Қазақстан Республикасы Үкіметінің кейбір шешімдеріне өзгерістер мен толықтырулар енгізу туралы

      РҚАО-ның ескертпесі!
      Күшін жою көзделген - ҚР Үкіметінің 2014.11.10 № 1182 (01.01.2017 ж. бастап қолданысқа енгізіледі) қаулысымен.

      Қазақстан Республикасының Үкіметі ҚАУЛЫ ЕТЕДІ:
      1. Қоса беріліп отырған Қазақстан Республикасы Үкіметінің кейбір шешімдеріне енгізілетін өзгерістер мен толықтырулар бекітілсін.
      2. Осы қаулы қол қойылған күнінен бастап қолданысқа енгізіледі.

      Қазақстан Республикасының
      Премьер-Министрі                                     С. Ахметов

Қазақстан Республикасы
Үкіметінің     
2014 жылғы 19 ақпандағы
№ 117 қаулысымен  
бекітілген     

Қазақстан Республикасы Үкіметінің кейбір шешімдеріне
енгізілетін өзгерістер мен толықтырулар

      1. «Дағдарыстан кейiн қалпына келтiру (бәсекеге қабiлеттi кәсiпорындарды сауықтыру) бағдарламасын бекiту туралы» Қазақстан Республикасы Үкiметiнiң 2011 жылғы 4 наурыздағы № 225 қаулысында:
      көрсетілген қаулымен бекітілген Дағдарыстан кейiн қалпына келтiру (бәсекеге қабiлеттi кәсiпорындарды сауықтыру) бағдарламасында:
      «Бағдарламаның паспорты» деген 1-бөлімде:
      «Нысаналы индикаторлары» деген жол мынадай редакцияда жазылсын:
      «Нысаналы индикаторлары
      50 бәсекеге қабілетті кәсіпорынды сауықтыру;
      Бағдарламаға қатысушы кәсіпорындардың қолданыстағы жұмыс орындарының кемінде 70 пайызын сақтау.»;
      «Қаржыландыру көздері мен көлемдері» деген жол мынадай редакцияда жазылсын:
      «Қаржыландыру көздері мен көлемдері
      2011 – 2016 жылдарға арналған республикалық бюджет қаржыландыру көзі болып табылады, оның ішінде 2011 жылға – 8,756 млрд. теңге. Алдын ала бағалау бойынша: барлық әлеуетті қатысушылар Бағдарламаға қатысқан, барлық оңалту (сауықтыру) жоспарларының ең жоғары субсидиялау мерзімі (5 жыл) болған, барлық оңалту (сауықтыру) жоспарлары кредиттер бойынша сыйақы ставкаларын субсидиялауды талап еткен кездегі ең пессимистік сценарий бойынша шығыстар 145,404 млрд. теңгеге дейін құрауы мүмкін.
      Осыларға жол беруді нақты бағалау осы шығыстарды 80 млрд. теңгеге дейін айтарлықтай қысқартуды болжамдауға мүмкіндік береді. Сондықтан 2012 – 2016 жылдарға арналған республикалық бюджеттен қаржыландыру сомалары жоспарлы кезеңге арналған тиісті бюджеттерді қалыптастыру кезінде нақтыланатын болады.»;
      «Кіріспе» деген 2-бөлімде:
      жетінші бөлік мынадай редакцияда жазылсын:
      «Берешегі осы сомадан кем бәсекеге қабілетті кәсіпорындар Қазақстан Республикасы Үкіметінің 2010 жылғы 13 сәуірдегі № 301 қаулысымен бекітілген «Бизнестің жол картасы 2020» бағдарламасы (бұдан әрі – «Бизнестің жол картасы 2020» бағдарламасы) шеңберінде мемлекеттік қолдау көрсетуді пайдалана алады. «Бизнестің жол картасы 2020» бағдарламасы бойынша субсидиялау түрінде қолдау шараларын алып жатқан кәсіпорындар Бағдарламаның талаптарына сәйкес келген жағдайда оған қатыса алады. Бұл ретте, «Бизнестің жол картасы 2020» бағдарламасы немесе басқа мемлекеттік және бюджеттік бағдарламалар шеңберінде субсидияланатын кредиттерді (қарыздарды алуды) Бағдарлама шеңберінде субсидиялау үшін Бағдарлама бойынша субсидиялау шартын жасасқанға дейін осы бағдарламалар шеңберінде жасалған субсидиялау шарттарын бұзуы тиіс.»;
      он тоғызыншы бөлік мынадай редакцияда жазылсын:
      «Бұл ретте қаржы ұйымдарымен қаржыландыру туралы келiсiмдер 2012 жылғы 1 қаңтардан кешіктірілмей жасалуы тиіс және 2011 жылғы 1 қаңтарға (не 2013 жылғы 1 қаңтардан бастап 2013 жылғы 1 сәуірге дейінгі кезеңде Бағдарламаға қатысуға өтініш берген кәсіпорындар бойынша 2012 жылғы 1 қаңтарға) олар бойынша міндеттемелердің жалпы сомасы 4 500 000 000 (төрт миллиард бес жүз миллион) теңгенi құрауы немесе асыруы тиiс (2012 жылғы 1 қаңтардан кешiктiрмей туындаған бұрын қабылданған мiндеттемелердi қайта қаржыландыру жағдайларын қоспағанда) және қайта құрылымдаусыз оларды болашақта орындау проблемалы болады деген негiздер болуы тиiс.»;
      жиырма екінші бөліктің жиырма төртінші абзацы мынадай редакцияда жазылсын:
      «қаржы ұйымдарына (облигация ұстаушы, қатысушы) кредиттер және/немесе лизингтiк операциялар бойынша пайыздық ставканы, облигациялар бойынша купонды субсидиялау шеңберiнде ақша қаражатын аудару;»;
      «Бағдарламаның мақсаты, мiндеттерi, нысаналы индикаторлары және iске асыру нәтижелерiнiң көрсеткiштерi» деген 4-бөлімде:
      «Бағдарламаның нысаналы индикаторлары» деген кіші бөлім мынадай редакцияда жазылсын:
      «50-ге жуық бәсекеге қабілетті кәсіпорынды сауықтыру;
      Бағдарламаға қатысушы кәсіпорындардың қолданыстағы жұмыс орындарының кемінде 70 пайызын сақтау.»;
      «Міндеттері» деген кіші бөлім мынадай редакцияда жазылсын:
      «1. Бағдарлама қатысушылардың борыштық жүктемесін азайту;
      2. Мемлекеттік қолдау шараларын көрсету.»;
      «Бағдарламаны iске асыру нәтижелерiнiң көрсеткiштерi» деген кіші бөлімде:
      1-тармақ мынадай редакцияда жазылсын:
      «1. Мыналар Бағдарлама көрсеткіштері болып табылады:
      1) Негізгі борышты өтеу:
      2013 жылы Бағдарламаға қатысушылардың субсидияланатын кредиттері (қарыздары) бойынша негізгі борыштың төмендеуі орташа алғанда кемінде 4 %-ды құрайды;
      2014 жылы Бағдарламаға қатысушылардың субсидияланатын кредиттері (қарыздары) бойынша негізгі борыштың төмендеуі орташа алғанда кемінде 15 %-ды құрайды;
      2015 жылы Бағдарламаға қатысушылардың субсидияланатын кредиттері (қарыздары) бойынша негізгі борыштың төмендеуі орташа алғанда кемінде 30 %-ды құрайды;
      2016 жылы Бағдарлама қатысушылардың субсидияланатын кредиттері (қарыздары) бойынша негізгі борыштың төмендеуі орташа алғанда кемінде 45 %-ды құрайды.
      2) Бағдарламаға қатысушылардың жалпы санына сыйақының пайыздық ставкасын субсидиялауды қамтамасыз етуге қатысты Бағдарламаға қатысушылардың үлесі:
      2013 жылы – 77 %;
      2014 жылы – 95 %;
      2015 жылы – 98 %;
      2016 жылы – 98 %.»;
      4-тармақта:
      төртінші және бесінші бөліктер мынадай редакцияда жазылсын:
      «Кәсіпорын Кредиторлар комитетінің кәсіпорынның Бағдарламаға қатысуға келісетіні туралы шешімінің және Сауықтыру жөніндегі кеңес шешімінің көшірмелерімен қоса кәсіпорынды банкрот деп тану туралы (оңалту рәсіміндегі кәсіпорын бойынша оңалту рәсімін тоқтату туралы өтініші) кредиторлардың талап арыз беруіне мораторийді көздейтін жеделдетілген оңалту рәсімін енгізу туралы арызды сотқа жібереді.
      Кәсiпорынды банкрот деп тану туралы кредиторлардың талап арыз беруiне мораторийдi көздейтiн жеделдетiлген оңалту рәсiмiн енгiзу туралы сот шешiмi (оңалту рәсіміндегі кәсіпорын бойынша оңалту рәсімін тоқтата тұру ұйгарым) алынып, ол Сауықтыру кеңесiнiң жұмыс органына ұсынылғаннан кейiн ақшалай сипаттағы мемлекеттiк қолдау шаралары Қазақстан Республикасының заңнамасына сәйкес тiркеледi және уәкiлеттi органның, Бағдарламаға қатысушының, меншiк иесiнiң (меншiк иелерiнiң), субсидиялау бойынша оператор мен кредиторлардың арасында жасалатын шарттарда өтеу кестелерін қоса бере отырып, ресiмделедi.»;
      жетінші бөлік мынадай редакцияда жазылсын:
      «Кәсiпорынды банкрот деп тану туралы кредиторлардың талап арыз беруiне мораторийдi көздейтiн жеделдетiлген оңалту рәсiмiн енгiзу туралы сот шешiмi (оңалту рәсіміндегі кәсіпорын бойынша оңалту рәсімін тоқтата тұру ұйғарым) ұсынылмаған жағдайда, кәсіпорын қатысушы деп танылған күннен бастап алты ай ішінде мемлекеттік қолдау шаралары қолданылмайды. Сауықтыру жөніндегі кеңес қатысушыны Бағдарламадан шығару туралы шешім қабылдайды. Сауықтыру жөніндегі кеңестің жұмыс органы немесе әлеуетті қатысушының кредиторлар комитеті консультант қызметінің құнын төлеуді бірлесіп қаржыландыруға бағытталған бюджет қаражатын өндіріп алу бойынша шаралар қабылдайды, сондай-ақ банкроттық рәсіміне бастамашылық ете алады.»;
      тоғызыншы бөлік мынадай редакцияда жазылсын:
      «Кәсіпорынды банкрот деп тану туралы кредиторлардың талап арыз беруіне мораторийді көздейтін жеделдетілген оңалту рәсімін енгізу туралы сот шешімі (оңалту рәсіміндегі кәсіпорын бойынша оңалту рәсімін тоқтата тұру ұйғарым) болмаған кезде, егер Бағдарламаның осы бөлімінің 5-тармағында көзделген түзетулер кәсіпорын Бағдарламаның қатысушысы деп танылғанға дейін қабылданбаған жағдайда, мемлекеттік қолдау шаралары қолданылмайды. Бұл ретте, жоғарыда көрсетілген түзетулер қабылданғаннан кейін қатысушы кәсіпорынды банкрот деп тану туралы кредиторлардың талап арыз беруіне мораторийді көздейтін жеделдетілген оңалту рәсімін енгізу туралы сотқа (оңалту рәсіміндегі қатысушы бойынша оңалту рәсімін тоқтата тұру туралы өтініш) арыз жолдайды.»;
      он бірінші бөлік мынадай редакцияда жазылсын:
      «Пайыздық ставканы субсидиялау тек қана кредиттер және/немесе лизингтiк операциялар, облигациялар купоны бойынша жүзеге асырылады. Бұл ретте, қаржыландыру туралы келісімдер 2012 жылғы 1 қаңтардан кешіктірілмей жасалуы тиіс және олар бойынша міндеттемелердің жалпы сомасы 2011 жылғы 1 қаңтардан кешіктірмей (не 2013 жылғы 1 қаңтардан бастап 2013 жылғы 1 сәуірге дейінгі кезеңде Бағдарламаға қатысуға өтініш берген кәсіпорындар бойынша 2012 жылғы 1 қаңтардағы жағдай бойынша) туындаған бұрын қабылданған міндеттемелерді қайта қаржыландыру жағдайларынан басқа, 2011 жылғы 1 қаңтарға 4 500 000 000 (төрт миллиард бес жүз миллион) теңгені құрауы немесе одан жоғары болуы тиіс (валюталар бағамы Бағдарлама iске асырылатын бүкiл кезеңге 2011 жылғы 1 қаңтардағы мән деңгейiнде тiркелiп қалады).»;
      «Бағдарламаны іске асыру кезеңдері» деген 5-бөлім мынадай редакцияда жазылсын:
      «5. Бағдарламаны іске асыру кезеңдері
      Бағдарламаны іске асыру үш кезеңде жүзеге асырылады:
      Бірінші және екінші кезеңдер – 2011 - 2013 жылдар.
      Бірінші кезең алдын ала іріктеу кезеңі болады.
      Екінші кезең – оңалту (сауықтыру) жоспарларын қарау және Бағдарламаға қатысушыларды іріктеу.
      Үшінші кезең:
      2011 – 2016 жылдар аралығы – мемлекеттік қолдау шараларын қолдану;
      2013 жылдан бастап оңалту (сауықтыру) жоспарларының іске асыру мерзімінің соңына дейін – Бағдарлама қатысушыларының оңалту (сауықтыру) жоспарларының іске асырылу мониторингісі.»;
      «Қажетті ресурстар мен оларды қаржыландыру көздері» деген 6-бөлім мынадай редакцияда жазылсын:
      «6. Қажетті ресурстар мен оларды қаржыландыру көздері
      2011 – 2016 жылдарға арналған республикалық бюджет қаржыландыру көзі болып табылады. Алдын ала бағалау бойынша:
      барлық әлеуетті қатысушылар Бағдарламаға қатысқан,
      барлық оңалту (сауықтыру) жоспарларының ең жоғары субсидиялау мерзімі (5 жыл) болады;
      барлық оңалту (сауықтыру) жоспарлары кредиттер бойынша сыйақы ставкаларын субсидиялауды талап еткен кездегі ең пессимистік сценарий бойынша шығыстар 145,404 млрд. теңгеге дейін қурауы мүмкін, оның ішінде:
      1) сыйақы ставкаларын субсидиялау – 141,004 млрд. теңге;
      2) оңалту (сауықтыру) жоспарларын әзірлеу бойынша консультанттардың көрсететін қызметтеріне ақы төлеуге бірлесе қаржыландыруға – 1,125 млрд. теңге;
      3) мониторинг бойынша консалтингтік компаниялардың көрсететін қызметтеріне ақы төлеуге – 1,685 млрд. теңге.
      Осыларға жол беруді нақты бағалау осы шығыстарды 80 млрд. теңгеге дейін айтарлықтай қысқартуды болжамдауға мүмкіндік береді. Сондықтан 2012 – 2016 жылдарға арналған республикалық бюджеттен қаржыландыру сомалары жоспарлы кезеңге арналған тиісті бюджеттерді қалыптастыру кезінде нақтыланатын болады.
      Сауықтыру жөніндегі бюджеттік бағдарламаларды жоспарлауды, әкімшілендіруді уәкілетті орган жүзеге асыратын болады.»;
      «Бағдарламаны іске асыру жөніндегі іс-шаралар жоспары» деген 7-бөлімде реттік нөмірі 16-жол мынадай редакцияда жазылсын:

      «

                                                                   ».

      2. «Сауықтыру жөнiндегi кеңес құру туралы» Қазақстан Республикасы Үкiметiнiң 2011 жылғы 17 маусымдағы № 660 қаулысында:
      көрсетілген қаулымен бекітілген Сауықтыру жөніндегі кеңес туралы ережеде:
      4-тармақта:
      4) тармақша мынадай редакция жазылсын:
      «4) мынадай:
      Сауықтыру жөніндегі кеңесінің жұмыс органына кредиторлардың кәсiпорынды банкрот деп тану туралы талап арыз беруiне мораторий енгiзуді көздейтін жеделдетілген оңалту рәсімін енгізу туралы (оңалту рәсіміндегі Бағдарлама қатысушына қатысты оңалту рәсімін тоқтата тұру туралы сот ұйғарымы) сот шешiмi ұсынылмаған жағдайда;
      Бағдарламаны іске асыру мониторингі барысында субсидиялау бөлігінде қатысушының өтеу кестесі бойынша кредит, лизингтік операциялар немесе облигациялар жөніндегі купон, оның iшiнде сыйақы ставкасының субсидияланбайтын бөлігі бойынша күнтізбелік тоқсан күннен асатын мерзімі өткен төлемдерді төлемегені анықталған жағдайда, катысушыларды Бағдарламадан шығару туралы шешім қабылдайды;».
      3. «Дағдарыстан кейін қалпына келтіру бағдарламасы (бәсекеге қабілетті кәсіпорындарды сауықтыру) шеңберінде сыйақының пайыздық ставкасын субсидиялау қағидасын бекіту және «Дағдарыстан кейін қалпына келтіру бағдарламасын (бәсекеге қабілетті кәсіпорындарды сауықтыру) бекіту туралы» Қазақстан Республикасы Үкіметінің 2011 жылғы 4 наурыздағы № 225 қаулысына толықтырулар енгізу туралы» Қазақстан Республикасы Үкіметінің 2011 жылғы 8 қыркүйектегі № 1031 қаулысында (Қазақстан Республикасының ПҮАЖ-ы, 2011 ж., № 53, 755-құжат):
      көрсетілген қаулымен бекітілген Дағдарыстан кейін қалпына келтіру бағдарламасы (бәсекеге қабілетті кәсіпорындарды сауықтыру) шеңберінде сыйақының пайыздық ставкасын субсидиялау қағидасында:
      2-тармақта:
      сегізінші, тоғызыншы және оныншы абзацтар мынадай редакцияда жазылсын:
      «субсидиялау жөнiндегi оператор – Қазақстан Республикасының Үкiметi айқындаған заңды тұлға, оған:
      кредиттер және (немесе) лизингтiк операциялар, облигациялар бойынша купонды субсидиялау шеңберiнде қаржы ұйымдарына (облигация ұстаушыға, қатысушыға) ақша қаражатын аудару;
      субсидиялау бөлiгiнде Бағдарламаның iске асырылуын мониторингілеу жөніндегі міндеттер жүктелген;».
      3-тармақ мынадай редакцияда жазылсын:
      «3. Пайыздық ставканы субсидиялау кредиттер және/немесе лизингтік операциялар, облигациялар купоны бойынша ғана жүзеге асырылады. Бұл ретте, қаржыландыру туралы келісімдер 2012 жылғы 1 қаңтардан кешіктірілмей жасалуы тиіс және 2011 жылғы 1 қаңтардағы қарыздардың олар бойынша міндеттемелердің жалпы сомасы (не 2013 жылғы 1 қаңтардан 2013 жылғы 1 сәуір мерзімі арасында Бағдарламаға қатысуға өтініш берген кәсіпорындар бойынша 2012 жылғы 1 қаңтардағы) 2012 жылғы 1 қаңтардан кешіктірмей туындаған бұрын қабылданған міндеттемелерді қайта қаржыландыру жағдайларынан басқа, 4 500 000 000 (төрт миллиард бес жүз миллион) теңгені құрауы немесе одан артық болуы тиіс.»;
      12, 13-тармақтар мынадай редакцияда жазылсын:
      «12. Қатысушы кәсiпорынды банкрот деп тану туралы кредит берушiлердiң талап арыз беруiне мораторийдi көздейтiн жеделдетiлген оңалту рәсiмiн енгiзу туралы сот шешiмiн (оңалту рәсіміндегі қатысушыға қатысты оңалту рәсімін тоқтата тұру туралы сот ұйғарымы) алғаннан кейін субсидиялау жөнiндегi операторға Сауықтыру жөніндегі кеңестің оңалту (сауықтыру) жоспарын мақұлдау туралы шешiмiнiң, оңалту (сауықтыру) жоспарына сәйкес жүргiзiлген қайта құрылымдауды ескере отырып, қатысушының қарыз алуын өтеу кестелерінің негiзiнде жасалған өтеу кестелерiн қоса алғанда, субсидиялау шартының жобасы көшiрмелерiн қоса бере отырып, осы Қағидаға 1-қосымшаға сәйкес нысан бойынша субсидиялауға өтiнiм бередi. Өтеу кестесіндегі субсидиялау сомалары мемлекеттің тарапынан қолдау шаралары ретінде оңалту (сауықтыру) жоспарында көрсетілген сыйақының пайыздық ставкасын субсидиялау көлеміне негізделе отырып, есептеледі. Бұл ретте, әрбір қатысушыға және кредиторға қатысты өтеу кестесінде көзделген субсидиялардың жалпы көлемі осы қатысушыға және кредиторға қатысты оңалту (сауықтыру) жоспарында көзделген субсидиялардың жалпы көлемінен аспауы тиіс.
      Субсидиялауға арналған өтiнiмді Бағдарламада белгiленген жағдайларда кәсiпорынды банкрот деп тану туралы кредит берушiлердiң талап арыз беруiне мораторийдi көздейтiн жеделдетiлген оңалту рәсiмiн енгiзу туралы сот шешiмiн (оңалту рәсіміндегі қатысушыға қатысты оңалту рәсімін тоқтата тұру туралы сот ұйғарымы) ұсынбастан беруге болады.»
      13. Қатысушы субсидиялауға өтiнiм берген күнінен бастап он жұмыс күні ішінде осы Қағидаға 2-қосымшаға сәйкес нысан бойынша оның негiзiнде субсидиялау жөнiндегi оператор сыйақының пайыздық ставкасының субсидияланатын бөлiгiн, ал қатысушы – сыйақының пайыздық ставкасының субсидияланбайтын бөлiгiн төлейтiн өтеу кестесiн қоса бере отырып, субсидиялау шарты жасалады. Егер кредитор болып ислам банкі әрекет еткен жағдайда, субсидиялау шарты осы Қағидаға 2-1-қосымшаға сәйкес нысан бойынша жасалады. Субсидиялау шарты жасалған сәттен бастап есептелген сыйақы субсидиялауға жатады. Қаржы ұйымы субсидиялау шарты жасалған сәттен бастап бiр күн iшiнде облигациялар бойынша купонды субсидиялау, төлем көзінен ұсталатын салықтар бойынша міндеттемелер туындаған және қаржы ұйымдарында Қазақстан Республикасы заңды тұлғаларының шоттарын ашуға (енгізуге) құқықтылығы болмаған жағдайлардан басқа, субсидиялау жөніндегі оператордың арнайы ағымдағы шотын ашады.
