Қазақстан Республикасының 2003 жылғы 20 маусымдағы
Жер кодексiне
сәйкес Қазақстан Республикасының Үкiметi
ҚАУЛЫ ЕТЕДI:
1. Қоса берiлiп отырған Жер учаскелерiн меншiкке өтеусiз беру үшiн халықаралық қатысуы бар ғылыми орталықтарды айқындау ережесi бекiтiлсiн.
2. Осы қаулы алғаш рет ресми жарияланғаннан кейiн он күнтiзбелiк күн өткен соң қолданысқа енгiзiледi.
Қазақстан Республикасының
Премьер-Министрі
Қазақстан Республикасы
Үкiметiнiң
2006 жылғы 2 қарашадағы
N 1042 қаулысымен
бекiтiлген
Жер учаскелерiн меншiкке өтеусiз беру үшін халықаралық қатысуы бар ғылыми орталықтарды айқындау ережесi
Жалпы ережелер
1. Жер учаскелерiн меншiкке өтеусiз беру үшiн халықаралық қатысуы бар ғылыми орталықтарды айқындау ережесi (бұдан әрi - Ереже) Қазақстан Республикасының 2003 жылғы 20 маусымдағы Жер кодексiне сәйкес әзiрлендi және жер учаскелерi меншiкке өтеусiз негiзде берiлетiн халықаралық қатысуы бар ғылыми орталықтарды (бұдан әрi - орталықтар) айқындау тәртiбiн белгiлейдi.
2. Жер учаскелерi халықаралық қатысуы бар ғылыми орталықтарға меншiкке:
әлемдiк нарықтағы экономика мен өндiрiстiң тиiстi салаларында бәсекеге қабiлеттi өнiмдер шығаруға бағдарланған жаңа технологияларды игеруге қолдау көрсету;
перспективалық кластерлерде экономика мен өндiрiс салаларының қажеттiлiктерiне сәйкес кадрлардың қайта мамандануының икемдi жүйесiн қалыптастыру;
елде халықаралық стандарттарға сәйкес келетiн халықаралық оқу орындарының филиалдарын дамыту мақсатында өтеусiз негiзде берiледi.
3. Жер учаскелерi меншiкке өтеусiз негiзде берiлетiн халықаралық қатысуы бар ғылыми орталықтарды ғылыми және ғылыми-техникалық қызметте басшылық жасауды жүзеге асыратын Қазақстан Республикасының орталық атқарушы органы (бұдан әрi - уәкiлеттi орган) айқындайды.
4. Көрсетiлген орталықтарды объективтi және құзыреттi түрде айқындау мақсатында уәкiлеттi орган жанынан жер учаскелерi өтеусiз негiзде берiлетiн халықаралық қатысуы бар ғылыми орталықтарды айқындау жөнiндегi комиссия (бұдан әрi - Комиссия) құрылады. Комиссияның құрамы мен ол туралы ереже уәкiлеттi орган басшысының бұйрығымен бекiтiледi.
5. Комиссияның құрамына уәкiлеттi мемлекеттiк органның, сондай-ақ мүдделi мемлекеттiк органдардың, заңды тұлғалардың (жарғылық капиталына мемлекет қатысатын мемлекеттiк кәсiпорындар мен ұйымдар) өкiлдерi кiредi.
Ғылыми орталықтарды айқындау тәртiбi
6. Орталықты жер учаскесiн меншiкке өтеусіз негiзде алуға құқығы бар ретiнде айқындау үшiн, оның мынадай өлшемдерге сәйкес келуi талап етiледi:
1) жарғылық капиталы кемiнде 50000 ең төменгi есептiк көрсеткiш акционерлiк қоғамның не жауапкершiлiгi шектеулi серiктестiктiң ұйымдық-құқықтық нысанында құрылған заңды тұлға, акционер (тең құрылтайшы) ретiнде шетелдiк ұйым қатысады, онда қазақстандық тарапта акциялардың бақылау пакетi (үлестiң көбi) сақтала отырып, оның акцияларының пакетi (қатысу үлесi) акционерлiк қоғамның (жауапкершiлiгi шектеулi серiктестiктiң) жарғылық капиталының кемiнде 25%-ын құрауы тиiс;
2) Қазақстан Республикасының Үкiметi жанындағы
жоғарғы ғылыми-техникалық комиссияның
(бұдан әрi - ЖҒТК) шешiмiмен мақұлданған, жер учаскесiн беру мақсаттарына сәйкес келетiн орталықтың даму тұжырымдамасының (бұдан әрi - тұжырымдама) болуы;
3) орталықтың мемлекеттiк ғылыми, ғылыми-техникалық және инновациялық саясаттың басым бағыттары бойынша қызметтi жүзеге асыруы;
4) орталық қызметiнiң Қазақстан Республикасының Yкiметi жанындағы ЖҒТК айқындаған халықаралық ғылыми-техникалық ынтымақтастықтың неғұрлым перспективалық және тиiмдi бағыттарына сәйкестiгi;
5) орталық мамандарының Қазақстан Республикасының iргелi және қолданбалы ғылымы мен техникасының болжамдарын және даму стратегиясын әзiрлеуге қатысуы;
6) орталықтың Қазақстан Республикасының Президентi немесе Үкiметi бекiткен мемлекеттiк және салалық бағдарламаларды iске асыруға қатысуы;
7) орталықтың материалдық, қаржылық және кемiнде 5 ғылым докторы, оның iшiнде тиiстi бағыты бойынша Ph.D (философия докторы) бiлiктi ғылыми кадрларының болуын қоса алғанда, кадрлық ресурстармен қамтамасыз етiлуi.
