Ескерту. Тақырыбы жаңа редакцияда – ҚР Үкіметінің 28.10.2019 № 804 (алғашқы ресми жарияланған күнінен кейін күнтізбелік жиырма бір күн өткен соң қолданысқа енгізіледі) қаулысымен.
"Қазақстан Республикасының Мемлекеттік шекарасы туралы" 2013 жылғы 16 қаңтардағы Қазақстан Республикасының Заңы 55-бабының 12-1) тармақшасына сәйкес Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Жер қойнауын пайдалану жөніндегі операцияларға және жер қойнауын пайдалану жөніндегі операцияларды қамтамасыз етуге тартылған қазақстандық және шетелдік кемелер мен қазақстандық әуе кемелерін бақылауды жүзеге асыру қағидалары бекітілсін.
Ескерту. 1-тармақ жаңа редакцияда – ҚР Үкіметінің 28.10.2019 № 804 (алғашқы ресми жарияланған күнінен кейін күнтізбелік жиырма бір күн өткен соң қолданысқа енгізіледі) қаулысымен.2. Осы қаулы алғашқы ресми жарияланған күнінен кейін күнтізбелік жиырма бір күн өткен соң қолданысқа енгізіледі.
Қазақстан Республикасының | |
Премьер-Министрі | Б.Сағынтаев |
| Қазақстан Республикасы | |
| Үкіметінің | |
| 2016 жылғы 2 желтоқсандағы | |
| № 759 қаулысымен | |
| бекітілген |
Жер қойнауын пайдалану жөніндегі операцияларға және жер қойнауын пайдалану жөніндегі операцияларды қамтамасыз етуге тартылған қазақстандық және шетелдік кемелер мен қазақстандық әуе кемелерін бақылауды жүзеге асыру қағидалары
Ескерту. Қағида жаңа редакцияда – ҚР Үкіметінің 28.10.2019 № 804 (алғашқы ресми жарияланған күнінен кейін күнтізбелік жиырма бір күн өткен соң қолданысқа енгізіледі) қаулысымен.
1-тарау. Жалпы ережелер
1. Осы Жер қойнауын пайдалану жөніндегі операцияларға және жер қойнауын пайдалану жөніндегі операцияларды қамтамасыз етуге тартылған қазақстандық және шетелдік кемелер мен қазақстандық әуе кемелерін бақылауды жүзеге асыру қағидалары (бұдан әрі – Қағидалар) "Қазақстан Республикасының Мемлекеттік шекарасы туралы" 2013 жылғы 16 қаңтардағы Қазақстан Республикасының Заңы (бұдан әрі – Заң) 55-бабының 12-1) тармақшасына сәйкес әзірленді және жер қойнауын пайдалану жөніндегі операцияларға және жер қойнауын пайдалану жөніндегі операцияларды қамтамасыз етуге тартылған қазақстандық және шетелдік кемелер (бұдан әрі – кемелер) мен қазақстандық әуе кемелеріне (бұдан әрі – әуе кемелері) Заңның 55-бабының 12-1) тармақшасына сәйкес Қазақстан Республикасының Үкіметі бекітетін жер қойнауын пайдалану жөніндегі операцияларға және жер қойнауын пайдалану жөніндегі операцияларды қамтамасыз етуге тартылған қазақстандық және шетелдік кемелер мен қазақстандық әуе кемелерінің Қазақстан Республикасының Мемлекеттік шекарасын бірнеше рет кесіп өтуіне рұқсаттар беру тәртібіне сәйкес Қазақстан Республикасы Ұлттық қауіпсіздік комитетінің Шекара қызметі (бұдан әрі – Шекара қызметі) берген Қазақстан Республикасының Мемлекеттік шекарасын бірнеше рет кесіп өтуге рұқсаттардың (бұдан әрі – рұқсат) шарттарын көрсетілген кемелердің сақтауы бөлігінде ғана бақылауды жүзеге асыру тәртібін айқындайды.
2. Рұқсат алған кемелерге қатысты бақылауды Шекара қызметі жүзеге асырады.
Рұқсат алған әуе кемелеріне қатысты бақылауды Шекара қызметі Қазақстан Республикасының Қарулы Күштерімен бірлесіп жүзеге асырады.
