Дәрілік заттарды, медициналық мақсаттағы бұйымдар мен медициналық техниканы көтерме және бөлшек саудада өткізу қағидаларын бекіту туралы

      РҚАО-ның ескертпесі!
      Бұйрықтың қолданысқа енгізілу тәртібін 4-тармақтан қараңыз

       "Халық денсаулығы және денсаулық сақтау жүйесі туралы" Қазақстан Республикасының 2009 жылғы 18 қыркүйектегі Кодексінің 69-бабына сәйкес БҰЙЫРАМЫН:

      1. Қоса беріліп отырған Дәрілік заттарды, медициналық мақсаттағы бұйымдар мен медициналық техниканы көтерме және бөлшек саудада өткізу қағидалары (бұдан әрі – Қағидалар) бекітілсін.

      2. Қазақстан Республикасы Денсаулық сақтау және әлеуметтік даму министрлігінің Медициналық және фармацевтикалық қызметті бақылау комитеті:

      1) осы бұйрықты Қазақстан Республикасы Әділет министрлігінде мемлекеттік тіркеуді;

      2) осы бұйрықты Қазақстан Республикасы Әділет министрлігінде мемлекеттік тіркегеннен кейін күнтізбелік он күннің ішінде мерзімді баспасөз басылымдарында және "Әділет" ақпараттық-құқықтық жүйесінде ресми жариялауға жіберуді;

      3) осы бұйрықты Қазақстан Республикасы Денсаулық сақтау және әлеуметтік даму министрлігінің интернет-ресурсында орналастыруды;

      4) осы бұйрықты Қазақстан Республикасы Әділет министрлігінде мемлекеттік тіркегеннен кейін он жұмыс күнінің ішінде Қазақстан Республикасы Денсаулық сақтау және әлеуметтік даму министрлігінің Заң қызметі департаментіне осы тармақтың 1), 2) және 3) тармақшаларында көзделген іс-шаралардың орындалуы туралы мәліметтерді ұсынуды қамтамасыз етсін.

      3. Осы бұйрықтың орындалуын бақылау Қазақстан Республикасының Денсаулық сақтау және әлеуметтік даму вице-министрі А.В. Цойға жүктелсін.

      4. Осы бұйрық 2018 жылғы 1 қаңтардан бастап қолданысқа енгізілтін Қағидаларының 5-тармағын қоспағанда оны алғашқы ресми жариялаған күнінен бастап күнтізбелік он күн өткен соң қолданысқа енгізіледі.

Дәрілік заттарды, медициналық мақсаттағы бұйымдар мен медициналық техниканы Қазақстан Республикасында көтерме және бөлшек саудада өткізу қағидалары
1. Жалпы ережелер

      1. Осы Дәрілік заттарды, медициналық мақсаттағы бұйымдар мен медициналық техниканы Қазақстан Республикасында көтерме және бөлшек саудада өткізу қағидалары (бұдан әрі – Қағидалар) "Халық денсаулығы және денсаулық сақтау жүйесі туралы" Қазақстан Республикасының 2009 жылғы 18 қыркүйектегі Кодексінің (бұдан әрі – Кодекс) 69-бабына сәйкес әзірленген және дәрілік заттарды, медициналық мақсаттағы бұйымдар мен медициналық техниканы көтерме және бөлшек саудада өткізу тәртібін айқындайды.

      2. Осы Қағидаларда мынадай ұғымдар пайдаланылды:

      1) дәрілік заттарды, медициналық мақсаттағы бұйымдар мен медициналық техниканы бөлшек саудада өткізу – сатып алумен (әкелуден басқа), сақтаумен, бөлумен, түпкі тұтынушыға өткізумен (әкетуден басқа), жоюмен байланысты фармацевтикалық қызмет;

      2) дәрілік заттарды, медициналық мақсаттағы бұйымдар мен медициналық техниканы көтерме саудада өткізу – сатып алумен, сақтаумен, әкелумен, әкетумен, көлемін шектемей өткізумен (дәрілік заттарды халыққа өткізуді қоспағанда), жоюмен байланысты фармацевтикалық қызмет;

