкілетті органға жауап жолдау арқылы өз келісімін жазбаша растайды.

      20. Қаражат алушыда болғанда алушылар уәкілетті органды, сондай-ақ қызметтің осы бағытында мамандандырылған тізілімге енгізілген ұйымдарды шақыра отырып, келіспеушіліктерді талқылауды өз бетінше ұйымдастырады және техникалық тапсырма бойынша тиісті шешім қабылдайды.

      21. Тізілімге енгізілген ұйымдардың техникалық тапсырманы орындауы мүмкін болмаған кезде, техникалық тапсырма уәкілетті ұйымға қаржы жылының алдындағы жылғы 1 қарашадан кешіктірілмей жіберіледі.

      22. Уәкілетті ұйым техникалық тапсырманы алған сәттен бастап техникалық тапсырмаларды шетелдік өндірушілермен пысықтау бойынша рәсімдерді жүргізеді.

      23. Қаржы жылының алдындағы жылғы 20 желтоқсанға дейінгі мерзімде уәкілетті ұйым уәкілетті органға немесе қаражат алушыда болғанда алушыға ұсынылған тапсырма бойынша және көрсетілген мөлшерде (көлемде) қорғаныстық тапсырысты орындау не оның балама нұсқасын және/немесе аз мөлшерде (көлемде) орындау мүмкіндігі туралы жауап жібереді.

      Көрсетілген мерзім ішінде жауап ұсынылмаған кезде уәкілетті ұйымның қорғаныстық тапсырысты орындауы мүмкін емес деп танылады.

      Техникалық тапсырманың балама нұсқасы қаражат уәкілетті органда болғанда уәкілетті орган арқылы алушымен келісіледі.

      Уәкілетті ұйымнан немесе қаражат уәкілетті органда болғанда уәкілетті органнан тиісті хабарлама алынған күннен бастап үш жұмыс күні ішінде алушы техникалық тапсырманың балама нұсқасын келіседі. Балама нұсқа алушының талаптарына сәйкес келмеген кезде ол туралы уәкілетті ұйым және/немесе қаражат уәкілетті органда болғанда уәкілетті орган хабардар етіледі.

      24. Уәкілетті ұйым көрсетілген мерзімде уәкілетті органға және/немесе қаражат алушыда болғанда алушыға жауап бермеген кезде не уәкілетті ұйым ұсынған өнім техникалық тапсырма талаптарына сәйкес келмесе, уәкілетті ұйымды қорғаныстық тапсырысты орындаушы (бұдан әрі – орындаушы) деп таңдау мүмкін емес деп танылады.

      Қаражат уәкілетті органда болғанда уәкілетті орган уәкілетті ұйымның қорғаныстық тапсырысты орындауының мүмкін еместігі туралы алушыны үш жұмыс күні ішінде хабардар етеді.

      Уәкілетті орган көрсетілген күнге дейін ақпарат ұсынбаған кезде, уәкілетті ұйымды қорғаныстық тапсырысты орындаушы ретінде таңдау мүмкін емес деп саналады.

      25. Уәкілетті ұйымның қорғаныстық тапсырыс өнімін беруі мүмкін болмаған кезде ол қорғаныстық тапсырысқа енгізілмейді және алушы оны Қазақстан Республикасының мемлекеттік сатып алу туралы заңнамасына сәйкес сатып алады.

      Іс-шара мемлекеттік сатып алуға берілген кезде техникалық тапсырмаға оны Қазақстан Республикасының мемлекеттік сатып алу туралы заңнамасына сәйкес келтіру бөлігінде ғана өзгерістерге жол беріледі.

      26. Ағымдағы қаржы жылындағы 1 қаңтардан кешіктірмей уәкілетті орган немесе қаражат алушыда болғанда алушылар техникалық тапсырманы осы бағытта мамандандырылған, тізілімге енгізілген ұйымдарға жібереді.

      Бұл ретте тиісті жоспарлы кезеңге дейінгі жылдың алдындағы кезең ағымдағы қаржы жылы болып саналады.

      Бұдан әрі орындаушыны таңдау және шарт жасасу сатысында орындаушының және уәкілетті органның келісімінсіз техникалық тапсырманы алушының өзгертуіне жол берілмейді.

      27. Ағымдағы қаржы жылындағы 1 ақпанға дейінгі мерзімде тиісті жоспарлы кезеңге арналған бюджеттік өтінімді қалыптастыру үшін тізілімге енгізілген ұйымдар және уәкілетті ұйым уәкілетті органның немесе қаражат алушыда болғанда алушылардың атына Баға белгілеу қағидаларына сәйкес жоспарлы калькуляциясын қоса бере отырып, өздерінің баға ұсыныстарын ұсынады.

      Осы сатыда баға ұсыныстарын ұсынбаған кезде қорғаныстық тапсырыс өнімін жалғыз өндіруші болып табылатын ұйымдарды қоспағанда, тізілімге енгізілген ұйымдар және/немесе уәкілетті ұйым одан әрі орындаушыны таңдау рәсімдеріне қатыспайды.

      Баға ұсыныстарының ұсынылмағаны туралы уәкілетті орган үш жұмыс күні ішінде қаражат уәкілетті органда болғанда алушыны хабардар етеді.

      28. Уәкілетті орган үш күн мерзімде қаражат уәкілетті органда болғанда алушыларға қорғаныстық тапсырыс өніміне ең төмен баға ұсыныстарын жібереді.

      Егер уәкілетті орган қорғаныстық тапсырысты орындау сатысында оның сапасын бақылауды жүзеге асыру үшін алушының мамандарын тартуды жоспарлаған жағдайда, ең төмен баға ұсынысымен бірге алушының қажетті мамандарының саны, олардың мамандықтары, оларды тартудың болжамды мерзімі, қорғаныстық тапсырыс өнімі сапасының сәйкестігін бақылауды жүзеге асырудың болжамды орны туралы ақпарат ұсынады.

      Уәкілетті орган көрсетілген мерзімде баға ұсыныстарын ұсынбаған іс-шаралар мемлекеттік сатып алу туралы заңнамаға сәйкес сатып алынады.

      29. Ағымдағы қаржы жылындағы 15 наурызға дейінгі мерзімде қаражат уәкілетті органда болғанда алушы ұсынылған бағаларға сәйкес бұрын тиісті жоспарлы кезеңге арналған қорғаныстық тапсырыста бекітілген сома шегінде тиісті жоспарлы кезеңге арналған өтінімге енгізу үшін алдын ала іс-шаралар тізімін ұсынады.

      Бюджеттік бағдарламалар әкімшілерінің тиісті жоспарлы кезеңге арналған шығыстар лимитіне кірмеген қорғаныстық тапсырыс өнімі бойынша техникалық тапсырма мөлшері (көлемі) азайту жағына қарай өзгереді және өтініммен бірге ұсынылады.

      30. Ағымдағы қаржы жылындағы 15 мамырға дейінгі мерзімде қаражат уәкілетті органда болғанда уәкілетті орган және қаражат алушыларда болғанда алушылар бюджет заңнамасында белгіленген тәртіппен тиісті жоспарлы кезеңге арналған бюджеттік өтінімді бюджеттік жоспарлау жөніндегі уәкілетті органға жібереді.

      31. Алушы бекітілген шығыстар лимиті шегіне кірмеген қорғаныстық тапсырыс өнімінің мөлшерін (көлемін) қосымша қажеттілік ретінде көрсетеді.

      32. Ағымдағы қаржы жылындағы 1 қазанға дейінгі мерзімде қаражат уәкілетті органда болғанда уәкілетті орган техникалық тапсырмаларды қызмет бағыттары бойынша тізілімге енгізілген ұйымдарға және/немесе уәкілетті ұйымға жібереді.

      Техникалық тапсырмада мемлекеттік құпияларды құрайтын мәліметтер болған кезде, оны беру мемлекеттік құпиялар туралы заңнама талаптарына сәйкес жүзеге асырылады.

      33. Ағымдағы қаржы жылындағы 1 қазанға дейінгі мерзімде қаражат алушыларда болғанда алушылар техникалық тапсырмаларды қызмет бағыттары бойынша тізілімге енгізілген ұйымдарға және/немесе уәкілетті ұйымға өз бетінше жібереді.

      34. Ағымдағы қаржы жылындағы 15 қазанға дейінгі мерзімде орындаушыны таңдау мақсатында тізілімге енгізілген ұйымдар уәкілетті органның немесе қаражат алушыларда болғанда алушылардың мекенжайына Баға белгілеу қағидаларына, сондай-ақ техникалық тапсырмада көзделген талаптарға сәйкес бюджеттік өтінімді қалыптастыру үшін ұсынылған баға ұсыныстарында көрсетілген шығындардан аспайтын жоспарлы калькуляциясымен өздерінің баға ұсыныстарын ұсынады.

      Тізілімге енгізілген ұйымның баға ұсынысын ұсынуы олардың техникалық тапсырмада көзделген талаптарды сақтай отырып, қорғаныстық тапсырыс өнімін беруді жүзеге асыруға келісім беруін растау болып табылады.

      Кейіннен тізілімге енгізілген ұйымды қорғаныстық тапсырыстың нақты іс-шарасы бойынша орындаушы деп таңдаған кезде ұсынылған техникалық тапсырма бойынша шарт жасасудан және оны орындаудан негізсіз бас тарту осы Қағидалардың 103-тармағына сәйкес ұйымды тізілімнен алып тастау үшін негіз болып табылады.

      35. Ағымдағы қаржы жылындағы 15 қазан мен 10 желтоқсан аралығында уәкілетті орган және қаражат алушыда болғанда алушы орындаушыны таңдау бойынша рәсімдерді жүргізеді.

      36. Уәкілетті орган немесе қаражат алушыда болғанда алушы талап етілетін сападағы қорғаныстық тапсырыс өнімін өндіру немесе беру үшін қажетті жағдайларды қамтамасыз ету мүмкіндігіне сүйене отырып, осы іс-шара бойынша бюджеттік өтінімді қалыптастыру үшін бұрын баға ұсыныстарын ұсынған, тізілімге енгізілген ұйымдар арасынан орындаушыларды таңдауды жүргізеді.

      37. Нақты қорғаныстық тапсырыстың іс-шарасы шеңберінде мемлекеттік құпияларды құрайтын мәліметтермен жұмыс істеу қажет болған кезде тізілімге енгізілген ұйымдарда мемлекеттік құпияларды құрайтын мәліметтерді пайдалана отырып жұмыс жүргізуге рұқсаттаманың болуы ескеріледі.

      38. Қаражат уәкілетті органда болғанда орындаушыны таңдау мақсатында қызмет бағыттары бойынша уәкілетті органның комиссиясы (бұдан әрі – орындаушыларды таңдау жөніндегі комиссия) құрылады. Қажет болған кезде алушы әрбір орындаушыларды таңдау жөніндегі комиссияға қызмет бағыттары бойынша арнайы танымы бар өкілді (өкілдерді) және/немесе маманды (мамандарды) жібереді.

