"Қазақстан Республикасындағы еңбек туралы" Қазақстан Республикасының 1999 жылғы 10 желтоқсандағы Заңының 8-бабы 2-тармағының 16) тармақшасына сәйкес және жеке және қоғамдық денсаулықты сақтау мен нығайтуға мемлекеттiң, жұмыс берушiнiң және азаматтардың өздерiнiң бiрлескен жауапкершiлiгiн iске асыру мақсатында Қазақстан Республикасының Yкiметi ҚАУЛЫ ЕТЕДІ :
1. Қоса берiлiп отырған Профилактикалық, алдын ала және мiндеттi медициналық тексерулерден өтуге тиiс адамдардың осындай тексерулерден уақтылы өтуiн қамтамасыз ету ережесi бекiтiлсiн.
2. Осы қаулы алғаш рет ресми жарияланған күнiнен бастап он күнтiзбелiк күн өткен соң қолданысқа енгiзiледі.
Қазақстан Республикасы | |
Премьер-Министрiнің | |
міндетін атқарушы |
| Қазақстан Республикасы Yкiметiнiң 2006 жылғы 8 қыркүйектегi N 856 қаулысымен бекiтiлген |
Профилактикалық, алдын ала және мiндеттi медициналық
тексерулерден өтуге тиiс адамдардың осындай тексерулерден
уақтылы өтуiн қамтамасыз ету ережесi
1. Жалпы ережелер
1. Осы Профилактикалық, алдын ала және мiндеттi медициналық тексерулерден өтуге тиiс адамдардың осындай тексерулерден уақтылы өтуiн қамтамасыз ету ережесi (бұдан әрi - Ереже) "Қазақстан Республикасындағы еңбек туралы" Қазақстан Республикасының 1999 жылғы 10 желтоқсандағы Заңына және "Азаматтардың денсаулығын қорғау туралы" Қазақстан Республикасының 2006 жылғы 7 шiлдедегi Заңына сәйкес әзiрлендi.
2. Ереже жұмыс берушiнiң профилактикалық, алдын ала және мiндеттi медициналық тексерулерден өтуге тиiс адамдардың осындай тексерулерден уақтылы өтуiн қамтамасыз ету тәртiбiн белгiлейдi.
3. Профилактикалық, алдын ала және мiндеттi медициналық тексерулерден (бұдан әрi - медициналық тексеру) өтудiң негiзгi мақсаттары денсаулықты қалыптастыру мен нығайтуға, аурулардың, оның iшiнде кәсiптiк аурулардың, уланулардың, жазатайым оқиғалардың алдын алуға, оларды анықтауға және таралуын болдырмауға, сондай-ақ қандай да бiр шаруашылық және (немесе) өндiрiстiк қызметтi жүзеге асыратын ұйымдардың қызметкерлерiнiң, адамдардың еңбек қауiпсiздiгi мен денсаулығын сақтауды қамтамасыз етуге бағытталған уақтылы медициналық тексерудi жүргiзудi қамтамасыз ету болып табылады.
4. Профилактикалық медициналық тексерулер - тегiн медициналық көмектiң кепiлдi көлемiнiң шеңберiнде диспансерлеу, серпiндi қадағалау мақсатында жыл сайын жүргiзiлетiн медициналық тексерулер (жыл сайынғы медициналық тексерулер).
Алдын ала медициналық тексерулер - жұмысқа орналасатын және оқуға түсетiн адамдардың денсаулық жағдайын анықтау, жазатайым оқиғалардың, жалпы, кәсiптiк, жұқпалы және паразитарлық аурулардың алдын алу және таралуын болдырмау мақсатында жүргiзiлетiн, оларды медициналық тексерулер.
Мiндеттi медициналық тексерулер - денсаулық жағдайын серпiндi қадағалауды, аурулардың бастапқы белгiлерiн уақтылы анықтауды, жалпы, кәсiптiк, жұқпалы және паразитарлық аурулардың алдын алуды және таралуын болдырмауды қамтамасыз ету мақсатында мерзiмдi жүргiзiлетiн халықты медициналық тексерулер (мерзiмдi тексерулер).
5. Профилактикалық, алдын ала және мiндеттi медициналық тексерулердi қажеттi материалдық-техникалық, кадр ресурстары бар және еңбекке қабiлеттiлiгi мен кәсiптiк жарамдылығына сараптама жасауға лицензиясы бар денсаулық сақтау ұйымдары жүзеге асырады.
2. Медициналық тексерулерден уақтылы өтудi қамтамасыз ету тәртiбі
6. Жұмыс берушiлер меншiк нысанына қарамастан өзiнiң қаражаты есебiнен Қазақстан Республикасының қолданыстағы заңнамасына сәйкес осы тексерулерден өтуге тиiс қызметкерлердiң медициналық тексерулерден уақтылы өтуiн қамтамасыз етедi.
7. Жұмыс берушi жыл сайын Қазақстан Республикасының қолданыстағы заңнамасына сәйкес мемлекеттiк санитарлық- эпидемиологиялық қызмет органдарымен келiсiм бойынша медициналық тексерулерден өтуге тиiс қызметкерлер әсерiне ұшырайтын өндiрiстi, цехты, мамандықтарды, зиянды, қауiптi заттар мен өндiрiстiк факторларды көрсете отырып, адамдардың аты-жөнi бойынша тiзiм жасайды және бекiтедi.
8. Жұмыс берушi жыл сайын медициналық тексерулерден өтуге тиiс адамдардың тiзiмiн бекiткеннен кейiн еңбекке қабiлеттiлiгi мен кәсiптiк жарамдылығына сараптама жасауға лицензиясы бар денсаулық сақтау ұйымдарымен медициналық тексерулердi жүргiзуге шарт жасасады.
9. Жұмыс берушi бекiткен тiзiмге сәйкес қызметкерлердің медициналық тексерулерден өту кестесiн бекiтетiн жауапты адамдарды жұмыс берушi тағайындайды.
10. Медициналық тексеруден өтуге тиiс қызметкерлер бекiтiлген кестелерге сәйкес тиiстi шарттар жасалған денсаулық сақтау ұйымдарына жiберiледi.
11. Жұмыс берушілер Қазақстан Республикасының Yкiметi бекiтетiн тегiн медициналық көмектiң кепiлдi көлемiнiң - тiзбесiне сәйкес профилактикалық медициналық тексеруден өтуге тиiс адамдардың осындай тексерулерден өтуi үшiн жағдай жасайды.
12. Жұмыс берушi профилактикалық, алдын ала және мiндеттi медициналық тексерулерден өтуге тиiс адамдардың осы тексерулерден уақтылы өтуiн ұйымдастыруға жауапты болады.
13. Профилактикалық, алдын ала және мiндеттi медициналық тексерулерден өтудiң уақтылығын мемлекеттiк санитарлық-эпидемиологиялық қызмет органдары, медициналық қызмет көрсету саласындағы бақылау жөнiндегi мемлекеттiк органдар мен еңбек жөнiндегi уәкiлеттi органның мемлекеттiк еңбек инспекторлары бақылайды.