      3) дәрілік заттардың, медициналық мақсаттағы бұйымдар мен медициналық техниканың айналысы – қауіпсіз, тиімді және сапалы дәрілік заттарды, медициналық мақсаттағы бұйымдар мен медициналық техниканы әзірлеушіден және (немесе) өндірушіден тұтынушының қолдануына дейін жеткізу процесінде жүзеге асырылатын қызмет;

      4) дәрілік заттардың, медициналық мақсаттағы бұйымдар мен медициналық техниканың айналысы саласындағы субъектілер (бұдан әрі – субъектілер) – фармацевтикалық қызметті жүзеге асыратын жеке немесе заңды тұлғалар;

      5) дәрілік заттарды, медициналық мақсаттағы бұйымдар мен медициналық техниканы көтерме саудада өткізу объектілері – дәріхана қоймасы, медициналық техника және медициналық мақсаттағы бұйымдар қоймасы;

      6) дәрілік заттарды, медициналық мақсаттағы бұйымдар мен медициналық техниканы бөлшек саудада өткізу объектілері – дәріхана, алғашқы медициналық-санитариялық және (немесе) консультациялық-диагностикалық көмек көрсететін денсаулық сақтау ұйымдарындағы дәріхана пункті, шалғайдағы елді мекендерге арналған жылжымалы дәріхана пункті, оптика дүкені, медициналық техника және медициналық мақсаттағы бұйымдар дүкені;

      7) хабарлама – рұқсаттар және хабарламалар саласындағы уәкілетті орган бекіткен нысан бойынша өтініш иесі құрастырған, қызметті немесе белгілі бір іс-қимылдарды жүзеге асыруды бастау не тоқтату туралы ақпарат беретін құжат.

2. Дәрілік заттарды, медициналық мақсаттағы бұйымдар мен медициналық техниканы көтерме және бөлшек саудада өткізуге қойылатын талаптар

      3. Дәрілік заттарды, медициналық мақсаттағы бұйымдар мен медициналық техниканы көтерме, сондай-ақ бөлшек саудада өткізуді "Рұқсаттар және хабарламалар туралы" Қазақстан Республикасының 2014 жылғы 16 мамырдағы Заңымен (бұдан әрі – Рұқсаттар мен хабарламалар туралы заң) белгіленген тәртіпте қызметтің басталуы туралы хабарлаған немесе лицензия алған субъектілер жүзеге асырады.

      4. Қазақстан Республикасы Денсаулық сақтау және әлеуметтік даму министрінің 2015 жылғы 25 маусымдағы № 516 бұйрығымен бекітілген (Нормативтік құқықтық актілерді мемлекеттік тіркеу тізілімінде № 11806 болып тіркелген) Дәрілік заттарға, медициналық мақсаттағы бұйымдар мен медициналық техникаға жатпайтын тауарлар тізбесіне сәйкес, дәрілік заттарға, медициналық мақсаттағы бұйымдар мен медициналық техникаға жатпайтын тауарларды дәрілік заттарды, медициналық мақсаттағы бұйымдар мен медициналық техниканы көтерме және бөлшек саудада өткізу объектілері арқылы өткізуге рұқсат етіледі.

      5. Субъектілер дәрілік заттарды көтерме тиісті дистрибьюторлық практика (GDP) талаптарына саудада өткізуді сәйкес дәрілік заттарды, дәрілік заттарды бөлшек саудада өткізуді тиісті дәріханалық практика (GРP) талаптарына сәйкес жүзеге асырады.

      6. Көтерме және бөлшек саудада өткізу субъектілері:

      1) мемлекеттік және орыс тілдерінде фармацевтикалық қызмет субъектісінің атауы, оның ұйымдық-құқықтық нысаны және жұмыс режимі көрсетілген маңдайша жазуының болуын;

      2) танысу үшін ыңғайлы жерде:

      фармацевтикалық қызметке лицензияның және оған қосымшаның немесе қызметті немесе белгілі бір әрекеттерді жүзеге асырудың басталуы немесе тоқтатылуы туралы ақпарат беретін құжаттың көшірмелерінің (оның ішінде электрондық құжаттың басып шығарылған көшірмесінің);

      дәрілік заттардың, медициналық мақсаттағы бұйымдар мен медициналық техника айналысы саласындағы мемлекеттік органның аумақтық бөлімшелерінің телефондары және мекенжайлары туралы ақпараттың;

      пікірлер мен ұсыныстар кітабының;

      фармацевтикалық анықтама қызметінің телефон нөмірлері туралы ақпараттың орналастырылуын;

      3) персоналдың жүйлі оқытылуын, фармацевтика (медицина) карларының кемінде бес жылда бір рет біліктілігін арттырудан және қайта даярлаудан өтуін қамтамасыз етеді.