      Субсидиялау шартына қол қойылғаннан кейін оңалту (сауықтыру) жоспарына кейіннен Сауықтыру жөніндегі кеңесінде қараусыз және мақұлдаусыз кредиторлар комитетінің шешімімен бекітілетін субсидиялау шартының ажырамас бөлігі болып табылатын өтеу кестесіндегі іс жүзінде көрсетілген соманы есепке ала отырып, өзгерістер және (немесе) толықтырулар енгізіледі. Бұл ретте, кредиторлар мен меншік иелері тарапынан шаралар азайтылуға жатпайды.
      Өтеу кестесiне субсидиялау шартына қосымша келiсiм жасау жолымен өзгерiстер мынадай:
      1) оңалту (сауықтыру) жоспарына өзгерiстер және (немесе) толықтырулар енгiзiлген;
      2) егер мемлекет тарапынан қолдау шаралары ұлғайтылмаған жағдайда, оңалту (сауықтыру) жоспарына өзгерiстер және (немесе) толықтырулар енгiзбей, кредит берушiлер мен меншiк иелерi тарапынан қосымша қолдау шаралары көрсетiлген жағдайда енгiзiлуi мүмкiн.»;
      16-тармақтың екінші бөлігі мынадай редакцияда жазылсын:
      «Аталған тәртіп облигациялар бойынша купонды субсидиялауға, сондай-ақ төлем көзінен ұсталынатын салық бойынша міндеттемелер пайда болған және қаржы ұйымдарында Қазақстан Республикасы заңды тұлғаларының шоттарын ашуға (енгізуге) құқықтылы болмаған жағдайларға қолданылмайды.»;
      17-тармақта:
      мынадай мазмұндағы екінші бөлікпен толықтырылсын;
      «Қаржы ұйымдарында Қазақстан Республикасы заңды тұлғаларының шоттарын ашуға (енгізуге) құқықтылығы болмаған жағдайда, субсидиялау жөніндегі оператор ақшалай қаражатты қатысушының ағымдағы шотына өтеу кестесіне сәйкес мерзімде және мөлшерде аударады.»;
      екінші бөлік мынадай редакцияда жазылсын:
      «Облигациялар бойынша купонды субсидиялау кезінде субсидиялау жөніндегі оператор сыйақының пайыздық ставкасының субсидияланбайтын бөлігін қатысушының төлеуі туралы облигация ұстаушыдан жазбаша хабарлама алған сәттен бастап бір жұмыс күні ішінде уәкілетті орган ақшалай қаражатты уақтылы аударған жағдайда өтеу кестесіне сәйкес облигацияларды ұстаушының ағымдағы шотына ақшалай қаражатты аударады.»;
      20-тармақ мынадай мазмұндағы 4) тармақшамен толықтырылсын:
      «4) қаржы ұйымдарында Қазақстан Республикасы заңды тұлғаларының шоттарын ашуға (енгізуге) құқықтылығы болмаған кезде – субсидиялау жөніндегі оператор қатысушы кредит, лизингтiк операциялар, оның iшiнде субсидияланбайтын бөлiгi бойынша төлемді өтеу кестесінде көрсетілген мерзімде төлемегені туралы қаржы ұйымынан хабарламаны алған күні, бұл туралы уәкілетті органды хабардар етеді.»;
      21-тармақтың бірінші бөлігі мынадай редакцияда жазылсын:
      «21. Қатысушы кредит, лизингтiк операциялар немесе облигациялар жөнiндегi купон бойынша, оның iшiнде сыйақы ставкасының субсидияланбайтын бөлiгi бойынша мерзiмi өтiп кеткен төлемдердi өтеу кестесiне сәйкес күнтізбелік тоқсан күн ішінде толық төлеген жағдайда, қаржы ұйымы немесе облигация ұстаушы мерзiмi өткен төлемдерді толық төлеген күннен кейінгі күннен кешікпейтін мерзімде бұл туралы субсидиялау жөніндегі операторды жазбаша хабардар етеді. Кейіннен субсидиялау жөніндегі оператор қаржы ұйымының хабарламасын алған күннен кейінгі күннен кешікпейтін мерзімде бұл туралы уәкілетті органды хабардар етеді.»;
      көрсетілген Қағидаға 2-қосымшада:
      2.4-тармақ мынадай мазмұндағы 2-2) тармақшамен толықтырылсын:
      «2-2) қаржы ұйымдарында Қазақстан Республикасы заңды тұлғаларының шоттарын ашуға (енгізуге) құқықтылығы болмаған жағдайда, қатысушының ағымдағы шотына сыйақы ставкасын субсидиялау үшін ақшалай қаражатты Министрліктен ақшалай қаражат уақтылы түскен кезде өтеу кестесіне сәйкес аударуға;»;
      2.6-тармақтың 11) тармақшасы алынып тасталсын;
      2.8-тармақ мынадай мазмұндағы 1-2) тармақшамен толықтырылсын:
      «1-2) қаржы ұйымдарында Қазақстан Республикасы заңды тұлғаларының шоттарын ашуға (енгізуге) құқықтылығы болмаған кезде өтеу кестесімен көзделген ақшалай қаражатты, оның ішінде Компаниядан алынған сыйақы ставкасын субсидиялауға арналған сомаларды қаржы ұйымына аударуға;»;
      6.2-тармақ мынадай редакцияда жазылсын:
      «6.2. Егер туындаған дауды келіссөздер жүргізу жолымен шешу мүмкін болмаса, ол дау мен оған қатысты өзге де мәселелер Қазақстан Республикасының заңнамасына сәйкес шешіледі және реттеледі. Егер туындаған дау тарапының бір жағынан халықаралық қаржы ұйымдары мен институттарын қоса алғанда, Қазақстан Республикасының резиденті емес болған жағдайда, онда осындай дау Халықаралық Төреліктің қарауына жіберілуі мүмкін. Халықаралық Төреліктің таңдауы тараптардың жазбаша келісімімен айқындалады. Резиденттер арасындағы дауды Қазақстан Республикасының соттары қарайды.»;
      Ескертпе мынадай редакцияда жазылсын:
      «Ескертпе:
      Субсидиулаудың мәні мен тәртібіне негізделе отырып, субсидиялау шарты оны жасау кезінде түзетуге жатады.»;
      Сыйақының пайыздық ставкасын субсидиялау қағидасы мынадай мазмұндағы 2-1-қосымшамен толықтырылсын:

Дағдарыстан кейін қалпына 
келтіру бағдарламасы (бәсекеге
қабілетті кәсіпорындарды  
сауықтыру) шеңберінде   
сыйақының пайыздық ставкасын
субсидиялау қағидасына  
2-1-қосымша        

№ Субсидиялау шарты

Астана қаласы                               «___» __________ 20__ жыл

      Бұдан әрi «Министрлiк» деп аталатын Қазақстан Республикасы
Қаржы министрлiгi атынан «Қазақстан Республикасының Қаржы министрi,
жауапты хатшысы және вице-министрлерiнiң арасында мiндеттер мен
өкiлеттiктердi бөлу туралы» Қазақстан Республикасы Қаржы министрiнiң
_____ жылғы «___» ________ № ____ бұйрығының негiзiнде, сондай-ақ
Қазақстан Республикасы Үкiметiнiң 2008 жылғы 24 сәуiрдегі № 387
қаулысымен бекiтiлген Қазақстан Республикасы Қаржы министрлiгi туралы
ережеге сәйкес әрекет ететiн Қаржы вице-министрi ________________ бiр
тараптан, сондай-ақ бұдан әрi «Компания» деп аталатын «Активтердi
басқару және оңалту компаниясы» акционерлiк қоғамы атынан Жарғының
негiзiнде әрекет ететiн президент ________________________ екiншi
тараптан, бұдан әрi «Қаржы ұйымы» деп аталатын __________________
атынан _______________ негiзiнде әрекет ететiн _________________
үшiншi тараптан, бұдан әрi «Меншік иесі» деп аталатын _______________
атынан ______________ негiзiнде әрекет ететiн _________________
төртiншi тараптан және бұдан әрi «Қатысушы» деп аталатын
_______________ атынан ______________ негiзiнде әрекет ететiн
_________________ бесінші тараптан, бiрлесiп «Тараптар», ал жекелеп
алғанда «Тарап» деп аталатын, Сауықтыру кеңесiнiң 20__ жылғы «___»
____________ шешiмiн орындау үшiн және Қазақстан Республикасы
Үкiметiнiң 2011 жылғы 4 наурыздағы № 225 қаулысымен бекiтiлген
Дағдарыстан кейiн қалпына келтiру бағдарламасына (бәсекеге қабiлеттi
кәсiпорындарды сауықтыру) (бұдан әрi – Бағдарлама), Бағдарлама
шеңберiнде сыйақының пайыздық ставкасын субсидиялау қағидасына (бұдан
әрi - Қағида) сәйкес төмендегiлер туралы осы Субсидиялау шартын
(бұдан әрi – Шарт) жасасты:

1. Шарттың мәні

      1.1. Осы Шарттың ажырамас бөлiгi болып табылатын өтеу кестесiне
сәйкес қатысушының қаржы ұйымына қаржы шарттары бойынша үстеме баға
ретiнде төлейтiн шығыстарды iшiнара өтеуге арналған ақша қаражатын
(бұдан әрi – үстеме бағаны субсидиялау) компанияның қаржы ұйымына
төлеудi жүзеге асыруы.

