Ескерту. Күші жойылды - ҚР Үкіметінің 12.10.2023 № 903 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) қаулысымен.

      "Өнеркәсіптік саясат туралы" 2021 жылғы 27 желтоқсандағы Қазақстан Республикасының Заңы 30-бабының 3-тармағына сәйкес Қазақстан Республикасының Үкіметі ҚАУЛЫ ЕТЕДІ:

      1. Осы қаулыға қосымшаға сәйкес өнеркәсіптік-инновациялық жобаларды қоса қаржыландыруды қоса алғанда, мемлекеттік бюджеттен берілетін қаражат шеңберінде қаржыландыру, лизингтік қаржыландыру шарттары мен тетіктері айқындалсын.

      2. Мыналардың күші жойылды деп танылсын:

      1) "Қоса қаржыландыруды қоса алғанда, индустриялық-инновациялық жобаларды қаржыландырудың, индустриялық-инновациялық қызмет субъектілерін лизингтік қаржыландырудың шарттары мен тетіктерін айқындау туралы" Қазақстан Республикасы Үкіметінің 2012 жылғы 5 маусымдағы № 745 қаулысы;

      2) "Қазақстан Республикасы Үкіметінің кейбір шешімдеріне өзгерістер енгізу туралы" Қазақстан Республикасы Үкіметінің 2013 жылғы 20 желтоқсандағы № 1363 қаулысымен бекітілген Қазақстан Республикасы Үкіметінің кейбір шешімдеріне енгізілетін өзгерістердің 19-тармағы.

      3. Осы қаулы алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Өнеркәсіптік-инновациялық жобаларды қоса қаржыландыруды қоса алғанда, мемлекеттік бюджеттен берілетін қаражат шеңберінде қаржыландыру, лизингтік қаржыландыру шарттары мен тетігі 1-тарау. Қаржыландыру шарттары

      1. Өнеркәсіптік-инновациялық жобаларды қоса қаржыландыруды қоса алғанда, мемлекеттік бюджеттен берілетін қаражат шеңберінде қаржыландыру, лизингтік қаржыландыру шарттары болып табылады:

      1) Мыналар Қазақстан Даму Банкінің, сондай-ақ Қазақстан Республикасының Үкіметі айқындайтын басқа да ұлттық даму институттарының (бұдан әрі – қаржыландырушы ұйым) өнеркәсіптік-инновациялық жобаларды (бұдан әрі – жоба) қаржыландыруға қатысуының жоба сметасы сомасының 85 %-ынан (сексен бес пайызынан) аспайтын мөлшері;

      2) өнеркәсіптік-инновациялық қызмет субъектісінің (бұдан әрі – субъект) және (немесе) өзге де үшінші тұлғалардың жоба сметасы шеңберінде қаржыландыру үлесі ақшалай қаражатпен жүзеге асырылады;

      3) жобаны іске асыру бойынша тәуекел толық көлемде жабылған, оның ішінде қамтамасыз етілген;

      4) қоса қаржыландыруды қоса алғанда, қаржыландыру жиырма жылдан аспайтын мерзімге беріледі;

      5) жобалық шешімдердің технологиялық және техникалық негізділігі.

      2. Қоса қаржыландыру кезінде жобаны қажетті қаржы ресурстарымен (ақшамен) ішінара қамтамасыз етуді жүзеге асыратын қаржыландырушы ұйымнан басқа тараптың болуы қосымша шарт болып табылады.

      3. Лизингтік қаржыландыру субъектілерге бір жылдан жиырма жылға дейінгі мерзімге беріледі. Лизингтік қаржыландыру ұлттық валютада жүзеге асырылады.

      4. Қоса қаржыландыруды қоса алғанда, қаржыландыру жаңа өнеркәсіптік-инновациялық жобаларды, сондай-ақ жұмыс істеп тұрған өндірістерді жаңғыртуға (техникалық қайта жарақтандыру, оның ішінде өнеркәсіпті цифрлық трансформациялау, 4.0 Индустрияны және цифрлық технологияларды енгізу) және кеңейтуге бағытталған басым тауарлар тізбесіне сәйкес өнеркәсіптік-инновациялық жобаларды құру үшін жүзеге асырылады.

2-тарау. Қаржыландыру тетігі

      5. Жобаларды қоса қаржыландыруды қоса алғанда, қаржыландыру кезінде мынадай тетіктер пайдаланылады:

      1) субъектілерге ақылылық, мерзімділік және қайтарымдылық шарттарымен ақшалай нысанда кредит беру (қарыздар);

      2) жобаны дайындауды және іске асыруды қамтамасыз ету мақсатында жобаны қаржыландыру (аралық қаржыландыру);

      3) қарызды субъектінің акцияларына немесе жарғылық капиталындағы қатысу үлесіне айырбастау құқығымен беру (мезониндік қаржыландыру);

      4) мүлікті жасау және беру, сондай-ақ жасалған мүлікті пайдалану процесінде қызметтер көрсету және (немесе) тауар өндіру және (немесе) жұмыс орындау үшін күтілетін жүйелі ақшалай төлемді қамтамасыз ету болып табылатын талап ету құқықтарын беру арқылы жобаны қаржыландыру (жобалық қаржыландыру).