Заңның 70-бабы 1-тармағының 1) тармақшасына сәйкес Қазақстан Республикасы Қарулы Күштерінің Әуе қорғанысы күштері Қазақстан Республикасының Мемлекеттік шекарасын әуе кеңістігінде күзету кезінде Қазақстан Республикасының Мемлекеттік шекарасын кесіп өту тәртібінің сақталуын бақылауды жүзеге асырады.
3. Жер қойнауын пайдалану жөніндегі операцияларға және жер қойнауын пайдалану жөніндегі операцияларды қамтамасыз етуге тартылған кемелер және әуе кемелері тасымалдайтын жолаушылар дара кәсіпкер немесе заңды тұлға, филиал, өкілдік ұсынатын жолаушылар тізіміне сәйкес бақылаудан өтеді, оған Шекара қызметінің лауазымды адамы бақылаудан өткені туралы белгі қояды.
4. Жер қойнауын пайдалану жөніндегі операцияларға және жер қойнауын пайдалану жөніндегі операцияларды қамтамасыз етуге тартылған кемелер мен әуе кемелерімен тасымалданатын жүктер мен тауарлар Қазақстан Республикасының аумағына Еуразиялық экономикалық одақтың және Қазақстан Республикасының кеден заңнамасына сәйкес әкелінеді.
Қазақстан Республикасының аумағына Еуразиялық экономикалық одақтың және Қазақстан Республикасының кеден заңнамасының талаптары сақтала отырып әкелінген жүктер мен тауарларды Қазақстан Республикасының аумағынан Каспий теңiзiнiң қазақстандық секторының су кеңістігіне өткізу кедендiк бақылаусыз жүзеге асырылады.
2-тарау. Жер қойнауын пайдалану жөніндегі операцияларға және жер қойнауын пайдалану жөніндегі операцияларды қамтамасыз етуге тартылған кемелерді бақылауды жүзеге асыру тәртібі
5. Кеме порттан (орналасу пунктінен), теңіздегі өткізу пунктінен немесе Қазақстан Республикасының Мемлекеттік шекарасы арқылы өткізу жүзеге асырылатын өзге де орыннан Каспий теңізінің қазақстандық секторының су кеңістігіне шығар алдында, бірақ одан бұрын төрт сағаттан кешіктірмей, кеменің Каспий теңізінің қазақстандық секторының су кеңістігіне шығуын жоспарлайтын дара кәсіпкер немесе заңды тұлға, филиал, өкілдік немесе кеме капитаны (капитанның вахталық көмекшісі) жауапкершілік учаскесінде порт (орналасу пункті), теңіздегі өткізу пункті немесе Қазақстан Республикасының Мемлекеттік шекарасы арқылы өткізетін өзге де орны орналасқан Шекара қызметінің әскери бөліміне кеменің шығуға әзір екені туралы кез келген байланыс құралдары арқылы ауызша хабар береді және рұқсат беруге құжаттарды тапсырған кезде мәлімделген жүру жолы өзгерген жағдайда, кеменің жүру маршрутын нақтылайды.
6. Шекара қызметінің лауазымды адамдары кемеге келгеннен кейін кемені байқауды және қарап-тексеруді ұйымдастырады. Кеменің капитаны (капитанның вахталық көмекшісі) Шекара қызметінің лауазымды адамдарына рұқсатты, Шекара қызметі әскери бөлімінің командирі куәландырған кеме экипажының құрамын, кеме жолаушыларының тізімін және кеме экипажының мүшелері мен жолаушылардың жеке басын куәландыратын құжаттарды ұсынады.
Шекара қызметінің лауазымды адамдары құжаттарды ондағы мәліметтердің дұрыстығы мен олардың дұрыс ресімделуі тұрғысынан тексеріп, оларды кеменің капитанына (капитанның вахталық көмекшісіне) қайтарады.
7. Шекара қызметінің лауазымды адамдары мынадай құжаттардың да бар-жоғын тексереді:
1) кеменің Қазақстан Республикасының Мемлекеттiк Туын көтеріп жүзу құқығы туралы куәлiгiнің немесе шет мемлекеттің туын көтеріп жүзетін кемені Каспий теңізінің қазақстандық секторында пайдалануға рұқсат;
2) кеме журналы;
3) кеменің жабдықталу мен жарақталу қауіпсіздігі туралы куәлігі.
8. Шекара қызметінің лауазымды адамдары кеменің капитаны (капитанның вахталық көмекшісі) мен экипажы мүшелеріне ауызша сұрау жүргізеді, сондай-ақ капитанмен (капитанның вахталық көмекшісімен) бірлесіп, кемені қарап-тексеруді жүргізеді.