      39. Дауыс беру құқығына алушының бір ғана уәкілетті өкілі ие. Уәкілетті орган орындаушыларды таңдау жөніндегі комиссия құрамына үш өкілге дейін енгізеді, олардың әрқайсысы жеке дауыс беру құқығына ие.

      Шешім дауыстардың қарапайым көпшілігімен қабылданады.

      Дауыс беру кезінде алушының техникалық тапсырмасы бойынша орындаушыны таңдау жүзеге асырылатын өкілінде дауыс беру құқығы басым болады.

      Мәселен, дауыстар тең болған кезде алушының өкілі дауыс берген шешім қабылданады.

      40. Орындаушыларды таңдау жөніндегі комиссия құрамын және оның жұмыс тәртібін уәкілетті орган айқындайды.

      41. Қаражат алушыда болғанда алушылар орындаушыларды таңдау жөніндегі өз комиссиясын қалыптастырады. Шешім дауыстардың қарапайым көпшілігімен қабылданады.

      42. Тізілімге енгізілген ұйымдардан орындаушыларды таңдау кезінде мыналар:

      1) ұсынылатын қорғаныстық тапсырыс өнімінің техникалық тапсырма талаптарына сәйкестігі;

      2) Қазақстан Республикасының заңнамасында белгіленген жағдайларда тиісті қызмет түрін жүзеге асыруға лицензияның болуы;

      3) алушы айқындаған көлемде қорғаныстық тапсырыс өнімін беру үшін қажетті өндірістік үй-жайлардың, технологиялық жабдықтардың және білікті мамандардың болуы;

      4) алушы айқындаған көлемде қорғаныстық тапсырыс өнімін шығару үшін қажетті меншік құқығындағы өндірістік үй-жайлардың, технологиялық жабдықтардың, білікті мамандардың болуы, сондай-ақ киім-кешек және арнайы мүлікті, жеке қорғану құралдарын шығару саласында мамандандырылған орындаушылар үшін қорғаныстық тапсырыс өніміне тәжірибелік үлгілерді беруі;

      5) қорғаныстық тапсырыс шеңберінде мемлекеттік құпияларды құрайтын мәліметтермен жұмыс істеу қажет болған кезде тізілімге енгізілген ұйымдарда мемлекеттік құпияларды құрайтын мәліметтерді пайдалана отырып жұмыс жүргізуге рұқсаттаманың болуы ескеріледі.

      43. Орындаушыны таңдау кезінде орындаушыларды таңдау жөніндегі комиссия ең төмен баға ұсынысын ұсынған ұйымдарға, сондай-ақ мыналарға:

      1) алушы қару-жарақты және әскери техниканы сәйкестендіру туралы талап қойған жағдайда, бұрын осыған ұқсас техникалық тапсырма бойынша қорғаныстық тапсырыс өнімін өндіруді немесе беруді жүзеге асырған, тізілімге енгізілген қорғаныс өнеркәсібі кешені ұйымдарына;

      2) егер тактикалық-техникалық тапсырмада атауы, тауар белгілері қамтылса, ондай қорғаныстық тапсырыс өнімін алушы жарақтандыруға (жабдықталымға) қабылдаса, тізілімге енгізілген қорғаныс өнеркәсібі кешені ұйымдарына;

      3) Баға белгілеу қағидаларына сәйкес қорғаныстық тапсырыс өнімі құнының калькуляциясын қоса бере отырып, баға ұсыныстарын ұсынған қорғаныстық тапсырыс өнімін жалғыз отандық берушілер болып табылатын ұйымдарға;

      4) авиациялық техниканың ұшу жарамдылығын ұзартуды жүзеге асыратын тізілімге енгізілген авиажөндеу ұйымдарына;

      6) қызметтің осы бағыты бойынша инвестициялық жобалары бар тізілімге енгізілген ұйымдарға қатысты шешім қабылдайды.

      44. Егер орындаушыны таңдау кезінде бір баға ұсынысы ұсынылса, онда орындаушыларды таңдау жөніндегі комиссия жоспарлы калькуляция Баға белгілеу қағидаларының талаптарына сәйкес болған кезде, осы ұйымды таңдауға қатысты шешім қабылдайды.

      45. Орындаушыны таңдауда баға ұсыныстары, сондай-ақ өндірісті оқшауландыру және қорғаныстық тапсырыстың нақты іс-шарасы шеңберінде қорғаныстық тапсырыс өнімін беру кезінде өндіріс қуаты негізге алынады.

      46. Егер екі және одан көп ұйымның қорғаныстық тапсырыс өніміне баға ұсыныстары бірдей болған жағдайда, өзге де талаптар тең болған кезде таңдау жергілікті қамту үлесі анағұрлым жоғары қорғаныстық тапсырыс өнімінің пайдасына жүзеге асырылады.

      47. Қорғаныстық тапсырыстың әрбір іс-шарасы бойынша баға ұсыныстары жеке қаралады. Баға ұсыныстары конверттермен беріледі, олар қызмет бағыттары бойынша орындаушыларды таңдау жөніндегі комиссия мүшелерінің қатысуымен ашылады.

      48. Тізілімге енгізілген ұйымның біреуі ғана баға ұсынысын ұсынған кезде, егер тауар құнының жоспарлы калькуляциясы Баға белгілеу қағидаларына сәйкес жасалған жағдайда, көрсетілген ұйым орындаушы болып таңдалады.

      49. Егер ұсынылған жоспарлы калькуляция Баға белгілеу қағидаларының талаптарына сәйкес келмесе, ал ұйым баға ұсынысын өзгертуден бас тартса, осы іс-шара уәкілетті ұйымға орындау үшін беріледі.

      50. Орындаушыны таңдау нәтижелері туралы орындаушылар деп таңдалған ұйымдар орындаушыларды таңдау жөніндегі комиссия отырысы өткен күннен бастап күнтізбелік он күн ішінде қағаз немесе электронды түрде хабардар етіледі.

      51. Ағымдағы қаржы жылындағы 25 қаңтарға дейінгі мерзімде уәкілетті ұйым шетелдік өндірушілердің баға ұсыныстарын іріктеу рәсімдерін жүзеге асырады және бюджеттік өтінімді қалыптастыру үшін оларды уәкілетті органға немесе қаражат алушыда болғанда алушыларға ұсынады.

      52. Осы Қағидалардың 34-51-тармақтарының қолданысы оқ-дәрілерді қоспағанда, пайдаланылмайтын қару-жарақты, әскери техниканы, техникалық және арнайы құралдарды құртып жіберу, кәдеге жарату, көму арқылы жою және қайта өңдеу (бұдан әрі – жою) кезінде уәкілетті ұйымға қолданылмайды.

      Уәкілетті ұйым жою бөлігінде Баға белгілеу қағидаларына сәйкес қорғаныстық тапсырыс өнімі құнының калькуляциясын қоса бере отырып, баға ұсынысын ұсынады.

      53. Айрықша жағдайларда, Қазақстан Республикасы Президентінің, Қазақстан Республикасы Қауіпсіздік Кеңесінің немесе Республикалық жедел штабының мәселелерін, не оқыстан туындайтын қауіпті шешу мақсатында қосымша қажеттілікке енгізілмеген қорғаныстық тапсырыс өнімі алушы бұрын айқындаған басымдық бойынша сатып алынады, не басымдық тәртібін уәкілетті орган, сондай-ақ уәкілетті органның келісуі бойынша алушы өзгертеді.

      Ондай жағдайларда орындаушыны таңдауды Қазақстан Республикасы Президентінің, Қазақстан Республикасы Қауіпсіздік Кеңесінің немесе Республикалық жедел штабтың нұсқауларына сәйкес не оқыстан туындайтын қауіпті ескере отырып, орындаушыларды таңдау жөніндегі комиссия жүргізеді. Бұл ретте баға ұсыныстары уәкілетті органның немесе алушының тиісті сұрау салуын алған күннен бастап бес жұмыс күні ішінде ұсынылады. Орындаушыларды таңдау жөніндегі комиссия баға ұсыныстарын ұсынған күннен бастап үш жұмыс күні ішінде шешім қабылдайды.

      54. Қаражат алушыда болғанда алушы тиісті жоспарлы кезеңге арналған республикалық бюджет туралы заңға қол қойылғаннан кейін он жұмыс күні ішінде уәкілетті органға өтінімді осы Қағидаларға 1-қосымшаға сәйкес нысан бойынша ұсынады.

      55. Қорғаныстық тапсырыс жобасы алушылардың өтінімдері бойынша Қазақстан Республикасының Бюджет кодексіне, "Қорғаныс өнеркәсібі және мемлекеттік қорғаныстық тапсырыс туралы" Қазақстан Республикасының Заңына, осы Қағидаларға және Қазақстан Республикасының басқа да нормативтік құқықтық актілеріне, орталық атқарушы органдардың стратегиялық жоспарларына, Қазақстан Республикасының Президентіне тікелей бағынатын және есеп беретін мемлекеттік органдардың меморандумдарына және Қазақстан Республикасының халықаралық шарттары мен міндеттемелеріне сәйкес қалыптастырылады.

      Өтінімді бірінші басшы немесе өтінімге қол қоюға уәкілетті адам бекітеді.

      56. Қорғаныстық тапсырысты бекіту туралы Қазақстан Республикасы Үкіметінің тиісті қаулы жобасы тиісті жоспарлы кезеңге арналған республикалық бюджет туралы заң күшіне енген күннен бастап екі ай ішінде Қазақстан Республикасының Үкіметіне енгізіледі.

      Қорғаныстық тапсырысты нақтылау республикалық бюджет нақтыланған жағдайда, бірақ жылына екі реттен асырылмай жүргізіледі.

      57. Тиісті жоспарлы кезеңге арналған қорғаныстық тапсырысты бекіту туралы Қазақстан Республикасы Үкіметінің қаулысын алғаннан кейін уәкілетті орган және қаражат алушыларда болғанда алушылар бес жұмыс күні ішінде оның тапсырмаларын тиісті орындаушыларға дейін, оларға қатысты бөлігінде қорғаныстық тапсырысты орындауға арналған тиісті шарт жобаларын жолдау арқылы жеткізеді.

      58. Қорғаныстық тапсырыс тапсырмасында көрсетілген қорғаныстық тапсырыстың әрбір жекелеген өнімі қорғаныстық тапсырыстың жекелеген іс-шарасы болып табылады.

