Қазақстан Республикасының Үкіметі қаулы етеді:
"Өсімдіктерді қорғау туралы" Қазақстан Республикасы Заңының жобасы Қазақстан Республикасының Парламенті Мәжілісінің қарауына енгізілсін.
Қазақстан Республикасының
Премьер-Министрі
ЖОБА
ҚАЗАҚСТАН РЕСПУБЛИКАСЫНЫҢ ЗАҢЫ
ӨСIМДIКТЕРДI ҚОРҒАУ ТУРАЛЫ
Осы Заң өсiмдiктердi зиянкестерден, арамшөптерден және өсiмдiк ауруларынан қорғау саласындағы қызметтiң құқықтық, экономикалық, ұйымдастырушылық, технологиялық принциптерiн айқындайды және егiндi, оның сапасын сақтауға әрi Қазақстан Республикасының аумағында фитосанитарлық iс-шараларды жүзеге асыруда адамдардың денсаулығы мен қоршаған табиғи ортаға зиянды әсерiн болдырмауға бағытталған.
1-тарау. ЖАЛПЫ ЕРЕЖЕЛЕР
1-бап. Осы Заңда пайдаланылатын негiзгі ұғымдар
Осы Заңда мынадай негізгi ұғымдар пайдаланылады:
зиянды организмдер - топыраққа, өсiмдiкке және ауыл шаруашылығы өнiмiне терiс әсер етушi зиянкестер, арамшөптер мен өсiмдiктер аурулары;
мемлекеттік фитосанитарлық бақылау - зиянды және аса қауiптi зиянды организмдердiң жаппай таралуының және олардан өсiмдiк шаруашылығы өнiмi ысырабының алдын алу мақсатында Қазақстан Республикасының өсiмдiктердi қорғау туралы заңнамасын заңды және жеке тұлғалардың сақтауына бағытталған уәкiлеттi органның және оның аумақтық бөлiмшелерiнiң лауазымды адамдарының қызметi;
өсiмдiктердi қорғау - өсiмдiк шаруашылығы өнiмiнiң зиянды және аса қауiптi зиянды организмдерден ысырабының алдын алуға бағытталған фитосанитарлық мониторингтiң, фитосанитарлық iс-шаралардың әдiстерiн әзiрлеуге және іс жүзiнде қолдануға бағытталған қызмет саласы;
пестицидтердің (улы химикаттардың) бастапқы құрауыштары - қауiптi және аса қауiптi зиянды организмдермен күресу үшiн препараттарды өндiруге арналған химиялық және басқа заттар;
пестицидтердi зарарсыздандыру - Қазақстан Республикасының заңнамасына сәйкес тыйым салынған немесе жарамсыздыққа келген пестицидтердi (улы химикаттарды), сондай-ақ олардың ыдыстарын кәдеге жаратуға, көмуге немесе жоюға бағытталған iс-шаралар;
аса қауiптi зиянды организмдер - дүркiн-дүркiн жаппай көбеюге және таралуға қабiлеттi, экономикалық нұқсан келтiретiн әрi Қазақстан Республикасының Yкiметi бекiтетiн аса қауiптi зиянды организмдер тiзбесiне енгiзiлген өсiмдiктер зиянкестерi мен аурулары;
пестицидтердің қалдық мөлшерi - химиялық заттардың өсiмдiк өнiмiнде және қоршаған орта объектiлерiнде болуының мөлшерлiк көрсеткiшi, оның көмегiмен олардың адам мен жануарларға қауiпсiздiгi бағаланады;
пестицидтер (улы химикаттар) - зиянды және аса қауiптi зиянды организмдерге қарсы егiн жинау алдындағы құрғатуда, жапырақтарды түсiруде және өсiмдiктердiң өсуiн реттеуде қолданылатын химиялық және басқа заттар;
пестицидтердi тiркеу - препараттарды биологиялық, уыттық, гигиеналық және экологиялық бағалау процесiн аяқтайтын рәсiм, оның нәтижелерi бойынша уәкiлеттi орган жеке және заңды тұлғаларға Қазақстан Республикасының аумағында оларды ресми қолдану құқығына тiркеу куәлiгiн бередi;
пестицидтердi қолдану регламентi - оларды қолданудың қауiпсiз шарттарына және тәртiбiне қойылатын мiндеттi талаптар;