      7. Кодекстің 69-бабының 4-тармағында айқындалған жағдайларда дәрілік заттарды, медициналық мақсаттағы бұйымдар мен медициналық техниканы көтерме және бөлшек саудада өткізуге рұқсат етілмейді.

      8. Кодекстің 69-бабының 7-тармағына сәйкес, Қазақстан Республикасының аумағына әкелінген және өндірілген дәрілік заттар, медициналық мақсаттағы бұйымдар мен медициналық техника тіркеу куәлігінің мерзімі аяқталғанға дейін Қазақстан Республикасының аумағында шектеусіз қолданылады, айналыста болады және пайдаланылады.

      Дәрілік затты, медициналық мақсаттағы бұйымды қайта тіркеу немесе оларды тіркеу деректеріне таңбалануы мен қаптамасы бойынша өзгерістер енгізу кезінде жаңа қаптаманы бекіту жағдайында дәрілік заттың, медициналық мақсаттағы бұйымның жарамдылық мерзімі аяқталғанға дейін дәрілік затты, медициналық мақсаттағы бұйымды бір мезгілде өткізуге жол беріледі.

      9. Ілеспе құжаттарға сәйкес келмейтін, жарамдылық мерзімі өткен, Қазақстан Республикасында мемлекеттік тіркеуден, қауіпсіздік пен сапаны бағалаудан өтпеген, жалған, Қазақстан Республикасы заңнамасының талаптарына сәйкес келмейтін дәрілік заттар, медициналық мақсаттағы бұйымдар мен медициналық техника көтерме және бөлшек сауда объектілерінде басқа дәрілік заттардан, медициналық мақсаттағы бұйымдар мен медициналық техникадан бөлек сақталады және "Тиісті шаралар қабылданғанға дейін өткізуге жатпайды" деген затбелгімен жарақтандырылады.

3. Дәрілік заттарды, медициналық мақсаттағы бұйымдар мен медициналық техниканы көтерме саудада өткізу тәртібі

      10. Дәрілік заттарды, медициналық мақсаттағы бұйымдар мен медициналық техниканы көтерме саудада өткізуді жүзеге асыратын объектілерге:

      дәрілік заттар мен медициналық мақсаттағы бұйымдарды көтерме саудада өткізуді жүзеге асыратын дәріхана қоймасы;

      медициналық мақсаттағы бұйымдар мен медициналық техниканы көтерме саудада өткізуді жүзеге асыратын медициналық мақсаттағы бұйымдар ме медициналық техника қоймасы жатады.

      11. Дәрілік заттарды, медициналық мақсаттағы бұйымдар мен медициналық техниканы көтерме саудада өткізуді жүзеге асыратын объектінің Қазақстан Республикасы Денсаулық сақтау және әлеуметтік даму министрінің 2015 жылғы 1 сәуірдегі № 27 бұйрығымен бекітілген (Нормативтік құқықтық актілерді мемлекеттік тіркеу тізілімінде № 10600 болып тіркелген) фармацевтикалық қызметке қойылатын біліктілік талаптарына (бұдан әрі – Біліктілік талаптары) сәйкес фармацевтикалық қызметті жүзеге асыру үшін білікті персоналы бар.