9. Бақылау аяқталғаннан кейін Шекара қызметінің лауазымды адамы рұқсатқа белгілер қояды. Шекара қызметінің лауазымды адамы жүргізілген іс-шаралардың нәтижелері туралы Шекара қызметінің әскери бөліміне байланыс құралдары арқылы ақпарат жібереді.
10. Кемелердің Каспий теңізінің қазақстандық секторының су кеңістігіне шығуы Шекара қызметі әскери бөлімінің лауазымды адамдары кемеде бақылауды аяқтағаннан кейін порттан (орналасу пунктінен), теңіздегі өткізу пунктінен немесе Қазақстан Республикасының Мемлекеттік шекарасы арқылы өтетін өзге де орыннан жүзеге асырылады.
Кемені Каспий теңізінің қазақстандық секторының су кеңістігіне шығаруды Шекара қызметі әскери бөлімінің командирі куәландырған кеме экипажының құрамына кіретін адамдар жүзеге асырады.
11. Каспий теңізінің қазақстандық секторының су кеңістігінде болған кезде рұқсатқа сәйкес мынадай талаптар орындалады:
1) кеме капитаны (капитанның вахталық көмекшісі) Шекара қызметінің әскери бөлімімен үнемі радиобайланыста болады, кеме тұрған географиялық координаталарын көрсете отырып, Қазақстан Республикасының Мемлекеттік шекарасын кесіп өтудің әр фактісі туралы хабардар етеді және ол туралы кеме журналына жазба жүргізеді;
2) кеменің орналасқан жері туралы ақпаратты үнемі автоматты түрде беруді қамтамасыз ететін техникалық бақылау құралдары істен шыққан кезде кеме капитаны (капитанның вахталық көмекшісі) ақау себептері туралы Шекара қызметінің әскери бөліміне хабарлайды.
Кеменің орналасқан жері туралы ақпаратты үнемі автоматты түрде беруді қамтамасыз ететін техникалық бақылау құралдарының істен шығуына әкелген себептерді төрт сағат ішінде жою мүмкін болмаған жағдайда, кеменің капитаны (капитанның вахталық көмекшісі) бұл туралы Шекара қызметінің әскери бөлімін хабардар етеді және ақауды жою үшін портқа (орналасу пунктіне), теңіздегі өткізу пунктіне немесе Қазақстан Республикасының мемлекеттік шекарасы арқылы өткізу жүзеге асырылатын өзге де орынға қайта оралады;
3) Шекара қызметі лауазымды адамдарының талабы бойынша кеменің капитаны (капитанның вахталық көмекшісі) кеменің орналасқан жеріне қатысты ақпаратты және кеменің Қазақстан Республикасының Мемлекеттік шекарасын бірнеше рет кесіп өтуіне байланысты басқа да қажетті ақпаратты ұсынады.
12. Кеме Қазақстан Республикасының портына (орналасу пунктіне), теңіздегі өткізу пунктіне немесе Қазақстан Республикасының Мемлекеттік шекарасы арқылы өткізу жүзеге асырылатын өзге де орынға келерден бұрын төрт сағаттан кешіктірмей, кемені басқаратын дара кәсіпкер немесе заңды тұлға, филиал, өкілдік немесе кеменің капитаны (капитанның вахталық көмекшісі) бұл туралы Шекара қызметінің әскери бөліміне кез келген байланыс құралдары арқылы ауызша хабар береді. Шекара қызметінің лауазымды адамдары портқа (орналасу пунктіне), теңіздегі өткізу пунктіне немесе Қазақстан Республикасының мемлекеттік шекарасы арқылы өткізу жүзеге асырылатын өзге де орынға келіп, кемені бақылауды ұйымдастырады, осы Қағидалардың 6 және 7-тармақтарында көрсетілген құжаттарды тексеруді, кемені қарап-тексеруді, кеме экипажы мүшелерінің түсірілуін қадағалауды жүзеге асырады, кеме капитаны (капитанның вахталық көмекшісі) мен экипажы мүшелеріне ауызша сұрау жүргізеді.
13. Кемеден экипаж мүшелерін, адамдарды түсіру, кез келген жүктер мен тауарларды түсіру (тиеу) Шекара қызметінің бақылауы аяқталғаннан кейін жүзеге асырылады. Бақылау аяқталған соң Шекара қызметінің лауазымды адамы рұқсатқа кеменің портқа (орналасу пунктіне), теңіздегі өткізу пунктіне немесе Қазақстан Республикасының Мемлекеттік шекарасы арқылы өткізу жүзеге асырылатын өзге де орынға келуі туралы белгі қояды.