Қазақстан Республикасының аумағында қолдануға рұқсат етiлген пестицидтер тiзiмi - оларды қолдану регламенттерi бар тiркелген пестицидтердiң (улы химикаттардың) уәкiлеттi орган бекiткен тiзбесi;
арнайы техника - пестицидтердi қолдануға арналған құрылғылар мен жабдық;
уәкiлеттi орган - өкiлеттiгi шегiнде жеке және заңды тұлғалардың өсiмдіктердi қорғау саласындағы қызметін үйлестiру мен реттеуді, сондай-ақ өсiмдiктердi қорғау туралы заңнаманың сақталуына мемлекеттiк бақылауды жүзеге асыратын мемлекеттiк орган;
фитосанитарлық ахуал - зиянкестердiң, арамшөптердiң және өсiмдiктер ауруларының санымен және зиянкестiгiмен айқындалатын ауыл шаруашылық және өзге алаптардың, ауыл шаруашылығы мақсатындағы объектiлердiң қалыптасқан жай-күйi;
фитосанитарлық мониторинг - зиянды және аса қауiптi зиянды организмдердiң дамуы мен таралуын байқау және бақылау жүйесi;
фитосанитарлық iс-шаралар - зиянды және аса қауiптi зиянды организмдердiң саны мен зиянкестiгiн азайтуды қамтамасыз етушi шаралар кешенi;
зиянкестіктiң экономикалық шегi - егiннiң ысырабын туғызатын, ол
кезде фитосанитарлық iс-шараларды жүргiзу орынды болатын зиянды және аса
қауiптi зиянды организмдердiң саны.
2-бап. Өсiмдiктердi қорғау туралы Қазақстан Республикасының заңнамасы
1. Қазақстан Республикасының өсiмдiктердi қорғау туралы заңнамасы
Қазақстан Республикасының
Конституциясына негiзделедi әрi осы
Заңнан және Қазақстан Республикасының өзге де нормативтiк құқықтық
актілерiнен тұрады.
2. Егер Қазақстан Республикасы бекiткен халықаралық шарттарда осы
Заңдағыдан өзгеше ережелер белгiленсе, халықаралық шарттардың ережелерi
қолданылады.
3-бап. Өсiмдiктердi қорғау саласындағы мемлекеттiк саясаттың негiзгi
мiндеттерi
Өсiмдiктердi қорғау саласындағы мемлекеттiк саясаттың негiзгi
мiндеттерi:
1) елдiң азық-түлiк қауiпсiздiгiн қамтамасыз ету;
2) қолайлы фитосанитарлық ахуалды қамтамасыз ету;
3) фитосанитарлық іс-шараларды жүргiзу кезiнде ауыл шаруашылығы
өнiмiнiң, қоршаған табиғи ортаның ластануының алдын алу.
2-тарау. Өсiмдiктердi қорғау саласындағы мемлекеттiк реттеу
4-бап. Қазақстан Республикасының өсiмдiктердi қорғаудың мемлекеттiк
жүйесi
Қазақстан Республикасының өсiмдiктердi қорғаудың мемлекеттiк жүйесiне
мыналар кiредi:
1) Қазақстан Республикасының Yкiметi;
2) уәкiлеттi орган және оның аумақтық бөлiмшелерi;
3) өсiмдiктердi қорғау саласындағы қызметтi жүзеге асыратын
мемлекеттiк ұйымдар;
4) иелiгiнде мемлекеттiк фитосанитарлық бақылаудың объектiлерi бар
жеке және заңды тұлғалар.
5-бап. Қазақстан Республикасы Yкiметінiң өсiмдiктердi қорғау
саласындағы құзыретi
Қазақстан Республикасы Yкiметiнiң өсiмдiктердi қорғау саласындағы
құзыретiне мыналар жатады:
1) өсiмдiктердi қорғау саласындағы мемлекеттiк саясатты iске асыру;
2) өсiмдiктердi қорғау саласындағы бағдарламаларды бекiту;
3) олармен күрес және фитосанитарлық мониторинг республикалық бюджеттiң қаражаты есебiнен жүзеге асырылатын Аса қауiптi зиянды организмдердiң тiзбесiн бекiту;
4) өсiмдiктердi қорғау саласында халықаралық ынтымақтастықты жүзеге асыру;
5) заңнамалық актiлермен және Қазақстан Республикасы Президентiнiң актiлерiмен белгiленген өзге функциялар.