      12. Дәрілік заттарды, медициналық мақсаттағы бұйымдар мен медициналық техниканы көтерме саудада өткізу мынадай талаптардың сақталуымен жүзеге асырылады:

      1) өндірушілерден немесе фармацевтикалық қызметке лицензиясы немесе дәрілік заттарды көтерме саудада өткізуге арналған лицензияға қосымшасы бар немесе Рұқсаттар мен хабарламалар туралы заңда белгіленген тәртіппен қызметті бастағаны туралы хабарлаған субъектілерден ғана сатып алынған дәрілік заттарды, медициналық мақсаттағы бұйымдар мен медициналық техниканы көтерме саудада өткізу;

      2) дәрілік заттар, медициналық мақсаттағы бұйымдар мен медициналық техника фармацевтикалық немесе медициналық қызметке лицензиясы бар немесе Рұқсаттар мен хабарламалар туралы заңда белгіленген тәртіппен қызметтің басталуы туралы хабарлаған субъектілер сауда өткізеді;

      3) дәрілік заттар мен медициналық мақсаттағы бұйымдар Қауіпсіздік пен сапаны бағалау қағидаларына сәйкес қауіпсіздік пен сапа туралы қорытындыны алғанан кейін өткізіледі;

      4) "Өлшем бірлігін қамтамасыз ету туралы" 2000 жылғы 7 маусымдағы Қазақстан Республикасының Заңына сәйкес (бұдан әрі - Өлшем бірлігін қамтамасыз ету туралы заң), өлшем бірліктеріне жататын медициналық техника Қазақстан Республикасының техникалық реттеу туралы заңнамасына сәйкес өлшем құралдарының типін бекіту туралы сертификат немесе метрологиялық атестаттау туралы сертификат болған жағдайда өткізіледі;

      5) үй-жай, алаңдар мен жабдық Біліктілік талаптарына сәйкес келеді;

      6) дәрілік заттар, медициналық мақсаттағы бұйымдар мен медициналық техника Қазақстан Республикасы Денсаулық сақтау және әлеуметтік даму министрінің 2015 жылғы 24 сәуірдегі № 262 бұйрығымен бекітілген (Нормативтік құқықтық актілерді мемлекеттік тіркеу тізілімінде № 11191 болып тіркелген) Дәрілік заттарды, медициналық мақсаттағы бұйымдар мен медициналық техниканы сақтау және тасымалдау қағидаларына сәйкес (бұдан әрі – Сақтау және тасымалдау қағидалары) олардың қауіпсізігінің, тиімділігі мен сапасының сақталуын қамтамасыз ететін жағдайларда сақталады және тасымалданады;

      7) дәрілік заттарды, медициналық мақсаттағы бұйымдар мен медициналық техниканы көтерме саудада өткізуді жүзеге асыратын субъектілер алынған және өнім берушіден сатып алушыға дейін жеткізілген кез келген өнім сериясына/партиясына қатысты орындалған әрекеттерді қадағалауға және осы Қағидалардың 7-тармағында көрсетілген дәрілік заттың, медициналық мақсаттағы бұйым мен медициналық техниканың орналасқан жерін анықтауға мүмкіндік беретін құжаттама жүйесінің болуын және жұмыс істеуін қамтамасыз етеді;

      8) дәрілік заттарды, медициналық мақсаттағы бұйымдар мен медициналық техниканы көтерме саудада өткізуді жүзеге асыратын субъектілер осы Қағидалардың 7-тармағында көрсетілген дәрілік заттарды, медициналық мақсаттағы бұйымдар мен медициналық техниканы анықтау фактілерінің құжат түрінде тіркелуін, олар туралы хабарлауды, нарықтан алынуын және уәкілетті органға немесе оның аумақтық бөлімшелеріне ақпараттық берілуін қамтамасыз етеді.

      13. Дәрілік заттарды, медициналық мақсаттағы бұйымдар мен медициналық техниканы дәріхана қоймасынан, медициналық техника мен медициналық мақсаттағы бұйымдар қоймасынан өткізу Қазақстан Республикасының Салық кодексінің 276-7-бабының 3-тармағына сәйкес басшының немесе оған уәкілетті тұлғаның, бас бухгалтердің қолымен, сондай-ақ дәрілік заттарды, медициналық мақсаттағы бұйымдар мен медициналық техниканы босатқан адамның қолымен расталған тауар-ілеспе құжаттарымен сүйемелденеді.

