Локомотивтік тартым қызметтерін көрсету ережесін бекіту туралы

Көлік және коммуникациялар министрінің 2004 жылғы 23 шілдедегі N 286-І бұйрығы. Қазақстан Республикасы Әділет министрлігінде 2004 жылғы 27 шілдеде тіркелді. Тіркеу N 2972

Қолданыстағы

      "Темір жол көлігі туралы" Қазақстан Республикасының  Заңының  14-бабы 2-тармағының 8) тармақшасына сәйкес Бұйырамын:
      1. Қоса беріліп отырған Локомотивтік тартым қызметтерін көрсету ережесі бекітілсін.
      2. Қазақстан Республикасы Көлік және коммуникациялар министрлігінің Темір жол көлігі комитеті (Н.Т.Байдәулетов) осы бұйрықты мемлекеттік тіркеу үшін Қазақстан Республикасының Әділет министрлігіне ұсынуды қамтамасыз етсін.
      3. Осы бұйрықтың орындалуын бақылауды өзіме қалдырамын.
      4. Осы бұйрық Қазақстан Республикасы Әділет министрлігінде мемлекеттік тіркелген күннен бастап күшіне енеді.

       Министр

"Локомотивтік тартым қызметтерін 
көрсету ережесін бекіту туралы" 
Қазақстан Республикасы Көлік  
және коммуникациялар министрінің
2004 жылғы 23 шілдедегі N 286-І 
бұйрығымен бекітілген     

  Локомотивтік тартым қызметтерін көрсету ережесі

1. Жалпы ережелер

      1. Осы Локомотивтік тартым қызметтерін көрсету ережесі (бұдан әрі - Ереже) "Темір жол көлігі туралы" Қазақстан Республикасының  Заңы  мен темір жол көлігі саласындағы басқа нормативтік құқықтық актілерге сәйкес әзірленген және локомотивтік тартым қызметтерін көрсетуді ұйымдастыру тәртіптерін анықтайды.
      Ереже локомотивтік тартым операторы (бұдан әрі - оператор), тасымалдаушылар және тасымалдау процесінің басқа қатысушылары арасындағы қатынастарды реттейді, сондай-ақ темір жол көлігімен жолаушылардың, багаждың, жүк багажының, пошталық жөнелтілімдер мен жүк тасымалдарын ұйымдастыру және маневрлік пен шаруашылық жұмыстарын жүзеге асыру кезінде локомотивтік тартым қызметтерін көрсету тәртібін анықтайды.

      2. Осы Ережеде пайдаланылатын негізгі ұғымдар:
      1) локомотивті күтіп ұстау - локомотивтің ақаусыз жағдайын қамтамасыз ететін нормативтік-технологиялық жұмыстар кешенін орындау;
      2) локомотивтік тартым қызметтерін көрсету шарты - тасымалдарды жүзеге асырған кезде оператордың, тасымалдаушылардың және локомотивтік тартым қызметтерін басқа пайдаланушылардың өзара іс-әрекетінің, сондай-ақ локомотивтік тартымды пайдаланып шаруашылық және маневрлік жұмыстардың тәртібін анықтайтын шарт;
      3) станциялық маневрлік жұмыстар - станция жұмысының технологиялық процестеріне сәйкес станциялық жолдарда вагондарды локомотивтермен жылжыту жөніндегі жұмыстар, ол магистральдық темір жол желісі операторымен белгіленеді;
      4) жүк операцияларын орындаған кездегі маневрлік жұмыстар - локомотивтің кірме жолдардағы маневрлік жұмыстары.
      "Магистральдық темір жол желісі", "магистральдық темір жол желісінің операторы", "локомотивтік тартым операторы", "локомотивтік тартым қызметтері", "жылжымалы құрам", "тасымалдық процесс", "Ұлттық темір жол компаниясы", "тасымалдау процесінің қатысушылары" ұғымдары "Темір жол көлігі туралы" Қазақстан Республикасының Заңымен белгіленген мәндерде қолданылады.

