"Мүлiктi жария етуге байланысты рақымшылық жасау туралы" Қазақстан Республикасының 2006 жылғы 5 шiлдедегi Заңы 11-бабының 6-тармағына сәйкес Қазақстан Республикасының Үкiметi ҚАУЛЫ ЕТЕДI:

       1. Қоса берiлiп отырған Қазақстан Республикасының аумағында орналасқан, құқықтары Қазақстан Республикасының заңнамасына сәйкес ресiмделмеген жылжымайтын мүлiктi жария етудi жүргiзу ережесi бекiтiлсiн.

      2. Осы қаулы қол қойылған күнiнен бастап қолданысқа енгiзiледi және жариялануға тиiс.

      Қазақстан Республикасының
      Премьер-Министрі

Қазақстан Республикасы
Үкіметінің   
2006 жылғы 21 шілдедегі
N 696 қаулысымен 
бекітілген 

Қазақстан Республикасының аумағында орналасқан, құқықтары Қазақстан Республикасының заңнамасына сәйкес ресiмделмеген жылжымайтын мүлiктi жария етудi жүргiзу ережесi

1. Жалпы ережелер

      1. Осы Қазақстан Республикасының аумағында орналасқан, құқықтары Қазақстан Республикасының заңнамасына сәйкес ресiмделмеген жылжымайтын мүлiктi жария етудi жүргiзу ережесi (бұдан әрi - Ереже) "Мүлiктi жария етуге байланысты рақымшылық жасау туралы" Қазақстан Республикасының 2006 жылғы 5 шiлдедегi Заңына (бұдан әрi - Заң) сәйкес әзiрлендi және Заңның 11-бабында белгiленген мүлiктi жария етудi жүргiзудiң тәртiбiн регламенттейдi.

      2. Осы Ереже Заңның 3-бабында көрсетiлген мүлiкке қолданылмайды.

      3. Жылжымайтын мүлiктi жария ету, соның iшiнде жылжымайтын мүлiктi жария етуге ұсыну мерзiмi 2006 жылғы 3 шiлдеден басталады және 2007 жылғы 1 тамызда аяқталады.
      Ескерту. 3-тармаққа өзгерту енгізілді - ҚР Үкіметінің 2006.11.29. N 1132 (алғаш рет ресми жарияланған күнiнен бастап қолданысқа енгiзiледi), 2007.04.16. N 302 (алғаш рет ресми жарияланған күнiнен бастап қолданысқа енгiзiледi) қаулыларымен.

2. Жылжымайтын мүлiктi жария етудi жүргiзу тәртiбi

      4. Жылжымайтын мүлiктi жария ету Қазақстан Республикасының азаматтары мен заңды тұлғаларының (бұдан әрi - жария ету субъектiлерi) жылжымайтын мүлiк орналасқан жер бойынша аудандардың (облыстық маңызы бар қалалардың, қалалардағы аудандардың) жергiлiктi атқарушы органдарының жанынан құрылатын Қазақстан Республикасының аумағында орналасқан, құқықтары Қазақстан Республикасының заңнамасына сәйкес ресiмделмеген жылжымайтын мүлiктi жария етудi жүргiзу жөнiндегi комиссияға (бұдан әрi -  комиссия) өтiнiш жасауы арқылы жүргiзiледi.

      5. Жылжымайтын мүлiктi жария ету үшiн жария ету субъектiсi комиссияға мынадай құжаттарды:
      1) Заңға 1 немесе 2-қосымшаға сәйкес нысан бойынша екi данадағы өтiнiштi;
      2) жеке басын куәландыратын, ал заңды тұлға өкiлдерi - сондай-ақ жарғының (ереженiң), заңды тұлғаны мемлекеттiк тiркеу туралы куәлiктiң, салық төлеушi куәлiгiнiң нотариалды куәландырылған көшiрмелерiн және олардың өкiлеттiгiн растайтын құжаттарды;
      3) алынып тасталды
      Ескерту. 5-тармаққа өзгерту енгізілді - ҚР Үкіметінің 2006.11.29. N 1132 (алғаш рет ресми жарияланған күнiнен бастап қолданысқа енгiзiледi) қаулысымен.

