Ескерту. Күші жойылды - ҚР Бас Прокурорының 09.01.2023 № 11 (алғашқы ресми жарияланған күнінен кейін қолданысқа енгізіледі) бұйрығымен.

      Елден тыс жерлерде жүрген қазақстандық азаматтарды қорғауды және оларға қамқорлық жасауды мемлекетке міндеттейтін Қазақстан Республикасы Конституциясының 11-бабын іске асыру мақсатында БҰЙЫРАМЫН:

      1. Қылмыстық жауаптылыққа тартылған және жазасын шетелде өтеп жүрген Қазақстан Республикасының азаматтары туралы деректер банкі құрылсын.

      2. Бекітілсін:

      1) осы бұйрықтың 1-қосымшасына сәйкес, Қылмыстық жауаптылыққа тартылған және жазасын шетелде өтеп жүрген Қазақстан Республикасының азаматтары туралы деректер банкін жүргізу жөніндегі нұсқаулық;

      2) осы бұйрықтың 2-қосымшасына сәйкес, қылмыстық жауаптылыққа тартылған және жазасын шетелде өтеп жүрген адамға карточка.

      3. Қазақстан Республикасы Бас прокуратурасының Құқықтық статистика және арнайы есепке алу жөніндегі комитеті (бұдан әрі – Комитет) осы бұйрықты:

      1) Қазақстан Республикасының Әділет министрлігіне мемлекеттік тіркеу үшін;

      2) мүдделі мемлекеттік органдар мен Қазақстан Республикасы Бас прокуратурасының құрылымдық бөлімшелеріне мәлімет және қызметте пайдалану үшін, Комитеттің аумақтық органдарына орындау үшін жолдасын.

      4. Осы бұйрықтың орындалуын бақылау Комитет Төрағасына жүктелсін.

      5. Осы бұйрық ресми жарияланған күнінен бастап қолданысқа енгізіледі.

Қылмыстық жауаптылыққа тартылған және жазасын шетелде өтеп жүрген Қазақстан Республикасының азаматтары туралы деректер банкін жүргізу жөніндегі нұсқаулық
1. Жалпы ережелер

      1. Осы Нұсқаулық қылмыстық жауаптылыққа тартылған және жазасын шетелде өтеп жүрген Қазақстан Республикасының азаматтары туралы автоматтандырылған деректер банкін (бұдан әрі – деректер банкі) жүргізуді айқындайды.

      2. Деректер банкі шетелдік мемлекеттердің аумақтарында қылмыс жасаған және жазасын өтеп жүрген Қазақстан Республикасының азаматтарын дұрыс есепке алуға арналған.

      3. Есепке алуды және қалыптастыруды Қазақстан Республикасы Бас прокуратурасының Құқықтық статистика және арнайы есепке алу жөніндегі комитеті (бұдан әрі - Комитет) жүргізеді.

      4. Деректер банкін қалыптастыруды Комитет электрондық форматта, осы бұйрыққа Нұсқаулықтың 1-қосымшасына сәйкес, қылмыстық жауаптылыққа тартылған және жазасын шетелде өтеп жүрген адамға карточканы (бұдан әрі – карточка) толтыру арқылы жүзеге асырады.

      5. Қазақстан Республикасының азаматын шетелдік мемлекеттердің аумақтарында қылмыстық жауаптылыққа тарту нәтижесінде соттау дерегі және Комитетке оған қатысты шетелдік мемлекет сотының заңды күшіне енген айыптау үкімінің (қаулысының) көшірмесін ұсыну есепке алу үшін негіз болып табылады.

      6. Егер Қазақстан Республикасының халықаралық келісімшартында осы Нұсқаулықта көзделгеннен өзге ережелер белгіленген болса, онда халықаралық келісімшарттың ережесі қолданылады.

