РҚАО-ның ескертпесі!
      Осы бұйрық 11.04.2019 бастап қолданысқа енгізіледі

      "Стандарттау туралы" 2018 жылғы 5 қазандағы Қазақстан Республикасы Заңының 9-бабының 13) тармақшасына сәйкес БҰЙЫРАМЫН:

      1. Қоса беріліп отырған Стандарттау жөніндегі техникалық комитеттерді құру, жұмыс істеу және тарату қағидалары бекітілсін.

      2. Қазақстан Республикасының Индустрия және жаңа технологиялар министрінің міндетін атқарушының мынадай:

      1) "Стандарттау жөніндегі техникалық комитеттердің құрылу, жұмыс істеу және таратылу ережесін бекіту туралы" 2010 жылғы 23 сәуірдегі № 42 (Нормативтік құқықтық актілерді мемлекеттік тіркеу тізілімінде № 6276 болып тіркелген, "Егемен Қазақстан" газетінде 2010 жылғы 28 тамызда № 351-352 26195 жарияланған);

      2) "Стандарттау жөніндегі техникалық комитеттердің құрылу, жұмыс істеу және таратылу ережесін бекіту туралы" Қазақстан Республикасы Индустрия және жана технологиялар министрінің міндетін атқарушының 2010 жылғы 23 сәуірдегі № 42 бұйрығына өзгерістер мен толықтырулар енгізу туралы" 2013 жылғы 14 тамыздағы № 250 (Нормативтік құқықтық актілерді мемлекеттік тіркеу тізілімінде № 8650 болып тіркелген, "Егемен Қазақстан" газетінде 2013 жылғы 5 желтоқсанда № 268 (28207) жарияланған) бұйрықтарының күші жойылды деп танылсын.

      3. Қазақстан Республикасы Инвестициялар және даму министрлігінің Техникалық реттеу және метрология комитеті заңнамада белгіленген тәртіппен:

      1) осы бұйрықты Қазақстан Республикасы Әділет министрлігінде мемлекеттік тіркеуді;

      2) осы бұйрық мемлекеттік тіркелген күнінен бастап күнтізбелік он күн ішінде қазақ және орыс тілдерінде Қазақстан Республикасы Нормативтік құқықтық актілерінің эталондық бақылау банкіне ресми жариялау және енгізу үшін "Республикалық құқықтық ақпарат орталығы" шаруашылық жүргізу құқығындағы республикалық мемлекеттік кәсіпорнына жіберуді;

      3) осы бұйрықты Қазақстан Республикасы Инвестициялар және даму министрлігінің интернет-ресурсында орналастыруды;

      4) осы бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде Қазақстан Республикасы Инвестициялар және даму министрлігінің Заң департаментіне осы тармақтың 1), 2) және 3) тармақшаларына сәйкес іс-шаралардың орындалуы туралы мәліметтерді ұсынуды қамтамасыз етсін.

      4. Осы бұйрықтың орындалуын бақылау жетекшілік ететін Қазақстан Республикасының Инвестициялар және даму вице-министріне жүктелсін.

      5. Осы бұйрық 2019 жылғы 11 сәуірден бастап қолданысқа енгізіледі және ресми жариялануға жатады.

Стандарттау жөніндегі техникалық комитеттерді құру, жұмыс істеу және тарату қағидалары

1- тарау. Жалпы ережелер

      1. Осы Стандарттау жөніндегі техникалық комитеттерді құру, жұмыс істеу және тарату қағидалары (бұдан әрі – Қағидалар) "Стандарттау туралы" 2018 жылғы 5 қазандағы Қазақстан Республикасы Заңының 9-бабының 13) тармақшасына сәйкес әзірленді және стандарттау жөніндегі техникалық комитеттерді құру, жұмыс істеу және тарату тәртібін айқындайды.

      2. Стандарттау жөніндегі техникалық комитеттер (бұдан әрі – ТК) ТК-ға бекітілген салада ұлттық стандарттау жүйесін дамыту үшін ұлттық стандарттау жүйесі субъектілерінің ерікті қатысуының қағидаттары негізінде экономика салаларында құрылады.

      Стандарттау жөніндегі ұлттық орган (бұдан әрі – СҰО) базасында ТК-ны құру рұқсат етіледі.

      3. ТК-ны құру, қызметін үйлестіру, тарату, сондай-ақ ұлттық стандарттау жүйесінің тізбесіне енгізуді СҰО жүзеге асырады.

      4. ТК-ны құруға өтінім берушілер тиісті салада ұлттық стандарттау жүйесінің мүдделі субъектілері бола алады.