      6. Субъектілерді лизингтік қаржыландыру тетігі жобаларды қажетті қаржы ресурсымен (ақшамен) қамтамасыз ету болып табылады, мұнда лизинг беруші сатушыдан меншігіне сатып алған және лизинг шартында келісілген лизинг нысанасын белгілі бір ақыға және белгілі бір талаптармен кәсіпкерлік мақсаттар үшін кемінде бір жыл мерзімге уақытша иеленуге және пайдалануға беруге міндеттенеді.

      7. Лизингтік қаржыландыру таза лизинг беру арқылы жүзеге асырылады.

      8. Субъект еркін нысанда өтініш беру арқылы қоса қаржыландыруды қоса алғанда, қаржыландыру, жобаларды лизингтік қаржыландыру үшін қаржыландырушы ұйымға жүгінеді және мынадай құжаттарды ұсынады:

      1) жеке тұлға үшін – жеке басты куәландыратын құжаттың көшірмесі, дара кәсіпкер ретінде тіркелгені туралы құжаттың көшірмесі; заңды тұлға үшін – мемлекеттік тіркеу (қайта тіркеу) туралы куәліктің¹ немесе анықтаманың көшірмесі;

      2) заңды тұлғаларға арналған құрылтай құжаттарының көшірмелері;

      3) жобаның бизнес-жоспары;

      4) өтінім берудің алдындағы соңғы есепті жылдың 31 желтоқсанындағы жағдай бойынша заңды тұлғаның бухгалтерлік теңгерімі;

      5) есебі салық органдарында жүргізілетін берешектің жоқ (бар) екені туралы мәліметтер;

      6) құқық белгілейтін, оның ішінде кепіл болып отырған жылжымалы немесе жылжымайтын мүлікке ауыртпалықтың бар немесе жоқ екені туралы құжаттардың көшірмелері;

      7) жұмыс істеп тұрған өндірістерді жаңғыртуға (техникалық қайта жарақтандыруға) және кеңейтуге бағытталған жобаның сипаттамасы және оны іске асырудың болжамды экономикалық және қаржылық тиімділігі;

      8) субъектінің және (немесе) өзге үшінші тұлғалардың жобаны ақшалай қаражатпен қаржыландыруға қатысуын растайтын құжаттар.

      _____________________________________

      1 "Қазақстан Республикасының кейбір заңнамалық актілеріне заңды тұлғаларды мемлекеттік тіркеу және филиалдар мен өкілдіктерді есептік тіркеу мәселелері бойынша өзгерістер мен толықтырулар енгізу туралы" 2010 жылғы 20 қаңтардағы № 239-IV Қазақстан Республикасының Заңы қолданысқа енгізілгенге дейін берілген заңды тұлғаны (филиалды, өкілдікті) мемлекеттік (есептік) тіркеу (қайта тіркеу) туралы куәлік заңды тұлғаның қызметі тоқтатылғанға дейін жарамды болып табылады.

      9. Жобаларды қоса қаржыландыруды қоса алғанда, қаржыландыруды, лизингтік қаржыландыруды субъект ұсынған құжаттарды қарау және талдау нәтижесі бойынша қаржыландырушы ұйым жүзеге асырады.

      10. Қаржыландырушы ұйым өтініш келіп түскен күннен бастап екі ай ішінде осы жобаларды қоса қаржыландыруды қоса алғанда, қаржыландыру, субъектілерді лизингтік қаржыландыру шарттары мен тетігінің (бұдан әрі – шарттар мен тетік) 8-тармағына сәйкес ұсынылған субъектінің құжаттарын қарайды.

      11. Тиісті құжаттарды қарау нәтижесі бойынша қаржыландырушы ұйым үш жұмыс күні ішінде жобаларды қоса қаржыландыруды қоса алғанда, қаржыландыруды, лизингтік қаржыландыруды ұсыну немесе ұсынудан бас тарту туралы шешім қабылдайды.

      12. Жобаларды қоса қаржыландыруды қоса алғанда, қаржыландыруды, лизингтік қаржыландыруды ұсынудан бас тарту туралы шешім қабылданған жағдайда қаржыландырушы ұйым үш жұмыс күні ішінде субъектіге тиісті дәлелді жазбаша хабарлама жібереді.

      13. Жобаларды қоса қаржыландыруды қоса алғанда, қаржыландырудан, лизингтік қаржыландырудан бас тарту туралы шешім мынадай негіздер бойынша қабылданады:

      1) субъектінің осы шарттар мен тетіктің 1 және 2-тармақтарына сәйкес айқындалған шарттарға сәйкес келмеуі;

      2) субъектінің осы шарттар мен тетіктің 8-тармағында айқындалған қажетті құжаттарды ұсынбауы.

      14. Жобаларды қоса қаржыландыруды қоса алғанда, қаржыландыру, лизингтік қаржыландыру туралы шешім қабылданған жағдайда қаржыландырушы ұйым бес жұмыс күні ішінде субъектімен шарт жасасады.