2. Қылмыстық жауаптылыққа тартылған және жазасын шетелде өтеп жүрген Қазақстан Республикасының азаматтары туралы деректер банкін толықтыру тәртібі

      7. Деректер банкін Қазақстан Республикасы Жоғарғы Сотының жанындағы Соттардың қызметін қамтамасыз ету департаментінен (Қазақстан Республикасы Жоғарғы Сотының аппараты) (бұдан әрі-Департамент) Қазақстан Республикасының Әділет министрлігінен (бұдан әрі – ҚР ӘМ), Қазақстан Республикасының Ішкі істер министрлігінен (бұдан әрі – ҚР ІІМ) және Қазақстан Республикасының шетелдердегі мекемелерінен (бұдан әрі – шетелдердегі мекемелер) алынған растау құжаттарының негізінде жүзеге асырылады:

      1) шетелдік мемлекет сотының заңды күшіне енген айыптау үкімінің (қаулысының) көшірмесі;

      2) "Жеке басты куәландыратын құжаттар туралы" Қазақстан Республикасы Заңына (бұдан әрі - Заң) сәйкес Қазақстан Республикасы азаматының жеке басын куәландыратын құжаттың көшірмесі. Тұлғада Заңның 6 - бабының 1-тармақшасында көзделген жеке басты куәландыратын құжаттардың жоқтығы жағдайында оларды есепке алу үшін көші-қон полиция органдары ҚР азаматтығының болуын растаумен қатар 1974 жылғы үлгідегі төлқұжатты және 1-нысанды пайдалануға болады;

      3) Комитет бұрын мәліметтері жіберілген тұлғаларға қатысты үкімді өзгерту, босату, шартты түрде мерзімінен бұрын босату немесе өлімі туралы хабарламалар.

      8. Деректер банкінде мәліметтері бар азаматтың жазбаша өтінішінің негізінде түзету ақпаратын енгізуге жол беріледі. Түзету енгізу туралы өтініші Комитетке жіберіледі.

      Өтініште көрсетілген сауалнамалық деректер өтініш берушінің жеке басын куәландыратын құжаттың мәліметтеріне сәйкес келуі тиіс. Тегін, атын, әкесінің атын, туған күнін өзгерткен тұлғалар қазіргі және бұрынғы сауалнамалық деректерін көрсетеді.

      Түзету енгізу туралы өтінішке мыналар жалғанады: өтініш берушінің жеке басын куәландыратын құжаттың көшірмесі және сот тағайындаған жазаны өтеу немесе соттылықты алып тастау дерегін растайтын құжаттардың түпнұсқалары немесе нотариус растаған, заңдастырылған, апостиль қойылған көшірмелері.

      Жіберілген құжаттың түпнұсқасын өтініш берушіге қайтару қажет болған жағдайда оны өтініште көрсету талап етіледі.

      9. Комитеттің қызметкері растау құжаттарын алғаннан кейін бес (5) жұмыс күнінің ішінде ақпаратты карточкаға толтырады және оның графикалық көшірмелерін енгізеді.

      10. Қылмыстық жауаптылыққа тартылған және жазасын шетелде өтеп жүрген ҚР азаматтары туралы деректер сот үкіміне сәйкес, міндетті түрде үкімнің заңды күшіне енген күнін көрсете отырып толтырылады.

      Мәліметтерді сотталған жөніндегі хабарламадан енгізген кезде, тиісті шетелдегі мекемеге сот үкімінің көшірмесін ұсыну туралы сұрау жолдау қажет.

      11. Сауалнамалық деректер ҚР азаматының жеке басын куәландыратын құжат көшірмесінің негізінде енгізіледі.

      ҚР азаматының жеке басын куәландыратын құжаттың көшірмесі болмаған жағдайда, ол жөніндегі қажетті мәліметтер ҚР құқық қорғау және арнайы органдарының ақпарат алмасу жүйесі арқылы қалыптастырылған құжаттардың негізінде енгізіледі.

      12. Қылмыстық жауаптылыққа тартылған және жазасын шетелде өтеп жүрген адамдардың елін және ұлтын көрсетуге арналған цифрлық кодтар осы Нұсқаулықтың 2-қосымшасындағы "Әлем мемлекеттерінің сөздігіне" және осы Нұсқаулықтың 3-қосымшасындағы "Ұлттар сөздігіне" сәйкес келуі тиіс.

