"Қазақстан Республикасының мемлекеттік қызметі туралы" 2015 жылғы 23 қарашадағы Қазақстан Республикасы Заңының 63-бабы 1-тармағына сәйкес ҚАУЛЫ ЕТЕМІН:
1. Қоса беріліп отырған "Б" корпусының мемлекеттік әкімшілік қызметшілерін аттестаттауды өткізу қағидалары бекітілсін.
2. "Б" корпусының мемлекеттік әкімшілік қызметшілерін аттестаттау 2017 жылғы 1 шілдеге дейін өткізілсін.
3. Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігі орталық мемлекеттік және жергілікті атқарушы органдармен бірлесіп:
1) "Б" корпусының мемлекеттік әкімшілік қызметшілерін аттестаттауды;
2) "Б" корпусының мемлекеттік әкімшілік қызметшілерін аттестаттауды өткізу тәртібі мәселелері бойынша түсіндіру жұмысын жүргізуді қамтамасыз етсін.
4. Осы Жарлықтың орындалуын бақылау Қазақстан Республикасы Президентінің Әкімшілігіне жүктелсін.
5. Осы Жарлық алғашқы ресми жарияланған күнінен бастап қолданысқа енгізіледі.
Қазақстан Республикасының | |
Президенті | Н.Назарбаев |
| Қазақстан Республикасы Президентінің 2016 жылғы 30 желтоқсандағы № 404 Жарлығымен БЕКІТІЛГЕН |
"Б" корпусының мемлекеттік әкімшілік қызметшілерін
аттестаттауды өткізу
ҚАҒИДАЛАРЫ
1. Жалпы ережелер
1. "Б" корпусының мемлекеттік әкімшілік қызметшілерін аттестаттауды өткізудің осы қағидалары (бұдан әрі – Қағидалар) "Қазақстан Республикасының мемлекеттік қызметі туралы" 2015 жылғы 23 қарашадағы Қазақстан Республикасының Заңы (бұдан әрі – Заң) 63-бабының 1-тармағына сәйкес әзірленді және "Б" корпусының мемлекеттік әкімшілік қызметшілерін (бұдан әрі – "Б" корпусының қызметшілері) аттестаттауды өткізу тәртібін айқындайды.
2. Аттестаттаудың мақсаты "Б" корпусы қызметшілерінің кәсіби дайындық деңгейін және атқаратын лауазымдарына сәйкестігін айқындау болып табылады.
3. Аттестаттаудан "Б" корпусының қызметшілері өтеді, оған төмендегілер қосылмайды:
1) аттестаттаудан өткізу кезінде "Қазақстан Республикасында зейнетақымен қамсыздандыру туралы" Қазақстан Республикасының Заңында белгіленген зейнеткерлік жасқа толуына екі жыл және одан аз уақыт қалған "Б" корпусының қызметшілері.
Осы тармақшаның бірінші бөлігінде көрсетілген мерзім 2017 жылдың 5 қаңтарынан 30 маусымын қоса алғандағы аралықта басталса, бұл "Б" корпусының қызметшілерін аттестаттаудан өтуден босатуға негіз болып табылады;
2) жүктілік пен босануға, сондай-ақ бала күтіміне байланысты демалыстағы "Б" корпусының қызметшілері;
3) жүктілігі туралы медициналық қорытынды ұсынған жүкті әйелдер, үш жасқа дейінгі балалары бар әйелдер, он төрт жасқа дейінгі баланы (он сегіз жасқа дейінгі мүгедек баланы) тәрбиелеп отырған жалғызбасты аналар, көрсетілген санаттағы балаларды анасыз тәрбиелеп отырған басқа да адамдар;
4) тиісті аттестаттау комиссиясында әңгімелесуден өту сәтінде мемлекеттік қызмет өтілі алты айдан аз, мемлекеттік әкімшілік лауазымға алғаш рет тағайындалған адамдар;
5) "А" корпусы мемлекеттік әкімшілік қызметінің кадр резервінде тұрған "Б" корпусының қызметшілері.