      5. ТК-ның құрамына тиісті салада ұлттық стандарттау жүйесінің мүдделі субъектілерінің өкілдері кіреді.

      ТК-ның құрамына ТК жұмысының айқындығын қамтамасыз ету үшін ТК отырыстарында дауыс беру құқығынсыз тәуелсіз сарапшы-бақылаушы ретінде СҰО өкілі қосылады.

      6. Ұлттық стандарттау жүйесінің мүдделі субъектілері СҰО-ға берілген өтінімі негізінде ТК-ның құрамына кіреді және ТК құрамынан шығады.

      7. ТК қызметіне екі жыл бойы қатыспаған ТК мүшелері ТК құрамынан шығарылады және ТК отырысының хаттамасы негізінде СҰО шешімі бойынша басқа мүдделі өкілдермен ауыстырылады.

      8. ТК-ның қызметін ақпараттық-талдамалық және ұйымдастырушылық қамтамасыз етуді оның базалық ұйымы жүзеге асырады.

      9. ТК қызметін қамтамасыз ету, хат-хабар жүргізу, ТК отырысына құжаттарды дайындау және ресімдеу мақсатында төраға, оның орынбасары (қажет жағдайда) мен хатшысынан тұратын хатшылық жұмыс істейді.

      10. Хатшылық ТК-ның қызметін үйлестіру, хат-хабарларды жүргізу, құжаттарды дайындау және ресімдеу мақсатында ТК-ның мүшелері арасында базалық ұйымнан тағайындалады. ТК төрағасының және оның орынбасарының функциялары ҚР СТ 1.15 "Стандарттау жөніндегі техникалық комитеттер. Құру және жұмыс істеу тәртібі" (бұдан әрі – негізге алынатын ұлттық стандарт) стандартында айқындалған.

      11. Хатшылық базалық ұйым бланкінде немесе базалық ұйым деректемелерімен ТК бланкінде хат-хабар жүргізеді.

      12. ТК қызметі ҰСО ресми сайтында орналастырылған "Электрондық техникалық комитеттер" (бұдан әрі – ақпараттық жүйе) ақпараттық жүйе арқылы немесе жазбаша хат-хабар жүргізу жолымен жүзеге асырылады.

      Ақпараттық жүйе арқылы ТК жұмысының тәртібі негізге алынатын ұлттық стандартпен белгіленеді.

2-тарау. Стандарттау жөніндегі техникалық комитетін құру тәртібі

      13. ТК қолданыстағы ТК-мен стандарттау объектілерін олардың қайталануын болдырмау жағдайында құрылады.

      14. ТК-ны құру туралы өтінішті ТК құру қажеттігі мен орындылығы туралы негіздемесін, сондай-ақ кәсіпкерлік қызметті жүзеге асыратын жеке тұлғаның немесе ТК-ны құруға негіз болатын заңды тұлғаның, оның қызметі және ТК жұмыс істеуіне жағдай жасау мүмкіндіктері туралы жан-жақты ақпараты бар толық және қысқартылған атауы көрсетіліп, еркін нысанда ұлттық стандарттау жүйесінің мүдделі субъектісі СҰО-ға жібереді.

      Өтінімге мыналар:

      1) ТК-ға бекітілген стандарттау объектілерінің тізбесі немесе ТК қызметінің саласы;

      2) ТК-ның жұмыс жоспары;

      3) ТК жұмысына қатысуға ресми (жазбаша) келісімі бар ТК-ға мүше ұйымдар тізбесі;

      4) оның базасында ТК құрылатын ұйымның (салыстыру үшін түпнұсқасы ұсынылмаған жағдайда, нотариалдық куәландырылған) құрылтай құжатының көшірмесі қоса беріледі.

      15. Ұлттық стандарттау жүйесінің мүдделі субъектілерінен өтінімді алған сәттен бастап, СҰО аталған салада ТК болмауына және ұсынылған ақпараттың нақтылығына өтінімді күнтізбелік 30 күн ішінде қарастырады.

      16. Өтінімді қарастыру қорытындысы бойынша СҰО:

      1) ТК-ны құру туралы;

      2) негізделген ескертулер мен оларды жоюға мерзімдерін көрсетіп өтінім беруші ұйымға өтінімді пысықтауға қайтару туралы;

      3) бас тарту себептерінің дәлелді негіздемесімен өтінімді қабылдамау туралы шешім қабылдайды.

