Ескерту. Күші жойылды - ҚР Үкіметінің 08.07.2014 № 777 қаулысымен (алғашқы ресми жарияланған күнінен кейін күнтізбелік он күн өткен соң қолданысқа енгізіледі).

      "Банкроттық туралы" Қазақстан Республикасының 1997 жылғы 21 қаңтардағы Заңын іске асыру мақсатында Қазақстан Республикасының Үкіметі ҚАУЛЫ ЕТЕДІ:

      1. "Борышкердің мүлкін (активтерін) сату жөнінде сауда-саттық жүргізу ережесін бекіту туралы" Қазақстан Республикасы Үкіметінің 2006 жылғы 26 сәуірдегі N 326 қаулысына (Қазақстан Республикасының ПҮАЖ-ы, 2006 ж., N 15, 143-құжат) мынадай өзгерістер мен толықтырулар енгізілсін:
 

      көрсетілген қаулымен бекітілген Борышкердің мүлкін (активтерін) сату жөнінде сауда-саттық жүргізу ережесінде:
      1-тармақ мынадай редакцияда жазылсын:
      "1. Осы Ережеде мынадай ұғымдар пайдаланылады:
      1) банкроттық саласындағы уәкілетті орган (бұдан әрі - уәкілетті орган) - банкроттық саласында (банктерді, сақтандыру (қайта сақтандыру) ұйымдарын және жинақтаушы зейнетақы қорларын қоспағанда) мемлекеттік реттеуді жүзеге асыратын мемлекеттік орган;
      2) жеңімпаз - аукцион лоты үшін неғұрлым жоғары баға ұсынған қатысушы;
      3) лот - аукционда бір мезгілде сатылатын зат немесе бірнеше заттар;
      4) лоттың бастапқы бағасы - әрбір лот бойынша сауда-саттық басталатын баға;
      5) лоттың ең төмен бағасы - лот одан төмен сатылуы мүмкін емес баға;
      6) сату бағасы - сауда-саттық нәтижесінде белгіленген лоттың түпкілікті бағасы;
      7) сатушы - конкурстық басқарушы;
      8) сатып алушы - сатушымен, сатып алу-сату шартын жасасқан жеңімпаз;
      9) сауда-саттыққа қатысушы - осы Ережеде белгіленген тәртіппен сауда-саттыққа қатысу үшін тіркелген жеке немесе заңды тұлға;
      10) сауда-саттықты ұйымдастырушы - конкурстық басқарушымен сауда-саттық жүргізу жөнінде қызметтер көрсету туралы шарт жасасқан және олардың нәтижелеріне мүдделі емес жеке немесе заңды тұлға;
      11) сауда-саттықтың ағылшындық әдісі - бастапқы баға неғұрлым жоғары баға ұсынған бір қатысушы қалған сәтке дейін алдын ала жарияланған қадаммен өсетін сауда-саттық әдісі;
      12) сауда-саттықтың голландтық әдісі - бастапқы баға қатысушылардың бірі аукцион затын жарияланған баға бойынша сатып алуға келісім берген сәтке дейін жарияланған қадаммен төмендейтін сауда-саттық әдісі.";

      4-тармақ мынадай мазмұндағы екінші абзацпен толықтырылсын:
      "Ауыл шаруашылығы ұйымы болып табылатын борышкердің сату жоспары қызметінің негізгі түрін міндетті түрде сақтай отырып, борышкердің мүлкін аукционға бірыңғай лотпен бастапқы шығару туралы қосымша шартты қамтуы тиіс";

      11-тармақта:
      бірінші абзацта "Сауда-саттық жүргізу" деген сөздердің алдынан "Сату жоспарында көзделген" деген сөздермен толықтырылсын;

      екінші абзац мынадай редакцияда жазылсын:
      "Барлық немесе жекелеген лоттар бойынша сату жоспарында көзделген сауда-саттық жүргізілмеді деп танылған немесе сату жоспарына тиісті өзгерістер енгізгеннен кейін сауда-саттық жүргізудің негізгі шарттарын өзгерткен жағдайда келесі сауда-саттықты жүргізу туралы ақпараттық хабар осы тармақта белгіленген тәртіппен жарияланады.";

      мынадай мазмұндағы төртінші абзацпен толықтырылсын:
      "Ауыл шаруашылығы ұйымының конкурстық массасын сату жөніндегі аукционды өткізу уақыты мен орнын конкурстық басқарушы кредит берушілер комитетінің келісімімен анықтайды.";

      12-тармақтың 9) тармақшасы "мекен-жайлар" деген сөзден кейін ", болған жағдайда веб-сайт" деген сөздермен толықтырылсын;

      18-тармақтың бесінші абзацы мынадай редакцияда жазылсын:
      "Әрбір лот бойынша сауда-саттыққа қатысу үшін кепілдік жарна ағылшындық әдіс кезінде лоттың бастапқы бағасының 10 %-ын, голландтық әдіс кезінде лоттың ең төменгі сомасының 10 %-ын құрайды.";

      23-тармақ мынадай мазмұндағы екінші сөйлеммен толықтырылсын:
      "Сауда-саттықты ұйымдастырушыны тарту үшін қаражат жеткіліксіз болған кезде сауда-саттықты осы Ережеде белгіленген тәртіппен конкурстық басқарушы жүргізеді.".

      2. Мыналардың күші жойылды деп танылсын:

      1) "Банкроттық рәсімдерін ауыл шаруашылығы ұйымдары үшін қолданудың ерекшеліктері туралы ережені бекіту туралы" Қазақстан Республикасы Үкіметінің 1997 жылғы 22 желтоқсандағы N 1816 қаулысы (Қазақстан Республикасының ПҮАЖ-ы, 1997 ж., N 57, 514-құжат);

      2) "Борышкер-ауыл шаруашылығы ұйымының конкурстық массасын  сатудың кейбір мәселелері" туралы Қазақстан Республикасы Үкіметінің 2003 жылғы 2 қазандағы N 1016 қаулысы (Қазақстан Республикасының ПҮАЖ-ы, 2003 ж., N 40, 420-құжат).

      3. Осы қаулы алғаш рет ресми жарияланған күнінен бастап он күнтізбелік күн өткен соң қолданысқа енгізіледі.

      Қазақстан Республикасының
      Премьер-Министрі                                    К. Мәсімов