4. Аттестаттау кезеңдерін өткізу мерзімдері көзделетін "Б" корпусы қызметшілерін аттестаттаудың жалпы кестесін (бұдан әрі – жалпы кесте) мемлекеттік қызмет істері жөніндегі уәкілетті орган (бұдан әрі – уәкілетті орган) бекітеді және оның интернет-ресурсында орналастырылады.
Мемлекеттік органдар және жергілікті атқарушы органдар жалпы кестенің негізінде "Б" корпусы қызметшілерін аттестаттауды өткізу кестесін дербес бекітеді.
5. Аттестаттаудан өтуге жататын "Б" корпусының қызметшілеріне жыл сайынғы еңбек демалысын беру, оларды қызметтік іссапарға, тағылымдамаға, сондай-ақ қайта даярлау және біліктiлікті арттыру курстарына жіберу аттестаттауды өткізу кестелерін ескере отырып, жүзеге асырылады.
Қазақстан Республикасы Президенті Әкімшілігінің, Қазақстан Республикасы Премьер-Министрі Кеңсесінің және Қазақстан Республикасы Парламенті палаталары аппараттарының "Б" корпусы қызметшілерін қоспағанда, аттестаттаудан өтуге жататын "Б" корпусы қызметшілерінің конкурстарға қатысуына, сондай-ақ оларды мемлекеттік әкімшілік лауазымға ауысу тәртібімен тағайындауға тиісті аттестаттау комиссиясының қабылданған шешімі болған жағдайда ғана жол беріледі.
Бұл талап уақытша бос лауазымдарды атқаратын адамдарға қолданылмайды.
6. Аттестаттау кезеңінде оқу демалысында, еңбекақысы сақталмайтын демалыста, ұзақ іссапарда болған немесе науқастануы салдарынан жұмыста болмаған, сондай-ақ халықаралық және өзге ұйымдарға іссапарға жіберілген "Б" корпусының қызметшілері аттестаттаудан жұмысқа шыққаннан кейін алты айдың ішінде 2017 жылдың соңына дейін өтеді.
Қазақстан Республикасының шет елдердегі мекемелеріне жұмысқа жіберілген дипломатиялық қызмет персоналы 2017 жылдың соңына дейін аттестаттаудан өтуге тиіс.
Мемлекеттік органдарға іссапарға жіберілген адамдар аттестаттауды осы Қағидалардың ережелеріне сәйкес өтеді.
7. "Б" корпусының қызметшілері атқаратын лауазымдарының санаттарына байланысты аттестаттауды тиісті деңгейдегі аттестаттау комиссияларында өтеді:
бірінші деңгейде – Қазақстан Республикасының Президенті жанындағы Жоғары аттестаттау комиссиясы (бұдан әрі – ЖАК);
екінші деңгейде – орталық мемлекеттік органдардың, олардың ведомстволарының, орталық мемлекеттік органдардың және олардың ведомстволарының облыстардағы, республикалық маңызы бар қаладағы, астанадағы аумақтық бөлімшелерінің, сондай-ақ облыстардың, республикалық маңызы бар қаланың, астананың әкімі аппараттарының аттестаттау комиссиялары;
үшінші деңгейде – орталық мемлекеттік органдардың және олардың ведомстволарының аудандардағы, қаланың аудандарындағы және облыстық маңызы бар қалалардағы аумақтық бөлімшелерінің, сондай-ақ аудандардың, қала аудандарының және облыстық маңызы бар қалаларының әкімі аппараттарының аттестаттау комиссиялары.
8. ЖАК құрамына Қазақстан Республикасының Президенті Әкімшілігі Басшысының орынбасары, Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы, Қазақстан Республикасының Премьер-Министрі Кеңсесінің Басшысы, Қазақстан Республикасы Парламентінің Сенаты мен Мәжілісін тең негізде білдіретін Қазақстан Республикасы Парламентінің депутаттары, Қазақстан Республикасы Президенті Әкімшілігі құрылымдық бөлімшелерінің басшылары, академиялық ортаның және қоғамдық бірлестіктердің өкілдері кіреді.