      Тауар-ілеспе құжатта өнімнің әрбір атауына, партиясына (сериясына) атауы:

      дозасы (дәрілік зат үшін);

      өлшеп-орамы;

      саны, бір бірлігінің бағасы;

      сомасы;

      сериясы;

      жарамдылық мерзімі, қауіпсіздігі мен сапасы туралы қорытындының нөмірі мен қолданылу мерзімі (дәрілік зат немесе медициналық мақсаттағы бұйым үшін) көрсетіледі.

      Тауар-ілеспе құжаттарда түзетулерге, қосып жазуға, сызуға жол берілмейді.

      14. Субъектінің өтініші бойынша Қазақстан Республикасында тіркелген дәрілік заттардың, медициналық мақсаттағы бұйымдардың қауіпсіздігі мен сапасына бағалау жүргізу қағидаларымен (бұдан әрі - Қағидалар) белгіленген нысан бойынша өнімнің қауіпсіздігі мен сапасы туралы қорытындының көшірмесі ұсынылады.

      Қауіпсіздік пен сапаны бағалау қағидаларға сәйкес берілген дәрілік заттардың, медициналық мақсаттағы бұйымдар мен медициналық техниканынң қауіпсіздігі сапасы туралы қорытынды олардың қолданылу мерзімі ішінде және тағы бір жыл қосып сақталуы және тұтынушылар және (немесе) мемлекеттік бақылаушы органдар үшін қолжетімді.

      15. Дәрілік субстанцияларды Рұқсаттар мен хабарламалар туралы заңға сәйкес дайындау құқығы мен фармацевтикалық қызметке лицензиясы бар дәріханаларға, сондай-ақ дәрілік заттарды өндіру құқығы мен фармацевтикалық қызметке лицензиясы бар дәрілік заттарды өндіру жөніндегі ұйымдар көтерме саудада өткізу жүзеге асырады.

4. Дәрілік заттарды, медициналық мақсаттағы бұйымдар мен медициналық техниканы бөлшек саудада өткізу тәртібі

      16. Дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын объектілерге:

      1) дәріхана;

      2) алғашқы медициналық-санитариялық және (немесе) консультациялық-диагностикалық көмек көрсететін денсаулық сақтау ұйымдарындағы дәріхана пункті;

      3) дәріханалар болмаған кезде шалғайдағы ауылдық жерлердегі жылжымалы дәріхана пункті;

      4) дәріхана пунктері болмаған кезде алғашқы медициналық-санитариялық, консультациялық-диагностикалық көмек көрсететін денсаулық сақтау ұйымдары жатады.

      17. Медициналық мақсаттағы бұйымдар мен медициналық техниканы, оның ішінде көру қабілетін түзеуге арналған көзілдірік оптикасын, көру қабілетін түзеуге арналған көзілдіріктерді, сондай-ақ оларды күту мен жөндеу жөніндегі ілеспе тауарларды бөлшек саудада жүзеге асыратын объектілерге:

      1) оптика дүкені;

      2) медициналық техника мен медициналық мақсаттағы бұйымдар дүкені жатады.

      18. Дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын объектінің Біліктілік талаптарына сәйкес фармацевтикалық қызметті жүзеге асыру үшін білікті персоналы бар.

      19. Бөлшек сауда объектілерінде келушілерге көрінетін жерлерде мынадай сипаттағы ақпарат орналастырылады: "Дәрілік заттар қайтаруға және айырбастауға жатпайды", "Дәрілік заттар балаларға босатылмайды", "Дәрігердің рецептісі бойынша босатуға арналған дәрілік заттарды рецептісіз өткізуге тыйым салынады", "Дәріханада дайындалатын дәрілік препараттарды сақтау мерзімдері" (дайындау құқығы бар дәріханалар үшін).

      20. Тегін медициналық көмектің кепілдік берілген көлемі (бұдан әрі - ТМККК) шеңберінде халықты дәрілік заттармен, медициналық мақсаттағы бұйымдармен қамтамасыз ету бойынша мемлекеттік көрсетілетін қызметті жүзеге асыратын бөлшек саудада өткізу объектілері халықтың амбулаториялық деңгейде белгілі бір аурулары бар азаматтардың жекелеген санаттарын тегін қамтамасыз етуге арналған дәрілік заттар тізбесі туралы ақпаратқа қолжетімділігін қамтамасыз етеді.