6-бап. Уәкiлеттi органның және оның аумақтық бөлiмшелерiнiң құзыретi
1. Уәкiлетті органның құзыретiне мыналар жатады:
1) олардың фитосанитарлық iс-шаралары мен мониторингi республикалық бюджеттiң қаражаты есебiнен жүзеге асырылатын Аса қауiптi зиянды организмдердiң тiзбесiн әзiрлеу және Қазақстан Республикасының Yкiметiне ұсыну;
2) аса қауiптi зиянды организмдерге қарсы күрес жөнiндегi мемлекеттiк бағдарламаларды әзiрлеу және Қазақстан Республикасының Yкiметiне ұсыну;
3) ауыл шаруашылығы және өзге алаптарын зиянды және аса қауiптi зиянды организмдерден қорғауды жүзеге асыру жөнiндегi ұсыныстарды бекiту;
4) пестицидтердiң тiркеулiк сынақтарын және мемлекеттiк тiркеуiн жүргiзу жөнiндегi ережелердi әзiрлеу мен бекiту;
5) орман қорының жерлерiн қоспағанда Қазақстан Республикасының аумағын зиянды және аса қауiптi зиянды организмдердің таралуынан қорғауды ұйымдастыру;
6) өсiмдiктердi қорғау жөнiндегi қызметтi лицензиялау;
7) фитосанитарлық іс-шараларды жүргiзуде мемлекеттiк органдардың, жеке және заңды тұлғалардың қызметтерiн үйлестiру;
8) тауарларды, жұмыстарды және қызмет көрсетулердi мемлекеттiк сатып алу жөнiндегi конкурстық құжаттамаларды, ғылыми және өсiмдiктердi қорғау жөнiнде өзге зерттеулерге тапсырыстарды Қазақстан Республикасының заңнамасына сәйкес әзiрлеу;
9) пестицидтердi мемлекеттiк сатып алу, оларды сақтау, тасымалдау, қолдану жөнiндегi конкурстарды ұйымдастыру және жүргізу, сондай-ақ заңнамада белгiленген тәртiппен пестицидтердiң босалқы қорын құру;
10) мемлекеттiк санитарлық-эпидемиологиялық қызметтiң және қоршаған ортаны қорғаудың уәкiлеттi органдарының келiсуiмен пестицидтердi зарарсыздандыру жөнiндегi жұмыстарын ұйымдастыру;
11) фитосанитарлық iс-шараларды, фитосанитарлық нормативтердi, статистика органдарының келiсуiмен фитосанитарлық есептер мен есеп берудiң нысандарын, сондай-ақ оларды тапсыру тәртiбiн әзiрлеудi ұйымдастыру және белгiленген тәртiппен бекiту;
12) аса қауiптi зиянды организмдер бойынша фитосанитарлық мониторингтi ұйымдастыру;
13) өсiмдiктердi қорғау саласындағы нормативтiк құқықтық актiлер және жүргiзiлген фитосанитарлық іс-шаралар туралы ақпаратты мүдделi адамдарға берудi ұйымдастыру мен қамтамасыз ету;
14) пестицидтердiң тiркеулiк, өндiрiстiк сынақтарын және мемлекеттiк тiркеудi ұйымдастыру, сондай-ақ Қазақстан Республикасының аумағында қолдануға рұқсат етiлген пестицидтердiң өкiлеттi орган бекiтетiн тiзiмiн жүргiзу;
15) өсiмдiктердi қорғау саласындағы қолданбалы ғылыми зерттеулердi ұйымдастыру мен үйлестiру;
16) республикалық бюджеттiң қаражаты есебiнен сатып алынған пестицидтердi мониторингтiң деректерiне байланысты аумақ бойынша тарату, олардың сапасын, сақталуын, тасымалдануын және Қазақстан Республикасы аумағында қауiпсiз қолданылуын бақылау;
17) халық арасында өсiмдiктердi қорғау саласында түсiндiру жұмысын ұйымдастыру және жүргiзу;
18) өсiмдiктердi қорғау саласындағы халықаралық ұйымдар және мемлекеттiк органдармен ынтымақтастықты жүзеге асыру;
19) өсiмдiктердi қорғау саласындағы нормативтiк құқықтық актілерде көзделген өзге функциялар.