7. Осы Ереженiң 6-тармағында айқындалған өлшемдерге сәйкес және өздерiне жер учаскесiнiң меншiкке өтеусiз негiзде берiлуiне үмiткер орталықтар уәкiлеттi органға мынадай құжаттарды ұсынады:
1) уәкiлеттi орган бекiтетiн нысан бойынша өтiнiш;
2) орталықтың құрылтайшы құжаттарының және мемлекеттiк тiркеу туралы куәлiгiнiң нотариалды расталған көшiрмелерi;
3) уәкiлеттi органың орталықты аккредиттеу туралы шешiмiнiң көшiрмесi;
4) жарияланымдармен және патенттермен расталған ғылыми әзiрлемелердiң тiзiмi;
5) салық төлеушiнiң Қазақстан Республикасы бойынша салық берешегiнiң, мiндеттi зейнеткерлiк жарнасы мен әлеуметтiк аударымдары бойынша берешегiнiң жоқтығы туралы тиiстi салық органының
белгiленген
нысандағы анықтамасының түпнұсқасы;
6) жер қатынастары жөнiндегi уәкiлеттi орган берген меншiгiнде жер учаскелерiнiң болуы немесе болмағаны туралы анықтама;
7) тұжырымдама және осы Ереженiң 6-тармағында айқындалған өлшемдерге орталық қызметiнiң сәйкестiгi туралы мәлiметтердi қамтитын өзге де құжаттар.
Өтiнiште жер учаскесiнiң пайдаланылу мақсаты, оның болжамды мөлшерi, орналасқан орны көрсетiледi.
Тұжырымдамада құрылатын орталықтың болжанып отырған объектiлерi, көлемi мен оны қаржыландыру көздерi, қызметтердiң түрлерi, шығарылатын өнiмнiң түрлерi мен көлемi көрiнiс табады.
8. Құжаттарды қарау мерзiмi оларды қабылдаған сәттен бастап және уәкiлеттi орган тиiстi шешiм қабылдағанға дейiн отыз күнтiзбелiк күннен аспайды.
9. Ұсынылған құжаттарды қарау Комиссияның отырыстарында жүзеге асырылады. Қараудың қорытындылары бойынша Комиссия:
1) орталықты жер учаскесiн меншiкке өтеусiз негiзде алуға құқығы бар ретiнде айқындауды;
2) орталықты жер учаскесiн меншiкке өтеусiз негiзде алуға құқығы бар ретiнде айқындаудан бас тартуды ұсынады.
10. Комиссияның ұсынымдарына сәйкес уәкiлеттi орган жер учаскелерi меншiкке өтеусiз негiзде берiлетiн орталықтарды айқындау туралы шешiм қабылдайды.
11. Оларға қатысты жер учаскесiн меншiкке өтеусiз негiзде алу құқығын беруден бас тарту туралы шешiм қабылданған орталықтарды уәкiлеттi орган шешiм қабылданған сәттен бастап он жұмыс күнi iшiнде ол туралы жазбаша хабардар етедi.
12. Орталықты жер учаскесiн меншiкке өтеусiз негiзде алуға құқығы бар ретiнде айқындаудан бас тарту үшiн:
1) осы Ереженiң 6-тармағында көрсетiлген өлшемдерге сәйкес келмеуi;
2) ұсынылған құжаттардағы орталықтың қызметi туралы жалған немесе толық емес мәлiметтер;
3) орталықта салық берешегiнiң және мiндеттi зейнеткерлiк жарналары мен әлеуметтiк аударымдар бойынша берешегiнiң болуы негiз болып табылады.
13. Оларға қатысты уәкiлеттi органның оң шешiмi қабылданған орталықтар қабылдаған шешiмнiң көшiрмесi оларға тапсырыла отырып, шешiм қабылданған сәтiнен бастап он жұмыс күнi iшiнде ол туралы жазбаша хабардар етiледi.
14. Жер учаскесiн меншiкке беру туралы шешiмдi Қазақстан Республикасының Жер кодексiнде белгiленген олардың құзыретi шегiнде республикалық маңызы бар қала мен астананың, аудандардың (облыстық маңызы бар қалалардың) жергiлiктi атқарушы органдары, аудандық маңызы бар қалалардың, кенттердiң, ауылдардың (селолардың), ауылдық (селолық) округтердiң әкiмдерi жер учаскелерi меншiкке өтеусiз негiзде берiлетiн орталықтарды айқындау туралы уәкiлеттi органның шешiмi болған кезде ғана қабылдайды.
15. Республикалық маңызы бар қала мен астананың, ауданның (облыстық маңызы бар қаланың) жергiлiктi атқарушы органының, аудандық маңызы бар қаланың, кенттiң, ауылдың (селоның), ауылдық (селолық) округтiң әкiмiнiң жер учаскесiн меншiкке беру туралы шешiмiн алған орталықтар көрсетiлген шешiмдi алған сәттен бастап он жұмыс күнi iшiнде осы туралы уәкiлеттi органды жазбаша хабардар етедi.
16. Жер учаскесiн алған орталықтарға Қазақстан Республикасының заңнамасына сәйкес меншiк иелерiнiң құқықтары мен мiндеттерi берiледi және жыл сайын, 20 қаңтарға және 20 шiлдеге дейiн уәкiлеттi органды орталықтың жер учаскесiн мақсатқа сай және оны ұтымды пайдалану жөнiндегi қызметi туралы хабардар етедi.
17. Уәкiлеттi орган учаске бiр жыл iшiнде мақсатына сай пайдаланылмаса және (немесе) Қазақстан Республикасының заңнамасын бұза отырып пайдаланылса, жер учаскесi орналасқан орын бойынша облыстың (республикалық маңызы бар қаланың, астананың) жер ресурстарын басқару жөнiндегi аумақтық органына оны қайтып алу туралы ұсыныстар бередi.