Мемлекеттiк қарыздар мен гранттарды жоспарлау, тарту және пайдалану тиімділігi мәселелері жөнiндегі үйлестiру кеңесін құру туралы

Қазақстан Республикасы Үкіметінің 2005 жылғы 19 қазандағы N 1047 Қаулысы

Жаңартылған

      Мемлекеттiк қарыздар мен гранттарды жоспарлау, тарту және пайдалану тиімділігi мәселелерi жөнiндегi үйлестірудi күшейту мақсатында Қазақстан Республикасының Үкіметi ҚАУЛЫ ЕТЕДI:

      1. Қосымшаға сәйкес құрамда Мемлекеттік қарыздар мен гранттарды жоспарлау, тарту және пайдалану тиімділігі мәселелерi жөнiнде үйлестіру кеңесi құрылсын.

      2. Қоса беріліп отырған Мемлекеттiк қарыздар мен гранттарды жоспарлау, тарту және пайдалану тиімдiлігі мәселелерi жөнiндегi үйлестіру кеңесi туралы epeжe бекiтiлсiн.

      3. Осы қаулы қол қойылған күнiнен бастап қолданысқа енгізіледі.

      Қазақстан Республикасының
      Премьер-Министрі

Қазақстан Республикасы 
Үкiметiнiң       
2005 жылғы 19 қазандағы
N 1047 қаулысына    
қосымша        

      РҚАО-ның ескертпесі!
      Қосымшаны жаңа редакцияда енгізу көзделген - ҚР Үкіметінің 2010.06.18 № 612 Қаулысымен (жариялануға жатпайды).

 Мемлекеттiк қарыздар мен гранттарды жоспарлау,
тарту және пайдалану тиiмдiлігі мәселелерi жөнiндегi
үйлестiру кеңесiнің құрамы

      Ескерту. Қосымшаға өзгеріс енгізілді - ҚР Үкіметінің 2011.06.24 № 705 Қаулысымен.

Келімбетов            - Қазақстан Республикасының Экономикалық
Қайрат Нематұлы         даму және сауда министрі, төраға

Супрун                - Қазақстан Республикасының
Виктор Васильевич       Экономика және бюджеттiк жоспарлау
                        вице-министрi, төрағаның орынбасары

Сағындықов            - Қазақстан Республикасы Экономика және
Самат Алпысұлы          бюджеттiк жоспарлау министрлiгi
                        Инвестициялық саясат және жоспарлау
                        департаментiнiң директоры, хатшы

Айтжанов              - Қазақстан Республикасының Ауыл
Дулат Нулиұлы           шаруашылығы вице-министрi

Баталов               - Қазақстан Республикасының Индустрия
Асқар Болатұлы          және сауда вице-министрi

Өтеулина              - Қазақстан Республикасының Бiлiм және
Хафиза Мұхтарқызы       ғылым вице-министрi

Лу Брефорт            - Қазақстан Республикасындағы
                        Дүниежүзілік Даму Банкi өкiлдігінiң
                        директоры (келiсiм бойынша)

Симоне Вунш           - Қазақстан Республикасындағы Германия
                        экономикасын қалпына келтiру жөнiндегi
                        кредиттiк ведомствоның директоры
                        (келiсiм бойынша)

Ник Зайнал Абидин     - Қазақстан Республикасындағы Ислам Даму
                        Банкi өңiрлiк өкілдiгiнiң директоры
                        (келiсiм бойынша)

Анна Брамвелл         - Қазақстан Республикасындағы Еуропа
                        Комиссиясының өкiлдiгi техникалық
                        жәрдемдесу бөлiмiнiң басшысы (келiсiм
                        бойынша)

Әбдімомынова Лейла    - Астана қаласындағы Еуропа Қайта Құру
                        және Даму Банкi өкiлдiгiнiң директоры
                        (келiсiм бойынша)

Юрико Шоджи           - Бiрiккен Ұлттар Ұйымының Даму
                        бағдарламасы өкілдігінiң директоры
                        (келiсiм бойынша)

Айманбетова           - Қазақстан Республикасы Ұлттық Банкi
Гүлбану Зарлыққызы      Төрағасының орынбасары

Бiрәлиев              - Қазақстан Республикасының Қоршаған
Әлжан Хамидоллаұлы      ортаны қорғау вице-министрi

Жошыбаев              - Қазақстан Республикасы Сыртқы iстер
Рәпiл Сейiтханұлы       министрiнiң орынбасары

Қасымбек              - Қазақстан Республикасының Көлiк
Жеңiс Махмұдұлы         және коммуникация вице-министрi

Құсдәулетов           - Қазақстан Республикасының Әдiлет
Дулат Рашитұлы          вице-министрi