2. Тараптардың құқықтары мен міндеттері

      2.1. Министрлік:
      1) Тараптардан осы Шарттың талаптарын тиісінше орындауды талап
етуге;
      2) Компаниядан ай сайын есепті айдан кейінгі айдың 15-күніне
Бағдарламаның үстеме бағасын субсидиялау бөлігінде іске асырылуын
мониторингілеу туралы ақпаратты талап етуге құқылы.
      2.2. Министрлік:
      1) Компанияның Қағидаға 3-қосымшаға сәйкес нысан бойынша
өтінімін алған күннен бастап екі жұмыс күні ішінде Компанияның
есеп-шотына өтінімде көрсетілген мөлшерде ақша қаражатын аударуға;
      2) Қатысушының үстеме бағаның субсидияланбайтын бөлiгiнiң төлеу
мерзiмi өткен бөлiгiн толық көлемде өтегенi туралы Компания
хабарлаған күннен бастап екi жұмыс күнi iшiнде Компанияның
субсидиялар төлеудi жаңартатыны туралы жазбаша хабарлауға;
      3) Сауықтыру кеңесі Қатысушыны Бағдарламадан шығару туралы
шешім қабылдаған күннен бастап бір жұмыс күні ішінде Компанияға
үстеме бағаны субсидиялауды тоқтату туралы жазбаша хабарлауға;
      4) Қатысушы Бағдарламадан шығарылған жағдайда бес жұмыс күні
ішінде Тараптарға осы Шартты бұзу туралы жазбаша хабарлама жіберуге;
      5) осы Шарт талаптарының орындалуына әсерін тигізуі мүмкін
барлық мән-жайлар туралы осы Шарттың Тараптарын уақтылы хабардар
етуге;
      6) мынадай:
      Сауықтыру кеңесiнiң шешiмi бойынша Қатысушы Бағдарламадан
шығарылған;
      Қатысушы қаржыландыру шарттары бойынша негiзгi борышын толық
(мерзiмiнен бұрын толық) өтеген жағдайларда субсидиялар төлеуді
тоқтатуға мiндеттi.
      2.3. Компания:
      1) Тараптардан осы Шарттың талаптарын тиісінше орындауды талап
етуге;
      2) Қатысушы мен қаржы ұйымынан өтеу кестесіне сәйкес үстеме
бағаны төлеу жөнiндегi қажеттi құжаттар мен ақпаратты сұратуға
құқылы.
      2.4. Компания:
      1) өтеу кестесіне сәйкес Қатысушының өтінімі негізінде үстеме
бағаны субсидиялау үшін Компанияға ақша қаражатын аударуға Қағидаға
3-қосымшаға сәйкес нысан бойынша Министрлікке өтінім жіберуге;
      2) уәкiлеттi орган ақша қаражатын уақтылы аударған жағдайда,
Қатысушылардан өтiнiмдердiң түсуiне қарай Компанияның арнаулы
ағымдағы шотына үстеме бағаны субсидиялау үшiн ақша қаражатын тоқсан
сайын, алдағы тоқсандағы айдың бiрiншi күнiне дейiнгi мерзiмде
аванстық төлемдермен Қаржы ұйымына аударуға;
      3) қаржыландыру шарттары бойынша үстеме бағаны субсидиялау
кезінде төлем көзінен ұсталатын салық бойынша міндеттемелер туындаған
жағдайда, Министрліктен ақша қаражаты уақтылы түскен жағдайда өтеу
кестесіне сәйкес қатысушының ағымдағы шотына үстеме бағаны
субсидиялау үшін ақша қаражатын аударуға;
      4) қаржы ұйымынан қатысушының қаржыландыру шарттары бойынша
төлемді, оның iшiнде үстеме бағаның субсидияланбайтын бөлiгiн өтеу
кестесінде көрсетілген мерзімде уақтылы төлемегені туралы хабарламаны
алған күні үстеме бағаның субсидияланатын бөлiгiн қаржы ұйымына
төлеуді тоқтата тұруға және Министрлiктi хабардар етуге;
      5) ай сайын, есептi айдан кейiнгi айдың 15-күнiне Министрлiкке
Бағдарламаны іске асыру шеңберінде пайыздық ставканы субсидиялау
туралы ақпаратты осы Шартқа қосымшаға сәйкес нысан бойынша ұсынуға;
      6) осы Шарт талаптарының орындалуына әсерін тигізуі мүмкін
барлық мән-жайлар туралы осы Шарттың Тараптарын уақтылы хабардар
етуге міндетті.
      2.5 Қаржы ұйымы:
      уәкілетті орган ақша қаражатын уақтылы аударған жағдайда, осы
шарт шеңберінде үстеме бағаны субсидиялау үшін ақша қаражатының
уақтылы аударылуын Компаниядан талап етуге құқылы.
      2.6 Қаржы ұйымы:
      1) осы шарт жасалған сәттен бастап келесi жұмыс күнінен
кешiктiрмей үстеме бағаны субсидиялауға арналған Компанияның арнаулы
ағымдағы шотын ашуға;
      2) Компанияның ашылатын арнаулы ағымды шоты үшін (ашу, қызмет
көрсету, енгізу) Компаниядан комиссиялар, алымдар және (немесе) басқа
төлемдер алмауға;
      3) өтеу кестесіне сәйкес үстеме бағаны субсидиялау үшін
Компания аударатын ақша қаражатының нысаналы пайдалануын қамтамасыз
етуге;
      4) үстеме бағаның субсидияланатын бөлігін өтеуге арналған
Компанияның ақшалай қаражаты есебінен үстеме бағаның