2. Уәкiлеттi органның аумақтық бөлiмшелерiнiң құзыретiне уәкiлеттi органның функцияларын тиiстi аумақта жүзеге асыру жатады.
3. Өсiмдiктердi қорғау саласындағы уәкiлеттi органның және оның аумақтық бөлiмшелерiнiң басшылары бiр мезгiлде Қазақстан Республикасының және тиiстi аумақтардың өсiмдiктердi қорғау жөнiндегi бас мемлекеттiк инспекторлары болып табылады, уәкiлеттi органның өзге лауазымды адамдары бiр мезгiлде Қазақстан Республикасының және тиiстi аумақтардың өсiмдiктердi қорғау жөнiндегi мемлекеттiк инспекторлары болып табылады.
7-бап. Өсiмдiктердi қорғау жөнiндегi мемлекеттiк инспекторлардың
құзыретi
1. Қазақстан Республикасының, облыстың, қаланың, ауданның өсiмдiктердi қорғау жөнiндегi бас мемлекеттiк инспекторларының құзыретiне мыналар жатады:
1) тиiстi аумақта мемлекеттiк фитосанитарлық бақылауды ұйымдастыру және жүзеге асыру;
2) тиiстi аумақта фитосанитарлық іс-шараларды жүзеге асыру жөнiндегi ұйғарымдарды жеке және заңды тұлғалардың орындауына беру және олардың орындалуын бақылау;
3) фитосанитарлық есептi және есеп берудi ұйымдастыру мен жүргiзу және Қазақстан Республикасының өсiмдiктердi қорғау туралы заңнамасында белгiленген тәртiппен оны тапсыру;
4) осы Заңға және Қазақстан Республикасының өзге нормативтiк құқықтық актiлерiне сәйкес өзге функциялар.
2. Өсiмдiктердi қорғау жөнiндегi мемлекеттiк инспектордың құзыретiне мыналар жатады:
1) тиiстi аумақта мемлекеттiк фитосанитарлық бақылауды жүзеге асыру;
2) фитосанитарлық есеп пен есеп берудi жүргiзу және Қазақстан Республикасының өсiмдiктердi қорғау туралы заңнамасында белгiленген тәртiппен оны тапсыру;
3) осы Заңға және Қазақстан Республикасының өзге нормативтiк құқықтық актiлерiне сәйкес өзге функциялар.
8-бап. Өсiмдiктердi қорғау жөнiндегi мемлекеттiк инспекторлардың
құқықтары
1. Өсiмдiктердi қорғау жөнiндегi мемлекеттiк инспекторлар мынаған құқылы:
1) жеке және заңды тұлғалардың заңнаманы және өсiмдiктердi қорғау жөнiндегі нормативтiк құқықтық актiлердi сақтауын тексеру мақсатында олардың аумақтары мен ауыл шаруашылығына арналған объектiлерiне кедергiсiз кiруге;
2) жеке және заңды тұлғаларға, өсiмдiктердi қорғау туралы заңнаманың анықталған бұзушылықтарын жою туралы ұйғарымдар ұсыну, ұйғарымдар орындалмаған жағдайда хаттамалар жасап, соттарға қуыным арызын жiберуге;
3) Қазақстан Республикасының заңнамалық актiлерiне сәйкес айрықша жағдайларда жеке және заңды тұлғалардың қызметiн соттың шешiмiнсiз 3 күнге дейiн мерзiмге өсiмдiктердi қорғау саласындағы заңнаманың бұзушылықтарын жойғанша, мiндеттi түрде көрсетiлген мерзiмде қуыным арызын сотқа берумен, тыйым салуға және кiдiртiп қоюға;
4) Қазақстан Республикасының заңнамалық актiлерiнде белгiленген тәртiппен өсiмдiктердi қорғау туралы заңнаманы бұзған жағдайда жеке және заңды тұлғаларды әкiмшiлiк жауапкершiлiкке тартуға.