3-тарау. Жер қойнауын пайдалану жөніндегі операцияларға және жер қойнауын пайдалану жөніндегі операцияларды қамтамасыз етуге тартылған қазақстандық әуе кемелерін бақылауды жүзеге асыру тәртібі
14. Шекара қызметінің лауазымды адамдары әуе кемесіне келгеннен кейін әуе кемесіне байқауды және қарап-тексеруді ұйымдастырады. Әуе кемесінің командирі (ұшу экипажының мүшесі) Шекара қызметінің лауазымды адамдарына рұқсатты, Шекара қызметі әскери бөлімінің командирі куәландырған әуе кемесі экипажының құрамын, кеме жолаушыларының тізімін және әуе кемесі экипажының мүшелері мен жолаушылардың жеке басын куәландыратын құжаттарды ұсынады.
Шекара қызметінің лауазымды адамдары құжаттарды ондағы мәліметтердің дұрыстығы және олардың дұрыс ресімделуі тұрғысынан тексеріп, оларды әуе кемесінің командиріне (ұшу экипажының мүшесіне) қайтарады.
15. Шекара қызметінің лауазымды адамдары әуе кемесінің командирі мен экипажы мүшелеріне ауызша сұрау жүргізеді, сондай-ақ әуе кемесінің командирімен (ұшу экипажының мүшесімен) бірлесіп, кемені тексеріп қарайды.
16. Бақылау аяқталғаннан кейін Шекара қызметінің лауазымды адамы ұшу тапсырмасына (ұшу парағына) жазба жасайды және рұқсатқа белгілер қояды. Шекара қызметінің лауазымды адамы Шекара қызметінің әскери бөліміне байланыс құралдары арқылы жүргізілген іс-шаралардың нәтижелері туралы ақпарат жібереді.
17. Әуе кемелерінің Каспий теңізінің қазақстандық секторының үстіндегі әуе кеңістігіне ұшып шығуы Шекара қызметі әскери бөлімінің лауазымды адамдары кемеде бақылау жүргізгеннен кейін Қазақстан Республикасының әуеайлақтарынан, тікұшақ айлақтарынан және қону алаңдарынан, оның ішінде халықаралық ұшулар үшін ашылмағандарынан да жүзеге асырылады.
Әуе кемелерін Каспий теңізінің қазақстандық секторының су кеңістігіне ұшып шығаруды Шекара қызметі әскери бөлімінің командирі куәландырған кеме экипажы құрамына енгізілген адамдар жүзеге асырады.
18. Құрлықтық қайраң үстіндегі су кеңістігінде орналасқан қалқымалы қонақүйлерді қоса алғанда, Қазақстан Республикасының аумағынан жасанды аралдарға, қондырғылар мен құрылыстарға, қалқымалы бұрғылау қондырғыларына не қалқымалы қонақүйлерді қоса алғанда, жасанды аралдардан, қондырғылар мен құрылыстардан, қалқымалы бұрғылау қондырғыларынан Қазақстан Республикасының аумағына адамдарды, жүктер мен тауарларды жеткізуді жүзеге асыратын әуе кемелерінің ұшулары Қазақстан Республикасының әуе кеңістігін пайдалану саласындағы заңнамасына сәйкес жүзеге асырылады.
19. Шекара қызметінің лауазымды адамдары орналасу пунктіне келіп, әуе кемесін байқауды ұйымдастырады, осы Қағидалардың 14-тармағында көрсетілген құжаттарды тексеруді, кемені тексеріп-қарауды, кеме экипажы мүшелерінің түсуін байқауды жүзеге асырады, кеме командирі мен экипажы мүшелеріне ауызша сұрау жүргізеді.
20. Әуе кемесі экипажы мүшелерінің, адамдардың түсуі, кез келген жүктер мен тауарларды түсіру (тиеу) Шекара қызметінің бақылауы аяқталған соң жүзеге асырылады. Бақылау аяқталғаннан кейін Шекара қызметінің лауазымды адамы рұқсатқа әуе кемесінің орналасу пунктіне келуі туралы белгілер қояды, сондай-ақ ол туралы ұшу тапсырмасына (ұшу парағына) жазба жасайды.