      59. Тиісті кезеңге арналған республикалық бюджет туралы Қазақстан Республикасының Заңына өзгерістер мен толықтырулар енгізу туралы Қазақстан Республикасының заңнамалық актісіне қол қойылғаннан кейін алушылар он жұмыс күні ішінде уәкілетті органға өтінімдерді осы Қағидаларға 1-қосымшаға сәйкес нысан бойынша ұсынады.

      60. Ғылыми зерттеулерге мемлекеттік қорғаныстық тапсырысты қалыптастыру "Қорғаныс өнеркәсібі және мемлекеттік қорғаныстық тапсырыс туралы" Қазақстан Республикасының Заңымен, сондай-ақ Мемлекеттік қорғаныстық тапсырыс шеңберінде ғылыми зерттеулерді ұйымдастыру және жүргізу қағидаларымен айқындалады.

      61. Осы Қағидалардың 4-60-тармақтарының талаптары арнаулы мемлекеттік органдарға қолданылмайды.

3-тарау. Арнаулы мемлекеттік органдарға арналған қорғаныстық тапсырысты қалыптастыру және орналастыру ерекшеліктері

      62. Қорғаныстық тапсырыс шеңберінде әскери мақсаттағы тауарларды (өнімді), қосарланған мақсаттағы (қолданыстағы) тауарларды (өнімді) әскери мақсаттағы орындалатын жұмыстарды және әскери мақсаттағы көрсетілетін қызметтерді сатып алу туралы шешім қабылдаған кезде арнаулы мемлекеттік органдар мемлекеттік қорғаныстық тапсырысқа енгізуге жататын қорғаныстық тапсырыс өнімінің тізбесін өздерінің бюджеттік өтінімдерінің құрамында айқындайды.

      63. Арнаулы мемлекеттік органдар тиісті жоспарлы кезеңге арналған республикалық бюджетті қалыптастыру кезінде отандық тауар өндірушілер, жұмыстарды, көрсетілетін қызметтерді отандық берушілер және/немесе уәкілетті ұйым арасынан орындаушыларды таңдауды жүзеге асырады.

      64. Арнаулы мемлекеттік органдар орындаушыны таңдауды талап етілетін сападағы қорғаныстық тапсырыс өнімін неғұрлым тиімді экономикалық жағдайларда қамтамасыз ету қабілетіне сүйене отырып жүргізеді.

      65. Қорғаныстық тапсырыс шеңберінде мемлекеттік құпияларды құрайтын мәліметтермен жұмыс істеу қажет болған кезде әскери мақсаттағы тауарларды (өнімді), қосарланған мақсаттағы (қолданыстағы) тауарларды (өнімді) отандық өндірушілерде (бұдан әрі – отандық тауар өндіруші), жұмыстарды, көрсетілетін қызметтерді отандық берушілерде және/ немесе уәкілетті ұйымда мемлекеттік құпияларды құрайтын мәліметтерді пайдалана отырып, жұмыстар жүргізуге рұқсаттаманың болуы ескеріледі.

      66. Орындаушыларды таңдау мақсатында арнаулы мемлекеттік органдар қаржы жылының алдындағы жылғы 30 қарашадан кешіктірмей отандық тауар өндірушілерге және/немесе жұмыстарды, көрсетілетін қызметтерді отандық берушілерге және/немесе уәкілетті ұйымға қорғаныстық тапсырыс өнімін сатып алу ниеті туралы сұрау салу жолдайды.

      67. Сұрау салу мынадай мәліметтерді:

      1) сатып алынатын қорғаныстық тапсырыс өнімінің атауын және техникалық тапсырмасын, стандарттарын (олар болған жағдайда);

      2) қорғаныстық тапсырыс өнімінің мөлшерін және/немесе көлемін;

      3) қорғаныстық тапсырыс өнімінің орнын және талап етілетін мерзімдерін;

      4) берілетін қорғаныстық тапсырыс өніміне кепілдік мерзімін;

      5) олардың құны қорғаныстық тапсырыс өнімінің құнына қосылуға тиіс ілеспе жұмыстар мен көрсетілетін қызметтердің тізбесін;

      6) төлем талаптарын, оның ішінде аванстық төлем мөлшерін;

      7) әскери және арнайы киiм нысанын, айырым белгiлерiн және жеке қорғану құралдарын сатып алу кезінде тәжірибелік үлгілерді ұсыну қажеттігі туралы талапты қамтиды.

      68. Отандық тауар өндірушілердің, жұмыстарды, көрсетілетін қызметтерді отандық берушілердің арнаулы мемлекеттік органдардың сұрау салуына жауап беруі сұрау салуды алған күннен бастап күнтізбелік отыз күннен кешіктірілмейтін мерзімде баға ұсынысын қоса бере отырып жүзеге асырылады.

      69. Қорғаныстық тапсырыс өнімінің жалғыз отандық берушісі болып табылатын отандық тауар өндіруші, жұмыстарды, көрсетілетін қызметтерді отандық беруші қорғаныстық тапсырыс өнімі құнының калькуляциясын қоса бере отырып, баға ұсынысын ұсынады.

      Қажет болған кезде отандық тауар өндіруші, жұмыстарды, көрсетілетін қызметтерді отандық беруші тактикалық-техникалық (техникалық) сипаттамалары сұрау салуда көрсетілгеннен де жақсы өнімді ұсынады.

      70. Арнаулы мемлекеттік органдар отандық тауар өндірушілер, жұмыстарды, көрсетілетін қызметтерді отандық берушілер арасынан орындаушыларды таңдауды мынадай өлшемшарттар бойынша жүзеге асырады:

      1) ұсынылатын қорғаныстық тапсырыс өнімі техникалық сипаттамаларының сұрау салу талаптарына сәйкестігі;

      2) Қазақстан Республикасының заңнамасында белгіленген жағдайларда қызметтің тиісті түрін жүзеге асыруға лицензияның болуы;

      3) сұрау салуда белгіленген көлемдегі қорғаныстық тапсырыс өнімін өндіру үшін қажетті өндірістік үй-жайлардың, технологиялық жабдықтардың және білікті мамандардың болуы;

      4) әскери және арнайы киiм нысанын, жеке қорғану құралдарын шығару саласында маманданатын орындаушылар үшін сұрау салуда белгіленген көлемдегі қорғаныстық тапсырыс өнімін өндіру үшін қажетті меншік құқығында өндірістік (қоймалық) үй-жайлардың және технологиялық жабдықтардың, білікті мамандардың болуы.

      71. Орындаушыларды таңдау ең төмен баға және уәкілетті ұйым жүзеге асыратын жоюды қоспағанда, арнаулы мемлекеттік органдардың сұрау салуында көрсетілген талаптарға сәйкес келетін қорғаныстық тапсырыс өнімін ұсынған отандық тауар өндірушілер, жұмыстарды, көрсетілетін қызметтерді отандық берушілер арасынан жүзеге асырылады.

      72. Мемлекеттің ұлттық қауіпсіздігі саласындағы іргелі жəне қолданбалы ғылыми зерттеулердің тақырыбын, орындаушыларын және құнын айқындау, сондай-ақ осы зерттеулерге сараптама жүргізу арнаулы мемлекеттік органның бірінші басшысы бекіткен тәртіппен жүзеге асырылады.

      73. Отандық тауар өндірушілер, жұмыстарды, көрсетілетін қызметтерді отандық берушілер қорғаныстық тапсырысты орындауы мүмкін болмаған жағдайда, олар арнаулы мемлекеттік органдардың атына жауап беруді сұрау салуды алған күннен бастап күнтізбелік он күннен кешіктірілмейтін мерзімде жүзеге асырады.

      74. Уәкілетті ұйым сұрау салуды алған күннен бастап күнтізбелік қырық күннен кешіктірілмейтін мерзімде тиісті қорғаныстық тапсырыс өнімін беру мүмкіндігі не мүмкін еместігі туралы жауап береді, сондай-ақ кемінде екі баға ұсынысын не қорғаныстық тапсырыс өнімінің шетелдік өндірушісі талап етілетін өнімнің жалғыз өндірушісі болып табылғанда бір баға ұсынысын қоса бере отырып, оның болжамды бағасын ұсынады.

      75. Егер уәкілетті ұйым көрсетілген мерзімде арнаулы мемлекеттік органдарға жауап бермеген не жауап сұрау салу талаптарына сәйкес келмеген жағдайда, уәкілетті ұйымды қорғаныстық тапсырысты орындаушы ретінде таңдау мүмкін емес деп танылады.

      76. Арнаулы мемлекеттік органдар ағымдағы қаржы жылындағы

      10 сәуірден кешіктірмей мынадай құжаттарды:

      1) қызметтің тиісті түрін жүзеге асыруға лицензияларды, өндіріс қуатын;

      2) қорғаныстық тапсырыс өнімін өндіру үшін қажетті технологиялық жабдықты, еңбек ресурстарын;

      3) қорғаныстық тапсырыс өніміне баға белгілеу мәселелері бойынша құжаттарды тексеруді аяқтайды.

      77. Арнаулы мемлекеттік органдар Қазақстан Республикасының бюджет заңнамасында белгіленген тәртіппен тиісті жоспарлы кезеңге арналған қорғаныстық тапсырыс өніміне бюджеттік өтінімдерді бюджеттік жоспарлау жөніндегі уәкілетті органға енгізеді.

      78. Арнаулы мемлекеттік органдар ағымдағы қаржы жылындағы 1 желтоқсаннан кешіктірмей қорғаныстық тапсырыс өніміне нақтыланған өтінімді уәкілетті органға осы Қағидаларға 1-қосымшаға сәйкес нысан бойынша ұсынады.

      79. Өтінімдер үш жылдық кезеңге арналған республикалық бюджетте көзделген бағдарламалар, кіші бағдарламалар бөлінісінде ұсынылады.

      80. Өтінімді арнаулы мемлекеттік органның бірінші басшысы немесе өтінімге қол қоюға уәкілетті адам бекітеді.

4-тарау. Тізілімді қалыптастыру, бекіту және жүргізу

      81. Тізілімді қалыптастыру, бекіту және жүргізу қорғаныстық тапсырысты қалыптастырудың және орналастырудың құрамдас бөлігі болып табылады және оны уәкілетті орган жүзеге асырады.

      82. Тізілім осы Қағидаларға 2-қосымшаға сәйкес нысан бойынша жүргізіледі.

      83. Осы Қағидаларда белгіленген талаптарға сәйкес келетін және осы Қағидалардың 89-тармағында көзделген құжаттардың толық жиынтығын ұсынған, Қазақстан Республикасының резиденттері болып табылатын отандық тауар өндірушілер, жұмыстарды, көрсетілетін қызметтерді отандық берушілер тізілімге енгізуге жатады.

      84. Қорғаныстық тапсырыс өнімін жалғыз отандық өндіруші болып табылатын ұйымдарды қоспағанда, мемлекеттік сатып алудың жосықсыз қатысушыларының тізіліміне енгізілген отандық тауар өндірушілер, жұмыстарды, көрсетілетін қызметтерді отандық берушілер тізілімге енгізуге жатпайды.

