Қазақстан Республикасының Үкіметі қаулы етеді:
1. Белгіленген тәртіппен Астана қаласын сумен жабдықтау және кәріздеу жобасын (бұдан әрі - жоба) қаржыландыру үшін сомасы 21 361 000 000 (жиырма бір миллиард үш жүз алпыс бір миллион) жапон иенінде келісім (шарт) жасасу нысанында Жапон Халықаралық Ынтымақтастық Банкінің қарызын тарту жолымен үкіметтік қарыз алу жүзеге асырылсын.
2. Жапониядағы Қазақстан Республикасының Төтенше және Өкілетті Елшісі Тілеухан Самарқанұлы Қабдрахмановқа Қазақстан Республикасы Үкіметінің атынан Кредит берушімен қарыз туралы келісім жасасуға уәкілеттік берілсін.
3. Қазақстан Республикасының Қаржы министрлігі үкіметтік сыртқы қарыз қаражаты түпкі қарыз алушыға - Астана қаласының әкіміне үкіметтік сыртқы қарыз туралы келісімге (шартқа) сәйкес келетін шарттарда Астана қаласының жергілікті бюджетіне республикалық бюджеттен кредит беру жолымен және жергілікті атқарушы органдардың қарыз алуын шектеу шеңберінде беріледі деп белгілесін.
4. Астана қаласының Әкімдігі:
Қазақстан Республикасының Қаржы министрлігімен бірлесіп айлық мерзімде қарызды өтеу мен қызмет көрсету және қарыз қаражатының пайдаланылуын есепке алу жөніндегі міндеттемелердің орындалуы туралы тиісті келісім жасассын;
тиісті қаржы жылына арналған жергілікті бюджетте қарызды өтеу және оған қызмет көрсету үшін тиісті қаражат көздесін;
жобаны іске асыруды қоса қаржыландыру үшін жергілікті бюджеттен қаражат бөлуді көздесін;
тартылатын қарыз қаражатының мақсатты және тиімді пайдаланылуын қамтамасыз етсін.
5. Осы қаулының орындалуын бақылау Қазақстан Республикасы Премьер-Министрінің бірінші орынбасары А.С.Павловқа жүктелсін.
6. Осы қаулы қол қойылған күнінен бастап күшіне енеді.
Қазақстан Республикасының
Премьер-Министрі