Абе Наоми             - Жапония халықаралық ынтымақтастық 
                        агенттiгiнiң Қазақстандағы үйлестiрушiсi

Шарман Алмаз          - Америка Кұрама Штаттарының Орталық
                        Азиядағы халықаралық ынтымақтастық 
                        агенттiгiнiң Қазақстан бойынша 
                        бағдарламалардың үйлестiрушiсi

Бадикова              - Көшi-қон жөнiндегi халықаралық ұйымның
Екатерина Викторовна    Қазақстандағы миссиясы басшысының
                        мiндетiн атқарушы

Вермерт Стивен        - Азия Даму Банкiнiң Қазақстан 
                        Республикасындағы өкiлдiгiнiң директоры

Шин Ы Чоль            - Корея халықаралық ынтымақтастық
                        жөнiндегi агенттiгiнiң Қазақстандағы
                        өкiлдiгiнiң директоры

Бабақұмаров           - Қазақстан Республикасының
Ержан Жалбақұлы         Мәдениет және ақпарат вице-министрi

Омаров                - Қазақстан Республикасының
Қадыр Тоқтамысұлы       Денсаулық сақтау вице-министрi

Сабдалин              - Қазақстан Республикасының Төтенше
Абылай Қиялұлы          жағдайлар вице-министрi

Сәтқалиев             - Қазақстан Республикасының
Алмасадам Майданұлы     Энергетика және минералдық ресурстар
                        вице-министрi

Сұлтанов              - Қазақстан Республикасының Қаржы
Бақыт Тұрлыханұлы       вице-министрi      
       Ескерту. Құрамға өзгерту енгізілді - ҚР Үкіметінің 2006.07.13 N 668, 2007.03.20 N 224 қаулыларымен.

Қазақстан Республикасы  
Үкiметiнiң         
2005 жылғы 19 қазандағы 
N 1047 қаулысымен   
бекiтiлген       

  Мемлекеттiк қарыздар мен гранттарды жоспарлау,
тарту және пайдалану тиімділігi мәселелерi жөнiндегі
үйлестiру кеңесi туралы ереже

  1. Жалпы ережелер

      1. Мемлекеттiк қарыздар мен гранттарды жоспарлау, тарту және пайдалану тиімділігі мәселелерi жөнiндегі үйлестiру кеңесi (бұдан әрi - Кеңес) Қазақстан Республикасының Үкіметi жанындағы консультативтік-кеңесші орган болып табылады.

      2. Кеңес өз қызметiнде Қазақстан Республикасының Конституциясын, өзге де нормативтік құқықтық кесiмдерiн, Қазақстан Республикасының халықаралық шарттарын, сондай-ақ осы Ереженi басшылыққа алады.

      3. Кеңес өз қызметiн Қазақстан Республикасының мемлекеттiк органдарымен, сондай-ақ қызметi Кеңестiң мақсаттары мен міндеттерiне қайшы келмейтін қарыз берушілермен және донорлармен өзара iс-қимыл жасай отырып жүзеге асырады.

      4. Кеңес шешімдерi ұсынымдық сипатта болады.

  2. Кеңестiң мiндеттерi мен функциялары

      5. Кеңестiң негiзгi міндеттерi:
      1) Қазақстан Республикасы мемлекеттік ұйымдарының қарыз берушiлермен және донорлармен ынтымақтастығының қысқа мерзiмдi және орта мерзiмдi мiндеттерi жөніндегі ұсыныстарды қалыптастыру;
      2) мемлекеттік қарыздар мен гранттарды жоспарлауға, тартуға және пайдалануға байланысты проблемалық мәселелердi талдауды жүзеге асыру, сондай-ақ оларды шешу жөнiнде ұсыныстар әзiрлеу;
      3) Қазақстан Республикасының мемлекеттiк ұйымдарына мемлекеттiк қарыздар мен гранттарды жоспарлау, тарту және тиімдi пайдалану жөнiндегi мәселелерді шешуге жәрдемдесу;
      4) халықаралық құқық нормаларына сәйкес мемлекеттiк қарыздар мен гранттарды жоспарлау, тарту және пайдалану саласындағы Қазақстан Республикасының заңнамасын жетілдiру жөніндегi ұсынымдар мен ұсыныстарды әзiрлеу болып табылады.