  2. Локомотивтік тартым қызметтерін көрсетудің тәртібі

      3. Тасымалдаушыларға және тасымалдау процесінің басқа қатысушыларына локомотивтік тартым қызметтерін көрсету үшін локомотивтік тартым қызметтерін көрсету шарты (бұдан әрі - Шарт) негіз болып табылады, онда осы Ережеге және басқа нормативтік құқықтық актілерге сәйкес негізгі шарттар, құқықтар, міндеттер және тараптардың жауапкершілігі белгіленеді.
      Шарт жасаспастан локомотивтік тартым қызметтерін көрсетуге жол берілмейді.

      4. Тасымалдаушылар және тасымалдау процесінің басқа қатысушылары локомотивтік тартым қызметтерін алу үшін локомотивтік тартым қызметтерін пайдалану құқығын растайтын қажетті құжаттарды қоса отырып, операторға өтініш жолдайды:
      1) көшірмелері:
      жылжымалы құрамды мемлекеттік тіркеу туралы куәліктің;
      жылжымалы құрамға меншік құқығын немесе пайдалану құқығын растайтын құжаттың;
      жылжымалы құрамға техникалық қызмет көрсету және жөндеу базасының бар болуы немесе мұндай базаның болмағанда жөндеу жұмыстарын жүргізуге шарттың (шарттардың) бары туралы құжаттың;
      жүктерді, жолаушыларды, қауіпті жүктерді тасымалдауға уәкілетті органның берген лицензияларының;
      2) жүктерді тасымалдаған кезде - тасымалданатын жүктің салмағы мен атауы көрсетілген құжаттар;
      3) жолаушыларды тасымалдаған кезде - жолаушылар поезының жүріс маршрутының үлгісі көрсетілген құжаттар;
      4) егер заңды тұлғаның өкілі ретінде бірінші басшы немесе оның міндетін атқаратын тұлға қатыспаса, сондай-ақ осы шартқа қол қояр кезде жеке кәсіпкердің мүддесін сенім білдірілген тұлға қорғаған жағдайда Шартқа қол қою құқығына сенімхат ұсынады.

      5. Локомотивтiк тартым қызметтерiн көрсету туралы оператордың шешiмi осы Ережеге сәйкес өтiнiштi және барлық қажеттi құжаттарды тiркеген күннен бастап 15 күнтiзбелiк күннен ұсынылған:
      1) жолды жөндеудiң күрделi және басқа түрлерiн жүргiзген кезде магистральдық темiр жол желiстiң операторымен қызмет көрсету басталарға дейiн 2 тәулiктен;
      2) магистральдық темiр жол желiсi оператордың шаруашылық жұмыстарының басқа түрлерi бойынша 12 сағаттан кешiктiрiлмей қабылданады.
      Бұл ретте тасымалдаушыларға және тасымалдау процесiнiң басқа қатысушыларына локомотивтiк тартым қызметтерiн көрсету туралы жазбаша хабарлама мен қол қою үшiн Шарттың жобасы жiберiледi.

      6. Осы Ереженiң 5-тармағында көрсетiлген құжаттардың толық емес пакетi ұсынылған жағдайда оператор тасымалдаушылардың және тасымалдау процесiнiң басқа қатысушыларының өтiнiштерiн қабылдаудан бас тартады, ол жөнiнде құжаттардың келiп түскен күнiнен кейiнгi келесi жұмыс күнiнен кешiктiрмей өтiнiштi қарауға қабыл алмағанының себептерiн көрсетiп, тасымалдаушыларды және тасымалдау процесiнiң басқа қатысушыларын хабардар етедi.

      7. Локомотивтiк тартым қызметтерi барлық тасымалдаушыларға және тасымалдау процесiнiң барлық қатысушыларына тең негiздер мен шарттарда оператормен берiледi.
      Магистральдық темiр жол желiсiнiң нақты учаскелерiнде локомотивтiк бригаданың локомотивке қызмет көрсетуге рұқсаты болмаған, станциялық маневрлiк жұмыстарды, жүк операцияларын орындағанда маневрлiк жұмыстарды жүзеге асыруға техникалық және технологиялық мүмкiн еместiк жағдайларда, оператор локомотивтiк тартым қызметтерiн көрсетуден бас тартады.

