Қазақстан Республикасының немесе оның әкімшілік-аумақтық бірлігінің саяси, экономикалық және әлеуметтік тұрақтылығына, адамдардың өмірі мен денсаулығына қауіп төндіретін жағдайларды жедел жоюды қамтамасыз ету мақсатында Қазақстан Республикасының Үкіметі ҚАУЛЫ ЕТЕДІ:
1. Қазақстан Республикасы Ішкі істер, Әділет, Қорғаныс, Төтенше жағдайлар, Көлік және коммуникация, Қаржы министрліктері, Ұлттық қауіпсіздік комитеті (келісім бойынша) облыстардың, Астана және Алматы қалаларының әкімдіктерімен бірлесіп, екі ай мерзімде қорғаныс, мемлекеттің қауіпсіздігі және қоғамдық тәртіпті қорғау мақсатында мемлекеттік органдардың қарауындағы теміржол, автомобиль, су көлігін, мемлекеттік авиацияны және азаматтық авиацияның әуе кемелерін пайдалану мәселелерін (тетігін) заңнамалық реттеу жөнінде ұсыныстар әзірлесін.
2. «Бюджеттің атқарылуы және оған кассалық қызмет көрсету ережесін бекіту туралы» Қазақстан Республикасы Үкіметінің 2009 жылғы 26 ақпандағы № 220 қаулысына (Қазақстан Республикасының ПҮАЖ-ы, 2009 ж., № 12, 86-құжат) мынадай толықтыру енгізілсін:
көрсетілген қаулымен бекітілген Бюджеттің атқарылуы және оған кассалық қызмет көрсету ережесінде:
мынадай мазмұндағы 422-1-тармақпен толықтырылсын:
«422-1. Қазақстан Республикасының немесе оның әкімшілік-аумақтық бірлігінің саяси, экономикалық және әлеуметтік тұрақтылығына, сондай-ақ адамдардың өмірі мен денсаулығына қауіп төндіретін жағдайларды жою мақсатында жүргізілген, көлік құралдарын тартумен байланысты орталық мемлекеттік органның шығыстары және/немесе орталық мемлекеттік органның өзінің теңгеріміндегі көлік құралдарын өзге мемлекеттік органға беру жөнінде келтірілген шығыстары кейіннен Қазақстан Республикасы Үкіметінің шешімі негізінде заңнамада белгіленген тәртіппен шұғыл шығындарға арналған резервтің қаражатынан өтеледі.».
3. «Әлеуметтік және криминогенді сипаттағы төтенше жағдайларды жою жөніндегі шараларды ұйымдастыру туралы» Қазақстан Республикасы Үкіметінің 1998 жылғы 9 ақпандағы № 86 қаулысының күші жойылды деп танылсын.
4. Осы қаулы қол қойылған күнінен бастап қолданысқа енгізіледі.
Қазақстан Республикасының
Премьер-Министрі К. Мәсімов