Халықаралық және мемлекетаралық қатынастарды (Тәуелсiз Мемлекеттер Достастығы шеңберiнде) жүктердi темiр жолдармен тасығаны үшiн тасымал төлемiн алуды толық қамтамасыз ету және есеп айырысуды жеделдету мақсатында Қазақстан Республикасының Министрлер Кабинетi қаулы етедi: 

      1. 1994 жылдың 1 мамырынан бастап темiр жол көлiгi мен халықаралық және мемлекетаралық жүктердi тасу 1951 жылдың 1-қарашасынан бастап қолданылатын Халықаралық темiр жол жүк қатынастары туралы келiсiмде айқындалған шарттармен жүзеге асырылатын болып белгiленсiн. 

      2. Тәуелсiз Мемлекеттер Достастығы елдерiнiң темiр жол әкiмшiлiктерi басшыларының ТМД мемлекеттерiнiң темiр жолдарымен жүк тасыған кезде Халықаралық темiр жол жүк қатынастары туралы Келiсiмнiң жекелеген баптарын қолдану ережелерiн белгiлегенi (Мемлекетаралық және халықаралық қатынастарда жүктердi тасымалдау құжаттарын ресiмдеу мен тасығаны үшiн тасымалдау төлемiн алу тәртiбi туралы 1994 жылғы 21 қаңтардағы келiсiм) қаперге алынсын. 
      Бұл ретте қолданылып жүрген халықаралық практикаға сәйкес: 
      - жөнелтiлетiн станцияда жөнелтушiден - жөнелтiлетiн станциядан Қазақстан Республикасы темiр жолының шекарасынан шығатын станциясына дейiнгi тасымалданатын қашықтық үшiн, ал ТМД мемлекеттерiнiң темiр жолдары бойынша темiр жолдар жанынан да, сол сияқты меншiк нысанына қарамастан заңды тұлғалар мен жеке тұлғалар тарапынан құрылатын экспедиторлық ұйымдар арқылы транзиттiк тасымалдау үшiн; 
      - әкелiнетiн станцияда жүктi алушыдан - Қазақстан Республикасы темiр жолының шекарасына кiретiн станциясынан әкелiнетiн станцияға дейiнгi қашықтыққа тасымалдағаны үшiн төлем алынады. 

      3. Қазақстан Республикасының Көлiк министрлiгi: 
      - республика аумағында орналасқан, бiрақ Ресей Федерациясы, Өзбекстан Республикасы мен Қырғыз Республикасы темiр жолдарының құрамына енетiн темiр жол станцияларында Қазақстан Республикасы "резиденттерiнiң" жүк тасығаны үшiн тарифтердi қолдану мен тасымалдау төлемiн есептеудiң шектес ТМД мемлекеттерiнiң темiр жол әкiмшiлiктерiмен келiсiлген тәртiбiн белгiлесiн; 
      Мемлекетаралық және халықаралық қатынастарда жүк тасығаны үшiн тасымалдау құжаттарын ресiмдеу мен тасымал төлемiн алу тәртiбi туралы келiсiмнiң жекелеген параграфтары мен баптарын қолдану тәртiбiн айқындасын және жүк иелерiнiң жүк бағасын жариялағаны үшiн қосымша алымның және иелерiнiң өтiнiмдерi бойынша жүктi тасу шарттарына жасаған өзгерiсi үшiн алымның ставкаларын бекiтсiн; 
      темiр жол станциялары арасындағы республикалық жүк тасқыны мен вагондар тасқынын ең ұтымды әрi экономикалық жағынан тиiмдi нұсқалар бойынша бағыттаудың тәртiбiн қарастырып, белгiлесiн. Республиканың темiр жолдарындағы станциялар арасында жүк тасығаны үшiн тасымал төлемдерi жөнелту станциясында баратын станциясына дейiнгi нақтылы қашықтық бойынша жүретiн жолының бәрiне алынатын болсын. 

      4. Жүк тасығаны үшiн тарифтiк есеп айырысу швейцариялық франкпен белгiленсiн. 

      5. Есеп айырысу: 
      Қазақстан Республикасының темiр жолдары бойынша транзитпен басқа мемлекеттердiң жүктерi тасылған кезде - еркiн айналыстағы немесе өзге де шарттық валютамен; 
      Қазақстан Республикасының аумағы бойынша республика "резиденттерi" жүзеге асыратын экспорттық-импорттық тасымалдау кезiнде - Қазақстан Республикасының ұлттық валютасымен; 
      Қазақстан Республикасының аумағы бойынша республиканың "резидент еместерi" жүзеге асыратын экспорттық-импорттық тасымалдау кезiнде - еркiн айналыстағы валютамен немесе Қазақстан Республикасының Ұлттық валютасымен жүзеге асырылады. 
      Еркiн айналыстағы валюта Қазақстан Республикасының валютасына Қазақстан Республикасы Ұлттық банкiнiң төлем күнiндегi бағамы бойынша айырбасталады.
      Жүк тасудан алынған валюталық түсiм ол темiр жолдың валюталық шотына түскеннен кейiн мiндеттi түрде сатылады.

      Қазақстан Республикасының
      Премьер-министрi