2. Өсiмдiктердi қорғау жөнiндегi мемлекеттiк инспекторлардың әрекеттерiне шағым уәкiлеттi органға немесе сотқа берiлуi мүмкiн.
9-бап. Өсiмдiктердi қорғау жөнiндегi мемлекеттiк инспекторлардың
актiлерi
1. Хаттамалар мен ұйғарымдардың нысандарын, оларды жасау мен берудiң тәртiбiн уәкiлеттi орган Қазақстан Республикасының әкiмшiлiк құқық бұзушылық туралы кодексiне сәйкес бекiтедi.
2. Өсiмдiктердi қорғау жөнiндегi мемлекеттiк инспекторлардың ұйғарымдары қызметi фитосанитарлық iс-шараларды жүргiзуге байланысты жеке және заңды тұлғалардың атқаруы үшiн мiндеттi.
10-бап. Өсiмдiктердi қорғау саласындағы қызметтi жүзеге асыратын
мемлекеттік ұйымдар
1. Өсiмдiктердi қорғау саласындағы қызметтi жүзеге асыратын мемлекеттiк ұйымдарды қызметтердiң мына түрлерiн жүзеге асыру мақсатында Қазақстан Республикасының Yкiметi құрады:
1) Қазақстан Республикасының Үкiметi бекiткен тiзбе бойынша аса қауiптi зиянды организмдердiң фитосанитарлық мониторингi;
2) тiркеуге ұсынылған препараттарды қолданудың реттемелерiн
өндiрiстiк жағдайда тексеру үшiн пестицидтердiң өндiрiстiк сынақтары;
3) пестицидтердiң қалдықты мөлшерiнiң болуына ауыл шаруашылығы
өнiмдерiн тексеру.
2. Осы баптың 1-тармағының 1) және 2) тармақшаларында көзделген
қызметтiң түрлерi мемлекеттiк монополияға жатады.
3. Өсiмдiктердi қорғау саласындағы қызметтi жүзеге асыратын
мемлекеттiк ұйымдар, сондай-ақ иелiгiнде мемлекеттiк фитосанитарлық
бақылауға жататын объектiлерi бар жеке және заңды тұлғалар уәкiлеттi орган
бекiткен тәртiппен фитосанитарлық есеп жүргiзедi және уәкiлеттi органға
тапсырады.
3-тарау. Мемлекеттiк фитосанитарлық бақылау
11-бап. Мемлекеттiк фитосанитарлық бақылаудың мақсаттары мен
мiндеттерi
Мемлекеттiк фитосанитарлық бақылау мыналарды көздейдi:
1) жеке және заңды тұлғалардың өсiмдiктердi қорғау туралы заңнаманың
талаптарын сақтау жөнiндегi қызметiн бақылау;
2) фитосанитарлық іс-шараларды ұйымдастыруды және орындалуын бақылау;
3) фитосанитарлық есептi жүргiзу мен беру;
4) өсiмдiктердi қорғау туралы заңнаманың бұзушылықтарын анықтау және
жолын кесу;
5) пестицидтердің тiркеулiк және өндiрiстiк сынақтарын ұйымдастыру
мен жүргiзудi бақылау.
12-бап. Мемлекеттiк фитосанитарлық-бақылау объектiлерi
Мемлекеттiк фитосанитарлық бақылау объектiлерi:
1) ауыл шаруашылық және өзге алаптар, зиянды және аса қауiптi зиянды
организмдердiң тiршiлiк ету орындары болып табылатын ауыл шаруашылығына
арналған объектiлер, сондай-ақ өсiмдiк шаруашылығы өнiмi;
2) зиянды және аса қауiптi зиянды организмдер;
3) фитосанитарлық іс-шараларды жүргiзу үшiн пайдаланылатын арнайы
техника мен пестицидтер.