"Б" корпусының қызметшісімен әңгімелесу барысында ол жұмыс істейтін мемлекеттік органның бірінші басшысының орынбасарынан төмен емес лауазымды атқаратын адам ЖАК құрамына енгізіледі.
ЖАК құрамы уәкілетті органның ұсынымы бойынша Қазақстан Республикасы Президентінің Әкімшілігі Басшысының актісімен бекітіледі.
9. Екінші және үшінші деңгейдегі аттестаттау комиссияларының құрамына "А" корпусының мемлекеттік әкімшілік қызметшілері, оның ішінде жоғары тұрған мемлекеттік органдардан, алдыңғы деңгейде аттестаудан сәтті өткен "Б" корпусының қызметшілері, оның ішінде құрылымдық бөлімшелердің басшылары, әдеп жөніндегі уәкілдер, қоғамдық кеңестердің, ғылыми-сарапшылық, академиялық ортаның, қоғамдық бірлестіктердің өкілдері, сондай-ақ уәкілетті органның әдеп кеңестерінің мүшелері кіре алады.
10. Орталық мемлекеттік органдарда және олардың ведомстволарында құрылатын аттестаттау комиссиялары құрамына Парламент Сенатының және Мәжілісінің депутаттарын тартуға жол беріледі.
Орталық мемлекеттік органдардың және олардың ведомстволарының облыстардағы, республикалық маңызы бар қаладағы, астанадағы, аудандардағы, қаланың аудандарындағы және облыстық маңызы бар қалалардағы аумақтық бөлімшелерінде, сондай-ақ облыстардың, республикалық маңызы бар қаланың, астананың, аудандардың, қала аудандарының және облыстық маңызы бар қалалардың әкімі аппараттарында құрылатын аттестаттау комиссияларының құрамына тиісті мәслихаттардың депутаттарын тартуға жол беріледі.
11. Құқық қорғау және арнаулы мемлекеттік органдарда, сондай-ақ Қарулы Күштердің мемлекеттік мекемелерінде құрылатын аттестаттау комиссияларының құрамына тиісінше құқық қорғау, арнаулы мемлекеттік органдардың қызметкерлерін, сондай-ақ әскерилерді қосуға жол беріледі.
12. ЖАК-тың жұмыс органы уәкілетті орган болып табылады, ал екінші және үшінші деңгейлердегі аттестаттау комиссияларының жұмыс органы – персоналды басқару қызметтері (кадр қызметтері) болып табылады.
13. ЖАК-тың хатшысы "А" корпусының мемлекеттік әкімшілік лауазымын атқаратын уәкілетті органның лауазымды адамы болып табылады.
Екінші және үшінші деңгейлердегі аттестаттау комиссияларының хатшысы мемлекеттік органның персоналды басқару қызметінің (кадр қызметінің) өкілі болып табылады.
14. Персоналды басқару қызметінің (кадр қызметінің) өкілі болмаған жағдайда немесе оның аттестаттаудан өтуі кезінде аттестаттау комиссиясы төрағасының шешімімен аттестаттау комиссиясының хатшысы болып басқа адам белгіленеді.
15. Аттестаттау комиссиясының жұмысын ұйымдастыруды оның хатшысы қамтамасыз етеді және дауыс беруге қатысуға құқығы жоқ.
16. Екінші және үшінші деңгейлердегі аттестаттау комиссияларының құрамы осы Қағидалардың 32 және 38-тармақтарында белгіленген тиісті аттестаттау комиссиялары төрағаларының актілерімен бекітіледі.
17. Аттестаттау комиссиясы төрағасының актілерді шығару бойынша өкілеттіктері болмаған жағдайда, аттестаттау комиссиясының құрамын актілерге қол қоюға уәкілетті жоғары тұрған лауазымды адам бекітеді.
18. Аттестаттау комиссиялары кемінде бес мүшеден, оның ішінде төрағадан тұрады. Аттестаттау комиссиясының қатыспаған мүшелерін алмастыруға жол берілмейді.