      21. Дәрігердің рецептісі бойынша босатуға жататын дәрілік заттар рецептісіз өткізуге жатпайды.

      22. Дәрілік заттар мен медициналық мақсаттағы бұйымдарды бөлшек саудада өткізу кезінде оларды тұтынушының (тапсырыс берушінің) орналасқан жері бойынша жеткізуге жол беріледі.

      Дәрілік заттар мен медициналық мақсаттағы бұйымдарды тұтынушыға жеткізу Сақтау және тасымалдау қағидаларына сәйкес тасымалдау процесінде олардың қасиеттерінің өзгеруіне жол бермейтін тәсілмен жүзеге асырылады.

      23. Дәрілік заттарды, медициналық мақсаттағы бұйымдар мен медициналық техниканы бөлшек саудада өткізу мынадай талаптардың сақталуымен жүзеге асырылады:

      1) дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын субъектілердің тиісті үй-жайлары, жабдығы болуы тиіс;

      2) дәрілік заттар, медициналық мақсаттағы бұйымдар мен медициналық техника Сақтау және тасымалдау қағидаларына сәйкес олардың қауіпсіздігінің, тиімділігі мен сапасының сақталуын қамтамасыз ететін жағдайларда сақталады және тасымалданады;

      3) дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын субъектілер Қауіпсіздік пен сапаны бағалау қағидаларында белгіленген тәртіппен қауіпсіздік пен сапаны бағалаудан өткен, тіркелген дәрілік заттар мен медициналық мақсаттағы бұйымдарды белгілі бір мерзімге немесе қолданыс мерзімі шектелмей жасалған шарт (келісімшарт) негізінде фармацевтикалық қызметке лицензиясы бар не Рұқсаттар мен хабарламалар туралы заңда белгіленген тәртіппен қызметтің басталуы туралы хабарлаған субъектілерден алады;

      4) дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын субъектілер Қауіпсіздік пен сапаны бағалау қағидаларында белгіленген тәртіппен қауіпсіздік пен сапаны бағалаудан өткен, тіркелген дәрілік заттар мен медициналық мақсаттағы бұйымдарды халыққа, медициналық қызметке лицензиясы бар немесе Рұқсаттар мен хабарламалар туралы заңда белгіленген тәртіппен қызметтің басталуы туралы хабарлаған жеке медициналық практикамен айналысатын жеке тұлғаларға, сондай-ақ рецептісіз босатылатын дәрілік заттар мен медициналық мақсаттағы бұйымдарды басқа ұйымдарға өткізеді;

      5) Өлшем бірлігін қамтамасыз ету туралы заңға сәйкес өлшем құралдарына жататын медициналық техниканы бөлшек саудада өткізуді жүзеге асыратын субъектілер оны Қазақстан Республикасының техникалық реттеу туралы заңнамасына сәйкес өлшем құралдарының типін бекіту туралы сертификат не медициналық өлшеу техникасын метрологиялық аттестаттау туралы сертификат болған жағдайда іске асырады;

      6) дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын субъектілер денсаулық сақтау субъектілерімен фармакотерапия, денсаулықты нығайту, халық ауруларының профилактикасы және фармакологиялық қадағалау мәселелері бойынша өзара іс-қимылды жүзеге асырады;

      7) дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын субъектілер жалған фармацевтикалық өнімді анықтайды және оның таралуының алдын алады;

      8) дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын субъектілер дәрілік препараттардың ұтымды тағайындалуын насихаттауға ықпал етеді;

      9) дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын маман:

      дұрыс және ұтымды қолдану немесе пайдалануға;

      ықтимал жанама әсерлері мен қарсы көрсетілімдеріне;

      басқа дәрілік препараттармен өзара әсерлесуіне, оларды қолдану немесе пайдалану кезіндегі сақтық шараларына;

      қолданылу мерзімдеріне және үй жағдайларында сақтау ережелеріне;

      пайдалану ережелеріне, медициналық мақсаттағы бұйымдар мен медициналық техниканың жиынтығына қатысты дұрыс ақпарат ұсынады;

      10) дәрілік заттарды, медициналық мақсаттағы бұйымдар мен медициналық техниканы бөлшек саудада өткізуді жүзеге асыратын субъектілер шұғыл жағдайларда халыққа шұғыл медициналық көмек көрсетеді.