13-бап. Мемлекеттiк фитосанитарлық бақылауды жүзеге асыру тәртiбi
Мемлекеттiк фитосанитарлық бақылауды уәкiлеттi орган және оның
аумақтық бөлiмшелерiнiң өсiмдiктердi қорғау жөнiндегi мемлекеттiк
инспекторлары жүзеге асырады.
14-бап. Өсiмдiктердi қорғау жөнiндегi қызметтi лицензиялау
1. Мiндеттi лицензиялануға мыналар жатады:
1) тiркеулiк, өндiрiстiк сынақтар және ғылыми зерттеулер үшiн тәжiрибелiк үлгiлердi қоспағанда пестицидтердi және оларды өндiру үшiн бастапқы құрауыштарын әкелу;
2) пестицидтердi қолдану бойынша қызмет көрсету жөнiндегi қызмет.
2. Пестицидтердi әкелудi және пестицидтердi қолдану бойынша қызмет көрсету жөнiндегi қызметтi жүзеге асыратын жеке және заңды тұлғаларға қойылатын бiлiктiлiк талаптары Қазақстан Республикасының заңнамасына сәйкес белгiленедi.
3. Лицензиат өсiмдiктердi қорғау саласындағы өз қызметiнiң нәтижесi бойынша аумақ бойынша пестицидтердiң келiп түсуi мен жұмсалуына есеп жүргiзедi және белгiленген тәртiппен уәкiлеттi органға фитосанитарлық есеп тапсырады.
15-бап. Пестицидтерге мемлекеттiк фитосанитарлық бақылау
1. Пестицидтердi өндiру, әкелу, тасымалдау, сақтау, сату және қолдану мемлекеттiк фитосанитарлық бақылауға жатады.
2. Тiркеулiк, өндiрiстiк сынақтар және ғылыми зерттеулер үшiн әкелiнетiн тәжiрибелiк үлгiлердi қоспағанда, мемлекеттiк тiркеуден өтпеген пестицидтердi, сондай-ақ тiркелмеген пестицидтердi өндiру үшiн бастапқы құрауыштарды өндiруге және әкелуге тыйым салынады.
3. Пестицидтердi мемлекеттiк тiркеу уәкiлеттi орган белгiлеген
тәртiппен жүргiзiледi.
4. Мемлекеттiк тiркеуден өткен пестицидтер уәкiлеттi орган жүргiзетiн
Қазақстан Республикасының аумағында қолдануға рұқсат етiлген
пестицидтердiң тiзiмiне енгiзiледi.
4-тарау. Мiндеттi талаптар
16-бап. Жеке және заңды тұлғалардың зиянды және аса қауiптi зиянды
организмдердiң жаппай таралуының алдын алу жөнiндегi
мiндеттерi
1. Қызметi мемлекеттiк фитосанитарлық бақылаудың объектiлерiмен байланысты жеке және заңды тұлғалар мынаған мiндеттi:
1) зиянды және аса қауiптi зиянды организмдердiң жаппай таралуының алдын алу мақсатында өз аумағында фитосанитарлық мониторинг және фитосанитарлық іс-шараларды жүзеге асыруды қамтамасыз етуге;
2) егiндердi, өзге ауыл шаруашылығы алаптарын, өсiмдiк тектi өнiмдердi сақтау мен қайта өңдеу үшiн үй-жайды зиянды және аса қауiптi зиянды организмдердiң жұғуынан қорғауды жүргiзу;
3) қоршаған ортаның және ауыл шаруашылығы өнiмдерiнiң пестицидтердiң улы қалдықтарымен бекiтiлген санитарлық-гигиеналық нормалардан асыра ластануына жол бермеуге;
4) өсiмдiктердi қорғау жөнiндегi мемлекеттiк инспекторлардың өсiмдiктердi қорғау және қоршаған ортаны қорғау салаларындағы нормативтiк құқықтық актiлердiң талаптарына сәйкес келмейтiн, адам денсаулығы мен қоршаған ортаға қауiп төндiретiн, тыйым салынған әрi жарамсыздыққа келген пестицидтердi зарарсыздандыру жөнiндегi ұйғарымдарын орындауға;
5) өсiмдiктердi қорғау жөнiндегi мемлекеттiк инспекторларға олардың қызметтiк мiндеттерiн орындауына көмек көрсетуге.