       5-1. Мүлiктi жария еткенi үшiн алым (бұдан әрi - алым) төлеу туралы шешiмдi жария ету субъектiсi дербес қабылдауы тиiс.
      Жария ету субъектiлерi алымды жылжымайтын мүлiктi жария етуге құжаттарды тапсырған сәттен бастап және жария етiлген жылжымайтын мүлiкке құқықтарды мемлекеттiк тiркегенге дейiн кез келген уақытта төлейдi.
      Ескерту. 5-1-тармақпен толықтырылды - ҚР Үкіметінің 2006.11.29. N 1132 (алғаш рет ресми жарияланған күнiнен бастап қолданысқа енгiзiледi) қаулысымен.

      6. Өтiнiш берiлген күнi комиссия:
      1) жария етуге түскен өтiнiштердi тiркеу журналына өтiнiштi енгiзедi және нөмiр бередi;
      2) өтiнiш иесiне өтiнiштiң күнi мен нөмiрiн көрсете отырып, өтiнiштi және ұсынылған құжаттарды алғанын растайтын қолхат бередi.

      7. Жария ету мерзiмi iшiнде берiлген жылжымайтын мүлiктi жария ету туралы өтiнiш комиссияға өтiнiш берiлген күннен бастап он бес жұмыс күнi iшiнде қаралуға тиiс.

      8. Он бес жұмыс күнi iшiнде комиссия:
      1) Ереженiң 9-тармағында көрсетiлген негiздер бойынша құжаттарды қайтару;
      2) жылжымайтын мүлiктi жария етуден бас тарту;
      3) жылжымайтын мүлiктi жария ету туралы шешiм қабылдайды.
      Ескерту. 8-тармаққа өзгерту енгізілді - ҚР Үкіметінің 2006.11.29. N 1132 (алғаш рет ресми жарияланған күнiнен бастап қолданысқа енгiзiледi) қаулысымен.

      9. Жылжымайтын мүлiктi жария етуге ұсынылған құжаттар мынадай жағдайларда себебi көрсетiле отырып қайтарылуға тиiс:
      1) құжаттардың толық пакетiн ұсынбау;
      2) ұсынылған құжаттарда тазартулар мен түзетулердiң болуы;
      3) мүлiктi жария еткенi үшiн алым сомасын дұрыс есептемеу;
      4) ұсынылған құжаттардың Қазақстан Республикасының заңнамасында осындай құжаттарға қойылатын талаптарға сәйкес келмеуi.
      Жылжымайтын мүлiктi жария етуге ұсынылған құжаттарды қайтару үшiн негiз болған себептер жойылған жағдайда, жария ету субъектiсi мүлiктi жария етудiң белгiленген мерзiмi iшiнде қайтадан мүлiктi жария етуге өтiнiш беруге құқылы.

      10. Жылжымайтын мүлiктi жария етуден бас тарту Заңның 2 және 3-баптарында көзделген талаптар сақталмаған кезде жүзеге асырылады.
      Жылжымайтын мүлiктi жария етуден бас тарту туралы шешiм қолданыстағы заңнама нормаларына жасалған сiлтемемен дәлелденуге тиiс.
      Ескерту. 10-тармаққа өзгерту енгізілді - ҚР Үкіметінің 2006.11.29. N 1132 (алғаш рет ресми жарияланған күнiнен бастап қолданысқа енгiзiледi) қаулысымен.

      11. Жылжымайтын мүлiктi жария ету туралы шешiм шығарылғаннан кейiн Комиссия мемлекеттiк органдар мен ұйымдардың мынадай құжаттарды ресiмдеуi жөнiнде шаралар қабылдайды:
      1) жылжымайтын мүлiк объектiсiне техникалық паспорт;
      2) объектiнi пайдалануға қабылдау актiсi;
      3) жер учаскесiне жеке меншiк құқығына акт.
      Осы құжаттарды ресiмдеу жөнiндегi ұйымдастыру мәселелерi комиссияға жүктеледi.
      Жария етiлген жылжымайтын мүлiк объектiсiне арналған техникалық паспортты Қазақстан Республикасы Әділет министрлігінің Тіркеу қызметі комитеті облыстардың, Астана және Алматы қалаларының жылжымайтын мүлік орталықтары - республикалық мемлекеттік кәсіпорындары мен олардың филиалдары ресімдейді.
      Объектiнi пайдалануға қабылдау актiсiн ресiмдеу "Мүлiктi жария етуге байланысты рақымшылық жасау туралы" Қазақстан Республикасының Заңына сәйкес жария етiлген жылжымайтын мүлiк объектiлерiн пайдалануға қабылдауды ұйымдастыру және жүргiзу ережесiнде белгiленген тәртiппен жүзеге асырылады.
      Жер учаскесiне жеке меншiк құқығына актiнi ресiмдеу "Мүлiктi жария етуге байланысты рақымшылық жасау туралы" Қазақстан Республикасының Заңына сәйкес жария етiлген жер учаскелерiне құқықтарды ресiмдеу ережесiнде белгiленген тәртiппен жүзеге асырылады.
      Ескерту. 11-тармаққа өзгерту енгізілді - ҚР Үкіметінің 2006.11.29. N 1132 (алғаш рет ресми жарияланған күнiнен бастап қолданысқа енгiзiледi), 2007.04.16. N 302 (алғаш рет ресми жарияланған күнiнен бастап қолданысқа енгiзiледi) қаулыларымен.