      85. Тізілімді қалыптастыру және жүргізу отандық тауар өндірушілерді, жұмыстарды, көрсетілетін қызметтерді отандық берушілерді тізілімге енгізу және одан алып тастау, сондай-ақ тізілімде олар туралы қамтылған мәліметтерге өзгерістер мен толықтырулар енгізу арқылы жүзеге асырылады.

      86. Тізілімді қалыптастыру және жүргізу қызмет бағыттары бойынша отандық тауар өндірушілер, жұмыстарды, көрсетілетін қызметтерді отандық берушілер тізілімге енгізу туралы (бұдан әрі – өтінім) берген өтінімдері негізінде осы Қағидаларға 3-қосымшаға сәйкес нысан бойынша жүзеге асырылады.

      87. Отандық тауар өндірушілер және жұмыстарды, көрсетілетін қызметтерді отандық берушілер өтінімдерді уәкілетті органға жыл сайын 20 қазанға және 20 сәуірге дейін береді.

      88. Өтінім уәкілетті органның талабы бойынша меншік құқығындағы өндірістік үй-жайларға, қуатына, өндірісті оқшауландыруға, технологиялық жабдықтарына және білікті мамандарына қатысты деректер бойынша құжаттарды беруіне, сондай-ақ ұйымға уәкілетті органның өкілдерін кіргізуге, олардың талаптары бойынша өтінімде көрсетілген өндірістік үй-жайларды, қуатын, технологиялық жабдығын және мамандарын көрсетуге отандық тауар өндірушінің, жұмыстарды, көрсетілетін қызметтерді отандық берушінің келісімін көздейді. Бұл келісім өтінім берілген күннен бастап тізілімде болған бүкіл кезеңге таралады.

      89. Өтінімге мынадай құжаттар:

      1) құрылтай құжаттарының нотариалды куәландырылған көшірмесі;

      2) заңды тұлғаның (филиалдың, өкілдіктің) мемлекеттік (есепке алу) тіркеу (қайта тіркеу) туралы куәлігінің көшірмесі не бизнес сәйкестендіру нөмірін көрсете отырып, мемлекеттік (есепке алу) тіркеу туралы анықтаманың көшірмесі;

      3) салықтық берешектің, міндетті зейнетақы жарналары және әлеуметтік аударымдар бойынша берешектің жоқтығын куәландыратын құжат;

      4) түсіндірме жазбаны қоса бере отырып, соңғы үш жылдағы жылдық бухгалтерлік теңгерім;

      5) "Рұқсаттар және хабарламалар туралы" 2014 жылғы 16 мамырдағы Қазақстан Республикасының Заңына сәйкес міндетті түрде лицензиялауға жататын қызметтің тиісті түрін жүзеге асыруға құқық беретін лицензияның және/немесе "Е-лицензиялау" www.elicense.kz. веб-порталынан лицензияның нотариус куәландырған көшірмесі;

      6) "Техникалық реттеу туралы" Қазақстан Республикасының Заңына сәйкес стандарттар (олар бар болған кезде);

      7) әскери, арнайы нысанды, жеке қорғану құралдарын шығаратындар (жеңіл өнеркәсіп) үшін сәйкестiк сертификаты (өнiмнiң, көрсетiлетiн қызметтiң техникалық регламенттерде белгiленген талаптарға, стандарттардың ережелерiне сәйкестiгiн куәландыратын), сондай-ақ сериялық шығарылатын өнімнің техникалық регламенттерде белгіленген (сертификат немесе сәйкестік туралы декларация) талаптарға сәйкестігін куәландыратын құжат;

      8) ғылыми зерттеулерді жүзеге асыру бөлігінде қорғаныстық тапсырысты орындауды жүзеге асыратын ұйымдарды қоспағанда, қорғаныстық тапсырыс өнімін өндіру үшін қажетті меншік құқығындағы өндірістік үй-жайлардың, қуаттың, технологиялық жабдықтардың және білікті мамандардың бар екенін куәландыратын құжат;

      9) тізілімге енгізу үшін өтінім берушінің қаражаты есебінен жүргізілгеніне өтінім берілгенге дейін жарты жыл өтпеген техникалық және қаржылық аудиттер қоса беріледі.

      90. Техникалық аудит индустриялық сертификатпен расталады.

      Алынған индустриялық сертификат тізілімге енгізу туралы өтінімді қарау үшін негіз болып табылады.

      Қаржылық аудит шығынға ұшыраған кәсіпорынның жоқ екенін анықтау мақсатында жүргізіледі.

      91. Тізілімге енгізуге арналған өтінімде қызметтің әрбір бағыты бойынша есеп-қисабы бар өндірісті оқшауландыру туралы ақпарат енгізіледі.

      92. Осы Қағидалардың 89–91-тармақтарында көзделген өтінім мен құжаттар қағаз түрінде беріледі. Өтінімде заңды тұлғаның электрондық мекенжайы және байланыс телефондары (кемінде үш) көрсетіледі.

      93. Өтінімді уәкілетті орган құратын комиссия (бұдан әрі – тізілімді қалыптастыру жөніндегі комиссия) осы Қағидалардың 89-тармағында көрсетілген құжаттарды ұсынған кезде күнтізбелік отыз күннен аспайтын мерзімде қарайды.

      94. Тізілімді қалыптастыру жөніндегі комиссия құрамына уәкілетті органның және алушылардың қызмет бағыттары бойынша қажетті танымдары бар лауазымды адамдары енгізіледі.

      95. Тізілімді қалыптастыру жөніндегі комиссия ұйымдарды тізілімге енгізу бойынша жылына екі реттен асырмай қарашада және мамырда, тізілімдегі олар туралы мәліметтерді алып тастау және оларға өзгерістер мен толықтырулар енгізу бойынша тиісті құжаттардың келіп түсуі шамасына қарай олар уәкілетті органға келіп түскен күннен бастап бір ай ішінде отырыстар өткізеді.

      96. Тізілімді қалыптастыру жөніндегі комиссияның шешімі тізілімге енгізу, одан алып тастау және оған өзгерістер енгізу үшін негіз болып табылады.

      97. Шешім дауыстардың қарапайым көпшілігімен қабылданады.

      98. Уәкілетті орган не тізілімді қалыптастыру жөніндегі комиссия осы Қағидалардың 89–91-тармақтарында көрсетілген құжаттардың сәйкес еместігін анықтаған жағдайда, уәкілетті орган бес жұмыс күні ішінде оларды жою үшін отандық тауар өндірушіні, жұмыстарды, көрсетілетін қызметтерді отандық берушіні хабардар етеді. Бұл ретте отандық тауар өндіруші, жұмыстарды, көрсетілетін қызметтерді отандық беруші хабарламаны алған күн деп электрондық түрде жолданған күннен кейінгі күн саналады.

      99. Отандық тауар өндіруші, жұмыстарды, көрсетілетін қызметтерді отандық беруші хабардар етілген күннен бастап үш жұмыс күні ішінде растайтын құжаттарды қоса бере отырып, анықталған кемшіліктерді жойғаны туралы уәкілетті органды жазбаша түрде хабар етеді.

      Көрсетілген мерзімде құжаттарды ұсынбау тізілімге енгізуден бас тартуға негіз болып табылады.

      100. Тізілімді қалыптастыру жөніндегі комиссия анықталған кемшіліктердің жойылғаны туралы хабарламаны алған күннен кейін бес жұмыс күні ішінде ұсынылған құжаттарды қайта қарайды, ал нәтижелері бойынша тізілімге енгізу не енгізуден бас тарту туралы шешім шығарады.

      101. Уәкілетті орган өтінімдерді қарау мерзімі аяқталғаннан кейін он бес жұмыс күні ішінде тізілімді қалыптастыру жөніндегі комиссияның шешімі негізінде тізілімді бекітеді немесе оған өзгерістер мен толықтырулар енгізеді.

      102. Тізілімге толықтырулар уәкілетті органның бұйрығымен жылына екі реттен асырмай, ағымдағы қаржы жылындағы қаңтарда және тамызда енгізіледі.

      Тізілімнен алып тастау, оған өзгерістер енгізу тізілімді қалыптастыру жөніндегі комиссия отырысы өткен күннен бастап он бес жұмыс күні ішінде жүргізіледі.

      103. Мынадай:

      1) қорғаныстық тапсырыс өнімін өндіру үшін қажетті жекеменшік құқығындағы өндірістік үй-жайлардың, қуаттың, технологиялық жабдықтардың, өндірісті оқшауландыру және білікті мамандардың болуы туралы ұйым ұсынған деректердің шынайы еместігі белгіленген, сондай-ақ осы деректер асыра көрсетілген;

      2) тізілімнен алып тастау туралы заңды күшіне енген сот шешімі болған не Қағидалардың осы тармағында айқындалған басқа да жағдайлар немесе бұзушылықтар белгіленген;

      3) олар мемлекеттік сатып алудың жосықсыз қатысушылары деп танылған;

      4) оны орындаушы ретінде таңдау үшін негіз болған техникалық тапсырма бойынша баға ұсынысын берген орындаушы орындаудан бас тартқан, сондай-ақ орындаушы шарт жасасудан бас тартқан және осы Қағидалардың 113-тармағында белгіленген шарттар жасасу мерзімдерін бұзған;

      5) шарт міндеттемелерінде айқындалған форс-мажорлық себептерді қоспағанда, қорғаныстық тапсырысты уақтылы, тиісінше орындамаған немесе сапасыз орындаған;

      6) жеке меншік құқығындағы өндірістік үй-жайларға, қуатқа, технологиялық жабдықтарға, өндірісті оқшауландыруға және білікті мамандарға қатысты өтінімде берілген деректер бойынша құжаттар беруден бас тартқан немесе уәкілетті орган өкілдері оларға барған кезде ұйымға кіргізуден бас тартқан;

      7) орындаушының кінәсі белгіленген кезде қорғаныстық тапсырыс өнімін қайтарудан және/немесе рекламацияда көрсетілген жарамсыздықты жоюдан бас тартқан;

      8) қорғаныстық тапсырыста белгіленген баға мен орындаушының пайдасын ескере отырып, іс жүзіндегі шығындар айырмашылығын ерікті түрде қайтарудан бас тартқан жағдайларда ұйымдар тізілімнен алып тастауға жатады.

      Қорғаныстық тапсырыс өнімін жалғыз өндіруші болып табылатын кәсіпорындар тізілімнен алып тастауға жатпайды.

      Осы тармақтың 1) тармақшасында көрсетілген бұзушылық ұйымды тізілімнен анық емес деректерді ұсыну фактісі анықталған күннен бастап бір жылға алып тастауға әкеп соқтырады.