субсидияланбайтын бөлігін өтеуді жүргізбеуге;
      5) үш жұмыс күн ішінде Қатысушылармен жасалған төлем
кестелерімен бірге қаржыландыру шарттарының көшірмелерін беруге;
      6) Қатысушы өтеу кестесіне сәйкес мерзімде және мөлшерде үстеме
бағаның субсидияланбайтын бөлiгiн төлеген кезде, оның iшiнде Қатысушы
мерзiмi өткен берешектi толық өтеген кезде, Компанияның арнаулы
ағымдағы шотынан ақшалай қаражатты уақтылы есептен шығаруды
қамтамасыз етуге;
      7) Қатысушының өтеу кестесін орындағаны не бұзғаны туралы
Компанияны өтеу кестесіне сәйкес төлем күнінен кейінгі күннен
кешіктірмей жазбаша хабардар етуге;
      8) Қатысушы қаржыландыру шарттары бойынша төлемдi, оның iшiнде
үстеме бағаның субсидияланбайтын бөлiгiн өтеу кестесiнде көрсетілген
мерзiмде төлемеген жағдайда, Компанияның арнаулы ағымдағы шотынан
субсидиялау үшiн ақша қаражатын Қатысушы берешегiн өтегенге дейiн
алмауға және өтеу кестесi бойынша төлем күнiнен кейiнгi күннен
кешiктiрмей Компанияны хабардар етуге;
      9) ай сайын, есепті айдан кейінгі айдың 10-күніне қарай
Компанияға есепті айға пайыздық ставканы субсидиялау туралы ақпаратты
осы Шартқа қосымшаға сәйкес нысан бойынша ұсынуға;
      10) өтеу кестесінің орындалуына байланысты барлық қажетті
құжаттар мен ақпаратты осы Шарт Тараптарының талап етуі бойынша
ұсынуға;
      11) Қаржы ұйымының заңды мекенжайы, пошталық және банктiк
деректемелерi, сондай-ақ нақты мекенжайы өзгерген кезде осындай
өзгерiстер туралы тараптарға бес жұмыс күнi iшiнде жазбаша түрде
хабарлауға мiндеттi. Хабардар етпеген және (немесе) уақтылы хабардар
етпеген жағдайда, туындауы мүмкiн салдарлар үшiн Қаржы ұйымы жауапты
болады;
      12) осы Шарт бойынша құқықтар мен міндеттерді осы Шарттың
қолданылу мерзімі аяқталғанға дейін Тараптардың алдын-ала
келісімінсіз үшінші тұлғаға бермеуге және қайта бермеуге;
      13) осы Шарт талаптарының орындалуына әсер етуі мүмкін барлық
мән-жайлар туралы осы Шарттың Тараптарын уақтылы хабардар етуге;
      14) Қатысушыға оңалту (сауықтыру) жоспарында көзделген қолдау
шараларын ұсынуға міндетті.
      2.7. Меншік иесі:
      1) Қатысушыға оңалту (сауықтыру) жоспарында көзделген қолдау
шараларын ұсынуға;
      2) осы Шарттың талаптарын орындауға әсер етуге қабілетті барлық
жағдайлар туралы осы Шарттың Тараптарына уақтылы хабарлауға;
      3) осы Шарт Тараптарының талабы бойынша өтеу кестесін орындауға
байланысты қажетті барлық құжаттар мен ақпаратты ұсынуға міндетті.
      2.8. Қатысушы:
      Қаржы ұйымынан үстеме бағаны субсидиялау үшін Компанияның ақша
қаражатының ағымдағы арнаулы шотынан ақша қаражатының шығарылуын
қамтамасыз етуді талап етуге құқылы.
      2.9. Қатысушы:
      1) қаржыландыру шарттары бойынша төлемдерді, оның ішінде үстеме
бағаның субсидияланбайтын бөлігін өтеу кестесіне сәйкес уақтылы
өтеуге;
      2) қаржыландыру шарттары бойынша үстеме бағаны субсидиялау
кезінде төлем көзінен ұсталатын салықтар бойынша міндеттемелер
туындаған жағдайда, қаржы ұйымына немесе облигацияларды ұстаушыға
өтеу кестесінде көзделген ақшалай қаражатты, оның ішінде Компаниядан
алынған, үстеме бағаны субсидиялауға арналған сомаларды аударуға.
Ақшалай қаражат төлем көзінен ұсталатын салықтар шегеріліп, өтеу
кестесіне сәйкес аударылады;
      3) осы Шарт талаптарының орындалуына әсер етуі мүмкін барлық
мән-жайлар туралы осы Шарттың Тараптарын уақтылы хабардар етуге;
      4) өтеу кестесінің орындалуына байланысты барлық қажетті
құжаттар мен ақпаратты осы Шарт Тараптарының талаптары бойынша
ұсынуға;
      5) Сауықтыру кеңесі Қатысушыны Бағдарламадан шығару туралы
шешім қабылдаған жағдайда, үстеме бағаны субсидиялауға арналған
оңалту (сауықтыру) жоспарын орындау шеңберінде тартылған ақшалай
қаражатты республикалық бюджетке отыз күндік мерзімде қайтаруға;
      6) қаржыландыру шарттары бойынша үстеме бағаны субсидиялау
кезінде төлем көзінен ұсталатын салықтар бойынша міндеттемелер
туындаған жағдайда, төлем көзінен ұсталатын салықтарды есептеу, ұстап
қалу және аудару бойынша салық агенті болуға міндетті.