      12. Мүлiктi жария ету субъектiсi болып табылатын Қазақстан Республикасының азаматтары үшiн тұрғын үй объектiлерi бойынша Ереженiң 11-тармағында көрсетiлген құжаттарды беру өтеусiз негiзде жүзеге асырылады.

      13. Пәтерлерге, жатақханалардағы бөлмелерге және өзге тұрғын үй-жайларға, ғимарат құрамаларына (кейiнгi объектiлер) құқықтарды тiркеу жылжымайтын мүлiктi жария ету туралы шешiмнiң және жылжымайтын мүлiк объектiсiне техникалық паспорттың негiзiнде жүзеге асырылады.

      14. Ереженiң 11-тармағында көрсетiлген құжаттарды ресiмдеу процесi аяқталғаннан кейiн комиссия жария ету субъектiсiне Заңға 3-қосымшаға сәйкес нысан бойынша мәлiметтердi жария етiлген мүлiк тiзiлiмiне бiр мезгiлде енгiзе отырып, жылжымайтын мүлiктi жария ету туралы шешiмдi ресiмделген құжаттармен бiрге бередi.

      15. Жария ету субъектiсiне жылжымайтын мүлiктi жария ету туралы шешiмдi беру Ереженiң 11-тармағында көрсетiлген ресiмделген құжаттармен бiрге комиссияға өтінiш жасалған күннен бастап екi айдан кешiктiрмейтiн мерзiмде жүргiзiлуге тиiс.
      Ескерту. 15-тармақ жаңа редакцияда - ҚР Үкіметінің 2006.11.29. N 1132 (алғаш рет ресми жарияланған күнiнен бастап қолданысқа енгiзiледi) қаулысымен.

      16. Жария етiлген жылжымайтын мүлiк, жария ету субъектiсiнiң алым төлегенi және алым төлеушiлер болып табылмайтын адамдар туралы ақпарат жылжымайтын мүлiкке құқықтарды мемлекеттiк тiркеудi жүзеге асыратын органдарға ұсынылады.
      Ескерту. 16-тармаққа өзгерту енгізілді - ҚР Үкіметінің 2006.11.29. N 1132 (алғаш рет ресми жарияланған күнiнен бастап қолданысқа енгiзiледi) қаулысымен.

3. Қорытынды ережелер

      17. Мүлiктi жария ету субъектiлерi жария етiлген жылжымайтын мүлiкке құқықтарды Қазақстан Республикасының заңнамасына сәйкес 2007 жылғы 1 қарашаға дейiнгi мерзiмде ресiмдеуге мiндеттi.
      Ескерту. 17-тармаққа өзгерту енгізілді - ҚР Үкіметінің 2006.11.29. N 1132 (алғаш рет ресми жарияланған күнiнен бастап қолданысқа енгiзiледi), 2007.04.16. N 302 (алғаш рет ресми жарияланған күнiнен бастап қолданысқа енгiзiледi) қаулыларымен.

      18. Жылжымайтын мүлiктi жария еткен жария ету субъектiлерi аталған мүлiкке мемлекеттiк тiркелген сәттен бастап иелiк етуге құқылы.

      19. Жария етiлген жылжымайтын мүлiкке құқықтарды мемлекеттiк тiркеу жылжымайтын мүлiкке құқықтарды және онымен жасалатын мәмiлелердi мемлекеттiк тiркеу туралы заңнамада белгiленген тәртiппен жүзеге асырылады.