      17. СҰО ТК-ға сәйкестендіру (реттік) нөмір мен атау береді. Техникалық комитеттің белгілеуі "ТК" әріптері мен сәйкестендіру нөмірінен (мысалы: ТК 156) тұрады.

      18. ТК туралы мәліметтер ұлттық стандарттау жүйесінің тізбесіне енгізіледі.

      19. ТК-ны құрған күннен бастап екі ай ішінде ТК хатшысы ТК ережесі мен құрылымын дайындайды және СҰО-ға келісуге жібереді.

      20. ТК құрылымы ерікті нысанда мынадай құжаттардың қосымшаларымен бірге ұсынылады:

      1) ТК төрағасы, төраға орынбасары, жауапты хатшысынан тұратын ТК хатшылығының құрамы;

      2) кіші комитеттердің (бұдан әрі – КК) (бар болса) құрамы туралы мәліметтер;

      3) әрбір КК стандарттау (қызмет ету салалары) объектілері, оның құрамы және хатшылық мекенжайы көрсетілетін КК тізбесі (бар болса).

      21. ТК-да стандарттау салаларының нақты бір бағытында бір немесе бірнеше КК құру рұқсат етіледі.

      22. Әрбір КК өзінің меншікті сәйкестендіру (реттік) нөмірі мен атауы беріледі. КК белгісі ТК белгісінен, көлбеу сызық, "КК" әріптерінен, КК нөмірінен және оның атауынан тұрады. Қысқаша атауы атаусыз белгілерді қамтиды (мысалы: ТК 156/КК 1).

      23. КК құрылымын, құрамын өзгерту ТК отырыстарында бекітіледі. ТК хатшылығы КК құрылымы, құрамын өзгертуді бекіткеннен кейін күнтізбелік 10 күн ішінде тиісті ақпаратты СҰО жолдайды.

      24. ТК ережесі мен құрылымын СҰО келісілгеннен кейін ТК төрағасы бекітеді және ақпараттық жүйеде орналастырылады.

      25. ТК қызметіне қатысты барлық өзгерістер ТК отырысынан және ТК төрағасы отырыс хаттамасын бекіткеннен кейін СҰО күнтізбелік 30 күн ішінде келісіледі.

3-тарау. Стандарттау жөніндегі техникалық комитетінің жұмыс істеу тәртібі

      26. ТК-ның жұмысы шет елдермен тауарлық өнім (технологиялар, көрсетілетін қызметтер) алмасу кезінде техникалық кедергілерді болдырмау үшін ұлттық стандарттардың сапалы деңгейін арттыруға бағытталған.

      ТК мынадай функцияларды ұйымдастырады және жүзеге асырады:

      1) стандарттау жөніндегі құжаттарды әзірлеуге қатысады және оларды әзірлейді;

      2) бекітіп берілген қызмет саласына сәйкес ұлттық стандарттар жобаларының мазмұнын стандарттау жөніндегі техникалық комитеттің мүшелерімен техникалық талқылауды ұйымдастырады;

      3) ұлттық стандарттау жоспарын қалыптастыру жөнінде ұсыныстар енгізеді;

      4) мемлекеттік органдарға, заңды немесе жеке тұлғаларға өз құзыретіне кіретін мәселелер бойынша базалық ұйым атынан сұрау салулар жолдайды;

      5) стандарттау саласындағы ғылыми зерттеулерге қатысады;

      6) стандарттау жөніндегі халықаралық және өңірлік ұйымдардың стандарттау жөніндегі техникалық комитеттерінің жұмысына қатысады;

      7) бекітіп берілген стандарттау объектілері бойынша мониторингті жүзеге асырады;

      8) Қазақстан Республикасының стандарттау саласындағы заңнамасында көзделген өзге де өкілеттіктерді жүзеге асырады.

      27. Ұлттық стандарттарды әзірлеген жағдайда ТК жоба мазмұнына міндетті техникалық талқылау өткізеді.

      28. Жоба мазмұнын техникалық талқылау мынадай процестерді қамтиды:

      1) ұлттық стандарт жобасында ұсынылған терминология талданады;

      2) ұлттық стандартты енгізуге техникалық дайындық анықталады;

      3) техникалық талаптардың қолданыстағы ұлттық стандарттарда қайталануы талданады;

      4) Қазақстан Республикасының заңнамасына сәйкестігіне талдау жүргізіледі;

      5) ғылыми зерттеулердің болуы зерделенеді.

      29. ТК-ның мүшелері ТК отырыстарында жоба мазмұнын техникалық талқылау шеңберінде ерікті өз пікірін білдіреді.