19. Аттестаттау комиссиясының төрағасы дәлелді себептермен отырысқа қатыспаған жағдайда, оның міндеттері аттестаттау комиссиясы мүшелерінің біріне уақытша жүктеледі.
20. Аттестаттау комиссиясы отырысының, егер оған комиссия құрамының үштен екісі қатысқан жағдайда, құқықтық күші бар деп саналады.
21. Аттестаттау комиссиясының шешімі отырысқа қатысқан аттестаттау комиссиясы мүшелерінің жалпы санының көпшілік дауысымен, аттестатталатын "Б" корпусы қызметшісінің қатысуынсыз қабылданады. Дауыстар тең болған жағдайда, аттестаттау комиссиясы төрағасының дауысы шешушi болып табылады.
22. Қабылданған шешім аттестаттау комиссиясының отырысынан кейін үш жұмыс күні ішінде хаттама түрінде ресімделеді, оған аттестаттау комиссиясының төрағасы және хатшысы қол қояды.
23. "Б" корпусының қызметшісі тиісті аттестаттау комиссиясының хаттамасына қол қойылған күнінен бастап үш жұмыс күні ішінде оған қол қойып танысады.
24. Аттестаттау комиссиясының шешімі шыққаннан кейін "Б" корпусы қызметшісінің сұратуы бойынша бағалау парағының, жеке құзыреттерді бағалайтын тест нәтижелері туралы қорытындының көшірмелері, аттестаттау комиссиясы отырысының хаттамасынан үзінді ол сұрату жасаған күннен бастап екі жұмыс күні ішінде беріледі.
2. Аттестаттауды өткізудің кезеңдері
25. Аттестаттау мынадай кезеңдерді қамтиды:
1) бағалау парағын дайындау;
2) жеке құзыреттерді бағалайтын тест өткізу. Жеке құзыреттерді бағалайтын тестке қатыспаған "Б" корпусының қызметшісі келесі кезеңге жіберілмейді;
3) ЖАК немесе тиісті деңгейдегі аттестаттау комиссияларында әңгімелесуден өту. Әңгімелесу барысы дыбыс-немесе бейнежазба құралдарын қолдану арқылы тіркеледі.
Екінші және үшінші деңгейлерде "Б" корпусының қызметшілерімен әңгімелесуді бейнеконференцбайланысы арқылы өткізуге жол беріледі;
4) әңгімелесудің қорытындысы бойынша және алдыңғы кезеңдердің нәтижелері ескере отырып, аттестаттау комиссиясының шешімдер қабылдауы.
26. Аттестаттау комиссиясы мына шешімдердің бірін қабылдайды:
1) атқаратын мемлекеттік лауазымына сай келеді және лауазымын жоғарылатуға ұсынылады;
2) атқаратын мемлекеттік лауазымына сай келеді;
3) атқаратын мемлекеттік лауазымына сай емес және мемлекеттік лауазымын төмендетуге ұсынылады;
4) атқаратын мемлекеттік лауазымына сай емес және қызметтен шығаруға ұсынылады.
27. Бағалау парағының нысанын, жеке құзыреттерді бағалайтын тест бағдарламалары мен оны ұйымдастыру тәртібін, сондай-ақ әңгімелесуді өткізу нұсқаулығын уәкілетті орган айқындайды.
28. Бірінші деңгейде аттестаттауды ЖАК-та А-1, А-2, А-3, А-4, В-1, С-1, С-О-1, D-1, D-2, D-О-1 санатындағы "Б" корпусының қызметшілері өтеді.