      13. Заңды күшіне енген айыптау үкімдерінің көшірмелерімен келіп түскен дактилоскопиялық карталар Комитеттің автоматтандырылған дактилоскопиялық ақпараттық жүйесіне енгізіледі.

      14. Қылмыстық жауаптылыққа тартылған және жазасын шетелде өтеп жүрген адамдар туралы мәліметтер автоматтандырылған деректер банкінде тұрақты сақталады.

      15. Растау құжаттары мен оларды ұсыну жөніндегі хат-хабар жеке номенклатуралық іске тігіледі.

3. Есепке алу үшін растау құжаттарын ұсыну тәртібі

      16. Шетелдердегі мекемелер болу елдің құзыретті органдардан келіп түскен күнінен бастап 15 жұмыс күнінің ішінде растау құжаттарының Қазақстан Республикасы Сыртқы істер министрлігінің Консулдық қызмет департаментіне (бұдан әрі - ҚР СІМ КҚД) жібереді.

      Растау құжаттарынның жолдау мерзімдерін есептеу кезде курьерлік жеткізу кезеңі есептелмейді.

      17. ҚР СІМ КҚД шетелдердегі мекемелерден келіп түскен құжаттарды бес (5) жұмыс күнінің ішінде Комитетке жөнелтеді.

      18. Шетелдердегі мекемелер Қазақстан Республикасы азаматының жеке басын куәландыратын құжаттардың көшірмелерін қоспағанда, деректер банкін толықтыру үшін қажетті барлық құжаттарды ұсынбаған жағдайда, Комитет ҚР СІМ КҚД арқылы, Қазақстан Республикасы азаматының жеке басын куәландыратын құжат көшірмесінен басқа тиісті шетелдегі мекемеден қосымша мәліметтерді сұратады.

      19. ҚР СІМ КҚД шетелдердегі мекемелердің растау құжаттарын уақтылы ұсынуына бақылау жүргізеді.

      20. Шетелдердегі мекемелер жылына бір рет ҚР СІМ КҚД-ге тиісті консулдық округтің аумағында сотталған және жазасын өтеп жүрген ҚР азаматтарының тізімдерін жібереді.

      Есепке алу үшін мәліметтерді толық ұсынуды қамтамасыз ету мақсатында, Комитет жылына 1 (бір) рет шетелдердегі мекемелер ҚР СІМ КҚД-ге ұсынған тізімдік деректерді және автоматтандырылған деректер банкінің мәліметтерін салыстырып тексереді.

      Салыстырып тексеру нәтижелері 2 (екі) данада құрылатын және ҚР СІМ КҚД мен Комитет басшылары қол қоятын акт ретінде ресімделеді.

      21. Департамент, ҚР ӘМ және ҚР ІІМ құжаттардың келіп түскен күнінен 15 жұмыс күнінің ішінде Комитет ҚР халықаралық келісімшарттарымен көзделген тәртіпте алынған, заңды күшіне енген айыптау үкімдерінің көшірмелерін жөнелтеді.

4. Есепке алуға жүгіну тәртібі

      22. Деректер банкінің статистикалық мәліметтерін сұрату Комитетке өтініштің негізін көрсете отырып, тиісті сұрау жолдау арқылы жүргізіледі.

      23. Азаматтарға қатысты тексеру іс-шараларын жүзеге асыруға уәкілетті мемлекеттік органдар және өзге органдар, ұйымдар, сондай-ақ жеке тұлғалар есепке алынған мәліметтерді Комитет пен оның аумақтық органдарының арнайы есепке алудың жекелеген түрлерін жүргізу және пайдалану саласындағы ақпараттық-анықтамалық қызметін регламенттейтін нормативтік құқықтық актілердің талаптарына сәйкес талап етеді.

      Қылмыстық жауаптылыққа тартылған және жазасын

      шетелде өтеп жүрген адамға карточка

      Ескертпе:

      1. * толтырылуы міндетті деректемелердің белгісі.