3. Шарттың қолданылу мерзімі

      3.1. Осы Шарт 20__ жылғы «___» __________ бастап күшіне енеді
және 20___ жылғы «___» __________ дейін қолданылады.
      3.2. Осы Шартты Бағдарлама мен Қағидада көзделген жағдайларда
біржақты тәртіппен Министрлік бұзуы мүмкін.

4. Тараптардың жауапкершілігі

      4.1. Осы Шарт бойынша Тараптар осы Шарттан туындайтын
міндеттемелерді орындамағаны және (немесе) тиісінше орындамағаны үшін
осы Шартқа және Қазақстан Республикасының заңнамасына сәйкес жауапты
болады.

5. Форс-мажор

      5.1. Тараптар осы Шарт бойынша, егер орындаудың мүмкін болмауы
форс-мажорлық жағдаяттар (еңсерілмейтін күш), яғни осы жағдайларда
төтенше және шарасыз жағдаяттар (сұрапыл апат, әскери іс-қимылдар
және т.б.) салдарынан болса, өз міндеттемелерін орындамағаны не
тиісінше орындамағаны үшін жауапкершіліктен босатылады.
      5.2. Форс-мажорлық (еңсерілмейтін күш) жағдаяттар басталған
кезде осы Шарт бойынша өз міндеттемелерін орындау мүмкін емес болған
Тарап осындай жағдаяттар туралы басқа Тараптарды олар басталған
сәттен бастап он жұмыс күні ішінде хабардар етуі тиіс. Бұл ретте,
форс-мажор (еңсерілмейтін күш) жағдаяттарының сипаты, әрекет ету
кезеңі, пайда болу фактісі уәкілетті мемлекеттік органдардың тиісті
құжаттарымен расталуы тиіс.
      5.3. Уақтылы хабардар етпеген жағдайда, Тарап хабардар
етпегендіктен немесе уақтылы хабардар етпегендіктен келтірілген
шығындарды басқа Тараптарға өтеуге міндетті.
      5.4. Форс-мажор (еңсерілмейтін күш) жағдаяттарының басталуы осы
Шарттың қолданылу мерзімі олардың әрекет ету кезеңіне ұзартуды
туындатады.
      5.5. Егер осындай жағдаяттар қатарынан үш ай бойы жалғасатын
болса, онда кез-келген Тарап осы Шарт бойынша міндеттемелерін бұдан
әрі орындаудан бас тартуға құқылы.

6. Дауларды шешу

      6.1. Осы Шартты орындауға байланысты қандай да бір дау
туындаған жағдайда, Тараптардың кез-келгені келіссөздер жүргізу
жолымен барлық дауларды реттеу үшін шаралар қабылдайды.
      6.2. Егер туындаған дауды келіссөздер жүргізу жолымен шешу
мүмкін болмаса, ол дау мен оған қатысты өзге де мәселелер Қазақстан
Республикасының заңнамасына сәйкес шешіледі және реттеледі.

7. Хат-хабарлар алмасу

      7.1. Осы Шарт шеңберінде Тараптардың бір-біріне жіберетін кез
келген хат-хабары жазбаша нысанда берілетін және осы Шартқа сәйкес
қараудың ерекше тәртібі көзделген хат-хабарды қоспағанда,
тапсырылғаны туралы белгімен Тараптар хат-хабарды алған сәттен бастап
күнтізбелік 30 (отыз) күн ішінде қаралатын болады.
      7.2. Хат-хабар тиісті түрде ресімделген кезде (хат-хабар егер
ол бланкте ұсынылған және мөрмен бекітілген, оған басшы қол қойған
кезде және тіркеу нөмірі, күні болса, сондай-ақ орындаушысы
көрсетілсе, тиісінше ресімделген болып есептеледі), жеке қолға
тапсырылса, пошта немесе қатысушы Тараптың мекенжайы бойынша курьер
байланысы арқылы жеткізілсе, тиісінше ұсынылған және жіберілген болып
есептеледі.
      7.3. Осы Шарттың қолданылуы барысында Тараптардың жауапты
тұлғалары екінші Тарапқа факсимильді байланыс және/немесе электрондық
пошта арқылы ақпараттық мазмұндағы хат-хабарды жіберуі мүмкін.
      Бұл ретте жіберуші Тарап екінші Тарапқа хат-хабарды жібергенін
растауға міндетті. Растама факсимильді байланыспен қабылдап алу
туралы қабылдаушы тараптың белгісі бар барлық хат-хабардың мәтінін
қоса беру жолымен жіберілген не ойдағыдай аяқталғаны туралы
факсимильді аппараттың үзіндісі болған кезде тиісті түрде жүзеге
асырылған болып есептеледі.

8. Құпиялық

      8.1. Осы арқылы Тараптар осы Шарттың талаптарына қатысты
ақпарат, банктік құпия, сондай-ақ осы Шарттың жасалуы мен орындалуы
барысында өздері алған қаржылық, коммерциялық және өзге де ақпарат
құпия болып табылатындығына келіседі және осы Шарт пен Қазақстан
Республикасының қолданыстағы заңнамасында тікелей көзделген
жағдайларды қоспағанда үшінші тұлғаларға жария етілмейді.
      8.2. Тараптар осы Шарттың құпиялығы мен талаптарын сақтау үшін
барлық қажетті, оның ішінде құқықтық сипаттағы шараларды қабылдайды.
      8.3. Тараптардың кез келгені осы Шарттың талаптарын бұза отырып
құпия ақпаратты таратқан немесе жариялаған жағдайда, осындай
ақпаратты тарату салдарынан екінші Тарап тартуы мүмкін залалды өтей
отырып, кінәлі Тарап Қазақстан Республикасының заңнамасында көзделген
жауапкершілікте болады.

9. Қорытынды ережелер

      9.1. Компания мен Қаржы ұйымы Бағдарлама мен осы Шарт
шеңберінде комиссиялар, алымдар және (немесе) өзге де төлемдер
алмайды.
      9.2. Тараптардың құқықтық мәртебесі өзгерген жағдайда, осы Шарт
бойынша және осы Шарттың орындалуы үшін барлық құқықтар мен
міндеттер, оның ішінде даулар мен келіспеушіліктерді реттеуге
байланысты туындаған құқықтар мен міндеттер Тараптардың құқықтық
мирасқорларына ауысады.
      9.3. Егер төлем күні жұмыс емес немесе мереке күндеріне келген
жағдайда, төлем одан кейінгі жұмыс күні жүргізіледі.
      9.4. Осы Шарт, осы Шарттың ажырамас бөлігі болып табылатын
қосымшасымен бірге осы Шарттың мәніне байланысты Тараптардың толық
өзара түсіністігін білдіреді.
      9.5. Осы Шарт Тараптардың әрқайсысы үшін бірдей заңды күші бар
____ (____________) ұқсас данада мемлекеттік және орыс тілдерінде ___
(__________) данадан жасалды. Осы Шарттың мемлекеттік және орыс
тілдеріндегі мәтіндері арасында әр түрлі оқу туындаған жағдайда, осы
Шарттың мемлекеттік тілдегі нұсқасына басымдық беріледі.
      9.6. Осы Шартта көзделмеген барлық өзге жағдайларда Тараптар
Қазақстан Республикасының қолданыстағы заңнамасын басшылыққа алады.

10. Тараптардың заңды мекенжайлары, банктік деректемелері және
қолдары

Субсидиялау шартына
қосымша      

Дағдарыстан кейін қалпына келтіру бағдарламасын (бәсекеге
қабілетті кәсіпорындарды сауықтыру) іске асыру шеңберінде
20__ жылғы ___________ пайыздық ставканы субсидиялау туралы
ақпарат

      кестенің жалғасы

Басшы _________________________________           ___________________
М.О.              (Т.А.Ә.)                               (қолы)