29. Екінші деңгейде аттестаттау комиссиялары:
В-2, В-3, В-4, В-5, С-2, С-3, С-4, С-5, С-О-2 санаттарындағы "Б" корпусының қызметшілері аттестаттаудан өтетін орталық мемлекеттік органдарда;
С-3, С-4, С-5, С-О-2 санаттарындағы "Б" корпусының қызметшілері аттестаттаудан өтетін орталық мемлекеттік органдардың ведомстволарында;
С-О-3, С-О-4, С-О-5, С-О-6, C-R-1, C-R-2 санаттарындағы "Б" корпусының қызметшілері аттестаттаудан өтетін орталық мемлекеттік органдардың және олардың ведомстволарының облыстардағы, республикалық маңызы бар қаладағы, астанадағы аумақтық бөлімшелерінде;
D-3, D-4, D-5, D-О-2, D-О-3, D-О-4, D-О-5, D-О-6, Е-1, Е-2, Е-R-1 санаттарындағы "Б" корпусының қызметшілері аттестаттаудан өтетін облыстардың, республикалық маңызы бар қаланың, астананың әкімдері аппараттарында құрылады.
30. Облыстардың, республикалық маңызы бар қаланың, астананың әкімдері, мәслихаттары, тексеру комиссиялары аппараттарының, сондай-ақ атқарушы органдардың "Б" корпусы қызметшілерін аттестаттауды өткізу үшін бірыңғай облыстық/қалалық аттестаттау комиссиялары құрылады.
31. ЖАК-тың төрағасы Қазақстан Республикасының Президенті Әкімшілігі Басшысының орынбасары болып табылады.
32. Екінші деңгейдегі аттестаттау комиссияларының төрағалары болып мынадай лауазымды адамдар айқындалады:
1) орталық мемлекеттік органның аттестаттау комиссиясына – жауапты хатшы немесе аппарат басшысы, жауапты хатшы немесе аппарат басшысы лауазымы енгізілмеген мемлекеттік органдарда – мемлекеттік орган басшысы айқындайтын өзге адам;
2) орталық мемлекеттік орган ведомствосының аттестаттау комиссиясына – ведомство басшысы;
3) орталық мемлекеттік органның облыстардағы, республикалық маңызы бар қаласындағы, астанадағы аумақтық бөлімшесінің аттестаттау комиссиясына – аумақтық бөлімшенің басшысы;
4) ведомствоның облыстардағы, республикалық маңызы бар қаласындағы, астанадағы аумақтық бөлімшесінің аттестаттау комиссиясына – ведомствоның аумақтық бөлімшесінің басшысы;
5) облыстардың, республикалық маңызы бар қаланың, астананың әкімдері, мәслихаттары, тексеру комиссиялары аппараттарының, сондай-ақ атқарушы органдардың бірыңғай облыстық/қалалық аттестаттау комиссиясына – облыстардың, республикалық маңызы бар қаланың, астананың әкімдері аппаратының басшысы.
33. Ведомство басшысы, орталық мемлекеттік органның облыстардағы, республикалық маңызы бар қаладағы, астанадағы аумақтық бөлімшесінің басшысы болмаған немесе аттестаттаудың қорытындылары бойынша ол атқаратын лауазымына сай емес деп танылған жағдайда, осы мемлекеттік органның аттестаттау комиссиясының төрағасы болып жауапты хатшы немесе жоғары тұрған органның аппарат басшысы немесе олардың шешімімен ЖАК-та аттестаттаудан сәтті өткен өзге лауазымды адам белгіленеді.
34. Орталық мемлекеттік органның ведомствосының облыстағы, республикалық маңызы бар қаладағы, астанадағы аумақтық бөлімшесінің басшысы болмаған немесе аттестаттаудың қорытындылары бойынша ол атқаратын лауазымына сай емес деп танылған жағдайда, осы мемлекеттік органның аттестаттау комиссиясының төрағасы болып ведомство басшысы немесе оның шешімімен ЖАК-та аттестаттаудан сәтті өткен өзге лауазымды адам белгіленеді.
35. Облыстың, республикалық маңызы бар қаланың, астананың әкімі аппаратының басшысы болмаған жағдайда, бірыңғай аттестаттау комиссиясының төрағасы болып ЖАК-та аттестаттаудан сәтті өткен облыстың, республикалық маңызы бар қаланың, астананың әкімі аппараты басшысы орынбасарларының бірі белгіленеді.