      Осы тармақтың 2) тармақшасында көрсетілген жағдай, егер сот шешімінде өзгеше көрсетілмесе, сот шешімі заңды күшіне енген күннен бастап бір жылға ұйымды тізілімнен алып тастауға әкеп соқтырады.

      Осы тармақтың 3) тармақшасында көрсетілген жағдай ұйым Мемлекеттік сатып алушылардың жосықсыз қатысушылары тізіліміне енгізілген күннен бастап Мемлекеттік сатып алушылардың жосықсыз қатысушылары тізіліміне енгізілген барлық кезеңде ұйымды тізілімнен алып тастауға әкеп соқтырады.

      Осы тармақтың 4) тармақшасында көрсетілген бұзушылық уәкілетті органнан не алушыдан шарт жобасы жіберілген күннен бастап бір жылға дейінгі мерзімде ұйымды тізілімнен алып тастауға әкеп соқтырады.

      Осы тармақтың 5-8) тармақшаларында көрсетілген бұзушылықтар тізілімді қалыптастыру жөніндегі комиссия тізілімнен алып тастау туралы шешім қабылдаған күннен бастап бір жыл мерзімге ұйымды тізілімнен алып тастауға әкеп соқтырады.

      104. Осы Қағидалардың 91-тармағында көрсетілген құжаттар өзгерген кезде, сондай-ақ қорғаныстық тапсырыс өнімін өндіру үшін қажетті жеке меншік құқығындағы өндірістік үй-жайлардың, қуаттың, технологиялық жабдықтардың, өндірісті оқшауландырудың және білікті мамандардың көлемі және/немесе саны азайған кезде тізілімге енгізілген ұйым үш жұмыс күні ішінде ол туралы уәкілетті органды тиісті құжаттарды қоса бере отырып, хабардар етеді.

      Осы тармақта көрсетілген өзгерістер енгізілгеннен кейін бір ай ішінде отандық тауар өндіруші, жұмыстарды, көрсетілетін қызметтерді отандық беруші уәкілетті органға қаржылық және техникалық аудит нәтижелерін жолдайды.

      Тізілімге енгізілген ұйым қорғаныстық тапсырыс өнімін өндіру үшін қажетті жеке меншік құқығындағы өндірістік үй-жайлардың, қуаттың, технологиялық жабдықтардың, өндірісті оқшауландыру көлемінің және/немесе білікті мамандар санының ұлғайғаны туралы уәкілетті органды қаржылық және техникалық аудит нәтижелерін қоса бере отырып, өзінің қалауы бойынша хабардар етеді.

      105. Құжаттарды қарау нәтижелері бойынша тізілімді қалыптастыру жөніндегі комиссия мынадай:

      1) тізілімге енгізу;

      2) тізілімге енгізуден бас тарту;

      3) тізілімнен алып тастау;

      4) тізілімдегі ұйым туралы мәліметтерге өзгерістер мен толықтырулар енгізу не енгізбеу;

      5) осы Қағидалардың 98-тармағына сәйкес құжаттарды толық пысықтауға жолдау жөніндегі шешімдердің бірін шығарады.

      Тізілімді қалыптастыру жөніндегі комиссияның шешімі хаттамамен ресімделеді.

      106. Тізілімді бекітілген, сондай-ақ оған өзгерістер мен толықтырулар енгізілген күннен бастап он жұмыс күні ішінде уәкілетті орган тиісті ұйымдардың мекенжайына, оларға қатысты бөлігінде, сондай-ақ мүдделі алушыларға тізілімге енгізгені не енгізуден бас тартқаны, енгізілген өзгерістер мен толықтырулар туралы хабарлама жолдайды. Бұл ретте отандық тауар өндіруші, жұмыстарды, көрсетілетін қызметтерді отандық беруші хабарламаны алған күн деп электрондық пошта арқылы жөнелтілген күннен кейінгі күн саналады.

      107. Уәкілетті орган тізілімге енгізілген ұйымдардың өндіріс базасының тіркелу орны және/немесе орналасу орнына бара отырып, өтінімде берілген деректердің сәйкестігіне мониторингілеуді жүзеге асырады. Өкілдер ұйымдарға барған кезде өндірістік үй-жайлардың, қуаттың, технологиялық жабдықтардың, өндірісті оқшауландырудың бар-жоғын қарайды және тізілімге енгізу үшін өтінімде берілген құжаттардың түпнұсқасын сұратады.

      108. Егер мониторинг нәтижелері бойынша ұйымның өтінімінде қорғаныстық тапсырыс өнімін өндіру үшін қажетті жеке меншік құқығындағы өндірістік үй-жайлардың, қуаттың, технологиялық жабдықтардың, өндірісті оқшауландырудың және білікті мамандардың болуы туралы анық емес деректер фактісі анықталған кезде, сондай-ақ осы деректер асыра көрсетілгенде, ұйымды тізілімнен алып тастау туралы материалдар тізілімді қалыптастыру жөніндегі комиссияның қарауына жіберіледі.

      Сондай-ақ тізілімге енгізілген ұйымға бару ұйым ұсынған анық емес деректер фактісі анықталғаны туралы алушылардың немесе әскери өкілдердің жазбаша хабарламасы бойынша жүзеге асырылады.

      109. Тізілімді қалыптастыру жөніндегі комиссия шешіміне уәкілетті органға Қазақстан Республикасының заңнамасында белгіленген тәртіппен шағым жасалады.

5-тарау. Қорғаныстық тапсырысты орындау

      110. Қорғаныстық тапсырысты орындау уәкілетті орган немесе алушы және орындаушы арасында жасалған қорғаныстық тапсырысты орындауға арналған шарт негізінде жүзеге асырылады.

      111. Қорғаныстық тапсырысты орындауға арналған шарт жобалары алушының немесе қаражат уәкілетті органда болғанда уәкілетті органның бірінші басшысы бекітетін қорғаныстық тапсырысты орындауға арналған үлгілік шартқа сәйкес жасалады.

      112. Қорғаныстық тапсырысты орындауға арналған үлгілік шартта мынадай мәліметтер:

      1) кіріспе;

      2) шарттың мәні;

      3) шарттың қолданылу мерзімі және/немесе шарттың жекелеген кезеңдерінің мерзімі;

      4) шарттың және аванс болған жағдайда оның сомасы;

      5) сапаны бақылау талаптары;

      6) қабылдап алу талаптары, беру (орындау қызмет көрсету) орны мен мерзімі;

      7) тұрақсыздық айыбының (айыппұл, өсімпұл) мөлшері;

      8) шартты бұзу немесе тоқтату үшін негіздеме;

      9) тараптардың жауапкершілігі;

      10) қорғаныстық тапсырыс өнімін бергені үшін толық ақы төлеу талаптары;

      11) Қазақстан Республикасының салық заңнамасы талаптарына сәйкес қосылған құн салығын төлеу талаптары;

      12) рекламация қою және қанағаттандыру талаптары;

      13) Қазақстан Республикасының заңнамасына қайшы келмейтін өзге де талаптар қамтылуға тиіс.

      113. Қорғаныстық тапсырысты орындауға арналған шарттарды жасасу рәсімдері қорғаныстық тапсырыс бекітілген күннен бастап отыз жұмыс күнінен аспауға тиіс.

      114. Қорғаныстық тапсырысты орындау сапасын бақылауды әскери өкілдіктер Қазақстан Республикасының Үкіметі белгілеген тәртіппен жүзеге асырады.

      115. Егер орындаушы ұйымдарда әскери өкілдіктер құрылмаған жағдайда, алушы қорғаныстық тапсырыстың орындалу сапасын бақылауды жүзеге асыру үшін өз өкілдерін жіберуге құқылы.

      116. Алушының өкілдері қорғаныстық тапсырыстың орындалу сапасын бақылауды "Қорғаныс өнеркәсібі және мемлекеттік қорғаныстық тапсырыс туралы" Қазақстан Республикасы Заңының талаптарына сәйкес жүзеге асырады.

      117. Қорғаныстық тапсырыстың орындалу сапасын бақылауды жүзеге асыру нәтижелері бойынша қорғаныстық тапсырыс өнімінің шарт талаптарына сәйкестігі фактісі расталған кезде, әскери өкілдіктер қорғаныстық тапсырыс өнімінің шарт талаптарына сәйкестігі туралы акт жасайды.

      Әскери өкілдіктің куәлігі және/немесе қорғаныстық тапсырыс өнімінің шарт талаптарына сәйкестігі туралы акт қорғаныстық тапсырыс өнімінің сапасын растайтын құжат болып табылады.

6-тарау. Қорғаныстық тапсырыс шеңберінде бюджет қаражаты уәкілетті органның бюджетінде көзделген жағдайда, қорғаныстық тапсырысты орындау ерекшеліктері

      118. Қорғаныстық тапсырыс шеңберінде бюджет қаражаты уәкілетті органның бюджетінде көзделген жағдайда, қорғаныстық тапсырысты орындау уәкілетті орган мен орындаушы арасында алушының пайдасына жасалған шарт негізінде жүзеге асырылады.

      119. Алушының пайдасына қорғаныстық тапсырысты орындауға арналған шарттардың жобалары үш данада қорғаныстық тапсырысты орындауға арналған үлгілік шартқа сәйкес жасалады.

      120. Уәкілетті орган алушының пайдасына жасасатын қорғаныстық тапсырысты орындауға арналған шарттарда осы Қағидалардың 112-тармағында көзделген мәліметтерді қоспағанда, алушы туралы мәліметтер, сондай-ақ оның қорғаныстық тапсырыс өнімін қабылдап алумен байланысты міндеттемелері көрсетіледі.

      121. Бақылау көлемін, сондай-ақ орындаушы ұйымдарда аккредиттелген әскери өкілдіктердің бар-жоғын айқындау мақсатында, уәкілетті орган қорғаныстық тапсырысты орындауға арналған шарт жобасын Қазақстан Республикасы Қорғаныс министрлігінің Әскери өкілдіктер орталығына келісу үшін жолдайды.

      122. Қазақстан Республикасы Қорғаныс министрлігінің Әскери өкілдіктер орталығы қорғаныстық тапсырысты орындауға арналған шарт жобасы ол келіп түскен күннен бастап күнтізбелік он күн ішінде келіседі.

      123. Уәкілетті орган алушының пайдасына жасаған қорғаныстық тапсырысты орындауға арналған шарт шеңберінде берілетін қорғаныстық тапсырыс өнімінің сапасы шарт талаптарына сәйкес келуге тиіс.

      124. Уәкілетті орган алушының пайдасына жасасқан қорғаныстық тапсырысты орындауға арналған шарт бойынша қорғаныстық тапсырысты орындау сапасын бақылауды әскери өкілдіктер Қазақстан Республикасының Үкіметі бекіткен тәртіппен жүзеге асырады.