      6. Негізгі мiндеттердi орындау мақсатында Кеңес мынадай функцияларды атқарады:
      1) мемлекеттік қарыздар мен гранттарды тарту үшін қолайлы жағдайлар жасау жөніндегі ұсыныстарды, мемлекеттiк қарыздар мен гранттарды жоспарлауды, тартуды және пайдалануды үйлестiрудiң проблемалық мәселелерiн қарайды;
      2) мемлекеттік қарыздар мен гранттарды тиімді жоспарлау, тарту және пайдалану мәселелерi жөніндегі ұсыныстарды, ұсынымдар мен консультативтiк қорытындыларды дайындайды және Қазақстан Республикасының Үкiметіне енгізеді;
      3) мемлекеттік қарыздар мен гранттарды тарту және пайдалану жөнiндегi қызметтi жүзеге асыратын Қазақстан Республикасының мемлекеттiк органдарына консультациялық жәрдем көрсетеді;
      4) Қазақстан Республикасы ұлттық заңнамасының мемлекеттiк қарыздар мен гранттарды жоспарлау, тарту және тиімді пайдалану мәселелерi бoйынша халықаралық құқық нормаларына сәйкес келу мәнiне талдау жасайды.

  3. Кеңестiң құқықтары

      7. Кеңес өз мiндеттерiн жүзеге асыру мақсатында Қазақстан Республикасының заңнамасында белгiленген тәртiппен:
      1) мемлекеттiк органдар мен ұйымдардан қажетті құжаттарды, материалдарды және ақпаратты сұратады;
      2) мемлекеттік қарыздар мен гранттарды жоспарлау, тарту және тиімдi пайдалану мәселелерi жөнiнде ұсынымдар бередi;
      3) мемлекеттік қарыздар мен гранттарды үйлестiруге байланысты мәселелер жөнiнде Қазақстан Республикасының Үкіметіне ұсыныстар енгізеді;
      4) Кеңес құзыретiне кiретін мәселелер бойынша Қазақстан Республикасының мемлекеттiк ұйымдарының өкiлдерiн, қарыз берушілер мен донорларды Кеңес отырыстарына шақырады және тыңдайды;
      5) Кеңес шеңберінде әлеуметтiк-экономикалық қызметтің жекелеген бағыттары бойынша арнайы жұмыс топтарын құрады.

  4. Кеңес қызметін ұйымдастыру

      8. Кеңестi төраға басқарады.

      9. Кеңес төрағасы:
      1) Кеңес жұмысына жалпы басшылықты жүзеге асырады;
      2) Кеңес отырыстарында төрағалық етеді;
      3) Қазақстан Республикасы Үкiметінің және Қазақстан Республикасы Премьер-Министрінің алдында Кеңес жұмысының қорытындылары туралы есеп бередi.

      10. Кеңес хатшысы:
      1) Кеңес жұмысының жоспарын әзiрлеудi қамтамасыз етедi;
      2) Кеңес отырыстары күн тәртiбiнiң жобасын қалыптастырады;
      3) Кеңес отырыстарына материалдарды, сондай-ақ хаттамалық шешімдердiң жобаларын дайындауды ұйымдастырады;
      4) Кеңес мүшелерiн және қарыз берушiлер мен донорлардан шақырылған өкiлдердi Кеңестiң кезектi отырысының өткізiлетiн орны, уақыты және күн тәртiбi туралы хабардар етедi;
      5) Кеңес отырыстары хаттамаларының үзiндiлерiн өз қолымен растайды.

      11. Кеңес отырыстары қажеттілігiне қарай, бiрақ кемiнде жылына бiр рет өткiзiледi және егер Кеңес мүшелерінің жалпы санының кемiнде үштен екiсi қатысса, заңды болып саналады.

      12. Төраға болмағанда отырыстарға Кеңес төрағасының орынбасары төрағалық етеді.

      13. Кеңес шешімдерi ашық дауыс берумен қабылданады және егер олар үшін қатысып отырған Кеңес мүшелерiнің басым көпшілігі дауыс бepce, қабылданды деп саналады. Қабылданған шешімдер хаттамамен pесімделеді.

      14. Шешім қабылдау кезiнде Кеңес мүшелерi тең дауысқа ие. Дауыстар тең болған жағдайда, төрағалық етуші дауыс берген шешiм қабылданды деп саналады.

      15. Кеңес мүшелерінің ерекше пiкiрге құқығы бар, ол білдiрiлген жағдайда жазбаша түрде баяндалуы және хаттамаға қоса берілуi тиіс.

      16. Қажет болған жағдайда Кеңес шешімдерi Қазақстан Республикасының мүдделі мемлекеттiк органдарына Кеңес отырыстарының хаттамаларынан үзінділер жіберу жолымен жеткiзіледi.
      РҚАО-ның ескертпесі!
      17-тармаққа өзгерту енгізу көзделген - ҚР Үкіметінің 2010.06.18 № 612 Қаулысымен (жариялануға жатпайды).
      17. Кеңестің жұмыс органының функцияларын Қазақстан Республикасы Экономика және бюджеттік жоспарлау министрлігі жүзеге асырады.