      24. Осы Қағидалардың 7-тармағында көрсетілген дәрілік заттардың, медициналық мақсаттағы бұйымдар мен медициналық техниканың келіп түсуінің алдын алу және оларды сақтау мен өткізу кезінде олардың сапасының төмендеуіне жол бермеу мақсатында:

      1) қабылдау және өткізу кезінде сапаны бақылау;

      2) дәрілік заттарды сақтау қағидалары мен мерзімдерін сақтау, қолданыс мерзімі шектеулі дәрілік заттарды есепке алуды жүргізу;

      3) өлшем құралдарының дұрыстығы мен дәлдігі;

      4) жазылған рецептінің дұрыстығын, оның жарамдылық мерзімін, жазылып берілген дозалардың науқастың жасына сәйкестігін, ингредиенттерінің сыйымдылығын, бір рет босату нормаларын тексеру;

      5) қауіпсіздік пен сапаны бағалау қорытындыларының қолданыс мерзімін есепке алуды жүргізу қамтамасыз етіледі;

      6) дәрілік заттарды дайындау құқығы бар дәріханаларда қосымша:

      дәріхана ішіндегі бақылаудың барлық түрлері;

      дәрілік нысандарды дайындау технологияларының сақталуы қамтамасыз етіледі.

      25. Дәрілік заттар, медициналық мақсаттағы бұйымдар мен медициналық техника олар өткізілгенге дейін қаптамадан шығарылуге, сұрыпталуге, сырттай қарап-тексерілуге жатады, қажет болған кезде тазартылуға, жиынтығы тексерілуге, жиналуға, реттелуге жатады.

      26. Дәрілік заттарды, медициналық мақсаттағы бұйымдар мен медициналық техниканы саны мен сапасы бойынша қабылдауды өнім берушінің ілеспе құжаттарының негізінде бөлшек саудада өткізу объектілерінің мамандары жүзеге асырады.

      27. Дәрілік заттарды, медициналық мақсаттағы бұйымдар мен медициналық техниканы қабылдау кезінде:

      1) санының сәйкестігі, жиынтығы, ыдысының бүтіндігі, қаптамасының, таңбалануының нормативтік құжаттарға сәйкестігі, мемлекеттік және орыс тілдерінде дәрілік заттың, медициналық мақсаттағы бұйымның медициналық қолданылуы жөніндегі нұсқаулықтың болуы, медициналық техникаға пайдалану құжатының болуы;

      2) ілеспе құжаттарда көрсетілген өнім атауының, қаптамасының, санының, партиясының (сериясының) сәйкестігі;

      3) ілеспе құжаттарда қауіпсіздік пен сапа туралы қорытындының немесе тауарды босатуға арналған жүкқұжатта оған сілтеменің болуы тексеріледі.

      28. Тұтынушыны медициналық қолданылуы жөніндегі нұсқаулықпен (нұсқаулықтың көшірмесімен) қамтамасыз еткен жағдайда дәрілік заттарды блистерлік (бастапқы) қаптамадан басқа тұтынушылық (екінші) қаптамасының тұтастығын бұза отырып өткізуге жол беріледі.

      29. Дәріхананың сауда залында, дәріхана пунктінің халыққа қызмет көрсету аймағында витринаға дәрігердің рецептінсіз өткізілетін дәрілік заттар қойылады.

      30. Ветеринария дәрігерлерінің рецептілері бойынша дәрілік заттар бөлшек саудада өткізуге жатпайды.

      31. ТМККК шеңберінде дәрілік заттарды халыққа бөлшек саудада өткізу республиканың әкімшілік-аумақтық бірлігі шегінде (аудан, қала, облыс) жазып берілген күнінен бастап күнтізбелік 10 күннің ішінде жарамды болатын, тегін босатуға арналған арнайы рецептілік бланкілерде жазылатын рецепт бойынша жүзеге асырылады.