      125. Орындаушы ұйымдарда әскери өкілдіктер құрылмаған жағдайда уәкілетті орган қорғаныстық тапсырыс өнімі сапасының шарт талаптарына сәйкестігін бақылауды жүзеге асыру үшін оларға өз өкілдерін жіберуге құқылы.

      126. Егер қорғаныстық тапсырыс өнімінің шарт талаптарына сәйкестігін бақылауды жүзеге асыру үшін сатып алынатын өнім саласындағы арнайы таным, тәжірибе және біліктілік қажет болған жағдайда, уәкілетті орган мамандарды, оның ішінде алушының пайдасына қорғаныстық тапсырысты орындауға арналған шарт жасасқан оның мамандарын тартады.

      Алушының мамандарын тарту алушының келісімімен жүзеге асырылады.

      Қорғаныстық тапсырыс өнімінің шарт талаптарына сәйкестігін бақылауды жүзеге асыру үшін алушының мамандарын іссапарға жіберу алушының қаражаты есебінен жүзеге асырылады.

      Қорғаныстық тапсырыс өнімінің шарт талаптарына сәйкестігін бақылауды жүзеге асыру үшін алушының мамандарын тарту мақсатында уәкілетті орган тиісті алушының атына сұрау салу жолдайды.

      127. Алушы сұрау салуды алған күннен бастап бес жұмыс күні ішінде уәкілетті органның атына қорғаныстық тапсырыс өнімінің шарт талаптарына сәйкестігін тексеру үшін тағайындалған өз өкілдері туралы мәліметтерді жібереді.

      128. Уәкілетті орган өкілдері қорғаныстық тапсырыс өнімінің шарт талаптарына сәйкестігін бақылауды шарт талаптарында көзделген қорғаныстық тапсырыс өнімінің сапасын растайтын құжаттар негізінде жүзеге асырады.

      129. Егер қорғаныстық тапсырыс өнімінің сапасын растайтын құжаттарды зерделеу нәтижесі бойынша қорғаныстық тапсырыс өнімінің шарт талаптарына сәйкестігі фактісі расталған жағдайда, уәкілетті орган өкілдері қорғаныстық тапсырыс өнімінің шарт талаптарына сәйкестігі туралы акт жасайды.

      130. Әскери өкілдіктің куәлігі және/немесе қорғаныстық тапсырыс өнімінің шарт талаптарына сәйкестігі туралы акт қорғаныстық тапсырыс өнімінің сапасын растайтын құжат болып табылады.

      131. Уәкілетті орган алушының пайдасына жасаған қорғаныстық тапсырысты орындауға арналған шартты орындау шеңберінде берілетін қорғаныстық тапсырыс өнімін қабылдап алуды алушы әскери өкілдіктің куәлігі және/немесе қорғаныстық тапсырыс өнімінің шарт талаптарына сәйкестігі туралы акті негізінде атауы, саны және/немесе жиынтығы бойынша жүзеге асырады.

      132. Қорғаныстық тапсырыс өнімін қабылдап алумен байланысты міндеттемелерді орындау үшін уәкілетті орган орындаушымен шарт жасасқан күннен бастап бес жұмыс күні ішінде шарттың бір данасын алушының атына жібереді.

      133. Қорғаныстық тапсырыс өнімін қабылдап алушы алушының ведомствосы (пайдаланушы және/немесе сақтау қоймасы) болып табылған жағдайда, мемлекеттік орган болып табылатын алушы шарттың көшірмесін тікелей алушының атына жолдайды және қорғаныстық тапсырыс өнімін қабылдап алу бөлігінде міндеттемелерді шарт талаптарына сәйкес орындауды қамтамасыз етеді.

      134. Алушыға қорғаныстық тапсырыс өнімін беру үшін орындаушы қорғаныстық тапсырыс өнімін бергенге дейін кемінде күнтізбелік жиырма күн ішінде уәкілетті органды және алушыны жеткізудің жоспарлы күні туралы хабардар етеді.

      135. Қорғаныстық тапсырыс өнімін берудің жоспарлы күні туралы орындаушының хабарламасы негізінде алушы мыналарды:

      1) орындаушының, уәкілетті органның өкілдерін және әскери өкілдерді алушының аумағына кіргізуді;

      2) егер техникалық тапсырма талаптарында және/немесе шарт талаптарында өзгеше айтылмаса, қорғаныстық тапсырыс өнімін қабылдап алу үшін қосымша жұмыстарды орындау (қосымша қызметтер көрсету) қажет болғанда жағдайда, осы жұмыстарды (көрсетілетін қызметтерді) орындау үшін орын дайындауды;

      3) егер техникалық тапсырма талаптарында және/немесе шарт талаптарында өзгеше айтылмаса, шарт талаптарына сәйкес қорғаныстық тапсырыс өнімін қабылдап алу үшін қорғаныстық тапсырыс өнімін тексеруді (сынауды) жүзеге асыру қажет болған жағдайда, тексеру (сынау) жүргізу үшін орын дайындауды;

      4) егер техникалық тапсырма талаптарында және/немесе шарт талаптарында өзгеше айтылмаса, шарт талаптарына сәйкес қорғаныстық тапсырыс өнімін тиісті жабдықта (бақылау-тексеру аппаратурасында) тексеру көзделген жағдайда, осы жабдықты (бақылау-тексеру аппаратурасын) дайындауды қамтамасыз етеді.

      Бұл ретте алушының жабдығы (бақылау-тексеру аппаратурасы) іске қосылған, қорғаныстық тапсырыс өнімін тексеру үшін оны қолдану мүмкіндігін растайтын тиісті құжаттамасы болуға тиіс.

      136. Егер қорғаныстық тапсырыс өнімін беру сәтінде алушы осы Қағидалардың 135-тармағында көзделген іс-шараларды орындауды қамтамасыз етпеген жағдайда, алушы қорғаныстық тапсырыс өнімін тиісті жағдайлар жасалғанға дейін жауапты сақтауға қабылдайды.

      Бұл ретте қабылдап алуды жүзеге асыру үшін тиісті жағдайларды қамтамасыз ету мерзімі шарт талаптарына сәйкес қорғаныстық тапсырыс өнімі беру орнына жеткізілген күннен бастап он жұмыс күнінен аспауға тиіс.

      137. Алушы тауар сапасын растайтын әскери өкілдіктің куәлігі және/немесе қорғаныстық тапсырыс өнімінің шарт талаптарына сәйкестігі туралы акт негізінде қорғаныстық тапсырыс өнімін атауы, саны және/немесе жиынтығы бойынша беру күнінен бастап бес жұмыс күні ішінде қабылдайды.

      138. Қабылдап алу нәтижелері бойынша қорғаныстық тапсырыс өнімінің атауы, саны және/немесе жиынтығы шарт талаптарына сәйкес келмеу фактісі расталған кезде, алушы ол туралы уәкілетті органды хабардар етеді, анықталған кемшіліктер туралы акт жасайды және оны орындаушыға береді.

      139. Алушы анықтаған кемшіліктер туралы акт жасаған күннен бастап он жұмыс күні ішінде орындаушы кемшіліктерді жоюды қамтамасыз етеді.

      Бұл ретте орындаушы кемшіліктерді жойғанға дейін алушы берілген өнімді уақытша сақтауға қабылдайды.

      140. Егер орындаушы он жұмыс күні өткеннен кейін кемшіліктерді жоймаған жағдайда, алушы өнімді орындаушыға қайтаруды жүзеге асырады және уәкілетті органның атына тиісті хабарлама жібереді.

      141. Егер қабылдап алу нәтижелері бойынша қорғаныстық тапсырыс өнімі атауының, санының және/немесе жиынтығының шарт талаптарына сәйкестігі расталған жағдайда, алушы қорғаныстық тапсырыс өнімін шарт талаптарында көзделген құжаттарға қол қою арқылы қабылдайды.

      142. Уәкілетті орган алушының пайдасына тауарды беру шарты бойынша төлемдерді жүзеге асырған күннен бастап бес жұмыс күні ішінде алушының атына бюджетті атқару жөніндегі орталық уәкілетті орган бекіткен нысан бойынша жауап хабарлама жібереді.

      143. Алушы тауарды қабылдап алу-тапсыру актісіне қол қойған күннен бастап бес жұмыс күні ішінде уәкілетті органның атына бюджетті атқару жөніндегі орталық уәкілетті орган бекіткен нысан бойынша алынған құндылықтарды есепке алу туралы хабарлама жібереді.

      144. Қорғаныстық тапсырысты орындау жұмыстарды орындауға (қызметтерді көрсетуге) арналған шарт негізінде жүзеге асырылған жағдайда, алушы уәкілетті органнан шарттың бір данасын алған күннен бастап күнтізбелік он бес күн ішінде қару-жарақты, әскери техниканы және/немесе өзге де мүлікті (бұдан әрі – ҚӘТ) дайындауды және орындаушыға тапсыруды қамтамасыз етеді.

      145. Жұмыстарды орындау (қызметтерді көрсету) үшін ҚӘТ-ті қабылдап алу-тапсыру іс жүзінде қолда бары және іс жүзінде жиынтықталуы бойынша жүзеге асырылады және техникалық жай-күйі бойынша қабылдап алу-тапсыру актісімен ресімделеді, оған алушының және орындаушының өкілдері арасында қол қойылады.

      146. ҚӘТ-ті алушыдан жұмыстарды орындау (қызметтерді көрсету) орнына дейін тасымалдау, егер өзге шартта айтылмаса, алушының күшімен және есебінен жүзеге асырылады.

      ҚӘТ-ті жұмыстарды орындағаннан (қызметтерді көрсеткеннен) кейін алушыға дейін тасымалдау, егер шартта өзге жағдайлар айтылмаса, орындаушының күшімен және есебінен жүзеге асырылады.

      Қажет болған жағдайда алушы ҚӘТ-ті тасымалдау процесінде сүйемелдеуді қамтамасыз етеді.

      147. Қорғаныстық тапсырыс өнімінің, оның ішінде жұмыстар орындалғаннан (қызметтер көрсетілгеннен) кейін ҚӘТ-ті қабылдап алу кезінде сапасына қатысты айқындалмаған наразылықтарды алушы орындаушыға кепілдік мерзімі ішінде білдіреді.

      148. Егер жұмыстарды орындау (қызметтерді көрсету) нәтижелері бойынша ҚӘТ-тің теңгерім құнын ұлғайту қажет болған жағдайда, алушы жұмыстарды орындау (қызметтерді көрсету) актісіне және ҚӘТ-ті қабылдап алу-тапсыру актісіне қол қойған күннен бастап бес жұмыс күні ішінде уәкілетті органның атына бюджетті атқару жөніндегі орталық уәкілетті орган бекіткен нысан бойынша алынған құндылықтарды есепке алу туралы хабарлама жібереді.