2. Тыйым салынған немесе жарамсыздыққа келген пестицидтердi, сондай-ақ олардан босаған ыдыстарды зарарсыздандыруды (кәдеге жарату, көму, жою) жеке және заңды тұлғалар Қазақстан Республикасының заңнамасына сәйкес қамтамасыз етедi.
17-бап. Зиянды және аса қауiптi зиянды организмдердiң жаппай
таралуының алдын алу және олармен күресу жөнiндегi
фитосанитарлық іс-шараларды ұйымдастыру
Фитосанитарлық iс-шараларды ұйымдастыруды және жүргiзудi уәкiлеттi орган және оның аумақтық бөлiмшелерi белгiлейдi әрi қызметi мемлекеттiк фитосанитарлық бақылаудың объектiлерiмен байланысты жеке және заңды тұлғаларға мiндеттi болып табылады.
18-бап. Пестицидтердiң босалқы қоры
1. Пестицидтердiң босалқы қоры аса қауiптi зиянды организмдерге қарсы күрес үшiн арналған пестицидтердiң үнемi жаңартылып отыратын белгiлi көлемi және уәкiлеттi органның меншiгi болып табылады.
2. Босалқы қор республикалық бюджеттiң қаражаты есебiнен сатып алынған пестицидтердiң көлемiнен құралады және аса қауiптi зиянды организмдердiң жаппай көбеюi мен таралуының алдын алуға және жоюға арналған.
3. Пестицидтердiң түрлерi бойынша босалқы қордың нормативiн және оны қолданудың тәртiбiн уәкiлеттi орган белгiлейдi.
19-бап. Фитосанитарлық нормативтер
1. Фитосанитарлық нормативтер ауыл шаруашылығы өсiмдiктерi және алаптары үшiн оның қауiпсiздiгi тұрғысынан фитосанитарлық факторды сипаттайтын көрсеткiштердің рұқсат етiлген ең көп немесе ең аз сандық немесе сапалық деңгейiн айқындайды.
2. Фитосанитарлық нормативтер өсiмдiктердi қорғау туралы заңнамаға сәйкес жүргiзiлетiн зерттеулермен белгiленедi.
3. Фитосанитарлық нормативтер фитосанитарлық iс-шаралардың көлемiн объективтi және негiзделген жоспарлау жүргiзу, сондай-ақ зиянды және аса қауiптi зиянды организмдердiң жаппай көбею, таралу және жою мүмкiншiлiгiн болжамдау үшiн негіз болып табылады.
4. Фитосанитарлық нормативтердi уәкiлеттi орган бекiтедi және өсiмдiктердi қорғау жөнiндегi мемлекеттiк инспекторлардың мемлекеттiк фитосанитарлық бақылауды жүргiзуi үшiн негiз болып табылады.
20-бап. Адамдардың денсаулығы және қоршаған орта үшiн қауiп
төндiретiн пестицидтердi зарарсыздандыру тәртiбi
Адамдардың денсаулығы және қоршаған орта үшiн қауiп төндiретiн, тыйым салынған немесе жарамсыздыққа келген пестицидтер, сондай-ақ олардан босаған ыдыстар, қоршаған ортаны қорғау органдарымен келiсiм бойынша уәкiлеттi орган айқындаған тәртiппен мiндеттi зарарсыздандыруға (кәдеге жаратуға, көмуге, жоюға) жатады.
21-бап. Өсiмдiктердi қорғау саласындағы ғылыми зерттеулердi және
өсiмдiктердi қорғау жөнiндегi мамандарды дайындау және
олардың бiлiктiлiгiн арттыру жөнiндегi қызметтi үйлестiру
1. Уәкiлеттi орган өсiмдiктердi қорғау саласындағы қолданбалы ғылыми зерттеулердiң жүргiзiлуiн ұйымдастырады, үйлестiредi және бақылайды, зерттеулердiң нәтижесiнде әзiрленген фитосанитарлық iс-шараларды жүзеге асыру тәртiбiн және тәсiлдерiн реттеушi әдiстердi, әдiстемелердi, ұсыныстарды бекiтедi.