36. Үшінші деңгейдегі аттестаттау комиссиялары:
C-R-3, C-R-4, C-R-5 санаттарындағы "Б" корпусының қызметшілері аттестаттаудан өтетін орталық мемлекеттік органдардың және олардың ведомстволарының аудандардағы, қаланың аудандарындағы және облыстық маңызы бар қалалардағы аумақтық бөлімшелерінде құрылады.
Осы тармақтың бірінші бөлігінде аталған "Б" корпусының қызметшілеріне орталық мемлекеттік органдардың және оның ведомстволарының облыстардағы, республикалық маңызы бар қаладағы, астанадағы аумақтық бөлімшелерінде құрылатын аттестаттау комиссияларында аттестаттаудан өтуіне рұқсат етіледі;
E-3, E-4, E-5, E-R-2, E-R-3, E-R-4, E-R-5, E-G-1, E-G-2, E-G-3, E-G-4 санаттарындағы "Б" корпусының қызметшілері аттестаттаудан өтетін аудандардағы, қаланың аудандарындағы және облыстық маңызы бар қалалардағы әкімдер аппараттарында құрылады.
37. Аудандар, қаладағы аудандар және облыстық маңызы бар қалалар әкімдері аппараттарының, сондай-ақ атқарушы органдарының, аудан (облыстық маңызы бар қала) мәслихаттарының "Б" корпусы қызметшілерін аттестаттаудан өткізу үшін бірыңғай аудандық/қалалық аттестаттау комиссиялары құрылады.
38. Үшінші деңгейдегі аттестаттау комиссияларының төрағалары болып мынадай лауазымды адамдар белгіленеді:
1) орталық мемлекеттік органның аудандардағы, қаланың аудандарындағы және облыстық маңызы бар қалалардағы аумақтық бөлімшесінің аттестаттау комиссиясына – аумақтық бөлімшенің басшысы;
2) ведомствоның аудандардағы, қаланың аудандарындағы және облыстық маңызы бар қалалардағы аумақтық бөлімшесінің аттестаттау комиссиясына – ведомствоның аумақтық бөлімшесінің басшысы;
3) аудан, қаладағы аудан және облыстық маңызы бар қала әкімі аппаратының, сондай-ақ аудан (облыстық маңызы бар қала) мәслихатының бірыңғай аудандық/қалалық аттестаттау комиссиясына – облыстық маңызы бар қаланың (облыстың әкімшілік орталығы болып табылатын қаланың әкімін қоспағанда), облыстағы ауданның және қаладағы ауданның әкімі;
4) облыстың әкімшілік орталығы болып табылатын қаланың бірыңғай қалалық аттестаттау комиссиясына – қала әкімі белгілейтін, аттестаттаудан сәтті өткен қала әкімі орынбасарының бірі.
39. Орталық мемлекеттік органның және оның ведомствосының аудандардағы, қаланың аудандарындағы және облыстық маңызы бар қалалардағы аумақтық бөлімшесінің басшысы болмаған не ол екінші деңгейдегі аттестаттаудан өтпеген жағдайда, аттестаттау комиссиясының төрағасы болып жоғары тұрған органның басшысы немесе оның шешімімен – аттестаттаудан сәтті өткен өзге лауазымды адам белгіленеді.
40. Облыстық маңызы бар қаланың, облыстағы ауданның және қаладағы ауданның әкімі болмаған жағдайда, аттестаттау комиссиясының төрағасы болып аттестаттаудан сәтті өткен аудан, қаладағы ауданның және облыстық маңызы бар қала әкімі орынбасарының бірі белгіленеді.
3. Аттестаттау комиссиясының шешіміне шағымдану
41. Аттестаттау комиссиясының шешіміне Заңның 63-бабы 8-тармағында көзделген тәртіпте шағым жасауға болады.
4. Қорытынды ережелер
42. Персоналды басқару қызметі (кадр қызметі) тиісті аттестаттау комиссиясының шешімін "Б" корпусы қызметшісінің қызметтік тізіміне енгізеді.