      149. Уәкілетті орган жұмыстарды орындауға (қызметтерді көрсетуге) арналған шарт бойынша төлемдерді жүзеге асырған күннен бастап бес жұмыс күні ішінде алушының атына бюджетті атқару жөніндегі орталық уәкілетті орган бекіткен нысан бойынша жауап хабарлама жібереді.

      150. Шартқа сәйкес алушының аумағында жұмыстар орындалған (қызметтер көрсетілген) жағдайда, жұмыстарды (көрсетілетін қызметтерді) қабылдап алуды алушы шартта белгіленген тәртіппен жүзеге асырады.

7-тарау. Уәкілетті ұйымның қорғаныстық тапсырысты орындауы

      151. Уәкілетті ұйым қорғаныстық тапсырысты орындауға арналған шарт негізінде қорғаныстық тапсырысты орындайды.

      152. Алушымен немесе уәкілетті органмен қорғаныстық тапсырысты орындауға арналған шарт жасасқаннан кейін, уәкілетті ұйым шетелдік өндірушілер немесе олардың ресми өкілдері арасында қорғаныстық тапсырысты орналастыру рәсімдерін бастайды.

      153. Уәкілетті ұйым қорғаныстық тапсырысты орналастыруды мынадай тәсілмен:

      1) тікелей шарт (келісімшарт) жасасу арқылы;

      2) баға ұсыныстарын сұрату арқылы жүзеге асырады.

      154. Тікелей шарт (келісімшарт) жасасу арқылы қорғаныстық тапсырысты орналастыру:

      1) егер сатып алатын өнімді жалғыз шетелдік өндіруші өндірсе;

      2) егер уәкілетті органмен немесе қорғаныстық тапсырысты алушымен жасалған шарттың техникалық ерекшелігі нақты атауды, тауар белгілерін немесе сатып алынатын өнімнің белгілі бір шетелдік өндірушіге тиесілілігіне нұсқайтын кез келген басқа да ақпаратты қамтыса;

      3) қорғаныстық тапсырыс өнімі Қазақстан Республикасы ратификациялаған халықаралық шарттар шеңберінде сатып алынған жағдайда жүзеге асырылады.

      155. Осы Қағидалардың 154-тармағында көзделген жағдайда, уәкілетті орган мен орындаушы арасында шарттар (келісімшарттар) жасасу рәсімдері уәкілетті органмен немесе алушымен шарт жасасқан күннен бастап күнтізбелік алпыс күннен аспауға тиіс.

      156. Осы Қағидалардың 154-тармағында көзделмеген қалған барлық жағдайда, қорғаныстық тапсырысты орналастыруды уәкілетті ұйым баға ұсыныстарын сұрату арқылы жүзеге асырады.

      157. Баға ұсыныстарына сұрау салу нарықты және бағаларды мониторингілеу нәтижелері бойынша уәкілетті ұйым айқындаған шетелдік өндірушілердің және/немесе олардың ресми өкілдерінің атына жіберіледі.

      158. Шет мемлекеттің заңнамасында қорғаныстық тапсырыс өніміне қатысты сыртқы экономикалық қызметті жүзеге асыруға уәкілетті арнайы ұйым айқындалған жағдайда, уәкілетті ұйым сұрау салуды осы ұйымның атына жіберуі мүмкін.

      159. Уәкілетті ұйым нарықты және бағаларды мониторингілеуді тұрақты түрде, қару-жарақ пен әскери техника көрмесіне бару, БАҚ-та, интернет ресурстарда жарнамалық материалдарды, фирмалық каталогтарды зерделеу арқылы жүзеге асырады.

      160. Орындаушыны таңдау мақсатында уәкілетті ұйым уәкілетті органмен және/немесе қорғаныстық тапсырысты алушымен шарт жасасқан күннен бастап бес жұмыс күнінен кешіктірмей, шетелдік өндірушілердің және/немесе олардың қызмет бейіні қорғаныстық тапсырысты орындауға арналған шартқа техникалық ерекшелік талаптарына сәйкес келетін ресми өкілдерінің атына баға ұсыныстарына сұрау салу жібереді.

      161. Уәкілетті ұйымның сұрау салуы мынадай мәліметтерді:

      1) сатып алынатын тауарлардың, жұмыстардың, көрсетілетін қызметтердің атауын және оларға техникалық тапсырманы;

      2) тауар санын, орындалатын жұмыстардың, көрсетілетін қызметтердің көлемін;

      3) тауарды беру, жұмыстарды орындау, қызметтерді көрсету орнын;

      4) тауарды берудің, жұмыстарды орындаудың, қызметтерді көрсетудің талап етілген мерзімін;

      5) берілетін тауарларға (өнімге), орындалатын жұмыстарға, көрсетілетін қызметтерге талап етілетін кепілдік мерзімін;

      6) қосымша көрсетілетін қызметтер тізбесін;

      7) төлеу шарттарын, соның ішінде аванстық төлем көлемін;

      8) әскери және арнайы киім нысанын, айырым белгілерін және жеке қорғану құралдарын сатып алған жағдайда, тәжірибелік үлгілерді ұсыну қажеттігі туралы талапты;

      9) өнім сапасының техникалық тапсырма талаптарына сәйкестігін растайтын құжаттарды ұсыну қажеттігі туралы талапты;

      10) баға ұсыныстарын ұсыну мерзімдерінің басталуы мен аяқталуы туралы мәліметтерді қамтиды.

      162. Баға ұсыныстарын ұсыну мерзімі он бес жұмыс күнінен кем болмауға тиіс.

      163. Сұрау салуда көрсетілген мерзім өткеннен кейін, сондай-ақ уәкілетті ұйымның тиісті сұрау салуынсыз келіп түскен шетелдік өндірушілердің немесе олардың ресми өкілдерінің баға ұсыныстары қаралмайды.

      164. Уәкілетті ұйымның сұрау салуы тауар белгілері, қызмет көрсету белгілері, фирмалық атаулары, патенттер, пайдалы модельдер, өндірістік үлгілері, тауар өндірілген орынның атауы және өндірушінің атауы көрсетілген, сондай-ақ өнімнің тиісті өндірушіге (орындаушыға) тиесілілігін айқындайтын өзге де ақпаратты қамтуы мүмкін.

      Сұрау салуға қорғаныстық тапсырысты алушымен немесе уәкілетті органмен жасалған қорғаныстық тапсырысты орындауға арналған шартқа техникалық ерекшелік қоса беріледі.

      165. Уәкілетті ұйымның сұрау салуына жауап ретінде шетелдік өндірушілер және/немесе олардың ресми өкілдері қорғаныстық тапсырысты орындау мерзімдері және қорғаныстық тапсырысты орындаудың өзге де талаптары туралы мәліметтерді қамтитын тек бір ғана баға ұсынысын ұсынады.

      166. Шетелдік өндірушілер және/немесе олардың ресми өкілдері баға ұсынысын ұсынуы олардың уәкілетті ұйымның сұрау салуында және техникалық ерекшелікте көзделген талаптарды сақтай отырып, тауарды беруге, жұмыстарды орындауға, қызметтерді көрсетуге келісім білдіру нысаны болып табылады.

      167. Баға ұсыныстарын ұсыну мерзімдері өткеннен кейін уәкілетті ұйым бес жұмыс күні ішінде баға ұсыныстарын салыстырады және қорғаныстық тапсырысты орындаушыны таңдауды жүзеге асырады.

      168. Уәкілетті ұйым қорғаныстық тапсырысты орындаушыны таңдауды мынадай өлшемшарттар бойынша жүзеге асырылады:

      1) өнімнің шарттың техникалық ерекшелігіне сәйкестігі;

      2) шетелдік өндіруші және/немесе оның ресми өкілі талаптарының (беру мерзімі, кепілдік мерзімі, аванстық төлем көлемі, қосымша қызметтер көрсету (жұмыстарды орындау) және т.б.) сұрау салу талаптарына және шартқа сәйкестігі;

      3) шетелдік өндірушінің және/немесе оның ресми өкілінің баға ұсынысының уәкілетті ұйым үшін рентабельділілікті ескере отырып, бөлінген сомаға сәйкестігі;

      4) қорғаныстық тапсырысты тиісінше орындау үшін шетелдік өндірушілердің ресми өкілдерінде өздерінің қаржы және еңбек ресурстарының болуы.

      169. Егер шетелдік өндірушілердің және/немесе оның ресми өкілдерінің баға ұсыныстары осы Қағидалардың 168-тармағында көрсетілген тең өлшемшарттарға сай келген жағдайда, ең төмен баға ұсынысын ұсынған шетелдік өндіруші және/немесе оның ресми өкілі орындаушы деп танылады.

      170. Егер ең төмен баға ұсынысын бірнеше шетелдік өндіруші (олардың ресми өкілдері) ұсынған жағдайда, уәкілетті ұйым қорғаныстық тапсырысты орындаушыны таңдауды мынадай қосымша өлшемшарттар бойынша жүзеге асырылады:

      1) сатып алынатын өнім нарығында жұмыс тәжірибесінің оң болуы;

      2) қалған әлеуетті орындаушылардың талаптарымен салыстырғанда талаптарының (беру мерзімдері, кепілдік мерзімі, технологиялық шешімдер, қолданылатын материалдар, аванстық төлем көлемі, қосымша қызметтер көрсету (жұмыстарды орындау) және т.б.) жақсы болып табылуы.

      171. Егер баға ұсыныстарын ұсыну мерзімі ішінде сұрау салу талаптарына сәйкес келетін тек бір ғана баға ұсынысы ұсынылғанда, уәкілетті ұйым қорғаныстық тапсырысты орындауға арналған шартты осы баға ұсынысын ұсынған әлеуетті орындаушымен жасасады.

      172. Әлеуетті орындаушының баға ұсынысы мынадай жағдайда:

      1) егер баға ұсынысы уәкілетті ұйымның рентабельділігін ескере отырып қорғаныстық тапсырыста көзделген сомадан артық болса;

      2) егер әлеуетті орындаушының ұсынысы сұрау салу талаптарына сәйкес келмесе, қайтаруға жатады.

      173. Баға ұсыныстарын салыстыру нәтижелері бойынша уәкілетті ұйым орындаушыны таңдайды және онымен қорғаныстық тапсырысты орындауға келісімшарт жасасады.

      174. Уәкілетті орган мен баға ұсыныстарын сұрату арқылы айқындалған орындаушылар арасында келісімшарттар жасасу рәсімдері уәкілетті ұйыммен немесе қорғаныстық тапсырысты алушымен шарт жасасқан күннен бастап күнтізбелік алпыс күннен аспауға тиіс.