2. Өсiмдiктердi қорғау жөнiндегi мамандарды дайындау және бiлiктiлiгiн арттыру жөнiндегi оқыту бағдарламалары (оқу бағдарламалары) мiндеттi түрде уәкiлеттi органмен келiсiлуге жатады.
5-тарау. Өсiмдiктердi қорғау жөнiндегi iс-шаралардың
қаржыландырылуы және өсiмдiктердi қорғау туралы заңнаманы
бұзғаны үшiн жауапкершiлiк
22-бап. Өсiмдiктердi қорғау жөнiндегi iс-шаралардың
қаржыландырылу көздерi
1. Республикалық бюджеттiң қаражаты есебiнен Қазақстан Республикасының Yкiметi бекiткен аса қауiптi зиянды организмдердiң тiзбесi бойынша фитосанитарлық іс-шараларды жүргiзуге арналған шығындарды қаржыландыру жүзеге асырылады.
2. Республикалық бюджеттiң есебiнен жүзеге асырылатын iс-шаралар мыналарды қамтиды:
1) аса қауiптi зиянды организмдердiң мекендеу орындарын анықтау жөнiндегi фитосанитарлық мониторингтi жүргiзу;
2) аса қауiптi зиянды организмдерге қарсы химиялық өңдеу жүргiзу үшiн пестицидтердi сатып алу, сондай-ақ пестицидтердің босалқы қорын қалыптастыру және жаңарту;
3) пестицидтердi кедендiк рәсiмдеу, сақтау және жұмыстарды жүргiзу орындарына жеткiзу;
4) аса қауiптi зиянды организмдердiң зияндылықтың экономикалық шегінен аса таралған орындарында химиялық өңдеу жүргiзу;
5) республикалық бюджеттiң қаражаты есебiнен сатып алынған тыйым салынған және жарамсыздыққа келген пестицидтердi, сондай-ақ олардан босаған ыдыстарға зарарсыздандыру жүргiзу;
6) өсiмдiктердi қорғау саласында қолданбалы зерттеулер жүргiзу.
3. Мемлекеттiк фитосанитарлық бақылау объектiлерi иелерiнiң есебiнен, уәкiлеттi орган белгiлеген тәртiппен, мына фитосанитарлық iс-шаралар жүргiзiледi:
1) өз қаражаты есебiнен сатып алынған, тыйым салынған және жарамсыздыққа келген пестицидтердi, сондай-ақ олардан босаған ыдыстарды өсiмдiктердi қорғау жөнiндегi мемлекеттiк инспекторлардың ұйғарымы бойынша зарарсыздандыру;
2) Қазақстан Республикасының Yкiметi бекiткен Тiзiмге енгiзiлген аса қауiптi зиянды организмдердi қоспағанда, зиянды организмдерге қарсы күрес жөнiндегi iс-шаралар;
3) ауыл шаруашылығы өнiмдерiн пестицидтердiң улы қалдықтарының болуына тексеру.
4. Пестицидтердiң тiркеулiк және өндiрiстiк сынақтары уәкiлеттi орган белгiлеген тәртiппен пестицидтердi өндiрушiлердiң қаражаты есебiнен жүргiзіледi.
23-бап. Өсiмдiктердi қорғау туралы заңнаманы бұзғаны үшiн жауаптылық
1. Өсiмдiктердi қорғау туралы заңнаманы бұзғаны үшiн кiнәлi жеке және заңды тұлғалар, мемлекеттiк органдардың лауазымды адамдары Қазақстан Республикасының заңнамалық актiлерiне сәйкес жауапты болады.
2. Өсiмдiктердi қорғау туралы заңнаманы бұзғаны үшiн жауаптылыққа
тарту кiнәлi адамдарды адамдардың денсаулығына, қоршаған ортаға келтірген
нұқсанды Қазақстан Республикасының заңнамалық актiлерiнде белгіленген
тәртiппен өтеу қажеттiгiнен босатпайды.
24-бап. Осы Заңның қолданысқа енгізілуі
Осы Заң ол ресми жарияланған күнінен бастап қолданысқа енгізіледі.
Қазақстан Республикасының
Президенті
Мамандар:
Багарова Ж.А.,
Жұманазарова А.Б.