      8. Тасымалдаушылардың және тасымалдау процесiнiң басқа қатысушыларының берiлген өтiнiшiнде қаралған локомотивтiк тартымның ұсынылған қызметтерiнен бас тартқан жағдайында, тасымалдаушылар мен тасымалдау процесiнiң басқа қатысушылары бұл жөнiнде операторды локомотивтiк тартымды пайдаланып тасымалдарды, шаруашылық пен маневрлiк жұмыстарды жүзеге асыруды бастау датасына дейiн 10 күнтiзбелiк күннен кешiктiрмей жазбаша түрде (егер тараптардың келiсiмiнде басқа түрi қаралмаған болса) хабардар етедi.

  3. Локомотивтiк тартым қызметтерiн көрсеткен (пайдаланған) кезде темiр жолдарда қозғалыс қауiпсiздiгiн қамтамасыз ету

      9. Оператор өз қызметiнiң процесiнде поездардың магистральдық, станциялық және кiрме жолдар бойынша қауiпсiз және үздiксiз қозғалысының нормативтерiн және шарттарын орындалуын қамтамасыз етедi.

      10. Магистральдық, станциялық пен кiрме жолдар бойынша қозғалыс қауiпсiздiгiн қамтамасыз ету мақсатында оператор:
      1) локомотивтiк бригадалардың қызметiне, локомотивтiң техникалық жағдайына, жабдықтау жұмыстарының сапасын қамтамасыз ету мен локомотивтi тиiстi күтiп ұстауға және магистральдық, станциялық пен кiрме жолдар бойынша қозғалыс қауiпсiздiгiнiң талаптарына сәйкес барлық мүлiктiк кешенге бақылауды жүзеге асырады;
      2) темiр жол көлiгi саласындағы нормативтiк құқықтық актiлерге сәйкес магистральдық, станциялық пен кiрме жолдар бойынша қозғалыс қауiпсiздiгiнiң мiндеттi талаптары мен нормалары, еңбектi қорғау және қауiпсiздiк техникасы жөнiнде өз қызметкерлерiне нұсқау бередi;
      3) магистральдық, станциялық пен кiрме жолдар бойынша қозғалыс қауiпсiздiгiн қамтамасыз ету мәселелерiнде магистральдық темiр жол желiсiнiң операторымен, тасымалдаушылармен, тасымалдау процесiнiң басқа қатысушыларымен үйлестiрiлген өзара iс-әрекеттердi жүзеге асырады;
      4) поездық, маневрлiк және шаруашылық жұмыстарды орындау процесiнде локомотивтiк бригадаларды қызмет көрсететiн учаскелерi үшiн жауап беретiн диспетчердiң (поездық, маневрлiк), станция, дөңес бойынша кезекшiлердiң және темiр жол көлiгі саласындағы нормативтiк құқықтық актiлерге сәйкес жұмыстар басшысының бұйрықтардың орындалуын бақылайды;
      5) апаттық жағдайлар мен оның зардаптарын жою үшін қажеттi қаржылар мен жұмылдыру бөлiмшелерiнiң бар болуын қамтамасыз етедi, магистральдық темiр жол желiсi операторымен, тасымалдаушылармен және тасымалдау процесiнiң басқа қатысушыларымен келiсу арқылы оларды пайдаланады;      
      6) оларды пайдалану процесiнде магистральдық темiр жол желiсi объектiлерiн пайдалану мен қорғау жөнiндегi талаптарды ұстанады, өртке қарсы сақтандыру жұмыстарын жүргізудi және темiр жол көлiгімен тасымалдау процесiнде туындаған өрттердi жоюды қамтамасыз етедi;
      7) оқуды, бiлiктiлiгiн арттыруды ұйымдастырады, тасымалдау процесiне қатысушы қызметкерлердi кәсiби сыйысымдылық пен жарамдылық бойынша сынақтардан өткiзедi.