      32. Құрамында есірткі құралдары мен психотроптық заттар бар, бақылауға жататын дәрілік заттарды халыққа бөлшек саудада өткізу Қазақстан Республикасында бақылауға жататын есірткі құралдары, психотроптық заттар, сол тектестер мен прекурсорлар туралы Қазақстан Республикасының заңнамасына сәйкес жүзеге асырылады.

      33. Дәрілік затты бір реттік жоғарғы дозадан асатын дозада жазып берген кезде дәрігер рецептіде дәрілік заттың дозасын жазбаша әріптермен және леп белгісімен белгілейді. Дәрігер осы талапты сақтамаған кезде фармацевтика қызметкері жазып берілген дәрілік затты белгіленген бір реттік жоғарғы дозаның жартысын босатады.

      34. Дәрігер жазып берген дәрілік зат болмаған жағдайда бөлшек саудада өткізу объектісінің маманы пациентке дәрігердің келісімінсіз бағасы ең төмен дәрілік заттан бастап халықаралық патенттелмеген атауымен қолда бар дәрілік заттың синонимдерін ұсынады немесе емдеуші дәрігермен келісім бойынша оны фармакологиялық ұқсас дәрілік затқа ауыстыруды жүзеге асырады.

      Бұл ретте, рецептінің келесі бетінде босатылған дәрілік заттың саудалық атауын көрсету, қолын және босату күнін қою қажет.

      35. Оны рәсімдеу талаптарына сәйкес келмейтін және (немесе) құрамында дәрілік препаратты жеке дайындау үшін сыйымсыз компоненттері бар рецепт жарамсыз болып саналады және дәріханада, дәріхана пунктінде қалдырылады.

      Бұл ретте бөлшек саудада өткізу объектісінің маманы құрамында сыйымсыз компоненттері бар, жеке дайындалған дәрілік препаратты қоспағанда, науқасқа жазып берілген дәрілік затты босатады.

      36. Жарамсыз рецептілер "Рецепт жарамсыз" деген мөрмен жабылады, нөмірленген, тігілген және басшының қолымен және дәріхананың, дәріхана пунктінің мөрімен бекітілген, осы Қағидаларға қосымшаға сәйкес нысан бойынша дұрыс жазылмаған рецептілерді есепке алу журналында тіркеледі.

      37. Дұрыс жазылмаған рецептілер туралы ақпарат тиісті медициналық ұйымның басшысына және (немесе) денсаулық сақтауды мемлекеттік басқарудың тиісті жергілікті органдарына мәлімет үшін беріледі.

      38. Дәріханада, дәріхана пункттерінде рецептілерді сақтау мерзімдері:

      1) тегін босатылатын дәрілік заттарға 3 жылды;

      2) құрамында:

      туынды 8-оксихинолин, гормондық стероидтер, анаболиялық стероидтер бар дәрілік заттарға 3 айды;

      улы заттар, клонидин, кодеин, тропикамид, циклопентолат, прегабалин, зопиклон, дифенгидрамин, прометазин бар 3 жылды құрайды.

      39. Сақтау мерзімдері өткеннен кейін рецептілер жойылуға тиіс.

      40. Рецептілерді жою үшін құрамына дәріхананың, дәріхана пунктінің басшысы мен материалдық жауапты тұлғалары кіретін комиссия құрылады.

      Комиссия жою туралы акт құрастырады, онда кезеңі және жойылған рецептілердің саны көрсетіледі.

      41. Бөлшек саудада өткізу объектілері олардың құрамы Қазақстан Республикасы Денсаулық сақтау және әлеуметтік даму министрінің 2015 жылғы 22 мамырдағы № 380 бұйрығымен бекітілген (Нормативтік құқықтық актілерді мемлекеттік тіркеу тізілімінде № 11421 болып тіркелген), алғашқы медициналық көмек көрсетуге арналған қобдишамен жабдықталады.

      42. Дәріханалары жоқ, аудан орталықтарынан шалғайдағы елді мекендерде дәрілік заттарды, медициналық мақсаттағы бұйымдарды өткізу Кодекстің 69-бабына сәйкес жүзеге асырылады.

Дұрыс жазылып берілмеген рецептілерді тіркеу журналы
Журнал учета неправильно выписанных рецептов