      175. Осы Қағидалардың 174-тармағында көзделген мерзімде шарт жасасу мүмкін болмаған жағдайда, уәкілетті ұйым уәкілетті органның және/немесе қорғаныстық тапсырысты алушының атына кідіру себептері және келісімшарт жасасудың болжамды мерзімдері туралы хабарлама жібереді.

      176. Уәкілетті ұйымның хабарламасы негізінде уәкілетті орган және/немесе қорғаныстық тапсырысты алушы мынадай шешімдердің бірін шығарады:

      1) уәкілетті ұйым мен орындаушы арасындағы келісімшарт жасасу мерзімдері ұзартылсын;

      2) шартқа қосымша келісімге қол қою арқылы шартқа техникалық ерекшелік қайта қаралсын және уәкілетті ұйым мен орындаушы арасындағы шарт жасасу мерзімі ұзартылсын;

      3) қорғаныстық тапсырыстан тиісті қорғаныстық тапсырыс өнімі алып тасталсын.

8-тарау. Қорытынды ережелер

      177. Мемлекеттік тапсырыс берушілер осы Қағидаларға 4-қосымшаға сәйкес нысан бойынша тоқсан сайын есепті кезеңнен кейінгі айдың 25-күнінен кешіктірмей уәкілетті органға қорғаныстық тапсырыс іс-шараларының орындалуы туралы есепті, сондай-ақ қорғаныстық тапсырысты орындау кезінде мерзімдерді бұзу туралы есепті және жыл сайын 25 наурыздан кешіктірмей уәкілетті органға қорғаныстық тапсырыстың орындалуы, сондай-ақ қорғаныстық тапсырыс тапсырмаларының орындалмауының барлық фактілері туралы жылдық есептерді ұсынады.

      178. Уәкілетті орган жыл сайын 15 сәуірден кешіктірмей Қазақстан Республикасының Үкіметіне мемлекеттік қорғаныстық тапсырыстың орындалуы, сондай-ақ қорғаныстық тапсырыс тапсырмаларының орындалмауының барлық фактісі туралы жылдық есепті ұсынады.

      179. Қорғаныс өнеркәсібі және мемлекеттік қорғаныстық тапсырыс туралы Қазақстан Республикасының заңнамасын бұзу Қазақстан Республикасының заңдарында белгіленген жауаптылыққа әкеп соқтырады.

Қазақстан Республикасының мемлекеттік қорғаныстық тапсырысы құрамына кіретін әскери мақсаттағы тауарларды (өнімдерді), қосарланған мақсаттағы (қолданыстағы) тауарларды (өнімді), әскери мақсаттағы жұмыстар мен әскери мақсаттағы көрсетілетін қызметтерді сатып алу үшін 20___ - 20 ___ жылдарға арналған өтінім __________________________________________________________________ (мемлекеттік тапсырыс беруші)

      1-бөлім

      Қару-жарақты, əскери жəне арнайы техниканы, техникалық құралдарды, оқ-дəрілер мен əскери мақсаттағы тауарларды (өнімді) жəне қосарланған мақсаттағы (қолданыстағы) тауарларды (өнімді) өндіруге жəне сынауға арналған жабдықты шығару жəне беру

      ___________________________________________

      ___________________________________________

      Жиыны

2-бөлім

      Мемлекеттің қорғанысы мен ұлттық қауіпсіздігі саласындағы іргелі жəне қолданбалы ғылыми зерттеулер, əскери мақсаттағы тауарларды (өнімді) жəне қосарланған мақсаттағы (қолданыстағы) тауарларды (өнімді) шығару мен сынауға арналған мемлекеттік тапсырыс берушілердің жарақтандыруында тұрған қару-жарақтың, əскери жəне арнайы техниканың, техникалық құралдардың, оқ-дəрілердің және жабдықтың тəжірибелік үлгілерін әзірлеу, оларды жаңғырту бойынша ғылыми-зерттеу және тәжірибелік-конструкторлық жұмыстар

      ___________________________________________

      ___________________________________________

      Жиыны

3-бөлім

      Қару-жарақты, əскери жəне арнайы техниканы, техникалық құралдарды, оқ-дəрілерді және әскери мақсаттағы тауарларды (өнімді) жəне қосарланған мақсаттағы (қолданыстағы) тауарларды (өнімді) шығару жəне сынау үшін жабдықты жөндеу, жаңғырту жəне оларға регламенттелген техникалық қызмет көрсету

      ___________________________________________

      ___________________________________________

      Жиыны

4-бөлім

      Пайдаланылмайтын əскери мүлікті қатерсіздендіру

      ___________________________________________

      ___________________________________________

      Жиыны

5-бөлім

      Пайдаланылмайтын əскери мүлікті жəне арнаулы мемлекеттік жəне құқық қорғау органдарының пайдаланылмайтын мүлкін, сондай-ақ оларға жиынтықтауыштарды кəдеге жарату, құртып жіберу, көму арқылы жою, қайта өңдеу, өткізу

      ___________________________________________

      ___________________________________________

      Жиыны

6-бөлім

      Жобалау-сметалық құжаттаманы әзірлеу, әскери, арнайы объектілерді салу және жөндеу, сондай-ақ оларды күтіп ұстау жəне пайдалану бойынша көрсетілетін қызметтер

      ___________________________________________

      ___________________________________________

      Жиыны

7-бөлім

      Қарулы Күштердің, басқа да əскерлер мен əскери құралымдардың əскери қызметшілеріне жəне арнаулы мемлекеттік органдардың, азаматтық қорғау органдарының қызметкерлеріне арналған əскери жəне арнайы киім нысанын, айырым белгілерін және жеке қорғану құралдарын шығару

      ___________________________________________

      ___________________________________________

      Жиыны

      Әскери мақсаттағы тауарларды (өнімді), қосарланған мақсаттағы (қолданыстағы) тауарларды (өнімді) отандық өндірушілердің және әскери мақсаттағы жұмыстар мен әскери мақсаттағы көрсетілетін қызметтерді отандық берушілердің тізілімі

Мемлекеттік қорғаныстық тапсырыстың әскери мақсаттағы тауарларын (өнімін), қосарланған мақсаттағы (қолданыстағы) тауарларын (өнімін) отандық өндірушілер және әскери мақсаттағы жұмыстар мен әскери мақсаттағы көрсетілетін қызметтерді отандық берушілер тізіліміне енгізу туралы өтінім

      Кімнен____________________________________________________________

      __________________________________________________________________

      (заңды тұлғаның атауы)

      ___________________________________________________бағыты бойынша

      Өтініш беруші туралы мәліметтер:

      1) Ұйымдық-құқықтық нысаны _____________________________;

      2) Бірінші басшының Т.А.Ә. және байланыс телефондары ______________;

      3) Заңды мекенжайы, іс жүзіндегі мекенжайы ___________________________;

      4) Өндірістің іс жүзіндегі мекенжайы __________________________________;

      5) Электрондық мекенжайы___________________________________________;

      6) Кәсіпорынның бір жыл ішінде өнімді өндіру бойынша өндірістік қуаты

      ______________________________________________________;

      7) Өнімді оқшауландыру деңгейі ___________________________;

      8) БСН ____________________________________________________________;

      9) Банк деректемелері _____________________________________________;

      Өтінімге қоса берілетін құжаттар:

      1) _________________________________________________________________;

      2) _________________________________________________________________;

      3) _________________________________________________________________;

      (заңды тұлғаның атауы және басшының немесе сенімхат негізінде (сенімхат нөмірі және беру күні) әрекет ететін заңды тұлға өкілінің Т.А.Ә.)

      20 __ жылғы "____" ____________ М.О. (бар болса)

Мемлекеттік тапсырыс берушілердің қорғаныстық тапсырысты орындау жөніндегі есебінің нысаны

20__ жылға арналған қорғаныстық тапсырыстың орындалмауы туралы есеп

____________________________________________________________________ (мемлекеттік тапсырыс беруші)

Қазақстан Республикасы Үкіметінің күші жойылған кейбір шешімдерінің тізбесі

      1. "Қазақстан Республикасының мемлекеттік қорғаныстық тапсырысын қалыптастыру, орналастыру және орындау ережесін бекіту туралы" Қазақстан Республикасы Үкіметінің 2009 жылғы 29 желтоқсандағы № 2219 қаулысы (Қазақстан Республикасының ПҮАЖ-ы, 2010 ж., № 3, 21-құжат).

      2. "Қазақстан Республикасының мемлекеттік қорғаныстық тапсырысын қалыптастыру, орналастыру және орындау ережесін бекіту туралы" Қазақстан Республикасы Үкіметінің 2009 жылғы 29 желтоқсандағы № 2219 қаулысына өзгерістер мен толықтырулар енгізу туралы" Қазақстан Республикасы Үкіметінің 2012 жылғы 9 қарашадағы № 1423 қаулысы (Қазақстан Республикасының ПҮАЖ-ы, 2013 ж., № 79, 1153-құжат).

      3. "Қазақстан Республикасының мемлекеттік қорғаныстық тапсырысын қалыптастыру, орналастыру және орындау ережесін бекіту туралы" Қазақстан Республикасы Үкіметінің 2009 жылғы 29 желтоқсандағы № 2219 қаулысына өзгерістер енгізу туралы" Қазақстан Республикасы Үкіметінің 2013 жылғы 2 тамыздағы № 777 қаулысы (Қазақстан Республикасының ПҮАЖ-ы, 2013 ж., № 43, 640-құжат).

      4. 2020 жылғы 1 қаңтардан бастап "Мемлекеттік қорғаныстық тапсырысты орындау жөніндегі операторларды айқындау туралы" Қазақстан Республикасы Үкіметінің 2017 жылғы 30 қазандағы № 682 қаулысы (Қазақстан Республикасының ПҮАЖ-ы, 2017 ж., № 53, 339-құжат).

      5. "Қазақстан Республикасы Үкіметінің кейбір шешімдеріне өзгерістер мен толықтырулар енгізу туралы" Қазақстан Республикасы Үкіметінің 2017 жылғы 8 қарашадағы № 724 қаулысымен бекітілген Қазақстан Республикасы Үкіметінің кейбір шешімдеріне енгізілетін өзгерістер мен толықтырулардың 3-тармағы (Қазақстан Республикасының ПҮАЖ-ы, 2017 ж., № 58, 361-құжат).

      6. "Мемлекеттік қорғаныстық тапсырысты орындау жөніндегі операторлардың отандық тауар өндірушілер мен жұмыстарды, көрсетілетін қызметтерді отандық берушілер тізіліміне енгізілген ұйымдар арасынан мемлекеттік қорғаныстық тапсырысты орындаушыларды таңдауды жүзеге асыруы қағидаларын бекіту туралы" Қазақстан Республикасы Үкіметінің 2017 жылғы 29 қарашадағы № 788 қаулысы (Қазақстан Республикасының ПҮАЖ-ы, 2017 ж., № 64-65, 387-құжат).