      30. ТК мүшелерінің барлық ұстанымы хаттамада белгіленеді, оған ТК төрағасы мен хатшысы қол қояды. Хаттама стандарт ісін толықтыру үшін СҰО мен ұлттық стандарт жобасын әзірлеушіге жолданады.

      31. ТК жұмыс жоспары жоспарланған жұмыстарды орындайтын жыл алдындағы жылдың 1 шілдесіне дейін СҰО жіберіледі.

      32. ТК қызметі туралы есеп жыл қорытындысы бойынша есепті кезеңнен кейінгі жылдың 5 қаңтарына дейін ұсынылады.

      СҰО ТК-ның қызметіне талдау өткізеді, оның қорытындысы бойынша ҚР Ұ 50.1.7 "Стандарттау жөніндегі техникалық комитеттер қызметінің тиімділігін бағалау әдістемесіне" сәйкес рейтингілік баға айқындалады.

      33. Хатшылық негізге алынатын ұлттық стандартта айқындалған функцияларды тиісті орындамаған жағдайда, СҰО хатшылықты жүргізуді ТК мүше - ұйымдармен келісе отырып, осы ТК құрамына кіретін басқа ұйымға хатшылық қызметін беру туралы шешім қабылдайды.

      34. Базалық ұйымды қайта ұйымдастыру немесе тарату кезінде, тиісті ақпаратты хатшылық сәйкес шешім қабылданған сәттен бастап күнтізбелік 30 күн ішінде СҰО жібереді.

      35. ТК халықаралық стандарттау жөніндегі ұйымдардың ТК, мемлекетаралық ТК-ның өзара іс-қимылы СҰО арқылы жүзеге асырылады.

      36. ТК-ның халықаралық стандарттау жөніндегі ұйымдардың ТК, мемлекетаралық ТК кіруі үшін өтінім СҰО жолданады.

      37. ТК-ның халықаралық стандарттау жөніндегі ұйымдардың ТК өзара іс-қимылы бойынша жұмыстарды жүргізу үшін міндетті шарт халықаралық стандарттау жөніндегі ұйымдардың ТК хатшылығынан түсетін стандарттардың жобаларын аудару үшін стандарттау жөніндегі халықаралық ұйымдардың ресми тіліне сәйкес келетін шетел тілін білетін маман болуы қажет.

      38. Халықаралық стандарттау жөніндегі ұйымдардың ТК, мемлекетаралық ТК құрамына кірген ТК мынадай функциялар атқарады:

      1) стандарттау жөніндегі құжаттардың жобаларын қарастырады және олар бойынша ұсыныстар мен ескертулерді СҰО ұсынды;

      2) стандарттау жөніндегі құжаттарды әзірлеуге қатысады;

      3) стандарттау жөніндегі құжаттарды әзірлеу кезінде қатысатын сарапшылар мен қадағалаушыларды ұсынады;

      4) стандарттау жөніндегі құжаттар жобалары бойынша дауыс беру сатыларында тиісті қорытынды әзірлейді және оларды СҰО жолдайды;

      5) халықаралық стандарттау жөніндегі ұйымдардың ТК, мемлекетаралық ТК отырыстарына қатысады.

4-тарау. Стандарттау жөніндегі техникалық комитетін тарату тәртібі

      39. ТК мынадай жағдайларда:

      1) осы Қағидаларда және негізге алынатын ұлттық стандартта көрсетілген функцияларды орындамаған кезде;

      2) ТК-ның бастамасы (негіздемесі) бойынша;

      3) екі жыл бойы қанағаттанарлықсыз рейтингілік баға кезінде ішіндегі жылдық қорытынды бойынша таратылады.

      40. Осы Қағидаларда және негізге алынатын ұлттық стандартта көрсетілген функцияларды орындамаған кезде ТК тарату негізге алынатын ұлттық стандартта белгіленген тәртіппен СҰО шешімі бойынша жүзеге асырылады.

      41. ТК-ның бастамасы бойынша, ТК-дан тиісті өтінім келіп түскеннен кейін СҰО күнтізбелік 15 күн ішінде шешім қабылдайды.

      42. СҰО екі жыл ішіндегі жылдық қорытынды бойынша қанағаттанарлықсыз рейтингілік баға айқындалғаннан кейін күнтізбелік 30 күн ішінде ТК-ны тарату туралы шешім қабылдайды.

      43. ТК-ны тарату туралы шешім қабылдаған жағдайда тиісті ақпарат ақпараттық жүйеге орналастырылады.