Мемлекеттiк меншiктi жекешелендiруден келiп түсетiн қаражатты тиiмдi пайдалану және Қазақстан Республикасында мемлекет иелiгiнен алу мен жекешелендiрудiң 1993-1995 жылдарға /II кезең/ арналған Ұлттық бағдарламасын қолдау мақсатында қаулы етемiн:
1. Жекешелендiрудi қолдауға бағытталатын қаржы үлесi мемлекеттiк меншiктi /мемлекеттiк ауылшаруашылық кәсiпорындарынан басқаларын/ жекешелендiруден республикалық бюджетке келiп түсетiн қаражаттың проценттiк арақатынасына қарай мөлшерленедi деп белгiленсiн.
2. Инвестициялық жобалар осы аталған қаражат есебiнен экономикалық сараптан өткiзiлгеннен кейiн қаржыландырылады деп белгiленсiн.
Инвестициялық жобаларды сараптан өткiзу жөнiнде тапсырыс берушiлер - Қазақстан Республикасының Мемлекеттiк мүлiк жөнiндегi мемлекеттiк комитетi мен инвестициялық қаржы алушы кәсiпорындар.
3. Осы қаулыны жүзеге асыру жөнiндегi жұмыс органы болып Қазақстан Республикасының Мемлекеттiк жекешелендiру қоры белгiленсiн.
4. Қазақстан Республикасының Мемлекеттiк жекешелендiру қоры техникалық-экономикалық негiздемелерге, жобалар мен бағдарламалар тиiмдiлiгiнiң есептерiне /бизнес-жоспарларға/ және инвестициялық қаражат алу үшiн қажеттi басқа да құжаттарға негiзгi талаптарды бiр ай мерзiм iшiнде әзiрлесiн.
5. Қазақстан Республикасында жекешелендiрудi қолдауға бағытталатын қаражатты жұмсаудың тәртiбi туралы Ереже бекiтiлсiн /қоса берiлiп отыр/.
6. Осы қаулының орындалуын бақылау Қазақстан Республикасының Мемлекеттiк мүлiк жөнiндегi мемлекеттiк комитетiне жүктелсiн.
Қазақстан Республикасының
Президентi
Қазақстан Республикасы
Президентiнiң
1994 жылғы 20 наурыз
N 1611 қаулысымен
Бекiтiлген
Қазақстан Республикасында жекешелендiрудi қолдауға
бағытталатын қаражатты жұмсаудың тәртiбi туралы
ЕРЕЖЕ
Осы Ереже Қазақстан Республикасында Мемлекет иелiгiнен алу мен жекешелендiрудiң 1993-1995 жылдарға /II кезең/ арналған ұлттық бағдарламасына сәйкес әзiрленген және Қазақстан Республикасында жекешелендiрудi қолдауға бағытталатын қаражатты жұмсаудың тәртiбiн белгiлейдi.
1. Жекешелендiрудi қолдауға бағытталатын қаражат мемлекет иелiгiнен алу мен жекешелендiру процестерiне, түрлi салаларда бәсекелестiктiң дамытылуына, экономиканың құрылымдық жағынан қайта бағдарлауына және республиканың экспорттық әлеуетiнiң арттырылуына жәрдемдесуге тиiс.
2. Аталған қаражат қайтарымсыз негiзде:
Қазақстан Республикасында Мемлекет иелiгiнен алу мен жекешелендiрудiң 1993-1995 жылдарға /II кезең/ арналған ұлттық бағдарламасын жүзеге асыру жөнiндегi шығысқа /жарнамаға, әдiстемелiк әдебиет шығаруға жұмсалатын шығын, аукциондар мен тендерлер өткiзуге байланысты шығыс/;
жекешелендiруге жататын кәсiпорындарды санациялауға, сондай-ақ оны жүзеге асырудың орындылығын экономикалық сараптауға;
жекешелендiру бағдарламасы шегiнде жобаларды экономикалық сараптау жұмыстарын қаржыландыруға;
кәсiпорындарды жекешелендiруден кейiнгi кезеңде қолдауға бөлiнедi.
3. Қаржы министрлiгi жоғарыда аталған қаражатты әр айдың 30-да Қазақстан Республикасы Мемлекеттiк мүлiк жөнiндегi мемлекеттiк комитетiнiң есепшотына аударады.
4. Жекешелендiрудi қолдауға бағытталатын қаражатты жұмсау туралы шешiмдi Қазақстан Республикасының Мемлекеттiк жекешелендiру қорының /бұдан әрi - Қор/ ұсынуы бойынша Қазақстан Республикасының Мемлекеттiк мүлiк жөнiндегi мемлекеттiк комитетi Қазақстан Республикасының Қаржы министрлiгiмен бiрлесiп қабылдайды.
5. Ұсынылатын жобаларды қабылдау мен қарауды, инвестиция объектiлерi мен бағытын таңдауды, тәуелсiз сарапшылар тартуды жүзеге асыратын жұмыс органы - Қор.
6. Министрлiктер, ведомстволар, кәсiпорындар және басқа да шаруашылық жүргiзушi субъектiлер аталған қаражатты алу туралы ұсыныстарды Қорға мерзiмiнде және қабылданған нысандар бойынша жасап, мына материалдарды: белгiленген ретпен бекiтiлген техникалық-экономикалық негiздемелердi, жобалар мен бағдарламалар тиiмдiлiгiнiң есептерiн /бизнес-жоспарларды/, аудиторлық анықтаманы және басқа да негiздеушi материалдарды тапсырады.
Құжаттар берiлген кезiнен бастап 30 күннен аспайтын мерзiм iшiнде қаралады.
7. Экономикалық сарапты қаржыландыру тапсырысшы мен тәуелсiз сарапшы арасындағы шартты негiзде жүзеге асырылып, шығын инвестициялық жобалардың құнына, ал жеке жобалар бойынша жекешелендiрiлген жағдайда - объектiлердiң құнына жатқызылады.
8. Аталған қаражат есебiнен қаржыландырылатын инвестициялар жөнiндегi бухгалтерлiк есеп республикалық бюджет есебiнен бөлiнетiн күрделi қаржы үшiн белгiленген ретпен дайындалып, Қазақстан Республикасының Мемлекеттiк мүлiк жөнiндегi мемлекеттiк комитетiне берiледi.