"Мемлекеттік сатып алу туралы" Қазақстан Республикасының 2002 жылғы 16 мамырдағы Заңының  21-бабы 1-тармағының 5) тармақшасына сәйкес Қазақстан Республикасының Үкіметі  ҚАУЛЫ ЕТЕДІ :

      1. "Экономикалық зерттеулер институты" акционерлік қоғамы сатып алудың маңызды стратегиялық мәні бар әлеуметтік-экономикалық даму, экономиканы мемлекеттік басқару проблемаларын зерттеу бойынша қызметтер көрсетуші болып белгіленсін.

      2. Қазақстан Республикасы Экономика және бюджеттік жоспарлау министрлігі заңнамада белгіленген тәртіппен:
      1) осы қаулының 1-тармағында көрсетілген заңды тұлғамен 2007 жылға арналған республикалық бюджетте көзделген қаражат есебінен 10207000 (он миллион екі жүз жеті мың) теңге сомасында мемлекеттік сатып алу туралы шарт жасасуды;
      2) қызметтерді мемлекеттік сатып алу үшін осы қаулыға сәйкес жұмсалатын қаражатты оңтайлы және тиімді жұмсау қағидатын сақтауды;
      3) осы қаулыдан туындайтын өзге де шараларды қабылдауды қамтамасыз етсін.

      3. Осы қаулы қол қойылған күнінен бастап қолданысқа енгізіледі.

       Қазақстан Республикасының
      Премьер-Министрі